आन्दोलन जारी राख्ने पेट्रोलियम व्यवसायीको अडान, १५ दिनमा समाधान गर्न सरकारलाई संसदिय उपसमितिको निर्देशन
काठमाडौं । विहिबार बैठक बसेको उक्त उपसमितिले सरकारलाई १५ दिन भित्र पेट्रोलियम नोक्सानीको समस्याको दिर्घकालिन समाधान गर्न निर्देशन दिदै सो समयावधिसम्म पेट्रोलियम व्यवसायीलाई आन्दोलनका कार्यक्रम रोक्न निर्देशन दियो । पेट्रोलियम व्यवसायीलाई व्यवस्थापिका सांसद-उद्योग,वाणिज्य तथा उपभोक्ता हित सम्बन्ध उपसमितिले भोलीदेखि पेट्रोल खरिद सूचारु गर्न दिएको निर्देशन नमान्ने पेट्रोलियम व्यवसायीले बताएका छन् । पेट्रोलियम नोक्सानीको क्षतिपूर्ति नबढाएको विरोधमा विहिबारदेखि आन्दोलनरत पेट्रोलिय डिलर्स एशोसिएशनले माग पुरा नभएसम्म आन्दोलन फिर्ता नलिने अडान दोहोराएका हुन् । ‘माग पुरा नभएसम्म प्रधानमन्त्रीले भने पनि आन्दोलन रोक्दैनौं,’ एशोसिएशनका अध्यक्ष लिलेन्द्र प्रधानले भने । पेट्रोल जस्तो अत्यावश्यक वस्तुमा हड्ताल गर्न नमिल्ने उपसमितिका संयोजक सुभाष चन्द्र ठकुरीले बताए । ठकुरीले थप अध्ययनका लागि सरकारसँग सहमती जनाएको दुई दिनपछि पेट्रोलियम व्यवसायीले आन्दोलन सुरु गरेको आरोप लगाए । उनले भने, ‘यसले देशका सेवा प्रदायक निकाय उपभोक्ताप्रति कति उत्तरदायी छन् भन्ने प्रष्ट हुन्छ ।’ ‘तापक्रमका कारण पनि इन्धनमा घटबढ हुने गरेकाले प्राविधिक लस भएको हुनसक्ने अनुमान छ,’ उनले भने, ‘मौसमका आधारमा स्थलगत अध्ययन गर्ने आयल निगमको सञ्चालक समितिले राखेको प्रस्तावमा हस्ताक्षर गरेको पाइएको छ । तर पनि निराधाररुपमा पेट्रोलियम व्यवसायीले आन्दोलन गरेका छन् ।’ सरकारले इन्धन ढुवानीका क्रममा प्राविधिक रुपमा हुने परिमाण नोक्सानीको क्षतिपूर्तिको माग पुरा नगरेको भन्दै नेपाल पेट्रोलियक डिलर्स राष्ट्रिय एशोसिएशनले माग पुरा नभए साउन ३१ गतेदेखि देशभरमा पेट्रोलियम पदार्थको बिक्री वितरणमा पनि बन्द गर्ने चेतावनी दिएको छ । आयल निगम सँग पटक–पटक अनुरोध गर्दा पनि समस्या समाधान नभएकाले आन्दोलन शुरु गरेको एशोसिएशनले जनाएको छ । एशोसिएशनले प्राविधिक कारणबाट हराउने पेटोलियम पदार्थको पनि क्षतिपूर्ति पाउनुपर्ने लगायतका माग राखेका थियो । खरिद बन्द गर्नेसम्मका आन्दोलन २० साउनदेखि पम्पमा कालो झण्डा गाडेर आन्दोलन सुरु गरेका व्यवसायीले २६ साउनदेखि पेट्रोल खरिद नगर्ने, २९ गतेदेखि डिजल तथा मट्टितेल खरिद नगर्ने र ३१ गतेदेखि बिक्री वितरण पनि बन्द गर्ने चेतावनी दिएका छन् । व्यवसायीले चार हजार लिटर पेट्रोल ढुवानी गर्दा करिब ९९ लिटर र डिजेलमा ६० लिटरसम्मको लस हुने गरेको दाबी गरेका छन् ।
देश भरिनै जग्गा प्लटिङ कार्य रोक्न सरकारको निर्देशन, पारिवारिक अंशबण्डा गर्न ढोका खुला
काठमाडौं । सरकारले कृषि योग्य जमिनमा जग्गा प्लटिङ गर्न रोक लगाएको छ । खाद्य सुरक्षा र खाद्य सम्प्रभुताको संवैधानिक प्रत्याभूत गर्न तथा भूमिलाई खन्डिकरण हुनबाट रोक्न कृषियोग्य जमिनको प्लटिङ गर्न रोक लगाएको भूमिसुधार तथा व्यवस्था सचिव कृष्णप्रसाद देवकोटाले बताए । मन्त्रालयले भूमिसुधार ऐन २०२१ ले प्रत्यायोजन गरेर अधिकारको प्रयोग गर्दै निर्देशिकका जारी गरी कृषियोग्य जमिनमा प्लटिङ रोकेको हो । अहिले देशभरिका सुगमस्थानहरूमा जग्गा प्लटिङ गर्न पाउने व्यवस्था छ । जग्गा प्लटिङका कारण कृषि योग्य जमिन मासिदै गएको र सो कारण कृषि उत्पादन घटेको र ठूलो मूल्यको कृषि वस्तु समेत आयात गर्नु परेकोले कृषि योग्य जमिन खण्डकरण रोक्न प्लटिङ कार्यमा रोक लगाएको देवकोटाले बताए । तर, पारिवारिक अंशबन्डा हुँदा भने कृषियोग्य जमिन भए पनि कित्ताकाट गर्न पाइने छ । यो निर्देशिका जारी हुनुभन्दा अगाडि पल्टिङको लागि अनुमति लिएको र ५० प्रतिशत जमिन बिक्री भएकोमा प्लटिङका लागि भने बाधा नहुने देवकोटाले बताए । मन्त्रालयले कृषियोग्य जमिनको व्याख्या जग्गा नामजाँच ऐन २०१९ बमोजिम पुनः नामजाँच भएको क्षेत्र जग्गा नामजाँच नियमावली २०५८ को नियम २० अनुसार कृषि क्षेत्र उल्लेख भएका जग्गाहरु र पुनः नामजाँच हुन बाँकी रहेको क्षेत्रमा साविकमा नामजाँच हुँदा फिल्डबुक तथा श्रेस्ता पुर्जामा धनहरतर्फ अब्बल, दोयम, सिम र भिरपाखो तर्फ अब्बल र दोयम कायम रहेको जग्गा सम्झनुपर्ने पर्ने गरी व्यवस्था गरेको छ ।
सिद्धार्थ बैंकको नयाँ शाखा भक्तपुरको कमल बिनायकमा, शाखा सङ्ख्या ७२ पुग्यो
काठमाडौं । सिद्घार्थ बैंकले आफ्नो नयाँ शाखा भक्तपुरको कमल बिनायकमा सञ्चालन गरेको छ । बैंकले बिहीबार एक विशेष समारोहका बीच उक्त शाखा कार्यालयको औपचारिक उद्घाटन गरेको छ । सो शाखाको उद्घाटन भक्तपुर उद्योग बाणिज्य संघका अध्यक्ष कृष्ण प्रसाद अवाल र बैंकका प्रमुख कार्यकारी अधिकृत शम्भुनाथ गौतमले संयुक्त रुपमा गरेका हुन् । बैंकको सो शाखा कार्यालय मार्फत सम्पुर्ण बैंकिङ सेवाका साथमा एटिएम सेवा पनि उपलब्ध हुने छ । यस शाखा समेत बैंकले ७२ शाखा, २ एक्स्टेन्सन काउन्टर ९८ एटीएम, ७० शाखा रहित बैंकिङ्ग सेवा र ४५० भन्दा बढी पिओएस् मार्फत् ग्राहकहरुलाई बैंकिंग सेवा प्रदान गर्नेछ । आर्थिक वर्ष २०७३/०७४ को श्रावण मसान्तसम्म बैंकले १ अर्ब ४१ करोड रुपैयाँ खुद मुनाफा आर्जन गरेको बैंकद्धारा जारी विज्ञप्तिमा उल्लेख छ । सोहि अवधीमा बैंकको कुल निक्षेप ७७ अर्ब ३१ करोड रुपैयाँ र कर्जा लगानी ६७ अर्ब १७ करोड रुपैयाँ रहेको छ ।
नयाँ टिभिएस स्ट्राइकर १२५ अब नेपाली बजारमा, ब्राण्ड एम्बेस्डरमा निखिल उप्रेती
काठमाडौं । टिभिएस मोटर कम्पनीले आफ्नो नयाँ उत्पादन टिभिएस स्ट्राइकर १२५ बिहीबार देखि नेपाली बजारमा ल्याएको छ । जगदम्बा मोर्टसका प्रवन्ध निर्देशक शाहिल अग्रवाल तथा नायक निखिल उप्रेतीले उक्त टिभिएस स्ट्राइकर १२५ को सार्वजनिक गरेका छन् । जगदम्बा मोटर्स नेपालका लागि टिभिएस मोटर कम्पनीको आधिकारीक विक्रेता हो । टिभिएस मोटर कम्पनीका उपाध्यक्ष दिपक कुमार अग्रवालले टिभिएस स्ट्राइकर १२५ ले युवा नेपालीहरुको मागलाई पूर्ण रुपमा सन्तुष्ट गर्ने बताएका छन् । नेपाली बजारमा यस उत्पादनद्वारा टिभिएस मोटर कम्पनीको प्रभावहरु बलियो हुने छ कम्पनी विश्वास रहेकाे छ । कम्पनीका अनुसार कम इन्धन खपत र शक्तिको सही मिश्रण भएको टिभिएस स्ट्राइकर १२५ नेपाली बाटोमा उपयुक्त रहनेछ । फिचर्सले भरिपूर्ण टिभिएस स्ट्राइकर १२५ ले ग्राहकहरुको मन जित्ने पक्का भइसकेको छ । ईको थ्रष्ट इन्जिनयुक्त टिभिएस स्ट्राइकर १२५ ले ८००० आर. पि. एममा ८.१ के डब्लु शक्ति प्रदान गर्ने छ । यसको टोर्क ५५०० आर. पि. एममा १०.८ एन. एम. बताईएको छ। एक लिटरमा ६७ किलोमिटर माईलेज दिने यस बाइकलाई आफ्नो श्रेणीमा सर्वोत्कृष्ट मानिन्छ । बेग्लै ट्याङ्क आकार र रङ्गहरुको मिश्रणले यसको आकर्षण अझ बढाउँछन् । श्रेणीमै पहिलो एल. इ. डि. टेल ल्याम्प र फूल डिजिटल स्पीडोमिटर युक्त यस बाईकको व्याख्या गर्न लायक रहेको छ । साथमा, यसमा ट्युवलेस टायर, डुअल प्याडेड सीट, ह्याजार्ड ल्याम्प, पास बाई स्वीच, राटो पेटल फ्रन्ट डिस्क ब्रेक, एलमिनियम फुट पेग र उज्यालो हेडल्याम्प जडान गरिएको छ । आरामदायी यात्राको लागि हाइड्रोलिक स्प्रिङ्ग सस्पेन्सन तथा प्रेसर डाईकास्टेड एलुमिनियम फुटरेष्ट समेत यसमा पाउन सकिने कम्पनीले जनाएको छ । नेपाली बजारमा टिभिएस स्ट्राइकर १२५ को मूल्य १ लाख ७४ हजार ९०० रुपैयाँ तोकिएको छ । साथै, तीन रङ्गमा सो बाईक उपलब्ध हुने बताईएको छ ।
आवेदन दिएको झण्डै दस महिना पछि श्री एयरलाइन्सले पायो उडान अनुमति
काठमाडौं । श्री एयरलाइयन्सले उडानका लागि अनुमति पाएको छ । लामोसमयको रस्साकस्सीपछि नागरिक उड्डयन प्राधिकरणले श्री एयरलायन्सलाई नियमित उडानका लागि अनुमति दिएको हो । यो वायुसेवाले एओसीका लागि प्राधिकरणमा आवेदन दिएको झण्डै १० महिनापछि अनुमति पाएको हो । पछिल्लो समय डेड दशकदेखि हेलिकोप्टर उडान गरिरहेको श्री एयरलाइन्सले नियमित उडानमा आन्तरिक वायुसेवा प्रयोग गर्न चाहेको थियो । यो वायुसेवाले हेलिकोप्टरबाट फिक्स विंग्स ( नियमति उडानका पंखा जडिन जहाज) ल्याउन खोजेको थियो । यो कम्पनी संचलनमै भएपनि यसले नयाँ सरहको प्रक्रिया पूरा गर्नुपर्ने भएकोले समय लागेको पनि उड्डयन विभागको भनाइ छ । नेपालमा हवाई उडानको लागि प्राधिकरणबाट उडान अनुमति माग गरेको हेलिकोप्टर सेवा प्रदायक कम्पनी एभरेष्ट हेलिलाई करीब एक वर्ष उडान अनुमति दिएको थियो । पछिल्लो त्यस अघी अल्टिच्यूट हेलिकोप्टरले पनि ६ महिना भन्दा बढीको समय खर्चनु परेको थियो । यो वायुसेवाले गत भदौ २२ गते पर्यटन मन्त्रालयबाट लाइसेन्स पाएको थियो । नेपालमा श्रीले एमआई १७ नामक ठूला र एएस ३५० बी ३ नामक साना हेलिकोप्टर संचालन गरिरहेको छ । हेलिकोप्टरमा राम्रो सेवा गरेको अनुभवलाई नै जहाजमार्फत अन्तरिक र अन्तराष्ट्रिय उडानमा प्रयोग गर्ने योजना बनेको अनिल मानन्धरको भनाइ छ । काठमाडौं विमानस्थललाई आधार बनाएर माउन्टेन फ्लाइट, भन्द्रपुर, विराटनगर, भैरहवा, नेपालगन्ज र धनगढीसहितका शहरी क्षेत्रका विमानस्थल (ट्रङ्क रुटका) गन्तव्यमा उडान गर्ने योजना यो वायुसेवाको छ । आन्तरिक उडानका यी गन्तव्यमा उडान गर्न सीआरजे २०० नामका जहाजबाट उडान हुन्छ । देशभित्र उडान गर्न ५० र ७० सीटका क्षमतामा जहाज हेरिएको मानन्धरको भनाइ छ । उड्डयन नियम अनुसार कम्तिमा दुईवटा जहाज संचालन गर्नुपर्ने भएकोले एकैपटक दुईवटा र थप एक गरी दुइटै क्षेत्रमा तीनतीन वटा जहाज हुनेछ ।
नेपाली बुलेटआयात गर्न ग्यास उद्योगीको माग, समयमा नल्याए कात्तिकदेखि आपूर्तिमा समस्या आउने
काठमाडौं । नेपाली ग्याँस बुलेट सञ्चालनमा नआए आगामी कात्तिकदेखि आपूर्तिमा समस्या आउने निश्चित रहेको भन्दै ग्यास उद्योगीले भारतबाट नेपाली ग्यास बुलेट ल्याउन पहल गर्न नेपाल सरकारलाई आग्रह गरेको छ । नेपाली नम्बरका ग्यास बुलेट अहिलेसम्म सञ्चालनमा आउन नसकेकाले आगामी कात्तिक महिनापछि पूर्ण रुपमा ग्यास आपूर्तिमा अवरोध हुनसक्ने ग्यास उद्योगीले बताउछन् । गत कात्तिकदेखि भारतीय नम्बर प्लेटका ग्याँस ढुवानी नगर्ने सहमती भएको थियो । अनुमति पाएको एकवर्ष बितिसक्दापनि संचालनमा नआएपछि नेपाल एल.पि ग्यास उद्योग संघले नेपाली नम्बरका बुलेट संचालनका अघि बढाउन कुटनीतिक पहल गर्न परराष्ट्र मन्त्रालयलाई अनुरोध गरेको हो । गत वर्षको असार २७ गते नेपाल आयल निगमले ७७५ बुलेट खरिदका लागि स्विकृती प्रदान गरेको थियो । करिव दस महिना अगाडी नेपाली बुलेटहरु भारतीय एक्सप्लोसिभ विभाग, नागपुरबाट भारतीय एक्सप्लोसिभ सर्टिफिकेट नपाएर रोकिएका थिए । हालसम्म करिब चार सय थान बुलेट भारतमै रहेको ग्यास उद्योगीले जनाएका छन् । करिब एक वर्षदेखि नेपाली बुलेटमा ग्यास आयातको पहल मन्त्रालयस्तरबाट भए पनि काम हुन सकेको छैन । संघका सचिव लक्ष्मण प्रसाद महर्जनका अनुसार उद्योगीले चार थान बुलेटका लागि करिब साढे तीन अर्ब रुपैयाँ र ग्यास व्यवसायीको तर्फबाट पाँच अर्बको लगानी अलपत्र परेको छ । गत चैतमा व्यवस्थापिका सांसद, उद्योग वाणिज्य तथा उपभोक्ता हित सम्बन्ध समितिले नेपाली ग्याँस बुलेटको समस्या समाधान गर्न आपूर्ति मन्त्रालयलाई निर्देशन दिएको थियो । धेरैपटक पहल गर्दापनि कुनै ठोस प्रकृया नभएको संघले जनाएको छ । नेपालमा आजसम्म पनि विस्फोटक सम्बन्धी कुनै मापदण्ड नभएकाले सम्पूर्ण विस्फोटक सम्बन्धी सुरक्षा मापदण्ड भारतको पेट्रोलियम एण्ड एक्स्प्लोसिभ सेफ्टी अर्गनाइजेसन (पेसो) ले निर्माण गरेको मापदण्डलाई अनुसरण गर्दै आइरहेको छ । सम्पूर्ण नेपाली नम्बर प्लेटका ग्याँसहरु पेसोको मापदण्ड अनुसार नै निर्माण गरिएको उद्योगीको दाबी छ । नेपालमा अहिलेसम्म कोशी ग्याँस उद्योग प्रालिलाई मात्र नेपाली ग्याँस बुलेट सञ्चालनका लागि अनुमति दिएको छ । भारतको मोटर भेहिकल सम्बन्धी ऐनमा पनि नेपाली बुलेटका लागि कुनै प्रावधान नभएको उद्योगीले बताए । १९६० को समझदारीमा पनि नेपाली नम्बर प्लेटका गाडीहरु भारतीय भूमिमा सञ्चालन गर्न पाउने अनुमति रहेकाले नेपाली ग्याँस बुलेट सञ्चालन गर्न दिनुपर्ने उद्योगीको माग छ । उक्त बुलेट सञ्चालनमा नआए नेपाल भारत बीचको व्यापार घाटा पनि करिब तीन सय ५० रुपैयाँ घट्ने महर्जनले बताए । उनका अनुसार नेपालको आफ्नै रिफाईनरी तथा भण्डारण नभएकाले एलपि ग्याँसको आपूर्ति अत्यावश्यक रहेको छ ।
टाटा मोटर्सको सबैभन्दा ठूलो शोरुम थापाथलीमा, ४००० वर्ग फिटमा स्थापित
काठमाडौं । नेपालका लागि टाटा मोटर्सको अधिकृत बिक्रेता सिप्रदी ट्रेडिङ प्रा.लि. ले थापाथलीमा आफ्नो नयाँ शोरुमको उद्घाटन गरेको छ । ४००० वर्ग फिट क्षेत्रमा फैलिएको उक्त शोरुम नेपालकै सबैभन्दा ठूलो अटोमोबाइल शोरुमको रुपमा स्थापित भएको छ । उक्त शोरुम उद्घाटन समारोहमा टाटा मोटर्स्का अन्तर्राष्ट्रिय व्यापार प्रमुख जोनी ओम्मेनले काठमाडौंको केन्द्रबिन्दुमा अवस्थित यस शोरुममा रहेका जेष्ट, बोल्ट, स्ट्रोम, टियागो र टिगोर जस्ता विभिन्न रेञ्जका गाडीहरु ग्राहकवर्गहरुलाई उचित मूल्यमा उपलब्ध गराउने बताएका छन् । नयाँ शोरुमको उद्घाटन गर्दै सिप्रदी ट्रेडिङ्ग प्रा.लि. का सिइओ राजनबाबु श्रेष्ठले भने, “यस नयाँ शोरुम मार्फत हामीले हाम्रो सेवा ग्राहकवर्गहरु बीच फैल्याउन पाएकोमा हामी निकै उत्साहित छौं । यस नयाँ शोरुमको उद्घाटनसँगै हामीले हाम्रा ग्राहकवर्गहरुलाई सहज, सरल र सुलभ सेवा र अनुभव प्रदान गर्न सफल हुनेछौं ।” यस नयाँ शोरुम हप्ताको ७ दिन, बिहान ९ बजे देखि रातीको ९ बजेसम्म खुल्ला रहेने कम्पनीले जनाएको छ । जहाँ टाटा मोटर्सको प्यासेन्जर भेकल्स्का सम्पूर्ण रेञ्जहरु उपलब्ध हुनेछन् । कम्पनीको यस थप नयाँ शोरुम सहित अब देशभर टाटा मोटर्सको २० प्यासेन्जर गाडीका शोरुम र २४ सर्भिस केन्द्रहरु रहेका छन् ।
ग्लोबल आइएमई बैंकको नयाँ एटिएम सेवा ठमेलमा
काठमाडौं । ग्लोबल आइएमई बैंकले काठमाडौंको पर्यटकिय नगरी ठमेलमा नयाँ एटिएम सेवा थप गरेको छ । ठमेल घुम्न आउने आन्तरिक तथा बाह्य पर्यटकहरुलाई लक्षित गर्दै बैंकले ठमेल सातघुम्ती स्थित होटल गरुडामा रहेको एटिएम लोउङ्गि बाट आफ्नो एटिएम सेवा सुरु गरेको हो । नयाँ एटिएम सेवा थप भएसंगै ग्लोबल आइएमई बैंकको एटिएम संख्या ११६ पुगेको छ । सबै क्षेत्र र वर्ग सम्म बैंकिङ्ग सेवाको पहुँच पुर्याउने उद्देश्यले बैंकले ११२ वटा शाखा ५ वटा एक्सटेन्सन काउण्टर, १४ वटा राजश्व संकलन काउण्टर, ११६ वटा एटिएम, ४६ वटा शाखारहित बैंकिङ्ग सेवा मार्फत आफ्ना ७ लाख भन्दा बढि ग्राहक माझ सेवा प्रदान गर्दै आइरहेको छ ।
