३० रुपैंयाँको इन्धन खर्चेर आफ्नै मोटरसाइकल/स्कुटरमा अब गुड्नुस १२० किलोमिटर
काठमाडौं । न पेट्रोल हाल्नुपर्ने चिन्ता न महंगो मूल्य । ३० रुपैंयाँको बिजुलीले चार्ज गर्नुस अनि गुडाउनुस १२० किलोमिटर । सुन्दा अपत्यारिलो लाग्ने यो कुनै दन्त्य कथा होइन् । एउटा विद्युतिय मोटरसाइकल र स्कुटरको सत्य हो । अझै अचम्म लाग्ने तथ्य यो छ कि २ बर्षका लागि मर्म खर्च जम्मा ३ हजार मात्रै । मोटर साइकल र स्कुटरको महंगो खरिद मूल्य, आकाशिँदो पेट्रोलको भाउ, थेग्ने नसक्ने सर्भिस शुल्कले हैरान हुनुभएको छ भने अब विद्युतिय सवारी तर्फ ध्यान दिनुस् । अष्ट्रेलियाको भिमोटो कम्पनीले ३० रुपैयाँको विद्युतले चार्ज गरेर १२० किलोमिटरसम्म गुड्ने मोटरसाइकल र स्कुटर नेपाली बजारमा ल्याइसकेको छ । त्यो पनि सस्तो मूल्यमा र २ वर्षसम्मको मर्मत खर्च बढीमा ३ हजार मात्रै लाग्छ । पेट्रोलबाट चल्ने मोटरसाइकल र स्कुटरको न्युनतम मूल्य १ लाख ५० हजार रुपैयाँ पर्छ । तर भिमोटोले उत्पादन गरेको विद्युतीय मोटरसाइकल र स्कुटरको मूल्य न्युनतम १ लाख १० हजार रुपैयाँ छ । ३० रुपैयाँको चार्ज गर्दा १२० किलोमिटर गुड्छ । ब्याट्री चार्ज गर्न ३ घन्टा देखी ६ घन्टासम्म लाग्छ । दिउँसोभरी गुडाएर रातभरी व्याट्री चार्जमा राख्न सकिन्छ । पेट्रोलबाट चल्ने बाइक र स्कुटरमा ५० किलोमिटर चलाउँदा १ लिटर पेटोल प्रयोग हुन्छ । अहिले पेट्रोलको प्रतिलिटर ११० रुपैयाँ छ । १२० किलोमिटर गुड्दा पेट्रोलबाट चल्ने बाइक र स्कुटरले झण्डै ३०० रुपैयाँको इन्धन खपत गर्छ । तर इलेक्ट्रिक भिमोटोले ३० रुपैयाँमा त्यत्ति गुड्ने भिमोटो नेपालका सञ्चालक सुरेन्द्र मान्नधर बताउँछन् । विश्व बजारमा नै इलेक्ट्रोनिक सवारी साधनहरुको माग बढिरहेको छ । भारतले सन् २०३० सम्म तेलबाट चल्ने सवारीसाधनहरुको विकल्पका रुपमा इलेक्टोनिक सवारीसाधनमा जोड दिएकाले यसको माग बढेको उनको भनाई छ । भिमोटोले २ वर्षसम्मका लागि कम्पनीले वारेन्टी दिएर बिक्री गरिरहेको छ । चार्ज बाहेक यो कम्पनीको बाइक र स्कुटर सञ्चालनको २ वर्षसम्म ३ हजार रुपैयाँ मात्रै खर्च हुने बताएको छ । यसले बढिरहेको प्रदूषणलाई पनि नियन्त्रण गर्छ । डिजेल र पेट्रोलबाट सञ्चालन हुने बाइक र स्कुटर भन्दा विद्युतीय बाइक र स्कुटरमा भन्सार धैरै नै सस्तो छ । विद्युतीय सवारी साधनमा २५ प्रतिशत मात्रै सरकारले कर उठाउने गरेकाले मूल्य अन्यको भन्दा सस्तो रहेको सञ्चालक मानन्धरको भनाई छ । नेपालमा पनि सन् २०२० सम्म उपत्यकामा सञ्चालन हुने कुल सवारी साधनको २५ प्रतिशत विद्युतीय सवारी साधन सञ्चालनमा ल्याइने भने पनि कार्यन्वयन हुन नसकेको उनी बताउँछन् । “नाकाबन्दी सकियो, विद्युतीय सवारी साधनको चर्चा पनि क्रमशः ओझेल पर्न थाल्यो । सरकारी नेतृत्व नै उदासीन देखियो” मानन्धर भन्छन् । वायु प्रदूषण बढ्दै गएपछि राष्ट्रिय योजना आयोगले विद्युतीय सवारी साधन, आवश्यक उपकरण, व्याट्री तथा पार्टपुर्जामा लाग्दै आएको भन्सार शुल्कलाई शून्य प्रतिशतमा झार्न र पेट्रोल, डिजलबाट चल्ने सवारी साधनलाई विद्युतीय सवारी साधनमा रूपान्तरण गर्न वैधता प्रदान गर्ने लगायतका सुझाव दिइएको थियो । तर अहिले त्यो कुरा हराएको उनको गुनासो छ । भिमोटोको काठमाडौं, भक्तपुर, ललितपुर, पोखरा र जनकपुरमा बिक्री केन्द्र खुलेका छन् । कुनै स्कुटर वा बाइक बिग्रियो भने बिगे्रको ठाँउमा नै गएर कम्पनीले मर्मत गरिदिने व्यवस्था भएको मानन्धरले बताए । भिमोटो नेपालको बाइक र स्कुटरको मूल्य १ लाख १० हजार देखी २ लाख ७४ हजार रुपैयाँसम्मको छ । भिमोटो टि १.५ स्कुटरको मूल्य १ लाख १० हजार, भिमोटो एलएन स्कुटरको मूल्य १ लाख ३१ हजार, भिमोटो इम्याक्स् स्कुटरको मूल्य २ लाख १६ हजार, इकोटर स्कुटरको मूल्य २ लाख ४५ हजार र भिमोटो भिक्ड्राकस स्कुटरको मूल्य २ लाख २६ हजार रुपैयाँ तोकिएको कम्पनीले जनाएको छ । यस्तै, भिमोटो सोको टिएस बाइकको मूल्य २ लाख ४९ हजार र भिमोटो सोको सिटी बाइकको मूल्य २ लाख ७४ हजार रुपैयाँ रहेको कम्पनीले जनाएको छ ।
अस्पतालमा औषधिको अभाव, डाक्टरले प्रयोग गर्ने पञ्जासमेत बिरामीले किन्नुपर्ने
धादिङ । जिल्ला अस्पतालमा औषधिको अभाव भएपछि बिरामी आफैँले औषधि खरिद गर्नुपर्ने अवस्था आएको छ । डाक्टरले प्रयोग गर्ने पञ्जा, निःशुल्क वितरण गर्ने औषधि तथा अन्य सामग्री नभएपछि सेवाग्राहीले नै खरिद गरेर जिल्ला अस्पतालमा उपचार गराउनुपर्ने बाध्यता रहेको सेवाग्राहीले गुनासो गरेका छन् । जिल्ला अस्पतालमा उपचारका लागि पुगेकी पार्वती लम्सालले यसअघि अस्पतालले नै खरिद गर्ने गरेको आइभि सेट, सूई र डाक्टरले प्रयोग गर्ने पञ्जासमेत बिरामीले खरिद गर्नुपर्ने अवस्था आएको बताए। बिरामी लिएर जिल्ला अस्पताल जाँदा अस्पतालका डाक्टरले आफैँले उपचार सामग्री र औषधि खरिद गर्नुपर्ने बताउने गरेको राजन श्रेष्ठको भनाइ छ । सरकारले जिल्ला अस्पतालबाट ७० किसिमका औषधि निःशुल्क वितरण गर्ने जनाएपनि अत्यावश्यक औषधिसमेत सकिएपछि अन्यौलमा परेको अस्पतालका सूचना अधिकारी कृष्णलाल उप्रेतीले बताए । नेपाल सरकारले निःशुल्क औषधि खरिद गर्नका लागि दिँदै आएको रु आठदेखि १० लाख रकम नपुग हुँदा निःशुल्क सेवा प्रभावकारी हुन सकेको छैन । जिल्ला अस्पतालमा दैनिक आउने करीब २०० बिरामीको परीक्षण गर्दा चिकित्सकले प्रयोग गर्ने सामग्री र र निःशुल्क औषधिका लागि करिब ७० लाख रुपैयाँ आवश्यक पर्ने भए पनि सरकारले उपलब्ध नगराउँदा निःशुल्क स्वास्थ्य सेवा प्रभावित हुने गरेको हो । रासस
मुक्तिनाथ विकास बैंकले एकैदिन खोल्यो ५ नयाँ शाखा
काठमाडौं । मुक्तिनाथ विकास बैंकले एकैसाथ ५ वटा नयाँ शाखा सञ्चालनमा ल्याएको छ । बैंकले शाखा सञ्जालहरु विस्तार गर्ने क्रममा महोत्तरीको बर्दीबास, रौतहटको चन्द्रनिगाहपुर, सुनसरीको इटहरी तथा इनरुवा र झापाको दमकमा गरी थप पाँच शाखा कार्यालय विस्तार गरी सञ्चालनमा ल्याएको हो । बर्दीबास शाखाको उद्घाटन उद्योग वाणिज्य संघ, बर्दीबासका अध्यक्ष प्रहल्लाद क्षेत्री, रौतहटको प्रतिनिधि सभाका सदस्य देवप्रसाद तिमल्सिना, ईटहरीको उद्घाटन ईटहरी उद्योग वाणिज्य संघका वरिष्ठ उपाध्यक्ष शैलेसकुमार विष्ट, इनरुवाको उद्घाटन प्रदेशसभा सदस्य राजिब कोइराला तथा दमक शाखाको उद्घाटन दमक नगरपालिका मेयर रोमनाथ ओलीले गरेका छन् । यसका साथै, बैंकले ९५ वटा शाखा, १५ वटा एटीएम र ३ लाख ७५ हजार ग्राहकलाई आधुनिक बैंकिङ्ग, लघुवित्त बैंकिङ्ग र ग्रामीण बैंकिङ्ग सेवाहरु प्रदान गर्दै आएको छ ।
केएल मोबाइल मेलामा एउटा मोबाइल किन्दा अर्को सित्तैमा
काठमाडौं । चाबहिल स्थित केएल मोबाइल हबमा जारी मोबाइल मेलामा एउटा मोबाइल किन्दा अर्को मोबाइल सित्तैंमा पाइने भएको छ । जिरो डाउनपेमेन्टका साथै शुन्य प्रतिशत ब्याजदरमा किस्ताबन्दीमा जुनसुकै ब्राण्डका मोबाईल उपलब्ध गराउने योजना सहित मेला सञ्चालन भैरहेको छ । चाबहिलको के एल टावरमा रहेको के एल मोबाइल हबले आफ्नो पहिलो बार्षिकत्सवको अवसरमा मेला आयोजना गर्दै अफर माथि अफरमा सेवाग्राहीलाई लक्षित गर्दै मोबाइल मेला सञ्चालन गरेको हो । एउटा मोबाइल किन्दा अर्को एउटा मोबाइल सित्तैंमा पाइने योजना मेलाको आकर्षण बनेको छ । जेडटिई ब्राण्डका एल फाइभ प्लस तथा ब्लेड एस सेभेन र लेनेभोको के फोर नोट मोबाइल किन्दा अर्को मोबाइल सित्तैमा उपलब्ध हुने मोबाइल हबका निर्देशक संगम राईले बताए । त्यसैगरी मोबाइलको खरिदमा ५० प्रतिशतसम्म छुटको व्यवस्था समेत गरिएको छ । मोबाइल हबका प्रबन्ध निर्देशक अलाइभ ग्लाइडरका अनुसार लेनोभोको के फाइभ नोट ५० प्रतिशत छुटमा किन्न सकिन्छ । एमआई फाइभ एसमा ४० प्रतिशत छुटका साथै एक्सचेञ्ज अफर पनि उपलब्ध छ । एमआई फोरमा ३५ प्रतिशत छुटका साथै एक्सचेञ्ज अफर लागू हुने ग्लाइडरले जानकारी दिए । यसैगरी मोबाइल मेलामा जुनसुकै ब्राण्डका जुनसुकै मोबाइल शुन्य प्रतिशत डाउन पेमेन्टका साथै शुन्य प्रतिशत ब्याजदरमा किस्ताबन्दीमा खरिद गर्न सकिने छ । ग्राहकले मोबाइलको ब्राण्ड र मूल्य अनुसार ६ महिना, १ वर्ष र १८ महिना अवधिको किस्ताबन्दीमा मोबाईल खरिद गर्न सक्ने छन् । केही ब्राण्डका मोबाइलहरु शुन्य प्रतिशत डाउन पेमेण्टमा समेत किन्न सकिने मेलामा १० देखि ५० प्रतिशतसम्मको डाउन पेमेण्टमा मोबाइल किन्न सकिन्छ । शुन्य प्रतिशत डाउनपेमेण्ट बाहेकका उल्लेखित सबै अफरहरु हरेक मोबाइलको खरिदमा लागू हुने मोबाइल हबले जनाएको छ । अफरहरु केएल मोबाइल हब चाबहिलका साथै एप्पल वल्र्ड मोबाइल, मर्कन्टाइल प्लाजाको पहिलो तल्ला पसल नम्बर एफ ५ दरबारमार्ग, सिटिभि मोबाइल ताम्राकार कम्प्लेक्स, पसल नम्बर ११३ न्युरोड तथा द वल्र्ड भिजन मोबाइल सिटिसी मल चौथो तल्लामा पनि उपलब्ध हुनेछ । ग्राहकले किस्ताबन्दीमा मोबाईल खरिद गर्न आफ्नो नागरिकता, रोजगारीताको प्रमाणपत्र र आम्दानी विवरणको कागजात उपलब्ध गराउनुपर्ने हुन्छ । मोबाइल मेला अवलोकन गर्नेहरुलाई आकर्षक गिफ् ह्याम्परका साथै गोलाप्रथाबाट प्रत्येक दिन एउटा मोबाइल बितरण गरिनेछ । विश्व बजारमा पाइने २५ भन्दा बढी चर्चित ब्राण्डका विभिन्न मोडलका मोबाइलहरु मेबाइल हबमा उपलब्ध छन् ।
नेपाल र बंगलादेशबीच ऊर्जामा लगानी सम्वन्धी समझ्दारी, नेपालबाट ५०० मेगावाट बिजुली किन्ने
काठमाडौं । बंगलादेशले नेपालको जलविद्युतमा लगानी गर्ने भएको छ । जलविद्युतमा लगानी गर्ने विषयमा नेपाल र बंगलादेशबीच समझ्दारीपत्र (एमओयु) मा हस्ताक्षर भएको छ । नेपालको तर्फबाट जलस्रोत, ऊर्जा तथा सिंचाइ मन्त्री वर्षमान पुन र बंगलादेशका विद्युत, ऊर्जा तथा खजिन स्रोत राज्यमन्त्री नरसुल हमिदले एमओयुमा हस्ताक्षर गरेका छन् । बंगलादेशका लगानीकर्ताले नेपालीसंगको साझेदारीमा ऊर्जा विकासमा संयुक्त रुपमा लगानी गर्ने भएका छन् । यसका लागि प्रसारणलाइन जोड्ने लगायत विषयमा समझदारी भएको छ । बंगलादेशले ९०० मेगावाटको माथिल्लो कर्णाली आयोजनाबाट ५०० मेगावाट बिजुली खरिद गर्नका लागि सहमति गरेको छ । पछिल्ला वर्षमा बंगलादेशले नेपालको जलविद्युतमा लगानी गरेर बिजुली किन्ने तयारी गरेको छ । नेपालको जलविद्युतमा भारत र चीनपछि बंगलादेश सहभागी भएको छ । सो अवसरमा बंगलादेशका राज्यमन्त्री हमिदले एमओयुबाट ऊर्जा विकासमा कोशेढुङा कायम भएको बताएका छन् ।
लाइफ इन्स्योरेन्स कर्पोरेशनले ३६ प्रतिशत बोनस दिने, पुँजी एक अर्ब ८१ करोड नाघ्ने
काठमाडौं । लाइफ इन्स्योरेन्स कर्पोरेशन(नेपाल) लिमिटेडले ३६ प्रतिशत बोनस सेयर दिने भएको छ । साथै, इन्स्योरेन्सले कर प्रयोजनको लागि १.८९४७४ प्रतिशत नगद लाभांश दिने प्रस्ताव गरेको छ । उक्त प्रस्ताव गत बिहीबार बसेको कम्पनी सञ्चालक समितिको बैठकले गरेको हो । बैठकले गत आवको मुनाफाबाट हाल कायम रहेको चुक्ता पुँजीको सो मात्राको बोनस दिने निर्णय गरेको हो । हाल कम्पनीको चुक्ता पुँजी एक अर्ब ३३ करोड रुपैयाँ रहेको छ । ३६ प्रतिशत बोनस पछि कम्पनीको चुक्ता पुँजी एक अर्ब ८१ करोड रुपैयाँ नाघ्ने छ । समितिको प्रस्तावलाई बीमा समितिले स्वीकृति तथा कम्पनीको आगामी वार्षिक साधारणसभाले पारित गरेपछि मात्रा लगानीकर्ताले सो मात्राको बोनस पाउने छन् ।
सिटिजन बैंकको एफपीओ बाँडफाँड, ४६ हजार ३७६ ले १० कित्ता पाए
काठमाडौं । सिटिजन बैंकको थप निष्कासन (एफपीओ) आज शुक्रबार बाँडफाँड भएको छ । गोलाप्रथा गर्दा ४६ हजार ३७६ जनाले १० कित्ता दरले एफपीओ पाएका छन् । यस्तै ६ जनालाई ११ कित्ताका दरले परेको छ । माग भन्दा १४ गुणा बढी आवेदन परेपछि गोलाप्रथाबाट एफपीओ बाँडफाँड गरिएको हो । कुल ६२ हजार ७८२ आवेदकबाट ६१ लाख ५ हजार ६३० कित्ता एफपीओ खरिदका लागि आवेदन परेको थियो । बैंकले प्रतिकित्ता १०० रुपैयाँ प्रिमिमय थप गरी प्रतिकित्ता २०० रुपैयाँमा ४ लाख ६३ हजार ८२६ कित्ता एफपीओ निष्काशन गरेको हो । बैंकले संस्थापक साधारण शेयर अनुपात ५१ः४९ प्रतिशत कायम गर्न एफपीओ निष्काशन गरेको हो । पछिल्लो समयमा सिटिजनको मात्र एफपीओ माग भन्दा १४ गुणा बढी आवेदन परेको छ । नेपाल बैंकको एफीओ बिक्री हुन सकेन । यस्तै एनएमबी बैंकको एफपीओ बल्लतल्ल बिक्री भएको थियो ।
त्रिपुरेश्वर-कलंकी-नागढुंगा र चावहिल-जोरपाटी-साँखु सडक यथास्थितीमै कालोपत्रे
काठमाडौं । सरकारले त्रिपुरेश्वर-कलंकी-नागढुंगा र चावहिल-जोरपाटी-साँखु सडक यथास्थितीमै कालोपत्रे गर्ने निर्णय गरेको छ । सरकारले यस्ताे निर्णय गरेपछि सडक विस्तार आयोजनाले सोही बमोजिम कार्ययोजना समेत तयार पारिसकेको छ । सडक विस्तार सम्बन्धमा सर्वाेच्च अदालतको निर्णय, नागरिकले भोग्नु परेको सास्ती लगायतका कारण देखाई साउन १० गते बसेको मन्त्रिपरिषद बैठकले यथास्थितिमै सडक कालोपत्रे गर्ने निर्णय गरेको थियो । ‘मन्त्रीपरिषदको निर्णय बमोजिम सडक कालोपत्रे गर्ने योजना बनाउन हामीले सम्बन्धित ठेकेदारहरुलाई परिपत्र गरिसकेका छौं, चालु आर्थिक बर्षभित्र उपलब्ध चौँडाईमा कालोपत्रे भैसक्छ’, सडक विभागको सडक विस्तार आयोजनाका सूचना अधिकारी विश्वविजय लाल श्रेष्ठले विकासन्युजसँग भने । त्रिपुरेश्वर–कलंकी–नागढुंगा सडक १२.४८ किलोमिटर लम्बाईको छ । त्यस्तै, चावहिल–जोरपाटी–साँखु–सडक पनि यथास्थितीमै कालोपत्रे हुँदैछ । सो सडक खण्ड पनि १२.५० किलोमिटर लामो नै रहेको छ ।यी दुई सडकको कुल लम्बाई २४.९८ किलोमिटर छ तर यसमा २७ सय ३५ वटा अवरोध रहेका छन् । त्रिपुरेश्वर-कलंकी-नागढुंगा सडक खण्डमा १ हजार १४९ वटा अवरोध रहेका छन् । त्यस्तै, चावहिल–जोरपाटी–साँखु सडकमा १ हजार ५ सय ८६ वटा अवरोध रहेका छन् । २०७४ असोज २ गते सर्वाेच्च अदालतको फैसला र त्यसको पुर्ण पाठले सडक विस्तार अभियानमा झनै समस्या थपिदिएपछि सरकारले यथास्थितीमै कालोपत्रे गर्ने निर्णय गरेको भौतिक पूर्वाधार तथा यातायात मन्त्री रघुबिर महासेठले बताए । उनै प्रस्तावमा मन्त्रीपरिषदले त्रिपुरेश्वर कलंकी नागढुंगा र चावहिल जोरपाटी साँखु सडक यथास्तितिमै कालोपर्ने गर्ने निर्णय गरेको थियो ।१५ दिनभित्र यी दुबै खण्डलाई हिलो धुलो र खाल्डाखुल्डी मुक्त बनाउन निर्देशन दिईसकेका छन् ।
