अख्तियारले जम्मा गर्यो राज्यकोषमा ४१० बिघा जमिन र साढे ४० कराेड रुपैंया, ४२६ जना जेलमा
काठमाडौं । अख्तियार दुरुपयोग अनुसन्धान आयोगले सोमबार आफ्नो २८ औं वार्षिक प्रतिवेदन राष्ट्रपति समक्ष बुझाएको छ । आयोगका प्रमुख आयुक्त नविनकुमार घिमिरेले राष्ट्रपति विद्यादेवी भण्डारी समक्ष प्रतिवेदन बुझाएका हुन् । आयोगले आर्थिक वर्ष २०७४\०७५ मा ४२६ जनाबाट ४० करोड ५५ लाख ५९ हजार रुपैंया बिगो उठाएको छ । यस्तै जमिनतर्फ ४१० बिघा १३ कठ्ठा १२ धुर जमिन सरकारको नाममा कायम गरेको हो । त्यसैगरी ५३ रोपनी ६ जना जमिन सरकारको नाममा कायम भएको प्रतिवेदनमा उल्लेख छ । अख्तियारमा सबैभन्दा बढी शिक्षा क्षेत्रमा उजुरी परेको छ । प्रतिवेदन अनुसार शिक्षा क्षेत्रमा १८.३२ प्रतिशत, संघीय मामिलामा १८.०२, भूमिमा ६.४८, वनमा ४.४८, प्रशासनमा ४.१३, स्वास्थ्यमा ४.३७, गृहमा ४.१३, यातायातमा २.२८, अर्थमा २.५९ र अन्य क्षेत्रका ३८.८ प्रतिशत उजुरी परेको थियो । गत आर्थिक वर्षमा आयोगमा १३ हजार १३, मातहतको कार्यालयहरुमा गरी कुल १९ हजार ४८८ उजुरीहरु परेका थिए ।
जलविद्युत् लगानी तथा विकास कम्पनीले १०% शेयर लाभांश दिने
काठमाडौँ । सरकारी स्वामित्वको जलविद्युत् लगानी तथा विकास कम्पनी लिमिटेडले आफ्ना शेयरधनीलाई दश प्रतिशत शेयर लाभांश वितरण गर्ने भएको छ । कम्पनीले चुक्ता पूँजीको दश प्रतिशत अर्थात् एक अर्ब बराबरको शेयर लाभांश वितरण गर्ने प्रस्ताव गरेको छ । सो प्रस्तावअनुसार शेयर लाभांश वितरण गर्दा लाग्ने कर बराबर हुन आउने २१ करोड ५२ हजार ६३१ बराबरको नगद लाभांश समेत प्रदान गर्ने भएको छ । तर सो प्रस्तावलाई यही पुस ३० गते आयोजना गरिएको सातौँ वार्षिक साधारणसभाले पारित गर्नुपर्नेछ । यस्तै कम्पनीले चुक्ता पूँजीको एक बराबर एकको दरले हकप्रद शेयर बिक्री गर्ने निर्णय यसअघि नै गरिसकेको छ । हाल कम्पनीको कूल चुक्ता पूँजी दश अर्ब रहेको छ । त्यसमा ८० प्रतिशत सरकारी स्वामित्वका संस्थाको रहेको छ भने २० प्रतिशत सर्वसाधारणको लगानी रहेको छ । कम्पनीले हालसम्म विभिन्न १४ आयोजनामा रु आठ अर्ब माथि लगानी गरेको छ । हकप्रद शेयर बिक्री पछि कम्पनीको पूँजी बढेर २२ अर्ब पुग्नेछ । अघिल्ला आर्थिक वर्षहरूमा कम्पनीले पाँच प्रतिशतका दरले नगद लाभांश दिँदै आएको थियो ।
नेप्सको सञ्जालमा अब युनियन पे चिप कार्ड प्रयाेग
काठमाडौं । युनियन पे इन्टरनेशनल (युपिआई) द्धारा जारी चिप पद्धतिमा आधारित कार्डहरु नेपाल इलेक्ट्रोनिक पेमेन्ट सिस्टम्सको सञ्जालमा संचालित एटिएम तथा पोस मेसिनहरुमा प्रयोग गर्न सकिने भएको छ । नेप्स, १६ वटा बैंक तथा वित्तीय संस्थाहरुद्धारा संस्थापित एवं संचालित, पेमेन्ट कार्ड इन्डष्ट्री डाटा सेक्यूरिटी स्ट्याण्डड र पिसिआई पिन सेकुरेटी प्रमाणित कम्पनी रहेको छ । चिप पद्धतिमा आधारित कारोवारहरु म्याग्नेटिक् पद्धतिमा आधारित कारोवार भन्दा बढि सुरक्षित र भरपर्दो हुन्छन् । नेप्सले चिपमा आधारित युनियन पे कार्ड जारी गर्नको लागि बैंक तथा वित्तीय संस्थाहरुसँग सहकार्य गर्ने योजना अगाडि सारेको छ । उक्त कम्पनी बैंक तथा वित्तीय संस्थाहरुको लागि इलेक्ट्रोनिक भुक्तानी सेवा प्रदान गर्ने साझा प्लेटफर्मको रुपमा विस्तारित हुँदै आएको छ । यस कम्पनीले आफ्ना सदस्य बैंक तथा वित्तीय संस्थाहरुलाई भिसा कार्ड तथा युनियन पे कार्ड सेवाको लागि होस्टिङ्ग र स्विचिङ्गको सेवा प्रदान गरेको छ ।
नवकान्तिपुर बहुउद्देश्यीय सहकारीद्वारा एटीएम सेवा
काठमाडौं । नवकान्तिपुर बहुउद्देश्यीय सहकारी संस्थाले एटिएम सेवाको शुभारम्भ गरेको छ । संस्थाको जग्गा परिसर गौशलामा उक्त एटीएमको उद्घाटन संस्थाका अध्यक्ष शिव प्रसाद सिटौलाले गरेका छन् । यो एटीएम कार्ड संस्थाका सदस्यहरुलाई पुस मसान्तसम्म निःशुल्क प्रदान गरिने संस्थाका का.मु. प्रमुख कार्यकारी अधिकृत हरिप्रसाद पाण्डेले जानकारी दिएका छन् । हाल देशका विभिन्न बैंक वित्तीय संस्थाका गरी एससीटी नेटवर्कका नेपालभर रहेका २ हजार भन्दा बढी एटीएम मेसिनहरु सञ्चालनमा रहेका छन् । आफ्ना सदस्यहरुलाई प्रविधि मैत्री छिटो, छरितो र प्रभाकारी सेवा प्रदान गर्ने उद्देश्यले यो सेवा सुरु गरिएको संस्थाले जानकारी दिएको छ । २१ औँ बार्षिकोत्सव मनाएको संस्थाले छुट्टै ‘एप’ समेत सार्वजनिक गरिसकेको छ । संस्थामा जगेडा तथा अन्य कोषहरु गरी रु. १२ करोड ५८ लाख २५ हजार ७०१ रहेको छ । सञ्चालन बचत (मुनाफा) रु. ४ करोड ३३ हजार ६३४ रहेको संस्थाले आफ्ना सदस्यहरुलाई १८ प्रतिशतको दरले लाभांश दिएको छ । भने चुक्ता पूँजी रु. ६ करोड १८ लाख ९३ हजार ८ सय रहेको संस्थाको कुल निक्षेप रु. २ अर्ब ५ करोड ८९ लाख ८५ हजार २८८ रहेको छ भने कर्जा लगानी रु. १ अर्ब २४ करोड ११ लाख ३० हजार ८१७ रहेको छ ।
१५ कम्पनीले एकैदिन साधारणसभा बाेलाए, १२ वटा वाणिज्य बैंक पछाडि
काठमाडौं । नेप्सेमा सूचिकृत अधिकांश कम्पनीहरु वार्षिक साधारणसभा गर्ने हतारोमा देखिएका छन् । कम्पनी कानुन अनुसार पुस मसान्तसम्ममा सबै कम्पनीले वार्षिक साधारणसभा (एजीएम) गर्नुपर्छ । पुस मसान्तसम्म साधारणसभा नगर्ने कम्पनीले पुँजीकाे अनुसार बढी कर तिर्नुपर्छ । पुस ९ गते मात्रै १५ वटा कम्पनीहरुले वार्षिक साधारणसभा डाकेका छन् । १५ कम्पनी मध्ये १० कम्पनीले आगामी पुस ३० गते वार्षिक साधारणसभा गर्दैछन् । अन्य पाँच कम्पनीले ३० गते अगाडि नै साधारणसभा बाेलाएका छन् । नेपाल दूरसञ्चार कम्पनीले पुस ३० गते आफ्नो ११औँ वार्षिक साधारणसभा टुँडिखेलस्थित त्रिभुवन आर्मी अफिसर्स क्लवमा गर्ने भएकाे छ । सभामा सेयरधनीलाई प्रतिसेयर ५५ रुपैयाँ नगद लाभांश वितरण गर्ने कम्पनीको प्रस्ताव छ । हिमालयन बैंकले पुस ३० गते माईतीघरको कार्की ब्याङ्क्वेटमा सभा राख्दैछ । बैंकले सेयरधनीलाई चुक्ता पुँजीको ५ प्रतिशत बोनस र १०.७८९५ प्रतिशत नगद लाभांश दिने प्रस्ताव सभामा पेस गर्दैछ । त्यस्तै, सिटिजन्स बैंक इन्टरनेसनलले पुस ३० गते लैनचौर स्थित लैनचौर व्याङ्क्वेटमा साधारणसभा बाेलाएकाे छ । सभामा बैंकले सेयरधनीलाई १.६ प्रतिशत नगद लाभांश र ३.६ प्रतिशत बोनस सेयर वितरण गर्ने प्रस्ताव लैजाँदै छ । नेपाल एसबिआई बैंकले पनि पुस ३० गते वार्षिक साधारणसभा बोलाएको छ । सभाले बैंकको ५ प्रतिशत बोनस र १०.७९ प्रतिशत नगद लाभांश प्रस्तावलाई पारित गर्दैछ । त्यस्तै, मेगा बैंकले पुस ३० गते नै आठौँ वार्षिक साधारणसभाको मिति तोकेको छ । बैंकले चुक्ता पुँजीको ६.८५ प्रतिशत नगद लाभांश र १.००२३३ प्रतिशत बोनस वितरण गर्ने प्रस्तावसहित साधारणसभाको मिति तय गरेको हो । बैंकको सभा सो दिन बिहान ११ बजे राष्ट्रिय सभागृह प्रदर्शनी मार्गमा बस्दै छ । त्यसैगरी, सांग्रिला डेभलपमेन्ट बैंकले पुस ३० गते कालिकास्थानस्थित अमृतभोगमा आफ्नो १४औँ वार्षिक साधारणसभा बाेलाएकाे छ । बैंक सेयरधनीलाई ४ प्रतिशत बोनस र कर प्रयोजनसहित ५.४५ प्रतिशत नगद लाभांश वितरण गर्ने प्रस्तावलाई पारित गर्दै छ । १ प्रतिशत बोनस र कर प्रयोजनको लागि ६.४२ प्रतिशत लाभांश पारित गर्ने एजेण्डा सहित नेपाल कम्यूनिटी डेभलपमेन्ट बैंकले पनि पुस ३० गते साधारणसभा डाकेको छ । बैंककाे एजीएम बिहान ९ बजे रुपन्देहीको मणिग्रस्थित ड्रिमल्याण्ड गोल्ड रिसोर्टमा बस्दै छ । कर्जा सूचना केन्द्र लिमिटेडले ५० प्रतिशत बोनस र २५ प्रतिशत नगद लाभांश वितरण गर्ने प्रस्तावलाई पारित गर्न आगामी पुस ३० गते चौथौँ वार्षिक साधारणसभा डाकेको छ । कम्पनीको आगामी एजीएम सो दिन बिहान ११ बजे दरवारमार्ग स्थित होटल अन्नपूर्णमा बस्दै छ । हाइड्रो इलेक्ट्रीसिटी इन्भेष्टमेन्ट एण्ड डेभलपमेन्ट कम्पनीले आगामी पुस ३० गते साधारणसभा गर्ने निर्णय गरेको छ । उक्त सभा सो दिन बिहान ११ बजे कमलादी स्थित नेपाल प्रज्ञा प्रतिष्ठानको प्रेक्षालयमा बस्दै छ । सभामा कम्पनीले सेयरधनीलाई चुक्ता पुँजीको ३० प्रतिशत बोनस सेयर र कर प्रयोजनको लागि २ करोड १० लाख ५२ हजार ६३१ रुपैयाँ बराबर नगद लाभांश पारित गर्ने प्रस्ताव लैजाँदै छ । साथै, कम्पनीले चुक्ता पुँजी वृद्धि गर्न १०० प्रतिशत हकप्रद सेयर जारी गर्ने प्रस्ताव राखेको छ । त्यसैगरी, नयाँ नेपाल लघुवित्तले दशौँ बार्षिक साधारणसभा पुस ३० गते धुलिखेल ट्रेनिङ सेन्टरमा गर्दैछ । पिपुल्स इन्भेष्टमेन्ट कम्पनीले पुस २९ गते अल्फा हाउस ब्याङ्क्वेटमा साधारणासभा राखेकाे छ । त्यस्तै, जनता बैंक लिमिटेडले पनि आगामी पुस २९ गते नवौँ वार्षिक साधारणसभा डाकेको छ । उक्त सभा बत्तिसपुतलीस्थित अनुपम फुडल्याण्ड एण्ड ब्याङ्केटमा बिहान ११ बजे बस्ने भएको छ ।नेपाल सेवा लघुवित्त वित्तीय संस्थाको पुस २८ गते वार्षिक साधारणसभा बस्दै छ । त्यस्तै, नेपाल बङ्गलादेश बैंकको २४औँ एजीएम आगामी पुस २६ गते बिहान १० बजे राष्ट्रिय सभागृह प्रदर्शनी मार्गमा बस्दै छ । सभाले चुक्ता पुँजीको १०.५३ प्रतिशत नगद लाभांश वितरण गर्ने सामान्य प्रस्तावलाई पारित गर्ने छ । २७ वटा वाणिज्य बैंक मध्ये एनआईसी एशिया बैंक र सानिमा बैंक लिमिटेडले वार्षिक साधारणसभा सम्पन्न गरिसकेका छन् । एनआईसी एशियाले गत पुस ४ गते र सानिमा बैंकले गत मंसिर २७ गते वार्षिक साधारणसभा सम्पन्न गरेका हुन् । अन्य ७ वटा वाणिज्य बैंकहरूले माग ७ सम्म साधारणासभा गर्नेगरी बाेलाएका छन् । १२ वटा बैंक भने साधारणसभा गर्न पछाडि परेका छन् ।
डलरको मूल्य बढ्दा रेमिट्यान्समा उच्च सुधार, बढ्दो आयातले शोधनान्तर स्थिति घाटामा
काठमाडौं । अमेरिकी डलरको मूल्य र सोसँगै बढेको अन्य देशका मुद्राको मूल्यको प्रभावले चालु आर्थिक वर्षको पहिलो चौमासमा नेपालको विप्रेषण आप्रवाहमा उत्साहजनक सुधार देखिएको छ । समीक्षा अवधिमा रेमिट्यान्स आप्रवाह ३६.४ प्रतिशत वृद्धि भई ३१२ अर्ब ३६ करोड पुगेको नेपाल राष्ट्र बैंकले सार्वजनिक गरेको रिपोर्टमा उल्लेख गरिएको छ । अघिल्लो आर्थिक वर्षको सोही समयमा कुल रेमिट्यान्स १.४ प्रतिशतले घटेको थियो । रेमिट्यान्ससँगै चालु आर्थिक वर्षको समीक्षा अवधिमा विदेश जाने नेपालीहरुको संख्यामा उच्च बढोत्तरी भई १ लाख २४ हपार ५ सय १८ जना पुगेको घ । अघिल्लो वर्ष यो संख्या १ लाख भन्दा कममा सीमित थियो । रेमिट्यान्स बढे पनि उक्त अवधिमा शोधनान्तर घाटामा उच्च वृद्धि देखिएको छ । चालु खातामा भएको उच्च वृद्धिका कारण यस्तो अवस्था देखिएको हो । उक्त अवधिमा देशको चालु खाता घाटा ८८ अर्ब ६४ करोड हुँदा कुल शोधनान्तर घाटा ५७ अर्ब ३३ करोड रहेको छ अघिल्लो वर्ष देशको शोधनान्तर स्थिति बचतमा थियो । समीक्षा अवधिमा पुँजीगत ट्रान्सफर ४ अर्ब २२ करोड र प्रत्यक्ष वैदेशिक लगानी ४ अर्ब ९६ करोड हुँदा देशको लगानी खाता भने बचतमा रहेको देखिन्छ । सो अवधिमा देशको कुल विदेशी मुद्रा विनिमय सिञ्चितिमा समेत १.८ प्रतिशतले ह्रास आई १०८२ अर्ब ९१ करोड कायम भएको छ । खाद्य र पेय पदार्थ सस्तियो समीक्षा अवधिमा देशको मुद्रास्फीति ४.२ प्रतिशत रहँदा खाद्य तथा पेय पदार्थको मूल्य घटेको राष्ट्र बैंकको रिपोर्टमा उल्लेख गरिएको छ जसअनुसार दाल तथा गेडागुडीमा १४ प्रतिशत, चिनी र चिनीजन्य पदार्थमा ७.६ प्रतिशत र तरकारीमा ८.७ प्रतिशत मूल्य घटेको देखाइएको छ भने यातायात, फर्निसिङ र घरयासी वस्तुहरुमा ८.४ प्रतिशत, ६.१ प्रतिशत र ८.७ प्रतिशत वृद्धि भएको देखाइएको छ ।
एनआई सी एशिया बैंकको नयाँ शाखा सुनसरीको इटहरीमा
काठमाडौं । एनआईसी एशिया बैंकको नयाँ शाखा कार्यालय इटहरी उद्घाटन भएको छ । इटहरी उप–महानगरपालिका वडा नं ५, सुनसरी स्थित पचरुखी शाखाको एनआईसी एशिया बैंकका प्रमुख बजार व्यवस्थापन अधिकृतसन्तोष कुमार राठीले उद्घाटन गरेका थिए । मुलुकभर २७० शाखा कार्यालयहरु, २८७ एटिएम, ३७ वटा एक्सटेन्सन काउण्टर एवं २० वटा शाखा रहित बैंकिङ्ग ईकाई मार्फत बैंकिङ्ग सेवा प्रदान गर्दै आएको छ । बैंकको वासलातको आकार रू. २११ अर्ब भन्दा बढि पुगेको छ भने कुल निक्षेप करिब रू. १६९ अर्ब तथा कर्जा रू. १४५ अर्ब रहेको छ । नेपालको हाल सम्म यस बैंकमा ग्राहकको संख्या करिब १४ लाख रहेको छ ।
मुक्तिनाथ विकास बैंक र नेपाल क्यान्सर अस्पतालबीच सेवा सम्बन्धी सहकार्य
काठमाडौं । मुक्तिनाथ विकास बैंक र नेपाल क्यान्सर अस्पताल बीच बैंकका ग्राहकहरुलाई अस्पतालले छुट दिने भएको छ । तोकिएका शुल्कमा विशेष छुट दिने सम्बन्धी मुक्तिनाथ विकास बैंकको तर्फबाट प्रमुख कार्यकारी अधिकृत प्रद्युमन पोखरेल र नेपाल क्यान्सर अस्पतालको तर्फबाट कार्यकारी अध्यक्ष सुदिप श्रेष्ठले सम्झौतापत्रमा हस्ताक्षर गरेका छन् । यस सम्झौता पश्चात मुक्तिनाथ विकास बैंकका भिसा डेबिट कार्ड वाहक ग्राहकहरूले नेपाल क्यान्सर अस्पताल हरिसिद्विमा उपचार गराउँदा विभिन्न तोकिएका सेवाहरुमा १० प्रतिशतसम्म छुट पाउने व्यवस्था रहेको छ ।
