ह्याम्स अस्पतालले भन्यो-पूर्वअर्थमन्त्री अधिकारीको अवस्था गम्भीर
काठमाडौँ । नेकपाका नेता, पूर्व उपप्रधान तथा अर्थमन्त्री भरतमोहन अधिकारीको अवस्था निकै गम्भीर रहेको छ । ह्याम्स अस्पतालले आज पत्रकार सम्मेलन मार्फत अधिकारीको स्वास्थ्य अवस्था निकै गम्भीर रहेको जनाएको हो । महत्वपूर्ण अंगहरुले काम गर्न छाडेकाले बचाउन सक्ने सम्भावना न्यून भएको चिकित्सिकहरुले बताए, स्वास्थ्य अवस्था खस्कदै गएको पत्रकार सम्मेलनमा बताइयो । सो अस्पतालमा नेता अधिकारीको सघन उपचार कक्ष (आइसियु) मा राखेर उपचार भइरहेको छ । गत माघ २ गते ८४ वर्षिय अधिकारीको स्वास्थ्यमा समस्या देखिएपछि ललितपुरस्थित मेडिसिटी अस्पतालमा उपचार गराइएकोमा सुधार नभएपछि माघ २४ गते ह्याम्स अस्पताल लगिएको थियो । नेता अधिकारीको छातीमा समस्या देखिएको छ ।
३ सय ६० जनाले पूरा गरे इञ्जिनियरिङको पढाई, कलेजले गर्यो बिदाई
काठमाडौं । नेपाल इन्जिनियरिङ कलेजले कलेजमा इन्जिनियरिङ अध्ययन पूरा गरेका तीन सय ६० जना विद्यार्थीलाई राजधानीमा एक कार्यक्रम गरी विदाई गरेको छ । कलेजमा सिभिल, आर्किटेक्चर, कम्प्युटर, इलेक्टिकल, इलेक्टोनिक्समा पढाई पूरा गरेका विद्यार्थीको विदाई गरेको हो । कार्यक्रममा कलेजका संस्थापक अध्यक्ष प्रा. दीपक भटराईले कलेजका अध्ययन पूरा गरेर कलेजले विदाई गर्नु भनेको समुद्रमा पौडन सक्ने गरी छोडनु जस्तै भएको बताए । विशाल समुद्रमा अव तपाईँहरुले समुद्रका अन्य जीवजन्तुसँंग संघर्ष गरेर अगाडि वढ्नुपर्छ, उनले भने, जुन संघर्ष कक्षाकोठाको संघर्ष भन्दा अझ वढी चुनौतीपूर्ण हुन्छ । कार्यक्रममा कलेजका प्राचार्य प्राडा हरिकृष्ण श्रेष्ठले पढाईका साथै व्यवहार पनि उतिकै राम्रो हुनुपर्ने खाँंचो औंल्याए । नलेज इज समथिंग, आटिट्युट इज मोर थिंग (ज्ञान केही हो, व्यवहार धेरै ठूलो कुरा हों) उनले भने । कलेजका उपप्राचार्य दीपक धामीले एसईई, प्लस टु, स्नातक, स्नातकोतर तह जति चुनौतीपूर्ण छ त्यो भन्दा वढी चुनौतीपूर्ण जीवन संघर्ष भएको बताए । सम्वन्धित विभाग (सिभिल, आर्किटेक्चर, कम्प्युटर, इलेक्टिकल, इलेक्टोनिक्स)को संयुक्त आयोजनामा भएको कार्यक्रममा उत्कृष्ट विद्यार्थीलाई पुरस्कार तथा प्रमाणपत्र पनि वितरण गरिएको थियो । साथै विषयगत रुपमा उत्कृष्ट विद्यार्थीलाई पनि पुरस्कार वितरण गरिएको थियो ।
उपत्यकाबाट २८ मेट्रिक टन फोहर व्यवस्थापन
काठमाडौँ । उपत्यकाका नदी र चक्रपथ सफाइ गरी २८ मेट्रिक टन फोहर व्यवस्थापन गरिएको छ । वाग्मती सफाइ महाअभियानको ३०३ औँ हप्तामा टेकु दोभानस्थित नदी क्षेत्रमा सफाइ गरी चार मेट्रिक टन फोहर व्यवस्थापन गरिएको छ । सफाइमा तीनवटै सुरक्षा निकाय, अधिकार सम्पन्न वाग्मती सभ्यता एकीकृत विकास समिति, मुक्तिनाथ विकास बैंकलगायत दुई दर्जन संस्थाका ३०० भन्दा बढी अभियानकर्मीको सहभागिता थियो । नदी किनारको ललितपुरतिरको भागमा म्याद सकिएका औषधि ल्याएर गाडी फोहर बनाउँदै आएको इञ्जेक्सन नेपाललाई महानगरपालिकाले २० हजार जरिवाना गराएको छ । गुह्येश्वरीमाथिको वाग्मती सफाइको २६५ हप्तामा महाशिवरात्रिको तयारीस्वरुप गौरीघाटबाट गुह्येश्वरी मन्दिर अघिको नदी किनारसम्म सफाइ गरियो । यसैगरी वाग्मती सफाइ अभियानका अभियानकर्मीले दुई वर्षपछि मकर मेला लाग्ने पनौतीको त्रिवेणीधाममा सफाइ गरेका छन् । पुण्यवती, लीलावती र रुद्रवती गरी तीन नदीको सङ्गमस्थलमा सफाइ गरिएको छ । सफाइमा स्थानीय जनप्रतिनिधि, वाग्मती सफाइ अभियानकर्मीलगायत स्थानीयवासीको सक्रिय सहभागिता थियो । दुवै सफाइ अभियानबाट पाँच मेट्रिक टन फोहर व्यवस्थापन गरिएको छ । रुद्रमती सफाइ अभियानको २५८ हप्तामा रातोपुल–सेतोपुल–मैतीदेवी क्षेत्रमा सफाइ गरी एक मेट्रिक टन फोहर व्यवस्थापन गरिएको छ । सफाइमा काठमाडौँ महानगरपालिका–३० सहितका २०० भन्दा बढी अभियानकर्मीको सक्रियता थियो । विष्णुमती सफाइको २३० औँ हप्तामा तारकेश्वर नगरपालिका–१० क्षेत्रमा सफाइ गरिएको छ । सफाइबाट पाँच मेट्रिक टन फोहर व्यवस्थापन गरिएको अभियानकर्मी शोभाकान्त पाण्डेले बताउनुभयो । सफाइमा वडाध्यक्ष अमृत थापा, स्थानीय महिला समूह, तीनवटै सुरक्षा निकाय, तारकेश्वर र विनायक सफाइ कम्पनी प्रालिको पनि सक्रियता थियो । तिलगङ्गा क्षेत्रको वाग्मती सफाइको २०४ औँ हप्तामा त्यस क्षेत्रमा सफाइ गरी एक मेट्रिक टन फोहर व्यवस्थापन गरियो । तिलगङ्गा महिला समूहलगायत संस्थाको सक्रियतामा सफाइ अभियान भइरहेको छ । चक्रपथ सफाइको ९९ औँ हप्तामा नारायणगोपाल चोकबाट ग्रीनसिटी अस्पतालसम्म सफाइ गरियो । २८० अभियानकर्मीको सक्रियतामा भएको सफाइमा १० मेट्रिक टन फोहर व्यवस्थापन गरिएको संयोजक लोकबहादुर टण्डनले जानकारी दिए । विसं २०७३ वैशाख २ गतेदेखि शुरु भएको सफाइ अभियान यही फागुन २५ गते शनिबार १०० हप्ता पूरा गर्दैछ । १०० हप्ता पूरा गरेको अवसरमा अर्को शनिबार विशेष कार्यक्रमको तयारी गरिएको चक्रपथ सफाइ अभियानकर्मी तिलक बस्नेतले बताए । आलोकनगर सफाइको ९९ औँ हप्तामा त्यस क्षेत्रमा सफाइ गरी एक मेट्रिक टन फोहर व्यवस्थापन गरिएको संयोजक प्रमिला पौडेलले बताइन् । सडक एवम् नदी किनारमा रोपिएका बिरुवा संरक्षण गरी हुर्काउने सम्बन्धमा टोलवासीबीच छलफल पनि भएको उनले बताए । चक्रपथ बाफल खण्ड सफाइको ८१ औँ हप्तामा कलङ्कीचोकबाट स्युचाटार पुलसम्म सफाइ गरी एक मेट्रिक टन फोहर व्यवस्थापन गरिएको सफाइ संयोजक ताराबहादुर कुँवरले राससलाई जानकारी दिए । आइतबारदेखि वीरगञ्जमा शुरु हुने नेपालकै पहिलो अश्वमेध महायज्ञको पूर्वसन्ध्यामा आज त्यहाँ पनि वाग्मती सफाइ महाअभियानका अभियानकर्मीले सफाइ गरेको गोविन्द काफ्लेले जानकारी दिए । विसं २०७० जेठ ५ गतेदेखि शुरु भएको वाग्मती सफाइ महाअभियानका प्रभावले हालसम्म देशका १०३ स्थानमा साप्ताहिक रुपमा सफाइ जागरण भइरहेको छ । रासस
विदेश भ्रमणमा जान जनप्रतिनिधिबीच हानाथाप, गरियो गोलाप्रथा
बाँके । विदेश भ्रमणमा जानका लागि नेपालगञ्ज उपमहानगरपालिकाका जनप्रतिनिधिबीच गोलाप्रथा गरिएको छ । विदेश भ्रमणका लागि उपमहानगरपालिकामा आएको कोटामा को जाने भन्ने विषयमा चर्को विवाद भएपछि गोलाप्रथाबाट छनोट गरिएको हो । उपमहानगरमा आएको स्वीजरल्याण्ड, थाइल्याण्ड र दुबई भ्रमणको कोटाका लागि विवाद चर्केपछि जनप्रतिनिधिबीच गोलाप्रथा गरिएको नेपालगञ्ज–११ का वडाध्यक्ष उज्जवलसिंह राठौरले जानकारी दिए । “जनप्रतिनिधिबीच विवाद चर्केपछि गोलाप्रथा गरेका छौँ”, वडाध्यक्ष राठौरले भने, “उपप्रमुख उमा थापा मगरले आफू नै जान पाउनुपर्ने अडान राखेपछि गोलाप्रथा गर्नुपरेको हो ।” उपप्रमुखले नमानेपछि उपमहानगरपालिका र काङ्ग्रेस पार्टीमा समेत विवाद बढ्दा गोलाप्रथा गर्नुपरेको उनले बताए । गोलाप्रथा अनुसार उपप्रमुख थापामगर नै छनोटमा परेकी छिन् । विदेश भ्रमणका लागि आएका १० वटा कोटामध्ये नेकपा, काङ्ग्रेस र राप्रपालाई क्रमशः तीन/तीन र एउटा फोरमको भागमा परेको थियो । काङ्ग्रेसबाहेकका दलले सहमतिकै आधारमा नामावली दिए पनि उपप्रमुखको ढिपीले काङ्ग्रेस निकट जनप्रतिनिधिबीच गोलाप्रथा भएको थियो । रासस
महाशिवरात्रीका दिन पशुपति क्षेत्रमा जाम नहुने, दर्शन पास पूर्ण रुपमा हटाइने
काठमाडौँ । यस बर्षको महाशिवरात्रीका दिन पशुपति क्षेत्रमा जाम नहुने नभएको छ । त्यसका लागि बातावरण बनाउन पशुपति क्षेत्र विकास कोष लागी परेको छ । अघिल्ला बर्षहरुमा महाशिवरात्रीको समयमा सर्वसाधारणले जामका कारण निकै हैरानी व्यहोर्नु परेको थियो । साथै, अघिल्ला बर्षमा पासको व्यवस्था गर्ने गरेको कारण जाम पर्ने गरेको भएपनि यस बर्षबाट दर्शन पास पूर्ण रुपमा हटाउन लागिएको कोषले बताएको छ । पशुपति क्षेत्र विकास कोषका संस्कृती महाशाखा प्रमुख प्रेमहरी ढुङ्गाना भन्छन्–‘यसपालिको महाशिवरात्रीमा हामी सकेसम्म जाम नहुने बातावरणको सिर्जना गर्न प्रयासरत रहेका छौ ।’ उनले अघिल्ला बर्षमा जामको समस्या निकै हुने गरेकाले भक्तजनहरुले समस्या भोग्नु परेको बताए । साथै, भक्तजनहरु भगवानको घरमा आउने भएकाले सकेसम्म कोषले पनि कसैले कुनै किसिमका कष्ट भोग्न नपरोस् भन्ने प्रयासमा जोड दिने बताए । महाशिवरात्रीको दिनमा पशुपति परिशर क्षेत्र हुँदै चल्ने यात्रुबाहक गाडीमा कुनै रोकतोक नगरिने भएको छ । सामान ल्याउने टोयटा ट्रयाकसम्मका गाडी समेत सो दिनमा चल्न पाउने छन् । तर, गाडी मन्दिर क्षेत्रमा रोक्न मनाही गरिएको छ । गाडी चल्दा हुने असहजताका विषयमा कसरी व्यवस्थापनको तयारी गर्दै हुनुहुन्छ भन्ने प्रश्नमा पशुपति विकास कोषले आफूले जामको बातावरण सिर्जना हुन नदिने बतायो । कोष भन्छ– विगतमा जाम हुने कुरा सत्य हो, तर यसपालि ठ्याक्कै त्यस्तो अवस्था आउँदैन, लोकल गाडी चढेर आएपनि अथवा आफ्नो गाडी नै ल्याएपनि भयो, तर पार्किङ गरेर बस्न भने पाईदैन । पार्किङ गर्न थाले जाम हुने निश्चित छ, तर हामीले सोही कुरामा कडाई गर्ने तयारी छ । शिवरात्रीका दिन यही फागनु २० गते सोमबार सवारी आवागमन बन्द हुँदैन । विगतमा रिङगरोडमा गाडी नचल्दा वृदवृद्धा देखी निकै भक्तजनलाई गाह्रो भएको हामीले पाएका छौँ । यसपालि भने सकेसम्म यस्ता गुनासा नआउन भन्ने हाम्रो चाहाना छ । यसमा हामीले मात्र नभई सम्बन्धित पक्ष सबैले ध्यान पुरयाएमा मात्र यो सम्भव छ–संस्कृती महाशाखा प्रमुख ढुंगानाले बताए । ट्राफिक व्यवस्थापन कस्तो हुन्छ ? सामान्यतया गौशाला चोकमा जाम हुने गर्छ । सोही चोकमा चौबाटो रहेका कारणपनि जाम पर्ने गरेको छ । महाशिवरात्रीको अवसरमा भने यस्तो जाम सकेसम्म न्यूनिकरण गर्न आफूहरु लागि पर्ने काठमाडौँ उपत्यका ट्राफिक महाशाखाका एसपी जयराज सापकोटाले बताए । महाशिवरात्रीको दिनमा सामान्यतया अन्य बेलामा जस्तै गाडीहरु चल्ने छन् । तर, सर्वसाधारणको भिड अत्याधिक बढेमा गौशला प्रवेश गर्ने सम्पूर्ण बाटोहरुमा रोक लगाईने छ । भिडभाड बढेको अवस्थामा चावहिल, सिफल, गौरीघाट, ज्ञानेश्वर, तिलगंगा लगायतका कुनै स्थानबाट सवारी साधन गौशलातर्फ लान नपाईने व्यवस्था गरिने छ । यस्तै, सिनामंगल पूलबाट उत्तरतर्फ होटल महाराजासम्म जाने रुटमा गाडी चलाउन पाईने छैन । जोरपाटी आउने मालबहाक सवारी चुच्चेपाटीसम्म आउन पाउने व्यवस्था रहेको छ । पार्किङको व्यवस्था कहाँ ? महाशिवरात्रीको समयमा तिलगंगामा सवारी पार्किङको व्यवस्था उपलब्ध हुनेछ । यस्तै, सिफल चौर, गुखह्ेश्वरी पारी रहेको बाग्मती करिडोर लगायतका स्थानमा पार्किङको व्यवस्था रहने छ । पुरानो बसपार्कबाट माईतीघर हुँदै सिनामंगल जाने गाडी तिलगंगासम्म पुग्न सक्ने छन् । यस्तै, कालोपुलबाट कपनसम्म चल्ने गाडीहरु शिवरात्रीको दिनमा महाराजगञ्जको रुट प्रयोग गरेर चलाउनु पर्नेछ । सवारी पासको के छ व्यवस्था ? सकेसम्म पास प्रयोग नगरिने भएपनि अत्यावश्यक सवारी साधनलाई सवारी पासको व्यवस्था गरिने छ ट्राफिक महाशाखाले जनाएको छ । पास भएका सवारी नक्साल भगवतीवहाल हुँदै चावहिल निस्किन सक्ने छन् ।
बीमा इन्स्टिच्यूटले दियो ३२८ कर्मचारीलाई तालिम, ग्रामीण भेगमा बीमा पोलिसीबारे जानकारी गराइने
काठमाडौ । बीमा इन्स्टिच्यूटले ३ सय २८ जना कर्मचारीलाई तालिम दिएको छ । इन्स्टिच्यूटले सुरुवातमा बीमा समितिका १७ जना कर्मचारीलाई तालिम प्रदान गरेको हो । हालसम्म बीमा इन्सिच्यूटले १४ वटा तालिम कार्यक्रम सम्पन्न गरेको पाईन्छ । अहिले तालिम कार्यक्रम सोही बीमा क्षेत्रमा कार्यरत कर्मचारीहरुमा मात्र लक्षित रहेको छ । आगामी दिनमा बीमा समितिको निर्देशन पाएमा कार्यक्रम मार्फत सर्भेयरलाई समेत तालिम दिने उदेश्य बीमा ईन्स्च्यिूटले राखेको पाईन्छ । तालिम कार्यक्रम जीवन बीमा, निर्जीवन बीमा तथा पूनर्बीमाका विषयमा छलफल हुने गरेको छ । बीमा समितिमा नव नियुक्त कर्मचारीले तालिम मार्फत आवश्यक ज्ञान हासिल गरेका छन् भने सुपरभाईजर समूहमा समेत तालिम संचालन भएको छ । बीमा क्षेत्रका विभिन्न संस्थाका प्रमुखकालागि समेत माग भएका विषय अनुरुप तालिम हुँदै आएको छ । तालिम किन आवश्यक ? बीमा क्षेत्रलाई व्यवसायिक बनाउन तालिमको आवश्यकता रहेको छ । यस्तै, बीमा क्षेत्रमा पारदर्शिता कायम गर्नपनि तालिमले महत्वपूर्ण भुमिका खेल्छ । साथै, दक्ष जनशक्तीको निर्माण गर्नलाई पनि तालिम आवश्यक रहेको बीमा ईन्स्टिच्यूटले जानकारी दिएको छ । तालिमको खर्च भने सम्झौता अनुसार कायम हुन्छ । सम्झौतामा बीमा क्षेत्रमा नयाँ पुराना कुन वर्गको व्यक्तीलाई तालिम दिने भन्ने कुरा तोकिएको हुन्छ । साथै कुन स्तरको तालिम हो सोही अनुसार खर्च लाग्ने जानकारी पाइएको छ । सम्झौता भने तालिम लिनु अगावै गर्ने गरिन्छ । बीमा समितिका पूर्व अध्यक्ष, विभिन्न बीमा कम्पनीका प्रमुख कार्यकारी अधिकृत लगायतका व्यक्तीत्वले तालिम दिने गरेको पाईन्छ । बीमा समितिका सहायक निर्देशक गणेश शर्माले बीमा ईन्स्टिच्यूटले प्रदान गर्ने तालिम मार्फत ग्रामीण भेगमा समेत बीमाका पोलिसीका बारेमा जानकारी होस् भन्ने हाम्रो उद्देश्य रहेको बताए ।
दरबाङ-म्याग्दीखोला जलविद्युत् आयोजनामा लगानी गर्न स्थानीयवासीलाई पहिलो प्राथमिकता
गलेश्वर । पश्चिम म्याग्दीको मालिका गाउँपालिकामा निर्माणधीन अवस्थामा रहेको २५ मेगावाट क्षमताको दरबाङ–म्याग्दीखोला जलविद्युत् आयोजनामा स्थानीयवासीलाई लगानीमा पहिलो प्राथमिकता दिइने भएको छ । धौलागिरि कालिका हाइड्रो लिमिटेडले निर्माण गर्न लागेको आयोजनामा स्थानीयवासीलाई नै लगानीको अवसर दिइने हाइड्रोका अध्यक्ष विनोद कुँवरले बताए । जलविद्युत् आयोजनाको पावरहाउस र कर्मचारी आवासगृहको महिला, बालबालिका तथा ज्येष्ठ नागरिकमन्त्री थममाया थापाले उद्घाटन गरिन् । कूल पाँच अर्ब १४ करोड लागतमा निर्माण हुन लागेको जलविद्युत् आयोजनामा संस्थागत पूँजीको ३० प्रतिशत सर्वसाधारणलाई शेयर जारी गरिने अध्यक्ष कुँवरले बताए । आयोजनामा सानीमा बैंकको नेतृत्वमा प्रभु बैंक, कुमारी बैंक, सेञ्चुरी बैंक, मुक्तिनाथ विकास बैंक र महालक्ष्मी विकास बैंकले रु तीन अर्ब ५० करोड ऋण लगानी गर्ने एकवर्ष अगाडि नै सम्झौता भइसकेको छ । आयोजनामा दक्षिण कोरिया, हङकङ, युकेलगायत विश्वका विभिन्न देशका साथै काठमाडौँमा बसोवास गर्ने म्याग्दीका बासिन्दा, म्याग्दी इन्भेष्टमेन्ट कम्पनी र ग्लोबल फ्रेण्डसिप क्यापिटल लिमिटेड मुख्य प्रर्वद्धक रहेका छन् । विद्यत् खरीद सम्झौता (पिपिए)मा नेपाल विद्युत् प्राधिकरणले प्रर्वद्धकसँग वर्षात्का आठ महिनाप्रति युनिट चार रुपैयाँ ८० पैसा र सुख्खायामका चार महिनाप्रति युनिट आठ रुपैयाँ ४० पैसामा खरिद गर्ने उल्लेख गरिएको छ । आयोजनाबाट उत्पादित विद्युत् १४ किलोमिटर लामो १३२ केभि ट्रान्समिटर लाइन हुँदै डाँडाखेत सवस्टेसनमार्फत राष्ट्रियप्रशारण लाइनमा जोडिने छ । योजना आगामी २०७९ सालसम्म निर्माण सम्पन्न गरिने अध्यक्ष कुँवरले बताए ।
दार्चुलामा जिप दुर्घटनामा मृत्यु भएका ११ जना कै सनाखत
दार्चुला । दार्चुला तिङ्कर सडकअन्तर्गत दुहुँ गाउँपालिका–३ राताकाठा क्षेत्रमा शुक्रबार राति भएको जिप दुर्घटनाका सबैको सनाखत भएको छ । सदरमुकाम खलङ्गाबाट दुहुँ गाउँपालिकाको हिकिला गइरहेको म१ज २८० नंको जिप दुर्घटनामा परी ११ को मृत्यु भएको थियो भने एक घाइते भएका थिए । दुर्घटनामा ११ को घटनास्थलमै मृत्यु भएको थियो । मृत्यु हुनेमा नौ दार्चुला र दुई यात्रु बैतडीका छन् । सशस्त्र प्रहरी नायब उपरीक्षक भीमबहादुर चन्दका अनुसार मृत्यु हुनेमा दुहुँ गाउँपालिका–१ का ५३ वर्षीया मानमती भट्ट, ४५ वर्षीया गौमती बम, ७१ वर्षीया धानाम बम, २४ वर्षीय धनबहादुर बम,वडा नं २ का ४१ वर्षीय कल्यानसिंह बडाल र उनका १७ वर्षीया छोरी निर्मला (निरु) बडाल, सोही ठाउँका ३५ वर्षीया परुली धामी रहेका छन् । यस्तै दुहुँ गाउँपालिका–४ का ५५ वर्षीया अमरा बम, सात वर्षीया आयुषा बम तथा बुहारी माइती घर पुर्याउन आएका बैतडी जिल्ला दोगडाकेदार गाउँपालिका–६ का ६० वर्षीय प्रताप भनिने धनबहादुर चन्द र २१ वर्षीया स्नेहा बम चन्द रहेको जिल्ला प्रहरी कार्यालय दार्चुलाका प्रहरी निरीक्षक रवीन्द्र कठायतले जानकारी दिए । जिप चालक दीपकसिंह धामी गम्भीर घाइते भएपछि गए राति नै उपचारको लागि भारतको पिथौरागढ सिफारिश गरिएको छ । उहाँको टाउको र खुट्टामा चोट लागेको स्वास्थ्य सहायक डम्मरदत्त भट्टले बताए । चार दिनअघि सोही क्षेत्रमा पहिरोमा परी एकको मृत्यु भएको थियो । पहिरो गएको क्षेत्रमै जिप दुर्घटना भएको हो । जिप झण्डै ५०० मिटर तल महाकाली नदीमा खसेको थियो । घटनास्थल सदरमुकाम खलङ्गाबाट सात किलोमिटर पर्छ । क्षमताभन्दा बढी यात्रु र सामान भएका कारण दुर्घटना भएको हुनसक्ने स्थानीय हिक्मतबहादुर बमले बताए । सो सडकखण्ड उकालो छ । “पहिरो आएको कारण सडक सुधार भएको थिएन”, बमले भने, “रातिको समयमा जिप चलाउँदा दुर्घटना भएको हुनसक्छ ।” दार्चुला–तिङ्कर सडकमा गत वर्षदेखि जिल्ला यातायात व्यवस्थापन समितिले राति जिप सञ्चालनमा रोकसमेत लगाएको थियो । विगतमा राताकाठा क्षेत्रमा जिप सञ्चालनमा रोकसमेत लगाइएको हो । साघुरो बाटो र ट्याक्टरका कारण सडक खाल्डाखुल्डी छन् । जिप दुर्घटनाका सबै मृतकहरुको शव जिल्ला अस्पतालमा राखिएको छ । अहिले बिहान १० बजेपछि शव परीक्षण शुरु हुने बताइएको छ । अहिले अस्पतालमा आफन्तहरुको भीड लागेको छ । यो वर्षकै ठूलो जिप दुर्घटनाका कारण जिल्ला शोकमा डुबेको छ । आफन्तहरुको अस्पतालमा रुवावासी चलेको छ । पाँच सिट पास भएको जिपमा ११ जना यात्रु बोक्नु र उकालोमा ब्रेकले काम गर्न नसक्दा जिप दुर्घटना भएको प्रहरीले जनाएको छ । रासस
