अमेरिकासँगको व्यापार वार्तामा धेरै काम गर्न बाँकी छ, चीनको निकाल्यो विज्ञप्ति
बेइजिङ । संयुक्तराज्य अमेरिका र चीनबीचको व्यापार वार्ता निकै जटिल र कठिन मोडमा पुगेको चीनका एक उच्च अधिकारीले जनाएका छन् । चीनको वाणिज्य मन्त्रालयले दुई देशबीचको व्यापारका विषयमा अझै धेरै काम गर्न बाँकी रहेको स्पष्ट गरेको छ । मन्त्रालयले मङ्गलबार विज्ञप्ति जारी गरी व्यापार वार्तामा केही विवादित विषयमा भने सहमति भइसकेको बताएको छ । दुई देशबीच जारी व्यापार युद्धलाई अन्त्य गर्नेगरी भएको वार्ता सकारात्मक रुपमा अघि बढेको भन्दै अमेरिकी राष्ट्रपति डोनाल्ड ट्रम्पले विश्वास व्यक्त गरेको भोलिपल्ट चीनको यस्तो भनाई आएको हो । राष्ट्रपति ट्रम्पले नयाँ व्यापार सम्झौतामा चिनीया राष्ट्रपतिसँग चाँडै हस्ताक्षर गर्न लागेको पनि बताए । चिनियाँ व्यापार मध्यस्थकर्ता एवं उपप्रधानमन्त्री लिउ हे वासिङ्टनमा व्यापार वार्ता गरी गत साता बेइजिङ फर्किनु भएको छ । वाणिज्य मन्त्री झोङ शानले उपप्रधानमन्त्रीको भनाई उद्धृत गर्दै भने, “वासिङ्टनको वार्ता प्रक्रिया अत्यन्त कठिन र थकानयुक्त रहेको छ ।” मन्त्री झोङले छलफलका विषयहरु निकै महत्वका रहेकामा जोड दिँदै चीनको वार्ता टोलीले दिन, रात काम गर्नु परेको जानकारी दिए । “दुई दिनका लागि पूर्व निर्धारित छलफल अरु दुई दिन थपियो । यो द्विपक्षीय छलफल निकै प्रभावकारी थियो । करिब ९० दिनदेखि चलिरहेको यो व्यापार छलफलबाट महत्वपूर्ण नतिजा निस्कने अपेक्षा गरिएको छ ।” “अहिले पनि दुबै मुलुकबीच वार्ता जारी छ किनभने अझै पनि धेरै काम गर्न बाँकी छ,” मन्त्री झोङले बताए । उनले कुनै सम्झौतामा पुग्नका लागि दुबै पक्षले निकै होसियारीपूर्वक मिलेर कार्य गर्नुपर्ने खाँचो छ भने । चीनको बैंकिङ नियामक आयोगका प्रमुखले छ वटा क्षेत्रमा महत्वपूर्ण सहमति भएको बताएका छन् । आयोगको भनाईलाई उद्धृत गर्दै स्थानीय वेभसाइट “दी पेपर” प्रविधि हस्तान्तरण, बौद्धिक सम्पत्ति संरक्षण, गैरकर अबरोध, कृषि, सेवा र परिवत्र्य दरमा दुई देशबीच सहमति भइसकेको जनाएको छ । “यो प्रक्रिया निकै महत्वको छ । मेरा विचारमा यसमा थप व्याख्या गरिनेछ, र यसमा मलाई कुनै शंका छैन,” गुओ शुकिङले बताए । रासस/एएफपी
नेपाल र बंगलादेशबीच दाेहाेराे करमुक्ति सम्झाैता, अर्काे देशमा तिरेकाे कर स्वदेशमा समायाेजन हुने
काठमाडौं । नेपाल र बंगलादेशबीच एक अर्काकाे देशमा लाग्दै आएको दोहोरो कर मुक्ति सम्झौता भएको छ । मंगलबार अर्थ मन्त्रालयमा आयोजित विशेष कार्यक्रममा अर्थमन्त्री युवराज खतिवडा तथा नेपालका लागि बंगलादेशका राजदुतको उपस्थितिमा नेपालका तर्फबाट अर्थ मन्त्रालयका राजश्व सचिव लालशंकर घिमिरे र बंगलादेशका तर्फबाट अर्थ मन्त्रालय आन्तरिक स्रोत महाशाखाका वरिष्ठ सचिव मुसरफ होसिनले हस्ताक्षर गर्दै यस्तो सम्झौता गरेका हुन् । उक्त सम्झौतासँगै नेपालमा बंगलादेशी नागरिकले लगानी गरेबापतको गरेको आय आर्जनको कर नेपालमा मात्रै तिर्नुपर्नेछ भने बंगलादेशमा नेपालीले गरेको लगानीको आयकर बंगलादेशमै तिर्नुपर्नेछ । कुनै देशमा अर्को देशमा भन्दा बढी दरको कर भए अर्को देशमा तिरेको करलाई समायोजन गरेर अर्को देशमा कर तिर्न सकिने सुविधा प्राप्त हुनेछ । यस्तो अवस्थामा सम्बन्धित देशका लगानीकर्ताले आफ्नो देशमा कर दाखिला गर्दा फरेन ट्याक्स क्रेडिट शीर्षकमार्फत् करकट्टि सुविधा पाउँछन् । आयकर ऐन, २०५८ को दफा ७३ मा “कुनै व्यक्तिको कुनै आयमा यस ऐन वा प्रचलित कानुन बमोजिम कर लाग्ने व्यवस्था भएको र सोही आयमा विदेशी मुलुकमा पनि कर लाग्ने रहेछ भने त्यस्तो दोहोरो कर नलाग्ने गर्न नेपाल सरकारद्वारा विदेशी सरकारसित अन्तर्राष्ट्रिय सम्झौता गर्न सक्नेछ ।” भन्ने व्यवस्था छ । सोही कानुनी व्यवस्था अनुसार नेपालले विभिन्न १० देशहरुसंग दोहोरो करमुक्ति तथा वित्तीय छल निरोध सम्झौता गरेको हो । यो सम्झौता नेपालका लागि ११ औं र बंगलादेशका लागि ३६ औं हो । नेपालले यसअघि चीन, भारत, कतार, दक्षिण कोरिया, पाकिस्तान, मौरिसस, अष्ट्रिया, श्रीलंका, नर्वे र थाईल्याण्ड गरी १० वटा देशसँग दोहोरो कर मुक्ति सम्झौता गरिसकेको छ । सम्झौतासँगै नेपालमा बंगलादेशको लगानी भित्र्याउन सहज हुने अपेक्षा गरिएको छ । नेपाली कानूनअनुसार हाल विदेशमा लगानी गर्न नपाइने भएकोले नेपाली लगानीकर्ताका लागि भने यसले खासै प्रभाव पार्ने छैन ।
एलआईसी नेपालको शेयर मूल्य समायोजन, प्रतिकित्ता एक हजार ४३२ रुपैयाँ
काठमाडौं । मंगलबार लाइफ इन्स्योरेन्स कर्पोरेशन(एलआईसी) (नेपाल) को शेयर मूल्य समायोजन भएको छ । नेपाल स्टक एक्स्चेञ्ज(नेप्से)ले इन्स्योरेन्सको १२ प्रतिशत बोनसपछि शेयरको मूल्य समायोजन गरेकाे हो । समायोजन पश्चात इन्स्योरेन्सको मूल्य प्रतिकित्ता १४३२ रुपैयाँ तोकिएको छ । जसको आधार मूल्य प्रतिकित्ता २१०३.५७ रुपैयाँ रहेको छ । मंगलबारको बजारमा इन्स्योरेन्सको शेयर मूल्य बढेर प्रतिकित्ता १४६० रुपैयाँसम्म कारोबार भएको छ । करिब साढे २ बजेसम्म इन्स्योरेन्सको शेयर प्रतिकित्ता १७ रुपैयाँले बढेर १४५० रुपैयाँमा कारोबार भइरहेको छ । केन्द्रिय कार्यालय नक्सालको भगवतीबहालमा रहेको यस इन्स्योरेन्सको हालसम्म एक करोड ३३ लाख कित्ता शेयर नेप्सेमा सूचिकृत रहेको छ ।
लघुवित्तका ऋणीलाई शेयरधनी बनाउने योजना, साधारण शेयरको ५० प्रतिशत छुट्याउन सक्ने व्यवस्था
काठमाडौं । लघुवित्त कम्पनीहरुका ऋणी सदस्यहरुलाई शेयरधनी बनाउन नीतिगत प्रयास सुरु भएको छ । नेपाल बैंकले बैंक तथा वित्तीय संस्थासम्बन्धी ऐन संशोधन गर्दै त्यस्तो व्यवस्था गर्न प्रस्ताव गरेको हो । प्रस्तावित व्यवस्था अनुसार लघुवित्त कम्पनीहरुले आफ्नो साधारण शेयरमध्ये ५० प्रतिशतसम्म शेयर ऋणी सदस्यहरुका लागि आरक्षित गर्नसक्ने व्यवस्था गर्न लागेको हो । नेपाल राष्ट्र बैंकले बाफियाको दफा ९ को उपदफा ८ मा यो व्यवस्था थप गर्दै सदस्यहरुका लागि शेयर जारी गर्नसक्ने व्यवस्था गर्न लागेको हो । उक्तऐनको दफा ९ मा हालसम्म ७ ओटा मात्रै उपदफा छ । अहिले नभएको व्यवस्था दफा ८ मा थपगर्दै उक्त व्यवस्था गर्न लागेको हो । ‘घ वर्गको वित्तीय संस्थाले उपदफा १ बमोजिम सर्वसाधारणलाई बिक्री बितरण गर्नको लागि छुट्याइएको शेयरलाई शतप्रतिशत मानी उक्त शेयर मध्येबाट बढीमा ५० प्रतिशतसम्म शेयर आफ्ना ऋणी सदस्यलाई छुट्याउन सक्नेछ ।’ थप गरिएको उपदफा ८ मा उल्लेख गरिएको छ । नेपाल राष्ट्र बैंकले ऋणी सदस्यको हितको लागि उक्त व्यवस्था गर्नुपरेको कारण समेत उल्लेख गरेको छ । यद्यपि उक्त व्यवस्थाले लघुवित्त कम्पनीहरुलाई शेयर जारी गर्नैपर्ने बाध्यकारी व्यवस्था भने गरेको छैन । हाल कर्मचारी र म्युचुअल फण्डहरुलाई मात्र शेयर आरक्षणको व्यवस्था छ । यो व्यवस्था लागु भए लघुवित्त कम्पनीहरुको सर्वसाधारणलाई जाने शेयरको मात्रा थप खुम्चनेछ । यो व्यवस्थाले हाल आईपीओ जारी भइसकेका र ऐन लागु हुनुअघि आईपीओ जारी हुने लघुवित्तलाई भने यसले कुनै असर गर्ने छैन । नेपाल राष्ट्र बैंकले हालसम्म ७२ ओटा लघुवित्त कम्पनीलाई सञ्चालन अनुमति दिएको छ भने थप १८ ओटा लघुवित्तलाई सञ्चालनको स्वीकृति दिने अन्तिम तयारी गरेको छ । त्यसमध्ये ४० ओटा कम्पनीहरुले साधारण शेयर जारी गरी दोस्रो बजारमा सूचिकृत हुँदा आशा लघुवित्तले शेयर जारी गरी सूचीकरणको अन्तिम तयारीमा छ । त्यस्तै, स्पर्श लघुवित्तले आईपीओ जारी गर्न आह्वानपत्र प्रकाशन गरिसकेको छ । बाँकी ५ कम्पनीहरु साधारणसभाबाट आईपीओ प्रस्ताव पारित गरी धितोपत्र बोर्डको पाइपलाइनमा छन् । सञ्चालनमा रहेका बाँकी २५ कम्पनीले भने आईपीओ जारी गर्ने प्रक्रिया समेत सुरु गरेका छैनन् ।
लुम्बिनी विकास बैंकको स्वतन्त्र सञ्चालकमा गुप्ता नियुक्त
काठमाडौँ । लुम्बिनी विकास बैंक लिमिटेडको स्वतन्त्र सञ्चालकमा अञ्जुकुमारी गुप्ता नियुक्त भएकी छन् । फागुन १९ गते बसेको सञ्चालक समितिको बैठकले गुप्तालाई स्वातन्त्र सञ्चालक नियुक्त गर्ने निर्णय गरेको हो । नवनियुक्त सञ्चालक गुप्ताले बैंकका सञ्चालक समितिका अध्यक्ष शुशिलराज पराजुलीवाट फागुन २० गते पद तथा गोपनियताको सपथ ग्रहण गरिन् । उक्त अवसरमा लुम्बिनी विकास बैंकका सञ्चालकहरु डा. रुप ज्योति, प्रविणकृष्ण श्रेष्ठ, प्रतापकुमार आचार्य र रामचन्द्र सिग्देलको उपस्थिति रहेको थियो ।
सुनको मूल्य घट्दो क्रममा, प्रति तोला ६१ हजारमा कारोबार हुँदै
काठमाडौं । साताको तेस्रो दिन सुन प्रतितोला ६१ हजार रुपैयाँमा कारोबार भईरहेको छ । साताको पहिलो र दास्रो दिन ६१ हजार ५ सयमा कारोबार भएको सुन मंगलबार ५ सय रुपैयाँ घटेर ६१ हजारमा कारोबार भईरहेको हो । आइतबारको तुलनामा तेजावी सुन भने प्रति तोला ५ सय कमि भई मंगलबार ६० हजार ७ सय रुपैयाँमा कारोबार भईरहेको छ । अघिल्लाे साता उच्च मूल्यमा काराेबार भएकाे सुन याे साता मूल्य घट्दाे क्रममा बिक्री भइरहेको छ । त्यस्तै चाँदी प्रति तोला १० रुपैयाँले कमी भई ७६० रुपैयाँमा बिक्री भईरहेको छ ।
११४० किलोमिटर पानीजहाज यात्रामा त्रिवेणीबाट समुन्द्र पुग्न सकिने
नवलपरासी । कुल ११४० किलोमिटरको जहाज यात्रामा नेपाली सीमाबाट समुन्द्रसम्म पानजहाजमा पुग्न सकिने निष्कर्ष निकालिएको छ । गंगा नदीसम्म ३०० किलोमिटर र त्यसपछि ८४० किलेमिटरको यात्रापछि समुन्द्री सतहमा पुग्न सकिने निष्कर्ष सम्भाव्यता अध्ययन गर्न गठित नेपाल भारतका अधिकारीको संयुक्त समितिले निकालेको हो । नेपालका प्रमुख तीन ठूला नदी कोशी, गण्डकी र कर्णालीमा पानीजहाज सञ्चालन गर्ने सम्भावनाअन्तर्गत पहिले चरणमा गण्डकीको नवलपरासीमा सम्भाव्यता अध्ययन सकिएको छ । टोलीले सोमबार नारायणी नदी सहित गण्डक ब्यारेज र गण्डक क्षेत्रअन्तर्गत १२ नं स्परको सम्भाव्यता अध्ययन गरेसँगै उक्त निष्कर्ष निकालिएको अवलोकनपश्चात यस क्षेत्रमा पानीजहाज सञ्चालनको सम्भावना उच्च रहेको नेपाली टोलीका संयोजक एवं जल तथा ऊर्जा आयोग सचिवालयका सहसचिव माधव बेलवासेले जानकारी दिए । उक्त टोली फर्किएपछि यस क्षेत्रमा समेत पानीजहाज सञ्चालन गर्ने सम्भावनाको विस्तृत अध्ययन प्रतिवेदन तयार गरिने टोलीमा सहभागी वाणिज्य आपूर्ति मन्त्रालयका उपसचिव तर्कराज भट्टले जानकारी दिए । नेपालमा पानीजहाज सञ्चालन गर्ने उद्देश्यले जल यातायातअन्तर्गत पहिलो चरणको प्रक्रियामा शुरु भएको टोलीमा सहभागी जल तथा ऊर्जा आयोगको सचिवालयका सिनियर डिभिजन इञ्जिनीयर महेश्वर श्रेष्ठले बताए । पानीजहाजलाई नेपाली भूमिमा कत्रो, कसरी र कुन रूपमा ल्याउन सकिन्छ भनेर अध्ययन गर्ने जिम्मेवारी पाएसँगै नेपाल र भारतको संयुक्त टोलीले ‘फिल्ड’मा अवलोकन गरी फर्किएको हो ।
१२३ जहाज भएकाे जेट एयरवेज संकटमा : १७ अर्ब तिर्न नसक्दा २७ ओटा जहाज ग्राउन्डेड
काठमाडौं । चर्चित भारतीय एयरलाइन्स कम्पनी जेट एयरलाइन्स समस्यामा परेको छ । नेपालमा नेपाल वायुसेवा निगमका जहाजहरु ग्राउन्डेड भएर संकट निम्तिएको बेला चर्चित भारतीय कम्पनीमा समेत व्यवस्थापकीय समस्याकै कारण संकट देखिएको हो । एशियाकै उत्कृष्ठ एयरलाइन्स कम्पनी मानिने इस्तिहाद एयरलाइन्सको समेत शेयर लगानी भएको उक्त एयरलाइन्सले पछिल्लो समयमा तिर्नुपर्ने विभिन्न भुक्तानीहरु सल्ट्याउन नसकदा समस्यामा पर्दै गएको हो । एयरलाइन्स समस्यामा परेसँगै कम्पनीका इक्विटी साझेदारहरुमा समेत असामजस्यता देखिएको छ । १२३ ओटा जहाज भएको र दुई दर्जनभन्दा बढी देशमा दैनिक ७५० भन्दा बढी उडान भर्ने जेट एयरवेजले भाडामा लिएका जहाजहरुको भुक्तानी नगरेपछि फेब्रुअरी महिनामा मात्र ५ ओटा बोइङ जहाजहरुलाई ग्राउन्डेड गरिएको छ । जेटका २० जहाजहरु यसअघि नै विभिन्न कारणले ग्राउन्डेड थिए । सोही कारणले सोमबार मात्रै थप २ जहाजहरु ग्राउन्डेड गरिएसँगै जेटका २७ जहाजले नियमित उडान भर्न पाएका छैनन् । यसकारण एयरलाइन्सको दैनिक २०० भन्दा बढी आन्तरिक उडानहरु रद्द भएका छन् । मुम्बईस्थित नागरिक उड्डयनका एक अधिकारीले पछिल्लो महिना जेट एयरलाइन्सको उडान आधाभन्दा बढीले घटेको छ । जनवरीसम्म मुम्बईबाट दैनिक २०० उडान भर्ने जेटले अहिले दैनिक १०० भन्दा कममात्र उडान भर्छ । भाडामा लिएको जहाजको तिर्नुपर्ने रकम नतिरेसँगै फेब्रुअरी ७ मा ४ ओटा जहाज ग्राउन्डेड गरिएकोमा फेब्रुअरी २३ मा थप २ ओटा जहाज सोही कारणले उडान स्थगित गरिएको थियो । फेब्रुअरी २७ र २८ मा क्रमशः ७ र ६ जहाजहरुको उडान स्थगित गरियो । मार्च १ मा २ ओटा र २ मा त्योभन्दा बढी जहाजहरु ग्राउन्डेड गरिएको नागरिक उड्डयन सम्बद्ध स्रोतले जानकारी दियो । जेटमा युएईस्थित इस्तिहाद एयरलाइन्सको २४ प्रतिशत शेयर छ । उसले समेत उक्त भुक्तानी दिन चाहँदैन । स्रोत भन्छ, इस्तिहादले बैंक–लिड रिज्योलुसन प्लान (बीएलआरपी) पछि मात्र रकम तिर्ने अडान लिएको छ । यसका लागि लामो समय लाग्नसक्ने अनुमान गरिएको छ । बीएलआरपीले जेट एयरवेजमा ८५ अर्ब भारतीय रुपैंयाको कोष अभावको महशुस गरेको छ, जसमा १७ अर्ब रुपैंया एयरलाइन्सको लिजिङबापत तिर्नुपर्ने अनुमान गरिएको छ । ८५ अर्बको उक्त कोष इक्विटि वा ऋणबाट जुटाउन सकिन्छ, यदि इक्विटी जारी गर्ने हो भने हालको अध्यक्षको ५१ प्रतिशत हिस्सा रहेको जेटको शेयर २०/२२ प्रतिशतमा झर्नेछ । यस्तो अवस्थामा अध्यक्ष नरेश गोयलको कदम के हुन्छ भन्ने विषय महत्वपूर्ण मानिएको छ । जेटको यो संकटले यसको प्यासेन्जर हिस्सालाई अर्को प्रतिस्पर्धी एयरलाइन्सभन्दा तल झारिलिएको छ । जेट एयरलाइन्सको प्यासेन्जर हिस्सा अघिल्लो वर्षको तुलनामा ९ प्रतिशत घटेर ११.९ प्रतिशतमा आइपुगेको छ जबकि अर्को भारतीय एयरलाइन्स कम्पनी एयर इन्डियाको हिस्सा १२.२ प्रतिशत छ । (फाइनान्सियल एक्सप्रेसको रिपोर्टमा आधारित)
