नेपालगञ्जमा आर्थिक विकास परियोजना शुरू हुँदै, चार क्षेत्रमा विशेष प्राथमिकता
राँझा । नेपालगञ्ज उपमहानगरपालिकामा स्थानीय तथा प्रादेशिक आर्थिक विकास परियोजना शुरू हुने भएको छ । जर्मन विकास नियोग (जिआइजेड)ले उपमहानगरपालिकामा सो परियोजना सञ्चालन गर्न लागेको नगरप्रमुख डा. धवलशम्शेर राणाले जानकारी दिएका छन् । उनका अनुसार, उद्योग व्यापार, शिक्षा, स्वास्थ्य र पर्यटन गरी चार क्षेत्रमा परियोजनाले विशेष प्राथमिकता दिएको छ । कार्यक्रमले गाउँ र शहरलाई जोड्ने उनको दाबी छ । उनले भने, “यसले गाउँनगरलाई जोड्दै व्यवसाय पनि प्रोत्साहन पनि गर्नेछ ।” सन् २०१९ को जुन १ देखि कार्यान्वयन प्रक्रियामा रहेको परियोजना २०२२ को मे १ सम्म सञ्चालन हुनेछ । प्रदेशसभा सदस्य तथा नेपाल कम्युनिष्ट पार्टी (नेकपा) बाँकेका अध्यक्ष आइपी खरेलले सरकार र जनताको आवश्यकताअनुसार दातृ निकायका कार्यक्रम सञ्चालन हुनुपर्ने बताएका हुन् । जिआइजेडका प्रमुख प्राविधिक सल्लाहकार भोल्केव स्टाइजरवडले उक्त कार्यक्रमले उपमहानगरपालिकाले लाभ लिनसक्ने बताए । उनका अनुसार, उपमहानगरपालिकाले कार्यक्रम सञ्चालनका लागि प्राथमिकता तोकेपछि जिआइजेडले कार्यक्रम र बजेटको निर्णय गर्नेछ । प्रमुख जिल्ला अधिकारी कुमारबहादुर खड्का, नेपालगञ्ज उद्योग वाणिज्य सङ्घका अध्यक्ष नन्दलाल वैश्य, जिल्ला सहकारी सङ्घ बाँकेका अध्यक्ष प्रेम सुवेदी, होटल व्यवसायी सङ्घ नेपालगञ्जका अध्यक्ष भीमलाल कँडेलले परियोजना कार्यान्वयनका लागि आवश्यक सहयोग र समन्वय गर्ने जानकारी दिएका छन् । रासस
दुई दिनमा २० हजार यात्रुले लिए अग्रिम टिकट
काठमाडौं । नेपालीको महान् पर्व दशैँ, तिहार तथा छठका लागि घर जान नयाँ बसपार्कबाट २० हजार यात्रुले अग्रिम बस टिकट लिएका छन् । आइतबारबाट टिकट बुकिङ खुला गरिएकामा नयाँ बसपार्कबाट मात्र दुई दिनमा २० हजार यात्रुले अग्रिम टिकट लिएका हुन् । यातायात व्यवस्था विभाग, महानगरीय ट्राफिक प्रहरी महाशाखा र नेपाल यातायात व्यवसायी राष्ट्रिय महासङ्घका प्रतिनिधिबीच गत भदौ २६ गते भएको निर्णयअनुसार यही असोज ५ गतेदेखि लामो दूरीका सवारी साधनका लागि अग्रीम टिकट बुकिङ खुला गरिएको हो । नयाँ बसपार्कको जिम्मा लिएको ल्होत्से बहुउद्देश्यीय प्रालिका महाप्रबन्धक सुनिल कुँवरले लामो दूरीका सवारीसाधनलाई मात्र अग्रिम टिकट खुलाइएकामा आइतबार १४ हजार र सोमबार छ हजार यात्रुले अग्रिम टिकट लिएका जानकारी दिएका छन् । पृथ्वी राजमार्गअन्तर्गत गोरखा, पोखरा, लमजुङ, बागलुङलगायत क्षेत्रमा जाने सवारीसाधनका लागि भने असोज १० गतेदेखि अग्रिम टिकट बुकिङ खुलाइने महाप्रबन्धक कुँवरले बताए । टिकट बिहान ७ः०० बजेदेखि साँझ ६ः०० बजेसम्म वितरण गर्ने गरिएको छ । नेपाल यातायात व्यवसायी राष्ट्रिय महासङ्घका महासचिव सरोज सिटौलाले दशैँ मान्न घर जाने यात्रुलाई ध्यानमा राखेर यातायातको राम्रो व्यवस्था मिलाएको बताए । “दशैँमा झण्डै २५ लाख हाराहारीमा यात्रु उपत्यका बाहिरिने भएकाले हामीले सवारीसाधनको राम्रो व्यवस्था मिलाएका छौँ”, उनले भने । रासस
कक्षा ११ को नतिजा प्रकाशित
काठमाडाैं । कक्षा ११ को परीक्षाफल प्रकाशित भएको छ । राष्ट्रिय परीक्षा बोर्डले केहिबेरअघि नतिजा प्रकाशित गरेको हो । कक्षा ११ को परीक्षा गत जेठमा भएको थियो । देशभरबाट पाँच लाख नौ हजार परीक्षार्थी सहभागी थिए । बोर्डले अघिल्लो वर्षभन्दा यसपालि नतिजा छिटो प्रकाशित गरेको हो । यसअघि कक्षा १२ को परीक्षा पनि अघिल्लो वर्षभन्दा छिटो प्रकाशित भएको थियो । कसको कति जिपिए ? नतिजा अनुसार ३.६१ देखि ४ जीपीए ल्याउने विद्यार्थीको संख्या २ हजार ३१९, ३.२१ देखि ३.६० जीपीए ल्याउने विद्यार्थीको संख्या १३ हजार ७७२, २.८१ देखि ३.२० जीपीए ल्याउने विद्यार्थीको संख्या ३२ हजार २५३, २.४१ देखि २.८० जीपीए ल्याउने विद्यार्थीको संख्या ५४ हजार ८१६, २.१ देखि २.४० जीपीए ल्याउने विद्यार्थीको संख्या ८४ हजार २३९ रहेकाे छ । यस्तै १.६१ देखि २ जीपीए ल्याउने विद्यार्थीको संख्या ८९ हजार ६५०, १.२१ देखि १.६० जीपीए ल्याउने विद्यार्थीको संख्या ४३ हजार ३७, ०.८१ देखि १.२० जीपीए ल्याउने विद्यार्थीको संख्या ८ हजार १७१ र ० देखि ०.८१ जीपीए ल्याउने विद्यार्थीको संख्या २१ हजार ३४६ जना रहेको जनाइएकाे छ ।
यो हो नेपालमा पाइने भक्सवागनको सबैभन्दा सस्तो कार, मूल्य कति ?
काठमाडौं । भक्सवागनको नेपालका लागि आधिकारीक विक्रेता पूजा इन्टर्नेशनल प्रा.लि.ले जर्मन अटोमेकर कम्पनीको विभिन्न मोडेलहरु नेपालमा विक्री वितरण गर्दै आइरहेको छ । नेपालमा पाइने भक्सवागनका कारहरुमध्ये पोलो १.० ट्रेडलाइन प्लस सवैभन्दा सस्तो मोडेल रहेको छ जसको बजारमूल्य रु.२८ लाख ४५ हजार तोकिएको छ । यस कारका सेफ्टि फिचरहरुको रुपमा दुईओटा एयरब्याग्स, एबीएस सिस्टम, सेन्ट्रल लकिङ्ग, चाइल्ड सेफ्टि लकजस्ता कुराहरु रहेका छन् भने कम्फर्ट फिचरका रुपमा म्यानुअल एयर कण्डिसन, फोल्डिङ्ग सिट, हाइट एडजस्ट गर्न मिल्ने ड्राइवर सिट, एडजस्ट गर्नमिल्ने हेड रेस्टजस्ता कुराहरु रहेका छन् । त्यसैगरी, अन्य फिचरहरुको रुपमा यो कारमा आउटसाइड रियर भ्यू मिरर्स, रुफ माउन्टेड एन्टेना, सवै आवश्यक जानकारी डिस्प्ले गर्ने एनालग इन्स्ट्रुमेन्ट क्लष्टर, १२ भोल्टको ब्याट्री जस्ता कुराहरु रहेका छन् । यसमा प्रयोग भएको ९९९ सीसी ३ सिलिण्डर डिओएचसि पेट्रोल इञ्जिनले ७५ पिएसको पावर र ९५ एनएमको टर्क प्रोड्यूस गर्दछ । त्यसैगरी यस कारमा ५ गियरहरु रहेका छन् भने कारले १८.७८ केएमपीएल माइलेज दिन्छ । यसरी, ५ सिटर यो कारको डाइमेन्सनको कुरा गर्नुपर्दा यसको लम्वाई ३९७१ मिलिमिटर, चौडाई १६८२ मिलिमिटर र उचाई १४६९ मिलिमिटर रहेको छ भने ग्राउण्ड क्लियरेन्स चाहिँ १६५ मिलिमिटर रहेको छ । त्यसैगरी ४५ लिटरको फ्यूल ट्याङ्क क्यापासिटी रहेको यस कारका अगाडिका चक्काहरुमा डिस्क ब्रेक र पछाडिका चक्काहरुमा चाहिँ ड्रम ब्रेक दिइएका छन् । कम्पनीले जनाए अनुसार अहिलेको विशेष अफर अनुसार यसकारको खरिदमा रु. १,५५,००० छुट दिइएको छ भने एडिस्नल एक्सेसरीजका रुपमा रियरभ्यू क्यामरा र पावर विन्डोजस्ता फिचरहरु पनि दिइएका छन् । भक्सवागनको नेपालमा विक्री भइरहेको सबैभन्दा महँगो मोडेल चाहिँ टिगुवान हाइलाइन एसयूभी हो जसको नेपाली बजार मूल्य भने रु.१ करोड ५८ लाख रहेको छ ।
नयाँ औद्योगिक क्षेत्रको कामले गति लिएन, विवादमा मकवानपुरको मयुरधाप
काठमाडौं । सरकारले एक प्रदेश एक उद्योग ग्रामको अवधारणा ल्याएको भएपनि औद्योगिक क्षेत्रको कामले गति लिन सकेको छैन । एक प्रदेश एक उद्योगको अवधारणसँगै सरकारले आगामी बर्ष भित्र उद्योग ग्राम स्थापना गर्ने लक्ष्य लिएको छ । तर, औद्योगिक क्षेत्रहरुको विस्तृत परियोजना प्रतिवेदन(डीपीआर) तयार भएपनि वातावरणीय प्रभाव मूल्याङ्कन (ईआईए)को काम सम्पन्न हुन सकेको छैन । सातै प्रदेशमा स्थापना हुने औद्योगिक क्षेत्र मध्ये चितवनको शक्तिखोर, बाँकेको नैवस्ता र कञ्चनपुरको दैजिमा निर्माण हुन लागेको औद्योगिक क्षेत्रको अन्तिम चरणमा पुगेको छ भने मकवानपुरको मयुरधापमा बन्न लागेको औद्योगिक क्षेत्र भने सबै भन्दा विवादित बनेको छ । त्यस्तै सर्लाहीको मुर्तिया, रुपन्देहीको मोतिपुर र कैलालीको लम्कीमा बन्न लागेको औद्योगिक क्षेत्रको ईआईए वन मन्त्रालयमा पुगेर अड्किएको छ । उद्योग मन्त्रालयले वन मन्त्रालयलाई ईआईए स्वीकृतिको लागि पढाएको, तर काम नभएको उद्योग मन्त्रालयले जानकारी दिएको छ । औद्योगिक क्षेत्र व्यवस्थापन लिमिटेडका अध्यक्ष नन्दकिशोर बस्नेतले ७ वटा प्रदेशको औद्योगिक क्षेत्रको डीपीआरको काम सकिएर वन मन्त्रालयलाई ईआईए स्वकृतिका लागि पठाएको, तर वन मन्त्रालयले अझै काम नगरेका बताए । उनले भने-‘मकवानपुरको मयुरधापमा बन्न लागेको औद्योगिक क्षेत्रका लागि स्थानीय तह र मालपोतले नै हामीलाई लालपूर्जा दिएको छ । तर, वन मन्त्रालायले कुरा नबुझेर ईआईए रोकिरहेको छ ।’ अब वन मन्त्री, मन्त्रालयका सचिव, उद्योग मन्त्री र सचिव बीच छलफल गरेर यो बिषयलाई टुङ्ग्याउने दिशामा अघि बढिनेछ–उनले भने । आइतबार राष्ट्रिय योजना आयोगद्वारा आयोजित राष्ट्रिय विकास समस्या समाधान समितिको ४६औँ बैठकमा समेत मकवानपुरको मयुरधाप औद्योगिक क्षेत्रको चार किल्ला भित्रको जग्गा औद्योगिक क्षेत्र व्यस्थापन लिमिटेडको स्वामित्वमा आएपनि उक्त जग्गा वन तथा वातावरण मन्त्रालय अन्तरगतको पर्सा राष्ट्रिय निकुञ्जको क्षेत्रभित्र परेको भनी इआईए स्वीकृति गर्न वन मन्त्रालय पुगेपनि सहमति प्रदान नगरेको उल्लेख छ । सबैभन्दा विवादित देखिएको मकवानपुरको मयुरधाप औद्योगिक क्षेत्रमा उत्पादनमूलक उद्योगहरु मात्रै स्थापना हुने पनि बस्नेतले बताए । औद्योगिक क्षेत्र व्यवस्थापन लिमिटेडका अनुसार उद्योग मन्त्रालयबाट वन मन्त्रालयमा ईआईएका लागि पठाएकोमा १३ महिनादेखि अड्किएको छ । वन मन्त्रलायको ईआईए शाखाका अनुसार औद्योगिक क्षेत्र व्यवस्थापन लिमिटेडले वनको जग्गा दर्ता गरेर प्रयोग गर्न पाउने हो । तर, लालपूर्जा नै लिएको कारण मकवानपुरको मयुरधापमा बन्न लागेको औद्योगिक क्षेत्रको ईआईए रोकिएको बताइएको छ । कहाँ कति क्षेत्रफलमा बन्दैछन् नयाँ औद्योगिक क्षेत्र ? कञ्चनपुरको दैजीमा १९८.७१ हेक्टरमा, चितवनको शक्तिखोरमा ११७८.६७ हेक्टर र बाँकेका नौवस्तामा २२८.८६ हेक्टर औद्योगिक क्षेत्र बन्दैछ । त्यस्तै कैलालीको लम्कीमा ७४४.८२ हेक्टर, झापाको दमकमा ७४७.२४ हेक्टर ,रुपन्देहीको मोतिपुरमा ५५०.४९ हेक्टर र सुर्खेतको साटाखानीमा ६७७ हेक्टरको डीपीआर तयार भएर वन मन्त्रालय गएको छ ।मकवानपुरको मयुरधापमा १३७.८६ हेक्टरमा बन्ने औद्योगिक क्षेत्रको डिपिआर तयार भएर वातावरणीय प्रभाव मूल्यांकनका लागि बन मन्त्रालयमा अड्किएर बसेको छ । सबै औद्योगिक क्षेत्र बनेपछि १० लाखले रोजगारी पाउने देशैभरि निर्माणको प्रक्रियामा रहेका औद्योगिक क्षेत्रमा उद्योगहरु सञ्चालनमा आएपछि १० लाखले रोजगारी पाउने औद्योगिक क्षेत्र व्यवस्थापन लिमिटेडका अध्यक्ष नन्दकिशोर बस्नेतले दाबी गरे ।
वैरो संघमा नयाँ नेतृत्वका लागि आज निर्वाचन हुँदै, पोखरेल र गैरेबीच भिडन्त
काठमाडौँ । नेपाल वैदेशिक रोजगार व्यवसायी सङ्घको नयाँ नेतृत्वका लागि मङ्गलबार निर्वाचन हुँदैछ । सङ्घको नेतृत्व हत्याउनका लागि नेपाल कम्युनिष्ट पार्टी (नेकपा) र नेपाली काँग्रेस निकट व्यवसायी ‘प्यानल’ नै बनाएर अगाडि बढेका छन् । सङ्घको २७ औँ साधारणसभापछि आजै निर्वाचनको कार्यतालिका तय गरिएको छ । सङ्घको नयाँ नेतृत्व चयनको लागि हुने निर्वाचनमा सहभागी हुन ६५८ प्रतिनिधिले नाम दर्ता गराएका छन् । म्यानपावर धरौटी बढाएसँगै ८५४ म्यानपावर कम्पनी कायम भए पनि १९६ कम्पनीले प्रतिनिधि पठाएका छैनन् । नेकपा र संघीय समाजवादी पार्टीलगायत प्रगतिशील समूहको तर्फबाट अध्यक्षमा सरोजकुमार पोखरेलले उम्मेदवारी दिएका छन् । त्यस्तै संयुक्त व्यवसायीको तर्फबाट प्रथम उपाध्यक्षमा हरिबहादुर पाण्डे क्षेत्री, द्वितीय उपाध्यक्षमा मुक्तिनाथ अधिकारी, तृतीय उपाध्यक्षमा अख्तर हुसेन, महासचिवमा रामचन्द्र गिरी, सचिवमा सन्जु गुरूङ र कोषाध्यक्षमा तेजमाया लिम्बू (तेजु)ले उम्मेदवारी दिएका छन् । सदस्यमा होमप्रसाद तिमिल्सिना, दलवीर भण्डारी, ओमबहादुर न्यौपाने, सरिता घले, सोमबहादुर तामाङ, बाबुराम खड्का, नुर महोम्मद मियाँ, दोर्जे शेर्पा, केदारनाथ अधिकारी र वीरेन्द्रकुमार यादवको उम्मेदवारी परेको सङ्घले जनाएको छ । यसैगरी, काङ्ग्रेस निकट व्यवसायी नेपाल लोकतान्त्रिक वैदेशिक रोजगार व्यवसायी फोरमका तर्फबाट अध्यक्षमा विष्णुप्रसाद गैरेको उम्मेदवारी परेको छ । त्यसैगरी सोही समूहको प्रथम उपाध्यक्षमा कमल तामाङ, द्वितीय उपाध्यक्षमा कमलदेव मल्ल, तृतीय उपाध्यक्षमा किशोरकुमार केसी, महासचिवमा सुजित श्रेष्ठ, सचिवमा मेगनाथ भुर्तेल र कोषाध्यक्षमा इन्दिरा गुरुङको उम्मेदवारी परेको छ । यसैगरी सदस्यमा दिनेशकुमार रावल, कर्णराज कटुवाल, सुरेन्द्र अर्याल, हर्कबहादुर लिम्बू, विजय लामा, बाबुलाल मगर, केवशराज न्यौपाने, छविलाल भट्टराई, जङ्गबहादुर इजम र लक्ष्मण पौडेलको उम्मेदवारी दिएका छन् ।
नवलपरासीमा कार दुर्घटना हुँदा ५ जनाको मृत्यु
कावासोती । पूर्वपश्चिम राजगार्गअन्तर्गत नवलपरासीका विभिन्न स्थानमा भएका सवारी दुर्घटनामा परी छ जनाको मृत्यु भएको छ । दुर्घटनामा परी कम्तीमा २० घाइते भएका छन् । जिल्ला प्रहरी कार्यालयका प्रहरी निरीक्षक राजेन्द्र अधिकारीका अनुसार गएराति १०ः१५ बजेको समयमा कावासोती नगरपालिकाको खरकट्टा जङ्गलस्थित पूर्वपश्चिम राजमार्गमा लु१ख ८५३२ नंको ट्रक र बा४१च ६४०९ नंको कार एकापसमा ठोक्किँदा कारमा सवार पाँचको मृत्यु भएको छ । दुर्घटनामा गम्भीर घाइते भएका पाँचलाई उपचारका लागि भरतपुर अस्पतालमा पठाइएकामा अस्पतालले मृत्यु भएको घोषणा गरेको प्रहरी निरीक्षक अधिकारीले बताए । मृत्यु हुने पाँचै जनाकोे नाम ठेगाना खुल्न सकेको छैन । यस्तै, नवलपरासीको मध्यविन्दु नगरपालिका–१० स्थित जङ्गलमा राति १ः४५ बजेको समयमा दाङबाट काठमाडौँका लागि छुटेको बस आफैँ अनियन्त्रित भई पल्टिँदा एक जनाको मृत्यु भएको छ भने कम्तीमा १५ घाइते भएका छन् । ना७ख ८६४२ नंको बस आफैँ अनियन्त्रित भएर पल्टिएको हो । बस पल्टिँदा मकवानपुर घर भएका बसचालक ३५ वर्षीय लक्ष्मण तिमिल्सिनाको मृत्यु भएको छ । दुर्घटनामा परी घाइते १५ जनाको विभिन्न अस्पतालमा उपचार भइरहेको छ । रासस
नागढुंगा-नौबिसे सुरुङ बनाउन सम्झौता, ४२ महिनामा बन्ने
काठमाडौँ । नेपालकै पहिलो सुरुङमार्गका रुपमा नागढुंगादेखि धादिङको नौबिसेसम्म सुरुङ मार्ग बनाउन सम्झौता भएको छ । २.६ किलोमिटर लामो यो सुरुङमार्ग बनाउन जापानी कम्पनी हाज्मा–आन्द्रो जेभी र सरकारबीच सहमति भएको हो । हाज्मा–आन्द्रो जेभीका बिजनेस म्यानेजर र नेपालका तर्फबाट सडक विभाग अन्तर्गतको विकास सहायता समन्वय महाशाखाका उपमहानिर्देशक अर्जुनजंग थापाले सोमबार हस्ताक्षर गरेका हुन् । निर्माण सुरू भएको ४२ महिनामा सुरुङमार्गको सम्पूर्ण काम सकेर नेपाल सरकारलाई हस्तान्तरण गर्ने जनाइएको छ । उक्त आयोजना निमार्णको लागि जापानी अन्तर्राष्ट्रिय सहयोग नियोग(जाइका)को आर्थिक सहयोग हुनेछ। उक्त सुरुङमार्ग निर्माणका लागि यसअघि नै जाइकासँग १६ अर्ब ऋण सम्झौता भइसकेको छ ।