भक्तपुरको वढी कर तिर्ने करदातामा नेपाल इन्जिनियरिङ कलेज
काठमाडौं । भक्तपुर कर कार्यालयले पेश गरेको विवरण अनुसार भक्तपुरबाट सबै भन्दा बढी कर तिर्ने संस्था नेपाल इन्जिनियरिङ कलेज (नेक) रहेको छ । आर्थिक वर्ष २०७४।०७५ मा सवैभन्दा वढी कर तिरेबापत नेकलाई शुक्रबार सम्मान गरिएको छ । जिल्ला प्रसाशन कार्यालय भक्तपुरमा भाद्र ४, २०६० मा संस्था दर्ता ऐन २०३४ बमोजिम सामाजिक संस्थाको रुपमा दर्ता नं. ५५२ कायम गरि दर्ता भएको यस नेपाल इन्जिनियरिङ कलेजले भक्तपुरका प्राईभेट कम्पनीहरु भन्दा पनि बढी कर तिरेको छ । उक्त वर्षमा उसले जिल्लामै सवैभन्दा वढी चार करोड दुई लाख भन्दा वढी कर तिरेको जनाएको छ । आन्तरिक राजश्व कार्यालय जगाती भक्तपुर प्रमुख कर अधिकृत सूर्यप्रसाद पोखरेलले कलेजका वोर्ड सदस्य शशिल भटराईलाई सम्मान गरे । कार्यक्रममा भक्तपुर उद्योग वाणिज्य संघका अध्यक्ष रामप्रसाद प्रजापति, सम्मानित कलेजका वोर्ड सदस्य भटराईलगायतले बोलेका थिए । निस्वार्थ भावनाले २०५१ देखि सबै नेपालिलाई सर्वोकृष्ट उच्च शिक्षा प्रदान गर्ने मनसायबाट स्थापित यस कलेजमा २०७४ को श्रावण देखि सञ्चालकहरु बिच सामाजिक संस्थालाई निजिकरण गर्ने कि नगर्ने भन्ने बारे भिन्न अवधारणा श्रृजना भई कलेज समस्यामा परेको छ । स्वर्गिय संस्थापक अध्यक्ष प्रा. डा. श्री दीपक प्रसाद भट्टराई ज्यूको सामाजिक संस्थानै भएतापनि देशलाई शिक्षाबाट मात्र नभई करबाट समेत नेपाल र नेपालीलाई ठुलो योगदान दिन सकिन्छ । परोपकारी भावनाको कदर अनुरुप बिगत २५ वर्ष देखि सामाजिक संस्थाको रुपमा सञ्चालित यस नेपाल इन्जिनियरिङ कलेजले समाज कल्याण परिषद्बाट कर मिनाहको स्विकृतीको लागि पहल गरेको छैन ।निजिकरण गर्न ईच्छुक सञ्चालकहरुले सञ्चालन गर्दा यस कलेजले आ.व. २०७२/७३ मा कुल आय २४ करोड ५२ लाख रूपैयाँमात्र देखाएको छ भने कुल बचत १४ लाख रूपैयाँमात्र देखाएई भक्तपुर कर कार्यालयलाई कुल १९ लाख रूपैयाँमात्र कर तिरेको छ । निजिकरणबिरुद्ध लागेको नयाँ सञ्चालक समितिले २०७४ देखि कलेज सञ्चालन गरि आर्थिक २०७३/७४ मा कुल आय ६० करोड ८१ लाख रुपैयाँ(जसमा आर्थिक २०७२/७३ सम्म पुरानो व्यवस्थापनले कर छली गर्ने मनसायबाट थप २० करोड रुपैयाँ विभिन्न शिर्षकमा लुकाईएको समेत आयमा जोडिएको) र बचत ३४ करोड ७८ लाख रुपैयाँ तथा आर्थिक २०७४/७५ मा कुल आय ४० करोड ५४ लाख रुपैयाँ र बचत ११ करोड ३४ लाख रुपैयाँ भनि कर कार्यालयमा पेश गरेको छ । आर्थिक वर्ष २०७४/७५ को लेखा परिक्षको प्रतिवेदन अनुसारनै यस सामाजिक संस्थाले ४ करोड रुपैयाँ भन्दा बढी कर तिरी भक्तपुरकै सबै भन्दा ठुलो करदाता हुन पुगेको छ ।
गरिमा विकास बैंकको बार्षिकोत्सवको अवसरमा ११ स्थानमा रक्तदान
काठमाडौं । गरिमा विकास बैंकको १३ औं बार्षिकोत्सवको अवसरमा ११ स्थानमा रक्तदान कार्यक्रम सम्पन्न भएको छ । बैंकको स्थापनाको १२औं बर्ष पूरा गरी १३औं बर्षमा प्रवेश गरेको अवसरमा २०७६ मंसीर ७ गते शनिबार देशका विभिन्न ११ स्थानमा रक्तदान कार्यक्रम सम्पन्न भएको हो । विकास बैंकले केन्द्रीय कार्यालय लाजिम्पाट, शाखा कार्यालयहरु स्याङ्गजाको वालिङ्ग, रुपन्देहीको बुटवल, म्याग्दीको वेनी, चितवनको नारायणगढ, झापाको विर्तामोड र दमक, सुनसरीको धरान, सुर्खेतको वीरेन्द्रनगर, कैलालीको धनगढी र कञ्चनपुरको महेन्द्रनगरमा बृहत रक्तदान कार्यक्रम सम्पन्न गरेको हो । उक्त स्थानहरुमा भएको रक्तदान कार्यक्रबाट पाँच सय युनिटभन्दा बढी रगत संकलन भएको छ । विकास बैंकले आफ्नो बार्षिकोत्सवको अवसरमा प्रत्येक बर्ष विभिन्न सामाजिक उत्तरदायित्व मुलक कार्यक्रमहरु सम्पन्न गर्दै आईरहेको छ । काठमाडौंको लाजिम्पाटमा केन्दीय कार्यालय रहेको यस विकास बैंकको हाल काठमाडौंमा १० वटा शाखा सहित देशभर ९० शाखा र ४९ वटा एटिएम संचालनमा छन । २०७६ मंसीर ६गतेसम्म विकास बैंकले करिब ३६अर्ब निक्षेप संकलन गरी ३२ अर्ब कर्जा लगानी गरेको छ ।
सुन्तला उत्पादन सात प्रतिशतले बढ्ने
काठमाडौं । जिल्लाको मुख्य निर्यातजन्य वस्तुको रुपमा रहेको सुन्तला उत्पादन यस वर्ष पर्वतमा सात प्रतिशतले वृद्धि हुने भएको छ । जिल्लामा गत वर्ष तीन हजार ४०० मेट्रिक टन सुन्तला उत्पादन भएकामा यस वर्ष सात प्रतिशतभन्दा बढीले वृद्धि हुने अनुमान गरिएको कृषि ज्ञान केन्द्र पर्वतले जनाएको छ । केन्द्रका अनुसार यो वर्ष झण्डै तीन हजार ६सय५० मेट्रिक टन सुन्तला उत्पान हुने भएको हो । यस वर्ष अनुकूल मौसम, रोग कीराको प्रकोप कम र असिनापानीलगायतबाट कुनै क्षति नभएकाले सुन्तला उत्पादन बढ्ने देखिएको केन्द्रका प्रमुख वासुदेव रेग्मीले जानकारी दिए । जिल्लामा केही वर्षदेखि सुन्तला उत्पादन निरन्तर बढेको छ । गत वर्ष पनि अघिल्लो वर्षको तुलनामा चार प्रतिशतले वृद्धि भएको थियो । पर्वतमा ७७० हेक्टर क्षेत्रफलमा सुन्तला खेती हुँदै आएको रेग्मीले जानकारी दिए। किसानले मल, किटनाशक विषादीको प्रयोग, बगैँचा सुधार गरेको तथा यस वर्ष हावाहुरी असिना नपरेको कारण सुन्तला उत्पादनमा वृद्धि भएको रेग्मीले बताए । कृषकले व्यावसायिकरूपमा खेती गर्न थाल्नु, सुन्तला खेती गर्ने क्षेत्रफलसमेत वृद्धि हुँदै जानुले वर्षेनी उत्पादन बढ्दै गएको रेग्मीको भनाइ छ । प्रधानमन्त्री कृषि आधुनिकीकरण परियोजनाअन्तर्गत पर्वतको जलजला क्षेत्र र मोदी गाउँपालिकाका विभिन्न वडालाई सुन्तला क्षेत्रको रूपमा विकास गरिएको छ । जिल्लामा सबैभन्दा बढी बाँसखर्कमा झण्डै यस वर्ष पाँच करोड रूपैयाँको सुन्तला उत्पादन हुने अनुमान गरिएको छ भने मोदी गाउँपालिका–२ देउपुरमा रु तीन करोडभन्दा बढीको सुन्तला उत्पादन हुने अनुमान गरिएको छ । यी दुईवटै गाउँका कृषकको मुख्य पेशा नै सुन्तला बनेको छ । पर्वत जिल्लाबाट निर्यात हुने मुख्य उत्पादित वस्तुमा सुन्तला नै परेको छ । वस्तुको तुलनामा पर्वतबाट सुन्तला बढी मात्रामा बाह्य जिल्लामा निर्यात हुन थालेको कृषि ज्ञान केन्द्र पर्वतले जनाएको छ । पर्वतको सुन्तला पोखरा हुँदै चितवन, काठमाडौँ, काकडभिट्टा, बुटवललगायतका शहरमा निर्यात हुँदै आएको छ । कृषकको बोटमै सुन्तला खरीद गर्न व्यापारी आउने भएका कारण सुन्तलाको बजारमा समस्या नरहेको देउपुरका कृषक दाताराम चापागार्इंले बताए । जलजलाको बाँसखर्कमा माघ लागेपछि मात्र सुन्तला टिप्न शुरु हुन्छ । अन्य क्षेत्रबाट पनि सुन्तला बिक्री शुरु भइसकेको कृषकले जनाएका छन् । यस वर्ष बोटबाटै प्रति किलो ६० रुपैयाँका दरले सुन्तला बिक्री हुन थालेको देउपुरका कृषक बाबुराम शर्माले जानकारी दिए । केन्द्रका अनुसार गत जेठमा परेको असिनापानीका कारण कुश्मा नगरपालिका–११ पकुवाको छापा र मोदी–५ बाजुङमा क्षति पुर्याएको थियो । रासस
ग्रामीण कृषि अर्थतन्त्र ओरालो झर्ने क्रम बढ्दाे
काठमाडौं । कृषिमा निर्भर नेपालको ग्रामीण अर्थतन्त्र क्रमशः ओरालोतर्फ झरेकाले कृषिजन्य उत्पादनको आयातमा तत्काल कमी आउने सङ्केत देखिँदैन । हिजो गाउँमा बसोबास गर्ने अधिकांश ग्रामीण जनता केही वर्षदेखि नजिकको शहरमा बसोबास गर्न थालेका छन् । शहर केन्द्रीकृत हुन थालेपछि गाउँको जग्गा बाँझो हुने क्रम तीव्र गतिले बढेको छ । सरकारी पुरानो तथ्याङ्कले हाल १० लाख ३० हजार हेक्टर जमीन बाँझो देखाएको छ । केन्द्रीय तथ्याङ्क विभागले २०६८ सालमा गरेको कृषि गणनाको तथ्याङ्कअनुसार नेपालमा ३० लाख ९१ हजार हेक्टरमा खेती गरिएका छन् । आठ वर्ष पहिले कृषि गणना हुँदा कूल खेतीयोग्य जमीनमध्ये ३३ दशमलव तीन दुई प्रतिशत बाँझो थियो । अहिले वर्षको एक प्रतिशतका दरले बाझिने क्रम बढेको अनुमान गरिएको छ । यस अवधिसम्म आइपुग्दा झण्डै ४२ प्रतिशत जमीन बाँझो रहेको बताइन्छ । जमीन बाँझो हुनुको मुख्य कारण शहर केन्द्रित बसोबास र वैदेशिक रोजगारी नै हो । बलिया तथा तन्नेरी युवा पढाइ र कामका खोजीमा विश्वका ८३ देशमा छरिएका छन् । वैदेशिक रोजगार विभागको पछिल्लो तथ्याङ्कअनुसार झण्डै ४५ लाखभन्दा माथिको जनसङ्ख्या विदेशमा बसोबास गर्छन् । झण्डै एक घर एक वैदेशिक रोजगार जस्तै बनेका छन् नेपाली गाउँहरु । छोराछोरी विदेश, बाबुआमा शहर केन्द्रीकृत, जस्का कारण गाईगोठ, बाख्राको खोर सबै रित्तिएका छन् । शहरका खेतीयोग्य जमीन खण्डीकरण भई टुक्राटुक्रामा घडेरीकरणका रुपमा बिक्री भइरहेका छन् । गाउँमा प्लटका प्लट जमीन बाँझो छ । शहरमा घडेरीकरणका नाममा खण्डित जमीनहरु बाँझो हुनुले उत्पादनमा ह्रास आएकाले तत्काल आयात घट्ने सम्भावना देखिँदैन । हिजो नेपालको ग्रामीण अर्थतन्त्र मौलिक थियो । उनीहरु मिलेर उत्पादन गर्थे । बोका, खसी, घीउ, तरुल, पिँडालु, सक्खरखण्ड, बदाम, मकै, भटमास, गहुँ, कोदो, फापर, जौ, जुनेलो, गहत, मस्याङ, सिलम, मह, दूध, बिक्री गरेर घरखर्च मात्र होइन, बचतसमेत गर्थे । कुनै बेला गाउँका मानिसले दशैँमा खसी, बोका, राँगा, हाँस, कुखुरा, घ्यूउ, मह, कसैले किन्नु पर्दैनथ्यो । अहिले उनै ग्रामीण जनता आयात गरेको कृषि उत्पादनमा निर्भर छन् । वैदेशिक आय (रेमिट्यान्स) को आकार बढेर झण्डै आठ खर्ब रुपैयाँ पुगेको छ । दिगो कृषि विकासका लागि रेमिट्यान्सले कुनै अर्थ राख्दैन । ‘‘गाउँमा उत्पादन हुने मकै, गहुँ, कोदो, जौ र फापरको उत्पादन वृृद्धिमा कुनै उपाय अवलम्बन गरिएन भने आगामी पाँच वर्षमा नेपालको ग्रामीण कृषि अर्थतन्त्र तहसनहस हुन्छ’’, भने कृषि विज्ञ कृष्ण पौडेल । आर्थिक वर्ष २०७४/७५ को तुलनामा आर्थिक वर्ष २०७५/७६ मा आइपुग्दा मकैको उत्पादन गर्ने जमीन १ दशमलव शून्य तीन, गहुँ २ दशमलव नौ, कोदो ६ दशमलव चार, फापर १ दशमलव शून्य दुई र जौ ३ दशमलव नौं प्रतिशतले उत्पादन भइरहेको जमीनको उपभोग घट्दै गएको छ । आर्थिक सर्वेक्षण २०७५/७६ का अनुसार पछिल्लो पटक नेपालमा मकै नौ लाख ४२ हजार ७९, गहुँ ६ लाख ८६ हजार ५५७, कोदो दुई लाख ६३ हजार ५९६, फापर झण्डै २८ हजार र जौ २३ हजार ६९४ हेक्टर जमीनमा खेती गरिँदै आएको छ । कूल खेतीयोग्य जमीनमध्ये प्रमुख खाद्यान्न बाली धानको उत्पादन ७४ जिल्लामा गरिन्छ । हिमालपारिका दुई जिल्ला मनाङ र मुस्ताङमा धान खेतीको सम्भावना छैन । धान खेती गर्ने कूल जमीनले ढाकेको कूल क्षेत्रफल १५ लाख हेक्टर रहेको छ । प्रमुख खाद्यान्न बाली धानको उत्पादनमा यस वर्ष गिरावट आउने कृषि तथा पशुपन्छी जमीनको उपभोग घट्नुको मुख्य कारण ग्रामीण जनताको बसोबास शहर केन्द्रीकृत हुनु, युवा वर्गमा खेती गर्ने आदत हट्दै जानु, सिँचाइको सुविधा नहुनु, समयमा मलखाद्य तथा बीउ बिजन उपलब्ध नहुनु र उत्पादन भएका वस्तुको उचित मूल्य नपाउनुले कृषि पेशाप्रति आम मानिसको आकर्षण घट्दै गएको हुँदा कृषि क्षेत्रमा तत्काल आयात कम हुने अवस्था देखिँदैन । सरकारले आर्थिक वर्ष २०७३/७४ बाट २० वर्षे कृषि विकास रणनीति कार्यान्वयनमा ल्याएको छ भने आगामी सन् २०३५ सम्ममा मुलुकलाई खाद्यान्नमा आत्मानिर्भर बनाउने सङ्कल्प गरेको छ । आर्थिक वर्ष २०७५/७६ को कूल गार्हस्थ्य उत्पादनमा कृषि क्षेत्र ९ कृषि, वन तथा मत्स्यपालन को योगदान २६ दशमलव ९८ प्रतिशत रहने अनुमान छ । गत आर्थिक वर्षमा भने कूल गार्हस्थ्य उत्पादनमा कृषि क्षेत्रको योगदान २७ दशमलव पाँच नौ प्रतिशत थियो । रासस
हनुमन्ते सरसफाइ अभियानले ९१ हप्तामा, सात टन फाेहाेर सङ्कलन
काठमाडौं । हनुमन्ते नदी सरसफाइ अभियानको ९१औँ हप्ता मनोहरा र हनुमन्तेको सङ्गमस्थल हनुमान मन्दिरको अगाडिबाट नदीको सफाइ गरिएको छ । मध्यपुरथिमि नगरपालिका–९ र ललितपुर तथा काठमाडौँको सिमानामा रहेको हनुमन्ते नदीमा भएको सफाइ अभियानमा सात टन फोहोर सङ्कलन भएको हनुमन्ते अभियानका सफाइ दूत एवं चलचित्र निर्देशक मदन घिमिरेले जानकारी दिए । अभियानका वीर दल गणका नेपाली सेनाको टोली, नेपाल प्रहरीको टोली, सशस्त्र प्रहरीको टोली, विभिन्न सामाजिक सङ्घसंस्थाहरुका टोली एवं प्रतिनिधि, सञ्चारकर्मीलगायतका अभियन्ता टोलीको सफाइ अभियानमा सहभागिता रहेको थियो । कार्यक्रमको शुरुवात गर्दै पूर्वप्रधानमन्त्री एवं राप्रपा संयुक्तका नेता लोकेन्द्रबहादुर चन्दले देशमा साना कामबाट पनि ठूलो परिवर्तन गर्न सकिने बताए । उनले हनुमन्ते सफाइ अभियान हेर्दा सानो भएपछि यो नियमित र ठूलो परिवर्तनको काम भएकाले यसको अभियन्ताहरु सम्मानको पात्र भएको बताउँदै खोला र नदीहरुमा फोहर गर्नेहरु पनि फोहर गर्न रोक्नुपर्ने बताए । विश्वमै वातावरण प्रदूषण भइरहेको बेलामा नेपालमा पनि यसको ठूलो चपेटामा परेको भन्दै नेपालमा पनि वातावरण प्रदूषणबाट जोगाउन यस्ता काम प्रभावकारी हुने भएकाले सबैले साथ र सहयोग दिएर लाग्नुपर्ने बताए । रासस
पर्यटन, औद्योगिक र कृषि मेलाको फ्यूजनले मुलुकको विकास हुने
काठमाडौं । नेपाल चेम्बर अफकमर्सका अध्यक्ष राजेश काजी श्रेष्ठले पर्यटन, औद्योगिकर कृषि मेलाको फ्युजनले मुलकको तिब्र विकासको लागि आवश्यक पूर्वाधारको विकास भएको सूचना सम्प्रेषण हुने बताए । चेम्बर अफ कमर्ससँग आबद्ध उद्योग व्यापार संगठन भैरहवाले आयोजना गरेको पाँचौ लुम्बिनी पर्यटन प्रबद्र्धन, औद्योगिक व्यापार तथा कृषिमहोत्सव २०७६ को अवलोकन तथा अन्र्तक्रियामा सहभागि हुदै यस्तो मेला वर्षेनी गर्दै प्रचारप्रसार गर्नु पर्नेमा जोड दिए । उद्योग व्यापार संगठन भैरहवाका अध्यक्ष नारायण भण्डारीको सभापतित्वमा भएको सो कार्यक्रममा उद्योगी व्यवसायीहरुको उपस्थिती रहेको थियो । यसैबिच गुल्मी चेम्बर अफकमर्सको प्रथम साधारण सभाको बिशेष अतिथि राजेश काजी श्रेष्ठले उद्घाटन गर्दै मुलुकको समग्र विकासमा व्यापारी व्यवसायीहरुको भूमिका महत्वपूर्ण रहेको बताए । उनले चेम्बरको इतिहास हकहितका साथै समाजिक सेवामा पनि चेम्बर सकृय रहेको जानकारी दिए । रिडिको प्रचार हुन आवश्यक रहेकाले धार्मिक पर्यटनको लागि आन्तरिक र वाह्य प्रचार हुन आवश्यक रहेको बताए । अन्य सस्थाहरु संगको समन्वमा हकहितमा लाग्नु पर्ने गुल्मि चेम्बर अफ कमर्सको प्रथम साधारण सभा सभापति अध्यक्ष युवराज न्यौपाने प्रमुख अतिथि अध्यक्ष राजेश काजी श्रेष्ठ , बिशेष अतिथि प्रदेश सभा सदस्य दिनेश पन्थी,प्रजिअ कोषहरी निरौला,चेम्बर प्रदेश अध्यक्ष भिमलाल पौडेल, कार्यकारी सदस्य टंकप्रसाद पोखरेल, गुल्मी पत्रकार महासंघ, उद्योग वाणिज्य संघ अध्यक्षको उपस्थिति रहेको थियो ।
सुपुष्पा अभिनित ‘टिलपिल टिलपिल तारा’ बजारमा
काठमाडौं । मोडल तथा नायिका सुपुष्पा भट्ट अभिनित म्युजिक भिडियो ‘टिलपिल टिलपिल तारा…’ सार्वजनिक भएको छ । विक्रमजंग शाह र मेलिना राईको स्वर रहेको गीतको भिडियो सार्वजनिक भएको हो । सुमन श्रापितको शब्द, जीवन परियारको सङ्गीत र सुदिप सागरको सङ्गीत संयोजन रहेको गीतको भिडियोमा सुपुष्पासँगै रोहन असिब र अजय पुनलाई फिचरिङ गरिएको छ । संगीता श्रेष्ठको निर्देशन, रोहन असिबको कोरियोग्राफ रहेको गीतको भिडियोमा शिवराम श्रेष्ठको छायाँकन र लोकेश बज्रचार्यको सम्पादन रहेको छ । तल क्लिक गर्नुहाेस् : हेर्नुहाेस् म्युजिक भिडियो
११०० मेगावाटका ३० आयोजना ग्रिडमा जोडिँदै, २२०० मेगावाट नेपालमा नै उत्पादन हुने
काठमाडौं । चालु आर्थिक वर्ष २०७६/७७ मा ११ सय मेगावाटका ३० जलविद्युत आयोजना ग्रिडमा जोडिने भएका छन् । विद्युत विकास विभागको तथ्याङ्क अनसार चालु आवभित्र ११ सय २५ मेगावाटका ३० आयोजनाहरुको निर्माण सम्मपन्न भई राष्ट्रिय प्रसारण लाइनमा जोडिने भएका हुन् । विद्युत विकास विभागले ५५६ मेगावाटको माथिल्लो तामाकोशी, १११ मेगावाटको रसुवागढी, १४.८ मेगावाटको माथिल्लो सान्जेन र निजी क्षेत्रका आयोजनाहरुबाट चालु आवमा करिब ११ सय २५ मेगावाट विद्युत प्रणालीमा थपिने गरी काम भइरहेको जनाएको छ । यस्तै निर्माणाधीन अवस्थामा रहेका आयोजनाहरुमा ४० मेगावाटको खानीखोला, २७ मेगावाटको दोर्दीखोला, ४२ मेगावाटको मिस्त्रीखोला, ८२ मेगावाटको तल्लो सोलु, २३.३ मेगावाटको तल्लो सोलु जलविद्युत आयोजनाहरु रहेका छन् । यी आयोजनाहरु कुनै निर्माण सम्पन्न गरिसकेका छन् भने कुनै आयोजना निर्माणको अन्तिम चरणमा छन् । देशभर निर्माधिन आयोजनाहरुबाट उक्त बिजुली उत्पादन भएमा हालसम्मकै सबैभन्दा बढी बिजुली उत्पादन हुने विभागले जनाएको छ । विभिन्न २४ वटा सरकारी तथा नीजि जलविद्युत आयोजना निर्माणधीन रहेकोले चालु आवमा उक्त क्षमताको बिजुली आउने उल्लेख छ । निर्माणाधीन आयोजनाहरुबाट एक वर्षभित्र सम्पन्न गरी विद्युत उत्पादन शुरु गर्ने विद्युत विकास विभागका महानिर्देशक नविनराज सिंहले बताए । निर्माणाधीन आयोजनाहरु एक वर्षभित्र पूरा भए चालु आव भित्रै २२ सय मेगावाट विद्युत नेपालमा उत्पादन हुनेछ । हाल नेपालले भारतबाट बिजुली आयात गरेर लोडसेडिङ हटाइएको छ । निर्माणाधीन आयोजना निर्धारित समयमै पूरा नभएको अवस्थामा नेपालले यसै वर्षबाट बढी भएको बिजुली उल्लेख्य मात्रामा निर्यात गर्ने उल्लेख छ । यस वर्ष थप हुने आयोजनाहरु संख्यात्मक रुपमा नीजि क्षेत्रका धेरै छन् । उत्पादन अनुमति जारी भई निर्माणको विभिन्न चरणमा रहेका आयोजना २०९ वटा छन् । यी आयोजनाको बिजुली उत्पादन क्षमता ७ हजार ९ सय ७२ मेगावाट छ । यसै गरी उत्पादन अनुमतिका लागि निवेदन दिएका दुई हजार ५ सय ६३ मेगावाटका आयोजना ३७ आयोजनाहरु रहेका छन् । सर्वेक्षेण अनुमति जारी भएका १७ हजार ८ सय ७६ मेगावाटका २ सय ८६ आयोजना छन् । २ हजार ५ सय ६३ मेगावाटका २८ आयोजनाले सर्वेक्षणको निम्ति दरखास्त दिएको विद्युत विकास विभागको तथ्याङ्कले देखाएको छ । गत आर्थिक वर्ष २०७५÷७६ मा पनि नेपाल सरकारले २० वटा जलविद्युत आयोजनाहरुबाट २ सय ८७ मेगावट विद्युत उत्पादन गर्ने लक्ष्य लिएको थियो तर लक्ष्य लिए अनुसारको उत्पादन भएको थिएन । गत आर्थिक वर्ष २०७५÷०७६ को असार मसान्तसम्ममा नेपाल सरकारले १ सय ४३ मेगावाट विद्युत उत्पादन गरि राष्ट्रिय प्रसारण लाईनमा जोडेको छ । हालसम्म करिब ११ सय विद्युत राष्ट्रिय प्रसारण लाइनमा जोडिएको छ ।