काठमाडौं । विराटनगर किंग्सका कप्तान सन्दीप लामिछाने नेपाल प्रिमियर लिग (एनपीएल) को तेस्रो संस्करणमा ह्याट्रिक विकेट लिने पहिलो खेलाडी बनेका छन् । पोखरा एभेन्जर्सविरुद्ध उत्कृष्ट बलिङ प्रदर्शन गर्दै उनले ह्याट्रिकसहित ६ विकेट लिएपछि खेलको नतिजामा ठूलो प्रभाव पारेका छन् ।
सन्दीपले पोखराविरुद्ध लगातार तीन बलमा तीन विकेट लिँदै ह्याट्रिक पूरा गरेका हुन् । उनले इनिङ्सको १५औं ओभरको तेस्रो, चौथो र पाँचौँ बलमा लगातार विकेट झारेका थिए ।
उनको घातक बलिङका कारण पोखरा एभेन्जर्सको मध्यक्रम सम्हालिन सकेन । सन्दीपले आफ्नो स्पेलमा ३ ओभर बलिङ गर्दै २३ रन खर्चेर ६ विकेट लिए । यो प्रदर्शनसँगै उनी जारी सिजनमा एउटै खेलमा ६ विकेट लिने पहिलो बलरसमेत बनेका छन् ।
रोचक पक्ष के छ भने प्रतियोगिताका अघिल्ला पाँच खेलमा सन्दीपले जम्मा एक विकेट मात्र लिएका थिए । तर, आफ्नो छैटौँ खेलमा उनले एकैपटक ६ विकेट लिएर व्यक्तिगत प्रदर्शनमा उल्लेखनीय सुधार गरेका छन् ।
एनपीएलको इतिहासमा ह्याट्रिक लिने सन्दीप चौथो खेलाडी हुन् । यसअघि विराटनगर किंग्सकै प्रतिश जीसी, काठमाडौं गोर्खाजका शाहब आलम र लुम्बिनी लायन्सका कप्तान रोहित पौडेलले ह्याट्रिक विकेट लिइसकेका छन् ।
त्यस्तै, एनपीएलमा एउटै खेलमा ६ विकेट लिने बलरको सूचीमा सन्दीप पनि थपिएका छन् । यसअघि शाहब आलम र कर्णाली याक्सका विलियम बोसिस्टोले पनि एकै खेलमा ६ विकेट लिएका थिए ।
राष्ट्रिय टोलीका अनुभवी लेग स्पिनरसमेत रहेका सन्दीपको यो प्रदर्शनले एनपीएलमा उनको बलिङ क्षमतासँगै विराटनगरको कप्तानी भूमिकालाई पनि चर्चामा ल्याएको छ ।
