‘अलिबाबा’ ले दक्षिण कोरियामा १ अर्ब १ करोड डलर लगानी गर्ने
चिनियाँ ई–कमर्स कम्पनी अलिबाबा समूहले आगामी तीन वर्षमा दक्षिण कोरियामा एक अर्ब अमेरिकी डलरभन्दा बढी लगानी गर्ने योजना बनाएको छ । दक्षिण कोरियाको योन्हप समाचार एजेन्सीका अनुसार अलिबाबाले दक्षिण कोरियामा आफ्नो व्यवसाय विस्तार गर्न आगामी तीन वर्षमा १ अर्ब १ करोड डलर लगानी गर्ने योजना बनाएको छ । अलिबाबाले यस वर्ष कोरियामा १८ हजार वर्ग मिटरको लजिस्टिक सेन्टर निर्माण गर्न २० करोड डलर खर्च गर्ने योजना बनाएको छ । अलिबाबाले हालै दक्षिण कोरिया सरकारलाई लगानी योजना बुझाएको छ । यस्तै, अलीबाबले सानो र मध्यम आकारका दक्षिण कोरियाली कम्पनीहरूलाई आफ्नो सामान बेच्न १० करोड डलर खर्च गर्नेछ । दक्षिण कोरियामा उपभोक्ताको बढ्दो गुनासोको बारेमा अलिबाबाको ई–कमर्स प्लेटफर्म ‘अली एक्सप्रेस’ ले अध्ययन गरिरहेको छ । अध्ययनपछि उपभोक्ताको मन जित्ने क्षेत्रमा लगानी लगाउने तयारी छ । एजेन्सीकाे सहयाेगमा
अमेरिकी तल्लो सदनले पारित गर्यो टिकटकमाथि प्रतिबन्ध लगाउने विधेयक
काठमाडौं । अमेरिकी तल्लो सदन हाउस अफ रिप्रिजेन्टेटिभ्सले बुधबार लोकप्रिय भिडियो एप टिकटक प्रतिबन्ध लगाउने विधेयक पारित गरेको छ । टिकटकको चिनियाँ मुल कम्पनी बाइटडान्सले ६ महिनाभित्र बहुमत सेयर अमेरिकी कम्पनीलाई नदिए सधैंका लागि अमेरिकामा टिकटक बन्द हुने विधेयकमा उल्लेख छ । टिकटकले अमेरिकालाई आफ्नो सेयर बेच्न चिनियाँ स्वीकृति लिनुपर्नेछ । चीनले यसलाई अस्वीकार गर्ने सम्भावना देखिँदैन । कम्पनीले यसअघि आफ्नो मूल्य २ खर्ब ६८ अर्ब डलर रहेको जनाएको थियो । अमेरिकी सांसदहरूले कम्पनीको हालको स्वामित्वको संरचनालाई राष्ट्रिय सुरक्षाका लागि खतरा भएको भन्दै यो कदम चालेका हुन् । तल्लो सदनबाट दुई तिहाई बहुमतले यो विधेयक पारित भए पनि यसलाई माथिल्लो सदन सिनेटले पारित गरेर राष्ट्रपतिले हस्ताक्षर गरेपछि लागू हुनेछ । तर, पूर्व अमेरिकी राष्ट्रपति डोनाल्ड ट्रम्पले टिकटक प्रतिबन्ध लगाउने विषयमा बोली फेरेपछि सिनेटबाट यो पारित हुने–नहुनेमा शंका छ । यसअघि ट्रम्प नै राष्ट्रपति हुँदा अमेरिकामा टिकटक प्रतिबन्धमा परेको थियो, तर अदालतको आदेशका कारण यो निर्णय पूर्ण कार्यान्वयन हुन पाएको थिएन । तर, अहिले भने ट्रम्पले आफ्नै निर्णय विपरित टिकटक प्रतिबन्धको विरोध गरेका छन् । टिकटकले राष्ट्रिय सुरक्षा नै खतरामा पार्न सक्ने अमेरिकाले ठहर गरे पनि टिकटकले भने १५ करोड जना अमेरिकी प्रयोगकर्ताको कुनै पनि डेटा चीन सरकारको पहुँच भन्दा टाढा रहेको भन्दै आरोपको खण्डन गर्दै आएको छ । यस्तै, चीनले टिकटक प्रतिबन्ध लगाउने अमेरिकाकोे कदमले उसैलाई समस्यामा पार्ने चेतावनी पनि दिएको छ । विदेश मन्त्रालयले भनेको छ, ‘टिकटकले अमेरिकी राष्ट्रिय सुरक्षालाई खतरामा पार्ने प्रमाण अमेरिकाले कहिल्यै फेला पारेको छैन, तर टिकटकलाई दबाउन पनि रोकिएको छैन, यसले उसैलाई समस्यामा पार्नेछ ।’ एजेन्सी
जापानी अन्तरिक्ष रकेट प्रक्षेपणको केही सेकेन्डमै विस्फोट
जापान । जापानी कम्पनीले बनाएको रकेटले स्याटेलाइटलाई कक्षमा स्थापित गर्ने प्रयास असफल भएपछि प्रक्षेपणको केही सेकेन्डमै विस्फोट भएको छ । टोकियोस्थित स्पेस वानको १८ मिटर (६० फिट) अग्लो काइरोस रकेट पश्चिमी जापानको तटीय वाकायामा क्षेत्रमा प्रक्षेपण गरिएको करिब पाँच सेकेन्डपछि इन्धनमा आगो सल्किएपछि विस्फोट भएको हो । विस्फोट हुनु पहिले सुदूर पहाडी क्षेत्रमा सेतो धुवाँ निस्किएको थियो । उक्त रकेट केही सेकेन्ड भित्रमा नैै विस्फोट भई जमिनमा भीषण ज्वालासहित खसेको थियो । ‘पहिलो काइरोस रकेटको प्रक्षेपण गरिएको थियो, तर प्रक्षेपणपछि प्रविधिक समस्या देखिएपछि यसलाई रद्द गरिएको छ’, स्पेस वानद्वारा जारी एक विज्ञप्तिमा भनिएको छ, ‘विस्तृत अनुसन्धान भइरहेको छ ।’ नजिकैको नदी किनारलगायत सार्वजनिक दृश्यावलोकन स्थलहरूमा भेला भएका सयौं युवा र वृद्ध दर्शकहरूले देखेका नाटकीय दृश्यहरूमा रकेटको पानी छर्किन प्रयोग गरिने यन्त्र (स्प्रिङ्कलर) ले पानी छ्याप्न थालेपछि जलिरहेको भग्नावशेष जमिनमा खसेको थियो । एक वृद्ध व्यक्तिले सार्वजनिक प्रसारक एनएचकेसँग भने, ‘मैले यो रकेट प्रक्षेपणबाट धेरै आशा गरेको थिएँ, सफलता मिल्न सकेन त्यसैले म निराश छु । के भयो अनुसन्धान भइरहेको बताइएको छ पछि थाहा हुने नै छ ।’ स्पेस वनले स्याटेलाइटलाई कक्षमा स्थापित गर्ने राष्ट्रको पहिलो निजी फर्म बन्ने आशा गरेको छ र यो आशा काइरोसबाट गरिएको थियो । प्राचीन ग्रीक भाषा अनुसार काइरोसको अर्थ ‘सही क्षण’ हो । उडानको लगभग ५१ मिनेटपछि उक्त सही क्षण आउने अपेक्षा कम्पनी र अन्तरिक्षविद्हरूले गरेका थिए । पार्टपुर्जाको अभाव र अन्य समस्याका कारण स्पेस वानले बुधबारको प्रयासअघि कैरोसको प्रक्षेपण पाँच पटक स्थगित गरेको थियो । रासस
