बजार : उद्योग

काठमाडौं । नेपालको अग्रणी औषधि उत्पादक देउराली जनता फर्मास्यूटिकल्सले कोभिड-१९ का सघन बिरामीको उपचारमा प्रयोग हुने औषधि फाभिर-२०० ट्याव उत्पादन शुरु गरेको छ । उक्त उत्पादनलाई औषधि व्यवस्था विभागले असोज ६ गते अनुमति दिएको छ । ‘हामीले नेपाल सरकारबाट उत्पादनको अनुमति लिई नेपालमा नै पहिलो पटक फाभिर-२०० ट्याव औषधी उत्पादन शुरु गरिसकेको छ’ कम्पनीले बुधबार जारी गरेको विज्ञप्तीमा भनिएको छ- ‘कोभिड-१९ को उपचारका लागि क्लिनिकल अध्ययन प्रयोजनको लागि उपलब्ध गराउने गरि औषधि व्यवस्था विभागबाट असोज ६ गते स्वीकृति प्राप्त भएको छ ।’ कोभिड-१९ का बिरामिहरुको उपचार/प्रयोगको लागि चिकित्सकको सिफारिस र निगरानीमा मात्र अनुसन्धानार्थ सो औषधि उपलब्ध हुने गरि औषधि व्यवस्था विभागबाट स्वीकृति प्राप्त भएको कम्पनीले जनाएको छ । महामारीको यस विषम परिस्थितिमा फाभिर-२०० ट्याव नामक औषधिलाई नेपाली जनताको उपयोगको लागि उपलब्ध गराउन नेपाल सरकार, स्वास्थ्य मन्त्रालय र औषधि व्यवस्था विभाग र नेपाल स्वास्थ्य अनुसन्धान परिषदबाट माग वा निर्देशन भएमा कोभिड-१९ का बिरामीहरुको उपचारका लागि आवश्यक मात्रामा तुरुन्तै उपलब्ध गराउन सम्पूर्ण तयारी गरिसकेको देउराली जनताले जनाएको छ । ‘आज नेपाल यो औषधि उत्पादन गर्ने आठौं देश भएको छ । फाभिर-२०० ट्याव नेपालमै पहिलो पटक उत्पादन गरि कोभिड-१९ बिरामीहरुको उपचारमा समेत योगदान पुर्याउन सकेकोमा हामी देउराली-जनता परिवार गौरवान्वित छौ’ कम्पनीले जारी गरेको विज्ञप्तीमा उल्लेख गरिएको छ । ‘हालको महामारीको असर कम गर्न र महामारीलाई फैलिन नदिन हामी सबैले आ-आफनो क्षेत्रबाट योगदान गर्नु पर्दछ भन्ने हाम्रो मान्यता रहेको छ’ देउराली जनता फर्मास्यूटिकल्स प्रा.लि.का प्रबन्ध निर्देशक हरिभक्त शर्माले भने- ‘हामी यही उत्तरदायित्वका साथ आफ्नो ठाँउबाट यो महामारीको प्रकोपबाट राष्ट्र र जनतालाई पर्न सक्ने प्रभाव कम गर्नका लागि अनबरत प्रयत्न गरिरहेका छौं ।’ नेपाल स्वास्थ्य अनुसन्धान परिषद्को तत्वावधानमा कोभिड-१९ को उपचारको लागि यस औषधिलाई ‘इन्भेष्टिगेशनल ड्रग फर इम्मरजेन्सी यूज’को अनुसन्धान गर्नको लागि क्लिनिकल स्टडीज गरि त्यसको प्रभावकारिताको समेत नेपालकै बिरामीमा अध्ययन गर्न सहकार्य गर्ने तयारी समेत गरिरहेको कम्पनीले जनाएको छ । यस कम्पनीमा कार्यरत स्वदेशी र विदेशी विश्वविद्यालयहरुबाट उच्च शिक्षा हासिल गरेका दक्ष वैज्ञानिक र प्राविधिकहरुलाई यस्तो विषम परिस्थितीमा विगत ६ महिनादेखि निरन्तर र अथक परिश्रम गरि आफ्नो व्यवसायिक जिम्मेवारी निर्बाह गर्दै यो महत्वपूर्ण औषधि नेपाली जनतालाई शिघ्र उपलब्ध गराउंन सफलता प्राप्त गरेकोमा कम्पनीले यस कार्यमा संलग्न सबै वैज्ञानिक र प्राविधिकहरुलाई हादिक धन्यबाद दिएको छ । विश्वभर महामारीको रुपमा फैलिरहेको कोभिड-१९ को कारण संसारभरको मानव समुदाय अहिले कठिन समयको सामना गरिरहेको छ । नेपालमा पनि यसको संक्रमणको दर उच्च गतिमा समुदायमा बढिरहेको छ । हाल देशका ७७ बटै जिल्लाहरुमा दुर्तरुपमा फैलिरहेको कोभिड-१९ महामारीको रोगबाट हालसम्म देशभर ६६ हजारा भन्दा बढी व्यक्तिहरु संक्रमित भइसकेका छन् भने ४२९ जना व्यक्तिको निधन भईसकेको छ । यसको संक्रमण क्रमश बढ्दै जाने देखिएकोले यस कठिन परिस्थितिमा सो रोगको उपचारका लागि आवश्यक औषधिहरुमध्ये फाभिपिराभिर ओरल ट्याब्लेट् एन्टीभाइरल औषधीलाई विश्वका धेरै मुलुकहरुले कोभिड-१९ का बिरामीहरुमा परीक्षण पश्चात प्रयोग गरिरहेका छन् । हालसम्म फाभिपिराभिर ट्याव औषधि जापान, चीन, रसिया, अमेरिका, टर्कि, क्यानडा, भारत र बंगलादेश लगायत धेरै देशमा सरकारले कोभिड-१९ को उपचारका लागि अत्यावश्यक प्रयोग गर्न अनुमति प्रदान गरिसकेका छन् ।

काठमाडाैं । नेपाल उद्योग परिसंघले कोभिड प्रोटोकलको पूर्णपालनाका लागि उद्योगी व्यवसायीलाई आग्रह गरेकाे छ । संघले कार्यस्थलमा भौतिक दूरी कायम गर्ने, सवारी साधानको प्रयोग गर्ने सम्बन्धमा, उत्पादन प्रशोधन तथा सामाग्री व्यवस्थापन गर्दा समेत कोभिड प्रोटोकलको पूर्ण पालनाको लागि आग्रह गरेको हाे । त्यस्तै, औद्योगिक उत्पादनहरु ढुवानी र बजार व्यवस्थापनमा समेत सरकारले तोकेका मापदण्डहरुको पूर्णपालना गरी यस्ता कार्यहरु गर्न संघले अनुरोध गरेको छ । यसैगरी उद्योग सञ्चालन, ढुवानी तथा बजारीकरणको सिलसिलामा संकास्पद संक्रमित व्यक्तिहरु देखिएमा सुरक्षित तवरबाट स्वास्थ्य संस्थामा पुर्याउने, औद्योगिक प्रतिष्ठानमा सचेताना कार्यक्रमहरु सञ्चालन गर्ने र व्यवस्थापनबाट प्रोटोकलको पालना भए नभएको सम्बन्धमा अनुगमन गर्ने कार्यहरुलाई पनि प्रभावकारीरुपमा कार्यान्वयनमा ल्याउन अनुरोध गरेको छ । विशेषगरी उद्योग प्रतिष्ठानहरुमा सरकारले तोकेको निश्चित प्रोटोकल सम्बन्धमा चेकलिष्ट नै बनाई उद्योग परिसरमा राख्न समेत परिसंघ आग्रह गर्दछ । यसबाट रोगको संक्रमणबाट बच्नको लागि सहयोग पुग्दछ भने रोग लागिहालेमा उपचार गर्न, आफ्नो सम्पर्कमा आएका व्यक्तिहरुको कन्ट्याक ट्रेसिङ्ग गर्न र अन्य व्यक्तिलाई संक्रमण हुनबाट जोगाउन सहयोग पुग्ने परिसंघको विश्वास रहेको छ । विश्वव्यापी महामारीको रुपमा फैलिरहेको कोभिड १९ बाट नेपालका उद्योग व्यवसायहरु पनि नराम्ररी प्रभावित भइरहेका छन् । कोभिडको प्रकोपको सुरुसँगै सरकाले लकडाउन, सेमिलकडाउन र निषेधाज्ञा जस्ता बन्देजहरु लगाउँदै आएको सबैमा विदितै छ । यसबाट उद्योगमा कार्यरत कामदार, श्रमिक, मजदुर र कर्मचारीहरु रोगलेभन्दा भोकले प्रभावित हुने देखिएकोले नेपाल उद्योग परिसंघले कोभिडसँगै काममा लागौ भन्ने स्लोगन समेत अगाडी सारेको थियो । यसको मुख्य आशय भनेको उद्योगमा कार्यरत कामदार, श्रमिक, मजदुर र कर्मचारीहरुको मनोवल उच्च बनाई काममा फर्काउनु थियो । उनीहरुको मनोवल उच्च राख्दा उद्योग व्यवसाय सुचारु रुपमा सञ्चालन गर्नको लागि मद्दत पुग्ने र कोभिडको कारण धरासायी बन्दै गएको राष्ट्रिय अर्थतन्त्रमा समेत सकारात्मक प्रभाव पर्नेदेखि परिसंघले सरकारसँग उद्योग व्यवसायहरुमा संक्रमण फैलिएमा संक्रमितहरुको राम्रो उपचारको व्यवस्था गरी प्रभावित क्षेत्र मात्र लकडाउन गर्नु पर्ने जसबाट उद्योग व्यवसायहरुलाई चलायमान बनाई राष्ट्रिय अर्थतन्त्रमा नकारात्मक असर पर्न नदिन अनुरोध गरेको थियो । नेपाल सरकारलाई परिसंघले प्रोटोकल बनाउने सम्बन्धमा राय सुझावहरु प्रस्तुत गरेको र सरकारले बनाएको कोभिड प्रोटोकलमा परिसंघको सुझावलाई प्राथमिकताका साथ समावेश गरेको देखिन्छ । त्यसैले, सरकारले आवतजावत, कार्यालय उद्योग परिसर प्रवेश, कार्यस्थल सरसफाइ र निसंक्रमणलाई पूर्णरुपमा पालना गर्नको लागि परिसंघका सदस्य लगायत सबै उद्योगी व्यवसायीहरुलाई आग्रह गर्दछ ।

काठमाडौं । सरकारले आज विभिन्न उद्योगी तथा व्यवसायीहरुलाई सम्मानित तथा विभूषित गरेको छ । पाँचौं संविधान दिवसको अवसरमा सरकारले एक दर्जनभन्दा बढी उद्योगी व्यवसायीहरुलाई विभूषित गरेको हो । उनीहरुलाई सरकारले मानपदवी, अलंकार र पदकले विभुषित गरेको हो । उद्योगी तथा शंकर ग्रुपका अध्यक्ष शंकरलाल अग्रवाल प्रबल जनसेवा श्री(चतुर्थ)बाट विभूषित भएका छन् । शंकर ग्रुपले गत आर्थिक वर्ष २०७६/७७ मा मात्रै आफ्नो सबै व्यवसायबाट १८ अर्ब रुपैयाँ सरकारलाई राजस्व तिरेको थियो । सन् १९६० मा रावत मल गोल्यानले स्थापना गरेको व्यवसाय नै अहिलेको शंकर ग्रुपको सुरुवातको पहिलो खुड्किलो थियो । यहीबाट यस समूहको व्यवसायीक यात्रा निरन्तर अगाडि बढ्दै आएको हो । उनै रावतका कान्छा छोरा शंकरलाल अग्रवालले आफ्नो बुबाले सुरु गरेको उद्योगमा नयाँ इट्टा थप्दै लगे । उनले १९७९ मा शंकर ग्रुपको आधारशिला राखेका थिए । शंकरलाल अग्रवालले स्थापना गरेका उद्योगको सूची हरेक वर्ष वढ्दै गएको छ । माइनिङ, सिमेन्ट, स्टील, सेन्थेथिक, कपडा, एफएमसिजी, बीमा, क्यापिटल मार्केट, रियलस्टेट, होटल लगायतका क्षेत्रमा यो समूहले लगानी गरेको छ भने ट्रेडिङ व्यवसायमा पनि कम्पनीले धेरै ब्राण्डको बस्तु तथा सेवा बिक्री गर्दै आएको छ । ट्रेडिङमा इलेक्ट्रोनिक्सदेखि अटोमोवाइलसम्मका क्षेत्रमा लगानी गर्दै आएको कम्पनीले नेपालमा नै टीभीएस ब्राण्डको मोटरसाइकल एसेम्बल यूनिट समेत स्थापना गरिसकेको छ । विगत ४५ वर्षमा शंकरलाल अग्रवालको नेतृत्वमा कम्पनीले ठूलो फड्को मारेको छ । यही समूहकै उत्कृष्ट कम्पनी जगदम्बा स्टील नेपालको सबैभन्दा ठूलो स्टील उत्पादक रहेको छ । यही कम्पनीमा मात्रै २५०० जनाले रोजगारी पाइरहेका छन् । जगदम्बा स्टील सरकारलाई सबैभन्दा धेरै राजस्व तिर्ने उत्पादन मूलक उद्योग समेत हो । जगदम्बा ग्रुप र जगदम्बा होल्डिङ शंकर ग्रुप अन्तर्गतका कम्पनीहरु हुन् ।अहिले उनले नेतृत्व गरिरहेको सबै कम्पनीमा १० हजारभन्दा बढीले रोजगारी पाइरहेका छन् । पछिल्ला वर्षहरुमा यो समूह ठूला करदाताको सूचीमा टप ५ भित्र पर्दै आएको छ । यस्तै, नेपाल उद्योग वाणिज्य महासंघका उपाध्यक्ष उमेशलाल श्रेष्ठ पनि सुप्रबल जनसेवा श्री पदकबाट विभुषित भएका छन्। उनी क्वेष्ट फर्मास्यूटिकल्सका प्रबन्ध निर्देशक हुन् । औंषधि उद्याेगकाे क्षेत्रमा याे अग्रणी उद्याेगकाे रूपमा स्थापित रहेकेा छ । महासंघका कार्यकारिणी सदस्य भरत आचार्यले पनि राष्ट्रपतिबाट संविधान दिवसको अवसरमा विभुषण पदक प्राप्त गरेका छन् । युवा उद्यमी आचार्यकाे नेतृत्वमा एक दर्जन भन्दा बढी उद्याेग सञ्चालनमा छन् । महासंघका कार्यकारिणी सदस्य तथा सुन व्यवसायी ज्योत्सना श्रेष्ठले पनि विभुषण पाएकी छिन् । युवा उद्यमी चिराग गोयल, चन्द्र प्रकाश खेतान, व्यवसायी लाक्टा फुर्टि शेर्पा, बिमलमान श्रेष्ठ लगायत पनि सम्मानित भएका छन् । संबिधान दिवसको अवसरमा सरकारले ५ सय ८६ जनालाई विभिन्न मानपदवी, अलंकार र पदकद्वारा विभूषित भएका छन् ।