समाज : खेलकुद

काठमाडौं । त्रिदेशीय टी-२० श्रृङ्खलाको तेस्रो खेलमा नेपालले मलेसिया विरुद्ध सहज जित हासिल गरेको छ। कीर्तिपुरस्थित त्रिवि क्रिकेट मैदानमा बुधबार भएको खेलमा आसिफ शेखको अर्धशतकमा नेपालले सहज जित हासिल गरेको हो । मलेसियाले दिएको ११५ रन लक्ष्य नेपालले चार विकेटको क्षतिमा १३.४ ओभरमा चार विकेटको क्षतिमा पूरा गरेको हो। ओपनर आसिफ शेखले ३८ बलमा सर्वाधिक ५७ रनको योगदान दिए । आसिफको यो टि२० आई करिअरको उत्कृष्ट प्रदर्शन हो । आसिफले ३१ बलमा अर्धशतक पूरा गरेका थिए । दीपेन्द्रसिंह ऐरी १७ बलमा २१ रनमा आउट भए । ओपनर कुशल भुर्तेल स्पिनर पवनदीप सिंहको बलमा ठूलो सट खेल्नेक्रममा लङअनमा विरनदीप सिंहबाट १ रनमा क्याच भए । पवनदीपले नै चौथो ओभरको अन्तिम बलमा रोहित पौडेललाई १२ रनमा एलबीडब्लू आउट गरे । तेस्रो विकेटका लागि दीपेन्द्र र आसिफले ७० रनको साझेदारी गर्दै नेपाललाई सहज जितको आधार तय गरे । टि२० आईमा डेब्यू खेल खेलेका विकेटकिपर दीलिप नाथ ७ बलमा ३ चौकासहित १५ रनमा अविजित रहे । कुशल मल्ल २ रनमा अविजित रहे । मलेसियाका बायाँ हाते स्पिनर पवनदीप सिंहले२ विकेट लिए । सैद अजिज र मुहम्मद आमिरले १/१ विकेट लिए । त्यसअघि टियु क्रिकेट मैदानमा टस जितेर पहिला ब्याटिङ गरेको मलेसियाले निर्धारित २० ओभरमा ८ विकेट गुमाउँदै ११४ रन बनाएको थियो । यो जीतसँगै नेपाल अंक तालिकाको शीर्षस्थानमा पुगेको छ। नेपालको चार अंक छ भने मलेसियाको दुई अंक छ। पपुवा न्युगिनीले अहिलेसम्म अंक बटुल्न सकेको छैन । टी–२० श्रृङ्खला अन्तर्गत चौथो खेलमा बिहीबार नेपाल र पपुवा न्युगिनीबीच प्रतिस्पर्धा हुनेछ।

काठमाडौं । काठमाडौंको त्रिभुवन विमानस्थल परिसरमा रहेको रोयल नेपाल गल्फ कोर्समा सम्पन्न पुरुष गलफ प्रतियोगिताको उपाधि नेपाली सेनाका भूतवूर्व कर्णेल सशीविक्रम सिंहले जितेका छन् । लुम्बिनी जनरल इन्स्योरेन्स कम्पनीको प्रायोजनमा दुईदिने ओपेन गल्फ प्रतियोगितामा महिलातर्फ उपाधि तारा कार्की चित्रकारले जितेकी छन् । लुम्बिनी जनरल इन्स्योरेन्सले सामाजिक उत्तरदायित्व अन्तर्गत दुई दिने ओपन गल्फ टुर्नामेन्टको प्रायोजन गरेको हो प्रतियागितामा पुरुषतर्फको फर्स्ट रनर अप अतिरिक्त प्रहरी महानिरिक्षक हरिबहादुर पाल भए । त्यस्तै ग्रस विनरमा सुरुज श्रेष्ठ, सिनियर विनरमा मेजर जनरल विजय मोक्तान, सिनियर फर्स्ट रनरअपमा सनप्रसाद प्रधान र होल इन वान होल नम्बर ६ को उपाधि जयवीर आचार्यले जितेका छन् । त्यस्तै महिलातर्फको फर्स्ट रनर अपको उपाधि रेखा घिमिरेले जितेकी छन् । जुनियर विनर गर्ल्सको उपाधि इष्टेना टण्डन, जुनियर महिला फर्स्ट रनर अपको उपाधि अन्वद्या मल्लले जितेकी छन् । उक्त प्रतियोगितामा १०० जना खेलाडीहरू सहभागी थिए । सहभागी विजेता खेलाडीहरूलाई विभिन्न १६ विद्यामा पुरस्कार तथा पदकहरू वितरण गरिएको छ । समापनका अवसरमा आयोजित पुरस्कार वितरण समारोहमा लुम्बिनी जनरल इन्स्योरेन्स कम्पनीअध्यक्ष मनोहर दास मुलले अन्तर्राष्ट्रिय रुपमा ख्यातिप्राप्त रहेको गल्फ प्रतियोगिताको माध्यमबाट खेलकुदको विकासमा योगदान गर्ने उद्देश्यले सन् २०१८ र २०१९ मा पनि प्रायोजन गरेको जानकारी दिए ।

काठमाडौं । लुम्बिनी जनरल इन्स्योरेन्स कम्पनीको प्रायोजनमा ‘ओपन गल्फ टुर्नामेन्ट २०२२’ हुने भएको छ । कोरोना संक्रमणको कारणले गत दुई वर्षदेखि हुन नसकेको उक्त गल्फ टुर्नामेन्ट आगामी चैत ११ गतेदेखि हुन लागेको हो । इन्स्योरेन्सले बुधबार एक पत्रकार सम्मेलन गर्दै उक्त प्रतियोगिता दुई दिनसम्म हुने जानकारी गराएको हो । प्रतियोगिता चैत ११ गते र चैत १२ गते त्रिभुवन विमानस्थल परिसरस्थित रोयर नेपाल गल्फ कोर्समा हुने छ । उक्त प्रतियोगिता बिहान ८ बजेदेखि सुरु हुनेछ । जसमा १२० जना खेलाडीहरू सहभागी हुने इन्स्योरेन्सले जनाएको छ । महिला पुरुष दुवै सहभागी हुन पाउने उक्त प्रतियोगितामा १० जना महिला र बाँकी पुरुष खेलाडी हुने आयोजकले जनाएको छ । त्यसमध्ये ९ देखि १४ वर्षसम्मका १६ जना जुनियर खेलाडी हुने छन् भने १८ वर्षभन्दा माथिका स:शुल्क खेल्न पाइने उक्त प्रतियोगिताको लागि इच्छुक तथा योग्यता पुगेका खेलाडीले बिहीबार(चैत १० गते) सम्ममा नाम दर्ता गराइसक्नु पर्ने हुन्छ । रोयल नेपाल गल्फका कोषाध्यक्ष मधुर शिन्याका अनुसार उक्त प्रतियोगितामा रोयल नेपाल गल्फका सदस्य, इन्स्योरेन्स र गैर सदस्य अतिथिहरु योग्य हुनेछन् । साथै, उक्त प्रतियोगितामा सहभागी विजेता खेलाडीहरुलाई विभिन्न १५ विधाका पुरस्कार वितरण गरिने छ । जसमा नगद पुरस्कारको व्यवस्था भने छैन । यो एमाच्योर गल्फ टुरनामेन्ट भएकोले नगद पुरस्कारको व्यवस्था नरहेको कोषाध्यक्ष शिन्याले बताए । इन्स्योरेन्सले सामाजिक उत्तरदायित्व कार्यक्रम अन्तर्गत खेलकुद विकासको लागि उक्त प्रतियोगिताको प्रायोजन गरेको इन्स्योरेन्सका प्रमुख कार्यकारी अधिकृत एनपी प्रधानले बताए । कम्पनीले यसअघि पनि दुई पटक सन् २०१८ र २०१९ मा गल्फ टुरनामेन्टको प्रायोजन गरेको थियो । त्यसपछि कोराना संक्रमणका कारण सन् २०२० र २०२१ मा भने कार्यक्रम हुन नसकेकोले बताउँदै पुनः यसलाई निरन्तरता दिइएको सीईओ प्रधानले बताए ।