पञ्चकन्या माई हाइड्रोले एकैपटक बोलायो तीन वर्षको साधारणसभा
काठमाडौं । पञ्चकन्या माई हाइड्रो पावरले एकैपटक तीन वर्षको वार्षिक साधारणसभा आव्हान गरेको छ । संस्थाले आर्थिक वर्ष २०७५/७६, ७६/७७ र ७७/७८ को क्रमशः चौंथो, पाँचौं र छैठौं वार्षिक साधारण सभा आगामी पुस २८ गते गर्न लागेको हो । उक्त सभा सो दिन बिहान ११ बजे ललितपुरको कुपण्डोल ब्याङ्क्वेट र अनलाइन मार्फत शुरु हुने छ । सभाले उक्त उल्लेखित तीन वटै वर्षको वार्षिक प्रतिवेदनमाथि छलफल गरी स्वीकृत गर्ने छ । त्यस्तै, कम्पनीको संस्थापक समुहबाट प्रतिनिधित्व गर्ने सञ्चालकमा एक जना महिलासहित ४ जना सञ्चालकको निर्वाचन तथा मनोनयन गर्ने प्रस्ताव रहेको छ ।
इन्फिनिटी लघुवित्तले पुस १५ गते बुक क्लोज गर्ने
काठमाडौं । इन्फिनिटी लघुवित्त वित्तीय संस्थाले आगामी पुस १५ गते बुक क्लोज गर्ने भएको छ । संस्थाले आगामी वार्षिक साधारणसभामा जाने प्रयोजनको लागि उक्त एक दिन बुक क्लोज गर्न लागेको हो । यससँगै पुस १४ गतेसम्म संस्थाको सेयर किन्ने तथा होल्ड गर्ने सेयरधनीले गत वर्षको लाभांश पाउने छन् । संस्थाले सेयरधनीलाई २७.७० प्रतिशत बोनस र १.४६ प्रतिशत नगद गरी कूल २९.१६ प्रतिशत लाभांश वितरण गर्ने प्रस्तावलाई सभामा लैजाँदै छ । संस्थाको पाचौं वार्षिक साधारणसभा आगामी पुस २७ गते नवलपरासीको गैंडाकोटस्थित होटल द नारायणीमा हुँदै छ । साथै, संस्थाले हाल कायम रहेको ५० करोडको अधिकृत पुँजीलाई वृद्धि गरी एक अर्ब रुपैयाँ पुर्याउने विशेष प्रस्ताव सभामा लैजाँदै छ ।
सिभिल बैंकको लाभांश घोषणा
काठमाडौं । सिभिल बैंकले गत आर्थिक वर्षको लाभांश घोषणा गरेको छ । बैंकले आर्थिक वर्ष २०७७/७८ को नाफाबाट ५.२६ प्रतिशत लाभांश वितरण गर्ने घोषणा गरेको हो । पुस ५ गते बसेको संस्थाको सञ्चालक समितिको बैठकले सेयरधनीलाई चुक्ता पुँजीको ५ प्रतिशत बोनस र कर प्रयोजनको लागि ०.२६ प्रतिशत नगद लाभांश वितरण गर्ने प्रस्ताव गरेको हो । प्रस्तावित लाभांश अघिल्लो दुई वर्षयताकै कम हो । बैंकले आर्थिक वर्ष २०७६/७७ र आर्थिक वर्ष २०७५/७६ को नाफाबाट क्रमशः ८.४२ प्रतिशत र ६.५७ प्रतिशत लाभांश वितरण गरेको थियो । हाल संस्थाको चुक्ता पुँजी ८ अर्ब ६४ करोड रुपैयाँ छ । ५ प्रतिशत बोनस पछि बैंकको चुक्ता पुँजी ९ अर्ब रुपैयाँ नाघ्ने छ । प्रस्तावित लाभांशलाई नेपाल राष्ट्र बैंकले स्वीकृत तथा बैंकको आगामी वार्षिक साधारणसभाले पारित गरेपछि मात्रै बैंकले सेयरधनीलाई लाभांश वितरण गर्ने छ ।
