कक्षा १२ को नतिजा सुधारोन्मुख, पुरक परीक्षा भदौ २५ र २६ गते हुने
काठमाडौं । राष्ट्रिय परीक्षा बोर्डले कक्षा १२ को नतिजा सार्वजनिक गरेको छ । गत वैशाख १४ मा लिइएको परिक्षाको नतिजा शुक्रबार सार्वजनिक भएकाे हो । जसमा ४ लाख ९१ हजार ४ सय ९७ विद्यार्थी सहभागी थिए । सहभागी परीक्षार्थीमध्ये ५२.९१ प्रतिशत विद्यार्थी उत्तीर्ण भएका छन् । देशभरबाट ५ हजार ५ सय ४२ विद्यालयका विद्यार्थी कक्षा १२ को परीक्षामा सहभागी थिए । गत वर्ष कक्षा १२ मा ५१.९१ प्रतिशत विद्यार्थी उतिर्ण भएका थिए । प्रतिशतका हिसाबले पनि यो वर्षको नतिजा केही सुधार रहेको बोर्डका अध्यक्ष महाश्रम शर्मा बताउँछन् । नतिजा अनुसार सबैभन्दा बढी २.८१ देखि ३.२० जीपीए ल्याउने रहेका छन् भने सबैभन्दा कम १.६१ देखि २.० जीपीए सम्म ल्याउने विद्यार्थी संख्या जम्मा १२ जना रहेका छन् । ए प्लस ग्रेड ल्याउने बढे सार्वजनिक नतिजा अनुसार यो वर्ष ९ हजार ५ सय ९१ विद्यार्थीले ‘ए प्लस ग्रेड’ ल्याएका छन् । उनीहरूले ३.६१ देखि ४.० जीपीए अर्थात ए प्लस ग्रेड ल्याएको बोर्डले जनाएको छ । बोर्डका अनुसार ए प्लस ग्रेड ल्याउने विद्यार्थीको संख्या बढेको छ । यसअघि गत वर्ष २०७९ सालको नतिजा अनुसार ६ हजार ९ सय ७६ विद्यार्थीले ३.६१ देखि ४ जीपीए ल्याएका थिए भने, २०७८ सालको नतिजा अनुसार चार हजार १ सय ७९ विद्यार्थीले ३.६ देखि ४ जीपीए ल्याएका थिए । १ सय २२ विद्यार्थीको परिक्षा रद्द कक्षा १२ मा परिक्षा दिएका १ सय २२ जना विद्यार्थीको परिक्षा रद्द भएको छ । परिक्षामा अमर्यादित क्रियाकलाप गरेका १ सय २२ जनाको परिक्षा नै रद्द गरेको बोर्डले जनाएको छ । यि मध्ये १८ विद्यार्थीको सबै विषयको परिक्षाफल रद्द गरेको छ भने ४ जना विद्यार्थीका सबै विषय रद्द गर्नुका साथै अर्को वर्ष बोर्डले लिने परिक्षामा समेत सहभागी हुन नपाउने भएका छन् । पुरक परीक्षा भदौ २५ र२६ मा शुक्रबार सार्वजनिक गरेका निताजमा विषय लागेका विद्यार्थीहरू मौका परिक्षा दिन पाउने व्यस्था छ । शैद्धान्तिक तर्फ सोही अनुसार बोर्डले भदौ २५ र २६ गते मौका परिक्षा दिने मिति तय गरेको छ । कक्षा १२ को बार्षिक परीक्षामा नियमित परीक्षार्थीका रुपमा सहभागी भई सैद्धान्तिक तर्फ अन्य सबै विषयमा डी वा सो भन्दा माथिल्लो ग्रेड प्राप्त गरी बढीमा कुनै दुई विषयमा नन्ग्रेडेड वा बढीमा दुई विषयमा अनुपस्थित रहेका परीक्षार्थीले पुरक परीक्षा दिन पाउँछन् । नतिजा अनुसार एक लाख ८७ हजार २१ विद्यार्थी नन्ग्रेडेड भएका छन् ।
कक्षा १२ को परीक्षामा ५२ प्रतिशत विद्यार्थी पास
काठमाडौं । परीक्षा बोर्डले सार्वजनिक गरेको कक्षा १२ को नतिजामा ५२ प्रतिशत विद्यार्थी उत्तिर्ण भएका छन् । गत वैशाख १४ गतेबाट सञ्चालित कक्षा १२ को परीक्षामा ४ लाख ९१ हजार ४ सय ९७ विद्यार्थी सहभागी थिए । सहभागी परीक्षार्थी मध्ये (५२.९१ प्रतिशत) उत्तीर्ण भएका छन् । देशभरबाट ५ हजार ५ सय ४२ विद्यालयका विद्यार्थी कक्षा १२ को परीक्षामा सहभागी थिए । कक्षा १२ नतिजा पनि गत असारमा प्रकाशित एसइईको जस्तै लेटर ग्रेडिङ निर्देशिका २०७८ अनुसार नतिजा प्रकाशन भएको राष्ट्रिय परिक्षा बोर्डले जनाएको छ ।
कीर्ते दस्तखत गरी रकम झिक्ने विद्यालय सहयोगी पक्राउ
झापा । काँकडभिट्टा माध्यमिक विद्यालयको बैंक खाताबाट कीर्ते दस्तखतका आधारमा चेक साँटेर चार लाख १८ हजार रुपैयाँ झिकेको आरोपमा विद्यालयकै कार्यालय सहयोगी रोशन मल्लिक पक्राउ परेका छन् । मेचीनगर नगरपालिका–६ निवासी मल्लिकले नेपाल बैंक लिमिटेड काँकडभिट्टाबाट २० पटक चेक साँटेर उक्त रकम निकालेको इलाका प्रहरी कार्यालय काँकडभिट्टाका प्रहरी निरीक्षक कृष्णकुमार पोखरेलले बताए । विद्यालयको बैंक खाता प्रधानाध्यापक हरिप्रसाद न्यौपाने र लेखापाल विष्णुलाल पाण्डेको संयुक्त हस्ताक्षरमा सञ्चालन हुँदै आएको थियो । तर, विद्यालयले बैंकबाट नियमित रकम भुक्तानी लिने र चेकबुक लिने काममा कार्यालय सहयोगी मल्लिकलाई खटाउने गरेको थियो । विद्यालयले विद्यार्थी बोक्ने बस किन्नका लागि बैंकमा रहेको रकम जाँचबुझ गर्दा मल्लिकले बैंकबाट अनाधिकृत रुपमा रकम निकाल्ने गरेको खुलेको छ । घटनानारे थाहा पाएपछि यही साउन १३ गते इलाका प्रहरी कार्यालय काँकडभिट्टामा उजुरी दिएको सहायक प्रधानाध्यापक मदन अधिकारीले जानकारी दिए । प्रहरीले सोही दिन मल्लिकलाई पक्राउ गरी अनुसन्धान थालेको थियो । हाल अभियोग लागेका मल्लिकलाई म्याद थप गरी थप अनुसन्धान भइरहेको प्रहरी निरीक्षक पोखरेलले बताए । बैंकबाट चेकबुक निकालेर ल्याउँदा चेकका केही पाना लुकाएर राख्ने गरेका मल्लिकले २०८० साउन ७ गते यता एक वर्षमा २० पटक कीर्ते हस्ताक्षर गरेर रकम निकाले खुलेको छ । मल्लिकले प्रधानाध्यापक र लेखापाल दुबैको कीर्ते हस्ताक्षर गरेको पाइएको छ । मल्लिकले विद्यालयका शिक्षक, विद्यालयसँग कारोबार भएका व्यवसायी र आफ्नै नामा अनाधिकृत रुपमा चेक काट्ने गरेका थिए ।
