विकासन्युज

दैनिक एक सय जनालाई भुक्तानी गर्छौं, चेक लिन आउनुस् : राष्ट्रिय बीमा कम्पनी

काठमाडौं । राष्ट्रिय बीमा कम्पनीले दैनिक एक सय जनालाई कोरोना बीमाको दावी भुक्तानी गर्ने भएको छ । कम्पनीले मंसिर १३ गते मंगलबारदेखि अधिकतम सय जनालाई दावी भुक्तानी गर्न शुरु गरेको हो । कम्पनीले सर्वसाधारण (व्यक्तिगत) तर्फका बीमितहरुमध्ये कूल १८६३ जना बीमितलाई पहिलो प्राथमिकतामा राखेर दावी भुक्तानी गर्न लागेको हो । सो कार्यको लागि कम्पनीले १२७० लटसम्मको चेक तयार पारिसकेको समेत बताएको छ । यससँगै चेक बनिसकेको तर नलगेकाहरुलाई यथाशिघ्र चेक बुझिलिन कम्पनीले आग्रह गरेको छ । कम्पनीले मंगलबार आफ्नो वेवसाइटमा सूचना सार्वजनिक गर्दै ७७ जना बीमितलाई चेक लिन आग्रह गरेको छ । [pdf id=368475] त्यस्तै, कम्पनीले १२७१ लटदेखि १५२७ लटसम्मका बीमितहरुको पनि विवरण सार्वजनिक गरिसकेको छ । [pdf id=368477]

काठमाडौंमा बन्दैछन् सुविधा सम्पन्न ११ पार्क, एउटाको लागत १ करोडसम्म

काठमाडौं । काठमाडौं उपत्यका विकास प्राधिकरणको जिल्ला आयुक्त कार्यालय काठमाडौंले सुविधा सम्पन्न पार्क निर्माण गर्ने भएको छ । आयुक्त कार्यालयले जिल्लाका पालिकाहरूसँग साझेदारी गरेर पार्क निर्माण गर्ने योजना बनाएको हो । पालिका भित्रका सार्वजनिक जग्गामा संरक्षण गरी पार्क निर्माण गर्ने योजना बनाएको जिल्ला आयुक्त कार्यालय काठमाडौंका इन्जिनियर राजिव श्रेष्ठले बताए । आयुक्तको कार्यालय काठमाडौंले केही दिनअघि मात्र पार्क निर्माण गर्ने इच्छुक पालिकाहरूलाई प्रस्तावको आव्हान गरेको थियो । इञ्जिनियर श्रेष्ठका अनुसार आयुक्त कार्यालय काठमाडौंले ११ वटा पालिकामा पार्क बनाउनको लागि पत्राचार गरेको छ । जिल्ला कार्यालयले काम हनु नसकेको आयोजनाको बजेटलाई संशोधन गरी पार्क बनाउने लक्ष्य लिएको हो । आयुक्त कार्यालयले अहिले नगरपालिकाबाट आएको विवरण संकलन गर्नतर्फ लागेको छ । नगरपालिकाहरूबाट सम्पूर्ण विवरण आएपछि बनाउने ठाउँको अनुगमन गरी बजेट छुट्याउने योजना रहेको पनि श्रेष्ठले बताए । तीव्र जनसंख्या वृद्धि तथा शहरीकरणका कारण शहरी क्षेत्रमा खुल्ला स्थलहरूको अभाव देखिएको र भएका सार्वजनीन जग्गाहरूको उचित व्यवस्थापन भएको नदेखिएकाले काठमाडौं जिल्लामा रहेका प्रत्येक नगरपालिकाहरूको न्यूनतम एक स्थानमा पार्क निर्माण गर्ने योजना बमोजिम जिल्ला आयुक्त कार्यालय काठमाडौंले पालिकामा पठाएको थियो । श्रेष्ठका अनुसार नगरपालिकाका घनावस्ती नजिक रहेका र अधिकतम जनताले उपयोग गर्न मिल्ने स्थानमा रहेको सार्वजनिक जग्गा संरक्षण गरी खुल्ला ठाउँमा पार्क बनाइनेछ । पार्क निर्माण गर्नको लागि आयुक्त कार्यालय काठमाडौंले काठमाडौं महानगरपालिका, कीर्तिपुर, तारकेश्वर, चन्द्रागिरी, नागार्जुन, शंखरापुर, दक्षिणकाली, गोकर्णेश्वर, बुढानिलकण्ठ र टोखा नगरपालिकालाई पत्राचार गरेको छ । पार्क निमार्णको गर्न चाहने इच्छुक पालिकाले प्रस्ताव पेश गर्न सक्ने पनि श्रेष्ठले बताए । उनका अनुसार पार्क अनुसार फरक–फरक सेवा सुविधा हुनेछन् । पार्कमा चौतारा, बाल खेल मैदान, बगैँचा, योगा, व्यायाम, हिँड्ने ठाउँ लगायतका भौतिक संरचनाहरू निर्माण हुनेछन् । ‘शहरदेखि गाउँको इच्छा र आकांक्षा फेरिएको छ, मान्छेलाई मनोरञ्जन नभई नहुने आवश्यकता हो, कार्यालय, बैठक, काम अनेक कामको बोझले तनावको तह बढ्दा मान्छेलाई दुई मिनेट शान्त भएर एकान्तमा ‘रिफ्रेस’ हुने ठाउँ पनि छैन, त्यसैले पार्क निर्माण अवधारण ल्याएको हौं,’ उनले भने । एक वटा पार्क निर्माणको लागि ५० देखि एक करोड रुपैयाँ बजेट राख्ने योजना रहेको पनि श्रेष्ठले बताए । पार्क निर्माण सुरु भएको एक वर्ष भित्रमा सम्पन्न लक्ष्य छ । ‘हामीले थोरै बजेटमा आकर्षक पार्क बनाउन खोजेका हौं, अहिले विभिन्न पालिकाहरूले पार्कको विषय बुझिरहनु भएको छ, केही पालिकाले विवरण पनि पेश गरिसक्नु भएको छ, विवरण पेश भएको ठाउँको अनुगम गर्ने पार्क निर्माणको काम अगाडि सर्छौं,’ उनले विकासन्युजसँग भने । हालसम्म शंखरापुर नगरपालिकाले मात्रै पार्क बनाउनका लागि आशय पत्र पेश गरेको छ ।

सत्तारुढ गठबन्धनलाई अगाडी बढाउने पक्षमा नेकपा एकीकृत समाजवादी

काठमाडौं । नेकपा (एकीकृत समाजवादी) वर्तमान सत्तारुढ गठबन्धनलाई अगाडी बढाउनुपर्ने पक्षमा उभिएको छ । मंगलवार पार्टी केन्द्रिय कार्यालयमा बसेको नेकपा (एकीकृत समाजवादी) को बैठकले वर्तमान सत्तारुढ गठबन्धनलाई अगाडी बढाउनुपर्ने निस्कर्ष निकालेको हो । बैठकपछि सञ्चारकर्मीहरुसँग संक्षिप्त कुराकानी गर्दै अध्यक्ष माधवकुमार नेपालले देश दक्षिणपन्थी दिशातिर जाने खतरा रहेको भन्दै आफूहरुले शतर्क हुनुपर्ने आवश्यकताको महशुुुस गरेको बताए । उनले गठबन्धनका दलहरुका बीचमा भइरहेको सहकार्यलाई अगाडी बढाएर लानुपर्ने बताए । त्यस्तै सचिवालय बैठकमा पार्टीका सम्मानित नेता झलनाथ खनालले आफ्नो निर्वाचन क्षेत्रमा पुनः मतदान हुनुपर्ने माग राखेको सन्दर्भमा सो विषयमासमेत छलफल भएको उनले जानकारी दिए । बैठकमा उदयपुर जिल्लाको विषयमा पनि छलफल भएको उनले बताए । उनले भने – ‘हाम्रो पार्टीले देशभर पाएको मतको छलफल गर्यौँ । इलाममा अनेकौँ खालका विसंगतिहरु देखिएको सन्दर्भमा उम्मेदवार भएका झलनाथ खनालले गम्भिर आपत्ति जनाएर वक्तव्य दिएका सन्दर्भमा कुनै कानूनी उपचारमा जाने र पुनः मतदानको माग गर्ने कुरा उनले उठाएका छन् । त्यस बारेमा छलफल भएको छ । देश कतै दक्षिणपन्थी दिशातिर त जाँदैन भन्ने कुरालाई हामीले गम्भिरताकासाथ लिनुपर्ने र शतर्क हुनुपर्ने आवश्यकता महशुस गर्यौँ । यस हिसावमा गठबन्धनका दलहरुसँगको हाम्रो सहकार्य छ, त्यो सहकार्यलाई अगाडी बढाएर लैजानुपर्छ भन्ने हामीले ठानेका छौँ ।’ बैठकले पार्टीलाई मतदान गर्ने मतदाता, समर्थक, शुभचिन्तक र मतदान सम्पन्न गराउन भुमिका खेल्ने सरकारी निकायहरुलाई धन्यवाद ज्ञापन गरेको प्रवक्ता जगन्नाथ खतिवडाले बताए । उनले गठबन्धनका कारण प्राप्त गरेका उपलब्धीहरुलाई रक्षा गर्दै आगामी दिनमा पनि गठबन्धनकै भावन अनुसार काम गर्ने पार्टीको निस्कर्ष रहेको स्पष्ट पारे । उनले भने  ‘आज जे–जस्तो मत परिणाम हामीले प्राप्त गर्यौँ । यो मत परिणाम हामीले सोचेजस्तो छैन । तर सोचेजस्तो छैन भन्दैमा हामीले गठबन्धन सँगसँगै लागेर गठबन्धनका कारणले प्राप्त गरेका उपलब्धीहरुलाई रक्षा गर्नुपर्छ भन्ने ठाउँमा र गठबन्धनको भावना अनुसार भोलिपनि काम गर्नुपर्छ भन्ने ठाउँमा यो निस्कर्षमा हामी पुगेका छौँ ।’ उनले निर्वाचनको समग्र समिक्षा भने सबै जिल्लाहरुबाट रिपोर्ट आइसकेपछि आगामी बैठकहरुमा गरिने बताए ।

सानिमा लाइफको बोनस सेयर नेप्सेमा सूचीकृत

काठमाडौं । सानिमा लाइफ इन्स्योरेन्सको बोनस सेयर नेपाल स्टक एक्सचेन्जमा सूचिकृत भएको छ । कम्पनीको ८ लाख ४० हजार कित्ता सेयर नेप्सेमा सूचिकृत भएको हो । कम्पनीले गत आर्थिक वर्षको मुनाफाबाट सेयरधनीलाई ४।२० प्रतिशत बोनस शेयर वितरण गरेको थियो । उक्त बोनस शेयर मंगलबार नेप्सेमा सूचीकृत भएको हो । नेप्सेमा सूचीकृत उक्त बोनस सेयर, सम्बन्धीत सेयरधनीको डिम्याट खातामा आएपछि दोस्रो बजारमा किनबेच गर्न सकिनेछ ।

सरकारले लिएको ऋण जनताले तिर्नुपर्ने अवस्था आउनसक्छ : गोल्छा

काठमाडौं । नेपाल उद्योग वाणिज्य महासंघका अध्यक्ष शेखर गोल्छाले सरकारले लिएको ऋण जनताले तिर्नुपर्ने अवस्था आउन सक्ने बताएका छन् । मंगलबार महासंघले अर्थतन्त्र बचाऔं भन्ने विषयमा गरेको कार्यक्रममा उनले यस्तो बताएका हुन् । उनले अब आउने सरकारले अर्थतन्त्र जोगाउने योजना नल्याए मुलुक गम्भीर संकटमा पर्ने बताए । गोल्छाले आर्थिक वृद्धिदर पूरा गर्न सम्भव भएपनि राष्ट्र बैंकको निर्णयका कारण असम्भव हुन पुगेको बताए । ‘राष्ट्र बैंकको अपरिपक्व निर्णय ले अर्थतन्त्र संकटमा परेको छ, कर्जा प्रवाह गर्दा सचेतना अपनाएको भए अर्थतन्त्र संकटमा पर्ने थिएन । अनियंत्रित कर्जा प्रवाह गर्दा अर्थतन्त्र संकटमा पर्न गएको हो,’ उनले भने । यस्तै, गोल्छाले चालू पूँजी कर्जा मार्ग दर्शन संकट परेको बेलामा ल्याएकोमा आपत्ति जनाएका  छन् । उनले अर्थतन्त्र संकटमा परेको बेला निर्देशिका ल्याउन आवश्यक नरहेको बताउँदै मार्गदर्शन तत्काल स्थगन गर्नुपर्ने बताएका छन् ।  

समानुपातिक मतगणना : कति दलले पाउलान् राष्ट्रिय मान्यता ?

काठमाडौं । प्रतिनिधिसभा र प्रदेशसभा सदस्यको यही मङ्सिर ४ गते सम्पन्न मतदानको मतपरिणाम आउने क्रम अन्तिम चरणमा छ । पछिल्लो मतपरिणामअनुसार प्रतिनिधिसभाको समानुपातिकतर्फ आज साँझसम्म ९८ लाख आठ हजार नौ सय २७ मत गणना सम्पन्न भएको छ । निर्वाचन आयोगकाअनुसार हालसम्म नेकपा एमालेले सबैभन्दा बढी मत २६ लाख ४३ हजार ८२ मत प्राप्त गरेको छ । त्यसपछि बढी नेपाली कांग्रेसले २४ लाख ९८ हजार सात सय ७८ मत पाएको छ । नेकपा माओवादी केन्द्रले ११ लाख २७ हजार सात सय १०, राष्ट्रिय स्वतन्त्र पार्टीले १० लाख ८५ हजार पाँच सय ६४, राष्ट्रिय प्रजातन्त्र पार्टीले पाँच लाख ५९ हजार दुई सय २५, जनता समाजवादी पार्टी नेपालले तीन लाख ७६ हजार आठ सय ६८, जनमत पार्टीले तीन लाख ३३ हजार चार सय ९३, नेकपा ९एकीकृत समाजवादी०ले दुई लाख ७६ हजार नौ सय ११ र नागरिक उन्मुक्ति पार्टीले दुई लाख ४६ हजार ८३ मत प्राप्त गरेको आयोगले जनाएको छ । यस निर्वाचनमा जम्मा एक करोड ७९ लाख ८८ हजार पाँच सय ७० मतदाता थिए । त्यसमध्ये ६१ प्रतिशत अर्थात् करिब एक करोड नौ लाख हाराहारीमा मत खसेको थियो । राजनीतिकदल सम्बन्धी ऐनमा प्रतिनिधिसभाको निर्वाचनमा समानुपातिक निर्वाचन प्रणालीतर्प खसेको सदर मतको कम्तीमा तीन प्रतिशत मत र पहिलो हुने निर्वाचित हुने निर्वाचन प्रणालीतर्प एक सिट प्राप्त गर्ने दलले मात्र राष्ट्रिय दलको मान्यता प्राप्त गर्ने उल्लेख छ । प्रतिनिधिसभामा एक सिट प्रत्यक्षसहित समानुपातिकतर्फ कम्तीमा तीन लाख हाराहारी मत प्राप्त गर्ने दलले मात्रै यस निर्वाचनमा राष्ट्रिय दलको मान्यता पाउने देखिन्छ । अहिलेसम्म ९८ लाख आठ हजार नौ सय २७ मत गणना हुँदा सात दलले ‘थ्रेस होल्ड’ सीमा पार गरिसकेका छन् । एमाले, कांग्रेस, माओवादी केन्द्र, राष्ट्रिय स्वतन्त्र पार्टी, राप्रपा, जसपा नेपाल र जनमत पार्टीले गणना भएको मतबाट तीन प्रतिशत भन्दा बढी मत कटाएका छन् । पछिल्लो मतगणनाको तथ्याङ्कको आधारमा नेकपा ९एकीकृत समाजवादी० दुई लाख ७६ हजार नौ सय ११ र राष्ट्रिय उन्मुक्ति पार्टीले दुई लाख ४६ हजार ८३ मत प्राप्त गरेका छन् । २०७४ मा पाँच राष्ट्रिय दल विसं २०७४ को प्रतिनिधिसभा र प्रदेशसभा सदस्य निर्वाचनमा पाँच दलले निर्वाचन ऐनले तोकेको थ्रेस होल्ड पार गरी राष्ट्रिय दलको मान्यता पाएका थिए । सो निर्वाचनमा एमाले, कांगरेस, माओवादी केन्द्र, राष्ट्रिय जनता पार्टी नेपाल र सङ्घीय समाजवादी फोरम नेपालले राष्ट्रिय मान्यता प्राप्त गरेका थिए । उक्त निर्वाचनमा एमालेले ३१ लाख ७३ हजार चार सय ९४, कांग्रेसले ३१ लाख २८ हजार तीन सय ८९, माओवादी केन्द्रले १३ लाख तीन हजार सात सय २१, राजपा नेपालले चार लाख ७२ हजार दुई सय ५४ र सङ्घीय समाजवादी फोरम नेपालले चार लाख ७० हजार दुई सय एक मत प्राप्त गरेका थिए । उक्त निर्वाचनमा प्रतिनिधिसभाको समानुपातिकतर्फ एमालेले ४१, कांगे्रसले ४०, माओवादी केन्द्रले १७, राष्ट्रिय जनता पार्टी नेपालले छ स्थान र सङ्घीय समाजवादी फोरम नेपालले छ सिट प्राप्त गरेको आयोगको तथ्याङ्क छ ।

राष्ट्र बैंकले घटाइदियो मेगा बैंकको लाभांश, अब सेयरधनीले कति पाउँछन् ?

काठमाडौं । नेपाल राष्ट्र बैंकले मेगा बैंकको प्रस्तावित लाभांश घटाइदिएको छ । राष्ट्र बैंकले मेगा बैंकको प्रस्तावित नगद लाभांश ०.०४ प्रतिशतले घटाइदिएको हो । यस अघि प्रस्तावित बैंकको नगद लाभांश ३.८३ बाट ०.०४ घटेर ३.७९ प्रतिशत भएको छ । यद्यपी बैंकको बोनस लाभांश भने यथावत रहेको छ । यसअघि मेगा बैंकले हाल कायम चुक्ता पुँजीको ४ प्रतिशत बोनस सेयर र ३.८३ प्रतिशत नगद लाभांश गरी कुल ७.८३ प्रतिशत लाभांश वितरण गर्ने प्रस्ताव गरेको थियो जनु घटेर ७.७९ भएको छ ।

एनएलजी इन्स्योरेन्सका २३७ बीमितले कोरोना बीमाको भुक्तानी पाउने

काठमाडौं । एनएलजी इन्स्योरेन्स कम्पनीले पहिलो लटमा २३७ जना बीमितलाई कोरोना बीमाको दावी भुक्तानी दिने भएको छ । कम्पनीले मंगलबारदेखि एकल तथा पारिवारिक बीमालेख अन्तर्गत पहिलो दावीकर्ताहरुलाई प्राथमिकतामा राखी उक्त बीमितहरुलाई भुक्तानीको दिन थालेको हो । कम्पनीले नेपाल सरकार, अर्थमन्त्रालय, वित्तीय क्षेत्र व्यवस्थापन तथा संस्थान समन्वय महाशाखा र नेपाल बीमा प्राधिकरणको निर्देशन बमोजिम भुक्तानी गर्ने छ । इन्स्योरेन्सले दावी फर्छौट हुने कोरोना बीमा दावीकर्ताहरुको विवरण कम्पनीको वेवसाइटमा उपलब्ध गराएको छ । साथै, विवरणमा रहेका बीमितहरुलाई समयमै भुक्तानी लिनसमेत कम्पनीले आग्रह गरेको छ । त्यस्तै, कम्पनीले बीमितहरुलाई भुक्तानीमा सहज गराउन लागि दुई जनाको कर्मचारीको फोन नम्बर समेत उपलब्ध गराएको छ । यससँगै बीमितले नीरोज रेग्मीलाई ९८४३७३७०३९ र रबी मर्हजनलाई ९८६१७९०४०६ मा सम्पर्क गर्न सक्नेछन् ।