आँधीका कारण न्युजिल्यान्डमा विद्युत्, उडान र यातायात सेवा अवरूद्ध
काठमाडौं । न्युजिल्यान्डको उत्तरी भागमा आएको उष्णकटिबन्धीय आँधीका कारण सोमबार हजारौं घरहरु विद्युतविहीन हुनुका साथै उडानहरु अवरुद्ध भएका छन् । आपतकालीन व्यवस्थापन मन्त्री किरन म्याकएनल्टीले तीव्र हावा र भारी वर्षाको ‘अत्यधिक खतरनाक’ संयोजनको कारण देशले व्यापक क्षति व्यहोर्नुपरेको छ । आँधीको अवस्था शुरूमाभन्दा कमजोर भएपनि यसले शहर तथा ग्रामिण क्षेत्रमा व्यापक रूखहरु ढालेको छ, सडकहरुमा क्षति पुर्याएकाे छ र विद्युत लाइन अवरूद्ध भएका छन् । अकल्याण्डसहित उत्तरी पाँच क्षेत्रमा आपतकालीन अवस्था घोषणा गरिएको छ । न्युजिल्यान्डको नर्थ आइल्याण्डमा करिब ५८ हजार मानिस विद्युत्विहीन भएका छन् । अधिकारीहरूले यो सञ्जाल पुनःस्थापित गर्न केही दिन लाग्न सक्ने बताएका छन् । म्याकएनल्टीले भने, ‘जबसम्म मौसम खराब रहन्छ, तबसम्म नेटवर्कमा काम गर्न वास्तवमा असुरक्षित छ । न्युजिल्यान्डको सबैभन्दा ठूलो सहरमा गत महिना आएको बाढीका कारण चार जनाको मृत्यु हुनुका साथै हजारौं मानिस विस्थापित बनेका थिए । उक्त क्षतिको घाउ नमेटिँदै यो अर्को प्राकृतिक विपत्ति आएको छ । नर्थल्याण्ड क्षेत्रमा १४० किलोमिटर प्रतिघण्टाको रफ्तारमा आएको हावाहुरीले क्षति पुर्याएको थियो भने अकल्याण्ड हार्बर ब्रिजमा ११० किलोमिटर प्रतिघण्टाको वेगले आँधीले प्रवेश गरेको थियो । म्याकएनल्टीले भने, ‘सरकारले देशको इतिहासमा तेस्रो पटक राष्ट्रिय आपतकालीन अवस्था घोषणा गर्ने बताइरहेको छ । मेरो विचारमा आपतकालीन अवस्थाको घोषणा गरिहाल्नु पर्दैन । किनकि आँधीको रफ्तार कमजोर भइसकेको छ ।’ मौसमले न्युजिल्यान्डको यातायात सञ्जाललाई पनि तहसनहस पारेको छ, उडान, रेल र बस तालिकाहरू सबै नराम्ररी प्रभावित भएका छन् । एयर न्युजिल्यान्डले हालसम्म ५०९ उडान रद्द गरेको तर मङ्गलबारदेखि सामान्य उडान सुरु हुने अपेक्षा गरिएको जनाएको छ । उक्त विमान सेवालेले १० हजारभन्दा अन्तर्राष्ट्रिय सेवाग्राहीहरू प्रभावित भएको र छ हजार ५०० लाई पुनः टिकट बुक गर्नु परेको बताएको छ । रासस
नेपाल विद्युतीय व्यवसायी महासंघको अध्यक्षमा देवकोटा, यस्तो बन्यो नयाँ कार्यसमिति
काठमाडौं । विद्युतीय व्यवसायीहरूको छाता संस्था नेपाल विद्युतीय व्यवसायी महासंघको अध्यक्षमा रेशम प्रसाद देवकोटा निर्वाचित भएका छन् । माघ २८ गते सम्पन्न तेह्रौं वार्षिक साधारण सभा एवं पाँचौं महाधिवेशनबाट देवकोटा अध्यक्ष पदमा निर्वाचित भएका हुन् । उनी महासंघको छैठौं कार्यकालका लागि अध्यक्षमा निर्वाचित भएका हुन् । यससँगै उक्त महाधिवेशनले आगामी तीन वर्षको पदाधिकारी तथा कार्यसमिति सदस्यहरु निर्वाचित गरेको छ । त्यस्तै, प्रथम उपाध्यक्षमा प्रेम बहादुर जि. सि., द्धितीय उपाध्यक्ष (एसोसियट)मा कोमल पोखरेल, तृतीय उपाध्यक्षमा लेखनाथ सापकोटा, महासचिवमा गोपाल अग्रवाल र कोषाध्यक्षमा प्रकाश चन्द्र पाण्डे निर्वाचित भएका छन् । यसैगरी, बिनोद लुईटेल सचिवमा, महेन्द्र कुमार श्रेष्ठ सह-कोषाध्यक्षमा चयन भएका छन् । यता सदस्यमा शंकरप्रसाद पोख्रेल, केशव ढकाल, राजेश गौतम, शिवराज रिजाल र चन्द्रकान्त जैसी शर्मा खुलातर्फबाट निर्वाचित भएका छन् । साथै, प्रदेश सदस्यहरुमा प्रदेश नं.१ बाट चन्द्रमणि देवकोटा, मधेस प्रदेशबाट मनोज कुमार अग्रवाल, बागमती प्रदेशबाट सरोज कुमार रेग्मी, गण्डकी प्रदेशबाट राजु भण्डारी, लुम्बिनी प्रदेशबाट लोकनाथ पोखरेल, सुदुरपश्चिम प्रदेशबाट विष्णुराज भट्ट निर्वाचित भएका छन् । त्यस्तै, एसोसियट् सदस्यमा पुरुषोत्तम अधिकारी र बालकृष्ण अग्रवाल गरी दुई जना चयन भएका छन् ।
सुख्खा बन्दरगाह त्रिदेशीय साझेदारीको रणनीतिअनुसार निर्माण हुनेछ : प्रधानमन्त्री
कञ्चनपुर । प्रधानमन्त्री पुष्पकमल दाहाल ‘प्रचण्ड’ले कञ्चनपुरको दोधरा-चाँदनी नगरपालिकामा प्रस्तावित सुख्खा बन्दरगाह त्रिदेशीय रणनीति अनुसार निर्माण हुने बताएका छन् । साेमबार आयोजित कार्यक्रममा उनले सो बन्दरगाह निर्माणपछि सुदूरपश्चिम प्रदेशका साथै समग्र मुलुकको आर्थिक विकासमा महत्वपूर्ण योगदान पुग्ने बताए । ‘सुख्खा बन्दरगाह त्रिदेशीय साझेदारीको रणनीति अनुसार निर्माण हुनेछ’, उनले भने, ‘हामी भारत र चीनको विकासबाट लाभ लिने उपायको खोजीमा छौँ, यो रणनीति अघि बढाउन बन्दरगाहले सहयोग पुर्याउने विश्वास छ ।’ उनले सुख्खा बन्दरगाहले नेपाल, भारत र चीन तीन वटै देशलाई फाइदा पुग्ने विश्वास व्यक्त गरे । प्रधानमन्त्री दाहालले बन्दरगाह निर्माणलाई उच्च प्राथमिकता दिएको समेत बताए । उनले हालै यसको वातावरणीय प्रभाव मूल्याङ्कन (ईआईए)को काम सकिएकाले समयमै निर्माण पूरा हुनेमा विश्वास व्यक्त गरे । ‘एमओयूमै भारत सरकारले तीन वर्षमा बन्दरगाह निर्माण गर्ने भनिसकेकाले मलाई निकै खुसी लागेको छ’, उनले भने, ‘यसबाट सुदूरपश्चिमका साथै मुलुकको विकासमा ठूलो योगदान पुग्नेछ।’ दोधारा-चाँदनी नगरपालिका वडा नं १, २ र ३ मा शुक्लाफाँटा राष्ट्रिय निकुञ्जको मध्यवर्ती वन क्षेत्रको जग्गा प्रयोग गर्ने गरी नेपाल इन्टरमोडल यातायात विकास समितिले सुख्खा बन्दरगाहको ईआईएमा सुझाव माग गरेको छ। प्रस्तावित आयोजनाले वन क्षेत्रको एक सय ८९ हेक्टर जग्गा भू-उपयोग परिवर्तन हुने भनि प्रस्ताव गरेको छ । सुख्खा बन्दरगाहमा सडक, रेल्वे प्लेटफर्म, गोदाम, पार्किङ क्षेत्र, भन्सार, तौल पुल, कन्टेनर यार्ड, यात्रु टर्मिनल, पशुपन्छी/खाद्य जाँच केन्द्र प्रयोगशाला, बैंक, प्रहरी केन्द तथा प्रशासनिक भवन निर्माण हुनेछन् । जसमा गोदामको क्षेत्रफल आयाततर्फ सात हजार वर्गमिटर, निर्यातका लागि दुई हजार पाँच सय वर्गमिटर, रेल्वे वेयर हाउस १७ हजार पाँच सय वर्गमिटर र १० हजार वर्गमिटर क्षेत्रफलको कन्टेनर स्ट्याकिङ यार्ड निर्माण हुनेछ । उक्त अवसरमा प्रधानमन्त्री दाहालले महाकाली नदीमा निर्माणाधिन चार लेनको पक्की पुलको समेत निरीक्षण गरेका थिए ।
नेपालले टर्कीका भूकम्प पीडितका लागि पठायो २२ टन राहत सामग्री
काठमाडौं । नेपाल सरकारले टर्किएका भूकम्प पीडितका लागि औषधि, चिकित्सा उपकरण, न्यानो कपडा र अन्य आधारभूत सामग्री राहतस्वरुप पठाएको छ । भूकम्पपीडितका लागि २२ टनभन्दा बढी राहत सामग्रीको पहिलो ढुवानी आज त्यसतर्फ पठाइएको हो । यही ६ फेब्रुअरीमा टर्किएमा गएको विनाशकारी भूकम्पपछि राहत तथा पुनःस्थापना कार्यमा ऐक्यबद्धता जनाउँदै राहत सामग्री पठाउने सरकारले निर्णय गरेको थियो । यसअघि ८ फेब्रुअरीमा परराष्ट्रमन्त्री डा बिमला राई पौड्यालले टर्कीएका समकक्षी मेभलुत काभुसोग्लुसँग टेलिफोन वार्तामा भूकम्पबाट भएको क्षतिमा टर्कीएका जनता र सरकारप्रति गहिरो समवेदना प्रकट गर्दै ऐक्यबद्धताका लागि सक्दो सहयोग गर्न नेपाल सरकार तयार रहेको बताएका थिए । परराष्ट्र मन्त्रालयले राहत सामग्री सहयोगका लागि सम्बन्धित सरकारी निकाय, निजी क्षेत्र र मानवीय संस्था तथा ढुवानीका लगि टर्किएस एयरलाइन्सलाई धन्यवाद दिएको छ ।
सन नेपाल लाइफले मृतक प्रेम आचार्यको परिवारलाई दियो ५० लाख रुपैयाँ
काठमाडौं । प्रेम आचार्यको परिवारलाई बीमा कम्पनीले ५० लाख १२ हजार एक सय ९४ रुपैयाँ दाबी भुक्तानी गरेको छ । सन नेपाल लाइफ इन्स्योरेन्स कम्पनीले जीवन बीमावापतको रकम परिवारलाई हस्तान्तरण गरेको हो । नयाँ बानेश्वरमा आत्मदाहको प्रयास गरेका प्रेम आचार्यको उपचारका क्रममा र्कीतिपुरस्थित बर्न अस्पतालमा भोलिपल्ट विहान मृत्यु भएको थियो । कम्पनीले दाबी भुक्तानी वापतको मृतककी श्रीमती नानुका अधिकारीको नाममा चेकमार्फत् हस्तान्तरण गरेको कम्पनीका इलाम शाखाका प्रमुख टङ्क श्रेष्ठले बताए । आचार्यको निधनभएपछि उनको परिवारलाई देश विदेश तथा विभिन्न व्यक्ति तथा सङ्घ संस्थाबाट सहयोग प्राप्त हुँदै आएको छ । रासस
जनयुद्ध दिवसको नाममा सार्वजनिक बिदा दिएकोमा विरोध प्रदर्शन
काठमाडाैं । सरकारले फागुन १ गते जनयुद्ध दिवसको नाममा सार्वजनिक बिदा दिएकोप्रति विरोध प्रदर्शन गरिएको छ । सरकारले जनयुद्ध दिवस भन्दै सोमवार सार्वजनिक बिदा दिएकोप्रति द्वन्द्वपीडित समुदाय र नागरिक समाजले विरोध प्रदर्शन गरेका हुन् । काठमाडौं जिल्ला अदालत अगाडी भेला भएर दर्जनौँको संख्यामा उपस्थित नागरिक समाज, मानवअधिकारवादी संघसंस्थासँग आवद्ध व्यक्तिहरु र द्वन्द्व पीडितले सरकारको निर्णयको विरोध गरेका हुन् । उनीहरुले जनयुद्ध दिवसको नाममा दिइएको सार्वजनिक बिदा खारेज गर्नुपर्ने र द्वन्द्वपीडितलाई न्याय दिनुपर्ने माग राखेका छन् । त्यस्तै फाुगन १ गते नेपाल र नेपालीको लागि कालो दिनको रुपमा रहेको उल्लेख गरेका छन् । बिरोध प्रदर्शन कार्यक्रममा सञ्चारकर्मीहरुसँग संक्षिप्त कुराकानी गर्दै मानवअधिकारवादी सुशिल प्याकुरेलले जनयुद्ध दिवस भनि बिदा दिनु ज्यादती भएको बताए । उनले प्रधानमन्त्री पुष्पकमल दाहालले जनयुद्ध दिवसको बिदा दिँदापनि अन्य लोकतान्त्रिक भनिने पार्टीहरु नबोलेका भन्दै लोकतान्त्रिक पार्टीहरुको निरिहता दिवसको रुपमा मनाउनुपर्ने टिप्पणी गरे । मानवअधिकारवादी चरण प्रसाईंले वर्तमान सरकार पीडितको पक्षमा नभई पीडकको पक्षमा उभिएको बताए । उनले हत्या, हिंसा गरेको दिनलाई दिवसको रुपमा मनाउनु नाजायज भएको भन्दै आफूहरुले त्यसको घोर बिरोध गरेको बताए । त्यस्तै अर्का मानवअधिकारवादी महामुनिश्वर आचार्यले फागुन १ गतेलाई जनयुद्ध दिवसको रुपमा स्वीकार्न नसकिने बताए । उनले जनयुद्ध नभइ सशस्त्र हिंसात्मक बिद्रोह भएको बताए । द्न्द्वपीडित परिवारले आफूहरुले अझै न्याय नपाएको बताएका छन् । जनयुद्धको नाममा भएको युद्धमा अझैपनि हजारौँ बेपत्ता भएको भन्दै उनीहरुको खोजि सरकारले नगरेको बताएका छन् । विरोध प्रदर्शनका क्रममा द्वन्द्वपीडितलाई न्याय दे, बेपत्ता आन्दोलन जारी छ , अदालतको फैसला लागू गर, दण्डहिनताको अन्त्य गर, हुकुमी शासन बन्द गर, लुटिएको सम्पती फिर्ता गर, हत्यारालाई फाँसी दे लगायतका नाराबाजी समेत भएको थियो ।
अर्थमन्त्रीको गनगन, सचिवको कर्के आँखा र सह-सचिवको चिट
काठमाडौं । आइतबार उपप्रधान तथा अर्थमन्त्री विष्णु पौडेलले चालु आर्थिक वर्षको अर्धवार्षिक समीक्षा गर्दै बजेट २ खर्ब ४४ अर्ब रुपैयाँले घटाए । हरेक वर्षको बजेट समीक्षापछि त्यसको जानकारी दिन पत्रकार सम्मेलन गर्ने अभ्यास छ । त्यही अभ्यासको निरन्तरता आइतबार अर्थमन्त्रीले पनि दिए । दिउँसो ३ बजे प्रतिनिधिसभाको बैठकमा चालू आर्थिक वर्षको बजेट घटाएको जानकारी गराएका पौडेलले साँझ ५ बजेका लागि पत्रकारहरुलाई अर्थमन्त्रालयको सुवर्ण हलमा बोलाए । बिहान ८ बजेर ७ मिनेटमा बजेटको अर्धवार्षिक समीक्षाका लागि भन्दै पत्रकारलाई निमन्त्रणा आयो । त्यसको ४ घण्टापछि अर्थात् दिउसो १२ बजेर ४४ मिनेटमा ५ बजेका लागि तय भएको पत्रकार सम्मेलन ६ बजेका लागि सारिएको भन्दै पुनः निमन्त्रणा पठाइयो । ६ बज्नु अगाडि नै अर्थमन्त्रालयको तेस्रो तलामा रहेको सुवर्ण हल पत्रकार सम्मेलनका लागि गएका सञ्चारकर्मीहरुले भरिभराउ थियो । ६ बज्यो । सबै सञ्चारकर्मीहरु अर्थमन्त्रीको पर्खाइमा थिए । हलमा अर्थमन्त्रालयका केही प्रतिनिधिहरु पनि थिए । सवा ६ बज्यो । अर्थमन्त्री आइपुग्ने सुरसार भएन । पत्रकारहरुले हलमा रहेका अर्थमन्त्रालयका प्रतिनिधिहरुलाई अर्थमन्त्री नआउने हुन् भनेर जिज्ञासा राख्न थाले । अब ५/१० मिनेट आइपुग्नु हुन्छ भन्ने ती प्रतिनिधिहरुको आवाज बनावटी थियो । त्यो बनावटी आवाज पटक-पटक सुनियो । पौने ७ बज्यो । हलभित्र भरिभराउ रहेका सञ्चारकर्मी हलबाट बाहिरिने क्रम बढ्दै थियो । पत्रकार सम्मेलन सकिएपछि ढिलो हुने भन्दै अर्थमन्त्रीका प्रेस संयोजक भुवन केसीले खाजाको प्रस्ताव गरे । खाजा आयो । सबैले खाजा खाए । ७ बज्यो । अहँ, अर्थमन्त्री आइपुगेनन् । पत्रकार सम्मेलन एक घण्टा ढिलो भइसकेको थियो । कतिपय पत्रकारहरुको धैर्यताको बाँध टुटिसकेको थियो । भरिभराउ रहेको सुवर्ण हल आधा भइसकेको थियो । ७ बजेपछि अर्थमन्त्रालयका केही उच्च अधिकारीहरु हलभित्र प्रवेश गरे । सहसचिव, सचिव, राष्ट्रिय योजना आयोगका उपाध्यक्ष लगायतको सहभागिता हलमा भयो । त्यसको १०/१२ मिनटेपछि अर्थात् ७ बजेर २० मिनेटमा हलमा आवागमन भयो उपप्रधान तथा अर्थमन्त्री विष्णुप्रसाद पौडेलको । हँसिलो, हतारिँदै र हस्याङ्ग फस्याङ्ग गर्दै आएका अर्थमन्त्री पौडेलको आसन बित्तिकै बजेट तथा कार्यक्रम महाशाखाका प्रमुख सहसचिव धनीराम शर्माले उनलाई बजेटको समीक्षाको विषयमा धारणा राख्न आग्रह गरे । उनले सुरुमै अर्थमन्त्रालयको सुवर्ण हलमा सम्पूर्ण पत्रकारहरुलाई स्वागत भन्दै कारणवस कार्यक्रम ढिलो हुन गएको र यो परिस्थितिको सम्पूर्ण जिम्मा आफुले लिने उद्घोष गरे । उनले त्यसपछि सरसर्ती बजेटको अर्धवार्षिक मूल्यांकन प्रतिवेदनमा उल्लेख मुख्य विषयहरुलाई करिब ९ मिनेट समय लगाएर सकाए र पत्रकारहरुको जिज्ञासाका लागि फ्लोर खुल्ला भएको जानकारी गराए । सुरुमै कान्तिपुर टीभीका सुमन पन्तले आफ्नो जिज्ञासा राखे । उनले सोधे, ‘आर्थिक वृद्धिको लक्ष्य भेटाउन सकिँदैन भनेर बजेट घटाउनु भएको छ, अब राजश्व संकलनको लक्ष्य कति हो, महँगी नियन्त्रण कत्तिमा राख्नु हुन्छ ? पन्तको जिज्ञासा लगत्तै हाम्रो अर्थ डटकममा आवद्ध मेनुका कार्कीले प्रत्येक वर्ष बजेटको आकार घटाउने र बजेटको लक्ष्य कहिल्यै हासिल नगर्ने परिपाटी किन बन्छ ? भनेर प्रश्न गरिन् । उनले थपिन्, ‘हामी डेढ घण्टादेखि पर्खिरहेका छौं, अर्थमन्त्रीज्यू, पत्रकारको पनि समय हुन्छ भन्ने बुझिदिनु होला ।’ सोही बिचमा अन्य पत्रकारहरुले पनि आफ्नो जिज्ञासा राखे । अन्तिममा जिज्ञासा राख्दै अन्नपूर्ण पोष्टमा आवद्ध रोविन पौडेलले पनि अर्थमन्त्री ढिलो गरि आएको प्रति गुनासो गरे । उनले समय तोकेरै ब्यांग्यात्मक किसिमले भने, ‘हामीले यो कार्यक्रम अघि नै मन्त्रीज्यूलाई १ घण्टा १९ मिनेट समय दिएका रहेछौं, धनयवाद ।’ पत्रकार सम्मेलनमा अर्थमन्त्री पौडेलले ७ मिनेट पत्रकारका जिज्ञासा सुने । जिज्ञासा राख्ने पत्रकारहरुको संख्या बढी नै थियो । तर, हतार भएको आभास दिलाउँदै उनले बिचमै प्रश्नको जवाफ दिन तर्फ लागे । जवाफमा सुरुमै उनले पुनः १ घण्टा १९ मिनेटको प्रशंग निकाले । ‘संसदबाट सिधै पत्रकार सम्मेलनमा आउने मन थियो, बिचमै मन्त्रिपरिषद् बैठक भयो, फेरि अर्कै कार्यक्रममा जानु पर्यो, यो परिस्थितिवस् बनेको हो, यसमा अन्यथा नसोच्नु होला,’ उनले भने । पत्रकारले राखेका जवाफमा उनले सुरुमै राखेका बजेटको समीक्षाका विषयहरु दोहोर्याउन थाले । प्रश्नको जवाफमा कुनै तुक थिएन । तुक यस मानेमा कि प्रश्न एउटा र जवाफ अर्कै थियो । उनले जवाफ दोहोर्याएको देखेर छेउमा बसेका सह-सचिवहरुले कागजमा लेखेर अर्थमन्त्रीको हातमा थमाउन थाले । सहसचिव धनीराम शर्माले पनि त्यसमा साथ दिए । एक जना सहसचिव पछाडिबाट आएर जवाफको चिट उनको हातमा राखे । अर्थमन्त्री पौडेलले त्यो चिटलाई समात्दै ती व्यक्तिलाई करिब दुई सेकेण्डसम्म नियाले । अर्थसचिव तोयम रायाले पनि कर्के आँखाले उनलाई हेरे । पौडेलले प्राप्त चिटहरुलाई हेरे जस्तो गरेर जवाफ बनावटी दिए । केही सञ्चारकर्मीहरुले बजेट कटौतीको विषयलाई राजनीतिसँग पनि जोडेर प्रश्न गरे । त्यसको जवाफमा अर्थमन्त्री पौडेलले यो इकोनोमिक फोरम भएपनि राजनीति पनि मिसिएको जवाफ फर्काए । उनले थपे, ‘स्रोत परिचालन र खर्च व्यवस्थापनको सम्भावना मूल्यांकन गरेर ‘रिसाइज’ गरिएको हो, जे गरेका छौं, कार्यान्वयन गर्छौं, मध्यावधिमा छौं, चालू आवको अन्त्यमा प्रश्न सोध्नु होला ।’ बजेटको अर्धवार्षिक समीक्षाका लागि पत्रकार सम्मेलन गरिएको भएपनि त्यसमा बढी प्राथमिकता भने मन्त्रीको ढिलाईसुस्तीले पायो । उनले आफैले पनि बारम्बार माफी मागिरहे । तर, पत्रकारहरुले उनलाई उनको ढिलाइको जवाफ भने माग्न छोडेनन् । त्यसको एउटा हिस्सा र प्रश्न एउटा यो पनि हो । आखिर, उच्च पदस्थहरुको समयप्रतिको अटेर र ढिलासुस्ती कहिलेसम्म ?
भीमफेदी–कुलेखानी सडक आजदेखि २ महिना बन्द
मकवानपुर । मकवानपुरको भीमफेदी–कुलेखानी हुँदै काठमाडौँतर्फ जाने सडकखण्ड मर्मत गर्न आजदेखि दुई महिनाका त्यहाँबाट सवारी साधन सञ्चालनमा रोक लगाइएको छ । मकवानपुर जिल्ला प्रहरी कार्यालयकाअनुसार हेटौँडाबाट भीमफेदी कुलेखानी हुँदै काठमाडौँतर्फ जाने हल्का सवारी साधानलाई आज बिहानैदेखि मकवानपुरको चित्लाङ हुँदै थानकोटको बाटोबाट सवारीसाधन सञ्चालन गराइएको छ । उक्त कार्यालयका प्रहरी उपरीक्षक वामदेव गौतमका अनुसार काठमाडौँको बल्खुबाट हेटौँडातर्फ आउने हल्का सवारीसाधन (सुमो, जीप, कार, मोटरसाइकल र मिनी बस)लाई ललितपुरको भट्टेडाँडाबाट मकवानपुरको ठिङ्गन हुँदै कान्तिलोकपथबाट दुई महिनाका लागि यातायात सेवा सञ्चालनमा ल्याइएको जानकारी दिए । यसैबीच वाग्मती प्रदेशका मुख्यमन्त्री शालिकराम जम्मकट्टेल एवं मन्त्रीहरु र सरोकारसँग सम्बन्धित निकाय, यातायात व्यवसायी, स्थानीय प्रशासन र प्रहरीसहितको संयुक्तरुपमा बसेको बैठकले भीमफेदी कुलेखानी हुँदै काठमाडौँतर्फ जाने सडक मर्मत गर्ने निर्णय गरेकाले दुई महिनाका लागि यातायात सञ्चालनमा रोक लगाई कार्यान्वयन गर्न आजैदेखि कुलेखानी, थानकोट र भट्टेडाँडा कान्तिलोकपथमा अस्थायीरुपमा हल्का सवारीसाधन सञ्चालन गराइएकोे सहायक प्रजिअ नेत्रप्रसाद शर्माले बताए । वाग्मती प्रदेशको राजधानी हेटौँडाबाट काठमाडौँतर्फ र काठमाडौँबाट हेटौँडातर्फ करिब दुई हजारभन्दा बढी हल्का सवारीसाधन दैनिक सञ्चालनमा रहेको नारायणी यातायात व्यवसायी संघका महासचिव सरोजकुमार खनालले जानकारी दिए । रासस
