अब चालक अनुमतिपत्र नविकरण पाल्पाबाटै
पाल्पा । सवारी चालक अनुमतिपत्र नविकरण पाल्पाबाटै थालिएको छ । यसअघि सो कार्य बुटवल लगायतका स्थानबाट हुने गरेको थियो । सेवाग्राहीको सहजतालाई ध्यानमा राखेर जिल्लाबाटै सवारी चालक अनुमतिपत्र नविकरणको व्यवस्था गरिएको यातायात व्यवस्था सेवा कार्यालय पाल्पाका प्रमुख केशव सुनारले जानकारी दिए। कार्यालयले यही जेठ ४ गतेदेखि सवारी चालक अनुमतिपत्र नविकरणको काम थालेको छ । तानसेन नगरपालिका–७ बर्तुङ देवकोटा चोकस्थित कार्यालयबाट नविकरणको काम थालिएको प्रमुख सुनारले बताए ।
नीति तथा कार्यक्रममा हामीले उठाएका विषय समेटिएका छन् : महासङ्घ
काठमाडौं । निजी उद्योगी तथा व्यवसायीहरुको छाता सङ्गठन नेपाल उद्योग वाणिज्य महासङ्घले सरकारको नीति तथा कार्यक्रममा आफुले दिएको सुझाव सम्बोधन गरिएकामा प्रसन्नता व्यक्त गरेको छ । महासङ्घले अहिलेको आर्थिक अवस्था, अर्थतन्त्रको समग्र मागमा आएको ह्रास, तरलताको सङ्कुचन, उच्च ब्याजदर, मूल्य वृद्धि, न्यून पुँजीगत खर्च, घट्दो राजस्व परिचालन तथा बाह्य क्षेत्र सन्तुलनमा परेको चापलाई सम्बोधन गरिने विषय समावेश गरिएकामा प्रसन्नता व्यक्त गरेको हो । महासङ्घका नीति तथा कार्यक्रममा समावेश गरिएका विषयलाई बजेटले कुन दिशामा लिने हो र कसरी अनुसरण गर्ने वा समेट्ने हो त्यो हेर्नुपर्ने बताएको छ । महासङ्घका अध्यक्ष चन्द्रप्रसाद ढकालले नीति तथा कार्यक्रममा समावेश गरिएका विषयमा बजेटमार्फत कसरी सम्बोधन हुन्छ त्यो हेर्न बाँकी रहेको बताए । उनले महासङ्घले दिएका विषय जस्तै निजी क्षेत्रलाइ अर्थतन्त्रको मुख्य साझेदार मानेकामा खुसी व्यक्त गरे । सरकार र निजी क्षेत्रको बलियो साझेदारीमार्फत उत्पादन तथा उत्पादकत्व बढाउने विषयलाई नीति तथा कार्यक्रममा समावेश गरिएको छ । यस्तै विदेशी लगानीलाई प्राथमिकताका साथ परिचालन गरिने विषयलाई पनि महत्वका साथ समावेश गरिएको छ । राजस्व प्रशासनलाई थप सुदृढ र चुस्त बनाउने तथा कर प्रणालीमा पुनरावलोकन गर्ने, पुँजी बजारमा गैरआवासीय नेपालीका लगानी खुला गर्ने, विकास आयोजनाका लागि जग्गा प्राप्ति, वन क्षेत्रको उपयोग, वातवरणीय प्रभाव मूल्याङ्कन र खरिद प्रक्रियामा सरलीकरण गर्न कानुन ल्याउने जस्ता विषय नीति तथा कार्यक्रममा समेटिएका छन् । उद्योगलाई उपलब्ध गराइने जग्गाको हदबन्दी सीमा पुनरावलोकन, उद्योगलाई आवश्यक पहुँचमार्ग र प्रसारण लाइन लगानीकर्ता स्वयंले बनाएमा निश्चित रकम सोधभर्ना दिने उद्योगहरुमा निर्वाध विद्युत् आपूर्ति सुनिश्चित गर्ने जस्ता महत्वपूर्ण पक्षलाई नीति तथा कार्यक्रममा प्राथमिकताका साथ समावेश गरिएको छ । चुरे संरक्षण गर्दै वातवरणीय ह्रास नहुने गरी खनिज वस्तुको उत्पादन र निर्यातको सम्भावना खोजिने, संवत् २०८० को दशकलाई नेपाल भ्रमण दशकका रुपमा र सन् २०२५ लाई भ्रमण वर्षका रुपमा मनाउने तथा निजी क्षेत्रलाई विद्युत् व्यापारमा सहभागी गराउने विषयलाई समेटिएको छ । यस्तै आन्तरिक रोजगारी सिर्जना गर्न निजी क्षेत्रसँगको सहकार्यमा राष्ट्रिय सीप विकास तथा रोजगार कार्यक्रम सञ्चालन गर्ने जस्ता महासङ्घले राख्दै आएका विषयलाई राष्ट्रपति रामचन्द्र पौडेलले शुक्रबार सङ्घीय संसद्को संयुक्त बैठकमा प्रस्तुत गर्नुभएको नीति तथा कार्यक्रममा समावेश गरिएको जनाइएको छ ।
म व्यक्ति र पार्टीभन्दा माथि उठेर काम गरिरहेको छु : अर्थमन्त्री डा. महत
काठमाडौं । अर्थमन्त्री डा. प्रकाशशरण महतले प्रतिनिधिसभाअन्तर्गतको अर्थ समितिसँग अर्थतन्त्रमा अहिलेको सूचकहरूका बारेमा छलफल गरेका छन् । आज सिंहदरबारमा बसेको समिति बैठकमा अर्थतन्त्रको अवस्था र सूचकहरूका बारेमा अर्थमन्त्रीले छलफल गरेका हुन् । छलफलमा अर्थमन्त्री डा. महतलाई सांसदहरुले वर्तमान अर्थतन्त्रकाबारेमा विभिन्न जिज्ञासा राखेका थिए । सांसदहरुको जवाफ दिँदै मन्त्री डा. महतले भने, ‘स्वदेशमा अवसर छैन भने विदेशमा गएर आफ्नो उन्नति गर्ने ढोका बन्द गर्नु हुँदैन, तर हामी नेपालमै अवसरहरु सिर्जना गर्दै लैजाने हो, यो कुरालाई हामीले प्राथमिकतामा राख्नुपर्छ, यसमा दुई मत छैन, युवाहरुको क्षमता छ, देशभित्रै प्रयोग हुनुपर्छ भन्ने मान्यतालाई हामी प्राथमिकतामा राख्छौं ।’ ‘यही उत्पादन कसरी बढाउने भन्ने कुरालाई प्राथमिकतामा राख्नुपर्छ, नेपालमा अहिले जुन उद्योग व्यवसाय छ, त्यसमा धेरैजसो हाम्रो भ्यालु एडसिन कम छ, हामी चाहन्छौं, यो भ्यालु एडिसन ज्यादा भन्दा ज्यादा देशभित्र नै होस् भन्ने कुरा प्राथमिकतामा रहन्छ, नेपाली उद्योग व्यवसायीलाई प्रमोट गर्ने जस्ता कुरालाई आउँदो बजेटमा प्राथमिकता दिन्छौं, बढीभन्दा बढी नेपाली उद्योग व्यवसायलाई प्रवद्र्धन गर्ने नीतिमा हामी जान्छौं’, मन्त्री डा. महतले भने, ‘ज्ञानलाई सम्पूर्ण रुपमा उपयोग गरेर सिस्टममा भएको समस्यालाई धकेल्ने हो, समस्यालाई कसरी धकेलेर बाहिर निकाल्ने हो भन्ने कुरामा सबै जानकार हुनुहुन्छ ।’ अर्थमन्त्री डा. महतले आफ्नो ज्ञान र अनुभवलाई म उपयोग गर्ने तर म ठूलो स्वरमा कुरा नगर्ने बताए । ‘सुधारको आवश्यकता छ, यसलाई इमान्दारिका साथ काम गर्छु, तर दुई महिनाभित्र मेरो ज्ञान र अनुभव उपयोग गरेर सारा समस्या सफाचट हुन्छ म भन्दिन, अवश्य पनि नीति कार्यक्रममा क्रमशः सुधारहरु गरिनेछन्, धेरैजसो यसपाली गरिनेछ, कतिपय कुरा क्रमशः गरिँदै लगिने छ’, उनले भने । उनले बजेट विनियोजन पश्चात कार्यतालिका बनाएर समेत काम गर्ने बताउँदै आफूले राजनीतिक दल भन्दा पनि देश र जनता हेरेर काम गर्ने बताए । ‘मैले आफ्नो टिममा यी कुरा बलियोसँग राखेको छु, सिस्टमबाट आएका कुरा ठीक छन् कि छैनन यी सबै कुरा दिनरात म हेरिरहेको छु, यहाँ राजनीतिक दल यो वा त्यो भनेर हेरेको छैन । यहाँ देश र जनताको कुरा छ, म व्यक्ति र पार्टीभन्दा माथि उठेर काम गर्छु’, उनले भने । राजस्व उठाउने प्रयत्न गर्दागर्दै पनि ३०/४० प्रतिशत राजस्व चालु आवमा उठाउन नसकिने अवस्था रहेको अर्थमन्त्री महतको भनाइ छ । सांसदहरुसँग कुरा गर्दै उनले भने, ‘यो आर्थिक वर्षमै गति लिएर ३५–४० प्रतिशत बढी राजस्व उठाउन सक्छु भन्ने अवस्था छैन, ‘वैदेशिक ऋणले हाम्रो अर्थतन्त्रलाई सहयोग पुगेको छ कि छैन ? यसको समीक्षा हुन जरुरी छ, यो समीक्षा गरेर हाम्रो आवश्यकताअनुसार ल्याउन आजको भोलि नै सम्भव छैन, यसको पनि सीमा छ, योसँगै हामीले खर्च गर्ने क्षमता पनि देखाउन आवश्यकता छ ।’ सरकारले भुक्तानी गर्नुपर्ने सावाँब्याजको भार बढ्दै गएको र ऋण भुक्तानीमा ध्यान केन्द्रित गर्दा पुँजीगत खर्चमा दबाब सिर्जना हुने डा. महतले बताएका छन् । साथै उनले सामाजिक सुरक्षा खर्च र शिक्षामा लगानी कटाउन नसकिने पनि बताएका छन् । उनले प्रणालीमा देखिएको समस्या एकैपटक समाधान नहुने भन्दै आफूमाथि शंका र प्रश्न गर्दै सहयोग समेत गर्न सांसदहरुलाई आग्रह गरेका छन् ।
नक्कली भुटानी शरणार्थी प्रकरणमा कसैले कसैलाई बचाऊ गर्ने अवस्था छैन : सञ्चारमन्त्री शर्मा
काठमाडौं । सञ्चार तथा सूचना प्रविधिमन्त्री रेखा शर्माले नक्कली भुटानी शरणार्थी प्रकरणमा कसैले कसैलाई पनि बचाऊ गर्न सक्ने अवस्था नरहेको बताएकी छन् । नेपाल सरकारका प्रवक्ता समेत रहेकी उनले सरकारले आँफै भित्र त्यो देखिएपनि त्यसलाई कारबाही गरेर अघि बढने संकल्प लिएको पनि स्पष्ट पारिन् । प्रेस सेन्टर नेपाल, प्रतिष्ठान प्रदेश समितिले शनिबार काठमाडौंमा आयोजना गरेको एक कार्यक्रममा बोल्दै उनले सरकारले राम्रो कामको सुरुवात गरिरहेको दावी समेत गरिन् । मन्त्री शर्माले माओवादी मन्त्रीहरुले विगत र अहिले पनि अरु दलका मन्त्रीहरुले भन्दा रामो काम गरिरहेको जिकीर पनि गरिन् । बदमासी माओवादी पार्टीबाट मन्त्री बनेकाहरुले पनि गरेको हुन सक्ने स्विकार गर्दै उनले अरु दलका मन्त्रीहरुको तुलनामा भने कम गल्ती गरेको बताइन् । उनले प्रधानमन्त्री पुष्पकमल दाहालले आफ्नो तेस्रो कार्यकाल बढी सुझबुझपूर्ण ढंगले अघि बढाएको भन्दै प्रशंशा समेत गरिन् । मन्त्री शर्माले भनिन्, ‘अहिले सरकारले राम्रो सुरुवात गरेको छ । अस्ती हाम्रो प्रधानमन्त्रीले प्रश्नोत्तरको बेलामा बोल्नु भयो, त्यो बोलिरहँदा एउटा कन्डिशन के देखियो भने हिजोदेखि अहिलेसम्मका सरकार हेरौं, हिजो केपी ओलीले नेतृत्व गर्दा होस्, शेरबहादुर देउवाले नेतृत्व गर्दाहोस्, जसले नेतृत्व गर्दाहोस–माओवादी मन्त्रीहरु त्यतिधेरै बदनाम छैनन् ।’ मन्त्री शर्माले सरकारले राम्रो काम गरिरहेको उल्लेख गर्दै त्यसको प्रचारप्रसारको काम गरिदिन पनि सञ्चार माध्यामहरुलाई आग्रह गरिन् ।
बुद्ध एयरको जहाजमा मुसा देखिएपछि…..
फाइल फोटो काठमाडौं । जनकपुरबाट काठमाडौं उडान भर्ने तयारीमा रहेको बुद्ध एयरको जहाजमा मुसा देखिएपछि उडान स्थगित गरिएको छ । उक्त जहाज काठमाडौं उड्नै लाग्दा यात्रुले मुसा देखेपछि उडान रोकेर अहिले इन्जिनियरहरुले प्राविधिक मर्मत गरिरहेका छन् । बिहान ९ः१५ बजे जनकपुरबाट काठमाडौं उडान तालिका रहेको जहाजमा यात्रुले मुसा देखिपछि उडान रोकेर जहाजको प्राविधिक चेकजाँच भइरहेको नेपाल नागरिक उड्डयन प्राधिकरणका प्रवक्ता जगन्नाथ निरौलाले जानकारी दिए । उक्त जहाज काठमाडौंबाट उडान भरेर बिहान साढे ८ बजे जनकपुर पुगेको थियो । जहाजमा ४९ यात्रु रहेका थिए । प्रवक्ता निरौलाले जहाजमा मुसा देखिएको खबर पाएपछि काठमाडौंबाट इन्जिनियरको टोलीले जनकपुर गएर जहाजको परीक्षण गरेपछि मात्रै उडान गरिने बताए । बुद्ध एयरका सूचना अधिकारी दीपेन्द्रकुमार कर्णका अनुसार उक्त जहाज अहिले इन्जिनियरले चेकजाँच गरिरहेका छन् । प्राविधिक परीक्षणपछि जहाज सञ्चालनमा आउनेछ । सो जहाजका यात्रुलाई अर्को जहाजमार्फत काठमाडौं ल्याइसकिएको कर्णले बताए ।
नीति तथा कार्यक्रमको व्यावहारिक कार्यान्वयनमा चेम्बरको जोड
काठमाडौं । नेपाल चेम्बर अफ कमर्सले सरकारले प्रस्तुत गरेको आगामी आर्थिक वर्षको नीति तथा कार्यक्रमको व्यावहारिक कार्यान्वयनमा जोड दिएको छ । आज एक विज्ञप्ति जारी गर्दै चेम्बरले मुलुकको आन्तरिक अर्थतन्त्र जोखिमको अवस्थामा रहेका बेला नीति कार्यक्रम परिणाममुखी हुने विश्वास लिएको छ । नीति तथा कार्यक्रममा समावेश गरिएका विषयलाई बजेटमार्फत सम्बोधन गर्न चेम्बरले सरकारको ध्यानाकर्षण गराएको छ । चेम्बरद्वारा जारी विज्ञप्तिमा भनिएको छ, ‘हालको आर्थिक मन्दी र लगानीमा देखिएको सङ्कुचनलाई नीति तथा कार्यक्रमले पर्याप्त मात्रामा समावेश गर्न सकेको छैन, आर्थिक स्थायित्व कायम गर्ने गरी आगामी बजेट आउन आवश्यक छ ।’ नीति तथा कार्यक्रमले आंशिकरुपमा भए पनि निजी क्षेत्रका माग भने सम्बोधन गरेको चेम्बरका अध्यक्ष राजेन्द्र मल्लले बताए । उनले भने, ‘निजी क्षेत्रले उठाएका केही माग सम्बोधन भएका छन्, उत्पादनमुखी कार्यक्रम, औद्योगिक विकास र सार्वजनिक निजी साझेदारी अवधारणालाई प्रभावकारी बनाउने गरी नीति कार्यक्रम कार्यान्वयन गर्न आवश्यक छ ।’ नीति तथा कार्यक्रममा महत्वाकाङ्क्षी योजना घोषणा हुने तर कार्यान्वयनको पाटो फितलो हुने समस्याप्रति पनि चेम्बरले सरकारको ध्यानाकर्षण गराएको छ । कमजोर धरातलमा आएको नीति तथा कार्यक्रम सकारात्मक भए पनि सीमित स्रोत र साधनका कारण कार्यान्वयनको पाटो जोखिम रहेको चेम्बरको ठहर छ । नीति तथा कार्यक्रम ‘कनिका छरेजस्तो’ बनाउने भन्दा आर्थिक विकासको जग बसाल्ने गरी आउनुपर्ने चेम्बरले जनाएको छ । सरकारद्धारा शुक्रबार प्रस्तुत गरिएको नीति तथा कार्यक्रमले सरकारी खर्चमा मितव्ययिता कायम गर्न खोज्नु सकारात्मक भएको चेम्बरको भनाइ छ ।
इसेवा मनि ट्रान्सफरको ‘मेरो डिजिटल देश’ अभियानको आज अन्तिम दिन, काठमाडौंमा घर जित्न सकिने
काठमाडौं । डिजिटल रेमिट्यान्स कम्पनी इसेवामनी ट्रान्सफरले विदेशबाट पैसा पठाउँदा लाग्ने शुल्क कम गरी रेमिट्यान्स बढाउन सञ्चालन गरेको ‘मेरो डिजिटल देश’ अभियानको आज अन्तिम दिन रहेको छ । इसेवा मनी ट्रान्सफरले विदेशबाट बैधानिक रेमिट्यान्सलाई प्रोत्साहन गर्ने उदेश्यले ‘मेरो डिजिटल देश’ अभियान सार्वजनिक गरेको थियो । कम्पनीले ‘मेरो डिजिटल देश’ अभियान मार्फत विश्वका जुनसुकै मुलुकमा रहेका नेपालीले नेपालमा इच्छाएको व्यक्तिको बैंक खातावा इसेवा वालेटमा पैसा पठाउँदा एक जनालाई बम्पर उपहार स्वरुप काठमाडौंमा साढेदुईतलाको घर दिने घोषणा गरेको थियो । ७ असोज देखि जेठ ६ गतेसम्म रेमिट्यान्स् पठाउने व्यक्तिहरू मध्येबाट गोलाप्रथामार्फत केही दिनमा विजेता सार्बजनिक गरिने कम्पनीले जनाएको छ । कम्पनीले अभियानअवधिभर हरेकमहिना एक जनालाई आकर्षक उपहार दिँदै आएको थियो । विश्वका दुईसय भन्दा धेरै मुलुकबाट रेमिट्यान्स भित्राउँदै आएको इसेवा मनि ट्रान्स्फरले ‘मेरो डिजिटल देश’ अभियानका विजेतालाई ललितपुरको महालक्ष्मी नगरपालिका वडा नं ४ इमाडोल, बोजेपोखरीमा ३ आना क्षेत्रफलमा बनेको साढे दुई तल्लाको घर प्रदान गर्ने कम्पनीले जनाएको छ । अभियानका विषयमा इसेवा मनी ट्रान्सफरका प्रमुख कार्यकारी अधिकृत अजेस कोइरालाले विदेशबाट नेपालीले पठाउने रेमिट्यान्सको लागत कम गर्न डिजिटल रेमिट्यान्समार्फत ‘मेरो डिजिटल देश’ अभियान सफलतापूर्वक सम्पन्न भएको बताए । उनले भने, ‘ हामीले जुन उदेश्यका साथ यो अभियान सञ्चालन गरेका थियौँ, यसमा नेपाली दाजुभाइ तथा दिदिबहिनीहरूको उत्साहजनक सहभागिता रह्यो, यस अभियानले डिजिटल रेमिट्यान्सलाई बढाउन हामीलाई थप हौसला मिलेको छ ।’
प्रतिबन्धित इनर्जी ड्रिंक्स बजारमा, थाहा नै छैन नियामकलाई
काठमाडौं । सरकारले ०७६ जेठ १० गतेदेखि विदेशी मुलुकबाट आयात हुने रेड बुल लगायतका इनर्जी ड्रिंक्सलाई आयातमा प्रतिवन्ध लगाएको थियो । तर, नेपाल समुद्रपार निकासी पैठारी संघले ती वस्तुहरु नेपाली बजारमा प्रशस्त पाइने गरेको दाबी गरेको छ । आयातित इनर्जी ड्रिंक्सहरुको राजस्व भन्सार छली गरेर ठूलो मात्रामा आयात भइरहेको विषयमा उद्योग वाणिज्य तथा आपूर्ति मन्त्री रमेश रिजाललाई जानकारी गराउँदा उनले समय स्वीकार गरेको संघले विज्ञप्तिमार्फत जनाएको छ । नेपाल समुद्रपार निकासी पैठारी संघका अध्यक्ष बिनोद कुमार सेठियाले विकासन्युजसँग कुरा गर्दै काठमाडौं एयरपोर्टमा नै सरकारी निकायको आँखा अगाडि ती वस्तुहरुको खरिद बिक्री भइरहेको बताए । त्यस्तै, उद्योगमन्त्री रिजालले बुधबार संघको प्रतिनिधि मण्डलसँगको भेटमा प्रतिबन्ध लगाएपनि चोरी पैठारी कायम रहेकोले ठूलो परिमाणमा राजस्व गुमिरहेको बताएको संघले जनाएको छ । ‘विश्व व्यापार संगठनले पनि आयात रोक्न दिँदैन,’ उनले भने, ‘अवैध रुपमा आयात भइरहेको मलाई थाहा छ, प्रतिबन्ध हटाउन प्रयास गर्छु’, उनले भने । संघका अनुसार ०७६/७७ पछि नेपालमा आधिकारिक रुपमा इनर्जी ड्रिंक्स आयात भएको छैन, तर देशभरका बजारमा विदेशी ब्राण्डका इनर्जी ड्रिंक्स सजिलोसँग खरिद गर्न सकिन्छ, जसबाट सरकारले ठूलो मात्रामा राजस्व गुमाएको छ । सरकारले इनर्जी ड्रिंक्सको आयात गर्दा आर्थिक वर्ष ०७५/०७६ मा सरकारले १ अर्ब ६७ करोड ६६ लाख रूपैयाँ राजस्व संकलन गरेको थियो । २०७६ असार २ गतेको राजपत्रमा सूचना प्रकाशित गरेर प्रतिबन्ध लगाइएको इनर्जी ड्रिंक्स (क्याफिनयुक्त शक्तिवद्र्धक पेय पदार्थ), फ्लेवर्ड सिन्थेटिक ड्रिंक्स लगायतका वस्तुहरु बजारमा प्रशस्त छन भन्ने मन्त्रीकै बुझाई हुँदा राजस्व र उपभोक्ता सम्बन्धित निकायले आफूहरु बेखबर भएको बताएका छन् । विकासन्युजसँग कुरा गर्दै वाणिज्य आपूर्ति तथा उपभोक्ता संरक्षण विभागका प्रमुख गजेन्द्रकुमार मिश्रले सो विषयमा आफूहरुलाई जानकारी नभएको बताए । काठमाडौंमा मात्रै पचासौं हजारको संख्यामा व्यवसाय रहेकाले विभागको जनशक्तिले सबैमा नियमित अनुगमन गर्न नसक्ने बताए । साथै उनले अन्तर्राष्ट्रिय एयरपोर्ट जस्तो ठाउँमा पटक–पटक छापा मार्ने काम गर्दा अन्तर्राष्ट्रिय जगतमा समेत राम्रो सन्देश जानसक्ने बताए । साथै उनले जानकारी प्राप्त भएमा प्रतिबन्धित वस्तुको खरिद बिक्री रोक्ने विषयमा विभाग तत्पर रहेको बताए । त्यस्तै, आन्तरिक राजस्व विभागका प्रवक्ता राजुप्रसाद प्याकुरेलले भन्सार छली गरेर आयात गरिएका इनर्जी ड्रिंक्सबाट आन्तरिक राजस्व समेत छली गरेर बिक्री भइरहेको सन्दर्भमा विभागलाई थाहा नभएको तर, सोसँग सम्बन्धित अन्य निकायले आवश्यक अनुसन्धान गर्न चाहेमा विभाग सहभागी हुने विकासन्युजलाई बताए । सरकारले विदेशी इनर्जी ड्रिंक्समा प्रतिबन्ध लगाएपछिका पछिल्ला वर्षमा नेपालमा नै केही त्यस्ता पेय पदार्थ उत्पादन गर्ने स्वदेशी उद्योग सञ्चालनमा ल्याएका छन् । पछिल्लो समयमा नेपाल समुद्रपार निकासी पैठारी संघले उद्योगमन्त्री रिजाललाई प्रतिबन्ध लगाउँदा चोरी पैठारी बढेको र राजस्वमा सरकारलाई घाटा भएको भन्दै विदेशी ब्राण्डका वस्तुको आयात खुलाउन दबाब दिएको छ । साथै सो विषयमा मन्त्री रिजालले समेत विश्व व्यापार संगठनको नियमअनुसार रोक्न नमिल्ने भन्दै आँफूहरुको मागमा मन्त्री सकारात्मक भएको संघले दाबी गरेको छ । संघका अध्यक्ष सेठियाले ब्रिटनिया बिस्कुटलाई सरकारले आयातमा प्रतिबन्ध गरेपनि बजारमा ठूलो मात्रामा बिक्री भइरहेको दाबी गरेका छन् ।
