वर्ष २०८१ : आठ हजार बढी घटनामा ७४५ जनाको मृत्यु, ३५१ जना पहिरोका कारण
काठमाडौं । गएको एक वर्षमा विपद्जन्य घटनामा ७४५ जनाको ज्यान गएको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार एक वर्षमा आठ हजार ८६१ वटा विपद्का घटना घटेको र ती घटनामा परी ७४५ जनाको मृत्यु भएको हो । ती घटनामा परी ६९ जना बेपत्ता भएका र एक हजार ७०२ जना घाइते भएका प्राधिकरणका प्रवक्ता रामबहादुर केसीले जानकारी दिए । उनका अनुसार एक वर्षमा विपदबाट १८ हजार ९९१ घरपरिवार प्रभावित हुन पुगेका छन् । कुल रु तीन अर्ब १३ करोड बराबरको आर्थिक क्षति भएको प्राधिकरणले जनाएको छ । कुन घटनामा कति मानवीय क्षति ? सबैभन्दा बढी पहिरोका कारण ३५१ जनाको ज्यान गएको छ । त्यसपछि बाढीबाट ९७, चट्याङबाट ७८ र आलागीबाट ७७ जनाको मृत्यु भएको प्राधिकरणले जनाएको छ । भारी वर्षाका कारण आठ, जनावरको आक्रमणबाट ४३, लेक लागेर २४, हवाई दुर्घटनामा २३, सर्पदंशबाट १९ जनाको मृत्यु भएको छ । त्यसैगरी, डढेलोबाट १०, हुरीबतासका कारण सात, डुङ्गा पल्टेर एक र अन्य विविध कारणबाट सात जनाको मृत्यु भएको छ । पहिरोबाट ४८, बाढीबाट १८ र हिउँ पहिरोमा परेर तीन जना बेपत्ता भएका छन् । सबैभन्दा बढी आगलागीका घटना विपद्जन्य घटनाका सङ्ख्या अध्ययन गर्दा सबैभन्दा बढी आगलागीका घटना यस वर्ष भएका छन् । विसं २०८१ वैशाख १ देखि चैत २९ गतेसम्मको तथ्याङ्कानुसार आगलागीका मात्र चार हजार १४५ वटा घटना भएका छन् । त्यसपछि डढेलोका एक हजार १९५ वटा र पहिरोका एक हजार पाँच घटना भएको छ । त्यस्तै, बाढी ४१८, भारीका वर्षाका ५६८, चट्याङका ४१८, जनावर आक्रमणका ४७७, लेक लागेका १११ वटा घटना भएका छन् । हवाई दुर्घटनाका दुई, सर्पदंशका ८४, हावाहुरीका ३४९, डुङ्गा पल्टेका एक, हिउँ पहिरोका छ, भूकम्पका ७४, असिनापानी एक र अन्य सातवटा विपद्जन्य घटना भएको प्राधिकरणले सार्वजनिक गरेको विवरणमा उल्लेख छ ।
राष्ट्र बैंकले बैंकहरूको मुद्दती निक्षेपमा ९७ करोड लगानी गर्ने
काठमाडौं । नेपाल राष्ट्र बैंकले आफ्नो उपदान तथा पेन्सन कोषमा रहेको ९७ करोड रुपैयाँ मुद्दती निक्षेपमा लगानी गर्ने निर्णय गरेको छ । केन्द्रीय बैंकले आइतबार सूचना जारी गर्दै उक्त रकम वाणिज्य बैंक, विकास बैंक र वित्त कम्पनीमा लगानी गर्न लागेको जानकारी गराएको हो । राष्ट्र बैंकका अनुसार 'क' वर्गका वाणिज्य बैंकहरूमा ७७ करोड ६० लाख, 'ख' वर्गका राष्ट्रिय स्तरका विकास बैंकहरूमा १४ करोड ५५ लाख र 'ग' वर्गका राष्ट्रिय स्तरका वित्त कम्पनीहरूमा ४ करोड ८५ लाख रुपैयाँ मुद्दती निक्षेपमा लगानी गरिनेछ । उक्त लगानी ७ वैशाख २०८२ देखि ७ वैशाख २०८३ सम्म, अर्थात् ३६६ दिनका लागि हुनेछ । इच्छुक संस्थाहरूले आवेदन आगामी ३ वैशाख साँझ ७ बजेसम्म दिनुपर्नेछ । निक्षेपको लागि योग्यता प्राप्त बैंक तथा वित्तीय संस्थाले राष्ट्र बैंकका विभिन्न मापदण्डहरू पूरा गर्नुपर्नेछ, जसमा कम्तीमा दुई वर्षको सञ्चालन अवधि, निर्धारित पूँजीकोष, न्यूनतम तरलता, सीमित निष्क्रिय कर्जा, तथा विगतमा कारबाहीमा नपरेको अवस्था हुनुपर्नेछ ।
२ सय जनालाई इसेवामा रोजगारीको अवसर, १२ कक्षा पासले आवेदन दिन सक्ने
काठमाडौं । डिजिटल वालेट सेवा प्रदायक कम्पनी इसेवामा रोजगारीको अवसर खुलेको छ । कम्पनीले देशभरका विभिन्न प्रदेशमा कार्य गर्नका लागि २०० जना बजार प्रतिनिधिको माग गरेको हो । इसेवाले कोशी, मधेश, लुम्बिनी, गण्डकी, कर्णाली र सुदूरपश्चिम प्रदेशमा २८/२८ जना र बागमती प्रदेशमा ३२ जना गरी कुल २०० जनाको माग गरेको जनाएको छ । उम्मेदवारले न्यूनतम १२ कक्षा उत्तीर्ण गरेको हुनुपर्छ । इच्छुक व्यक्तिहरूले आफ्नो बायोडाटा कम्पनीको इमेलमार्फत पठाउन सक्नेछन् ।
वीरगञ्जमा निषेधाज्ञाको अवधि थप
वीरगञ्ज । जिल्ला प्रशासन कार्यालय, पर्साले जिल्लामा शान्ति सुव्यवस्था कायम गर्न वीरगञ्ज महानगरपालिका र वरपरका क्षेत्रमा निषेधाज्ञा (कर्फ्यू)को समय बढाएको छ । आइतबार मध्याह्न १२ः०० बजेसम्मका लागि जारी भएको निषेधाज्ञाको समय बढाएर मध्यरात १२ः०० बजेसम्म निषेधाज्ञा जारी गरिएको हो । पर्साका प्रमुख जिल्ला अधिकारी गणेश अर्यालले शनिबार साँझ ७ः३० बजेदेखि आइतबार १२ः०० बजेसम्मका लागि जारी भएको कर्फ्युको समय आज राति १२ः०० बजेसम्मका लागि बढाएको जानकारी दिए । दुई समुदायबीच उत्पन्न विवाद उग्र हुँदै गएपछि जिल्ला प्रशासन कार्यालयले हिजो साँझ साढे ६ बजेदेखि आइतबार मध्याह्न १२ बजेसम्मको लागि कर्फ्यु लगाएको थियो।
प्रभु क्यापिटलको २०८२ को डिजिटल क्यालेन्डर सार्वजनिक, लगानी र साक्षरतामा जोड
काठमाडौं । प्रभु क्यापिटल लिमिटेडले नेपाली नयाँ वर्ष २०८२ को अवसरमा सांस्कृतिक र वित्तीय सन्देश समेटिएको डिजिटल क्यालेन्डर सार्वजनिक गरेको छ । यस क्यालेन्डरमा नेपाल पञ्चाङ्ग निर्णायक विकास समितिबाट अनुमोदित तिथि, सार्वजनिक बिदा, चाडपर्व, नेपाली–अंग्रेजी मिति, साथै प्रभु क्यापिटलका सेवा र सुविधाहरू समावेश गरिएको छ । डिजिटल माध्यममार्फत डाउनलोड र क्युआर कोड स्क्यान गरेर सजिलै पहुँच पाउने गरी क्यालेन्डर उपलब्ध गराइएको छ । प्रभु क्यापिटलले ग्राहकहरूलाई वित्तीय साक्षरताको सन्देश दिनका साथै आफ्नो सेवाबारे जानकारी दिने उद्देश्यले क्यालेन्डरलाई आकर्षक ढंगमा प्रस्तुत गरेको जनाएको छ । कम्पनीको साँचो पहिचान कर्मचारी हुन् भन्ने सोच अनुरूप, क्यालेन्डरमा कर्मचारीहरूकै माध्यमबाट सेवा र योजनाहरू प्रस्तुत गरिएको छ । नेपाली चाडपर्वमा उपहार दिने परम्परालाई आधुनिक सोचसहित विस्तार गर्दै, क्यापिटलले भविष्य केन्द्रित वित्तीय साधनहरू उपहार दिन प्रोत्साहन गरेको छ । जसले लगानी बढाउने, वित्तीय सुरक्षा दिने र समृद्ध भविष्यतर्फ उन्मुख गराउने सन्देश दिन्छ । कम्पनीका अनुसार क्यालेन्डरमा सांस्कृतिक झल्को दिने चित्रहरू र वित्तीय जानकारीलाई सँगै प्रस्तुत गरिएको छ । जसले परम्परा र प्रविधिको सशक्त संयोजन दर्शाउँछ । प्रभु क्यापिटलको यो डिजिटल क्यालेन्डर केवल समयको सूचक मात्र नभई वित्तीय चेतना, संस्कृतिको सम्मान र प्रविधिको प्रयोगको सफल उदाहरण बनेको छ । यसले ग्राहक तथा सर्वसाधारणलाई लगानीप्रति सचेत बनाउँदै, डिजिटल पहुँचमार्फत सुलभ र सन्देशमूलक अनुभव प्रदान गर्ने लक्ष्य लिएको छ ।
तस्बिरमा हेर्नूहोस चिसाेपानीमा १० वर्षदेखि भग्नावस्थामा रहेका घर तथा होटलहरू
काठमाडौं । विसं २०७२ वैशाख १२ गते नेपालमा विनाशकारी भूकम्प गयो । उक्त भूकम्प र त्यसपछिको पराकम्पमा परी ८ हजार ६ सय ५४ जनाले ज्यान गुमाए । २२ हजार ३०९ जना घाइते हुनुका साथै ५ लाख ११ हजार ३९० घर ध्वस्त भए र २ लाख ८६ हजार ७६७ घर आंशिक रूपमा क्षतिग्रस्त भए । भत्किएका धेरै घरको पुनःनिर्माण सम्पन्न भए पनि चिसाेपानीमा भने हालत उस्तै छ । त्यहाँका घर तथा होटलहरू अझै पनि भग्नावस्थामा रहेका छन् । भूकम्प गएको १० वर्ष पुग्दैछ तर ती संरचनाको पुनःनिर्माण हुन सकेको छैन । नुवाकोटका शिवपुरी गाउँपालिका–१ र सिन्धुपाल्चोकको मेलम्ची नगरपालिका– ३ को सिमानामा चिसाेपानी पर्दछ । त्यस क्षेत्रका कुल २५ घर भूकम्पले क्षति गरेको थियो । तस्बिरहरू : नरेश बोहोरा/विकासन्युज
कुमारी, सानिमा र नेपाल बैंकले घटाए ब्याजदर, एभरेष्टले बढायो
काठमाडौं । तीन वाणिज्य बैंकले मुद्दती निक्षेपको ब्याजदर घटाएका छन् भने एक बैंकले घटाएको छ । विसं २०८२ वैशाख १ गतेदेखि लागू हुने गरी कुमारी बैंक, सानिमा बैंक र नेपाल बैंकले ब्याजदर घटाएका छन् भने एभरेष्ट बैंकले ब्याजदर बढाएको छ । कुमारी बैंकले वैशाख महिनाका लागि मुद्दती निक्षेपमा ०.०९ प्रतिशत ब्याजदर घटाएर व्यक्तिगत तर्फ ५.९२ प्रतिशत र संस्थागत तर्फ ४.९२ प्रतिशतमा झारेको छ । यसअघि चैतमा बैंकले व्यक्तिगततर्फ ६.०१ प्रतिशत र संस्थागततर्फ ५.०१ प्रतिशत ब्याजदर तोकेको थियो । यस्तै, सानिमा बैंकले ०.१ प्रतिशत ब्याजदर घटाएर व्यक्तिगततर्फ ५.९५ प्रतिशत र संस्थागततर्फ ४.२ प्रतिशतमा झारेको छ । यसअघि चैतमा बैंकले व्यक्तिगततर्फ ६.०५ प्रतिशत र संस्थागततर्फ ४.३ प्रतिशत ब्याजदर तोकेको थियो । यस्तै, नेपाल बैंकले मुद्दती निक्षेपमा व्यक्तिगततर्फ ०.३५ प्रतिशत घटाएर ५.१५ प्रतिशत र संस्थागततर्फ ०.१५ प्रतिशत घटाएर ४ प्रतिशत कायम राखेको छ । यसअघि चैतमा बैंकले व्यक्तिगततर्फ ५.५ प्रतिशत र संस्थागततर्फ ४.१५ प्रतिशत ब्याजदर तोकेको थियो । एभरेष्ट बैंकले भने ब्याजदर बढाएको छ । बैंकले ०.६१ प्रतिशत ब्याजदर बढाएर व्यक्तिगततर्फ ६.६१ प्रतिशत र संस्थागततर्फ ५.६१ प्रतिशतमा झारेको छ । यसअघि चैतमा बैंकले व्यक्तिगततर्फ ६ प्रतिशत र संस्थागततर्फ ५ प्रतिशत ब्याजदर तोकेको थियो । साथै बैंकहरूले सार्वजनिक गरेको ब्याजदर सूचीअनुसार वैशाखमा औसत ब्याजदर व्यक्तिगततर्फ ५.९७ प्रतिशत र संस्थागततर्फ ४.३६ प्रतिशत कायम छ ।
'सवारीसाधन अब धनीको विलासिता हैन, आवश्यकता हो'
काठमाडौं । नेपाल अटोमोबाइल व्यवसायी संघ (नाडा) द्वारा पहिलोपटक आयोजित 'नाडा अटो संवाद २०८१' ले नेपालको अटोमोबाइल क्षेत्रप्रति रहेको परम्परागत दृष्टिकोणलाई परिवर्तन गर्दै दिगो, समावेशी र भविष्यमुखी गतिशीलताको खाका प्रस्तुत गरेको छ। कार्यक्रममा अर्थमन्त्री विष्णु पौडेल प्रमुख अतिथिको रूपमा सहभागी थिए भने सरकारी, निजी तथा अन्तर्राष्ट्रिय क्षेत्रका विशिष्ट विज्ञहरूको उपस्थितिमा नेपालको अटो उद्योगको रूपान्तरण र भविष्य विषयमा व्यापक छलफल भएको छ । प्रमुख छलफल बुँदाहरू १. ५० वर्षको फड्को र भावी दिशा नेपालको अटो क्षेत्रले इन्धनमा आधारित सवारी साधनबाट विद्युतीय सवारीतर्फ कसरी रूपान्तरण गरिरहेको छ भन्ने कुरामा समीक्षा गरिएको छ । अनपेक्षित नीतिगत निर्णयहरू (जस्तै लोन टु भ्यालूमा मा गरिएको परिवर्तन) ले उद्योगमा पार्न सक्ने नकारात्मक असरबारे पनि छलफल गरिएको छ । २. सवारी विलासिता होइन, आवश्यकता हो गतिशीलता सबै नागरिकको आवश्यकता हो भन्ने सन्देशसहित सार्वजनिक यातायातको पहुँच विस्तार, उपभोक्ता–मैत्री वित्तीय नीति र स्थानीय उत्पादन प्रवर्द्धनको आवश्यकता औँल्याइयो । ३. दिगो गतिशीलता : समृद्ध अर्थतन्त्र विद्युतीय सवारी, स्वदेशी उत्पादन र हरित ऊर्जाको प्रयोगबाट आयातमा निर्भरता घटाउने र आर्थिक विकासमा टेवा पुर्याउने उपायहरू प्रस्तुत गरिए । ४. भविष्यको नेपाल : स्मार्ट र हरित गतिशीलता वैकल्पिक ऊर्जामा आधारित सवारी र स्मार्ट समाधानमार्फत नेपाललाई २०५० सम्म दिगो गतिशीलता हासिल गर्ने लक्ष्य तय गरिएकाे छ । यो लक्ष्यमा पुग्न दीर्घकालीन स्थिर नीतिहरूको आवश्यकता औँल्याइयो । नाडा अटो संवादले सवारीसाधनलाई अब धनीको विलासिता हैन, सबैको अधिकारको रूपमा प्रस्तुत गरेको छ । निजी तथा सार्वजनिक क्षेत्रको सहकार्य, सुसंगत नीति, र स्थानीय उत्पादनमार्फत नेपालले आत्मनिर्भर र हरित अटोमोटिभ भविष्य निर्माण गर्न सक्ने सम्भावना औँल्याइएको छ । नेपालको अटो क्षेत्र अब केवल सवारी आयात गर्ने मुलुकको रूपमा सीमित रहँदैन । यो संवादले देखाएको दिशा र दृष्टिकोणले गर्दा नेपाल स्मार्ट, सुरक्षित, पहुँचयुक्त र नवप्रवर्तनमुखी गतिशीलताको नेतृत्व गर्न सक्ने यात्रामा अघि बढेको कम्पनीले जनाएको छ ।
