जेनजी पुस्ताको माग सुनुवाइ गरेर सहज वातावरण सिर्जना गर्न इप्पानको आग्रह
काठमाडौं । स्वतन्त्र ऊर्जा उत्पादकहरूको संस्था, नेपाल (इप्पान)ले हालै २८ वर्षमुनिका युवाहरू (जेनजी)ले गरेको शान्तिपूर्ण प्रदर्शनका क्रममा ज्यान गुमाएका र घाइते भएका घटनाप्रति दुःख व्यक्त गरेको छ । संस्थाले घटनाबाट उत्पन्न चिन्ताजनक अवस्था सम्बोधन गर्न सरकारलाई आग्रह गरेको छ । विभिन्न स्थानमा मंगलबार पनि विरोध प्रदर्शन जारी रहेको बेलामा असहज परिस्थितिपछि सबै प्रदर्शनकारीहरूलाई थप हानि हुनबाट बचाउन इप्पानले माग गरेको छ । इप्पानका अध्यक्ष गणेश कार्कीले प्रदर्शनकारीले उठाएका भ्रष्टाचार अन्त्य गर्ने, जवाफदेहिता प्रदान गर्ने र नागरिक स्वतन्त्रता सुनिश्चित गर्ने जस्ता वैध माग सरकारबाट यथोचित सुनुवाइ हुनुपर्ने माग गरे । 'घटनाको सत्यतथ्य छानबिन गर्न, मृतकका परिवारलाई क्षतिपूर्ति दिन र घाइतेको निःशुल्क उपचार गर्न सरकारसँग माग गर्दछौँ,' उनले भने । घाइतेको शीघ्र स्वास्थ्य लाभको कामना गर्दै इप्पानले उनीहरुको उपचारका लागि आर्थिक तथा भौतिक सहयोग गर्न सम्पूर्ण ऊर्जा उद्यमीलाई अपिल गरेको छ । शान्तिपूर्ण प्रदर्शनलाई नियन्त्रण गर्ने क्रममा अनावश्यक बल प्रयोग हुनु लोकतान्त्रिक मूल्य र संविधानविपरीत भएको इप्पानको ठहर छ ।
नेपाली कांग्रेसको केन्द्रीय कार्यालयमा तोडफोड र आगजनी
काठमाडौं । आन्दोलनकारी युवाले सानेपास्थित नेपाली कांग्रेसको पार्टी कार्यालयमा आगजनी गरेका छन् । जेनजी युवाहरूको समूहले नेपाली कांग्रेसको केन्द्रीय कार्यालयमा तोडफोड र आगजनी गरेका हुन् । ठूलो सङ्ख्यामा रहेका प्रदर्शनकारीलाई प्रहरीले नियन्त्रण गर्न नसकेपछि कार्यालय उनीहरूले कब्जा गरेका हुन् ।
नेकपा एमाले पार्टी कार्यालय च्यासलमा आगजनी
काठमाडौं । नेकपा एमाले पार्टी कार्यालयमा आगजनी भएको छ। जेनजी युवाहरूको समूहले नेकपा एमालेको केन्द्रीय कार्यालय च्यासलमा तोडफोड गरेका हुन् । सोमबारको प्रदर्शनमा १९ जनाको ज्यान गएपछि युवाहरूको समूह मंगलबार दलका पार्टी कार्यालय तोडफोडमा उत्रिएका हुन् ।
सर्वोच्च अदालतमा आजको सबै सुनुवाइ स्थगित
काठमाडौं । सर्वोच्च अदालतले ‘कर्फ्यू’ लागेकाले अदालतमा नियमित पेसी तोकिएका सबै मुद्दाको सुनुवाइ स्थगित गरेको छ । अदालतले मंगलबार जारी गरेको सूचनामा आवागमनमा अवरोध भएकाले बन्दीप्रत्यक्षीकरणको निवेदन र पूरकबाट पेस हुने निवेदनबाहेक सबै सुनुवाइ स्थगित भएको जनाएको छ । सूचनामा जिल्ला प्रशासन कार्यालय, काठमाडौं, भक्तपुर र ललितपुरमा आज जारी भएको कर्फ्यू आदेशका कारण आवागमनमा भएको अवरोध तथा विशेष परिस्थिति र संवेदनशीलतालाई मध्यनजर गरी सेवाग्राही एवम् कानुन व्यवसायीको असहजतालाई ध्यानमा राख्दै सुनुवाइ स्थगित गरेको जनाएको छ । –––
सुदूरपश्चिमका मुख्यमन्त्रीको गाडी तोडफोड
काठमाडौं । प्रदर्शनमा उत्रिएका जेनजी युवाहरूले आज सुदूरपश्चिम प्रदेशको मुख्यमन्त्री कार्यालयमा प्रवेश गरी मुख्यमन्त्री कमलबहादुर शाहको गाडीमा तोडफोड गरेका छन् । प्रदर्शनकारीहरू कार्यालयको परिसरमा प्रवेश गरी मुख्यमन्त्रीको सरकारी सवारीसाधनमा तोडफोड गरेका हुन् । सुरक्षाकर्मीको बाक्लो उपस्थिति हुँदाहुँदै प्रदर्शनकारीहरू भवनसम्म प्रवेश गर्न सफल भएका थिए। घटनापछि क्षेत्र तनावग्रस्त बनेको छ ।
युलेन्स स्कुलमा आगजनी
काठमाडौं । जेनजी प्रशर्दनकारीहरूले युलेन्स स्कुलमा आगजनी गरेका छन् । आरजु राणा देउवा अध्यक्ष रहेको ललितपुरको खुमलटारस्थित युलेन्स स्कुलमा आगजनी गरेको विद्यालयका प्रधानाध्यापक मेदिन लामिछानेले बताए । विकासन्युजसँगको कुराकानीमा प्रधनाध्यापक लामिछानेले भने, ‘आगो लागिरहेको छ, हामी हेरेर बसिरहेका छौं, गर्न सकिने अवस्था केही छैन ।’उनले दमकल समेत प्रदर्शनकारी आउन नदिएको बताए । जुद्ध बारूण यन्त्र कार्यालय र दमकललाई खबर गरेपनि पुग्न नसकेको बताए। विद्यालय भवनमा अहिले आगो दन्की रहेको छ ।
रास्वपा सांसद असिम शाहले दिए प्रतिनिधि सभा सदस्यबाट राजीनामा
काठमाडौं । राष्ट्रिय स्वतन्त्र पार्टी (रास्वपा)का सांसद असिम शाहले प्रतिनिधि सभा सदस्यबाट राजीनामा दिएका छन् । उनले मंगलवार प्रेस विज्ञप्ति जारी गर्दै प्रतिनिधि सभाको सदस्यको हैसियतमा नरहेको घोषणा गरेका हुन् । साथै, आजको उनले मितिदेखि संसद सदस्य पदबाट राजीनामा दिएको र जेनजी आन्दोलनमा सहभागी हुने घोषणा गरेका छन् ।
देउवा निवास प्रदर्शनकारीको कब्जामा, अश्रुग्यास प्रहार
काठमाडौं । प्रदर्शनकारीहरुले नेपाली कांग्रेसका सभापति शेरबहादुर देउवाकाे धनगढीस्थित निवासमा प्रवेश गरेका छन् । उनीहरुले निवासभित्र प्रवेश गरेर आगजनी गरेका छन् । प्रहरीले उनीहरुलाई बाहिर पठाउने प्रयास गरे पनि प्रदर्शनकारीको ठूलो भीड हुँदा समस्या सिर्जना भएको हो ।
