यसरी जाग्दैछ सरस्वती बहुमुखी क्याम्पस, बीबीएम र बीबीएले फर्काउँदैछ सान
काठमाडौं । २ बर्ष अघिसम्म विद्यार्थी नआएर सुनसान सरस्वती क्याम्पसमा यतिबेला विद्यार्थीको चाप थेगिनसक्नु छ । कुनै समय राजधानीमै कहलिएको सरस्वती क्याम्पस केहि समय पहिलो मणि बिनाको नाग जस्तै थियो । र, यतिबेला पुनः आफ्नो गुमेको शाख र पहिचान जोगाउने अभियानमा तल्लिन छ । भरिभराउ विद्यार्थी, उत्साहित प्राध्यापक, कर्मचारी र व्यवस्थित बन्दै गएका पुर्वाधारहरुले सरस्वती क्याम्पसको “कम ब्याक”लाई प्रष्टैसँग संकेत गरिरहेको देख्न सकिन्छ .क्याम्पसका सहायक क्याम्पस प्रमुख डा. बालकृष्ण सुबेदी भन्छन्–केहि समय अगाडिसम्म क्याम्पसका कक्षा कोठाहरु खाली थिए, चौरमा झार मात्रै पलाएको थियो, प्राध्यापक र कर्मचारीहरु घाम तापेर दिन काट्थे तर आज समय बदलिएको छ, सरस्वती बहुमुखी क्याम्पस यतिबेला जुरुक्कै उठेको छ । अधिकांश बिषयमा विद्यार्थीको न्युन उपस्थितीले कतिपय बिषय अन्य क्याम्पसमा मर्ज गर्ने तयारी बहस पनि चलेको थियो । तर गत बर्ष क्याम्पसले बीबीएम र बीबीए विषय थप गरेपछि भने क्याम्पसमा नयाँ पहिचान नै स्थापित भएको छ । ‘बीबीएम र बीबीए थपिएपछि पुराना बिषयमा पनि विद्यार्थीको चाप बढेको छ, हामीलाई क्याम्पस सुध्रिएकोमा साह्रै खुसी छौं’, क्याम्पसका विद्यार्थी नेता शंकर गौतमले भने । बीबीएम र बीबीएमले क्याम्पसमा त्राण थपेको उनले स्वीकार गरे ।२ बर्षअघि करिब ६ सयमा झरेको विद्यार्थी संख्या यतिबेला १ हजार ९ सय पुगेको छ ।क्याम्पसको पुर्वाधारलाई रंगरोगन गरेर चिटिक्क पारिएको छ । गेटबाट प्रवेश गर्दा सरस्वति क्याम्पसले जो कोहीलाई आकर्षित गर्छ । व्यवस्थित पार्किङ, रंगरोगन गरिएका पुर्वाधार, भलिबल कोर्ट, सानो बाटिकाले सरस्वति क्याम्पसलाई हेर्न लायक बनाएको सहजै देख्न सकिन्छ । हाल नेपाली, अग्रेँजी, समाजशास्त्र र व्यवस्थापन गरी चारवटा विषयमा स्नातकोत्तर अध्ययन गर्न पाइने सरस्वति क्याम्पसले थप केहि बिषय ल्याउने तयारी गरिरहेको छ । ‘हामीसँग पुर्वाधार पनि पर्याप्त छ र जनशक्ति पनि यथेष्ठ मात्रामा छन, हामी नयाँ बिषयमा स्नातकोत्तर सञ्चालनको तयारी गर्दैछौं, के बिषय थप्ने भनेर छलफल भैरहेको छ’, सहायक क्याम्पस प्रमुख सुवेदीले भने । आकर्षण बढ्दो तर सिट सिमित यस वर्ष बीबीएम र बीबीएमा आवेदन दिनेहरु ३०० थिए । ति मध्य ६४/६४ जनाको मात्रै मेरिट लिस्टमा नाम निस्कियो । २ लाख ९० हजार रुपैंयाँ बीबीएम र बिबिए अध्ययनको सुविधा विद्यार्थीहरुले पाईरहेका छन् । ‘सरकारी शैक्षिक संस्था भनेका गरिबका छोराछोरीले पढ्ने ठाउँ हो, हामीसँग पुर्वाधार जनशक्ति दुबै भएकाले कोटा थप्न आग्रह गरिरहेका छौं ताकी गरिबका सन्तानले पनि उच्च शिक्षा पढ्न पाउन’, सुवेदील सुनाए । उनले क्याम्पसमा रहेका लाइब्रेरीलाई स्तरोन्नति गर्ने काम पनि अघि बढाईसकेको जानकारी दिए । विद्यार्थीहरुले सन्दर्भ पुस्तकहरुको अध्ययनका लागि अन्यत्र धाउनुपर्ने बाध्यता हटाउने उनको उद्घोष छ । सरकारी शैक्षिक संस्थाहरुमा विद्यार्थीहरुको चाप घटिरहेको समयमा सरस्वति क्याम्पसले पनि पुनः कम ब्याक गरेको देख्न सकिन्छ । यसले अन्य क्याम्पसहरुलाई समेत सुधारको बाटोमा अघि बढ्न अभिप्रेरित गर्दछ ।
साल्ट ट्रेडिङ्गले फेब्रवरीलाई ‘आयोडिन मन्थ’को रुपमा मनाउने
कठमाडौं । साल्ट ट्रेडिङ्ग कर्पोरेशनले अँग्रेजी महिना फेब्रवरीलाई आयोडिन मन्थको रुपमा मनाउने भएको छ । नेपालमा सन् १९९८ देखि ,फेब्रवरी महिनालाई आयोडिन मन्थको रुपमा मनाउँदै आएकोमा यो वर्ष पनि निरन्तरता दिन लागेको हो । सरकारले सन् २०१८ सम्ममा ९० प्रतिशत पुर्याउने लक्ष्य लिइएकोमा २०१६ मै ९४.५ प्रतिशत पुगेको थियो । नेपाल यूनिभर्सल साल्ट आयोडिाइजेसनको सदस्य राष्ट्रको हैसियतले फेब्रवरी महिनालाई आयोडिन मन्थ घोषणा गरी महिनाभरी विभिन्न चेतनामूलक कार्यक्रमहरु सञ्चालन गर्ने भएको हो । यस कार्यक्रमबाट आयोडिनको कमिबाट हुने शारिरीक एवं मानसिक कमजोरीको सम्बन्धमा आम जनसमुदायलाई जानकारी दिने साल्टले साल्टले लक्ष्य लिएको छ । अभियानको क्रममा आयोडिन सम्बन्धी चेतनामूलक सन्देश लेखिएको झोला टी सर्ट, पम्पेल जस्ता सामाग्री वितरण गन साल्टले टोली समेत खटाउन जनाएको छ ।
स्टयाण्डर्ड चार्टड बैंक र शिखर इन्स्योरेन्सबीच बैंकएस्योरेन्स सम्झौता सम्पन्न
काठमाडौं । शिखर इन्स्योरेन्स कम्पनी लि. र स्टयाण्डर्ड चार्टड बैंक नेपाल लिमिटेडबीच बैंकएस्योरेन्स सम्झौता सम्पन्न भएको छ । उक्त सम्झौता पत्रमा स्ट्याण्डर्ड चार्टड बैंकका प्रमुख कार्यकारी अधिकृत जोसेफ सिल्भानुस र शिखर इन्स्योरेन्स कम्पनीका प्रमुख कार्यकारी अधिकृत दिपप्रकाश पाण्डेले एक समारोहका बीच हस्ताक्षर गरेका हुन् । सम्झौता पश्चात बैंकका सेवाग्राहीहरुले सुलभ रुपमा शिखर इन्स्योरेन्सबाट अग्नि बीमा, मोटर बीमा, स्वास्थ्य बीमा, दुर्घटना बीमा, यात्रा चिकित्सा बीमा लगायत विभिन्न निर्जिवन बीमा सेवा प्राप्त गर्न सक्नेछ । शिखर इन्स्योरेन्सको विस्तारित शाखा संजालको माध्यमबाट स्टयाण्डर्ड चार्टड बैंकका ग्राहकले सुलभ रुपमा बीमा सुविधा तथा दाबी फछ्र्यौट सुविधा प्राप्त गर्न सक्ने इन्स्योरेन्सले जनाएकाे छ । सम्झौता पश्चात माघ १८(आजै) बाट नै शिखरले बैंकका ग्राहकलाई बीमा सेवा प्रदान गरिएको छ ।
क्यान्सर विरुद्धको अभियानमा टीसीएल स्मार्ट टीभी
काठमाडौं । विगत तीन वर्षदेखि भैरहेको क्यान्सर विरुद्धको जागरण साईकल र्याली अभियानमा टीसीएल स्मार्ट टीभीले पनि सम्बन्ध गाँसेको छ । विभिन्न सामाजिक कार्यक्रममा आफ्नो सहभागिता जनाउने क्रममा यसपालि पनि आफ्नो कर्पोरेट सोसियल रेसपोन्सबिलीटी अन्तर्गत क्यान्सर विरुद्धको अभियानमा सम्बन्ध गाँसेको हो । उक्त कार्यक्रममा लक्की विजेतालाई ४३ इंचको टीसीएल स्मार्ट टीभी उपहार स्वरुप हस्तान्तरण गर्ने तथा अन्य सहयोग गर्ने कम्पनीले जनाएको छ । ४३ इंच टीसीएल स्मार्ट टीभी एफएचडी रहेको छ । जसमा स्क्रिन मिररिङ (मोबाईलको स्क्रिनलाई टि.भीमा हेर्न) साथै २ जि.बी. इन्टरनल मेमोरि र एन्रोईडको विभिन्नएप (युट्युब, फेसबुक आदि) चलाउन सकिने जस्तो विशेषता रहेको छ । टिसिएल टीभीकालागि नेपालको आधिकारीक विक्रेता चौधरी ग्रुप अन्तर्गत सि.जी. इलेक्ट्रोनिक्स रहेको छ ।
ग्लोबल आईएमई बैंकको स्वतन्त्र सञ्चालकमा नुमनाथ पौडेल नियुक्त
काठमाडौं । ग्लोबल आईएमई बैंकको स्वतन्त्र सञ्चालकमा नुमनाथ पौडेल नियुक्त भएका छन् । बैंकको हालै सम्पन्न २८९औँ सञ्चालक समितिको बैंठकले पौडेललाई कम्पनीको उक्त पदमा नियुक्त गरेको हो ।
१६ मेगाफिक्सल फ्रन्ट क्यामेरा भएको ‘प्रो सेभेन’ बजारमा, मूल्य ४७५००
काठमाडौं । चौधरी ग्रुपले मोबाइल उत्पादन गरी नेपाली बजारमा ल्याएको छ । कम्पनीले मेजू प्रो सेभेन, एमफाइभएस लगायत मोबाइल फोनहरु सार्वजनिक गरेको हो । सार्वजनिक गरिएको प्रो सेभेनमा १६ मेगाफिक्सलको फ्रन्ट क्यामेरा रहेको छ । ४ जीबी र्यामको उक्त मोबाइलमा ६४ जीबीको आन्तरिक सञ्चय क्षमता रहेको छ । ५.२ इन्चको फुल स्कृनको प्रयोग गरिएको यस मोबाइलले कम प्रकाशमा पनि सजिलैसँग फोटो खिच्न सकिने कम्पनीले जनाएको छ । कालो कलरमा उपलब्ध यस मोबाइलको बजार मूल्य कम्पनीले ४७५०० रुपैंया राखेको छ । त्यसैगरी अर्को सार्वजनिक गरिएको मेजू एमफाइभएसमा ५.२ इन्चको एचडी स्कृन प्रयोग गरिएको छ । यसमा प्रयोग गरिएको २.५ डी कभर ग्लासले स्मूथकलर प्रदान गर्नुको साथै अध्याँरो भएको समयमा पनि आरामपुर्वक पढ्न सकिन्छ । ३ जीबी र्यामको प्रयोग गरिएको यस मोबाइलमा ३२ जीबीको आन्तरिक सञ्चय क्षमता रहेको छ । यस मोबाइलको मूल्य बजार मूल्य कम्पनीले १९ हजार रुपैंया राखेको छ ।
ग्लोबल आइएमई बैंकको थप ३ शाखारहित बैंकिङ्ग सेवा सञ्चालनमा
काठमाडौं । ग्लोबल आइएमई बैंकले आफ्नो थप ३ शाखारहित बैंकिङ्ग सेवा सञ्चालनमा ल्याएको छ । बैंकले हालै आफ्नो ६६औँ शाखा कपिलबस्तुको जगदिशपुरमा, ६७औँ शाखा नवलपरासीको झ्यालबास र हसौरामा ६८ औँ शाखारहित बैकिङ्ग सेवा सुरु गरेको हो । बैंकले कपिलबस्तुको जगदिशपुरमा खोलिएको शाखारहित बैंकिङ्ग सेवाको लागि स्थानिय जगदिश गुप्ता, नवलपरासीको झ्यालबासमा खोलिएको सेवाको लागि स्थानिय जुद्घबहादुर थापा र नवलपरासीको हसौरामा खोलिएको सेवाको लागि स्थानिय अमित भण्डारीलाई व्यवसायीक प्रतिनिधि नियुक्त गरेको छ । कृषि र रेमिट्यान्स मुख्य आयस्रोत रहेका यि क्षेत्रका बासिन्दा बैंकिङ्ग सेवा उपभोग गर्नका लागि टाढा-टाढासम्म पुग्नुपर्ने बाध्यतालाई मध्यनजर गरि बैंकले ति स्थानहरुमा शाखारहित बैंकिङ्ग सेवा सुरु गरेको हो । हाल बैंकको ११३ वटा शाखा, १२७ वटा एटिएम, ४ वटा एक्सटेन्सन काउण्टर, १४ वटा राजश्व संकलन काउण्टर सञ्चालनमा रहेका छन् । साथै, बैंकले आजबाट ६८ शाखा रहित बैंकिङ्ग सेवा माफर्त आफ्ना ग्राहकहरु माझ सेवा प्रदान गर्ने भएको छ ।
दोस्रो पुस्ताको राडार आजदेखि सञ्चालनमा, हवाई सेवा सुरक्षित बनाउन एडिएसबी प्रविधि भित्र्याइँदै
काठमाडौं । नेपाल नागरिक उड्डयन प्राधिकरणले बिहीबार(आज)देखि दोस्रो पुस्ताको राडार औपचारिक रुपमा सञ्चालनमा ल्याएको छ । प्राधिकरणका अनुसार आज बिहान ६ः३० बजेदेखि उक्त राडार सञ्चालनमा ल्याइएको हो । हवाई सेवालाई सुरक्षित र भरपर्दो बनाउने लक्ष्यका साथ उक्त राडार सञ्चालनमा ल्याइएको त्रिभुवन अन्तरराष्ट्रिय विमानस्थल कार्यालयका प्रवक्ता प्रेमनाथ ठाकुरले जानकारी दिए। जापानी अन्तरराष्ट्रिय सहयोग नियोग (जाइका) को आर्थिक तथा प्राविधिक सहयोगमा ललितपुरको भट्टेडाँडामा जडान गरिएको उच्च क्षमताका ‘टु जी राडार’ सञ्चालनमा आएसँगै देशको हवाई यात्रालाई सुरक्षित बनाउन मद्दत पुग्ने विश्वास लिइएको छ । प्राधिकरण, जापानी दूतावास र जाइकाको उच्चस्तरीय प्रतिनिधिमण्डलले यही माघ १० गते बुधबार प्राविधिक पक्षको स्थलगत अनुगमन गरी राडार सञ्चालनबारे जानकारी लिएको थियो । त्रिभुवन अन्तरराष्ट्रिय विमानस्थलमा हाल ६० एरोनटिकल माइल क्षमताको राडार सञ्चालनमा रहेकामा आजदेखि १२० एरोनटिकल माइलमा स्तरोन्नति भएको छ । नयाँ प्रणाली जडानसँगै आकाशमा जहाज ‘होल्ड’ गर्नुपर्ने समस्याको अन्त्य हुनेछ । भट्टेडाँडाको आठ हजार २०० फिट अर्थात् दुई हजार ३०० मिटर उचाइमा जडान गरिएको राडार र अन्तरराष्ट्रि«य विमानस्थलमा जडित नयाँ प्रणालीको परीक्षण सफल भइसकेको प्रवक्ता ठाकुरको भनाइ छ । विगतमा रेडियो तरंगमार्फत वायुयानको जानकारी लिन सकिन्थ्यो भने आजदेखि सञ्चालनमा आएको राडारबाट श्रव्यदृश्यसहितको जानकारी लिन सकिने प्राधिकरणको दाबी छ । नयाँ राडार जडानपछि हवाई यात्रा सुरक्षित बनाउन मद्दत पुग्नेछ । उक्त राडारको लागत रु एक अर्ब छ । आजदेखि सञ्चालनमा आएको राडारको गतिविधिबारे सात दिनसम्म नियमित अनुगमन गरी त्यसबाट प्राप्त भएको तथ्यांकलाई विश्लेषण गरिनेछ । “राडारको कामको सूक्ष्म अनुगमन पछि त्यसको प्रभावकारिता के कति रहेको छ भन्ने जानकारी दिइन्छ । पहिलो दिनमा नै हवाई उडानमा केही सहजता थपिएको छ,” प्रवक्ता ठाकुरले भने। नयाँ राडारबाट काठमाडौँदेखि ४५० किलोमिटरको दूरीमा रहेका जहाजको अवस्थाबारे जानकारी लिन सकिने भएको छ । विभिन्न उचाइमा उडिरहेका जहाजको अवस्थाका बारेमा जानकारी लिन वा दिन सकिने छ । राडार जडानपछि नेपालको बाटो प्रयोग गर्दा अन्तरराष्ट्रिय वायुसेवा प्रदायकलाई समेत सहज हुने र त्रिभुवन अन्तरराष्ट्रिय विमानस्थल आवतजावत गर्ने सम्पूर्ण विमानको अवस्था जानकारी पाउन सहज हुने उनको भनाइ छ । भट्टेडाँडामा जडान गरिएको ‘इन रुट राडार’ र विमानस्थलमा जडित ‘टर्मिनल राडार’ले हवाई उडानलाई थप व्यवस्थित र सुरक्षित बनाउने प्राधिकरणको भनाइ छ । नयाँ राडार सञ्चालनमा आएपछि देशका धेरै भूभाग समेटिने र उडान थप सुरक्षित हुने प्राधिकरणका प्रवक्ता वीरेन्द्रप्रसाद श्रेष्ठले जानकारी दिए । उनले हवाई सुरक्षाको क्षमता अभिवृद्धि भएको र ट्राफिक व्यवस्थापनमा समेत सहजता थपिएको स्पष्ट पारेका छन् । “नेपालको हवाई आकाश सुरक्षित बनाउन यो प्रविधिले ठूलो भूमिका खेल्नेछ,” उनले भने । नेपालको पूर्वका सबै भूभाग र पश्चिममा सुर्खेतसम्मको विमानको गति, उचाइलगायतका विषयमा जानकारी पाउन सकिने प्राधिकरणले बताएको छ । पुरानो राडारले करिब ११० किलोमिटर (६० एरोनटिकल माइल) परसम्मको जहाजको अवस्था थाहा पाउन सकिन्थ्यो भने भट्टेडाँडामा जडान गरिएको नयाँ राडारबाट ४५० किलोमिटर (२५० एरोनटिकल माइल)सम्मको जहाजको सम्पूर्ण जानकारी थाहापाउन सकिन्छ । निर्माणाधीन गौतमबुद्ध विमानस्थल सञ्चालनमा आएपछि हाल जडित राडारलाई विस्तार गर्ने योजना अगाडि सारिएको छ । उक्त विमानस्थलमै नयाँ राडार जडान गरेर देशको सबै उडान क्षेत्र समेट्ने तयारी पनि सँगसँगै भइरहेको छ । आगामी डेढ वर्षभित्र उक्त विमानस्थल सञ्चालनमा ल्याउने तयारी छ । एडिएसबी प्रविधि भित्र्याइँदै नेपालको हवाई यातायातलाई भरपर्दो र सुरक्षित बनाउन प्राधिकरणले राडार प्रणालीलाई थप परिष्कृत गर्दै लैजाने सोचका साथ ‘स्वचालित निगरानी संयन्त्र’ (एडिएसबी) जडान गर्ने तयारी गरेको छ । सो प्रणाली काठमाडौं, ललितपुर, नेपालगञ्ज, भैरहवा र पोखरामा जडान गरिने प्राधिकरणका प्रवक्ता श्रेष्ठले जानकारी दिए । नेपालको हवाई मार्ग निगरानीलाई थप परिष्कृत र भरपर्दो बनाउँदै लैजाने ध्येयका साथ पाँच स्थानमा नयाँ प्रविधि जडान गर्न लागिएको हो । विसं २०५७ मा पहिलोपटक नेपाली आकाशलाई सुरक्षित बनाउन जापान सरकारको सहयोगमा राडार जडान गरिएको थियो । उक्त राडार पुरानो प्रविधिको भएकाले नयाँ राडार सञ्चालनमा ल्याइएको हो । थाई एयरको जहाज रसुवाको घोप्टेभिरमा दुर्घटना भएपछि राडार जडान गरिएको थियो । रासस
