त्रिशूली-१ को सुरुङभित्र एक जनाको शव भेटियो
काठमाडौं । माथिल्लो त्रिशूली-१ आयोजनाको सुरुङमा एकजनाको शव भेटिएको छ । शुक्रबार माथिल्लो त्रिशूली-१ आयोजनामा एकजनाको शव भेटिएको नेपाली सेनाले जानकारी दिएको हो । सेनाका उच्च अधिकारीले सुरुमा उक्त क्षेत्रमा ३०० जना मानिस रहेको भनिए पनि अहिले १५१ जना मात्र सम्पर्कमा रहेका बताए । बाँकी मानिसहरू सुरक्षित स्थानमा भागेको हुन सक्ने अनुमान गरिएको उनको भनाइ छ । यस्तै, टनेलको बीच भागमा अक्सिजनको आपूर्ति बन्द नभएकाले त्यहाँ थुनिएकाहरू जीवितै हुन सक्ने झिनो आशा अझै बाँकी रहेको स्वतन्त्र ऊर्जा उत्पादकहरूको संस्था, नेपाल (इप्पान) का वरिष्ठ उपाध्यक्ष उत्तम भ्लोन लामाले जानकारी दिए । त्रिशूली ३-ए र लाङटाङ आयोजना त्रिशूली ३-ए मा ४२ जना मानिसहरू रहेको आशंका गरिए पनि हालसम्म दुईजना जीवित र एकजनाको शव गरी जम्मा तीनजना मात्र फेला परेका छन । त्यस्तै, लाङटाङमा सुरुङभित्र दुईजनाको मृत्यु भएको पुष्टि भइसकेको छ । लाङटाङको पावर हाउस पुरिएकाले त्यसलाई उत्खनन गर्नुपर्ने अवस्था छ । वरिष्ठ उपाध्यक्ष लामाले हाल भारततर्फ करिब ६०० मेगावाट विद्युत निर्यात भइरहेको र बंगलादेशतर्फको निर्यात पनि सुचारु रहेको जानकारी दिए । यद्यपि, यस वर्ष १२ देखि १६ सय मेगावाटसम्म विद्युत निर्यात गरेर करिब ५० अर्ब रुपैयाँ आम्दानी गर्ने लक्ष्य राखिएकोमा आयोजनाहरूमा भएको क्षतिका कारण उक्त लक्ष्य पुरा नहुने देखिएको छ । आयोजनाहरूमा क्षति पुगे पनि र हिउँदमा केही थप विद्युत आयात गर्नुपर्ने स्थिति आए पनि तत्काल लोडसेडिङ भइहाल्ने र सर्वसाधारण डराउनुपर्ने अवस्था नरहेको लामाले स्पष्ट पारे ।
रसुवा बाढीः मधेसका ३१ जना सम्पर्कमा, १६७ अझै बेपत्ता
काठमाडौं । रसुवाको भोटेकोशी नदीमा आएको बाढीका कारण हराइरहेका मधेस प्रदेशका ३१ जना नागरिक परिवारको सम्पर्कमा आएका छन् । मधेस प्रदेश प्रहरी कार्यालयका अनुसार बाढी र पहिरोका कारण सम्पर्कविहीन भएका उनीहरू सुरक्षित रहेको पुष्टि भएको हो । प्रदेश प्रहरी कार्यालयका प्रवक्ता प्रहरी उपरीक्षक प्रभुप्रसाद ढकालका अनुसार बाढीमा परेर अझै १६७ जना सम्पर्कविहीन रहेका छन् । यसैबीच, बाढीमा फसेका सप्तरीका सञ्जयकुमार साहलाई त्रिशूली ए सुरुङबाट जीवितै उद्धार गरिएको छ । प्रहरीका अनुसार सम्पर्कमा आउनेहरूमा पर्साको वीरगञ्जमा बस्दै आएका सिन्धुलीका ज्ञानबहादुर थिङ र श्याम मोक्तान, बाराको कलैया उपमहानगरपालिका–२२ का सत्यम राम तथा स्वर्ण गाउँपालिका–३ का रुपेश गुप्ता रहेका छन् । यस्तै, रौतहटको गढीमाई नगरपालिका–७ का मोविदा खातुन, सकिना खातुन र सलमान अन्सारी, ईशनाथ नगरपालिका–४ का सेख मजिद तथा चन्द्रपुर नगरपालिकाका पवित्रा नेपाल सिलवाल र सम्राट सिलवाल पनि परिवारको सम्पर्कमा आएका छन् । सर्लाहीको लालबन्दी नगरपालिका–१ का वृजकिशोर दास र सुनिता दास तथा बागमती नगरपालिका–६ का दिपेश थापा पनि सुरक्षित फेला परेका छन् ।महोत्तरीको जलेश्वर नगरपालिका–१ का राकेशकुमार यादव, ई. विपीनकुमार मण्डल, श्रीकेश यादव, लोहारपट्टीका युवराज पाण्डे, औरहीका सचिनकुमार यादव, गौशालाका आदित्यनारायण यादव र बर्दिवासका विकास भारती सम्पर्कमा आएको प्रहरीले जनाएको छ । यसैगरी, धनुषाको सबैलाका लक्ष्मण मेहता, हंसपुरका दयावतीदेवी यादव, विजयकुमार यादव र सुरेश पजियार, जनकपुरधामका रीतिक झा, विक्रम ठाकुर र सुशान्त यादव पनि सम्पर्कमा आएका छन् । सिरहाको गोलबजारका टार्जन बलम्पाकी, लहानका उमेश यादव र कञ्चनरुपका अजय मरिक समेत परिवारको सम्पर्कमा आएको विवरण प्राप्त भएको छ । प्रवक्ता ढकालकाअनुसार हालसम्म सप्तरीका ४७, पर्साका ३८, बाराका २३, सर्लाहीका १८, रौतहटका १३, सिरहाका १२, महोत्तरीका १० र धनुषाका ७ जना अझै सम्पर्कविहीन छन् । मधेस प्रदेशका विभिन्न जिल्लाबाट ठुलो संख्यामा नागरिकहरू हराइरहेको सूचना प्राप्त भएपछि प्रहरीले उनीहरूको अवस्था पत्ता लगाउन र विवरण संकलन गर्न विशेष ‘हेल्प डेस्क’ सञ्चालनमा ल्याएको छ । –न्युज एजेन्सी नेपाल
इटालीमा मेलोनीको नयाँ कीर्तिमान, मोदीले दिए बधाई
काठमाडौं । जर्जिया मेलोनी दोस्रो विश्वयुद्धपछि इटालीमा सबैभन्दा लामो समय प्रधानमन्त्री पदमा रहने प्रधानमन्त्री बनेकी छन् । यो उपलब्धिका लागि भारतीय प्रधानमन्त्री नरेन्द्र मोदीले मेलोनीलाई बधाई दिएका छन् । प्रधानमन्त्री मोदीले सामाजिक सञ्जाल ‘एक्स’मार्फत मेलोनीलाई बधाई दिँदै उनको उपलब्धिले इटालीका जनताले उनको नेतृत्वप्रति गरेको विश्वास र भरोसा प्रतिबिम्बित गर्ने बताएका छन् । मोदीले लेखेका छन्, ‘मेरी मित्र तथा प्रधानमन्त्री जर्जिया मेलोनीलाई दोस्रो विश्वयुद्धपछि लगातार सबैभन्दा लामो समय प्रधानमन्त्री पदमा रहने प्रधानमन्त्री बन्नुभएकोमा बधाई ।’ उनले भारत र इटालीबीचको विशेष रणनीतिक साझेदारीलाई थप मजबुत बनाउन मेलोनीको मित्रता र सहकार्यको महत्वपूर्ण भूमिका रहेको उल्लेख गरेका छन् । ‘दुवै देशका जनताको अझ राम्रो र समृद्ध भविष्यका लागि आगामी दिनमा पनि उहाँसँग मिलेर काम गर्न म उत्सुक छु,’ मोदीले भनेका छन् । साथै उनले मेलोनीको आगामी कार्यकालको सफलताका लागि शुभकामना व्यक्त गरेका छन् । यसअघि मेलोनीले पनि सामाजिक सञ्जाल ‘एक्स’मार्फत आफ्नो नेतृत्वमा रहेको सरकार इटाली गणतन्त्रको इतिहासमा सबैभन्दा लामो समय टिक्ने सरकार बनेको बताएकी थिइन् । उनले यस उपलब्धिलाई आफूले गहिरो कृतज्ञता र जिम्मेवारीको भावनाका साथ स्वीकार गरेको बताएकी छन् । मेलोनीका अनुसार स्थिरता देखावटी रूपमा प्रस्तुत गरिने कुनै रेकर्ड नभई देशलाई योजना बनाउन, निर्णय लिन, प्रतिबद्धता पूरा गर्न र सम्मान हासिल गर्न सक्षम बनाउने अवस्था हो । उनले लेखेकी छन्, ‘स्थिरता कुनै प्रदर्शन गर्नुपर्ने रेकर्ड होइन, बरु देशलाई योजना बनाउन, निर्णय लिन, वाचा पूरा गर्न र सम्मान पाउन सक्षम बनाउने अवस्था हो ।’
बाढीप्रभावित क्षेत्रका क्यान्सर बिरामीलाई भक्तपुर क्यान्सर अस्पतालमा निःशुल्क उपचार
काठमाडौं । भक्तपुर क्यान्सर अस्पतालले रसुवा, नुवाकोट र धादिङका लगायत बाढीप्रभावित क्षेत्रका क्यान्सर बिरामीलाई निःशुल्क उपचार गर्ने भएको छ । अस्पतालले सार्वजनिक गरेको सूचनाअनुसार बाढीपीडित क्यान्सर बिरामीका लागि १० प्रतिशत निःशुल्क बेड तथा उपचार सेवा उपलब्ध गराइँदै आएको छ । यसअन्तर्गत बेड चार्ज, ल्याब परीक्षण शुल्क र अक्सिजन शुल्क निःशुल्क हुने तथा उपलब्ध भएसम्म आवश्यक औषधिसमेत उपलब्ध गराइने अस्पतालले जनाएको छ । त्यस्तै, विपन्न, असहाय तथा बेसहारा बिरामीले नेपाल सरकारबाट प्रदान गरिने विभिन्न प्रकारका क्यान्सर उपचारसम्बन्धी सुविधासमेत लिन सक्ने अस्पतालले जनाएको छ । विपन्न स्वास्थ्य बीमा तथा प्रदेश सरकारले प्रदान गर्ने सुविधामार्फत उपचार लिन सकिने भएकाले अस्पतालको सामाजिक सेवा इकाई वा प्रशासन शाखामा सम्पर्क गर्न अनुरोध गरिएको छ ।
दार्चुलामा पहिरोले थुनियो चौलानी नदी, तटीय क्षेत्रमा उच्च सतर्कता अपनाउन प्रशासनको आग्रह
काठमाडौं । दार्चुलाको अपिहिमाल गाउँपालिका-१ भट्टारमा गएको ठूलो पहिरोका कारण चौलानी (चमेलिया) नदी आंशिक रूपमा थुनिएको छ । शुक्रबार दिउँसो खसेको पहिरोले नदीको बहाव रोक्दा अचानक बाढी आउन सक्ने उच्च जोखिम सिर्जना भएको छ । पहिरो खसेलगत्तै नदीको केही भाग थुनिपनि हाल पानी बग्न सुरु गरिसकेको दार्चुलाका प्रमुख जिल्ला अधिकारी वर्तराज पौडेलले जानकारी दिएका छन् । घटनास्थलमा अझै पनि पहिरो खसिरहेकाले नदी पूर्ण रूपमा थुनिने खतरा कायमै रहेको प्रशासनले जनाएको छ । सम्भावित विपद्लाई मध्यनजर गर्दै जिल्ला प्रशासन कार्यालय दार्चुलाले एक सूचना जारी गरी नदी किनार तथा तटीय क्षेत्रका बासिन्दालाई उच्च सतर्कता अपनाउन विशेष आग्रह गरेको छ । प्रशासनले नदी वा खोला किनारमा नजान, जोखिमयुक्त क्षेत्रमा आवतजावत नगर्न तथा स्थानीय तह र सुरक्षा निकायबाट जारी हुने सूचनालाई गम्भीरतापूर्वक पालना गर्न अनुरोध गरेको छ । साथै, कुनै पनि आपत्कालीन अवस्था उत्पन्न भएमा तत्काल उद्धार तथा राहतका लागि जिल्ला प्रशासन कार्यालय, जिल्ला प्रहरी कार्यालय वा सशस्त्र प्रहरी बलसँग समन्वय गर्न अपिल गरिएको छ । ‘पहिरो गएको स्थानबाट करिब सय मिटरको दुरीमा रहेका १२ परिवारलाई सुरक्षित स्थानमा सारिएको छ । तत्काललाई जोखिम छैन् । सतर्क रहनुपर्छ,’ प्रमुख जिल्ला अधिकारी पौडेलले भने । पहिरो गएको स्थानमा जिल्ला प्रशासन कार्यालयबाट टाढा रहेकाले थप अवस्था बुझ्न प्रहरी पठाइएको उनको भनाइ छ । स्थानीय जनप्रतिनिधिले दिएको सूचना अनुसार थप पहिरो नथपिए त्यस्तो ठूलो जोखिम नरहेको प्रमुख पौडेलले जानकारी दिए ।
चौलानी नदी पहिरोले थुनिएपछि तटिय क्षेत्रमा सतर्कता अपनाउन आग्रह
काठमाडौं । चौलानी नदीमा माथिबाट आएको पहिरोका कारण नदी थुनिन गई अचानक बाढी आउन सक्ने जोखिम बढेपछि जिल्ला प्रशासन कार्यालय दार्चुलाले नदी आसपासका बासिन्दालाई सतर्क रहन आग्रह गरेको छ । प्रशासन कार्यालयका अनुसार अपिहिमाल गाउँपालिका–१ क्षेत्रमा पहिरोका कारण चौलानी नदीको बहाव प्रभावित भएको छ । नदी थुनिँदा एक्कासि पानीको मात्रा बढेर बाढी आउन सक्ने सम्भावना रहेकाले नदी किनार तथा आसपासका क्षेत्रमा बसोबास गर्ने नागरिकलाई विशेष सावधानी अपनाउन भनिएको हो । प्रशासनले नदी तथा खोलाको किनारमा नजान, सम्भावित जोखिमयुक्त क्षेत्रमा आवतजावत नगर्न तथा स्थानीय तह र सुरक्षा निकायले दिएको सूचनालाई गम्भीरतापूर्वक पालना गर्न आग्रह गरेको छ । आपत्कालीन अवस्था आएमा जिल्ला प्रशासन कार्यालय, जिल्ला प्रहरी कार्यालय तथा सशस्त्र प्रहरी बलसँग समन्वय गरी उद्धार तथा राहतका लागि आवश्यक व्यवस्था मिलाइने प्रशासनले जनाएको छ । जिल्ला प्रशासन कार्यालय दार्चुलाले जारी गरेको सूचनामा विपद्को जोखिमलाई मध्यनजर गर्दै सर्वसाधारणलाई उच्च सतर्कता अपनाउन विशेष अनुरोध गरिएको छ ।
कविरकी श्रीमतीले भनिन्– फर्किनुहुन्छ भनेर विश्वास नै लागेको थिएन, खुसीको सीमा छैन
काठमाडौं । रसुवाको भोटेकोशीमा आएको भीषण बाढीका कारण त्रिशूली–३ ए को सुरुङभित्र फसेका ललितपुरका कविर महर्जनको शुक्रबार १० दिनपछि जीवितै उद्धार भयो । नेपाली सेनासहित विज्ञ र प्राविधिकहरूको टोलीले महर्जनको शुक्रबार बिहान सकुशल उद्धार गरी काठमाडौं ल्याएको हो । उनको अहिले सैनिक अस्पताल छाउनीको आईसीयू कक्षमा उपचार भइरहेको छ । श्रीमान्लाई भेट्न सैनिक अस्पताल पुगेकी उनकी श्रीमती हीराशोभा महर्जनले महर्जन सकुशल फर्किंदा परिवारमा खुसीको सीमा नभएको बताइन् । उनले श्रीमान्ले सुरुमा आफूलाई चिन्न नसकेको भए पनि अहिले अवस्था ठीकै रहेको बताइन् । खुट्टामा थोरै चोट लागेको र शरीरसमेत पहेँलो भएको कारण चिकित्सकको निगरानीमा राखिएको उनले बताइन् । उनले भनिन्, ‘अहिले ठीकै छ, अलिअलि बोल्नुभएको छ । आउने बेलामा त त्यस्तो बोल्न सकिराख्नुभएको थिएन । मलाई नै चिन्नुभएन सुरुमा त । अहिले आईसीयूमा राखेर उपचार भइरहेको छ । खुट्टामा थोरै चोट लागेको छ । उहाँको सबै शरीर नै पहेँलो भएको छ । उहाँ फर्किनुहुन्छ भनेर विश्वास नै लागेको थिएन । उहाँ फर्किँदा हामी एकदमै खुसी छौँ । परिवारमा सबै खुसी हुनुभएको छ । नेपाली सेनाले उहाँको जीवन बचाइदिनुभएकोमा धन्यवाद ।’ उनी मेकानिकल सुपरभाइजर हुन् ।
पहिरोले कान्ति लोकपथ जोखिममा, सडक खुलाउन मेसिन परिचालन
काठमाडौं । पृथ्वी राजमार्गका विभिन्न खण्डमा पहिरोका कारण आवागमन अवरुद्ध भएपछि वैकल्पिक मार्गका रूपमा रहेको कान्ति लोकपथमा सवारी साधनको चाप अत्यधिक बढेको छ । अत्यधिक सवारी चाप र निरन्तरको वर्षासँगै खसेको पहिरोका कारण यो राजमार्ग सञ्चालनमा चुनौती थपिएको हो । हाल कान्ति लोकपथ हुँदै दैनिक एक हजारभन्दा बढी सवारी साधन आवतजावत गरिरहेका छन् । विशेषगरी हेटौँडाबाट मालवाहक र यात्रुवाहक सवारी साधनहरू त्रिभुवन राजपथ हुँदै काठमाडौं भित्रिने र काठमाडौंबाट खाली फर्किएका सवारी साधनहरू कान्ति लोकपथ प्रयोग गरी हेटौँडा जाने व्यवस्था मिलाइएको छ । काठमाडौंको एकान्तकुना, टीकाभैरव, ठिङ्गन हुँदै हेटौँडा जोड्ने यो सडक खण्डमा सवारी चाप बढेपछि व्यवस्थापनमा कठिनाइ भएको हो । कान्ति राजमार्ग सडक योजनाका इन्जिनियर उपेन्द्र महराका अनुसार सडकलाई सुचारु राख्न विभिन्न खण्डमा जनशक्ति र उपकरणहरू परिचालन गरिएको छ । टीकाभैरवदेखि तीनपानेसम्म तीनवटा ह्विल एक्स्काभेटर र एउटा ब्याकहो लोडर परिचालन गरिएको छ । त्यस्तै, तीनपानेदेखि टार्कुचे खण्डमा पनि निर्माण व्यवसायीमार्फत उपकरणहरू परिचालन गरी सडक खुलाउने काम भइरहेको छ । टार्कुचेदेखि वाग्मती खोला (बगुवा) सम्मको जोखिमपूर्ण खण्डमा तीनवटा एक्स्काभेटर र दुईवटा लोडर तैनाथ राखिएका छन् । मकवानपुर खण्डतर्फ ठिङ्गनदेखि हेटौँडासम्मको सडक तुलनात्मक रूपमा सुरक्षित र कालोपत्रे भइसकेकाले त्यहाँ आवागमन केही सहज छ । यद्यपि, लेबडाँडा र सिमाद खोलाआसपासमा वर्षा हुँदा सामान्य अवरोध हुने गरेको इन्जिनियर महराले जानकारी दिए । सडक विभाग, जिल्ला प्रशासन, नेपाल प्रहरी र ट्राफिक प्रहरीको टोली अहोरात्र खटिएर सडक सुचारु राख्ने प्रयास गरिरहेको उनको भनाइ छ । सडकको विर्खेधारा खण्डमा पहिरो पन्छाउने काम गरिरहेका सब–कन्ट्र्याक्टर धनबहादुर लिम्बूका अनुसार वैशाखदेखि नै निरन्तरको पहिरोले काममा बाधा पुर्याइरहेको छ । हाल दुईवटा स्काभेटर र छवटा टिपर प्रयोग गरेर पहिरो पन्छाउने काम भइरहेको छ । जिल्ला प्रशासन कार्यालयको निर्देशनअनुसार सडक अवरुद्ध हुन नदिन १०–१० मिनेट सवारी रोक्दै पहिरो पन्छाउने कार्य जारी राखिएको छ । यद्यपि, पहिरोको माटो फाल्ने उचित स्थान (डम्पिङ साइट) को अभाव र स्थानीय वन समिति तथा खानेपानी उपभोक्ताहरूको अवरोधका कारण काममा ढिलाइ भइरहेको लिम्बूले बताए । निर्माण व्यवसायी राजकुमार बुढाथोकीका अनुसार बाढी र पहिरोको जोखिमका कारण निर्माणाधीन यस सडकमा हाल निर्माणका कामहरू ठप्प भएका छन् । झन्डै १५० जना मजदुरहरू काम छोडेर बस्नुपर्ने अवस्था सिर्जना भएको छ । बगुवादेखि टीकाभैरवसम्मका छपेली, टार्कुचे र विर्खेधाराजस्ता ठूला पहिरोहरूले सडकलाई अझै जोखिमपूर्ण बनाएका छन् । अहिलेको विपद्को समयमा कान्ति लोकपथलाई ‘सर्भिसेबल’ (चलायमान) बनाउनु नै मुख्य प्राथमिकता रहेको प्राविधिकहरूको भनाइ छ । पृथ्वी राजमार्ग पूर्ण रूपमा सञ्चालनमा नआएसम्म यस सडकमा चाप नघट्ने र त्यसपछि मात्र रोकिएका निर्माण कार्यहरू पुनः अगाडि बढाउन सकिने देखिन्छ ।
