सुक्खायाममा विद्युत आपूर्ति सहज बनाउन ११ सय ५४ मेगावाट विद्युत भारतबाट आयात गरिने
काठमाडौं । नेपाल विद्युत प्राधिकरणले आगामी सुक्खायाममा विद्युत् आपूर्ति सहज बनाउन १ हजार १ सय ५४ मेगावाट विद्युत भारतबाट आयात गर्ने भएको छ । सोमबार (आज) काठमाडौंमा पत्रकार सम्मेलनमा कार्यकारी निर्देशक दीर्घायुकुमार श्रेष्ठले सुक्खायाममा माग र आपूर्तिबीच सन्तुलन कायम गर्ने उक्त मात्रामा विद्युत आयात गर्ने योजना रहेको बताएका हुन् । उनका अनुसार हाल सुक्खायाममा आन्तरिक उत्पादनबाट कुल १ हजार २ सय १८ मेगावाट विद्युत उपलब्ध हुने प्राधिकरणको अनुमान छ । उनले ढल्केबर–मुजफ्फरपुर प्रशारण लाइनबाट ६ सय मेगावाट, टनकपुर–महेन्द्रनगरबाट ५४ मेगावाट, बिहारका विभिन्न बिन्दुबाट ३ सय ५० मेगावाट र आरटिसीमार्फत १ सय ५० मेगावाट विद्युत आयात गर्ने प्राधिकरणको योजना रहेको बताए । उनका अनुसार आन्तरिक उत्पादन र आयात गरी सुक्खायाममा कुल २ हजार ३ सय ७२ मेगावाट विद्युत उपलब्ध हुने प्राधिकरणको अनुमान छ । अघिल्लो आर्थिक वर्षको सुक्खायाममा राष्ट्रिय विद्युत मागको उच्चतम बिन्दु २ हजार २ सय ९२ मेगावाट पुगेको थियो । कार्यकारी निर्देशक श्रेष्ठले गत भदौ १० मा भोटेकोशी र त्रिशूली नदीमा आएको बाढीका कारण माथिल्लो त्रिशूली–३ बीको २ सय २० केभी हब तथा विभिन्न जलविद्युत केन्द्रमा क्षति हुँदा ४ सय ३० मेगावाट विद्युत उत्पादन प्रणालीबाट बाहिरिएको जानकारी दिए । बाढीबाट प्राधिकरण र सहायक कम्पनीका संरचनामा करिब ७४ अर्ब रुपैयाँ बराबरको क्षति भएको प्रारम्भिक अनुमान गरिएको कार्यकारी निर्देशक श्रेष्ठले बताए । खोज तथा उद्धारको काम सम्पन्न भइसकेपछि प्रभावित क्षेत्रका सुरुङ र पावरहाउसमा जम्मा भएको डेब्रिज तथा फोहोर हटाउने काम अघि बढाइने उनले जानकारी दिए ।
दसैंमा सेन्साइको अफर : ३० हजार १०० रुपैयाँसम्म क्यासब्याक
काठमाडौं । नेपालीहरूको महान् पर्व दसैंलाई लक्षित गर्दै सेन्साइले विशेष उत्सव योजना सार्वजनिक गरेको छ । ‘अँध्यारोपछि उज्यालो आउँछ, यो दसैं आशा नछोडौँ, हामी सँगै छौँ’ भन्ने सन्देशसहित कम्पनीले योजना ल्याएको हो । योजनाअन्तर्गत सेन्साइका विभिन्न घरायसी तथा विद्युतीय उपकरण खरिद गर्दा ग्राहकले ३० हजार १०० रुपैयाँसम्म क्यासब्याक पाउनेछन् । योजनामा वाशिङ मेसिन, रेफ्रिजरेटर, चेस्ट फ्रिजर, एयर कूलर, भ्याकुम क्लिनरलगायतका उपकरण समावेश छन् । फ्रन्ट लोड वाशिङ मेसिन खरिद गर्ने ग्राहकले ६ केजी सर्फ एक्सेल र सेमी–अटोमेटिक वाशिङ मेसिन खरिद गर्दा २ केजी सर्फ एक्सेल निःशुल्क पाउने कम्पनीले जनाएको छ । योजनामा सहभागी ग्राहकले बम्पर उपहारका रूपमा सेन्साइ डाइरेक्ट ड्राइभ वाशिङ मेसिन जित्ने अवसरसमेत पाउनेछन्। बम्पर उपहारका लागि योजनामा उपलब्ध क्यूआर कोड स्क्यान गरी आवश्यक विवरण भर्नुपर्नेछ । ग्राहकको खरिदलाई सहज बनाउन शून्य प्रतिशत ब्याजदरमा ईएमआई तथा पुरानो सामानसँग नयाँ सामान साट्ने सुविधा पनि उपलब्ध गराइएको कम्पनीले जनाएको छ । कम्पनीका अनुसार यो योजना भदौ २६ गतेदेखि सीमित अवधिका लागि लागू भएको हो । चौधरी ग्रुपअन्तर्गतको सीजी इलेक्ट्रोनिक्सले नेपालमा सेन्साइका उत्पादन बिक्री वितरण गर्दै आएको छ । सेन्साइका उत्पादन नेपालभरका आधिकारिक डिलर तथा २२ वटा सीजी डिजिटल शोरुमबाट उपलब्ध हुने कम्पनीले जनाएको छ ।
अत्यधिक वर्षाबाट धानमा हुने क्षतिका लागि सलिकोको नयाँ बीमा योजना
काठमाडौं । सगरमाथा लुम्बिनी इन्स्योरेन्स कम्पनी लिमिटेड (सलिको)ले अत्यधिक वर्षाका कारण धान उत्पादनमा हुन सक्ने क्षतिका लागि नयाँ बीमालेख जारी गरेको छ । नेपाल बीमा प्राधिकरणबाट स्वीकृति लिएर कम्पनीले ‘अत्यधिक वर्षाको सूचकांकमा आधारित धान उत्पादनमा हुने ह्रास सम्बन्धी बीमालेख’ सञ्चालनमा ल्याएको हो । यो बीमालेख २०८३ असोज ७ गतेदेखि मंसिर ७ गतेसम्म लागू हुनेछ । कम्पनीका अनुसार कैलाली, कञ्चनपुर, धनुषा, सिराहा, सर्लाही, बाँके, बर्दिया, दाङ र कपिलवस्तुका धान उत्पादक किसानलाई यस बीमालेखमा समेटिएको छ । यस बीमालेखमा प्रति कट्ठा १ हजार ५९५ रुपैयाँ बीमाङ्क रकम कायम गरिएको छ । बीमालेख जारी भएको पहिलो दिनमै करिब १ हजार ३०५ किसानको ३ हजार ३०४ कट्ठा क्षेत्रफलको धानको बीमा गरिएको कम्पनीले जनाएको छ । यस बीमालेखमा किसानको खेतमा भएको वास्तविक क्षति छुट्टै मूल्याङ्कन गरिने छैन । तोकिएको तीन दिनको अधिकतम सञ्चित वर्षाको मात्राका आधारमा क्षतिपूर्ति निर्धारण गरिनेछ । तोकिएको वर्षाको सूचकांक पुगेमा किसानले छुट्टै दाबी फाराम वा अन्य कागजात बुझाउनुपर्ने छैन । बीमा भुक्तानीका लागि योग्य भएमा दाबी रकम किसानको बैंक खातामा सिधै जम्मा हुने व्यवस्था गरिएको कम्पनीले जनाएको छ । कम्पनीका अनुसार यस व्यवस्थाले किसानलाई दाबी प्रक्रियामा लाग्ने कागजी झन्झट र अतिरिक्त समयबाट राहत दिनेछ । अत्यधिक वर्षाका कारण धान उत्पादनमा कमी हुँदा हुने आर्थिक जोखिम व्यवस्थापनमा बीमालेखले सहयोग पुग्ने कम्पनीको विश्वास छ ।
राष्ट्रपति पौडेलसमक्ष राष्ट्रिय समावेशी आयोगको वार्षिक प्रतिवेदन पेश
काठमाडौं । राष्ट्रपति रामचन्द्र पौडेलसमक्ष राष्ट्रिय समावेशी आयोगले आर्थिक वर्ष २०८२/०८३ को वार्षिक प्रतिवेदन पेश गरेको छ । राष्ट्रपति भवन शीतल निवासमा सोमबार (आज) आयोजित कार्यक्रममा आयोगका कार्यवाहक अध्यक्ष हरिदत्त जोशीले राष्ट्रपति पौडेलसमक्ष वार्षिक प्रतिवेदन पेश गरेका हुन् । संवैधानिक व्यवस्थाअनुसार आयोगले आर्थिक वर्षभरि सम्पादन गरेका काम, गतिविधि तथा समावेशीकरणसँग सम्बन्धित विषय समेटिएको प्रतिवेदन राष्ट्रपतिसमक्ष पेश गरिएको हो ।
सानिमा बैंकको १० प्रतिशत नगद लाभांश पारित
काठमाडौं । सानिमा बैंक लिमिटेडको २२औँ वार्षिक साधारणसभा सम्पन्न भएको छ । बैंकका अध्यक्ष तुक प्रसाद पौडेलको अध्यक्षतामा असोज १२ गते सोमबार साधारणसभा सम्पन्न भएको हो । सभाले आर्थिक वर्ष २०८२/८३ का लागि साधारण सेयरधनीलाई १० प्रतिशत नगद लाभांश र अग्राधिकार सेयरधनीलाई ८.२५ प्रतिशत नगद लाभांश दिने प्रस्ताव पारित गरेको छ । दुवै लाभांशमा करसमेत समावेश छ । साधारणसभाबाट सर्वसाधारण सेयरधनीको तर्फबाट तेजबहादुर चन्द र महेश घिमिरे सञ्चालकमा निर्विरोध निर्वाचित भएका छन् । बैंकले आर्थिक वर्ष २०८२/८३ मा ३ अर्ब ५५ करोड रुपैयाँ खुद नाफा कमाएको जनाएको छ । बैंकको कुल सम्पत्ति २ खर्ब ९१ अर्ब २१ करोड रुपैयाँ, कुल निक्षेप २ खर्ब ४९ अर्ब ९३ करोड रुपैयाँ र खुद कर्जा सापटी २ खर्ब ३ अर्ब ९९ करोड रुपैयाँ पुगेको छ । अघिल्लो आर्थिक वर्षको तुलनामा बैंकको निक्षेप १०.८४ प्रतिशत, कर्जा सापटी ११.१९ प्रतिशत र कुल सम्पत्ति १०.५० प्रतिशतले बढेको बैंकले जनाएको छ । असार मसान्तसम्म बैंकको निष्क्रिय कर्जा २.८७ प्रतिशत, पुँजीकोष १२.८३ प्रतिशत, तरलता ३०.६८ प्रतिशत र कर्जा–निक्षेप अनुपात ८०.७७ प्रतिशत रहेको छ ।
दशैं भत्तासहित सेवा-सुविधाको माग गर्दै जडिबुटीका कर्मचारी धर्नामा
काठमाडौं । नेपाल सरकारको पूर्ण स्वामित्वमा रहेको जडीबुटी उत्पादन तथा प्रशोधन कम्पनी लिमिटेडका कर्मचारी सेवा-सुविधाको माग गर्दै धर्नामा बसेपछि कम्पनीको नियमित काम प्रभावित भएको छ । कर्मचारीहरू असोज ५ गतेदेखि केन्द्रीय कार्यालय कोटेश्वरसहित विभिन्न शाखा कार्यालयमा धर्नामा बसेका हुन् । श्रम अदालतले ३१ जेठ २०८१ मा गरेको फैसलाअनुसार श्रम ऐन, २०७४ र सामाजिक सुरक्षा ऐन, २०७५ ले तोकेका सेवा–सुविधा उपलब्ध गराउनुपर्ने माग कर्मचारीको छ । उनीहरूले आफूहरूले कानुनअनुसार पाउनुपर्ने सेवा–सुविधा लामो समयदेखि नपाएको भन्दै व्यवस्थापन समक्ष माग राख्दै आएका छन् । कर्मचारीका अनुसार कम्पनीबाट उपलब्ध हुनुपर्ने परिचयपत्रसमेत पाएका छैनन् । त्यस्तै, चाडपर्व खर्च, सुत्केरी स्याहार, प्रसूति बिदालगायतका सेवा-सुविधा पनि नपाएको उनीहरूको गुनासो छ । माग पूरा गर्न सञ्चालक समिति र व्यवस्थापनसँग पटक–पटक आग्रह गर्दा पनि सुनुवाइ नभएपछि धर्नामा बस्नुपरेको उनीहरूको भनाइ छ । कर्मचारीले केन्द्रीय कार्यालयसँगै बारा तामागढी, सुनसरीको तरहरा लगायत शाखा कार्यालयमा समेत आन्दोलनलाई समर्थन गरेका छन् । उनीहरूले प्रधानमन्त्री तथा मन्त्रिपरिषद्को कार्यालय, कृषि, वन तथा वातावरण मन्त्रालय, र श्रम, रोजगार तथा सामाजिक सुरक्षा मन्त्रालयमा समेत पत्राचार गरिसकेको बताएका छन् । तर, कम्पनीकी कार्यकारी प्रबन्धक उषा रिजालले भने कर्मचारीले तत्काल माग गरेको दशैं भत्तालगायतका सुविधा उपलब्ध गराउन कानुनी आधार आवश्यक पर्ने बताउँछिन् । सरकारी स्वामित्वको कम्पनी भएकाले कुनै पनि सुविधा कानुनी प्रक्रिया पूरा नगरी दिन नसकिने उनको भनाइ छ । ‘अहिले उहाँहरूले माग गर्नुभएको सुविधा दिने कानुनी आधार छैन,’ रिजालले भनिन्, ‘सरकारी कम्पनी भएकाले कुनै न कुनै कानुनी आधारमा टेकेर काम गर्नुपर्छ । विनियममा व्यवस्था नभएको सुविधा तत्कालै कसरी दिने भन्ने समस्या छ ।’ उनका अनुसार कम्पनीले कर्मचारीलाई सेवा–सुविधा थप गर्ने विषयमा सम्बन्धित निकायसँग प्रक्रिया अघि बढाउनुपर्ने हुन्छ । कम्पनीको विनियमअनुसार आर्थिक विषयमा अर्थ मन्त्रालयको सहमति आवश्यक पर्ने भएकाले त्यसतर्फ पनि प्रक्रिया अघि बढाइएको उनले बताइन् । रिजालले कर्मचारीको मागका सम्बन्धमा कम्पनीमा प्राप्त भएका पत्रहरूको बोधार्थ सम्बन्धित मन्त्रालय तथा माथिल्लो निकायमा पठाइएको र आवश्यक जवाफसमेत पठाइसकिएको बताइन् । ‘सबैतिर पत्राचार भएको छ । हामीले जवाफ पनि पठाइसकेका छौं,’ उनले भनिन् । उनले कर्मचारीलाई काममा फर्किएर वार्तामार्फत समस्या समाधान गर्न आग्रह गरेकी छन् । ‘काम रोकेर समस्या समाधान हुँदैन । काम गर्नुपर्छ,’ उनले भनिन्, ‘उहाँहरूसँग फोनमा पनि कुराकानी भइरहेको छ । तर, अहिले मागअनुसार तत्काल सुविधा दिन मिल्ने अवस्था छैन ।’ कर्मचारी काममा नफर्किए कम्पनीको उत्पादन र बजारमा पठाउने काम प्रभावित हुने उनको भनाइ छ । ‘उत्पादन गरेर बजारमा पठाउने र त्यसबाट आम्दानी गर्ने हो । कर्मचारी काममा नआए उत्पादन प्रभावित हुन्छ र कम्पनीलाई घाटा हुन्छ,’ उनले भनिन् । तर, कर्मचारीको तत्कालको मुख्य माग दशैं भत्ता उपलब्ध गराउनु रहेको भए पनि त्यसका लागि कम्पनीको विद्यमान विनियममा स्पष्ट व्यवस्था नभएको रिजालको भनाइ छ । भविष्यमा विनियम संशोधन गरेर सेवा-सुविधाका विषयमा कानुनी रूपमा निर्णय गर्न सकिने भए पनि तत्कालै सुविधा दिन कठिन रहेको उनले बताइन् ।
शिक्षामन्त्री पोखरेलसँग रसियाका राजदूतको शिष्टाचार भेट
काठमाडौं । शिक्षा तथा खेलकुदमन्त्री सस्मित पोखरेलसँग नेपालका लागि रसियाका राजदूत एलेक्सी भ्लादिमेरोभिकले शिष्टाचार भेटवार्ता गरेका छन् । सिंहदरबारस्थित शिक्षा तथा खेलकुद मन्त्रालयमा सोमबार (आज) भेट भएको हो । भेटमा नेपाल र रसियाबीचको द्विपक्षीय सम्बन्ध तथा आपसी हितका विषयमा छलफल भएको थियो । शिक्षा, खेलकुद, जनशक्ति विकासलगायत पारस्परिक हितका विभिन्न क्षेत्रमा सहकार्य विस्तार गर्ने विषयमा समेत छलफल भएको मन्त्रालयले जनाएको छ । मन्त्री पोखरेलले नेपालको जनशक्ति विकासमा रसियन सरकारले गर्दै आएको योगदान र सहयोगप्रति धन्यवाद व्यक्त गरे । उनले शिक्षा तथा खेलकुदका क्षेत्रमा नेपाल र रसियाबीचको सहकार्यलाई थप विस्तार गर्नुपर्नेमा जोड दिए । भेटमा राजदूत भ्लादिमेरोभिकले नेपालको शिक्षा तथा खेलकुद क्षेत्रमा लगानी गर्न रसियाली पक्ष इच्छुक रहेको बताए । उनले यी क्षेत्रमा सहकार्यका नयाँ सम्भावना पहिल्याउँदै दुई देशबीचको सम्बन्धलाई थप मजबुत बनाउन सकिने धारणा राखे ।
धनगढीमा खुल्यो भेस्पा र अप्रिलियाको नयाँ शोरुम
काठमाडौं । भेस्पा र अप्रिलियाको नेपालका लागि आधिकारिक वितरक डेल्टा अटोकर्प प्रालिले धनगढीमा नयाँ शोरुम सञ्चालनमा ल्याएको छ । युवापुस्तामाझ भेस्पा र अप्रिलियाका स्कुटरप्रति बढ्दो रुचि र ग्राहकको सहजतालाई ध्यानमा राख्दै धनगढीमा नयाँ शोरुम विस्तार गरिएको कम्पनीले जनाएको छ । शोरुमको असोज ९ गते विशेष कार्यक्रमबीच उद्घाटन गरिएको हो । उद्घाटन कार्यक्रममा डेल्टा अटोकर्पका निर्देशक तथा प्रमुख कार्यकारी अधिकृत विजय कुमार महतोले देशभर भेस्पा र अप्रिलियाका स्कुटर सहज रूपमा उपलब्ध गराउने योजनाअनुसार धनगढीमा नयाँ शोरुम सञ्चालनमा ल्याइएको बताए । उनका अनुसार नयाँ शोरुमबाट ग्राहकले अन्य शोरुममा उपलब्ध हुँदै आएका सेवा तथा सुविधा प्राप्त गर्नेछन् । ग्राहकको आवश्यकता र अपेक्षाअनुसार सेवा विस्तार गर्दै लैजाने प्रतिबद्धता पनि उनले व्यक्त गरे । धनगढी उपमहानगरपालिका–४ स्थित वेस्टर्न म्याक नेपाल प्रालिबाट भेस्पा र अप्रिलियाका विभिन्न मोडल खरिद गर्न सकिने कम्पनीले जनाएको छ । शोरुममा हालै नेपालमा सार्वजनिक गरिएको १७५ सीसीको अप्रिलिया एसआर १७५ लगायत भेस्पाका विभिन्न मोडल र नयाँ रङहरू उपलब्ध हुनेछन् । भेस्पाका नयाँ लाइल्याक र ओरो गोल्डेन रङमा समेत स्कुटर खरिद गर्न सकिने कम्पनीले जनाएको छ । डेल्टा अटोकर्पले देशभर शोरुम तथा आधिकारिक सर्भिस सेन्टरको संख्या बढाउँदै लगेको जनाएको छ ।
