‘राजनीतिक नियुक्ति पाएकाले मार्ग प्रशस्त गर्नु, कर्मचारीले सरकारसँग गति मिलाउन आवश्यक छ’
काठमाडाैं । राष्ट्रिय स्वतन्त्र पार्टी (रास्वपा)का सभापति तथा सांसद रवि लामिछानेले अब कर्मचारीतन्त्रले सरकारसँग रफ्तार गति मिलाउनुको विकल्प नभएको बताएका छन् । प्रतिनिधिसभाको पहिलो बैठकमा उनले सरकारले आफ्नो रफ्तार सुरु गरिसकेको बताउँदै त्यसमा कर्मचारी र सबैले गति मिलाउनु पर्ने बताएका हुन् । ‘हामी प्रश्न सोधेर आएका हौं, अब हामीले काम गरेर पनि देखाउन सक्छौं भनेर देखाउनुपर्नेछ, प्रतिपक्षले आलोचनात्मक टिप्पणीलाई हामी स्वागत गर्नेछौं । अब माइक काटिने छैन,’ उनले भने । उनले विगतका सरकारले नियुक्ति गरेका व्यक्तिहरुले मार्ग प्रशस्त गर्न पनि उनले आग्रह गरे । उनले विदेशी लगानीकर्तालाई पनि नेपाल अब लगानीमैत्री वातावरण बनेकोले लगानी गर्न पनि आग्रह गरे ।
सिंहदरबार चलाउन होइन, बदल्न आएका हौं : रवि लामिछाने
काठमाडौं । राष्ट्रिय स्वतन्त्र पार्टी (रास्वपा) का सभापति तथा प्रतिनिधि सभा सदस्य रवि लामिछानेले सरकार परिवर्तनको उद्देश्य केवल शासन सञ्चालन नभई प्रणाली रूपान्तरण भएको बताएका छन्। प्रतिनिधि सभा बैठकमा बोल्दै उनले जनताले दिएको म्यान्डेट सिंहदरबार चलाउन नभई सिंहदरबार बदल्न भएको बताए । लामिछानेले सिंहदरबार बदल्ने प्रक्रिया सुरु भइसकेको दाबी गर्दै सरकारले परिणाममुखी काम गर्ने प्रतिबद्धता व्यक्त गरे। उनले विपक्षी दलका सकारात्मक एजेण्डालाई पनि सरकारले कार्यान्वयन गर्ने उल्लेख गर्दै सहकार्यको राजनीतिमा जोड दिए । ‘हामी काम गरेर देखाउँछौं,’ उनले भने, ‘राम्रो कुरा जहाँबाट आए पनि स्वीकार गर्छौं ।’ उनले विगतका सरकारका कमजोरीहरूलाई लाजको विषय नभई सिक्ने अवसरका रूपमा लिने बताए । यसले नयाँ सरकार आत्मआलोचनात्मक र सुधारमुखी रहेको सन्देश दिएको छ । लामिछानेले आफ्ना निर्णयहरू अहंकाररहित हुने दाबी गर्दै लोकतान्त्रिक मूल्यअनुसार प्रतिपक्षको आवाजलाई कमजोर हुन नदिने प्रतिबद्धता समेत जनाए ।
संसद्मा एमालेको माग–ओली र लेखकलाई रिहा गर
काठमाडौं । प्रतिनिधिसभाको पहिलो बैठकमा प्रतिपक्षी दल नेकपा एमालेले अध्यक्ष केपी शर्मा ओली र नेपाली कांग्रेसका नेता रमेश लेखकलाई रिहा गर्न माग गरेका छन्। बैठक सुरु हुँदाबित्तिकै विरोध जनाउँदै एमाले सांसद गुरु बरालले ओली र लेखक पक्राउ गरेकोप्रति आपत्ति जनाउँदै रिहा गर्न माग गरेका हुन् । ‘नेकपा एमालेका अध्यक्ष केपी शर्मा ओली र नेपाली कांग्रेसका नेता रमेश लेखकलाई मुलुकी कार्यविधिको दफा १८१ र १८२ गलत ढंगबाट प्रयोग गरेर बन्दी बनाइएको छ । यो गम्भीर आपत्तिको विषय छ । आजै पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकको रिहाइको माग गर्दछौं, बरालले भने । बरालले विरोध गरेपछि सभामुख अर्जुननरसिंह केसीले उनलाई बोल्न समय दिएका थिए।
बैठक सुरु हुनासाथ एमालेको विरोध
काठमाडाैं । नयाँ संसद्को पहिलो बैठक सुरु हुनासाथ नेकपा एमालेले अवरोध गरेको छ । बैठक सुरु हुनासाथ एमाले सांसद गुरु बरालले उठेर विरोध गरेका हुन् । त्यसपश्चात सभामुख अर्जुनरसिंह केसीले बराललाई बोल्न समय दिए । फागुन २१ मा सम्पन्न निर्वाचनपछि गठन भएको प्रतिनिधि सभाको पहिलो बैठक सुरु भएको हो । सिंहदरबारस्थित निर्माणाधीन संघीय संसद् भवनको बहुद्देश्यीय कक्षमा बैठक सुरु भएको हो ।
नयाँ संसद्को पहिलो बैठक सुरु
काठमाडौं । फागुन २१ मा सम्पन्न निर्वाचनपछि गठन भएको प्रतिनिधि सभाको पहिलो बैठक सुरु भएको छ । सिंहदरबारस्थित निर्माणाधीन संघीय संसद् भवनको बहुद्देश्यीय कक्षमा बैठक सुरु भएको हो । बैठकमा संसदमा प्रतिनिधित्व गर्ने प्रमुख राजनीतिक दलका शीर्ष नेताहरूले सम्बोधन गर्ने कार्यक्रम तय गरिएको छ । आजको बैठकमा सत्तारूढ दल रास्वपाका सभापति रवि लामिछानेले सरकारको धारणा प्रस्तुत गर्ने कार्यक्रम रहेको संसद सचिवालयले जनाएको छ । प्रमुख प्रतिपक्षी दल नेपाली कांग्रेसका तर्फबाट भीष्मराज आङ्देम्बेले सम्बोधन गर्ने तय भएको छ । कांग्रेसले अझै संसदीय दलको नेता टुंगो नलगाएका कारण आङ्देम्बेलाई वक्ताको रूपमा अघि सारिएको हो । अर्का नेता अर्जुननरसिंह केसी ज्येष्ठ सदस्यका रूपमा बैठक सञ्चालनमा केन्द्रित रहने भएकाले उनी सम्बोधनमा सहभागी नहुने भएका हुन् । यसैगरी, नेकपा एमालेबाट रामबहादुर थापा, श्रम संस्कृतिबाट हर्क साम्पाङ र राष्ट्रिय प्रजातन्त्र पार्टीबाट ज्ञानेन्द्र शाहीले पनि आफ्नो धारणा राख्ने तय भएको छ । नेकपाका तर्फबाट संयोजक प्रचण्डले वर्षमान पुनलाई वक्ताका रूपमा अघि बढाउने तयारी गरेको नेकपाका एक नेताले जानकारी दिए । म्याग्दीबाट स्वतन्त्र रूपमा निर्वाचित सांसद महावीर पुनले समेत पहिलो बैठकमा बोल्ने अवसर पाउनेछन् । प्रधानमन्त्री बालेन्द्र शाह संसद् भवनमा उपस्थित हुने भए पनि आजको बैठकमा सम्बोधन नगर्ने उनको सचिवालयले जनाएको छ ।
साइकल चढेर संसद् भवन पुगे रास्वपा सांसद गजुरेल
काठमाडौं । राष्ट्रिय स्वतन्त्र पार्टी (रास्वपा) का सांसद आशिष गजुरेल साइकल चढेर संसद भवन पुगेका छन् । निर्वाचनपछिको पहिलो संसद बैठकमा सहभागी हुन उनी मौलिक पहिरन ‘दौरा–सुरुवाल’ मा माउन्टेन बाइक चढेर सिंहदरबार छिरेका हुन् । यातायात विज्ञसमेत रहेका गजुरेल भन्छन्, ‘हाम्रो सहरको चाप र स्वास्थ्यका लागि सम्भव भएसम्म हिँड्ने र नभए सार्वजनिक यातायातको प्रयोग गर्नु नै उत्तम हुन्छ ।’ उनी सिन्धुली– २ बाट निर्वाचित सांसद हुन् ।
हवाई इन्धनको मूल्यवृद्धिसँगै उडान भाडा आकासियो, धनगढी पुग्नै २३ हजार
काठमाडौं । मध्यपूर्वमा द्वन्द्व चर्किएसँगै अन्तर्राष्ट्रिय बजारमा इन्धनको मूल्यमा भारी वृद्धि भएपछि नेपाल आयल निगमले हवाई इन्धनको मूल्य दोब्बरले बढाएको छ । नेपाल आयल निगमले बुधबारदेखि लागू हुनेगरी हवाई इन्धनको मूल्यमा प्रतिलिटर १२४ रुपैयाँ वृद्धि गरेको छ । यो वृद्धिसँगै अब हवाई इन्धनको मूल्य प्रतिलिटर २५१ रुपैयाँ पुगेको छ । हवाई इन्धनको मूल्य बढेसँगै वायुसेवा कम्पनीहरूले आफ्नो उडान खर्च धान्नका लागि ‘फ्युल चार्ज’ बढाएका छन । वायुसेवा सञ्चालक संघले प्रेस विज्ञप्ति जारी गरेर ‘फ्युल चार्ज’ बढाएको जानकारी गराएको छ । नेपाल नागरिक उड्ययन प्राधिकरण (क्यान) ले बुधबारदेखि नै लागू हुनेगरी नयाँ ‘फ्युल सर्चेच’ जारी गरेको छ । कहाँ जान कति भाडा ? इन्धनको मूल्यवृद्धिसँगै काठमाडौं-धनगढी रुटका भाडामा इन्धनको मूल्य ११ हजार ९० रुपैयाँ पुगेको छ । अब काठमाडौंबाट धनगढी जान अधिकतम भाडा २३ हजार ५९ रुपैयाँ खर्चिनु पर्ने भएको छ । धनगढी रुटको न्यूनतम भाडादर १४ हजार ४ सय ५७ कायम भएको छ । क्यानका अनुसार काठमाडौं-माउन्टेनको अधिकतम भाडा १८ हजार २६ पुगेको छ । काठमाडौं–माउन्टेनको न्यूनतम भाडा ११ हजार ३४२ कायम भएको छ । यसअघि काठमाडौं–माउन्टेनको लागि इन्धनको भाडा ४ हजार ३६० तोकिएको थियो । मूल्य बढेसँगै उक्त रुटको भाडामा इन्धनको मूल्य ८ हजार ६१५ पुगेको छ । काठमाडौं–भद्रपुरका न्युनतम भाडा ९ हजार ९८९ रुपैयाँ र अधिकतम १५ हजार ८ सय ३७ पुगेको छ । उक्त रुटमा इन्धनको मूल्य ३ हजार ७२५ रुपैयाँले वृद्धि भएको छ । यसअघि भद्रपुर रुटको लागि इन्धनको मूल्य ३ हजार ८१५ रुपैयाँ रहेकोमा वृद्धि भएर ७ हजार ५४० रुपैयाँ पुगेको छ । त्यस्तै, काठमाडौं–विराटनगरको न्यूनतम भाडा ८ हजार ८८ रुपैयाँ र अधिकतम १२ हजार ७ सय ६५ रुपैयाँ पुगेको छ । काठमाडौं–जनकपुरको न्यूनतम भाडादर ५ हजार ५ सय ६५ र अधिकतम ७ हजार ७० कायम भएको छ । काठमाडौं–भरतपुरको न्यूनतम भाडा ३ हजार ८८५ रुपैयाँ र अधिकतम ५ हजार ९७३ रुपैयाँ तोकिएको छ । त्यसैगरी, काठमाडौं–पोखरा रुटको न्यूनतम ५ हजार ५१५ र अधिकतम ८ हजार ६ सय ५ कायम भएको छ । काठमाडौं–भैरहवा रुटको न्यूनतम ७ हजार ६ रुपैयाँ र अधिकतम ११ हजार १६ रुपैयाँ पुगेको छ । काठमाडौं–नेपालगन्ज भाडा न्यूनतम १० हजार ८ सय र अधिकतम १७ हजार १ सय ४८ कायम भएको छ । काठमाडौं–तुम्लिङटार न्यूनतम भाडा ६ हजार ३ सय २७ र अधिकतम ९ हजार ९ सय २० कायम भएको तोकिएको छ । त्यसैगरी, काठमाडौं–सिमरा रुटको न्यूनतम भाडा ३ हजार ३४४ रुपैयाँ र अधिकतम ५ हजार ९८ रुपैयाँ कायम भएको छ । काठमाडौं–राजविराजको भाडा अधिकतम १० हजार ७५० र न्यूनतम ८ हजार ५१२ रुपैयाँ पुगेको छ। नेपाल नागरिक उड्डयन प्राधिकरण का सूचना अधिकारी ज्ञानेन्द्र भुलका अनुसार यात्रुले तिर्ने हवाई भाडा चार प्रमुख आधारमा निर्धारण हुन्छ । ‘हाम्रो प्यासेन्जरले तिर्ने हवाई भाडामा चार वटा कुरा सहभागी हुन्छ, लागतदर, फ्युल सर्चार्ज, एयरपोर्ट ट्याक्स र १३ प्रतिशत भ्याट,’ उनले भने । उनका अनुसार लागतदर नेपाल सरकारले स्वीकृत गरेको संरचनाअनुसार निर्धारण हुने गर्दछ, जुन २०७३ सालदेखि लागू भए पनि समयमै पुनरावलोकन हुन सकेको छैन । ‘यो प्रत्येक दुई–दुई वर्षमा समीक्षा हुनुपर्नेमा अहिलेसम्म हुन सकेको छैन,’ भुलले बताए । हवाई भाडामा सबैभन्दा ठूलो प्रभाव इन्धनको मूल्यले पार्ने उनले स्पष्ट पारे । टोटल म्याक्सिमम फेयरमा करिब ४० प्रतिशत हिस्सा हवाई इन्धनकै हुन्छ । नेपाल सरकारको २०७५ सालको व्यवस्थाअनुसार हवाई इन्धनको मूल्य जति बढ्छ, सोही आधारमा भाडा समायोजन गर्ने प्रावधान रहेको छ । सोही व्यवस्था अनुसार प्राधिकरणले नयाँ भाडादर लागू गरेको भुलको भनाइ छ । भुलले अहिलेको अवस्था असामान्य रहेको उल्लेख गर्दै यात्रुलाई केही समयका लागि समायोजन भाडामै कम्प्रोमाइज आग्रह गरे । ‘यो हवाई भाडा यात्रुका लागि महँगो हो, तर असामान्य परिस्थितिका कारण यस्तो अवस्था आएको हो,’ उनले भने, ‘अहिले सबैले केही न केही कम्प्रोमाइज गर्नुपर्ने अवस्था छ ।’
