५ वर्षपछि बुटवल पावर कम्पनी सेयरधनी मालमाल हुँदै, कसरी ?
काठमाडौं । आगामी पाँच वर्षपछि बुटवल पावर कम्पनी लिमिटेड (बीपीसी) का लगानीकर्ता मालमाल हुने भएका छन् । चीनियाँ कम्पनीसंगको साझेदारीमा १ हजार मेगावाट बिजुली उत्पादन गर्न संयुक्त लगानीमा होल्डिङस कम्पनी स्थापना भएसँगै आगामी ५ वर्षपछि बीपीसीका लगानी कर्ता मालामाल हुने देखिएको हो । १ हजार मेगावाट बिजुली उत्पादन गर्न बीपीसीले २ खर्ब रुपैयाँ चीनियाँ लगानी ल्याउनेछ । यस्तै आफनो लगानीमा बीपीसीले ३७.६ मेगावाटको कावेली ए आयोजना कावेली इनर्जी लिमिटेड र ३० मेगावाटको न्यादी आयोजना न्यादी हाइड्रोपावर लिमिटेडमार्फत बीपीसीले निर्माण गरिरहेको छ । यी दुबै आयोजना आउदो ३ वर्षमा सम्पन्न हुदैछन् । यस्तै चीनियाँ लगानी ल्याउने भएपछि बीपीसीका आर्थिक अवस्था मजवुत भई लगानीकर्ताले राम्रो प्रतिफल पाउने प्रमुख कार्यकारी अधिकृत (सीईओ) उत्तरकुमार श्रेष्ठ बताउछन् । बीपीसीले सहायक कम्पनीमार्फत धेरै आयोजना निर्माण गर्ने भएकाले दीर्र्घकालमा लगानीकर्ताले अझ राम्रो प्रतिफल प्राप्त गर्ने उनको भनाई छ । हाल बीपीसीले २८ देखि ३० प्रतिशत हारहारीमा लाभांश दिदै आएकोमा कावेली, न्यादी र अन्य पाइपलाइनमा भएका आयोजना सम्पन्न भएपछि सेयरधनीको प्रतिफल बढ्ने उनको तर्क छ । यो वर्षपनि २५ देखि २८ प्रतिशतको हारहारीमा सेयरधनीलाई लाभांश दिदै छ । बीपीसीले जलविद्युत आयोजना बनाउन चीनका ३ वटा कम्पनी र नेपाली साझेदार बीपीसीको संयुक्त लगानीमा एसजीआईजी इन्टरनेसनल नेपाल हाइड्रोपावर कम्पनी स्थापना भएको छ । कम्पनीका दर्ता बुधबार नै भएको छ । होल्डिङ कम्पनीमार्फत आउदो ५ वर्षमा थप १ हजार मेगावाट बिजुली उत्पादन गर्ने लक्ष्य लिइएको छ । सिचुवन प्रोभिन्सल इन्भेष्टमेन्ट ग्रुप कम्पनी लिमिटेड, चेङ्गदु सिंचेन इन्भेष्टमेन्ट ग्रुप कम्पनी लिमिटेड र छिमयूआन इन्जिनीयरिङ्ग कन्सल्टिङ्ग कम्पनी लिमिटेडले नेपालमा होल्डिङ कम्पनी स्थापना गरेका हुन् । तत्काल १ अर्ब ९० करोड रुपैयाँ पुँजी रहने होल्डिङ कम्पनीमा बीपीसीका २०, चीनको एसजीआईको ६५ र १५ प्रतिशत क्युवाईईसी बेटरसिटीका स्वामित्व रहने गरी लगानी संरचना तयार पारिएको छ । होल्डिङस कम्पनीमा बीपीसीले ३८ करोड रुपैयाँ लगानी गर्नेछ । बीपीसीको संचित कोषमा २ अर्ब ३६ करोड ९० लाख रुपैयाँ छ । यस्तै सहायक कम्पनीमार्फत बीपीसीले १०८ मेगावाट क्षमताको तल्लो मनाङमस्र्याङदी आयोजना निर्माण गर्ने भएको छ । यो आयोजनामा चीनियाँ लगानी हुने छ । सानो आयोजनामा मात्र बनाउन नहुने मान्यताका आधारमा जविद्युतमा ठुलो लगानी भित्राउने तयारी भएको उनको भनाई छ । नेपालमा १ हजार मेगावाट बिजुली उत्पादन गर्न चीनबाट २ खर्ब बढी (२ अर्ब डलर) वैदेशिक लगानी आउने भएको छ । यो वर्ष पनि लगानीकर्तालाई राम्रो प्रतिफल दिने सीइओ श्रेष्ठ बताउछन् । बीपीसीले ४ मेगावटको खुदी, ९ मेगावाटको आँधिखोला र १२ मेगावाटको झिम्रुक आयोजना सञ्चालन गरिरहेको छ । आउँदो ४ वर्षमा बीपीसीको जडित क्षमता ९५ मेगावाट पुग्नेछ ।
युनाईटेड मोदीले ५ करोड ७५ लाख रुपैयाँ नगद लभांश वितरण गर्ने
काठमाडौं । युनाईटेड मोदी हाइड्रोपावरले ५ करोड ७५ लाख रुपैयाँ नगद लभांश वितरण गर्ने भएको छ । यस हाइड्रोले चुक्ता पुँजीको ५ प्रतिशतले हुन आउने कर सहित सोे मात्राको लाभांश वितरण गर्ने प्रस्ताव गरेको छ । मंसिर ७ गते बिहान बसेको कम्पनीको सञ्चालक समितिको बैठकले ५ प्रतिशत नगद लभांश दिने प्रस्ताव राखेको हो । हाल कम्पनीको चुक्ता पुँजी एक अर्ब १५ करोड रुपैयाँ रहेको छ ।
बीमा संस्थानमा प्रशासक बन्न ५ जनाको आवेदन
काठमाडौं । राष्ट्रिय बीमा संस्थानको प्रशासक बन्न ५ जनाले दरखास्त दिएका छन् । प्रशासन हुन दरखास्त दिनेमा गणेशराज कार्की , दामोदर सापकोटा, राजेन्द्रजंग कार्की, डा. शिवहरी श्रेष्ठ र सुरेन्द्र थापा रहेका छन् । अर्थ मन्त्रालयले गठन गरेको छनौट शिफारिश समितिले व्यवसायिक कार्ययोजना र अन्तरवार्ताका लागि बोलाएको छ ।
मिर्मिरे माइक्रोफाइनान्सले ३०.८० प्रतिशत बोनस दिने
काठमाडौं । मिर्मिरे माइक्रोफाइनान्स डेभलपमेन्ट बैंकले ३०.८० प्रतिशत बोनस सेयर दिने भएको छ । साथै कम्पनीले लाभांश कर बापत कर प्रयोजनको लागि १.६२ प्रतिशत नगद लभांश दिने निर्णय गरेको छ । यस कम्पनीले गत वर्षको मुनाफाबाट सेयरधनीलाई सो मात्राको लाभांश दिने निर्णय गरेको हो । उक्त निर्णय मंसिर ६ गते बसेको कम्पनीको सञ्चालक समितिको बैठकले गरेको हो । बैठकको निर्णयलाई नेपाल राष्ट्र बैंकले स्वीकृति तथा कम्पनीको आगामी साधारणसभाले पारित गर्नुपर्ने छ ।
एडीबीको नेपाल देशिय निर्देशकमा मुक्त्तर खामुदुखानोभ
काठमाडौं । विकास साझेदार एसियाली विकास बैंक (एडीबी) को नेपाल देशिय निर्देशकमा मुक्त्तर खामुदुखानोभ नियुक्त भएका छन् । उनले नेपालको दीर्धकालिन विकास योजना पुरा गर्नका लागि रणनीति बनाउने छन् । देशिय निर्देशकमा नियुत्त भएपछि खामुदुखानोभले नेपालको विकास, गरिवी निवारण र विकासमा सरकारसंग नजिक रहेर काम गर्ने बताएका छन् । उनी उज्वेकिस्तानका नागरिक हुन् । यसअघि उनी एडीबीको ऊर्जा विभागमा प्रमुख ऊर्जा विश्लेषकका रुपमा काम गरिसकेका छन् । टास्केन स्टेट टेक्निकल युनिभर्सिटी उजवेकिस्तानबाट इलेक्ट्रिक इन्जिनियरिङमा विद्यावारधी गरेका छन् । खामुदुखानोभले केनिची योकहमालाई प्रतिस्थापन गर्दे नयाँ देशिय निर्देशक बनेका हुन् ।
मेलम्चीको सुरुङ खन्न एक किलोमिटर मात्रै बाँकी, जनवरीमा ब्रेक थ्रु, नयाँ बर्षमा पानी उपहार !
काठमाडौं । बहुप्रतिक्षित मेलम्ची खानेपानी आयोजनाको सुरुङ अब एक किलोमिटर भन्दा कम मात्रै खन्न बाँकी रहेको छ । मेलम्ची खानेपानी आयोजना विकास बोर्डका इञ्जिनियर रमाकान्त दुवाडीका अनुसार मेलम्चीको सुरुङ खन्न अब ९९८ मिटर मात्रै बाँकी रहेको छ । हाल दैनिक १६।१७ मिटरको औषतमा सुरुङ खन्ने काम भैरहेको छ । २७.५ किलोमिटर लामो सुरुङ ९६.३७ प्रतिशत खनिसकिएको हो । अम्बाथान–ग्याल्थुमको माथिल्लो खण्डमा ३५४ मिटर सुरुङ खन्न बाँकी रहेको छ । यसको ब्रेक थ्रु यहि डिसेम्बर महिनामा हुनेछ । ग्याल्थुम–सिन्धु खण्डमा ६४४ मिटर सुरुङ खन्न बाँकी रहेको छ जसको ब्रेक थ्रु जनवरी महिनामा हुनेछ । आयोजनाले चैतको अन्तिम साता राजधानीबासीका धारामा पानी उपलब्ध गराउने योजना बनाएको थियो । अब नयाँ बर्षमा राजधानी बासीका धारामा मेलम्चीको पानी आइपुग्नेछ । ‘चैतको अन्तिम साता पानी ल्याइसक्ने योजना थियो, सोच अनुसार काम अघि बढ्यो भने नयाँ बर्षमा राजधानीबासीलाई मेलम्चीको पानी उपहार दिइनेछ’, इञ्जिनियर दुवाडीले भने । सुरुङ ब्रेक थ्रु भएको तीन महिनामा सुरुङ फिनिसिङको काम सम्पन्न हुनेछ । हाल सुरुङ फिनिसिङका लागि १० वटा ट्रान्जिट मिक्सचर भारतबाट ल्याइँदैछ । ती मिक्सचरले सुरुङ भित्रै फिनिसिङका लागि मिक्सिङ गर्न सक्नेछन् । सुन्दरी जलमा ८ करोड ५० लाख लिटर क्षमताको पानी प्रसोधन केन्द्रको सफल परिक्षण सम्पन्न भैसकेको छ । उपत्यकामा पाइप तथा धारा जडानको काम पनि अन्तिम चरणमा पुगिसकेको छ ।
दिनमा तीन कप कफी पिउनु स्वास्थ्यका लागि लाभदायक
बिहान उठ्नसाथ कफी पिउने बानी धेरैमा हुन्छ । धेरै कफी पिउनाले दाँत, मुखमा मात्र होइन, समग्र पाचन यन्त्रमै नकारात्मक असर पुर्याउँछ । तर, अब कफी पिउनलाई डराउनुपर्दैन । कफी पारखीका लागि खुसीको खबर छ । दिनमा ३-४ कप कफी पिउनु स्वास्थ्यका लागि लाभदायक हुने एउटा अध्ययनले देखाएको छ । कफीको सेवन गर्ने मानिसमा कलेजो, क्यान्सर र हृदयघातजस्ता जोखिम कम देखिएको छ । यद्दपी त्यसको कारण कफी नै हो भन्ने यकिन गर्न नसकिने अनुसन्धानकर्ताहरु बताउँछन् । महिलालाई गर्भवती भएको समयमा भने कफी सेवन हानीकारक हुने निश्चित रहेको अध्ययनले पुष्टी गरेको छ । रोगव्याधबाट जोगिन वा स्वास्थ्यलाई आधार मानेर कफी पिउन नहुने विज्ञहरु बताउँछन् । साउथ्याम्पन युनिभर्सिटीका अनुसन्धानकर्ताले मानव शरीरमा कफी सेवनबाट पर्ने प्रभावसम्बन्धी तथ्यांक संकलन गरेका छन् । के यो कफीकै प्रभाव हो ? कफी नपिउनेको तुलनामा दिनमा ३ कप कफी पिउने मानिसको शरीरमा मुटुको समस्या कम देखिएको छ । मुटु रोग तथा क्यान्सरको जखिम कम हुनु यसको लाभ लिने बलियो पक्षको रुपमा रहेको छ । तर, अध्ययनका सह-लेखक प्रोफेसर पौल रोडरेकका अनुसार कफीले गर्दा नै यो सम्भव भएको भन्ने स्पष्ट तथ्यांक छैन । उनले भने, ‘उमेर, धुम्रपान सेवन, कसरत जस्ता कुराले पनि यस्तो प्रभाव पारेको हुनसक्छ । ‘ जिवनमा जोखिमको सन्तुलन र उचित मात्रामा कफी सेवनले जोखिम कम भएको देखिएको हुनसक्ने उनको भनाई छ । गर्भवती महिलालाई २०० एमजी अर्थात दुई कप भन्दा कम कफी खान सुझाव गरिएको छ । यसले गर्भपतनको जोखिम निम्तयाउन सक्छ ।
लक्ष्मी बैंकको साधारणसभा २८ गते हुने, १० प्रतिशत बोनस सेयर दिने
काठमाडौं । लक्ष्मी बैंकले मंसिर २८ गते १७ औं वार्षिक साधारणसभा बोलाएको छ । सभाले चुक्तापुँजीको १० प्रतिशत बोनस सेयर जारी गर्ने प्रस्ताव सभामा पेश हुने भएको छ । यस्तै पुँजी बढाउन बैंक तथा वित्तीय संस्थासंग मर्जरमा जाने र प्राप्ति गर्नका लागि अधिकार सञ्चालक समितिलाई दिने प्रस्ताव पनि सभामा पेश हुदैछ । सभाले सञ्चालको बैठक भक्ता पनि बढाउने प्रस्ताव लैजाने बैंकले जनाएको छ ।
