अदालतको अपहेलना गर्दै राष्ट्रिय सम्पदा धरहराको आडमा व्यवसायिक टहरा निर्माण तिव्र
काठमाडौं । राष्ट्रिय सम्पदा धरहरा भन्दा धरहराको अस्तित्व नै नामेट पार्ने व्यवसायिक टहरा निर्माण तिव्र भएको भन्दै स्थानीय आन्दोलितहरु आन्दोलित भएका छन् । राष्ट्रिय सम्पदा बचाउ अभियान स्थानीय संघर्ष समितिमार्फत स्थानीयहरु आन्दोलित बनेका हुन् । स्थानीयलाई बिना सूचना, बिना जानकारी गुठी संस्थानले दादागिरी शैलीमा निर्माण कार्य अगाडि बढाएको स्थानीयको आरोप छ । पैसाको चलखेलका कारण पटक–पटक अदालत र सरकारी निकायलाई समेत हवाला दिंदै बिदाको दिन पारेर निर्माण कार्य अगाडि बढेको भन्दै संघर्ष समितिले सरकारी निकायको ध्यानाकर्षणसमेत गराएको छ । स्थानीय संघर्ष समितिका अनुसार गुठी संस्थानले प्रधानमन्त्रीको कार्यालय, पुरातत्व विभाग, महानगरपालिका, महानगरपालिकाको वडा नम्बर ११ कार्यालय लगायत कसैको पनि स्विकृतिबेगर उक्त निर्माण कार्य अगाडि बढेको हो । यसअधिका यी सबै निकायको निर्माण नगर्नु भन्ने निर्णय र उच्च अदालत पाटनले समेत गरेको आदेशको समेत अपहेलना गर्दै गुठी संस्थान व्यवसायिक टहरा निर्माणमा लागेको उनीहरुले बताएका छन् । स्थानीयले सबैतिरको निर्णय लत्याउँदै बैकुण्ठ रेग्मीको नेतृत्वमा गुठी संस्थानका महानिर्देशक नारायण चौधरी र प्रहरी प्रशासनको उपस्थितिमा उक्त अवैध निर्माण अगाडि बढेको पनि आरोप लगाएका छन् । स्थानीय क्लबका साथै संघर्ष समितिका वेदप्रकाश गौतम, रामेश्वर शिवा, राजेश डंगोल लगायतले जबरजस्तरुपमा पुरातात्विक क्षेत्रभित्र बिना नक्सा कम्पाउण्ड वाल लगायत अन्य जुनसुकै व्यवसायिक भवन निर्माण भएपनि बल प्रयोग गरेर त्यसलाई भत्काइने चेतावनी दिएका छन् । यसअघि ‘मेरो धरहरा मै बनाउँछु’ भन्ने सरकारको अभियानलाई सफल पारौं भन्दै धरहराका स्थानियबासीहरुले प्रधानमन्त्री तथा मन्त्रिपरिषद्को कार्यालयमा दशौं हजारको हस्ताक्षरसहित ज्ञापनपत्रसमेत बुझाएर सरकारको ध्यानाकर्षण गराएपछि उक्त निर्माणकार्य रोकिएको थियो । राष्ट्रिय सम्पदा धरहरा वरीपरी अन्य कुनै व्यापारिक भवनहरु निर्णण हुन नहुने र उक्त स्थललाई पर्यटकीय स्थल बनाईनुपर्ने उनीहरुको माग रहेको छ । अहिले एकातिर धरहरा निर्माण कार्य अगाडि बढेको छ भने अर्कातिर सडककासमेते मापदण्ड मिचेर भीम मुक्तेश्वर गुठी संस्थाले भाडामा लिई व्यापारिक भवन निर्माण तिव्र पारेको उनीहरुले बताएका छन् । राष्ट्रिय सम्पदा बचाउने अभियानमा स्थानीय खिचापोखरी युवा क्लब, संकटा क्लबका साथै अन्य स्थानीयहरु लागिपरेका छन् । स्थानीयले गुठी संस्थानको जग्गालाई पार्किङमा प्रयोग गर्न सक्ने तर व्यापारिक भवन बन्न नदिने बताएका छन् ।
गण्डकी विकास बैंकको नयाँ शाखा कोहलपुरमा, ३ महिनामा १५ करोड नाफा
काठमाडौं । गण्डकी विकास बैंकले बाँकेको कोहलपुरमा आफ्नो शाखाको औपचारीक समुद्घाटन गरेको छ । प्रमुख अतिथि कोहलपुर नगरपालिकाका मेयर लुट बहादुर रावतले आफ्नो समुद्घाटन मन्तव्यमा गण्डकी विकास बैंकलाई कोहलपुरमा स्वागत गर्न पाउदा अत्यन्तै खुसी भएको बताए । बैंकका सञ्चालक कृष्ण बहादुर थापा क्षेत्रीको अध्यक्षतामा सम्पन्न सो कार्यक्रममा नेपाल राष्ट्र बैंक नेपालगञ्ज शाखाका उपनिर्देशक नारायण प्रसाद पोख्रेल, कोहलपुर नगरपालिका वडा नम्बर ११ का वडा अध्यक्ष कर्ण बहादुर थापा र उद्योग वाणिज्य संघ कोहलपुरका अध्यक्ष चक्र अधिकारीले शुभकामना मन्तव्य राखेका थिए । उक्त कार्यक्रममा बैंकले प्रदान गर्ने सेवा सुविधा एवं बैंकको गतिविधिका बारेमा बैंकका प्रमुख कार्यकारी अधिकृत रेशम बहादुर थापाले जानकारी दिए । बैंकले केन्द्रीय कार्यालयका साथै देशका विभिन्न ठाउँहरुमा गरी ७७ वटा शाखा कार्यालय मार्फत आकर्षक व्याजदरमा विभिन्न निक्षेप योजना, सहज र सरल रुपमा कर्जा योजनाको अत्याधुनिक बैकिङ सेवा प्रदान गर्दै आएका छन् । गत असोज मसान्तसम्ममा निक्षेप रु. २३ अर्ब ७२ करोड र कर्जा तर्फ रु.२१ अर्ब २४ करोड भएको यस बैंकले तीन महिनामा सञ्चालन नाफा १५ करोड आर्जन गरेको उनले जानकारी दिए ।
नेपाल एम्बुलेन्स सेवाले पायो दक्षिण एशियाको ब्रिटिश मेडिकल जर्नल अवार्ड
काठमाडौं । नेपाल एम्बुलेंस सर्भिस (नास)ले ब्रिटिश मेडिकल जर्नल अवार्ड पाएको छ । नासलाई यस वर्षको क्वालिटी इम्प्रुभमेन्ट एण्ड पेशेंट सेफ्टी टिमको श्रेणीमा उक्त अवार्डद्धारा पुरस्कृत गरिएको हो । ब्रिटिश मेडिकल जर्नल दक्षिण एशिया अवार्ड हरेक वर्ष आयोजित हुँदै आएको छ । यो बीएमजे अवार्ड्स दक्षिण एशियाको पाँचौं संस्करण थियो र उक्त अवार्ड समारोह डिसेम्बर १ , २०१८ मा चेन्नईमा आयोजित भएको थियो । दक्षिण एशिया भरमा १५०० भन्दा बढी नोमिनेशनहरु- एक्सिलेन्स इन मेडिकल एडुकेसन् , हेल्थकेयर इनोवेशन, क्वालिटी इम्प्रुभमेन्ट र पेशेंट सेफ्टी टिम जस्ता विधामा प्राप्त भएको थियो । फाइनलिस्टहरु भारत, म्यानमार, श्रीलंका, बांग्लादेश, पाकिस्तान र नेपालका प्रतिनिधिका साथ विभिन्न क्षेत्रबाट रहेका थिए । नासका अध्यक्ष रन्जित आचार्यले भने , “यस पुरस्कारको श्रेय हाम्रो सम्पूर्ण टिमलाई जान्छ जसको कारण हामी नेपालबाट यो पुरस्कार जित्न सफल भएका छौँ । २४ घण्टा आपातकालीन सहयोगको लागी, सर्बसाधारणले टोल फ्री नम्बर १०२ मा सम्पर्क गर्न सक्नुहुनेछ । यसको आकस्मिक टेलिफोन नम्बर १०२ ले सिधै नासमा सूचना दिन्छ र नजिकमा रहेका एजेन्टहरुले उक्त फोन कलको प्रतिकृया दिँदै तत्काल नजिकको उपलब्ध एम्बुलेन्सलाई परिचालन गर्दछ ।” नासले प्रत्येक एम्बुलेन्समा ईएमटी (आपातकालीन मेडिकल टेक्नीशियन) दक्ष आकस्मिक प्राविधिकको सहायताले अन्तराष्ट्रिय स्तरको स्वास्थ्य सेवा प्रदान गर्दै आएको छ ।
धितोपत्र बोर्डले भन्यो-‘सेयरमा लगानी गर्न उत्तम समय हो अहिले’, २० वटा आधार समेत प्रस्तुत
काठमाडौं । आइतबार नेप्से परिसूचक ११ अंकले बढेपछि नेपाल धितोपत्र बोर्डले लगानीकर्तालाई ढुक्क भएर लगानी गर्न आग्रह गरेको छ । बोर्डले विभिन्न २० आधार समेत पेस गर्दै यतिबेला सेयर किन्न उत्तम समय भएको जनाएको छ । देशमा राजनीतिक स्थायित्व कायम भईसकेको, सरकारले वित्तीय प्रणालीमा विभिन्न सुधारका कार्यक्रमहरु अगाडि बढाई पूँजीबजार मार्फत देशको आर्थिक समृद्धिमा जोड दिएको, सूचीकृत संगठित संस्थाहरुले साधारण सभा गर्ने क्रममा रहेका, साधारण सभा गर्ने संस्थाहरुले लाभांसको समेत घोषणा गरिरहेका, धेरै जसो सूचीकृत संगठित संस्थाहरुले प्रकाशन गरेको यस आ.ब. को प्रथम त्रैमासिक अवधिको वित्तीय विवरणमा नाफाको अवस्था देखिएकोले अहिले लगानी गर्दा जोखिम नहुने बोर्डको तर्क छ । त्यस्तै, सरकार र बोर्डले हाल बजार विकास तथा सुधारका लागि विभिन्न कार्यक्रमहरु अगाडि बढाईएको, पूँजीबजारमा विगत केही वर्षहरुदेखि अन्यौलको रुपमा रहेको भ्याटको समस्यालाई समाधान गरी स्थायित्व दिएको, बजारको दीर्घकालिन विकासको लागि सरकारले प्रोत्साहन मूलक नीति तथा कार्यक्रमहरु अगाडि बढाएको बोर्डले स्मरण गराएको छ । धितोपत्रको प्राथमिक बजार ७७ जिल्लामा विस्तार भैसकेको, दोस्रो बजारको कारोवार पूर्ण स्वचालित अनलाईन प्रणालीमा जाने क्रममा रहेको र दोस्रो बजारको दायरा अझै फराकिलो बनाउन बोर्डको आ.ब. २०७५/७६ को नीति तथा कार्यक्रम अनुसार संघीय संरचना अनुसार विभिन्न प्रदेशहरुमा आर्थिक रुपमा सक्रिय जिल्ला/स्थानहरुमा (काठमाण्डौ उपत्यकावाहेक) स्थानीय स्तरमा धितोपत्र दलाल व्यवसायीको अनुमति पत्र प्रदान गर्न आवश्यक कार्य अगाडि बढाउन बोर्डले नेपाल स्टक एक्सचेञ्जलाई निर्देशन दिइसकेको, धितोपत्र बजारमा धितोपत्र व्यापारी (डिलर)लाई प्रवेश गराउन भैरहेको तयारीकोे सम्बन्धमा समेत नेप्सेसँग जानकारी माग गरेको लगायत सुधारका धेरै काम भएको अवगत गराएको छ । बैंकहरुले निक्षेपमा १३ प्रतिशत व्याज दिन थालेको, बैंकहरुले १०.५ प्रतिशत व्याजदरमा जारी गरेको ऋणपत्र समेत विक्री नभएको, सेयर कर्जा प्रति राष्ट्र बैंकको नीति अनुदार रहेको विषयमा भने धितोपत्रबोर्डको मौन रहेको छ । बोर्डले बैकल्पिक लगानी कोष नियमावली मार्फत प्राइभेट इक्यूटी, भेन्चर फण्ड र हेज फण्ड प्रबेश गराई कम्पनीहरुलाई चाहिने दीर्घकालीन कोषको व्यवस्था गर्ने कार्य अगाडि बढी सकेकोे छ भने मार्जिन ट्रेडिङ्ग शुरु गर्ने कार्य समेत अन्तिम चरणमा पुगेको समेत जनाएको छ । त्यसैगरी नेपाल सरकार र नेपाल धितोपत्र बोर्डले धितोपत्रको प्राथमिक र दोस्रो बजार विकास तथा सुधारका विभिन्न कार्यहरु अगाडि बढाईरहेको, देशको समष्टिगत आर्थिक अवस्था तथा पछिल्लो समयमा सूचीकृत कम्पनीहरुको वित्तीय कार्यसम्पादन समेत सन्तोषजनक रहेको, सरकारले पूँजीबजार र मुद्रा बजारमा वित्तीय स्थायित्व कायम गरी औद्योगिक एवं पूँजीबजारमा लगानीका समस्याहरु पहिल्याएर सात दिन भित्र सुझाव पेश गर्न अध्ययन समिति गठन गरेको सबैलाई अवगत गराएको छ । लगानीकर्ताहरुको समेत प्रतिनिधित्व रहेको उच्च स्तरीय उक्त समितिले दिने सुझावहरुको कार्यान्वयनबाट बजार विकास एवं स्थायित्व अभिबृद्धि हुनेमा बोर्ड विश्वस्त रहेको आइतबार जारी विज्ञप्तिमा उल्लेख गरिएको छ । विगतमा धितोपत्र बोर्डले सेयरको मूल्य बढ्दा मात्र विज्ञप्ती जारी गरी लगानीकर्तालाई होसियार हुन सचेत गर्दै आएको थियो । पछिल्लो समय सेयर बजारमा मन्दी देखिएपछि बोर्डले लगानीकर्ताको मनोबल बढाउने विज्ञप्ती जारी गरेको छ । बैंकहरुले निक्षेपमा १३ प्रतिशत व्याज दिन थालेको, बैंकहरुले १०.५ प्रतिशत व्याजदरमा जारी गरेको ऋणपत्र समेत विक्री नभएको, सेयर कर्जा प्रति राष्ट्र बैंकको नीति अनुदार रहेको विषयमा भने धितोपत्रबोर्डको मौन रहेको छ ।
ग्लोबल आइएमई बैंकको थप ६ शाखा रहित बैंकिङ्ग सेवा सञ्चालनमा
काठमाडौं । ग्लोबल आइएमई बैंकले गत साता थप ६ वटा शाखारहित बैंकिङ्ग सेवा सञ्चालनमा ल्याएको छ । सो अवधिमा बैंकले डडेल्धुराको चमडा र देवलमा, बैतडीको बसाली र काफलकोट बडीयामा, डोटीको चौखुट्टे र शान्तिनगरमा बैंकिङ्ग सेवा सञ्चालनमा ल्याएको हो । यीसँगै बैंकको शाखारहित बैंकिङ्ग सेवा संख्या ११० पुगेको छ । यी सबै शाखारहित बैंकिङ्ग सेवाहरुको उद्घाटन स्थानीय जनप्रतिनिधि, बुद्घिजीवि तथा स्थानीयवासीहरुको रोहवरमा भएको छ । शाखारहित बैंकिङ्ग सेवाबाट देशका विभिन्नग्रामीण क्षेत्रका स्थानियबासिन्दाले स्थानिय प्रतिनिधि मार्फत बैंकिङ्ग सेवा लिन सक्नेछन । यसबाट निक्षेप खाता खोल्ने, तोकिएको सीमा सम्मको रकम जम्मा गर्ने तथा झिक्ने, आफ्नो खातामा रहेको मौज्दातको जानकारी लिने, कर्जाको व्याज भुक्तानी गर्ने, डीशहोम सीडीएमए यूटिएलको महसुल भुक्तानी गर्ने, मोबाइल रिर्चाज गर्ने लगायतका सेवा लिन सक्नेछन् । कृषि, रेमिट्यान्स तथा पर्यटन मुख्य आयस्रोत रहेको ती स्थानहरुमा बैंकले शाखारहित बैंकिङ्ग सेवा शुरु गरेको हो । हाल बैंकले १३२ शाखा, १४१ एटीएम, ६ एक्सटेन्सन काउण्टर, १५ वटा राजश्व संकलन काउण्टर र ११०शाखा रहित बैंकिङ्ग सेवा, विदेशमा ३ प्रतिनिधि÷सम्र्पक कार्यालय माफर्त सेवा दिँदै आइरहेको छ ।
हुण्डाईले ल्यायो ‘हुण्डाई क्येर’ योजना, गाडी किन्नेलाई १० लाखसम्मको स्वास्थ्य बीमा
काठमाडौं । नेपालको लागि हुण्डाई मोटर्सको एक मात्र आधिकारिक बिक्रेता लक्ष्मी इन्टरकन्टिनेन्टल प्रा.लि ले हुण्डाई परिवार अन्तर्गत ‘हुण्डाई क्येर’ योजना ल्याएको छ । जस अन्तर्गत हरेक नयाँ हुण्डाई गाडीको खरिदमा १ वर्षको स्वास्थ्य बीमा प्रदान गरिनेछ । यस योजना अन्तर्गत हुण्डाई परिवारको नयाँ ग्राहकले प्रत्येक हुण्डाई गाडीको खरिदमा आफ्नाे नजिकको परिवारको लागि १० लाख रुपैयाँसम्मको बीमा योजना(फेमिली फ्लोटर योजना)प्रदान गरिनेछ । हुण्डाई मोटर्सले निरन्तर रुपमा ग्राहकसगँ नजिक र आत्मियताको सम्बन्ध बनाउँदै आइरहेका छ । यो नयाँ योजनाले नयाँ ग्राहकहरुको लागि हुण्डाई परिवारको साथ जोडिन मद्दत गर्ने कम्पनीको विश्वास छ ।
मंसिर २८ देखि नेपाल मेडिकल एक्स्पो हुँदै, स्वास्थ्य क्षेत्रमा योगदान पुग्ने
काठमाडौं । आगामी मंसिर २८ गतेदेखि भृकुटिमण्डपमा तेस्रो नेपाल मेडिकल तथा ल्याब एक्स्पो २०१८ आयोजना हुँदैछ । नेपालको स्वास्थ्य क्षेत्रमा योगदान दिने उद्देश्यले नेपाल मेडिकल एण्ड ल्याब एक्सपो आयोजना हुन लागेको हो । आयोजक एस.डि.प्रोमो मिडिया र केमिकल एण्ड मेडिकल सप्लायर्स एसोसिएशन अफ नेपालका अनुसार उक्त एक्स्पो पुस १ गतेसम्म हुने छ । यो एक्स्पो नेपालको स्वास्थ्य तथा ल्याब क्षेत्रको सबैभन्दा ठूलो व्यापार र ज्ञान आदान प्रदान गर्ने प्ल्याटफर्म हो । नेपाल मेडिकल एसोसिएशन, एसोसिएशन अफ इन्डियन मेडिकल डिभाईस इन्डष्ट्री, ईईपिसी, द साइन्टिफिक इक्युपमेन्ट एण्ड फर्निचर एसोसिएशन, नेपाल एसोसिएशन अफ क्लिनीकल केमेस्ट्री तथा जर्मनीको हाईटेक इन्डष्ट्री एसोसिएशन स्पेक्ट्यारिसको सहयोगमा यो एक्सपो हुन लागेको हो । यस अन्तर्राष्ट्रिय एक्स्पोमा मेडिकल एण्ड सर्जिकल इक्युपमेन्ट, डायगनोस्टिक्स, मेडिकल डिस्पोजेबल्स, फर्निचर एण्ड इन्फास्ट्रक्चर, आइ.टी. सर्भिसप्रोभाइडर, मेडिकल वेस्ट म्यानेजमेन्ट, फ्यासिलिटी म्यानेजमेन्ट, कमप्लीट हस्पिटल प्रोडक्ट्स एण्ड सपोर्ट सर्भिसेस, ल्याब,एनालाईटिकल, साइन्टिफिक एण्ड बायोटेक्निकल इन्सट्रुमेन्ट्स एण्ड कन्ज्युमेबल्सको प्रदर्शनी हुनेछ । यसको उद्घाटन नेपालका स्वास्थ्य मन्त्री उपेन्द्र यादवले गर्नेछन् । यो प्रदर्शनीमा २०० भन्दा बढि कम्पनीहरु र ५०० भन्दा बढि ब्राण्डहरुको उपस्थिती हुने आयोजकले बताएका छन् । यसमा १० मुलुकका अफिसरहरु, डाक्टरहरु, नीति निमार्णकर्ता, उद्योगपति तथा वैज्ञानिकहरु भेला हुनेछन् । नेपालको स्वास्थ्य क्षेत्र तथा ल्याब प्रवधिलाई द्रुतगति दिन यस एक्स्पोले सहयोग पुर्याउने छ । यसका साथसाथै नेपालका कम्पनीहरुलाई नयाँ प्रविधि भित्र्याउन र नेपालमै यस्ता उत्पादन गर्न सक्ने मौका यो एक्स्पोले दिनेछ । आगन्तुकहरुले स्वास्थ्य क्षेत्रका नयाँ प्रविधि हेर्न पाउनेछन्, जो विभिन्न अस्पताल, प्याथोलोजी ल्याब, अनुसन्धान केन्द्र, फार्मास्यूटीकल्स, खाद्य उद्योग, विश्वविद्यालय, ल्याबहरु तथा आपुर्तीसंग सम्बन्धित पनि रहनेछन् । एक्सपोका साथसाथै दुईवटा सम्मेलन पनि आयोजना गर्ने एस.डि. प्रोमोले जानकारी दिएको छ । पहिलो सम्मेलन १४ डिसेम्बरमा हुनेछ, जसमा यस उद्योगसँग सम्बन्धित विज्ञहरुले स्वास्थ्य क्षेत्र तथा ल्याब प्रविधिमा भएका विकासका बारेमा छलफल गर्नेछन् । यस सम्मेलनमा सम्बन्धित सरकारी, मेडिकल शिक्षा, संघ संस्थाहरु तथा आयोजकहरुसंग आबद्घ व्यक्तिहरुले स्वास्थ्य क्षेत्रमा दिगो विकासका उपायहरुमाथि छलफल गर्नेछन् । यसैगरी डिसेम्बर १५ मा “अस्पताल व्यवस्थापन”शाीर्षकमा अर्को सम्मेलन गरिनेछ जसमा अस्पताल व्यवस्थापन सम्बन्धि विभिन्न विषयमा प्रयोगात्मक उपायहरुको छलफल तथा उदाहरण दिइनेछ । यो दोस्रो सम्मेलनमा ४०० भन्दा बढि डाक्टरहरुको उपस्थिती रहनेछ । यस इभेन्टले नेपालको स्वास्थ्य तथा ल्याब प्रविधिमा टेवा पुर्याउनेछ । साथै, नेपालका स्वास्थ्य क्षेत्रका कम्पनीहरुलाई विकासशील दिशातर्फ उन्मुख गर्ने र नयाँ सोच तथा अनुसन्धानका फाइदाहरुतर्फ अग्रसर गर्नेछ ।
इन्जिनियर्सहरुको ३२ औं निर्वाचन: सातै प्रदेश कब्जा गर्ने पीनको दाबी
काठमाडौं । नेपाल इन्जिनियर्स एसोसिएशनको ३२ औं निर्वाचन नजिकिदैं जादा प्रोगेसिभ इन्जिनियरिङ एशोसियशन नेपाल पीनले तयारी पुरा गरेको बताएको छ । पीनले ३२ बुँदे घोषणापत्र जारी गर्दै सातै प्रदेशमा जित हासिल गर्ने दाबी गरेको हो । घोषणापत्रमा पीनले १५० मेघावटको जलविद्युत आयोजना बनाउनेदेखि लिएर ४७ हजार इन्जिनियरहरुलाई सदस्य बनाउने उल्लेख गरिएको छ । घोषणापत्र जारी गर्दै पीनका अध्यक्ष सम्भु बहादुर श्रेष्ठले सबै इन्जिनियरहरुको हकहितका लागि काम गर्ने बताए । उनले देशभरी नै चुनावी माहोल आफ्नै पक्षमा रहेको बताउँदै सातै प्रदेशमा जित हासिल गर्ने दाबी गरे । एसोसिएशनको ३२ औं कार्यकारिणी समिती निर्वाचन मंसिर २८ गते सातै प्रदेशमा हुँदैछ ।
