सरकारसँग ट्याक्सी चालकको मागः भाडा दर कम भो, सुरक्षा चाहियो
काठमाडौँ । उपत्यकामा चल्ने ट्याक्सी चालक तथा व्यवसायीले बदलिँदो परिस्थितिअनुसार वैज्ञानिक भाडादर कायम गर्न तथा ट्याक्सी चालकको सुरक्षाको प्रबन्ध गर्न माग गरेका छन् । बारम्बार ट्याक्सी चालकमाथि साङ्घातिक आक्रमण हुन थालेपछि उनीहरूले सरकार समक्ष चालकको सुरक्षाको सुनिश्चितता गर्न र २०६९ सालमा तोकिएको भाडादर परिमार्जन गरेर वैज्ञानिकरुपमा भाडादर कायम गर्न सरकारसँग माग गरेका हुन् । वैज्ञानिक भाडादर कायम नहुँदा बाध्यतावश यात्रु ठगिने गरेको बताउँदै यात्रु ठगिनबाट जोगिन पनि भाडादर समायोजन हुनुपर्ने उनीहरुको माग छ । “२०६९ सालदेखि भाडा समायोजन भएको छैन । छिमेकी मुलुकहरूमा मिटरको शुरुआत कल तीन किलोमिटर बराबर हुन्छ । त्यो हिसाबले हाम्रो यहाँको मिटरमा शुरुमा कल एकदमै कम छ’’, व्यवसायी एवं चालक पूर्ण तामाङले बताए । शुरुमा कल एकदमै कम भएकाले यहाँका छोटो दूरीमा ट्याक्सीले मिटरमा यात्रु लैजान समस्या भइरहेको उनको भनाइ छ । “मूल्यवृद्धिको आधारमा किमीको भाडा पनि कम छ, पर्याप्त ट्याक्सी पार्किङ तथा ट्राफिक प्रहरीले गर्ने व्यवहार समेत राम्रो छैन”, उनले भने । सुरक्षाका सवालमा ट्याक्सी चालक असुरक्षित रहेको बताउँदै तामाङले २०७४ सालमा भक्तपुर मनोहरा किनारामा चालक यज्ञ खड्काको गाडीभित्र हत्या र गत कात्तिक २४ गते चालक भरत मल्ललाई सोही स्थानमा लगेर आक्रमण गरी गम्भीर घाइते बनाइएको जानकारी दिए । यही पुस १ गते चालक डम्बर खड्कालाई ट्याक्सी चलाइरहेका बेला ललितपुरको पुल्चोकबाट बालकुमारी खोला किनारामा लगेर कुटपिट गरी गम्भीर घाइते बनाइएको घटनाका दोषी पत्ता नलाग्नु गम्भीर विषय भएको तामाङले बताए । व्यवसायी तथा चालक समाजसेवाका अभियानकर्ता सानु पूर्वाछाने मगर, आफूलगायत व्यक्तिले करीब रु ५७ हजार चन्दा उठाएर घाइतेको उपचार गरेको बताउँदै तामाङले कुटपिटबाट ट्याक्सी चालकले आँखा गुमाउनु परेको जानकारी दिए । “अर्का घाइते बा १ ज ६१ ५६ नंं का चालक डम्बर खड्कालाई रु २५ हजार सहयोग गरियो । प्राइभेट गाडीले ट्याक्सीको काम गर्दा पनि समस्या भएको छ । यसबारेमा पटक÷पटक उजुरी गरे पनि सम्बन्धित निकायले समस्या समाधानका लागि पहल गरेको छैन”, चालकहरूको भनाइ छ । हरेक चिजको मूल्यवृद्धि भएको अवस्थामा ट्याक्सी भाडा पनि समायोजन हुनुपर्ने बताउँदै तामाङले भने, “२०६९ सालमा ट्याक्सीको रुट परमिट लिँदा २५० तिर्नुपथ्र्यो, अहिले पाँच सय तिर्नुपर्छ, तेस्रो पक्ष बीमा ५०० बाट अहिले रु सात हजार ८०० छ, यस्तो अवस्थामा ट्याक्सीको भाडा बढाउनु आयश्यक छ ।” अधिकांश ट्याक्सी चालकले उपभोग्य वस्तुको मूल्यवृद्धि भएकाले सरकारले वैज्ञानिक र उपयुक्त संयन्त्रबाट मूल्य समायोजन गर्नुपर्ने तथा चालकमाथि आक्रमण गर्नेलाई कारवाही गर्नुपर्ने, रात्रिकालीन समयमा ट्याक्सी चलाउने चालकको सुरक्षा गरिनुपर्ने, उचित रुपमा सङ्ख्यागत आधारमा ट्याक्सीको पार्किङ गर्ने व्यवस्थापन हुनुपर्नेलगायत माग राख्दै आएका छन् । रासस
आशा लघुवित्तले एकैदिन खोल्यो चार नयाँ शाखा, २८ जिल्लामा सेवा विस्तार
काठमाडौं । आशा लघुवित्त वित्तीय संस्थाले एकैदिन थप चारवटा शाखा कार्यालयहरु स्थापना गरी कारोबार शुरु गरेको छ । संस्थाले बिहीबार मात्रै महोत्तरीको एकडारा गाउँपालिका, धनुषाको मुखियापट्टी मुसहर मनिया गाउँपालिका, सिराहाको सखुवानान्कार कट्टीगाउँपालिका तथा सप्तरीको रुपनी गाउँपालिकाबाट कारोबार शुरु गरेको हो । यी सहित संस्थाको शाखा संख्या ४५ पुगेको छ । त्यस्तै, संस्थाले २८ वटा जिल्लाहरुमा विस्तार भएको छ । एकडारा गाउँपालिकाका प्रमुख राम छविलाल साह, मुखियापट्टी मुसहर मनिया गाउँपालिकाका उपाध्यक्ष मीरादेवी महतो, रुपनी गाउँपालिकाका उपाध्यक्ष सरिता यादव तथा सखुवानान्कारकट्टी गाउँपालिकाका अध्यक्ष केदारनाथ यादवले शाखा कार्यालयहरुको उद्घाटन गरेका हुन् । संस्थाले विपन्न वर्गलाई आर्थिक क्रियाकलापहरुमा संलग्न गराई उनीहरुको जीवनस्तर उकास्ने उद्देश्यका सहित विभिन्न स्थानमा नया नया शाखा विस्तार गरिरहेको छ । साथै, संस्थाले आगामी दिनहरुमा अझ सहज र प्रभावकारी रुपमा वित्तीय सेवा प्रवाह गर्ने प्रमुख कार्यकारी अधिकृत बद्रीप्रसाद दुलालले जानकारी दिए । संस्थाले हालसम्म १ अर्ब ४५ करोड रुपैयाँभन्दा बढी कर्जा लगानी गरेको छ । साथै, सदस्यहरुबाट ३३ करोड रुपैयाँ निक्षेप संकलन गरेको छ ।
सरकारलाई सेयर लगानीकर्ताको प्रश्नः फूलले हानौं कि बञ्चरोले ?
काठमाडौं । सेयर लगानीकर्ताहरुले सरकारलाई फूलले हानौं कि बञ्चरोले भनि प्रश्न गरेका छन् । आफ्ना जायज मार्गहरु शान्तिपूर्ण तरिकाले सम्बोधन गरिदिन आग्रह गर्दा नटेरेको भन्दै लगानीकर्ताहरुले फुलले हान्दा नटेरे आफुहरुसँग बञ्चरो समेत रहेको बताएका हुन् । राजधानीमा शुक्रबार भेला भएका अधिकांश लगानीकर्ताहरुले समूहको तर्फबाट यसअघिका आन्दोनहरुमा सहभागी हुनेहरुप्रति आभार व्यक्त गर्दै आफूहरुलाई वेवास्ता गरिएकोमा सरकार र नियामक निकायहरुप्रति रोष प्रकट गरेका थिए । बैठकमा सहभागी एक सदस्यले आफूहरुले सरकारलाई ध्यानाकर्षण गर्न फूलले हानेको भन्दै आफूहरुसँग बञ्चरो पनि भएको र परिआए त्यो पनि चलाउनसक्ने चेतावनी दिए । अर्का सदस्यले माओवादी सशस्त्र युद्धपनि दवाव समूहबाट नै जन्म भएको भन्दै आफूहरुलाई कमजोर नआक्न चेतावनी दिए । बैठकमा वक्ताहरुले बजारमा हालसम्म क्रियाशील लगानीकर्ता नेताहरुले सरकारको दलाली गरेको आरोप समेत लगाए । उनीहरुले शेयर बजारको विश्लेषकको नाममा विष्णुप्रसाद बस्यालले २ करोड रुपैंया लिएर बजार परिसूचकलाई ९०० अंकमा ल्याउने जिम्मा लिएको आरोप समेत लगाए । नयाँ संघप्रतिको आलोचनात्मक टिप्पणी शेयर बजार दवाव समूहको नामबाट करिब १ महिना अघिदेखि बजारमा आन्दोलन गर्दै आएका लगानीकर्ताको समूहले शुक्रबार भृकुटीमण्डपमा भेला गरे। यसअघि गरिएको आन्दोलनको समीक्षा गर्ने र थप दवावका कार्यक्रम तय गर्ने भनेर डाकिएको भेला भए पनि भेलाले न त यसअघिको आन्दोलनको समीक्षा नै राम्राेसँग तय गर्न सक्याे, न त भावी रणनीति नै । भेलाकाे पहिलाे चरण भनेर छुट्याइएकाे समयमा उपस्थितमध्ये केहीले अाफ्ना अनुभव साट्नु र सरकारकाे अालाेचना गर्नुबाहेक केही गरेनन् । बरु भेलाले १५ सदस्यीय कार्यसमितिको चयन गरी नयाँ संस्था दर्ता प्रक्रिया सुरु गरेको छ । करिब १०० जना लगानीकर्ताको उपस्थिति रहेको उक्त भेलामा उठेर बोल्ने अधिकांश व्यक्तिहरु कार्यसमितिमा अटाए । विशेषगरी उपाध्यक्ष र सदस्यहरु चयन गर्ने क्रममा केही विवाद देखिए पनि अन्तमा सबै सदस्यहरु सर्वसम्मत रुपमा चयन भए । नयाँ कार्यसमिति चयनअघि बोल्ने अधिकांश वक्ताहरुले दवाव समूहको रुपमा गरिएको यसअघिको रिले अनसन, आमरण अनसन लगायतका आन्दोलनहरुले नै सरकारले बजारकाे एजेन्डा स्थापित गराउन सफल भएकाे भनेर दाबी गर्नसक्ने ठाउँ थियाे, त्यसमा समूहका नेताहरु फेरि पनि चुकेका छन् । भेलाले यसअघिका अान्दाेलनहरुले लगानीकर्तालाई व्युँझाउन सफल भएको भन्दै आन्दोलनमा सहभागी हुने सबैलाई धन्यवाद दिए पनि निर्वाचित कार्यसमितिले त्यसबारे आधिकारिक धारणा भने बनाउन सकेन । बैठकमा यसअघि समूहले उठाएका १४ बुँदै मागहरुमा जुन रुपमा छलफल हुनुपर्थ्याे त्याे गर्नबाट समेत समूह चुकेकाे छ ।
सरकार शहर केन्द्रित, गाउँ विकासको आयोजना अन्योलमा
काठमाडौँ । प्रतिनिधिसभाको बैठकमा सांसदहरुले स्थानीय तहमा केन्द्रीय सरकारको उपस्थिति नभएको भन्दै विकास निर्माणको काम प्रभावित भएको बताएका छन् । विगतमा केन्द्रीय सरकारको बजेटबाट अगाडि बढाइएका विकास निर्माण, खानेपानी तथा स्वास्थ्य तथा शिक्षाका योजना अलपत्र परेको भन्दै ती परियोजना स्थानीय तह र प्रदेश सरकारले समेत ध्यान नदिएकोमा जानकारी दिएका छन् । सांसद गोपालबहादुर बमले विगतका योजना अलपत्र परेका कारण स्थानीय जनता समस्यामा तत्काल विशेष ध्यान दिन सरकार र सदनको ध्यानाकर्षण गराएका छन् । प्रतिनिधिसभाको बैठकको शून्य समयमा सांसद डा अमरेशकुमार सिंहले चिनी मिलले उखु क्रसिङ शुरु नगर्दा किसान मर्कामा परेको भन्दै तत्काल उखुको समर्थन मूल्य तोक्न र उखु क्रसिङ शुरु गराउन सरकारले पहल गर्नुपर्ने बताएका छन् । सांसद खगराज अधिकारीले मादी करिडोरको बजेट हराएको भन्दै खोजी गरिदिन सरकार र सदनको ध्यानकर्षण गराएका छन् । सो करिडोरको बजेट केन्द्र सरकारसँग पनि छैन, प्रदेशले पनि पाएको छैन । यस्तै केही सांसदले विकास निर्माणको कामको जिम्मा लिएका निर्माण व्यवसायीले अलपत्र पारेको भन्दै त्यस्ता व्यवसायीलाई कारवाही गर्न माग गरेका छन् । रासस
उद्योग मन्त्री यादवले भने-ढुक्क हुनोेस्, लगानीमैत्री वातावरण बन्छ, कानून परिवर्तन हुन्छ
काठमाण्डौ । उद्योग, वाणिज्य तथा आपूर्ति मन्त्री मातृका यादवले आफू मन्त्री भएदेखि नै उद्योगीहरु रुन थालेको बताएका छन् । मन्त्री यादवले भने–जसले बढी आन्दोलन गरेको छ उही मन्त्रीलाई धम्की दिने ? शुक्रबारदेखि भृकुटी मण्डपमा शुरु भएको जुत्ता, चप्पल तथा छालाजन्य वस्तुहरुको राष्ट्रिय औद्योगिक प्रदर्शनी उद्घाटन गर्दै मन्त्री यादवले यस्तो बताएका हुन् । सो अवसरमा मन्त्री यादवले पहिले सबै सामान विदेशबाट आउँथ्यो, अहिले देशमा नै उत्पादन हुन थालेको छ । यो सुखद पक्ष भएको उनको भनाई थियो । अझैपनि ४ सयवटा पुन ऐन कानून छ, यी पुराना ऐन कानूनले लगानीमैत्री वातावरण बन्न सकेको छैन । मन्त्री यादवले भने–कानून परिवर्तन हुन्छ, अहिलेको कम्युनिष्ट सरकारले देशमा लगानीमैत्री बाताबरण तयार पार्छ । मन्त्री यादवले जुत्ता उत्पादनमा सहयोग गर्ने बताए । उनले भने–कुनैपनि पेशालाई जात विशेषसँग मात्र जोडेर हेर्नु हुँदैछ, यसलाई व्यवसायिक बनाउनु पर्छ । अब घरघरमा उद्योग सञ्चालन गर्न आह्वान गर्दै मन्त्री यादवले भने–केही समस्या भयो भने माग लिएर आउनोस्, सरकार सहयोग गर्न तयार छ । एशोशियशनका अध्यक्ष कृष्णकुमार फुँयालले नेपालमा जुत्ता उत्पादन गर्ने दक्ष जनशक्तिको अभाव रहेको बताए । खुला सीमाका कारण जुत्ता व्यवसायी मारमा परेको उनको भनाई थियो । वर्षेनि १ अर्ब २८ करोडको जुत्ता र छालाजन्य सामाग्री नेपाल आयात भएको थियो । जुत्ता र छालाजन्य उद्योगमा कच्चा पद्धार्थ र लगानी दुबैको अभाव रहेको अध्यक्ष फुँयालले बताए । व्यापार तथा निकासी प्रबद्र्धन केन्द्रका निर्देशक शरदबिक्रम रानाले नेपालका उत्पादनले विदेशमा प्रतिष्पर्धा गर्न सक्षम रहेको बताउँदै व्यवसायीहरु मिलेर आए सहयोग गर्न तयार रहेको बताए । त्यसैगरी, नेपाल उद्योग बाणिज्य महासंघका उपाध्यक्ष उमेशलाल श्रेष्ठले जबसम्म लगानी ऐन फेरिंदैन तबसम्म विदेशी लगानी आउने बताबरण सिर्जना नहुने बताए । साथै उनले नेपालीको माग अनुसार राम्रा जुत्ता बनाउन आग्रह गरे । कार्यक्रममा नेपाल हस्तकला व्यवसायी महासंघका अध्यक्ष धर्मराज शाक्यले नेपालमा उत्पादित वस्तुको संरक्षण गर्नु पर्ने बताए । फुटवेयर म्यानुफ्याक्चर्स एशोशियनशन अफ नेपालको आयोजनामा शुक्रबारदेखि भृकुटी मण्डपमा जुत्ता, चप्पल तथा छालाजन्य वस्तुहरुको राष्ट्रिय औद्योगिक प्रदर्शनी शुरु भएको हो । राष्ट्र समृद्धिको आधार स्वदेशी उत्पादनको प्रयोग भन्ने मूल नाराका साथ १५ औं राष्ट्रिय औद्योगिक प्रदर्शनी आयोजना गरिएको हो । यही पुस १३ गतेदेखि १९ गतेसम्म प्रदर्शनी जारी रहने छ । नेपाल भर छरिएर रहेका उद्योगहरुबाट उत्पादन भएका जुत्ता चप्पल तथा छालाजन्य वस्तुहरु उपभोक्ताहरुले एउटै छानामुनि अवलोकन तथा छनौट गरी प्रतिपष्र्धी मूल्यमा खरिद गर्ने अवसर प्रदान गर्नु प्रदर्शनीको उद्देश्य रहेको छ । उद्योगहरुले आफ्ना उत्कृष्ट उत्पादनहरुको प्रदर्शनी गरी उत्पादन तथा निकासी अभिबृद्धि गर्ने कार्यमा प्रदर्शनीबाट सहयोग र प्रदर्शनी १ लाख ५० हजार भन्दा बढीले अवलोकन गर्ने आयोजकले अपेक्षा राखेको छ । प्रदर्शनी अवधिभर खरिद गरिएका जुत्ता चप्पल र वस्तुहरुमा १५ प्रतिशत छुटको व्यवस्था गरिएको आयोजकले जानकारी दिए । नयाँ डिजाइनका जुत्ता चप्पल तथा छालाजन्य वस्तुहरु अवलोकन गर्न पाइने छ ।
मेगा बैंकको स्वतन्त्र संचालकमा शिवादेवी काफ्ले पुनः नियुक्त
काठमाडौं । मेगा बैंक लिमिटेडको स्वतन्त्र संचालकमा शिवादेवी काफ्ले पुनः नियुक्त भएकी छिन् । हालै सम्पन्न बैंक सञ्चालक समितिको बैठकले काफ्लेलाई आगामी चार वर्षसम्मको लागि स्वतन्त्र संचालक पदमा नियुक्त गरेको हो । साथै, काफ्लेले गत पुस १२ गते आफ्नो पद तथा गोपनियताको सपथ ग्रहण गरी पदवहाली गरिसकेकी छिन् । यसअघि बैंकले गत भदौ १० गते कम्पनीको स्वतन्त्र संचालकको पदमा काफ्लेलाई नियुक्त गरेको थियो । सो अवधिमा काफ्ले देश बाहिर रहेकाले निर्धारित समयावधि भित्र पद तथा गोपनियताको सपथ ग्रहण गर्न असमर्थ रहेकी थिइन् । सोही कारणले बैंकले गत पुस ४ गते कम्पनीको स्वतन्त्र संचालक पदमा काफ्लेलाई पुनः नियुक्त गरेको हो ।
ज्योति विकास बैंक र ग्राण्डि हस्पिटलबीच सेवा तथा सुविधा सम्बन्धि सम्झौता
काठमाडौं । ज्योति विकास बैंक र ग्राण्डि इन्टरनेसनल हस्पिटल धापासी, काठमाण्डौं बीच सहकार्य सम्झौता भएको छ । बैंकका तर्फबाट बैंकका सहायक महा प्रबन्धक रामहरि आचार्य र अस्पतालका तर्फबाट प्रमुख संचालन अधिकृत अम्रित खन्नाले उक्त सम्झौतामा हस्ताक्षर गरेका हुन् । हाल बैंकले ८२ वटा शाखा कार्यालय तथा २२ वटा एटिएम मार्फत सेवा उपलव्ध रहेको छ । आर्थिक वर्ष भित्र थप ८ वटा नयाँ शाखा तथा थप २७ स्थानमा एटिएम संचालनमा ल्याउने प्रक्रियामा रहेको छ । बैंकले १ लाख ५२ हजारभन्दा बढि खाताबाट रु. २३ अर्बभन्दा बढि निक्षेप संकलन गरी १० हजारभन्दा बढि ऋणी मार्फत रु. १८.८० अर्वभन्दा बढि लगानी गर्न सफल भएको छ । बैंकको हालको चुक्तापूँजी रु.२ अर्व ५९ करोड कायम रहेको छ । यस बैकले हाम्रो विकाश बैकलाइ प्राप्ति गरी एकिकृत कारोबार चाँडै सुरुवात गर्ने तयारीमा रहेको छ र तत्पश्चात बैंकको चुक्ता पूँजी रु ३ अरब १० करोड पुग्नेछ । यस बैंकका ग्राहकहरुले बैंकको एटिएम कार्ड र बैंकका कर्मचारीहरुले बैंकको आइडेन्टी कार्ड देखाइ सुविधाको प्राप्त गर्न सकिनेछ ।
ग्लोबल आइएमई बैंकको थप ३ शाखा रहित बैंकिङ्ग सेवा विस्तार
काठमाडौं । ग्लोबल आइएमई बैंकले थप ३ वटा शाखारहित बैंकिङ्ग सेवा सञ्चालनमा ल्याएको छ । पौष १०, ११, १२ गते नवलपरासी वर्दघाट —सुस्ता पूर्वजिल्लाको मध्यविन्दु नगरपालिका -१५, सो जिल्लाको कावासोती नगरपालिका- १७ र पाल्पाको रम्भागाँउपालिका -१ मा शाखा रहित बैंकिङ्ग सेवा सञ्चालनमा ल्याएको छ । तीनै शाखारहित बैंकिङ्ग सेवाहरुको उद्घाटन स्थानीय जनप्रतिनिधि तथा स्थानीय वासीहरुको रोहवरमा भएको छ । ग्लोबल आइएमई बैंकको हालसम्म १३३ शाखा, १४१ एटिएम, ७ एक्सटेन्सन काउण्टर, १४ वटा राजश्व संकलन काउण्टर र ११५ शाखा रहित बैंकिङ्ग सेवा, विदेशमा ३ प्रतिनिधि÷सम्र्पक कार्यालय माफर्त आफ्ना ९ लाख ५० हजार भन्दा बढि ग्राहकहरु माझ सेवा प्रदान गर्दै आइरहेको छ । त्यस्तै बैंकले अत्याधुनिक प्रविधि युुक्त भाईवर बैंकिङ्ग सेवा, मोबाइल बैंकिंङ्ग सेवा,इन्टरनेट बैंकिंङ्ग सेवाको साथमा अष्ट्रेलिया, बेलायत तथा अन्य राष्ट्रहरु र भारतमा प्रतिनिधि/सम्पर्क कार्यालय स्थापना गरेर ति देशमा रहेका नेपालीहरुलाई सेवा प्रदान गर्दै आएकाे छ ।
