नेपाल फर्निचर तथा फर्निसिङ संघकाे नयाँ नेतृत्व गठन
काठमाडौं । नेपाल फर्निचर तथा फर्निसिङ संघको १९ औं बार्षिक साधारण सभाले रुपेश प्रधानको अध्यक्षतामा नयाँ कार्यसमिति चयन गरेको छ । संघको साधारण सभाले नयाँ कार्य समितिका सबै पदाधिकारी निर्विरोध रुपमा चयन गरेको हो । संघको वरिष्ठ उपाध्यक्षमा शुभेन्द्र जोशी, उपाध्यक्षमा दिनेश अग्रवाल र मनिष अग्रवाल चयन भएका छन् । महासचिवमा ओम बस्नेत, कोषध्यक्षमा पूर्ण ब्रज्राचार्य, सचिवमा अर्जुन घिमिरे र सह कोषाध्यक्षमा सुष्मा लम्साल चयन भएका छन् । निवर्तमान अध्यक्ष राजेशकुमार अग्रवाल सहितसंघको १९ सदस्यीय कार्य समितिमा अरुण कुमार चौधरी, किरण वगिडिया, केदारनाथ बस्ताकोटी, योगेन्द्र कार्की, डम्बर पराजुली, रमिता श्रेष्ठ र दिलबिक्रम श्रेष्ठ सदस्यमा निर्वाचित भएका छन् । नेपाल चेम्बर अफ कमर्शका अध्यक्ष डा. राजेशकाजी श्रेष्ठको प्रमुख आतित्थमा संचालन भएको साधारण सभाले संघको बार्षिक प्रतिवेदन, आर्थिक प्रतिवेदन तथा चालु आर्थिक बर्षको अनुमानित बजेट समेत पारित गरेको छ ।
टेलिकमका प्रबन्ध निर्देशकले सम्हाले कार्यभार, यस्ता रहेछन् सुधारका योजना
काठमाडौं । नेपाल टेलिकमका नवनियुक्त प्रबन्ध निर्देशक डिल्लीराम अधिकारीले पदभार ग्रहण गरेका छन् । अधिकारीलाई सरकारले पुस १९ गते ३ वर्षका लागि टेलिकमको प्रबन्ध निर्देशक नियुक्त गरेको थियो । पदभार ग्रहण गर्दै नवनियुक्त प्रबन्ध निर्देशक अधिकारीले आफ्नो व्यावसायिक कार्य योजनाको मूल्यांकनको आधारमा नेपाल टेलिकमको प्रबन्ध निर्देशकको गहन जिम्मेवारी बहन गर्ने अवसर दिएकोमा नेपाल सरकार, सञ्चार तथा सूचना प्रविधि मन्त्रालयप्रति आभार प्रकट गरे । उनले प्रविधिको विकास र बजारको प्रतिस्पर्धा तथा समयमा परियोजनाहरु अगाडि बढ्न नसक्दा कम्पनीको सेवा प्रवाह, गुणस्तर र राजस्व वृद्धिमा देखिएको चुनौतीलाई सामना गर्दैै अगाडि बढ्न कर्मचारीहरुलाई आह्वान पनि गरे । उनले काममा ढिलासुस्ती, अधिकारको दुरुपयोग, भ्रष्टाचार तथा आर्थिक अनियमितता जस्ता कुरामा कसैसँग सम्झौता नगरिने स्पष्ट पनि पारेका छन् । उनले परिवर्तनशील प्रविधि र ग्राहकको माग तथा चाहनामा हुने परिवर्तनलाई समयानुकुल सम्बोधन गर्दै लैजाने, ब्याकबोन नेटवर्कलाई भरपर्दो र गुणस्तरीय बनाइने, फोरजी परियोजनालाई समयमा सम्पन्न गरिने, १ करोड लाइन क्षमताको टुजी र थ्रीजी परियोजनालाई यथाशीघ्र सम्पन्न गरिने, मोबाइल डाटाको प्रयोग बढाउनका लागि कार्यक्रम ल्याइने, एफटीटीएच सेवालाई मूख्य सहरहरु तथा पकेट क्षेत्रहरुमा विस्तार गरिने र कपर नेटवर्कलाई प्रतिस्थापन गरिने बताए । त्यसैगरी कर्पोरेट र इन्टरप्राइज बिजनेसलाई विशेष जोड दिइने, मध्य पहाडी लोकमार्गमा अप्टिकल फाइबर नेटवर्क तयार गर्ने कार्यमा शीघ्रता ल्याइने र मोबाइल फाइनान्सियल सेवा तथा आईपी टीभी सेवालाई उच्च प्राथमिकतामा राखी कार्यान्वयन गरिने प्रतिवद्धता व्यक्त गरे । प्रबन्ध निर्देशक अधिकारी यस अघि प्रबन्ध निर्देशकको कार्यालयमा प्रबन्धक पदमा कार्यरत थिए । उनले तत्कालीन नेपाल दूरसञ्चार संस्थानमा २०५९ फागुन २२ गते टेलिकम इन्जिनियर पदमा प्रवेश गरे । उनले २०६५ मा बरिष्ठ इन्जिनियर, २०७० मा उप–प्रबन्धक र २०७५ बैशाख १६ देखि प्रबन्धक पदमा कार्यरत हुन् ।
राष्ट्रिय वाणिज्य बैंकले दिन थाल्यो ३ प्रतिशतमै कर्जा, कसरी लिने ?
काठमाडौं । राष्ट्रिय वाणिज्य बैंकले अधिकतम ३.३३ प्रतिशत ब्याजदरमै कर्जा दिन सुरु गरेको छ । बैंकले सरकारले ल्याएको एकीकृत सहुलियत कर्जा कार्यक्रमसँग सम्बन्धित परियाेजना धिताेमा प्रदान गरिने कर्जाकाे वितरण आजबाट सुरु गरेकाे हाे । सोमबार राष्ट्रिय वाणिज्य बैंकको केन्द्रीय कार्यालयमा आयोजित पत्रकार सम्मेलनमा बैंकका अध्यक्ष तथा सञ्चार तथा सूचना प्रविधि मन्त्रालयका सचिव महेन्द्रमान गुरुङले भीमप्रसाद अधिकारीलाई शिक्षित युवा स्वरोजगार कर्जा र रजनी आयुलाई उच्च प्राविधिक तथा व्यवसायिक शिक्षा कर्जाको चेक हस्तान्तरण गरेर कर्जा कार्यक्रमको सुरुवात गरेका थिए । बैंकले भुकम्पपीडितहरुको निजी आवास निर्माण, उच्च र प्राविधिक तथा व्यवसायिक शिक्षा कर्जा, शिक्षित युवा स्वरोजगार कर्जा, विदेशबाट फर्केका युवा परिचालन कर्जा, दलित समुदाय विकास कर्जा, महिला उद्यमशील कर्जा र व्यवसायिक कृषि तथा पशुपन्छी शीर्षकको कर्जामा ३.३३ प्रतिशत र महिला उद्यमशीलता कर्जामा २.३३ प्रतिशत ब्याजसहित अधिकतम ५ कराेडसम्म कर्जा उपलब्ध गराउनेछ । राष्ट्रिय वाणिज्य बैंकको हाल आधार ब्याजदर ६.३३ प्रतिशत छ । त्यसमा २ प्रतिशतसम्म ब्याज प्रिमियम थप गर्न पाउने नियम छ । सरकारले त्यसमध्ये महिला उद्यमशीलता कर्जामा ६ प्रतिशत र अन्य कर्जाको हकमा ५ प्रतिशत ब्याज अनुदान दिँदा ऋणीले क्रमशः २.३३ प्रतिशत र ३.३३ प्रतिशत कायम रहन गएको हो । कसरी लिने कर्जा ? राष्ट्रिय वाणिज्य बैंकले भुकम्पपीडितहरुको निजी आवास निर्माण कर्जाका लागि अधिकतम ३ लाख, उच्च र प्राविधिक तथा व्यवसायिक शिक्षा कर्जाका लागि ५ लाख, शिक्षित युवा स्वरोजगार कर्जाका लागि अधिकतम ७ लाख, विदेशबाट फर्केका युवा परिचालनका कर्जाका लागि अधिकतम १० लाख, दलित समुदाय विकास कर्जाका लागि अधिकतम १० लाख, महिला उद्यमशील कर्जाका लागि १५ लाख र व्यवसायिक कृषि तथा पशुपन्छी कर्जाका लागि अधिकतम ५ करोड रुपैंयासम्मको कर्जा दिने व्यवस्था गरेको छ । जसका लागि आफूले लिन चाहेको कर्जाको प्रकार, रकम र आवश्यक कागजातसहित आफ्नो नजिकको शाखामा आवेदन दिनुपर्नेछ । आवेदकले बैंकले उपलब्त्र गराएको कर्जा फाराम भरी बैंकले नै उपलब्ध गराएको परियोजना प्रस्ताव ढाँचाअनुसारको प्रस्ताव पेश गर्नुपर्नेछ भने व्यक्तिगत प्रयोजनका लागि व्यक्तिगत प्यान र संस्थागत प्रयोजनको लागि फर्म वा कम्पनीको स्थायी लेखा नम्बर आवश्यक हुन्छ । कर्जा परियाेजनाकाे प्रकार र माग गरिएकाे रकमका अाधारमा किस्ताबन्दीमा उपलब्ध हुनेछ । के के चाहिन्छ कागजात ?
माछापुच्छ्रे बैंकद्वारा ५ लाखसम्मको बीमा रकम भुक्तानी
काठमाडौं । माछापुच्छ्रे बैंकले मृतक सुदिप कार्कीको परिवारलाई ५ लाख रुपैयाँ बीमा भुक्तानी गरेको छ । मृतक सुदिप कार्कीको बैंकमा तलब व्यवस्थापन बचत खाता रहि आएकोमा दुर्घटना बीमा सुविधा अन्तर्गत बैंकले निजको हकवालालाई सो रकम भुक्तनी गरेको हो । उक्त रकम बैंकका नायब प्रमुख कार्यकारी अधिकृत सन्तोष कोइराला र लुम्बिनी जनरल इन्स्योरेन्स कम्पनीका नायब प्रमुख कार्यकारी अधिकृत बि के श्रेष्ठले संयुक्त रुपमा हस्तान्तरण गरेका छन् । मृतक सुदिप कार्कीको एक दुर्घटनामा मृत्यु भएको थियो । मृतकका परिवारले आफ्नो दुःखको घडीमा बैंकबाट सहजै उक्त हक दाबी रकम उपलब्ध गराएकोमा बैंकलाई आभार समेत प्रकट गरेका छन् । माछापुच्छ्रे बैंकका ग्राहकहरुले तलब व्यवस्थापन बचत खातामा ६.५% व्याजदर पाउँदै आएका छन् । शून्य मौज्दातमा खोल्न सकिने तलब व्यवस्थापन बचत खातामा ग्राहकहरुले रु. ५ लाख सम्मको दुर्घटना बीमा सुविधा निःशुल्क पाउँदै आएका छन् । बैंकले पुर्वमा झापा देखि पश्चिममा कन्चनपुर सम्म ८८ वटा शाखाहरु, २ एक्सटेन्सन काउण्टर लगायत ५२ शाखा रहित बैकिङ्ग सेवा गरी जम्मा १४२ स्थानबाट ग्राहकलाइ बैंकिङ्ग सुविधा प्रदान गरिरहेको छ । साथै, बैंकको देशभर १११ वटा एटीएमहरु सञ्चालनमा रहेका छन् ।
एशियाली विकास बैंकको आर्थिक सहयोगमा नेपालगञ्जमा दुई आकाशे पुल बन्दै
काठमाडौं । नेपालगञ्जको दुई चोकमा आकाशे पुल निर्माणको प्रक्रिया शुरु गरिएको छ । अति व्यस्त बिपी चोक र धम्बोझी चोकमा आधुनिक प्रविधिको आकाशे पुल निर्माणका लागि विस्तृत अध्ययन परियोजना प्रतिवेदन (डिपीआर)बनाउन थालिएको छ । विकास बैंकको आर्थिक सहयोगमा यी दुई चोकमा र दोस्रोचरणमा नेपालगञ्जको गणेशमान चोक, पुष्पलाल चोकमा आकाशे पुल निर्माण गर्ने योजना नगरपालिकाको रहेको नगर प्रमुख डा धवलशम्शेर राणाले बताएका छन् । तीन वर्षको अवधिमा भएको तीव्र सडक विस्तारपछि बसाइसराइ र सवारी साधनको वृद्धिले नेपालगञ्जमा अहिले ट्राफिक व्यवस्थापन चुनौतीपूर्ण बन्दै गएको छ । एशियाली विकास बैंकको झण्डै रु चार अर्बको आर्थिक ऋण अनुदान सहयोगमा नेपालगञ्जमा ६० किलोमिटर कालोपत्र सडक विस्तार गरिएको छ । आकाशे पुल निर्माणका साथै नेपालगञ्जमा ट्राफिक प्रविधिको जडान, सार्वजनिक स्थलमा सवारी पार्किङको व्यवस्था, झण्डै १० हजारको हाराहारीमा रहेको अटोरिक्सा व्यवस्थापनको चुनौती पनि नेपालगञ्ज नगरपालिकालाई थपिएको छ । जनप्रतिनिधि निर्वाचित भएर आएको डेढ वर्षको अवधिमा नेपालगञ्जको विकासले ठूलै फड्को मारेको छ । नगरको वडा वडामा सडक कालोपत्र, साना ठूला नाला निर्माण, रानी तलाउको जीर्णोद्धार गरी नौकाबिहार सञ्चालन, बाल उद्यानको निर्माण लगायतका थुप्रै विकासका काम सम्पन्न भएका छन् भने थुप्रै योजना पनि बन्दै छन् । रासस
सानिमा लाईफ इन्स्योरेन्सको ३०औँ शाखा गोङ्गबुमा
काठमाडौं । सानिमा लाईफ इन्स्योरेन्सले नयाँ शाखा काठमाडौंको गोङ्गबुमा विस्तार गरेको छ । यो सहित कम्पनीको शाखा संख्या ३० पुगेको छ । उक्त नयाँ विस्तारित शाखाको उद्घाटन सानिमा लाईफका प्रबन्धक डा.भरत थापाले गरेका छन् । प्रबन्धक थापाले सोमबार इन्स्योरेन्सद्धारा आयोजित एक कार्यक्रममा उक्त शाखाको उद्घाटन गरेका हुन् ।
नेप्से ६ अंकले बढ्दा नेपाल बैंकको ८ करोड बढीको सेयर कारोबार
काठमाडौं । बजारमा नेप्से परिसूचक ६.६७ अंकले उकालो लागेर ११७७.४६ अंकमा पुगेको छ । सामान्य अंकले बढेको सोमबारको बजारमा कारोबार रकममा पनि सामान्य वृद्धि भएको छ । सो दिन १४८ कम्पनीको ३० करोड १९ लाख रुपैयाँ बराबरको सेयर किनबेच भएको छ । सो मध्ये सबैभन्दा बढी नेपाल बैंकको सेयर कारोबार भएको छ । बैंकको एकैदिन ८ करोड ५९ लाख रुपैयाँ बराबरको सेयर कारोबार भएको छ । जसको सेयर मूल्य प्रतिकित्ता ३०८ रुपैयाँ रहेको छ । त्यस्तै, एनसीसी बैंक, नागरिक लगानी कोष, नेपाल लाइफ इन्स्योरेन्स र प्रभु बैंकको एक करोड बराबरको सेयर किनबेच भएको छ । बजारमा सबैभन्दा बढी जीवन बीमा समूहकोे सूचक ९२ अंकले उकालो लागेको छ । त्यस्तै, निर्जीवन बीमा ८२, होटल १७ र माइक्रोफाइनान्स ११ अंकले बढेका छन् भने बाँकी समूह सामान्य एकल अंकले बढेका छन् । उत्पादनमूलक र अन्य समूह क्रमशः १२ र ०.०४ अंकले घटेका छन् ।
आगामी शैक्षिकसत्रदेखि काठमाडौंका संस्थागत विद्यालयको नाम र परिचयपत्र नेपाली भाषामा
काठमाडौं । काठमाडौं महानगरपालिकाले संस्थागत विद्यालयको नाम र विद्यार्थीलाई उपलव्ध गराउने परिचयपत्र नेपाली भाषामै राख्न लगाउने भएको छ । महानगरका शिक्षा अधिकारी सीताराम कोइरालाले आगामी शैक्षिकसत्रदेखि उक्त कुरालाई अनिवार्य रुपमा लागु गर्ने जानकारी दिएको छ । अङ्ग्रेजी भाषामा विद्यालय र विद्यार्थीको नाम हुँदा आफ्ना छोराछोरी कुन स्कूलमा पढ्छ र उनीहरुको नाम के हो भन्नेमा अभिभावकमा अन्योल रहेको भन्दै यस विषयमा अभिभावकलाई सहज गराउन यस्तो व्यवस्था ल्याएको महानगरका शिक्षा अधिकारी कोइरालाले बताएका छन् । शिक्षा अधिकारी कोइरालाले विद्यालयले अङ्ग्रेजीमा पनि लेख्न वा नलेख्नका लागि भने स्वतन्त्र छाडिने जानकारी दिँदै सरकारले अङ्ग्रेजी नाम भएका कलेजका नाम नेपाली भाषा, मौलिक संस्कृति झल्कने खालको नाम राख्न निर्देशन दिए पनि कलेजले उक्त निर्देशन अहिलेसम्म कार्यान्वयन नगरेको बताएका छन् । महानगरभित्र ६४० वटा संस्थागत विद्यालयमा शिक्षा समितिबाट निर्णय गरेपछि सोहीअनुसार नेपाली भाषालाई प्रभावकारी कार्यान्वयन गराउनका लागि निजी तथा तथा आवासीय विद्यालय अर्गनाइजेशन, नेपाल र राष्ट्रिय निजी तथा आवासीय विद्यालय अर्गनाइजेशन, नेपाल (एनप्याब्सन)लाई निर्देशन दिइने जानकारी गराएका छन् । शिक्षकलाई उनीहरुको खातामा तलब खुवाउनका लागि अन्तिम तयारीमा रहेको बताउँदै अब माघ महीनासम्मको तलब उनीहरुको आफ्नै खातामा हाल्ने व्यवस्था गर्ने भएको छ । महानगरले यसअघि विद्यालयमा तलब पठाउने गरेको र त्यहीबाट शिक्षकले तलब खाने गर्दैआएका थिए । महानगरमा ९१ सामुदायिक विद्यालयमा एक हजार ८३० शिक्षकहरु रहेका छन् । विद्यालयका शिक्षक, कर्मचारी तथा अभिभावकलाई कुनै वैदेशिक भ्रमण, तालीम, सभा, अवलोकन भ्रमण, खेलकूद, मैत्रीपूर्ण भ्रमण वा स्वदेशमा नै शैक्षिक भ्रमण वा यस्तै कुनै कार्यमा लैजादा शिक्षा विभागको पूर्वस्वीकृति अनिवार्य लिनुपर्ने व्यवस्था गर्नसमेत थालिएको शिक्षा अधिकारी कोइरालाले बताएका छन् । महानगरभित्रका विद्यालयले विद्यार्थीलाई बस्ने ठाउँ उपलव्ध नगराई भाडामा कोठा दिने गरेकाले कार्यविधि अपनाएर मात्र भाडा दिने व्यवस्था गर्न र कोठा भाडामा लगाएर टेन्टमा विद्यार्थी पढाउने गरेको पाइएमा प्रधानाध्यापकलाई कारवाहीसमेत गरिने जानकारी दिएका छन् । रासस
