विकासन्युज

अजय श्रेष्ठबारे पूर्वसहकर्मी उपेन्द्र पौड्याल : उहाँ असल मान्छे हुनुहुन्छ, पक्राउ पर्नु दुर्भाग्य हो

काठमाडौं । अजयजी र म सन् १९८६ देखि स्ट्यान्डर्ड चार्टर्ड बैंकमा सँगै काम गरेका थियौं, त्यसपछि हामीले धेरै वर्ष सँगै काम पनि गर्यौं, त्यसैले उहाँबारे म धेरै जानकार छु । उहाँलाई जुन अभियोगमा केन्द्रीय अनुसन्धान ब्युरोले पक्राउ गरेको भनिएको छ, त्यसमा उहाँको संलग्नता छ भन्ने कुरामा मलाई कत्ति पनि विश्वास लाग्दैन । यो मामिलामा म विश्वस्त हुन सक्दिन । यो दुभाग्र्य हो । उहाँ जस्तो राम्रो छवि भएको मान्छेलाई यस्तो आरोप लाग्नु भनेको सम्पूर्ण बैंकिङ क्षेत्रकै बदनियत हो । यसले राम्रो काम गर्नेलाई निरुत्साहित गर्छ । उहाँको पक्राउले म स्तब्ध र अचम्मित भएको छु । मैले व्यक्तिगत रुपमा उहाँलाई एकदमै इमान्दार र कर्तव्यनिष्ठ बैंकको रुपमा बुझेको छु । उहाँले जुनसुकै बैंकमा काम गर्दा पनि आफ्नो स्वार्थका लागि काम गर्नुभएन र गर्नुहुन्न भन्ने पनि मलाई थाहा छ । कुनै प्राविधिक कारण मात्रै फस्नुभएको हुनसक्छ । उहाँले आफूले स्वीकृत गर्ने सबै फाइलहरु राम्रोेसँग आफैं हेर्नुहुन्थ्यो । त्यसैले बैंकका कर्मचारीहरुले मिलेमतो गरे कि भन्ने पनि मलाई लाग्दैन । यो मामिलामा मलाई जहाँसम्म लाग्छ मूल्यांकनकर्ता र ऋणीकै संलग्नता रहेको छ भन्ने मलाई लाग्छ । बैंकरहरुले आफ्नो कार्यअवधिमा यस्ता कयौं अप्ठ्याराहरु भोग्नुपर्छ । तर गल्ती नगर्नेले सजायको भागिदार हुनु हुँदैन हुँदैन भन्नेमा म विश्वस्त छु, यस अर्थमा अजयजी निर्दोष सावित हुनुहुनेछ भन्ने मलाई लाग्छ । यो घटनाबाट बैंकरहरुले पाठ सिक्नुपर्छ तर निराश बन्नु चाहिँ हुन्न ।

जेनेस सोलुसन र यूकेएडको साझेदारीमा २ हजारलाई रोजगारी

काठमाडौँ । क्लाउड कम्प्युटिङ इकोसिस्टम र वेब/सफ्टवेयर विकाससम्बन्धि विशिष्टीकृत कम्पनी जेनेस सोलुसनले सन् २०१९ अगष्ट देखि युकेएडको रोजगारीका लागि सीप कार्यक्रम (सीप)सँग सहकार्य आरम्भ गरेको छ । जेनेस सोलुसनका निर्देशक निरञ्जन उदास र युकेएड सीपका टिम लिडर बलजीत बोहराले जनकपुरमा आयोजित बिशेष कार्यक्रममा प्रदेश नं २ का मुख्यमन्त्री लालबाबु राउत र डीएफआईडी नेपालकी प्रमुख लिजाहोनानको उपस्थितिमा सहकार्य सहमतिपत्रमा हस्ताक्षर गरेका हुन् । यूकेएड सीपसँग साझेदारीपत्रमा हस्ताक्षरपछि जेनेसले विश्वव्यापी मान्यताप्राप्त क्लाउड कम्प्युटिङ प्रशिक्षण र प्रमाणीकरणसम्मको पहुँच प्रदान गर्ने तथा त्यसलाई अंगीकार गरी नेपालमा शैक्षिक संस्थाहरूको क्षमता अभिवृद्धिका साथसाथै नेपाल र विश्वभरि रोजगारी उपलब्ध गराउने गरी जेनेस क्लाउड एकेडेमी (जीसीए) नामको विशेष परियोजना सञ्चालन गर्ने तयारी गरेको छ । जेनेसले अब नेपालमा उद्योगमुखी क्लाउड कम्प्युटिङ प्रशिक्षणहरू प्रदान गर्न र अमेजनको जब पोर्टल मार्फत विश्वव्यापी रोजगारीमापहुँचकालागिलोकप्रिय अमेजन वेब सर्भिस (एडब्लूएस) एजुकेट प्रोग्राम सञ्चालन गर्नेछ । यूकेएड सीपले संघीय, प्रादेशिक र स्थानीयतहका सम्बन्धित सरकारी निकायहरू, निजी क्षेत्र, दातृ निकायहरू र अन्य सरोकारवालाहरूसँग नजिकको सहकार्य सुनिश्चितगर्दै परियोजनामा सह लगानी गर्नेछ । नेपालका २,००० सूचना प्रविधिका विद्यार्थीहरूका लागि क्लाउड कम्प्युटिङको प्रशिक्षण प्रदान गर्ने तथा मुलुक भित्र र बाहिर रोजगारी उपलब्ध गराउने विशेष परियोजना सञ्चालन गर्ने योजना रहेको बताइएको छ ।

नेपाल इन्भेष्टमेन्ट बैंंक र इसेवाफोन पे प्रालिबीच अनलाईन भुक्तानी सम्झौता

काठमाडौँ । ईसेवाफोन पे प्रालि र नेपाल इन्भेष्टमेन्ट बैंकबीच अनलाइन भुक्तानी सम्झौता भएको छ । सम्झौतासँगै अब नेपाल इन्भेष्टमेन्ट बैंकबाट ईसेवामा रकम लोड गर्न तथा विभिन्न वस्तु तथा सेवाहरूको सहजै भुक्तानी गर्न सकिनेछ । ग्राहकहरूले बैंकको इन्टरनेट बैंकिङ तथा कुनैपनि शाखामार्फत सहजै ईसेवामा रकमलोड गर्न सक्ने छन् भने ईसेवा खातामा भएको रकम पनि सिधै बैंकमा जम्मा गर्न सक्नेछन् । इसेवाबाट मोबाईल रिचार्ज, टेलिफोन, इन्टरनेट, बिजुली तथा खानेपानीको महशुल भुक्तानी, हवाइ जहाज तथा बसको टिकट, विद्यालय/क्याम्पसको शुल्क भुक्तानी, होटेल र रेष्टुरेण्टको बिल भुक्तानी लगायत विभिन्न सुविधा उपभोग गर्न सकिनेछ । पछिल्लो समयमा इसेवाले क्युआर कोड मार्फत गरिने भुक्तानीलाई प्रवद्र्धन गरिरहेको छ । हाल ईसेवामा ५५ हजार क्युआर मर्चेन्ट आबद्ध भइसकेका छन् भने क्युआर कोडमा ईसेवाले आकर्षक क्यासब् याक तथा छुटको व्यवस्था समेत गरेको छ । अबदेखि नेपाल इन्भेष्टमेन्ट बैंकका ग्राहकले ईसेवामा पैसा लोड गरी सजिलै क्युआर कोडको सुविधा पनि लिन सक्नेछन् ।

बैंकिङ कसुरको अभियोगमा पूर्वबैंकर अजय श्रेष्ठ पक्राउ, ‘बैंकनै जमानी बस्छु भन्दा पनि छोडेन सीआईबीले’

काठमाडौं । इमान्दार बैंकरको छवि बनाएका पूर्व बैंकर अजय श्रेष्ठ बैंकिङ कसुरको अभियोगमा पक्राउ परेका छन् । बैंक अफ काठमाण्डूका पूर्व प्रमुख कार्यकारी अधिकृत श्रेष्ठलाई प्रहरीको केन्द्रीय अनुसन्धान ब्युरोले बिहीबार बिहान पक्राउ गरेको बैंक स्रोतले पुष्टि गरेको छ । मकवानपूर घर भएका सुरेन्द्र श्रेष्ठ नामका ऋणीले ४ वर्षअघि बैंकबाट लिएको ५ करोड ऋण नतिरेपछि उनको धितोमा राखिएको सम्पत्ति लिलामी प्रक्रिया सुर गरिएको थियो । तर, झापाको निरिङखोलामा रहेको भनिएको धितोमा रहेको उक्त सम्पत्ति नै नक्कली देखिएपछि बैंक अफ काठमाडौंले सीआईबीमा उजुरी दिएको थियो । बैंकले दिएको उजुरीका आधारमा सीआईबीले यसअघि नै ऋणी श्रेष्ठलाई पक्राउ गरेको थियो । सो ऋण प्रवाहमा कर्मचारीहरुको मिलेमतो देखिएपछि सीआईबीले बैंकका अन्य ५ जना कर्मचारीहरुलाई समेत पक्राउ गरेको हो जसमध्ये ३ जना हाल बैंकमा कार्यरत रहेको बैंकले जनाएको छ । ५ करोड रुपैंयाको ऋण स्वीकृतिमा तात्कालिन प्रमुख कार्यकारी अधिकृत अजय श्रेष्ठकै हस्ताक्षर थियो । सोही कारण उनलाई पक्राउ गरिएको सीआईबीले जनाएको छ । बैंक जमानी बस्छु भन्दा पनि छोडेन सीआईबीले श्रेष्ठ पक्राउ परेको खबरपछि बैंक अफ काठमाडौंको सञ्चालक समिति बैठक आकस्मिक रुपमा बोलाइएको थियो । बैठकले श्रेष्ठ इमान्दार भएको भन्दै राष्ट्र बैंकमार्फत् सीआईबीलाई श्रेष्ठलाई पक्राउ नगरिकनै अनुसन्धान गर्न सीआईबीलाई आग्रह गर्ने निर्णय गरेको थियो । ‘तर राष्ट्र बैंक र बैंकको आग्रहलाई सीआईबीले मानेन, उहाँलाई छाड्न मानेन’ बैंकका एक सञ्चालकले भने । स्रोतका अनुसार श्रेष्ठलाई छाड्न बैंक अफ काठमाण्डू आफैं जमानत बस्न तयार भएको थियो । तर पनि सीआईबीले छाड्न नमानेको स्रोतले बतायो । बैंकका प्रमुख कार्यकारी अधिकृत शोभनदेव पन्तले पनि घटनाको पुष्टि गर्दै श्रेष्ठको पक्राउले आफू स्तब्ध भएको बताए । ‘उहाँ इमान्दार मान्छे हुनुहुन्छ, उहाँले यसरी ऋण अपचलन गर्ने मान्छे होइन, उहाँको पक्राउले म सक्ड भएँ ।’ विकासन्यूजसँगको कुराकानीमा प्रमुख कार्यकारी अधिकृत पन्तले भने ।

नेपाल बैंकले संविधान दिवसको अवसरमा शुरु गर्यो सम्बृृृद्धि व्यवसाय कर्जा

काठमाडौँ । नेपाल बैंक लिमिटेडले संविधान दिवस तथा राष्ट्रिय दिवस २०७६ खुल्ला रक्तदान, सार्वजनिक स्थल सरसफाई, दीपावली, प्रभात फेरी, संविधानविदसंग अन्तरक्रिया तथा नयाँ कर्जा सेवा शुभारम्भ लगायतका विविध कार्यक्रमको आयोजना गरी मनाइएको छ । यसै अवसरमा बैंकले सरकारको समृद्ध नेपाल सुखी नेपालीको परिकल्पनालाई साकार बनाउन उद्योग वा व्यवसाय विस्तारका लागि सम्बृृृद्धि व्यवसाय र सेवाग्राही कर्जा, वातावरणीय सुधार निम्ति ग्रिन फाइनान्सिङ्ग कर्जा लगायतका नयाँ कर्जा सेवाहरु समेत सुरुवात गरेको जनाएको छ । यसैगरी बैंकद्वारा सञ्चालित भुगोल पार्क वरपर सरसफाई कार्यक्रमको नेपाल बैंक लिमिटेड संचालक समितिका अध्यक्ष वासुदेव अधिकारीले शुभारम्भ गरेका हुन् । यसै अवसरमा बैंकद्वारा आयोजित खुल्ला रक्तदान कार्यक्रममा सरिक ५० जना रक्तदातालाई बंैकका कायम मुकायम प्रमुख कार्यकारी अधिकृत कृष्णबहादुर अधिकारीले प्रमाणपत्र प्रदान गरे । त्यसैगरी बैंक कर्मचारीको सहभागितामा बाजागाजा तथा राष्ट्रिय झण्डासहित भव्य प्रभात फेरी सम्पन्न गरियो । साथै बंैकद्वारा यसै सप्ताहान्तमा नेपालको वर्तमान संविधानबारे वरिष्ठ संविधानविद पूर्व प्रधानन्यायाधीश कल्याण श्रेष्ठसंग अन्तरक्रिया कार्यक्रमको आयोजना गर्ने जनाएको छ । राष्ट्रिय दिवस उल्लासमय ढंगले मनाउने क्रममा असोेज १ देखि ४ गतेसम्म प्रधान कार्यालय एवम् विभिन्न प्रादेशिक तथा शाखा कार्यालयहरुमा दीपावलीका साथै राष्ट्रिय झण्डा फहराउने कार्यक्रम सम्पन्न गरिएको बैंकले जनाएको नेपाल बैंकका प्रेस संयोजक मुकुन्द अर्यालले जनाएका छन् ।

एनआईसी एशियाका सीईओ न्यौपाने प्रबल जनसेवा श्री बाट विभूषित

काठमाडौँ । एनआईसी एशिया बैंकका प्रमूख कार्यकारी अधिकृत(सीईओ) रोशनकुमार न्यौपानेलाई राष्ट्रपति विद्यादेवि भण्डारीबाट संविधान दिवसका दिन प्रबल जनसेवा श्री (चतुर्थ श्रेणी) द्वारा विभुषित गर्ने घोषणा भएको छ । मुलुकको समग्र बैंकिङ्ग क्षेत्रमा न्यौपानेले पुर्याउनु भएकोे योगदानको कदर गर्दै नेपाल सरकारको सिफारिसमा राष्ट्रपति भण्डारीले संविधान दिवस २०७६ को अवसरमा शुक्रबार उक्त पदवीको घोषणा गरेकी हुन् । सरकारले संविधान दिवसका अवसरमा मुलुकका विभिन्न क्षेत्रमा योगदान पुर्याएका ब्यक्तिहरु मध्ये युवा बैंकर न्यौपानेलाई छनौट गरेको हो । न्यौपाने नेपालको वाणिज्य बैंकहरुमा हाल कार्यरत प्रमुख कार्यकारी अधिकृतहरु मध्ये सवैभन्दा कम उमेर(३९ बर्ष) का छन् । नेपालको दुर्गम तथा ग्रामीण जिल्ला रसुवामा जन्मिएका न्यौपाने चार्टड एकाउण्टेन्ट समेत हुन् । विद्यालय शिक्षा रसुवा जिल्लाको तत्कालीन धैवुङ गाविसमा पर्ने कालिका हिमालय उच्च माध्यमिक विद्यालयबाट सम्पन्न गरेका थिए ।

मंगलबार बैरो संघको निर्वाचनः प्रगतिशीबाट पोखरेल र लोकतान्त्रिक समूहबाट गैरे चुनावी मैदानमा

काठमाडौँ । नेपाल वैदेशिक रोजगार व्यवसायी सङ्घको २७ औँ साधारणसभा असोज ७ गते राजधानीमा हुँदैछ । संघको नयाँ नेतृत्वका लागि नेपाली काँग्रेस र नेपाल कम्युनिष्ट पार्टी (नेकपा) निकट रहेका व्यवसायीले दुई समूह खडा गरेर निर्वाचनमा होमिँदै छन् । लोकतान्त्रिक समूहबाट गैरेले नेतृत्व गर्ने नेपाल लोकतान्त्रिक वैदेशिक रोजगार व्यवसायी फोरमका तर्फबाट अध्यक्षमा विष्णुप्रसाद गैरेको उम्मेदवारी घोषणा गरिएको हो । त्यसैगरी सो समूहको प्रथम उपाध्यक्षमा कमल तामाङ, द्वितीय उपाध्यक्षमा कमलदेव मल्ल, तृतीय उपाध्यक्षमा किशोरकुमार केसी, महासचिवमा सुजित श्रेष्ठ, सचिवमा मेगनाथ भुर्तेल र कोषाध्यक्षमा इन्दिरा गुरुङको उम्मेदवारी घोषणा गरिएको छ । यसैगरी सदस्यमा दिनेशकुमार रावल, कर्णराज कटुवाल, सुरेन्द्र अर्याल, हर्कबहादुर लिम्बू, विजय लामा, बाबुलाल मगर, केवशराज न्यौपाने, छविलाल भट्टराई, जङ्गबहादुर इजम र लक्ष्मण पौडेलको उम्मेदवारी घोषणा गरिएको छ । अध्यक्षका प्रत्याशी गैरेले व्यवसायलाई मर्यादित, व्यवस्थित र नियमित गर्ने तथा पेशागत हकहितको सुरक्षाका साथै कामदारको हकहित र सुरक्षामा ध्यान दिने प्रतिबद्धता व्यक्त गरेका छन् । उनले श्रम सम्झौता नभएका मुलुकसँग तत्काल सम्झौताका लागि नेपाल सरकारसँग पहल गर्ने र नयाँ तथा आकर्षक गन्तव्य मुलुकको पहिचान गरी श्रम सम्झौता गरेरमात्र कामदार पठाउने व्यवस्था मिलाउने प्रतिबद्धता व्यक्त गरे । प्रगतिशील समूहबाट पोखरेल उम्मेदवा आसन्न नेपाल वैदेशिक रोजगार व्यवसायी संघको निर्वाचनका लागि अध्यक्षमा प्रगतिशील समूहको तर्फबाट सरोजकुमार पोखरेलले उम्मेदवारी घोषणा गरेका छन् । नेपाल कम्युनिस्ट पार्टी (नेकपा) र समाजवादी पार्टी नेपालसँग निकट रहेका व्यवसायीको तर्फबाट पोखरेलले संयुक्त रुपमा उम्मदवारी दिने पोखरेलले बताए । संयुक्त व्यवसायीको तर्फबाट प्रथम उपाध्यक्षमा हरिबहादुर पाण्डे क्षेत्री, द्वितीय उपाध्यक्षमा मुक्तिनाथ अधिकारी, तृतीय उपाध्यक्षमा अख्तर हुसेन, महासचिवमा रामचन्द्र गिरी, सचिवमा सन्जु गुरूङ र कोषाध्यक्षमा तेजमाया लिम्बू (तेजु) ले उम्मेदवारी दिनेछन् । सदस्यमा होमप्रसाद तिमिल्सिना, दलवीर भण्डारी, ओमबहादुर न्यौपाने, सरिता घले, सोमबहादुर तामाङ, बाबुराम खड्का, नुर महोम्मद मियाँ, दोर्जे शेर्पा, केदारनाथ अधिकारी र वीरेन्द्रकुमार यादवले उम्मेदवारी दिने पत्रकार सम्मेलनमा बताइयो । निर्वाचनमा सहभागी हुन ६५८ प्रतिनिधिले गराए नाम दर्ता नयाँ नेतृत्व चयनको लागि हुने निर्वाचनमा सहभागी हुन ६५८ प्रतिनिधिले नाम दर्ता गराएका छन् । म्यानपावर धरौटी बढाएसँगै ८५४ म्यानपावर कम्पनी कायम भए पनि १९६ कम्पनीले प्रतिनिधि पठाएका छैनन् ।

दशैं तिहारभर गाडी जुनसुकै रुटमा चल्नसक्ने, अग्रिम टिकट बुकिङ सुरु, कहाँको भाडादर कति ?

काठमाडौं । दशैंमा देशभरका सवारीसाधन जहासुकै चल्न पाउने भएका छन् । सीमित रुटका लागि इजाजत लिएर सञ्चालन गर्दै आएका सवारी साधनलाई चाडपर्व अवधिभर जहासुकै चल्न पाउनेगरी ‘रुट फ्रि’ गर्न लागेको यातायात व्यवस्था विभागले जनाएको छ । त्यसका लागि विभागले छलफल गरिरहेको र १/२ दिनभित्र निर्णय हुने बताइएको छ । लामो दूरीमा चल्ने सवारी साधनको संख्या कम हुने भएकोले यात्रुको चाप थेग्न छोटो दूरी र शहरी क्षेत्रमा चल्ने सवारी साधनलाई लामो दूरीमा सेवा दिनेगरी त्यस्तो व्यवस्था गर्न लागिएको हो । लामो दूरीका बसहरुको अग्रिम टिकट बुकिङ सकिएपछि ‘रुट फ्रि’को सम्बन्धमा निर्णय हुने विभाग स्रोतले जनाएको छ । अग्रिम टिकट बुकिङ खुला यातायात व्यवस्था विभागले आइतबारदेखि लामो दूरीका यात्रुहरुका लागि बसको अग्रिम टिकट बिक्री खुला गरेको छ । दशैंका लागि उपत्यकाबाट बाहिरिने यात्रुहरुका लागि त्यस्तो टिकट बिक्री खुला गरिएको हो । विभागले साविकको भाडादरमै त्यस्तो टिकट बुक गर्नुपर्नेगरी बिक्री खुला गर्नुपर्ने व्यवस्था गरेको छ । सो भाडादर अघिल्लो वर्षको दशैंअघि समायोजन गरिएको थियो । विभागले गत असार १ गतेदेखि लागु हुने गरी सवारीसाधनको भाडा बढाए पनि मन्त्रालयको निर्देशनपछि सो भाडादर वृद्धिको निर्णय फिर्ता लिइएको थियो । चाडवाडको मुखमा बर्षैपिच्छे भाडादरको विषयलाई लिएर यातायात व्यवसायी र सरकारबीच विवाद हुने गरे पनि यो वर्ष भने साविककै भाडादरमा टिकट बुकिङ गर्न व्यवसायीहरु तयार भएका हुन् । विभागले तोकिएकोभन्दा बढी भाडा लिएको पाइएमा त्यसरी बढी भाडा लिने सवारीलाई कारबाही गर्ने चेतावनी समेत दिएको छ । हाल २५० किलोमिटरभन्दा लामो दूरीलाई विभागले लामो दूरीको रुट भनेर व्याख्या गर्दै आएको छ, ती रुटहरुमा टिकट बिक्री खुला भएको हो । मध्यम र छोटो दूरीका हकमा भने यात्रुहरुले तोकिएकै दिनमा टिकट काटेर यात्रा गर्न सक्नेछन् । कुन रुटको भाडा कति ? विभागले देशभर चल्ने रुटहरुका लागि अघिल्लो वर्ष असोज ७ गतेदेखि लागु हुनेगरी भाडादर तोकेको थियो । त्यही भाडादर यो वर्ष पनि लागु हुने जनाएको हो । अघिल्लो वर्ष भाडादर निर्धारण गर्दा इन्धनको मूल्यलाई ३५ प्रतिशत र अन्य सूचकलाई ६५ प्रतिशत मानेर भाडादर समायोजन गरेको थियो । सो भाडादर समायोजन गर्दा डिजेलको मूल्य १०१ रुपैंया र पेट्रोलको मूल्य ११४ रुपैंयाका आधारमा तोकिएको थियो । अहिले काठमाडौंमा डिजेलको मूल्य ९५ रुपैंया र पेट्रोलको मूल्य १०७ छ । सो मूल्यमा ५ रुपैंयाभन्दा बढी तलमाथि भएपछि भाडादर समायोजन गर्ने भने पनि यो वर्ष डिजेलमा ६ रुपैंया र पेट्रोलमा ७ रुपैंया मूल्य घटे पनि भाडादर समायोजन भएको छैन । विभागले अघिल्लो वर्ष काठमाडौंबाट छुट्ने सवारीबो भाडादर निम्नअनुसार तोकेको छ । सो भाडादरमा डिलक्स सुविधा लिएका सवारी साधनलाई २० प्रतिशतसम्म अतिरिक्त भाडा लिनसक्ने व्यवस्था गरेको छ । [pdf id=172584]