कुमारी बैंकका कर्मचारीले बाढीपीडितका लागि दिए ४६ लाख रुपैयाँ
काठमाडौं । त्रिशूली–भोटेकोशी क्षेत्रमा आएको बाढीबाट प्रभावित नागरिकको सहयोगका लागि कुमारी बैंक लिमिटेडका कर्मचारीले ४५ लाख ९७ हजार रुपैयाँभन्दा बढी सहयोग गरेका छन् । बैंकका कर्मचारीले स्वेच्छिक रूपमा आफ्नो तलबबाट रकम कट्टा गरी प्रधानमन्त्री दैवी प्रकोप उद्धार कोषमा ४५ लाख ९७ हजार ३५३ रुपैयाँ ५० पैसा योगदान गरेका हुन् । बाढीका कारण ठूलो मानवीय तथा भौतिक क्षति व्यहोरेका समुदायलाई राहत, उद्धार तथा पुनःस्थापनामा सहयोग पुर्याउने उद्देश्यले उक्त रकम संकलन गरिएको बैंकले जनाएको छ । संकलित रकम कोषमार्फत प्रभावित समुदायको सहयोगमा उपयोग हुने विश्वास बैंकले लिएको छ । कुमारी बैंकले सामाजिक उत्तरदायित्वलाई प्राथमिकतामा राख्दै विपद्का समयमा प्रभावित समुदायलाई सहयोग गर्दै आएको जनाएको छ । कर्मचारीको यो योगदानले सामाजिक एकता र राष्ट्रप्रतिको उत्तरदायित्वलाई थप बलियो बनाउने बैंकको विश्वास छ । यसअघि पनि बैंकले त्रिशूली–भोटेकोशी बाढीबाट प्रभावित नागरिकको राहत, उद्धार, पुनःस्थापना तथा पुनर्निर्माणका लागि प्रधानमन्त्री दैवी प्रकोप उद्धार कोषमा ३ करोड रुपैयाँ सहयोग गरेको थियो । त्यसैगरी, उद्धार तथा राहत कार्यलाई प्रभावकारी बनाउन बैंकले गृह मन्त्रालयलाई ३९ लाख रुपैयाँ बराबरका अत्याधुनिक ड्रोन, पावर बैंक, जेनेरेटरलगायत विपद् व्यवस्थापन सामग्री उपलब्ध गराएको थियो ।
आइजीआई प्रुडेन्सियल र जनकपुर बोल्ट्सबीच सम्झौता, खेलाडीको बीमा सुरक्षा गरिने
काठमाडौं । आइजीआई प्रुडेन्सियल इन्स्योरेन्स लिमिटेड र जनकपुर बोल्ट्सबीच क्रिकेट खेलको विकास, खेलाडीको वित्तीय सुरक्षा अभिवृद्धि तथा संस्थागत सहकार्य विस्तार गर्ने उद्देश्यले सम्झौता भएको छ । सम्झौतापत्रमा आइजीआई प्रुडेन्सियल इन्स्योरेन्सका प्रमुख कार्यकारी अधिकृत युगेशभक्त बादे श्रेष्ठ र जनकपुर बोल्ट्सका महाप्रबन्धक निरोज खतिवडाले हस्ताक्षर गरेका छन् । सम्झौताअनुसार जनकपुर बोल्ट्ससँग आबद्ध नेपाली खेलाडी, प्रशिक्षक, कर्मचारी तथा पदाधिकारीको खेल अवधिमा आवश्यक बीमा गरिनेछ । साथै, जनकपुर बोल्ट्सले आफ्नो संस्था र त्यससँग आबद्ध व्यक्तिहरूको बीमा आइजीआई प्रुडेन्सियल इन्स्योरेन्समार्फत गर्नेछ । यस सहकार्यले क्रिकेट खेलाडीको विकास, उनीहरूको मनोबल अभिवृद्धि र क्लबको संस्थागत सुदृढीकरणमा सहयोग पुग्ने दुवै संस्थाले विश्वास व्यक्त गरेका छन् । सम्झौताअन्तर्गत दुवै संस्थाले आ–आफ्नो क्षेत्रको विशेषज्ञता, पहुँच र स्रोत उपयोग गर्दै पारस्परिक हितका विभिन्न गतिविधिमा सहकार्य गर्नेछन् । सम्झौताबारे बोल्दै आइजीआई प्रुडेन्सियल इन्स्योरेन्सका प्रमुख कार्यकारी अधिकृत श्रेष्ठले कम्पनीले क्रिकेट, भलिबल, फुटबल तथा फुटसललगायत विभिन्न खेलकुद गतिविधिमा सहभागिता जनाउँदै आएको बताए । उनले भविष्यमा पनि खेलकुद क्षेत्रको विकास र विस्तारमा योगदानलाई निरन्तरता दिने बताए । नेपालको ऐतिहासिक क्लब जनकपुर बोल्ट्ससँग सहकार्य गर्न पाउँदा गौरव महसुस भएको उल्लेख गर्दै श्रेष्ठले नेपाली क्रिकेटले राष्ट्रिय तथा अन्तर्राष्ट्रिय क्षेत्रमा हासिल गरिरहेको प्रगतिलाई थप प्रोत्साहन गर्ने उद्देश्यले सम्झौता गरिएको बताए । उनले दुवै संस्थाबीचको सहकार्यलाई निरन्तरता दिने प्रतिबद्धतासमेत व्यक्त गरे । त्यस्तै, जनकपुर बोल्ट्सका महाप्रबन्धक खतिवडाले खेलाडीको विकास र क्रिकेटको विस्तारमा सहयोग गरेकोमा आइजीआई प्रुडेन्सियल इन्स्योरेन्स परिवारप्रति आभार व्यक्त गरे । उनले यस सहकार्यले खेलाडीको मनोबल बढाउनुका साथै क्लबको दीर्घकालीन विकासमा महत्वपूर्ण सहयोग पुग्ने विश्वास व्यक्त गरे ।
नेपालकी प्राची तोमर ‘मिसेस इन्टरनेशनल ग्लोबल २०२६’ मा चौथो रनरअप
काठमाडौं । मलेसियामा आयोजित ‘मिसेस इन्टरनेशनल ग्लोबल २०२६’ मा नेपालकी प्राची तोमरले चौथो रनरअपको उपाधि जितेकी छिन् । हाउस अफ फेसन नेपालका अनुसार अन्तर्राष्ट्रिय पेजेन्टको मञ्चमा नेपालको प्रतिनिधित्व गर्दै प्राचीले यो उपलब्धि हासिल गरेकी हुन् । प्रतियोगितामा प्राचीले चौथो रनरअपको उपाधिसँगै ‘क्विन अफ एजुकेसन’ को विशेष सबटाइटलसमेत प्राप्त गरेकी छिन् । शिक्षा, ज्ञान, व्यक्तिगत विकास तथा महिलालाई शिक्षामार्फत सशक्त बनाउने विषयमा उनको प्रतिबद्धतालाई सम्मान गर्दै उक्त उपाधि प्रदान गरिएको बताइएको छ । प्रतियोगिताको क्रममा प्राचीले आत्मविश्वास, शालीनता, दृढता र उद्देश्यपूर्ण प्रस्तुतिमार्फत नेपालको प्रतिनिधित्व गरेकी थिइन् । उनको सहभागिताले व्यक्तिगत उपलब्धिसँगै अन्तर्राष्ट्रिय पेजेन्टको मञ्चमा नेपालको उपस्थितिलाई समेत थप बलियो बनाएको हाउस अफ फेसन नेपालले जनाएको छ । प्राचीको यो सफलतालाई नेपाली महिलाका लागि प्रेरणादायी उपलब्धिका रूपमा लिइएको छ । आफ्ना सीमालाई तोड्दै आत्मविश्वासका साथ अघि बढ्न, आफ्नो लक्ष्य पछ्याउन र छुट्टै पहिचान निर्माण गर्न उनको यात्राले प्रेरणा दिने अपेक्षा गरिएको छ । ‘मिसेस इन्टरनेशनल ग्लोबल २०२६’ मा नेपालका तर्फबाट सहभागिता जनाउँदै प्राचीले हासिल गरेको चौथो रनरअपको उपाधि नेपाली फेसन तथा पेजेन्ट क्षेत्रका लागि समेत महत्वपूर्ण अन्तर्राष्ट्रिय उपलब्धिका रूपमा हेरिएको छ ।
सचिव बन्ने पालो नआउँदै अवकाशमा जाँदै दुई सहसचिव
काठमाडौं । सचिवमा बढुवा हुने वरिष्ठताको सूचीमा रहेका दुई सहसचिव पदोन्नति नपाउँदै अनिवार्य अवकाशमा जाने भएका छन्। नेपाल प्रशासन सेवाका सहसचिव हरिशरण पुडासैनी र प्रदीपकुमार कोइराला सचिव बन्ने सम्भावना रहे पनि दरबन्दी कटौती र अवकाशको समयसीमाका कारण उनीहरूको बढुवा अन्योलमा परेको हो। नेपाल प्रशासन सेवामा सचिवको दरबन्दी कटौती नभएको भए पुडासैनी र कोइराला यतिबेलासम्म सचिव भइसकेका हुन सक्थे। तर, सचिवको पद सीमित हुँदा वरिष्ठताका आधारमा बढुवाको पालो कुरिरहेका उनीहरू सहसचिवबाटै अवकाशमा जाने अवस्थामा पुगेका हुन्। सहसचिवको वरिष्ठता सूचीमा जयनारायण आचार्य, ज्ञानेन्द्र पौडेल, प्रदीपकुमार कोइराला र हरिशरण पुडासैनी क्रमशः छन्। पुडासैनी र कोइराला एकै दिन सहसचिव बनेका हुन्। वरिष्ठताका आधारमा सचिव बन्ने सम्भावना रहे पनि रिक्त हुने पद र उनीहरूको अवकाश मितिबीचको अन्तरले बढुवाको अवसर प्रभावित भएको छ। नेपाल प्रशासन सेवाका सचिव कृष्णबहादुर राउत आगामी पुस २० गते अनिवार्य अवकाशमा जाँदैछन्। उनको अवकाशपछि सचिवको एउटा पद रिक्त हुनेछ। तर, उक्त पद रिक्त हुनुअघि नै पुडासैनी सेवाबाट बाहिरिनेछन्। उनी आगामी कात्तिक ६ गते ५८ वर्ष पूरा गरी अनिवार्य अवकाशमा जाँदैछन्। त्यसैले राउतको अवकाशपछि हुने सचिव बढुवाको सिफारिसमा पुडासैनीको नाम पर्ने सम्भावना छैन। कोइरालाका लागि भने सचिव बन्ने सम्भावना अझै बाँकी छ। राउत अवकाशमा गएपछि रिक्त हुने पदमा वरिष्ठताका आधारमा आचार्य, पौडेल र कोइराला बढुवाका लागि सिफारिस हुने सम्भावना छ। त्यसक्रममा कोइराला तेस्रो नम्बरमा पर्नेछन्। तर, वरिष्ठताको नियमित क्रमभन्दा फरक निर्णय गर्दै उनलाई बढुवा गरिए छोटो अवधिका लागि भए पनि सचिव बन्ने अवसर मिल्न सक्छ। यसअघि पद्मकुमार मैनालीको बढुवाको उदाहरण दिँदै प्रशासनिक वृत्तमा कोइरालाको हकमा पनि त्यस्तै निर्णय हुन सक्ने चर्चा छ। त्यसो भए उनी करिब १५ दिनका लागि मात्रै सचिव रहने अवस्था बन्न सक्छ। यद्यपि, उनको बढुवा हुने वा नहुने विषयमा कुनै निर्णय भइसकेको छैन। कोइरालाका लागि सचिव बन्ने अर्को सम्भावित अवसर पनि छ। राष्ट्रपति कार्यालयका सचिव महादेव पन्थ आगामी पुस ३० गते अवकाशमा जानेछन्। उनको अवकाशपछि रिक्त हुने पदमा कोइराला दोस्रो प्राथमिकतामा सिफारिस हुन सक्नेछन्। त्यसपछि लोक सेवा आयोगका सचिव रामेश्वर दंगाल आगामी माघ १६ गते अवकाशमा जाने भएकाले अर्को पद पनि रिक्त हुनेछ। तर, दंगालको अवकाशपछि पद रिक्त हुने समयसम्म कोइराला सेवामा रहने छैनन्। उनी आगामी माघ ६ गते ५८ वर्ष पूरा गरी अनिवार्य अवकाशमा जाँदैछन्। त्यसैले वरिष्ठताको क्रमअनुसार पहिलो प्राथमिकतामा पुग्ने समयअघि नै उनको अवकाश हुनेछ। कोइरालालाई तेस्रो वा दोस्रो प्राथमिकताबाटै बढुवा गरिए मात्र सचिव बन्ने अवसर प्राप्त हुन सक्छ। महत्त्वपूर्ण जिम्मेवारी सम्हालेका पुडासैनी, अवसरको प्रतीक्षामा कोइराला हाल राष्ट्रिय योजना आयोगमा कार्यरत पुडासैनीले ग्वाङझाउस्थित नेपाली महावाणिज्यदूत, भन्सार विभागका महानिर्देशक तथा अर्थ मन्त्रालयको बजेटसम्बन्धी महत्त्वपूर्ण जिम्मेवारी सम्हालिसकेका छन्। सरकारी सेवाका विभिन्न महत्त्वपूर्ण निकायमा काम गर्ने अवसर पाएका उनी सचिवमा बढुवा नभई अवकाशमा जाने अवस्थामा पुगेका हुन्। राष्ट्रिय विपद् जोखिम न्यूनीकरण तथा व्यवस्थापन प्राधिकरणमा कार्यरत कोइरालाले भने राज्यका तर्फबाट त्यति धेरै महत्त्वपूर्ण जिम्मेवारी सम्हाल्ने अवसर नपाएको प्रशासनिक वृत्तमा चर्चा छ। वरिष्ठताका आधारमा सचिव बन्ने सम्भावना रहे पनि अवकाशको मितिले उनको अवसरलाई सीमित बनाएको छ। पुडासैनीको सचिव बन्ने सम्भावना लगभग समाप्त भइसकेको छ भने कोइराला अझै बढुवाको सम्भावनामा छन्। तर, उनको हकमा वरिष्ठताको नियमित क्रमअनुसार पालो कुर्दा सचिव बन्ने अवसर गुम्ने देखिन्छ। यसरी सचिवको दरबन्दी कटौती र अवकाशको समयतालिकाले दुई वरिष्ठ सहसचिवको वृत्तिविकासमा प्रत्यक्ष प्रभाव पारेको छ। पुडासैनी सचिव बन्ने अवसर नपाउँदै सेवाबाट बाहिरिने निश्चितजस्तै छ भने कोइरालाको भविष्य बढुवा सिफारिसमा अपनाइने प्राथमिकता र निर्णयमा निर्भर बनेको छ।
मतदातासँग मत माग्दै गगन थापा
काठमाडौं । नेपाली कांग्रेसका सभापतिका उम्मेदवार गगनकुमार थापाले मतदातासँग मत मागेका छन् । लाइनमा बसेका मतदातासँग उनले मत मागेका हुन् । पार्टीको १५ औँ महाधिशेन गत वर्षको मंसिरमै गर्ने निर्णय केन्द्रीय कार्यसमितिले गत वर्षको असोजमै गरेको भए पनि नेतृत्वले आलटाल गरेपछि पार्टीलाई विधिको शासनमा डोहोर्याउनका लागि विशेष महाधिवेशन गराएरै संविधान सम्मत बनाएर थापा नेतृत्वमा आएका थिए । उनकै नेतृत्वमा पार्टी गत फागुन २१ गतेको प्रतिनिधि सभा निर्वाचनमा होमिएको थियो । उनले यसपालि पनि समयमै महाधिवेशन गराएर पार्टीलाई विधान सम्मत नै अगाडि बढाएका छन् । उनले मत मागिरहँदा मतदाता भने निकै उत्साही देखिए । उनीसँग काठमाडौं ६ का श्यामकृष्ण खड्गीले सभापतिमा प्रतिस्पर्धा गरेका छन् । खड्गी पहिलो पटक केन्द्रीय कार्यसमितिमा चुनाव लडिरहेका हुन् । लामो समयदेखि कांग्रेस राजनीतिमा रहेका गगन थापा भने पहिलो पटक केन्द्रीय सदस्य हुँदा सर्वाधिक मतसहित शीर्ष स्थानमा रहेर चुनाव जितेका थिए । उनी यसअघि महामन्त्रीसमेत भएका थिए । जेन–जी आन्दोलनपछि पार्टी नीति पनि समाज सुहाउँदो परिवर्तन गर्दै लैजानु पर्छ भनी अग्रसर भएका थापा विशेष महाधिवेशन सफल पारी पार्टीलाई यहाँसम्म डोहोर्याएर लिएर आएका छन् । उनले मतदातालाई कसैको भड्काउमा नपरी स्वेच्छाले मतदान गर्न आग्रह गरेका छन् । उनले बिहानमात्रै सामाजिक सञ्जालमा लेख्दै कुनै समूह नबनेको भन्दै बिना दबाब मतदान गर्न आग्रह गरेका हुन् ।
चाडबाड लक्षित सुरक्षा : पोखराका नाकाहरूमा कुकुरसहितको छड्के जाँच
काठमाडौं । नजिकिँदै गरेका चाडपर्वहरूलाई मध्यनजर गर्दै कास्की प्रहरीले पोखरा भित्रने मुख्य नाकाहरूमा सुरक्षा व्यवस्था मजबुत बनाएको छ । आपराधिक गतिविधि नियन्त्रण र लागुऔषध ओसारपसार रोक्ने उद्देश्यका साथ प्रहरीले तालिमप्राप्त कुकुरसहित आकस्मिक ९सप्र्राइज० जाँचलाई तिब्र बनाएको हो । पोखरा अन्य जिल्लाहरूसँग जोड्ने प्रमुख ट्रान्जिटका रूपमा रहेको हुनाले चाडबाडको मौका छोपी हुनसक्ने गैरकानूनी गतिविधि रोक्न प्रहरीले उच्च शतर्कता अपनाएको छ । यसै सिलसिलामा पोखरा महानगरपालिका–२५, हेम्जास्थित सुइखेतमा विशेष सुरक्षा जाँच गरिएको छ । उक्त जाँच अभियानमा गण्डकी प्रदेश प्रहरी कार्यालयको समन्वयमा लागुऔषध र विस्फोटक पदार्थ पत्ता लगाउन सक्ने विशेष तालिमप्राप्त कुकुरहरूको प्रयोग गरिएको छ । कास्की प्रहरीका सूचना अधिकारी एवं प्रहरी नायव उपरीक्षक वीरेन्द्र पासवानकाअनुसार यात्रुहरूको सुरक्षित आवागमन सुनिश्चित गर्न र कुनैपनि आपराधिक घटना हुन नदिन यो अभियान सञ्चालन गरिएको हो । जनपद प्रहरी र ट्राफिक प्रहरीको संयुक्त टोली परिचालन गरी पोखराका विभिन्न संवेदनशील क्षेत्रमा यस्तो जाँच भइरहेको छ । चाडपर्वको अवधिभर यो आकस्मिक सुरक्षा अभियानलाई निरन्तरता दिइने प्रहरीले जनाएको छ । नागरिकलाई निर्धक्क भई यात्रा गर्न र सुरक्षा निकायलाई सहयोग पुर्याउन प्रहरीले आग्रह गरेको छ ।
उखु किसानलाई १ अर्ब ५० करोड अनुदान बाँडिँदै
काठमाडौं । कृषि, वन तथा पर्यावरण मन्त्रालयले उखु किसानलाई १ अर्ब ५० करोड रुपैयाँभन्दा बढी अनुदान वितरण गर्ने भएको छ । उखु उत्पादक किसानलाई प्रोत्साहनस्वरूप उपलब्ध गराइने अनुदान वितरणका लागि आवश्यक कार्यविधि स्वीकृत गरिएको कृषि, वन तथा पर्यावरणमन्त्री गीता चौधरीले जानकारी दिइन् । आर्थिक वर्ष २०८३/८४ मा निकासा भएको १ अर्ब ५० करोड ५० हजार रुपैयाँ बर्दिया, रौतहट, कैलाली, कञ्चनपुरलगायत जिल्लाका उखु किसानलाई वितरण गरिनेछ । उखु खेतीमा किसानलाई प्रोत्साहन गर्ने, कृषि उत्पादकत्व बढाउने र अनुदान लक्षित किसानसम्म पु¥याउने उद्देश्यले सरकारले यो कार्यक्रम सञ्चालन गर्दै आएको छ । सरकारले उखु किसानलाई प्रतिक्विन्टल ७० रुपैयाँ प्रोत्साहन अनुदान उपलब्ध गराउँदै आएको छ ।
शिक्षकलाई सवारी किन्न सरकारले ब्याज तिरिदिने
काठमाडौं । शिक्षकलाई सवारी साधन खरिदमा ब्याज सहुलियत दिने व्यवस्थासहितको शिक्षा (एघारौं संशोधन) नियमावली, २०८३ सहमतिका लागि शिक्षा मन्त्रालयले अर्थ मन्त्रालयमा पठाएको छ। प्रस्तावित व्यवस्थाअनुसार माध्यमिक तह प्रथम श्रेणीका शिक्षकले ५० लाख रुपैयाँसम्म र द्वितीय श्रेणीका शिक्षकले ४० लाख रुपैयाँसम्मको सवारी साधन खरिद गर्न सक्नेछन् । त्यस्तै, माध्यमिक तृतीय श्रेणी, निम्नमाध्यमिक र प्राथमिक तहका सबै श्रेणीका शिक्षकले ४ लाख रुपैयाँसम्मको दुई पाङ्ग्रे सवारी साधन खरिद गर्न सक्ने व्यवस्था प्रस्ताव गरिएको छ । सवारी साधन खरिदका लागि बैंकमार्फत हुने वित्तीय व्यवस्थामा लागत रकमको ८० प्रतिशतसम्मको किस्तागत ब्याज नेपाल सरकारले सहुलियत स्वरूप व्यहोर्ने व्यवस्था नियमावलीमा राखिएको छ । शिक्षकले बाँकी २० प्रतिशत रकम आफैं व्यवस्थापन गरी सवारी साधन खरिद गर्न सक्नेछन् । शिक्षक सेवामा बहाल रहेको अवधिसम्म सम्बन्धित बैंकले निर्धारण गरेको किस्तागत ब्याज सरकारले व्यहोर्ने व्यवस्था गरिएको हो ।
