कांग्रेस महाधिवेशनमा मतदान सुरु, ८१ वर्षीय शोभाचन्द्र बरालले खसाले मत
काठमाडाैं । नेपाली कांग्रेसको १५औँ महाधिवेशनअन्तर्गत नयाँ केन्द्रीय कार्यसमिति चयनका लागि मतदान शुरू भएको छ । ज्येष्ठ महाधिवेशन प्रतिनिधि ८१ वर्षीय शोभाकान्त बरालले गण्डकी प्रदेशमा पहिलो मत खसालेका छन् । मतदानका लागि मतदाता बिहानैदेखि लाइनमा लागेका थिए । अघिल्लो दिन मतदान गर्न नपाएका प्रतिनिधि आज मतदान गर्न पाउने भएपछि उत्साही देखिएका छन् । टाढा घर भएका प्रतिनिधि मतदान सकेर दसैँ मनाउन घर पुग्ने योजनामा छन् । मतदान सुरु भएसँगै कांग्रेस महाधिवेशन प्रतिनिधिमा पुनः उत्साह थपिएको छ । खराब मौसम र प्राविधिक समस्याका कारण मतदानमा ढिलाइ भएको थियो । ढिलो गरी मतदान सुरु गर्दा राति मतदातालाई कठिनाइ हुने भएकाले हिजो अपराह्नदेखि गर्ने भनिएको मतदान आज बिहानका लागि सारिएको निर्वाचन समितिका सदस्य सचिव राजु कटुवालले बताए । मतदाताको स्वास्थ्यलाई ध्यानमा राखेर मतदानको समय सारिएको उनले जानकारी दिए । उनले दिउँसो ३ बजेसम्म मतदान गर्न कसिने बताए । महाधिवेशन प्रतिनिधिको संख्या ७ हजार ३ सय १७ रहेको पनि सदस्य सचिव कटुवालले बताए । निर्वाचन समिति संयोजक वरिष्ठ अधिवक्ता प्रेमबहादुर खड्काले साँझमा मतदान शुरू गर्दा रातभर मतदातालाई अप्ठेरो पर्ने भएकाले त्यसलाई मध्यनजर गर्दै आज बिहानदेखि थालिएको बताए । उनले मतपत्र धेरै भएकाले आफूसँगै ३२ जना वरिष्ठ अधिवक्ताहरूले मतपत्रमा हस्ताक्षर गरेको बताए । उम्मेदवार र मतदाता धेरै भएका कारण मतपत्र छपाइमा ढिलाई भएको थियो । आर्थिक व्यवस्थापन समितिका संयोजक उमेश श्रेष्ठले महाधिवेशन एक दिन लम्बिएको भन्दै महाधिवेशन प्रतिनिधिको शुक्रबारको होटल बसाई खर्च र खाना खर्च पार्टीले नै बेहोर्ने बताए । कुन प्रदेशका प्रतिनिधिले कहाँ मतदान गर्ने ? निर्वाचन समितिले महाधिवेशन प्रतिनिधिको सहजताका लागि विभिन्न मतदान केन्द्र तोकेको छ । प्रतिनिधिहरूले आफूलाई तोकिएको प्रदेश तथा समूहअनुसार सम्बन्धित मतदान केन्द्रमा पुगेर मतदान गर्नुपर्नेछ । राष्ट्रिय सभा गृह, मतदान केन्द्र ‘क’ - बागमती प्रदेश खुलामञ्च, मतदान केन्द्र ‘ख’ - कोशी प्रदेश तथा तराई-मधेस समूह हिमाल हल - गण्डकी प्रदेश तराई–मधेस हल - मधेस प्रदेश पहाड हल - लुम्बिनी, कर्णाली र सुदूरपश्चिम प्रदेश तथा नेपाली जनसम्पर्क समिति र भ्रातृ संस्थातर्फका प्रतिनिधि परिचयपत्र र मतदाता नामावली रुजु गरिने निर्वाचन समितिले मतदानस्थलमा प्रवेश गरेपछि प्रतिनिधिहरूलाई आफूलाई तोकिएको प्रदेश तथा समूहको मतदान केन्द्रमा गई मतदान गर्न आग्रह गरेको छ । मतदान गर्नुअघि प्रत्येक प्रतिनिधिको परिचयपत्र तथा मतदाता नामावली रुजु गरिनेछ। रुजु प्रक्रिया पूरा भएपछि मात्रै प्रतिनिधिलाई मतदान गर्ने व्यवस्था गरिएको छ । निर्वाचन समितिले मतदानस्थलमा मोबाइल फोन लगायत निर्वाचन आचारसंहिताले निषेध गरेका सामग्री लिएर प्रवेश गर्न नपाइने जनाएको छ। प्रतिनिधिहरूले निर्वाचन समितिले तोकेको प्रक्रिया पूरा गरेर मात्रै मतदान गर्न पाउनेछन् । मतदानपछि मतगणना निर्वाचन समितिले मतदान सम्पन्न भएपछि मतगणना शुरू गर्ने जनाएको छ । मतदान सकिएपछि मतपेटिका सुरक्षित रूपमा व्यवस्थापन गरी आवश्यक प्रक्रिया पूरा गरेर मतगणना अघि बढाइनेछ । आजै मतगणना थालिने तयारी गरिएको समितिले जनाएको छ । मतगणना सम्पन्न भएपछि निर्वाचन परिणाम सार्वजनिक गरिने निर्वाचन समितिले जनाएको छ। त्यससँगै कांग्रेसको १५औँ महाधिवेशनबाट नयाँ केन्द्रीय नेतृत्व चयन हुनेछ । १५औँ महाधिवेशनले विधान संशोधन गर्दै नेपाली कांग्रेसको केन्द्रीय कार्यसमिति २९७ सदस्यीय बनाएको छ। नयाँ संरचनाअनुसार निर्वाचित हुने पदाधिकारी तथा केन्द्रीय सदस्यले आगामी कार्यकालका लागि पार्टीको नेतृत्व सम्हाल्नेछन् । महाधिवेशनको निर्वाचनमा सभापतिसहित प्रमुख पदमा प्रतिस्पर्धा रहेकाले मतदानलाई कांग्रेसको नयाँ नेतृत्व चयनका लागि महत्वपूर्ण मानिएको छ । प्रतिनिधिहरूको मतदानपछि आउने परिणामले पार्टीको आगामी राजनीतिक दिशा र संगठनात्मक नेतृत्वसमेत तय गर्नेछ ।
मेरो नाम जोडिएका उम्मेदवारको सूची आधिकारिक होइन: गगन थापा
काठमाडौं । नेपाली कांग्रेसका सभापति गगन थापाले आफ्नो नाम जोडेर प्रचार गरिएका उम्मेदवारको सूचीलाई आधिकारिक समर्थन वा सिफारिसका रूपमा नबुझ्न महाधिवेशन प्रतिनिधिहरूलाई आग्रह गरेका छन् । कांग्रेसको १५औँ महाधिवेशनअन्तर्गत केन्द्रीय कार्यसमिति चयनका लागि मतदान सुरु भएपछि थापाले पार्टीभित्र कुनै पनि प्यानल वा गुट नरहेको स्पष्ट पारेका हुन् । विभिन्न उम्मेदवारको सूचीलाई आफ्नो नामसँग जोडेर प्रचार गरिएकोप्रति ध्यानाकर्षण गराउँदै उनले त्यस्ता सूचीलाई आफ्नो आधिकारिक समर्थनका रूपमा नलिन आग्रह गरे । उनले कुनै पनि अफवाहमा नलाग्नसमेत महाधिवेशन प्रतिनिधिहरूलाई भनेका छन् । थापाले महाधिवेशन प्रतिनिधिहरूलाई कुनै भ्रम वा प्रभावमा नपरी पार्टीको सर्वोपरि हितलाई ध्यानमा राखेर स्वतन्त्र विवेक, मूल्याङ्कन र विश्वासका आधारमा मतदान गर्न आग्रह गरेका छन् । उनले यसपटकको निर्वाचनलाई पार्टीभित्रको स्वस्थ आन्तरिक लोकतान्त्रिक अभ्यासका रूपमा व्याख्या गर्दै प्रतिनिधिहरूलाई मर्यादित, संयमित र उत्साहपूर्ण ढङ्गले सहभागी हुन आह्वान गरेका छन् । बिहीबारका लागि तय भएको निर्वाचन प्राविधिक कारणले एक दिन ढिलो भएको उल्लेख गर्दै थापाले त्यसबाट महाधिवेशन प्रतिनिधिहरूमा पर्न गएको असुविधाप्रति क्षमासमेत मागेका छन् । प्रतिनिधिहरूको विवेकपूर्ण निर्णयले पार्टी सङ्गठनलाई नयाँ उचाइमा पुर्याउने विश्वाससमेत उनले व्यक्त गरेका छन् ।
४ जना जनप्रतिनिधिले छाडे नेकपा एमाले
काठमाडौं । नेकपा एमालेबाट दल त्याग गरेको भन्दै निर्वाचन आयोगले चार जना स्थानीय जनप्रतिनिधिको पद रिक्त भएको घोषणा गरेको छ । आयोगले २०७९ सालको स्थानीय तह निर्वाचनमा एमालेबाट निर्वाचित भएका भोजपुर र कपिलवस्तुका चार जनप्रतिनिधिको पद रिक्त भएको जानकारी दिएको हो । आयोगका अनुसार भोजपुर नगरपालिकाकी उपप्रमुख निर्मला शेर्पा र वडा नम्बर ८ का अध्यक्ष नवीन प्रधानको पद रिक्त भएको छ । त्यस्तै, कपिलवस्तुको विजयनगर गाउँपालिकाकी उपाध्यक्ष लक्ष्मीकुमारी चौधरी र वडा नम्बर ५ का अध्यक्ष अनवर मोमम्द मुसलमानको पदसमेत रिक्त भएको छ । राजनीतिक दलसम्बन्धी ऐन, २०७३ को दफा ३२ को उपदफा (१) र राजनीतिक दलसम्बन्धी नियमावली, २०७४ को नियम २२ बमोजिम दल त्याग गरेको जानकारी सम्बन्धित दलको केन्द्रीय समितिले आयोगलाई गराउनुपर्ने व्यवस्था छ । एमालेको केन्द्रीय सचिवालयको निर्णयको प्रतिलिपिसहित ती जनप्रतिनिधिले पार्टीको विधानविपरीत कार्य गरी दल परित्याग गरेको जानकारी आयोगमा प्राप्त भएको थियो । सोही आधारमा आयोगले असोज २२ गते उनीहरू निर्वाचित भएका स्थानीय तहका पद रिक्त भएको निर्णय गरेको जनाएको छ ।
दशैंका लागि अग्रिम टिकट बुकिङ खुला, रातिदेखि नै यात्रुको लाइन
काठमाडौं । दशैंमा घर जाने यात्रुलाई लक्षित गर्दै सरकारले आजदेखि अग्रिम बस टिकट बुकिङ खुला गरेको छ । टिकट पाउन सहज हुने अपेक्षासहित यात्रुहरू गएरातिदेखि नै काठमाडौंको नयाँ बसपार्कस्थित टिकट काउन्टरमा लाइन बसेका छन् । यातायात व्यवस्था विभाग, नेपाल प्रहरी, यातायात व्यवसायी तथा मजदुरबीच असोज २० गते मंगलबार विभागमा बसेको बैठकले असोज २३ गतेदेखि दशैंका लागि अग्रिम टिकट बुकिङ खुला गर्ने निर्णय गरेको थियो । केही जिल्लाका यात्रु भने टिकट लिन बिहीबार रातिदेखि नै लाइनमा बसेका छन् । नयाँ बसपार्क सञ्चालन गर्दै आएको लोत्से बहुउद्देश्यीय प्रालिका महाप्रबन्धक पंकज मल्लका अनुसार सुदूरपश्चिमका विभिन्न जिल्लामा जाने यात्रु बिहीबार राति ९ बजेदेखि नै टिकट काउन्टर अगाडि लाइनमा बसेका थिए । दशैंको अग्रिम टिकट बुकिङलाई व्यवस्थित बनाउन लोत्से बहुउद्देश्यीय प्रालिले नयाँ बसपार्क क्षेत्रमा १५ वटा काउन्टर थप गरेको जनाएको छ । यात्रुको चापलाई ध्यानमा राख्दै आवश्यक सुरक्षा प्रबन्धसमेत मिलाइएको कम्पनीले जनाएको छ ।
नयाँ कार्यसमिति चयनका लागि आज मतदान, ७ हजार ३१७ प्रतिनिधिले मत हाल्ने
काठमाडौं । नेपाली कांग्रेसको १५औँ महाधिवेशनअन्तर्गत नयाँ केन्द्रीय कार्यसमिति चयनका लागि आज शुक्रबार मतदान हुँदैछ । बिहीबारका लागि तय गरिएको मतदान आवश्यक तयारी पूरा नभएको भन्दै आजका लागि सारिएको हो । निर्वाचन समितिले आज बिहान ७ बजेदेखि मतदान सुरु हुने जनाएकाे छ । आवश्यक तयारी पूरा भए पनि साँझ मतदान सुरु गर्दा रातिको समयमा मतदातालाई कठिन हुने भएकाले बिहानदेखि मतदान गर्ने निर्णय गरिएको हाे । महाधिवेशनमा ७ हजार ३१७ जना प्रतिनिधि सहभागी छन् । प्रत्येक प्रतिनिधिले २३ वटा मतपत्रमा मतदान गर्नुपर्नेछ । मतदानस्थल निर्माणमा संलग्न व्यक्तिहरूका अनुसार एक जनालाई मतदान गर्न करिब ३० मिनेट लाग्ने अनुमान छ । बिहान ७ बजेदेखि मतदान सुरु भए दिउँसो ३ बजेसम्म सम्पन्न हुने निर्वाचन समितिको अनुमान छ । निर्वाचन समितिले मतदानका लागि प्रदर्शनी मार्गस्थित राष्ट्रिय सभागृह र खुलामञ्चमा मतदान केन्द्र स्थापना गरेको छ । राष्ट्रिय सभागृहमा बागमती प्रदेशका प्रतिनिधिले मतदान गर्नेछन् । खुलामञ्चमा भने बाँकी छ प्रदेशका साथै विदेशस्थित नेपाली जनसम्पर्क समितिबाट निर्वाचित भएर आएका महाधिवेशन प्रतिनिधिले मतदान गर्नेछन् । खुलामञ्चस्थित तराई–मधेश हलमा कोशी र मधेश प्रदेशका प्रतिनिधिले मतदान गर्नेछन् । हिमाल हलमा गण्डकी प्रदेशका प्रतिनिधिका लागि मतदानको व्यवस्था गरिएको छ । त्यस्तै, पहाड हलमा लुम्बिनी, कर्णाली र सुदूरपश्चिम प्रदेशका साथै जनसम्पर्क समितिबाट आएका प्रतिनिधिले मतदान गर्ने निर्वाचन समितिले जनाएको छ । मतदानअघि प्रत्येक प्रतिनिधिको परिचयपत्र र मतदाता नामावली रुजु गरिनेछ । रुजु प्रक्रिया पूरा भएपछि मात्रै मतदान गर्न दिइने समितिले जनाएको छ । मतदान सम्पन्न भएपछि मतपेटिका सङ्कलन गरी ललितपुरको सानेपास्थित पार्टी केन्द्रीय कार्यालयमा लगिने र त्यहीँ मतगणना सुरु गरिने निर्वाचन समितिले जनाएको छ ।
महिला चिकित्सकलाई वित्तीय व्यवस्थापनसम्बन्धी ज्ञान अभिवृद्धि गर्न साक्षरता कार्यक्रम
काठमाडौं । कामना सेवा विकास बैंकको सहकार्यमा नेपाल चिकित्सक संघले महिला चिकित्सकका लागि वित्तीय साक्षरता कार्यक्रम सम्पन्न गरेको छ । नेपाल चिकित्सक संघको आयोजनामा बिहीबार सम्पन्न भएको कार्यक्रममा ६० भन्दा बढी महिला चिकित्सकको सहभागिता थियो । कार्यक्रममा वित्तीय व्यवस्थापन, बजेट निर्माण, बचत, लगानी तथा कर व्यवस्थापनसम्बन्धी ज्ञान र सीप अभिवृद्धि गर्ने विषयमा प्रशिक्षण तथा अन्तरक्रिया गरिएको थियो । नेपाल चिकित्सक संघका अध्यक्ष डा. बद्री रिजालको अध्यक्षतामा सम्पन्न कार्यक्रममा प्रशिक्षकहरूले प्रस्तुतीकरण, अन्तरक्रिया तथा व्यावहारिक सहजीकरणमार्फत सहभागी चिकित्सकलाई वित्तीय व्यवस्थापनका विभिन्न पक्षबारे जानकारी दिएका थिए । कार्यक्रमको सुरुवात गर्दै डा. सुजिता हिराचनले चिकित्सकका लागि वित्तीय व्यवस्थापन, बजेट निर्धारण तथा कर व्यवस्थापनको आवश्यकता र महत्त्वबारे प्रकाश पारेकी थिइन् । कार्यक्रममा वित्तीय साक्षरतासम्बन्धी विषयमा डा. अनुपमा सङ्ग्रौला तथा कामना सेवा विकास बैंकका डिजिटल अपरेसन विभाग प्रमुख जिनुसा पलिखे श्रेष्ठ र कर्जा अधिकृत सूर्यकान्त न्यौपानेले सहजीकरण गरेका थिए । उनीहरूले व्यक्तिगत वित्तीय योजना, बजेट निर्माण, बचत, लगानी, कर व्यवस्थापन तथा दीर्घकालीन वित्तीय सुरक्षालगायत विषयमा व्यावहारिक जानकारी दिएका थिए । कार्यक्रममा अध्यक्ष डा. रिजालले चिकित्सकले आफ्नो पेसासँगै वित्तीय व्यवस्थापनलाई पनि उत्तिकै प्राथमिकता दिनुपर्ने बताए । उनले चिकित्सकको व्यावसायिक जीवनसँगै व्यक्तिगत तथा पारिवारिक आर्थिक सुरक्षाका लागि वित्तीय ज्ञान र व्यवस्थित वित्तीय योजना महत्त्वपूर्ण रहेको उल्लेख गरे । कार्यक्रम सफल बनाउन सहयोग गरेकोमा कामना सेवा विकास बैंकसहित सम्बन्धित सबै पक्षलाई उनले धन्यवाद दिए । कार्यक्रम संयोजक डा. निशा आचार्यले महिला चिकित्सकका लागि वित्तीय साक्षरता महत्त्वपूर्ण र आवश्यक विषय भएकाले यस्ता कार्यक्रमले आर्थिक निर्णय क्षमता अभिवृद्धि गर्न सहयोग पुग्ने बताइन् । महिला चिकित्सकको व्यावसायिक विकाससँगै आर्थिक सशक्तीकरण र वित्तीय सचेतना अभिवृद्धि गर्ने उद्देश्यले आयोजना गरिएको कार्यक्रमले सहभागीलाई आम्दानीको उचित व्यवस्थापन, भविष्यका लागि वित्तीय योजना निर्माण तथा आर्थिक निर्णय लिन थप सक्षम बनाउने बैंकले विश्वास व्यक्त गरेको छ । कामना सेवा विकास बैंकले वित्तीय पहुँच, वित्तीय साक्षरता तथा वित्तीय समावेशीकरण अभिवृद्धिका लागि विभिन्न कार्यक्रम सञ्चालन गर्दै आएको जनाएको छ । आगामी दिनमा पनि नेपाल सरकारले लिएको लक्ष्य प्राप्तिमा सहयोग पुग्ने गरी यस्ता कार्यक्रमलाई निरन्तरता दिने बैंकले प्रतिबद्धता जनाएको छ ।
युक्रेन : यात्रुबाहक बसमा रुसी हमला, ३३ जनाको मृत्यु
काठमाडौं । युक्रेनको क्रामातोर्स्क सहरमा यात्रुबाहक दुई बसलाई लक्षित गरी रुसी ग्लाइड बम हमला भएको छ । उक्त हमलामा ३३ जनाको मृत्यु भएको र १८ जना घाइते भएको अधिकारीहरूले जनाएका छन् । डोनेत्स्क क्षेत्रका प्रमुख वादिम फिलाश्किनका अनुसार रुसी सेनाले सर्वसाधारण यात्रु सवार बसलाई निशाना बनाएर हमला गरेको हो । उनले धेरैभन्दा धेरै सर्वसाधारणको ज्यान लिने उद्देश्यले बसलाई लक्षित गरिएको आरोप लगाएका छन् । स्थानीय अधिकारीहरूले सार्वजनिक गरेका तस्बिरमा सडकमा छरिएको भग्नावशेष र आगलागी भएको बस देखिएको छ । क्रामातोस्र्क र छिमेकी सहर स्लोभियांस्क रुसी सेनाले कब्जा गर्ने प्रयास गरिरहेको किल्लाबन्दी गरिएको क्षेत्रमा पर्छन् । रुसी राष्ट्रपति भ्लादिमिर पुटिनले युक्रेनको औद्योगिक क्षेत्र डोनबासमाथि आफ्नो दाबी गर्दै आएका छन् । रुसले भने पछिल्लो हमलाबारे अहिलेसम्म कुनै प्रतिक्रिया जनाएको छैन । यो घटना युक्रेनभर रुसी हमलामा वृद्धि भइरहेका बेला भएको हो । संयुक्त राष्ट्रसंघका अनुसार सन् २०२६ को अगस्टसम्म युक्रेनमा रुसी हमलामा मारिएका सर्वसाधारणको संख्या सन् २०२५ को पूरै वर्षमा मारिएका सर्वसाधारणको संख्याभन्दा बढी भइसकेको थियो ।
डोलेश्वर भिलेजको ११ औं साधारणसभा सम्पन्न, १६ लाख कित्ता आईपीओ ल्याउने
काठमाडौं । डोलेश्वर भिलेज रिसोर्ट एण्ड फार्म हाउस लिमिटेडले आफ्नो जारी पुँजीको ३० प्रतिशत आईपीओ निष्कासन गर्ने तयारी गरेको छ । कम्पनीले १६ लाख २० हजार कित्ता आईपीओ निष्कासनको अनुमति माग्दै नेपाल धितोपत्र बोर्ड (सेबोन) मा आवेदनसमेत दिइसकेको जनाएको छ । बिहीबार सम्पन्न कम्पनीको ११औं वार्षिक साधारणसभाले आईपीओ निष्कासनसम्बन्धी प्रस्ताव अघि बढाएको हो । साधारणसभाले रामनाथ मैनाली, बुद्धिप्रसाद पोखरेल, डोरबहादुर भण्डारी, सृष्टि पोखरेल, छविलाल लुइँटेल र ध्रुवराज पोख्रेललाई सञ्चालकमा निर्विरोध निर्वाचित गरेको छ । निर्वाचित सञ्चालक समितिको पहिलो बैठकले रामनाथ मैनालीलाई अध्यक्ष तथा टिकाध्वज भण्डारीलाई स्वतन्त्र सञ्चालकमा चयन गरेको छ । २०७२ सालदेखि सञ्चालनमा रहेको रिसोर्टले आईपीओबाट प्राप्त पुँजीलाई व्यवसाय विस्तार तथा पूर्वाधार विकासमा परिचालन गर्ने योजना बनाएको छ । कम्पनीले रिसोर्टलाई चारतारे स्तरमा स्तरोन्नति गर्दै थप आवासीय कोठा, स्विमिङ पुल, स्पा, ज्याकुजी, सेमिनार हल तथा मनोरञ्जन क्षेत्र विस्तार गर्ने जनाएको छ । कम्पनीले पर्यटन व्यवसायसँगै कृषि, ऊर्जा, उद्योग, पूर्वाधार, स्वास्थ्य, शिक्षा लगायतका उत्पादनशील क्षेत्रमा समेत लगानी विस्तार गर्ने लक्ष्य लिएको छ । यसबाट व्यवसायको दायरा विस्तार गर्दै शेयरधनीलाई उचित प्रतिफल दिने कम्पनीको योजना छ ।
