राधी विद्युतको सेयर बाँडफाँट, कट अफ प्राइस १९५ रुपैयाँ
काठमाडौं । राधी विद्युत कम्पनीको अवितरित हकप्रद सेयर बाँडफाँट गरिएको छ । कम्पनीले कात्तिक २९ गतेदेखि मंसिर ८ गतेसम्म सर्वसाधारण समूह तर्फको १३ लाख ५२७ कित्ता अवितरित हकप्रद सेयर शिलबन्दी बोलपत्रद्धारा खरिद आह्वान गरेको थियो । उक्त अवधिमा परेको आवेदन मंसिर १४ गतेका दिन खोली मंसिर १६ गते निष्काशनकर्ता कम्पनीको संचालक समितिले बाँडफाँट गरेको कम्पनीले जनाएको छ । बाँडफाँटमा नपरेको सेयर वापतको रकम फिर्ता भुक्तानी मंसिर २० गतेदेखि आवेदकहरुले आवेदन फाराममा उल्लेख गरेको बैंक र वित्तीय संस्थाको खातामा आईपीएसमार्फत रकमान्तर गरिने कम्पनीले बताएको छ । साथै आफ्नो खातामा रकम जम्मा भए नभएको एकिन गरि रकम जम्मा नभएको खण्डमा मुक्तिनाथ क्यापिटलमा सम्पर्क राख्न हुन कम्पनीले आग्रह गरेको छ । बाँडफाटको अन्तिम मूल्य (कट अफ प्राइस) १९५ रुपैयाँ रहेको छ । उक्त मूल्यमा बोलपत्र पेश गर्नेहरूको हकमा सापेक्षिक भार अनुसार समानुपातिक रुपमा बाँडफाँट गरिएको कम्पनीले बताएको छ । बाँडफाँटको विवरण बिक्री प्रबन्धक मुक्तिनाथ क्यापिटलको वेभसाइटमा हेर्न सकिनेछ ।
अजोड इन्स्योरेन्सको सेयर कारोबार फुकुवा
काठमाडौं । नेपाल स्टक एक्सचेञ्ज(नेप्से) ले अजोड इन्स्योरेन्सको सेयर कारोबार फुकुवा गरेको छ । प्रुभु इन्स्योरेन्ससँग मर्जरको लागि प्रकृियामा गएपछि अजोडको सेयर कोरोबार मंसिर ११ गतेदेखि रोक्का भएको थियो । नेप्सेले संस्थागत सेयरधनी बाहेकको सेयरधनीको सेयर कारोबार मंसिर १९ गतेदेखि लागु हुने गरी खुला गरेको छ ।
सानिमा बैंकको सेयर मूल्य समायोजन, कतिमा खुल्छ कारोबार ?
काठमाडौं । सानिम बैंकको सेयर मूल्य समायोजन भएको छ । बैंकले दिन लागेको १० प्रतिशत बोनस सेयरपछि सेयर मूल्य समायोजन भएको हो । आइतबार बन्द भएको कारोबारलाई आधार मान्दै नेपाल स्टक एक्सचेञ्जले सानिमा बैंकको नयाँ सेयर मूल्य २४७.१८ रुपैयाँ तोकिदिएको छ । बैंकको यसअघि सेयर मूल्य प्रतिकित्ता २७१.९० रुपैयाँ थियो ।
