सुनकोसी-मरिण डाइभर्सन आयोजनाको नयाँ ठेक्का प्रक्रिया रद्द
काठमाडौं । सुनकोसी-मरिण डाइभर्सन बहुउद्देश्यीय आयोजनाको बाँध, विद्युत् गृह तथा सम्बन्धित संरचना निर्माणका लागि आह्वान गरिएको नयाँ ठेक्का प्रक्रिया रद्द गरिएको छ । आयोजनाले एक सार्वजनिक सूचना जारी गर्दै सिभिल, हाइड्रोमेकानिकल कम्पोनेन्ट तथा सम्बन्धित संरचना निर्माणका लागि गत जुन ८ मा आह्वान गरिएको अन्तर्राष्ट्रिय बोलपत्र रद्द गरिएको जानकारी दिएको हो । नयाँ ठेक्का प्रक्रियामा सहभागी कम्पनीहरूमध्ये प्राविधिक रूपमा योग्य ठहरिएका तीनवटा कम्पनीको आर्थिक प्रस्ताव आगामी सोमबार (कात्तिक १६ गते) खोल्ने अन्तिम तयारी भइरहेका बेला आयोजनाले यो अप्रत्यासित निर्णय लिएको हो । आयोजनाद्वारा प्रकाशित सूचनामा सार्वजनिक खरिद ऐन, २०६३ को दफा ३(२) बमोजिम बोलपत्र रद्द गरिएको उल्लेख गरिए पनि ठेक्का रद्द गर्नुको विस्तृत र स्पष्ट कारण भने खुलाइएको छैन । यसअघि बाँध र विद्युत् गृह निर्माणको जिम्मा पाएको रमण-पटेल संयुक्त उपक्रमले काममा अपेक्षित प्रगति गर्न नसकेको भन्दै आयोजनाले २०८२ कात्तिक २५ गते साविकको ठेक्का तोडेको थियो । त्यसपछि बाँकी रहेका अधूरा कामहरूलाई निरन्तरता दिनका लागि पुनः नयाँ अन्तर्राष्ट्रिय बोलपत्र आह्वान गरिए तापनि सो प्रक्रिया समेत रद्द भएपछि आयोजना निर्माण कार्य थप अन्योलमा परेको छ । उक्त आयोजनाका निर्देशक इन्जिनियर कृष्णप्रसाद रिजाल र जलस्रोत तथा सिँचाइ विभागका महानिर्देशक इन्जिनियर दिनेश रजौरियालाई प्रहरीले यसअघि नै नियन्त्रणमा लिएको थियो ।
पहिरोका कारण ५ स्थानका सडक अवरुद्ध
काठमाडौं । देशका विभिन्न स्थानमा गएको बाढी र पहिरोका कारण गोरखा, काभ्रेपलाञ्चोक र सुर्खेतका प्रमुख सडक खण्डहरू पूर्ण रूपमा अवरुद्ध भएका छन् । गोरखाको आरुघाट गाउँपालिका-२ र ३ जोड्ने सोतीस्थित बुढीगण्डकी नदीमा रहेको फलामे मोटरेबल पुल बाढीले बगाएपछि ती दुई वडाहरूबीचको सडक सम्पर्क विच्छेद भएको छ । यस्तै, काभ्रेपलाञ्चोकको रोशी गाउँपालिका-९ स्थित पिन्थली र वडा नं ८ को गिम्दीबेँसीमा पहिरो खसेपछि बीपी राजमार्ग पूर्ण रूपमा अवरुद्ध बनेको छ भने सुर्खेतको बराहताल गाउँपालिका-७ स्थित औलिसेमा सुक्खा पहिरो खस्दा कर्णाली राजमार्गको यातायात सेवा पनि ठप्प भएको छ । यसैबीच, सम्भावित बाढी तथा पहिरोको जोखिमलाई मध्यनजर गर्दै मकवानपुर र ललितपुर जोड्ने कान्ति लोकपथमा रातिको समयमा सवारी साधन आवागमनमा रोक लगाइएको छ ।
पहिरो र लेदो खस्दा बिपी राजमार्ग अवरुद्ध
काठमाडौं । काभ्रेपलाञ्चोकमा पहिरो र लेदो खस्दा बीपी राजमार्ग पूर्ण रूपमा अवरुद्ध भएको छ । जिल्ला प्रहरी कार्यालय काभ्रेपलाञ्चोकका अनुसार राजमार्गअन्तर्गत रोशी गाउँपालिका-९ पिन्थलीमा खहरे खोलाबाट ढुङ्गा र माटोसहितको लेदो सडकमा आएको छ भने रोशी गाउँपालिका-८ गिम्दीबेसीमा पनि लगातार पहिरो खसिरहेको छ । सडक दुवैतर्फ पूर्ण रूपमा बन्द भएपछि र अझै पनि पहिरो तथा लेदो झर्ने उच्च जोखिम कायम रहेकाले प्रहरीले बीपी राजमार्ग हुँदै यात्रा गर्ने तयारीमा रहेका सबै यात्रुलाई तत्काल यात्रा सुरु नगर्न अनुरोध गरेको छ । सडक खुल्नेबारे आधिकारिक जानकारी नआएसम्म जोखिम मोलेर यात्रा नगर्न र सुरक्षित स्थानमै बस्न सम्बन्धित निकायले सबैमा आग्रह गरेको छ ।
