दुई चालक नराख्ने ४५ सवारी साधन कारवाहीमा, कानून नमान्नेलाई १ हजार जरिवाना
काठमाडौँ । महानगरीय ट्राफिक प्रहरी महाशाखाले लामो दूरीका सार्वजनिक सवारीसाधनमा दुई चालक नराख्ने ४५ सवारी साधनलाई कारवाही गरेको छ । महाशाखाको टोलीले लामो दूरीका सवारी साधनमा अनिवार्यरूपमा दुई चालक राख्नुपर्ने कानूनलाई अवज्ञा गर्ने सार्वजनिक सवारी साधनका चालकलाई नागढुङ्गामा जाँचका क्रममा कारवाही गरेको हो । प्रहरी प्रधान कार्यालय, राजमार्ग सुरक्षा तथा ट्राफिक निर्देशनालयले माघ २७ गतेदेखि लामो दूरीमा चल्ने यात्रुवाहक सार्वजनिक सवारी साधनमा दुई सवारीचालक राखे/नराखेको जानकारी लिन ‘ट्राफिक कम्युनिकेशन एप्स’ सञ्चालमा ल्याएको थियो । महाशाखाका प्रमुख एवं प्रहरी वरिष्ठ उपरीक्षक वसन्त पन्तले यातायात व्यवस्था ऐन, २०४९ मा उल्लेख भएअनुसार लामो दूरीका सवारी साधनमा दुई चालक राख्नुपर्ने कानूनी व्यवस्थालाई सुनिश्चित गर्न एप्स सञ्चालनमा ल्याएको बताउँदै उक्त कानून नमान्ने सवारी साधनलाई कारवाही गरिएको जानकारी दिए । निर्देशनालयले लामो दूरीका सवारीचालक, बस नम्बर तथा प्रस्थान समय इन्टरनेटको सर्भरमा राखेर एप्समार्फत हेर्ने व्यवस्था मिलाएको थियो । उक्त एप्स सञ्चालनसँगै सवारी दुर्घटना न्यूनीकरण हुने बताइएको छ । उक्त एप्स पहिलो चरणमा काठमाडौँको नागढुङ्गामा, प्रदेश नं २ को सर्लाहीको कर्मैया र प्रदेश नं ५ को बाँकेको कोहलपुरमा एप्स सञ्चालनमा ल्याइएको थियो । कानून नमान्ने सवारी साधनलाई एक हजार जरिवाना गरेको महाशाखाले जनाएको छ । रासस
सुजुकी बर्गम्यान १२५ सीसी स्कूटरको बिक्री शुरु, भैरहवामा शोरुम उद्घाटन
काठमाडौँ । भैरहवामा सुजुकी बर्गम्यान १२५ सीसी स्कूटरको बिक्री शुरु भएको छ । फागुन ७ गते सुजुकी टु ह्वीलर्सको लागि शोरुम पनि उद्घाटन भएको छ । भैरहवा लुम्बिनी गेट नजिकै सिद्धार्थ मोटर्सबाट सो स्कूटरको बिक्री शुरु गरिएको छ । पत्रकार सम्मेलन गरी शोरुम उद्घाटन र सुजुकी बर्गम्यान बिक्री शुभारम्भ तथा र्याली सम्पन्न गरेको कम्पनीले जनाएको छ । भैरहवा उद्योग बाणिज्य संघका अध्यक्ष कुलप्रसाद न्यौपाने सुजुकी बर्गम्यान १२५ सीसीको बिक्री शुभारम्भ साथै शोरुम उद्घाटन भएको हो । विशिष्ट अतिथिहरुमा लाइन्स कल्ब अफ सिदार्थ नगर का अध्यक्ष थिरिन्द्र श्रेष्ठ , प्रहरी अफिसर नारद कार्की, सिदार्थ बैंकका भैरहवा शाखा म्यानेजर जीबन घिमिरे, मुक्तिनाथ बिकास बैंकका म्यानेजर बिकल छेत्रीको उपस्थिति रहेको थियो । कार्यक्रममा भी जी सुजुकी कम्पनीका एरिया सेल्स म्यानेजर धनीराम भुसाल र भी जी सुजुकीका मार्केटिंग म्यानेजर नबराज कोइरालाले पनि दैनिक जीबनमा मानबको लागी स्कूटर जीबन साथी जस्तै भएको बताए । कार्यक्रममा सुजुकी भैरहवा को सुजुकी बिक्रेता सिद्धार्थ मोटर्सका अध्यक्ष दिनेसमान अमात्यले कार्यक्रमको सभापतित्व गरेका थिए । आकर्षक तथा सुविधाजनक यो स्कूटर म्याक्सी–स्कूटर हो, जसमा १४ इन्च आकारको ट्युबलेस ठूला टायरहरु छन्, सुजुकी बर्गम्यान १२५ मा ७५०० आरपिएममा ८.७ बिएचपिको शक्ति उत्पादन गर्ने क्षमता बोकेको १२५ सिसिको शक्तिशाली इन्जिन जडित छ । स्कूटरको अग्र भागमा डिस्क ब्रेक छ भने ५.६ लिटर क्षमताको प्रेट्रोल अट्ने क्षमता राख्दछ । डिजिटल ड्यासबोर्ड रहेको यो स्कूटरमा एलइडि हेड लाइट, एलइडि टेल ल्याम्प जडान गरिएका छन् । फरक खालको बनावटको कारणले यो स्कुटर अत्यन्त आकर्षक देखिनुका साथै बाक्लो र विस्तारित सिटले यसलाई चलाउँदा छुट्टै प्रकारको अनुभूति महशुस हुन्छ । यो स्कूटर १२५ सिसिका स्कूटरहरुको समूहमा एक बेन्चमार्कको रुपमा स्थापित हुने सिद्धार्थ मोटर्स भैरहवाका अध्यक्ष दिनेशमान अमात्य बताए । हाल यसको नेपालको बजार मूल्य २ लाख २९ हजार ९ सय रुपैयाँ कायम गरिएको छ ।
होन्डाले बेलायतको प्लान्ट बन्द गर्ने, ३५ सयको रोजगारी जोखिममा
टोकियो । कार निर्माता कम्पनी होन्डाले मङ्गलबार बेलायतको एउटा ठूलो मोटर उत्पादन कारखाना (प्लान्ट) बन्द गर्ने घोषणा गरेको छ । कम्पनीले प्लान्ट बन्द भएसँगै करिब तीन हजार ५०० जनाको रोजगारी गुम्ने सम्भावना रहेको जनाएको छ । इङ्ल्यान्डको दक्षिणपश्चिम स्वीन्डोनमा रहेको प्लान्ट होन्डाको युरोपेली युनियनमा रहेको एक मात्र प्लान्ट हो । यो प्लान्टबाट होन्डाको “सिभिक” मोडेलको कार विगत २४ वर्षदेखि उत्पादन हुँदै आएको थियो । यस प्लान्टबाट वार्षिक करिब एक लाख ५० हजार कार उत्पादन हुने गर्दछन् । यो प्लान्ट सन् २०२१ देखि पूर्ण रुपमा बन्द हुनेछ, होन्डाले घोषणा गरेको छ । युरोपेली क्षेत्रका प्रमुख अधिकृत काट्सुसी इनोउले एक विज्ञप्ति जारी गरी कम्पनीको यो निर्णय निकै कष्टपूर्ण रहेको बताए । गत वर्ष होन्डाका युरोपेली वरिष्ट उपाध्यक्ष इयान हावेल्सले बिना सम्झौता युरोपेली युनियनबाट बेलायतको बहिर्गमन भएमा त्यसले कम्पनीलाई करोडौं पाउन्ड घाटा हुने बताएका थिए । रासस÷एएफपी
