नारायणगढ–बुटवल सडक धमाधम कालोपत्र हुँदै
नवलपुर । विस्तारका क्रममा रहेको पूर्वपश्चिम राजमार्गको नारायणगढ–बुटवल खण्डमा धमाधम कालोपत्र भइरहेको छ । गैँडाकोटको भेडाबारी क्षेत्रमा गरिएको परीक्षण सफल भएपछि कावासोती क्षेत्रमा हाल कालोपत्रको काम भइरहेको छ । सडक निर्माण कम्पनी चाइना स्टेट कन्स्ट्रक्सन इञ्जीनियरिङ कर्पोरेशन लिमिटेडका ठेक्का व्यवस्थापक राजेश झाले हालसम्म तीन किलोमिटरभन्दा बढी सडक कालोपत्र गरिएको जानकारी दिए । ‘हामीले यस वर्ष २० किलोमिटरभन्दा बढी कालोपत्र गर्ने योजनाका साथ काम गरिरहेका छौँ’, उनले भने, ‘गैँडाकोटको भेडाबारीबाट झराही खोला, रजहरमा दुई किलोमिटर क्षेत्र तथा देवचुलीको लोकाहाबाट कावासोतीको डण्डासम्म कालोपत्र गर्ने गरी काम अगाडि बढाएका छौँ ।’ अहिले कालोपत्र भइरहेको क्षेत्रबाहेक थप पाँच किलोमिटर सडक कालोपत्रको तयारी छ । सडक विस्तारका लागि निर्माण कम्पनीले एक हजारभन्दा बढी जनशक्ति तथा दुई सय बढी उपकरणको प्रयोग गरिरहेको झाले बताए । सडक विस्तारका लागि ८० टिपर, ३० एक्साभेटर, १३ सेट रोलर र १३ सेट ग्रेडर तथा डोजरसहितका उपकरणको प्रयोग गरिएको छ । डण्डास्थित अक्सपाल्ट प्लान्टबाट उत्पादित सामग्री लगेर कालोपत्रको काम भइरहेको छ । चालु आर्थिक वर्षभित्र ५० प्रतिशत काम सक्ने लक्ष्य रहेको भए पनि वर्षातलगायत कारण काममा ढिला हुनसक्ने ठेक्का व्यवस्थापक झाले बताए । नारायणगढ–बुटवल सडक विस्तार योजना पूर्वी खण्डका सूचना अधिकारी इञ्जीनियर धीरज ढकालले हालसम्मको प्रगति ३० दशमलव पाँच प्रतिशत रहेको बताए । हाल सो सडकमा कल्भर्ट निर्माणलगायत काम भइरहेको छ । उनले भने, ‘मासिक तीन प्रतिशतभन्दा बढी प्रगति हुने गरी काम भइरहेको छ ।’ सडक विस्तारका लागि माटो फिलिङ गर्ने, बिजुलीको पोल सार्ने काम सँगसँगै भइरहेको छ । सडक विस्तारका लागि आवश्यक पर्ने माटो, ढुङ्गा, गिट्टीलगायत कच्चा पदार्थको समस्या छैन । माटो तथा ढुङ्गा, गिट्टीका लागि स्थानीय तहले सहयोग गरेका छन् । चार वर्षअघि विस्तारको काम सुरु भएको नारायणगढ–बुटवल खण्डको सहरी क्षेत्रमा चार लेनका अतिरिक्त दुई लेन तथा ग्रामीण क्षेत्रमा चार लेनमा राजमार्ग फराकिलो गरिँदै छ । दाउन्ने पहाडको पाँच किलोमिटर क्षेत्रमा भौगोलिक अवस्थाका कारण सडक तीन लेन विस्तार गर्ने गरी ठेक्का सम्झौता गरिएको छ । रासस
राष्ट्रिय बीमा कम्पनीको सञ्चालकमा विश्वराज बराल नियुक्त
काठमाडौं । राष्ट्रिय बीमा कम्पनीको सञ्चालकमा विश्वराज बराल नियुक्त भएका छन् । उनी नेपाल बैंकको तर्फबाट प्रतिनिधिको रुपमा कम्पनीको सञ्चालकमा नियुक्त भएका हुन् । नेपाल बैंकको चैत २ गतेको पत्रानुसार बराल अर्को व्यवस्था नभएसम्म कम्पनीको सञ्चालकमा नियुक्त भएका हुन् । साथै, उनले अध्यक्ष दिनेश उपाध्यायबाट पद तथा गोपनियताको सपथ ग्रहण गरिसकेका छन् ।
शिक्षण अस्पताल विस्तार गर्दै सरकार, राजधानी बाहिर पहिलो स्वास्थ्य विज्ञान विश्वविद्यालय
काठमाडौं । पुष्पकमल दाहाल ‘प्रचण्ड’ नेतृत्वको सरकार निर्माण भएको तीन महिना पुरा भएको छ । प्रचण्ड सरकारले ब्यतित गरेको समयमा हुनुपर्ने उपलब्धि र भएको नतिजाको विषयमा समर्थन वा आलोचनात्मक कोणबाट विश्लेषण भइरहेका छन् । तर, यो अवधिमा स्वास्थ्य क्षेत्रको विषयमा महत्वपूर्ण निर्णय गर्दै सरकारले मोफसलमा मेडिकल कलेज र स्वास्थ्य विज्ञान विश्वविद्यालयकै विस्तार गर्ने निर्णय गरेको छ । चितवनको भरतपुर अस्पताल र बाँकेको भेरी अस्पताललाई सरकारले चिकित्सा विज्ञान राष्ट्रिय प्रतिष्ठान (न्याम्स) अन्तर्गत आंगिक शिक्षण अस्पतालको रुपमा सञ्चालन गर्ने निर्णय गरेको छ ।चैत १० गते को मन्त्रिपरिषद्को बैठकले ती अस्पतालहरुलाई शिक्षण अस्पतालको रुपमा सञ्चालन गर्ने निर्णय गरेको हो । त्यस्तै, सरकारले कोशी अस्पताललाई शिक्षण अस्पतालका रूपमा विकास गरी पूर्वाञ्चल विश्वविद्यालय अन्तर्गत आङ्गिक मेडिकल कलेजका रूपमा सञ्चालन गर्ने निर्णय गरेको छ । त्यस्तै, सरकारले कैलालीको गेटामा रहेको प्रस्तावित गेटा मेडिकल कलेजलाई सहिद दशरथ चन्द राष्ट्रिय स्वास्थ्य विज्ञान विश्वविद्यालयको रूपमा स्थापना तथा सञ्चालन गर्ने निर्णय गर्दै सहिद दशरथ चन्द राष्ट्रिय स्वास्थ्य विज्ञान विश्वविद्यालय विधेयक तर्जुमा सम्बन्धमा समिति गठन भई विधेयक तर्जुमाको काम गरिरहेको जनाएको छ । सो विश्वविद्यालय सञ्चालनमा आउँदा नेपालमा पहिलो स्वास्थ्य विज्ञान विश्वविद्यालय राजधानीबाहिर मुलुकको सुदुरपश्चिम भागबाट सञ्चालन हुनेछ । प्रचण्डको नेतृत्वको सरकारले एक सय दिनमा गरेका कामहरुको विषय सार्वजनिक गर्दै प्रधानमन्त्रीको सचिवालयले कोशी अस्पताललाई पूर्वाञ्चल विश्वविद्यालयको आंगिक शिक्षण अस्पताल र कैलालीको गेटामा रहेको प्रस्तावित गेटा मेडिकल कलेजलाई सहिद दशरथ चन्द राष्ट्रिय स्वास्थ्य विज्ञान विश्वविद्यालयको रूपमा स्थापना तथा सञ्चालन गर्ने निर्णय गर्दै सहिद दशरथ चन्द राष्ट्रिय स्वास्थ्य विज्ञान विश्वविद्यालय बनाउने निर्णय गरेको उल्लेख गरेको छ । चिकित्सा शिक्षा ऐनमा एकवटा विश्वविद्यालयले बढीमा पाँचवटा भन्दा धेरै मेडिकल कलेज सञ्चालनको लागि स्वीकृति दिन नपाइने व्यवस्था रहेको छ । केहीवर्षदेखि विश्वविद्यालयहरुबाट मेडिकल कलेज विस्तारको काम रोकिदै आएको थियो । सरकारले चिकित्सा विज्ञान राष्ट्रिय प्रतिष्ठान ९न्याम्स० अन्तर्गत दुईवटा अस्प्ताललाई शिक्षण अस्पतालको रुपमा सञ्चालन गर्ने निर्णय गरेको हो, भने पूर्वाअञ्चल विश्वविद्यालय अन्तर्गत सञ्चालन हुनेगरी विराटनगरको कोशी अस्पताललाई शिक्षण अस्पतालको रुपमा विकास गर्ने निर्णय गरेको हो । भेरी अस्पतालले पश्चिमी तराई, कर्णाली र सुदुरपश्चिमका मानिसहरुलाई समेत उपचार सेवा उपलब्ध गराउँदै आएको छ । सो अस्पताललाई शिक्षण अस्पतालको रुपमा विकास गर्दा उपचार सेवा थप प्रभावकारी हुने जनाइएको छ । त्यस्तै पछिल्लो समयमा जनघनत्व बढ्दै गएको र धेरै भौगोलिक क्षेत्रको सुगमताको रुपमा चितवन बन्दै गएको छ । भरतपुर अस्पताललाई शिक्षण अस्पतालको रुपमा विकास गर्ने आँफूहरुको लामो समयदेखिको सपना पूरा भएको भरतपूर महानगरकी प्रमूख रेनु दाहालले बताएकी छन् । त्यस्तै, नेपालको पूर्वी भूगोलकै महत्वपूर्ण अस्पतालको रुपमा कोशी अस्पताललाई शिक्षण अस्पताललाई प्रदेश सरकारले नै केहीवर्ष अगाडि शिक्षण अस्पतालको रुपमा विकास गर्ने तयारी गरेको थियो । बिसं १९४७ सालमा स्थापना भएको सो अस्पताल तीनसय ५० बेड रहेका छन् । चिकित्सा शिक्षा आयोगले नयाँ शैक्षिक शत्रबाट २१ वटा मेडिकल कलेजमा एमबिबिएस अध्ययनको लागि भर्ना खुलाएको छ । जसमा १६ वटा निजी कलेज रहेका छन् भने ५ वटा सरकारी कलेज रहेका छन् । सरकारको नयाँ निर्णयसँगै सरकारी स्वामित्वमा चिकित्सा शिक्षा अध्यापन गराउने संस्थाको संख्या ८ वटा पुगेको छ । लामो समयदेखि भौतिक संरचना निर्माण भएर पनि सुदुरपश्चिमको गेटा मेडिकल कलेज सञ्चालनमा आउन सकेको छैन भने अन्य सञ्चालनमा रहेका सरकारी शिक्षण अस्पतालहरुले समयानुकुल सहज र प्रविधियुक्त उपचार सेवा प्रदान गर्न सकिरहेका छैनन् भन्ने गुनासो रहँदै आएको छ । त्यसैले प्रचण्ड सरकारले पछिल्लो सय दिनमा चिकित्सा शिक्षणको विषयमा गरेका निर्णयहरु जनपक्षीय र सराहनीय भएपनि तिनीहरुको दिगो सञ्चालन भने निकै चुनौतिपूर्ण रहेको देखिन्छ ।
सुनको मूल्य हालसम्मकै उच्च, तोलाको १ लाख ११ हजार पुग्यो
काठमाडौं । बुधबार सुनको मूल्य हालसम्मकै उच्च भएको छ । नेपाल सुनचाँदी व्यवसायी महासंघको अनुसार बुधबार छापावाल सनुको मूल्य तोलाको दुई हजार रुपैयाँले बढेर प्रतितोला १ लाख ११ हजार रुपैयाँ कायम भएको छ । यस्तै, चाँदीको मूल्य पनि बढेको छ । महासंघका अनुसार अघिल्लो दिन प्रतितोला १४ सय रुपैयाँमा कारोबार भएको चाँदी बुधबार १ हजार ४४० रुपैयाँ पुगेको छ ।
५ वर्षपछि सगरमाथा चढ्ने अनुमति पाएपछि दुवै खुट्टा नभएकाे बुढामगर लागे आधारशिविरतर्फ
काठमाडौं । पूर्व गोरखा सैनिक हरि बुढामगर विश्वको सर्वोच्च शिखर सगमाथा आरोहणका लागि सोलुखुम्बु प्रस्थान गरेका छन् । बुधबार उनी त्रिभुवन विमानस्थल हुँदै सगरमाथा आधार शिविरतर्फ प्रस्थान गरेका हुन् । शारीरिक रुपमा अशक्त रहेका उनका दुवै खुट्टा छैनन्। उनी कृतिम (प्रोस्थेटिक) खुट्टाको सहायतामा सगरमाथा आरोहण गर्न लागेका हुन् । कृतिम खुट्टाको सहायतामा सगरमाथाको आधारशिविर पुगेर ‘स्काइड्राइभिङ’ गर्ने उनी पहिलो व्यक्तिसमेत हुन् । सगरमाथा आरोहण गर्न सोलुखुम्बु जानुभन्दाअघि उनले ५ वर्षको पर्खाइपछि सगरमाथा चढ्न जान अनुमति पाउँदा खुशी लागेको बताए । उनले आफ्नो सगरमाथाको सफल आरोहणले सारा नेपालीहरुलाई खुशी दिने विश्वास व्यक्त गरे । उनले शारीरिक अशक्त भएका व्यक्तिहरु कोही भन्दा केही पनि कमजोर हुँदैनन् भन्ने आत्मविश्वास अन्य आफूजस्तै साथीहरुमा जगाउनका लागि सगरमाथाको सफल आरोहण आफ्ना लागि महत्वपूर्ण रहेको बताए । उनले आफ्नो लागि सगरमाथा आरोहणको समय २ महिनाको हुने जानकारी दिए । सन् २०१० मा अफगानिस्तानको लडाईंमा उनले दुवै खुट्टा गुमाएका थिए । घुँडाभन्दा तल दुवै खुट्टा गुमाउने र कृतिम खुट्टाको सहारामा सगरमाथा आधार शिविरसम्म पदयात्रा गर्ने बुढामगर पहिलो व्यक्ति हुन् । बुढामगरले मोन्ट ब्लाङ्क (४,८१० मिटर), चुलु सुदूरपूर्व (६,०५९ मिटर), किलिमन्जारो (५,८९५ मिटर), र मेरा पिक (६,४७६ मिटर) आरोहण गरेका छन् । उनले २०१७ मा मेरा चुचुरो आरोहण गरेका थिए भने र ६,००० मिटरभन्दा अग्लो हिमाल आरोहण गर्ने पहिलो घुँडा माथि (दुवै अंगविच्छेदन) डबल एम्प्यूटी गर्ने बने । उनको जन्म रोल्पा जिल्लाको मिरूल गाउँमा सन १९७९ मा भएको हो । यसअघि पनि उनी सगरमाथाको आधारशिविरसम्म पुगिसकेका छन् ।
सिटिजन्स बैंक र एलिवेट लाउन्ज एन्ड क्लबबीच समझदारी
काठमाडौं । सिटिजन्स बैंक र न्युरोडमा रहेको एलिवेट लाउन्ज एन्ड क्लबबीच सिटिजन्स बैंकका कार्डबाहक ग्राहकलाई विशेष छुट दिने समझदारी पत्रमा हस्ताक्षर भएको छ । समझदारी पत्रमा हस्ताक्षरसँगै सिटिजन्स बैंकका कार्डबाहकले एलिवेट लाउन्जमा २० प्रतिशतसम्मको आकर्षक छुट पाउने भएका छन् । यस किसिमको सहकार्यबाट बैंकका ग्राहक लाभान्वित हुनुका साथै नगद कारोबारबाट डिजिटल कारोबारतर्फ उत्प्रेरित गर्ने विश्वास बैंकले लिएको छ । बैंकले डिजिटल बैंकिङ माध्यमको प्रयोग बढाउन र ग्राहकलाई डिजिटल माध्यमबाट भुक्तानीमा प्रोत्साहन गर्न समय-समयमा ग्राहकमैत्री सुविधा सञ्चालनमा ल्याउँदै आएको छ । सिटिजन्स बैंकले देशभरका १८२ शाखा, १३९ एटीएम र ९७ शाखारहित बैंकिङ इकाइबाट १५ लाख ४० हजारभन्दा बढी ग्राहकलाई आधुनिक बैंकिङ सेवा प्रदान गर्दै आएको छ ।
डिशहोममा १ वर्षको रिचार्जमा खोटाङका ५ जनाले जिते एक एक लाख नगद
खोटाङ । डिशहोममा १ वर्षको रिचार्जमा खोटाङका ५ जनाले जिते एक एक लाख नगद रुपैयाँ जितेका छन् । ‘१ वर्षको रिचार्ज गर्दा २४ महिना डिशहोम हेर्न सकिने कम्पनीले जनाएकाे छ । यो योजना अन्तर्गत डिशहोम डिटिएचका ग्राहकले नजिकैको डिलरदाईकोमा गएर फण्ड ट्रान्सफर मार्फत १ वर्षको रिचार्ज गर्ने ग्राहक मध्ये लक्की ड्र मार्फत खोटाङका ५ नगद एक एक लाख रुपयाँ प्राप्त गरेको डिशहोमले जनाएको छ । डिशहोमले दिएको जानकारी अनुसार अफर अन्तर्गत रिचार्ज गर्ने मध्ये हरेक हप्ता एक जना भाग्यशाली ग्राहकले लक्की ड्र मार्फत देबका आचार्य, रत्नकला बुढाथोकि, कमला रिजाल, हिरालाल रिजाल र एम्बिता राईले हार्दिक बधाई एक एक लाख जितेका हुन् । सैँजु इन्टरप्राइजेज अन्तर्गतका डिलर बिजय स्टोर्स एण्ड सप्लायर्स दिक्तेल-१, खोटाङ्गका डिलरदाईबाट डीसहोमको वार्षिक रिचार्ज गरि स्किम अन्तर्गत उक्त खोटाङका ५ नगद पुरस्कार प्राप्त गरेका हुन्। ग्राहकलाई १ लाख रुपैयाँ डिस मिडियाबाट आरएसएम बिपिन्द्र न्यौपाने, अफिसर बिजय पन्थीको उपस्थितिमा खोटाङ उद्योग बाणिज्य संघका अध्यक्ष राजन प्रसाद आचार्यबाट हस्तान्तरण गरिएको थियो । आयोजकको तर्फबाट विजेतालाई हार्दिक बधाई दिदै सम्पुर्ण डिशहोम डिटिएचका ग्राहकहरुले यो योजनामा सहभागी हुने कम्पनीले जनाएकाे छ । लक्कि ड्रको प्रत्यक्ष प्रशारण हरेक हप्ता सोमबार साँझ ५ बजे डिशहोम रियालिटी टिभी, रमाईलो एचडी, सरोकार टिभी , नेपाः च्यानल, र डिशहोम सोकेस प्रशारण हुँदै आएको पनि डिशहोमले जानाएको छ ।
किसान लघुवित्तको साक्षरता कार्यक्रम सम्पन्न
काठमाडौं । किसान लघुवित्त वित्तीय संस्था नवलपुरले प्रमुख गोष्ठी तथा वित्तीय साक्षरता कार्यक्रम सम्पन्न गरेको छ । नवलपुरले आयोजना गरेको उक्त कार्यक्रममा वित्तीय संस्थाका ७२ वटा केन्द्रहरुका केन्द्र प्रमुख तथा सदस्यहरुले सहभागी जनाएका थिए । केन्द्रीय कार्यालयको तर्फबाट काठमाडौं क्षेत्रीय प्रमुख मनोज कुमार थापाको उपस्थिति रहेको थियो । कार्यक्रममा वित्तीय साक्षरता सम्बन्धी विभिन्न भिडियो सामाग्री, प्रस्तुतिकरण तथा छलफल गरिएको थियो भने ग्राहक सदस्यहरुले वित्तीय संस्थाको सेवा सुविधाहरुको बारेमा जिज्ञासाहरु राखेका थिए । हाल शाखाले १०,६७,८९,३७५ रुपैयाँ लगानी गरेको छ भने ८७,८८,०९३ रुपैयाँ बचत संकलन गरेको छ । शाखामा ७५३ जना सदस्यहरु आवद्ध भई कर्जा तथा बचत कारोबार गरिरहेका छन् । शाखाले ४ वटा स्थानीय तहमा जम्मा ७२ वटा केन्द्र मार्फत लघुवित्त सेवा प्रदान गर्दै आएको छ ।
