भूमिहीनलाई लालपुर्जा वितरण गर्न जग्गाको नापजाँच अगाडि बढ्यो
काठमाडौं । भूमिहीन एवं अव्यवस्थित बसोबासीलाई लालपुर्जा वितरणका लागि तनहुँमा जग्गा नापजाँचको काम अगाडि बढेको छ । राष्ट्रिय भूमि आयोग तनहुँले भूमिहीन एवं अव्यवस्थित बसोबासीलाई लालपुर्जा वितरणका लागि जग्गा नापजाँचको काम अगाडि बढाएको हो । आयोगका विज्ञ सदस्य श्रीराम कार्कीका अनुसार शुक्लागण्डकी नगरपालिका–३, ८ र ९ मा जग्गाको नापजाँच भइरहेको छ । देवघाट गाउँपालिका–५ मा नापजाँच सकिए पनि केही छुटपुट भएकाले छुटपुट भएकालाई समेत समावेश गर्ने तयारी गरिएको उनले बताए । देवघाटकै वडा नं २ र ४ मा जग्गाको नापजाँच सुरु गर्ने तयारी गरिएको छ । सदस्य कार्कीका अनुसार आँबुखैरेनी गाउँपालिकाका ६ वटै वडामा जग्गाको नापजाँच काम सकिएको छ । व्यास नगरपालिकाका जग्गा नापजाँचका लागि छलफल अगाडि बढाइएको छ । जग्गा नापजाँचका लागि आवश्यक उपकरण खरिदका लागि नगरपालिकाले बोलपत्र आह्वान गरिसकेको उनले बताए । ‘प्राविधिक कम भएका कारण पनि जग्गा नापजाँचको कामले तीव्रता पाउन सकेको छैन, हामीसँग उपलब्ध प्राविधिकलाई नै मिलाएर सबै स्थानीय तहमा खटाउनुपर्ने अवस्था छ, जग्गा नापजाँच सुरु भएपछि धेरै काम अगाडि बढेको छ भन्ने महसुस सबैलाई हुन्छ, सोहीबमोजिम हामीले कामलाई अगाडि बढाइरहेका छौँ, असारभित्रै अथवा नभए दशैँ अगाडि कुनै न कुनै पालिकामा लालपुर्जा वितरण गर्ने लक्ष्य छ,’ उनले भने । जग्गा नापजाँच सम्पन्न भएपछि फिल्ड ढड्डा उतारेर काम गर्दा प्रत्येक पालिकाका लागि एक महिना समय आवश्यक पर्छ । यसैगरी भानु नगरपालिकामा पनि दशैँअघि सुकुम्बासी एवं अव्यवस्थित बसोबासीलाई लालपुर्जा वितरणको तयारीसहित नापजाँच कार्य सुरु भएको छ । वर्षौँदेखि लालपुर्जाविहीन रहँदै आएका स्थानीयवासीलाई लालपुर्जा दिने उद्देश्यसहित भानु नगरपालिकामा जग्गाको नापजाँच सुरु भएको छ । भानु नगरपालिका–१ स्थित नयाँबस्तीबाट जग्गाको नापजाँच कार्य सुरुआत गरिएको हो । भानु–१ मा पाँच सयभन्दा बढीलाई निस्सा वितरण गरिएको थियो । यो वडाबाट सुरु भएको जग्गा नापजाँच कार्य क्रमशः अन्य वडामा सुरु गरिने नापी कार्यालयका तनहुँका प्राविधिक एवं जग्गा नापजाँच कार्यका टोली प्रमुख राजीव श्रेष्ठले जानकारी दिए । भानु नगरपालिकाका प्रमुख आनन्दराज त्रिपाठीले दशैँअगावै नापजाँच कार्य सकेर लालपुर्जा वितरण गरिने बताए । राष्ट्रिय भूमि आयोग तनहुँका अध्यक्ष रामचन्द्र अधिकारीले स्थानीय तहको समन्वयमा भूमिहीनलाई लालपुर्जा र अव्यवस्थित बसोबासीलाई व्यवस्थित बनाउने प्रक्रिया सुरु गरिएको बताए । भानु नगरपालिकामा जग्गाको नापजाँच सुरु भएपछि भूमिहीन खुसी भएका छन् । यसअघि निस्सा पाएका नयाँबस्तीका रामबहादुर परियारले अब लालपुर्जा पाइन्छ कि भन्ने आशा जागेको बताए । ‘प्रत्येक चुनावमा नेता आएर लालपुर्जा दिन्छौँ भन्नुहुन्छ, तर कहिल्यै पुर्जा पाइएन, अहिले नापजाँचको काम सुरु भएपछि त पक्कै पुर्जा पाइन्छ होला,’ उनले भने । सोही ठाउँकी डिलकुमारी राना पनि जग्गा नापजाँच अगाडि बढेपछि हर्षित छिन् । लालपुर्जा नहुँदा सुकुम्बासी भएर बाँच्नुपरेको भन्दै उनले जग्गा नहुँदा धेरै समस्या आइपरेको उल्लेख गरे । जिल्लाका १० पालिकामा भूमिहीन दलित १ हजार १०८, भूमिहीन सुकुम्बासी १ हजार ८७२ र अव्यवस्थित बसोबासी २३ हजार १३७ गरी २६ हजार ११७ जनाको निवेदन दर्ता भएको छ ।रासस
नयाँ स्टक एक्सचेञ्ज र ब्रोकर लाइसेन्स वितरण रोक्न अर्थ समितिको निर्देशन
काठमाडौं । प्रतिनिधि सभाको अर्थ समितिले नयाँ स्टक एक्सचेञ्ज र नयाँ ब्रोकर लाइसेन्स वितरण प्रक्रिया तत्कालका लागि रोक्न निर्देशन दिएको छ । समितिको सोमबार बसेको बैठकले अर्को निर्णय नभएसम्मका लागि नयाँ स्टक एक्सचेञ्जको कामकारबाही र धितोपत्र दलाल तथा धितोपत्र व्यापारीको अनुमति (ब्रोकर लाइसेन्स) प्रदान गर्ने कार्य रोक्न अर्थमन्त्रालय, नेपाल धितोपत्र बोर्ड र नेपाल स्टक एक्सचेञ्ज (नेप्से)लाई निर्देशन दिएको हो । न्युनतम मापदण्ड पुरा गरे÷नगरेको विषयमा समितिले ब्रोकर लाइसेन्स वितरण प्रक्रियामा छानविन गरि निष्कर्षमा नपुगेसम्म लाइसेन्स सम्वन्धी सम्पूर्ण प्रक्रिया तत्कालका स्थगन गर्न भनेको हो । हाल धितोपत्र बोर्डले १८ वटा ब्रोकर कम्पनीलाई लाइसेन्स प्रदान गरिसकेको छ । साथै, समितिले आगामी बैठकमा अर्थ मन्त्रालय र धितोपत्र बोर्डको पदाधिकारीहरुसंग नयाँ स्टक एक्सचेञ्ज र ब्रोकर लाइसेन्सको विषयमा विस्तृत छलफल गर्ने बताएको छ । बोर्डबाट नयाँ स्टक एक्सचेन्ज र नयाँ धितोपत्र दलाल व्यवसायीको लाइसेन्स वितरणमा विभिन्न सञ्चारमाध्यम र सरोकारवाला पक्षबाट अनेक कोणबाट प्रश्न उठेको र सांसदहरुले अनुचित तवरले प्रक्रिया अगाडी बढाएको भनेर विषय उठान गरेको हुँदा तत्काल लाइसेन्स वितरण प्रक्रिया स्थगन गर्न समितिले निर्देशन दिएको हो । साथै, समितिको गत जेठ २ गते बसेको बैठकमा समेत गम्भीर रुपमा अध्ययन गर्नुपर्ने माग भएको बताएको छ । पूँजीबजारका विभिन्न पक्ष समेटेर समितिको प्रतिवेदन वि.सं.२०७७ असार ३० को पत्रबाट बोर्डलाई कार्यान्वयनको लागि पठाइएकोमा हालसम्म भएका कामकारवाही र समितिको निर्देशन कार्यान्वयनको सम्बन्धमा अध्ययन गर्न आवश्यक कागजात र विवरण ५ दिनभित्र समितिमा आइपुग्ने गरी उपलब्ध गराउन अर्थ मन्त्रालय र नेपाल धितोपत्र बोर्डसँग समितिले गत जेठ ७ गते पत्र पठाएको थियो । धितोपत्र बोर्डले गत जेठ १२ गते अर्थसमितिलाई पठाएको पत्रमा थप एउटा सम्म स्टक एक्सचेन्ज स्थापना गर्न अनुमति प्रदान गर्न उपयुक्त हुने बताएको थियो । साथै, धितोपत्र दलाल तथा धितोपत्र व्यापारीको अनुमती पूर्वाधार तयार गरेका ब्रोकर कम्पनीलाइ लाइसेन्स प्रदान गरेको जानकारी गराएको थियो ।
प्रभु लाइफको अध्यक्षमा शिक्षा भट्टचन
काठमाडौं । प्रभु लाइफ इन्स्योरेन्सको सञ्चालक समितिको अध्यक्षमा शिक्षा भट्टचन नियुक्त भएकी छिन् । इन्स्योरेन्स कम्पनीको आइतबार बसेको सञ्चालक समितिको बैठकले भट्टचनलाई अध्यक्षमा नियुक्त गरेको हो । संस्थापक सेयरधनीहरुको तर्फबाट भट्टचन अध्यक्षमा चयन भएकी हुन् । साथै कम्पनीको संचालकमा सुशान शेरचन, मिजास भट्टचन र श्याम कृृष्ण श्रेष्ठ चयन भएका छन् ।
फेरी अर्काे सहकारीले ठग्यो बचतकर्ताको पौने २१ करोड रुपैयाँ
काठमाडौं । महेन्द्रनगरस्थित शिवशिखर बहुउद्देश्यीय सहकारी संस्थाले बचतकर्ताको २० करोड ७८ लाख रुपैयाँ बढी रकम ठगी गरेको खुलेको छ । जिल्ला प्रहरी कार्यालय कञ्चनपुरमा बचत रकम फिर्ता नगरेको भन्दै २ हजार ४९६ जना बचतकर्ताले प्रहरीमा निवदेन दिएका छन् । जिल्ला प्रहरी कार्यालय कञ्चनपुरका अनुसार बचतकर्ताहरूले २० करोड ७८ लाख २४ हजार रुपैयाँ रकम फिर्ता माग गर्दै निवेदन दिएका हुन् । जिल्ला प्रहरी कार्यालय कञ्चनपुरका प्रवक्ता प्रहरी निरीक्षक हर्षबहादुर चन्दले शिवशिखर सहकारी संस्थाबाट ठगिएका दुई हजार चार सय ९६ जनाले निवेदन दिएको बताए । ‘अहिले हामी निवदेनकर्ताको संयुक्त जाहेरी बनाएर मुद्दा दर्ता गर्ने तयारीमा छौँ, अनुसन्धान गर्न सजिलो होस् भनेर संयुक्त जाहेरी तयार गर्न लागेका हौँ ,’ उनले भने । गत महिना प्रहरीले उक्त सहकारीबाट बचत रकम फिर्ता नपाएकाहरूलाई बचतपास बुक र नागरिकतासहित प्रहरीमा निवेदन दिन आग्रह गरेको थियो । अहिले महेन्द्रनगरस्थित शिवशिखर सहकारी संस्था बन्द छ । बचतकर्ताहरूले आफूहरूले जम्मा गरेको रकम फिर्ता पाउनुपर्ने भन्दै निवेदन दिएको बताएका छन् । ‘हामीले मेहनतले कमाएको रकम हामीलाई फिर्ता गराइदिन भनेर प्रहरीमा निवेदन दिएका हौँ, सहकारीका कर्मचारीले घरमै आएर आग्रह गर्दा बचत जम्मा गरेका हौँ,’ बचतकर्ता सुमन कुँवरले भने । उक्त सहकारीमा ३७ हजार रकम बचत रहेको उनको भनाइ छ । त्यसैगरी, वासुदेव भट्टले पनि ४१ हजार रकम उक्त सहकारीमा जम्मा रहेको बताए । ‘सहकारीको कार्यालयमा गएर बचत फिर्ता माग्दा दिएन, ३÷४ दिन कार्यालयमा धाएँ, मेरो किराना पसल छ, मैले दैनिक बचत गर्दै आएको थिएँ,’ उनले भने । बचतकर्ताहरूले बचत रकम फिर्ता र सहकारी सञ्चालकहरूलाई कारबाहीको माग गरेका छन् । भक्तपुर केन्द्रीय कार्यालय रहेको शिवशिखर बहुउद्देशीय सहकारी संस्थाले महेन्द्रनगरलगायत अन्य जिल्ला शाखाबाट समेत ठगी गरेको उजुरी प्रहरीमा छ ।
नेपाल रिपब्लिकको आईपीओ खरिद गर्ने आज अन्तिम मौका
काठमाडौं । नेपाल रिपब्लिक मिडियाको आईपीओमा आवेदन दिने आज अन्तिम दिन रहेको छ । कम्पनीले जेठ २६ गतेदेखि सर्वसाधारण लगानीकर्तालाई बिक्री खुला गरेको आईपीओमा आज जेठ ३० गतेसम्म आवेदन दिन सकिनेछ । कम्पनीले जारी पूँजी ९६ करोड ७५ लाख रुपैयाँको ४४.९९ प्रतिशत अर्थात् ४३ करोड ५३ लाख रुपैयाँको ४३ लाख ५३ हजार कित्ता सेयर बिक्री खुला गरेको हो । कम्पनीले ४ प्रतिशत अर्थात् १ लाख ७४ हजार १२० कित्ता कर्मचारी, ५ प्रतिशत अर्थात् २ लाख १७ हजार ६५० कित्ता सामूहिक लगानी कोष, ४ लाख ३५ हजार ३ सय कित्ता विदेशमा रोजगारीमा रहेका नेपालीलाई बिक्री गरी बाँडफाँट गर्दा बाँकी रहेको ३६ लाख १९ हजार ८९१ कित्ता सेयरमा सर्वसाधारण लगानीकर्ताले आवेदन दिन सक्नेछन् । कम्पनीको आईपीओमा लगानीकर्ताले न्यूनतम १० कित्तादेखि अधिकतम ५ सय कित्तासम्म खरिद गर्न सक्नेछन् । कम्पनीको आईपीओ निष्काशन तथा बिक्री प्रबन्धकमा मेगा क्यापिटल मार्केट्स रहेको छ । लगानीकर्ताले नेपाल धितोपत्र बोर्डबाट स्वीकृत प्राप्त गरेका सम्पूर्ण सि–आस्बा सदस्य बैंक तथा वित्तीय संस्था र तिनका तोकिएका शाखा कार्यालयहरुका साथै मरो सेयर माफर्् आवेदन दिन सक्नेछन् । इन्फोमेरिक्स क्रेडिट रेटिङ्ग नेपालले कम्पनीलाई आईआरएन सिंगल बी प्लस इस्यूअर रेटिङ्ग प्रदान गरेको छ । यसले कम्पनीको दायित्व बहन गर्ने क्षमतामा उच्च जोखिम रहेको संकेत गर्दछ ।
निर्माण र सरसफाइ सेवा एकैठाउँबाट दिन औजार र प्राईम किल्निङबीच सम्झौता
काठमाडौं । औजार र प्राईम किल्निङ बिच सम्झौता भएको छ । घर तथा व्यवसायीक भवनहरु निर्माण गर्दै आएको ओजार र घर तथा कार्यलय सरसफाइ गर्दै आइरहेको प्राईम क्लिनिन्ग बिच एकै साथ अगाडि बढ्ने गरी सम्झौता भएको हो । उक्त सम्झौता पत्रमा औजारका प्रबन्धक अजय कुमार त्रिपाठी र प्राईमका सिद्धार्थ कार्कीले हस्ताक्षर गरेका छन् । दुवै कम्पनीले मिलेर ग्राहकहरुलाई अझ छिटो, छरितो र सरल तरिकाले सेवा दिने सम्झौता गरेका छन् । औजारले काठमाडौं, ललितपुर, भक्तपुर, पोखरा, बुटवल, नेपालगन्ज जस्ता शहरहरुमा धारा, बत्ति मर्मत, टायल, फलाम तथा ट्र्स, छ्तबाट पानी चुहिने, फल्स सिलिन्ग, मोडुलर किचन, कार्पेन्टर, सिभिल आदि इत्यादिको सेवा दिँदै आएको छ । साथै, प्राईमले ठुला ठुला भवनका भित्र बाहिर, टायल तथा ग्रेनाईट, सोफा कार्पेट आदि अत्यधुनिक उपकरणद्वारा सफाई तथा पोलिस गर्ने काम गर्ने गरेको छ ।
निर्वाचनको पूर्वसन्ध्यामा इपानमा विवाद बढ्यो, चुनाव सार्न खोजेको आरोप
काठमाडौं । निर्वाचनको पूर्वसन्ध्यामा स्वतन्त्र उर्जा उत्पादकहरुको संस्था, नेपाल (इपान)मा विवाद उत्पन्न भएको छ । उम्मेदवारको योग्यता, आर्थिक पारदर्शीता, साधारणसभामा प्रस्तुत हुने विषय बस्तुहरुको बारेमा सोमबार विवाद भएको कार्यसमितिका एक सदस्यले बताए । अध्यक्षका आकांक्षी किरण मल्ल र उनको समूहका आकांक्षीलाई उम्मेदवार बन्न रोक्ने गरि निर्वाचन विनियमावलीमा सर्त राखेका भन्दै मल्ल पक्षधरको व्यवसायीहरुले इपानको कार्यलयमा पुगेर विरोध गरेका छन् । ‘चुनाव लागेको छ । दुई पक्षबीच चर्काचर्की भयो’ सचिवालयका एक कर्मचारीले बताए । संस्थापन पक्षले निर्वाचत नै सार्न खोजेको आरोप मल्ल पक्षले लगाएको छ । निर्वाचनमा संस्थापन पक्षको समर्थनमा गणेश कार्कीको नेतृत्वमा एउटा प्यानल छ भने अर्कोतर्फबाट किरण मल्लको नेतृत्वमा नयाँ समूहले उम्मेदवारी दिने तयारी गरिरहेको छ । निर्वाचन विनियमावलीमा उम्मेदवारको योग्यताबारे विपक्षीलाई रोक्ने गरी सर्तहरु राखेको भन्दै मल्ल पक्षले आक्रोश व्यक्त गरेका थिए । साेही आशंकाका आधारमा उनीहरूले उम्मेदवार बन्न पूरा हुनुपर्ने सर्तहरु, आवश्यक कागजपत्रबारे आवश्यक जानकारी निर्वाचत समितिसँग माग गरेका थिए । साथै साधारणसभामा प्रस्तुत हुने संस्थाको वार्षिक कार्यक्रम, गत आर्थिक वर्षको आर्थिक प्रतिवेदन, अध्यक्षले राख्ने मन्तव्य जस्तो महत्वपूर्ण विषयहरु कार्य समिति सदस्यहरुलाई पनि उपलब्ध नगराएको भन्दै कार्यसमितिका सदस्यहरुले नै अध्यक्षसहित पदाधिकारीहरुको आलोचना गरेका छन् । इपानको साधारणसभा र कार्यसमितिको निर्वाचन यहि जेठ ३२ गते काठमाडौंमा हुँदैछ । जेठ ३० गते उम्मेदवारको मनोनयन दर्ता गर्ने कार्यक्रम छ । हाल इपानमा ४५१ वटा जलविद्युत कम्पनीहरु संगठित भएका छन् । गत वर्षसम्म २५० सदस्य रहेकोमा यस वर्ष निर्वाचनको पूर्वाद्धमा करिव २०० सदस्य थपिएका हुन् । नयाँ थपिएका सदस्यहरुले एकै पटक इमानको नेतृत्वमा आकांक्षा राखेपछि उम्मेदवारको योग्यतामा विवाद शुरु भएको छ ।
होन्डा एक्सचेन्ज मेलामा पुरानो बाइक ल्याई नयाँ लैजानुहोस्
काठमाडौं । कुनै पनि पुरानो मोटरबाइकसँग होण्डा मोटरबाईक साट्न पाइने भएको छ । हाल होण्डाको आधिकारीक विक्रेता स्याकार ट्रेडिंग कम्पनीले संचालन गरिरहेको ‘होण्डा एक्सचेन्ज र फाईनान्स मेला’मा कुनै पनि पुरानो मोटरबाइक ल्याएर साट्न पाइनेछ । मेलामा आफ्नो पुरानो बाईकसँग होण्डको कुनै पनि नयाँ बाईक साट्दा उच्च मूल्यांकन रकमका साथमा तुरुन्तै ५ हजार र एक्सचेन्ज बोनस पनि पाइने कम्पनीले जानकारी दिएको छ । साथै, १० हजारसम्मको आकर्षक स्क्रयाच कुपन पनि साट्न पाइनेछ । कम्पनीका्े अनुसार मेलामा सस्तो अग्रिम भुक्तानी र निक्कै कम ब्याजदरमा नयाँ होण्डा खरिद पनि गर्न सकिने छ । होण्डा फाईनान्समार्फत मात्रै ५९ हजार ९९९ रुपैंयाको अग्रिम भुक्तानी र मात्रै १५ को ब्याजदरमा बाइक घर लान पाइने कम्पनीले जानकारी दिएको छ । जेठ १८ गतेदेखि सुरु भएको यस मेलाका योजनाहरुमा सहभागी हुन ग्राहकहरुले काठमाडौं होण्डा मोटर बाईकको सबै डिलरहरुमा सम्पर्क गर्न सक्नेछन् ।
