एक जना नेपालीको टाउकोमा ८१ हजार ऋण
काठमाडौं । सरकारले आर्थिक मितव्ययिताको धज्जी उडाउँदै जथाभावी खर्च गर्दा सार्वजनिक ऋणसमेत अस्वाभाविक रूपमा थप्नुपर्ने अवस्था सिर्जना भएको छ । जसका कारण वर्षेनी सार्वजनिक ऋण हवात्तै बढ्ने क्रम देखिएको छ । हाल सार्वजनिक ऋण २३ खर्ब ७१ अर्ब २५ करोड पुगेको छ । जसअनुसार प्रति नेपालीको टाउकोमा सार्वजनिक ऋण ८१ हजार ३ सय ६ रुपियाँ थपिएको छ । कुल सार्वजनिक ऋण २३ खर्ब ७१ अर्ब २५ करोड रुपियाँलाई २०७८ सालको नेपालको जनसंख्या २ करोड ९१ लाख ६४ हजार ५ सय ७८ मा भाग लगाउँदा प्रतिव्यक्ति ऋणको हिस्सा ८१ हजार रुपियाँ नाघेको हो । गत कात्तिकसम्म प्रतिव्यक्ति ऋणको हिस्सा ८० हजार ८ सय १९ रुपियाँ रहेको थियो । अर्थविद् चन्द्रमणि अधिकारीले निरन्तर आन्तरिक ऋण लिंदा ब्याज बढी पर्ने र ब्याज तिर्दैमा रकम सकिने हुँदा विकास निर्माणको कार्य गर्न नसकिने बताए । यो समाचार नेपाल समाचारपत्र दैनिकमा छ ।
दुई कम्पनीको साढे ३ लाख कित्ता सेयर बिक्रीमा, मूल्य कति ?
काठमाडौं । विभिन्न दुई कम्पनीको संस्थापक सेयर बिक्री खुला गरिएको छ । सिद्धिार्थ प्रिमियर इन्स्योरेन्स र सांग्रिला डेभलपमेन्ट बैंकको गरी कूल ३ लाख ४९ हजार कित्ता सेयर बिक्रीमा राखिएको हो । सिद्धिार्थ प्रिमियर इन्स्योरेन्सले संस्थापक समूहतर्फको १ लाख ७८ हजार ८६५ कित्ता सेयर बिक्रीमा राखिएको हो । कम्पनीका अनुसार आज पुस ४ गतेदेखि लिलाम प्रक्रियाबाट बिक्रीमा राखिएको हो । कम्पनीको उक्त सेयरको मूल्य न्यूनतम प्रतिकित्ता २२० रुपैयाँ तोकिएको छ । इच्छुक विद्यमान संस्थापक सेयरधनी तथा अन्य जोकोही लगानीकर्ताले सो वा सोभन्दा बढी मूल्य अंकित गरी बोलकबोल गर्नुपर्नेछ । इच्छुक लगानीकर्ताले पुस १३ गतेभित्र बोलपत्र पेस गर्नुपर्नेछ । कम्पनीको सो सेयर बिक्री प्रबन्धकमा एनआईसी एशिया क्यापिटल रहेको छ । यस्तै, सांग्रिला डेभलपमेन्ट बैंकले संस्थापक सेयरधनी ईमान बहादुर गुरुङको नाममा रहेको १ लाख ७१ हजार १० कित्ता सेयर बिक्रीमा राखिएको हो । उक्त सेयरको मूल्य बिक्रेताले तोके बमोजिम हुने बैंकल जनाएको छ । बैंकका विद्यमान संस्थापक सेयरधनीहरूले उक्त सेयर खरिद गर्न ३५ दिनभित्र निवेदन दिनुपर्नेछ । म्यादभित्र आवेदन नपरेमा संस्थापकभन्दा बाहिर सेयर बिक्रीको प्रक्रिया अघि बढ्ने बैंकले जनाएको छ ।
आज यी २ कम्पनीको सेयर खरिद गर्यो भने ३१.५७ प्रतिशतसम्म लाभांश पाइने
काठमाडौं । बुधबार विभिन्न २ कम्पनीको लाभांश सुरक्षित गर्ने अन्तिम दिन रहेको छ । भगवती हाइड्रोपावर डेभलपमेन्ट कम्पनी र सोल्टी होटलको लाभांश सुरक्षित गर्ने आज पुस ४ गते अन्तिम दिन हो । साधारणसभा तथा लाभांश प्रयोजनार्थ दुवै कम्पनीले पुस ५ गते सेयरधनी किताब बन्द (बुक क्लोज)गर्ने निर्णय गरेका छन् । त्यसैले आजसम्म नेपाल स्टक एक्सचेञ्ज (नेप्से)मा आजसम्म सेयर खरिद गर्नेले लाभांश प्राप्त गर्नेछन् । भगवती हाइड्रोपावर कम्पनीले गत आर्थिक वर्ष २०७९/८० को नाफाबाट हाल कायम चुक्ता पुँजीको १०.५२६३ प्रतिशत नगद लाभांश वितरण प्रस्ताव गरेको छ । लाभांश पारित गर्न कम्पनीले २३औं वार्षिक साधारणसभा पुस २४ गते काठमाडौंमा बिहान १० बजे डाकेको हो । यस्तै, सोल्टी होटलले गत आर्थिक वर्ष २०७९/८० को नाफाबाट हाल कायम चुक्ता पुँजीको ५ प्रतिशत बोनस सेयर र २६.५७८९ प्रतिशत नगद गरी कूल ३१.५७८९ प्रतिशत लाभांश वितरण गर्ने प्रस्ताव गरेको छ । लाभांश पारित गर्न लघुवित्तले ४९औं वार्षिक साधारणसभा पुस २६ गते बिहान साढे १० बजे बोलाएको हो ।
विन्ध्यवासीनी हाईड्रोपावरको लाभांश घोषणा, बुक क्लोज कहिले तोक्यो ?
काठमाडौं । विन्ध्यवासीनी हाईड्रोपावर डेभलपमेन्ट कम्पनीले लाभांश वितरण गर्ने घोषणा गरेको छ । कम्पनीको सञ्चालक समितिको पुस ३ गते बैठकले चुक्ता पुँजीको ५.२६३२ प्रतिशतका दरले नगल लाभांश वितरण गर्ने प्रस्ताव गरेको हो । कम्पनीले उक्त लाभांश पारित गर्न पुस २६ गते काठमाडौंमा बिहान १० बजे सातौं वार्षिक साधारणसभा आह्वान गरेको छ । कम्पनीले लाभांश तथा वार्षिक साधारणसभा प्रयोजनका लागि मंसिर पुस १७ गत बुक क्लोज गर्ने निर्णय गरेको छ । त्यसैले नेपाल स्टक एक्सचेञ्जमा अघिल्लो दिनसम्म कायम सेयरधनीहरुले मात्रै साधारणसभामा सहभागी भई लाभांश प्राप्त गर्न सक्ने छन् ।
विश्वविद्यालय स्थापना गर्ने बागमती प्रदेशको निर्णय
मकवानपुर । बागमती प्रदेश मन्त्रिपरिषद् बैठकले बागमती प्रदेश विश्वविद्यालय स्थापना गर्ने निर्णय गरेको छ । प्रदेशका मुख्यमन्त्री शालिकराम जमकट्टेलको अध्यक्षतामा आज बसेको मन्त्रिपरिषद् बैठकले उक्त निर्णय गरेको हो । प्रदेशको शैक्षिक विकासका लागि प्रदेश सार्वजनिक विश्वविद्यालय स्थापना गर्नका लागि संरचना तयार गर्न अनुमति प्रदान गर्ने निर्णय मन्त्रीपरिषद्ले गरेको भौतिक पूर्वाधार विकास मन्त्री युवराज दुलालले जानकारी दिए । विश्वविद्यालय स्थापना गर्नका लागि संरचना तयार गर्न अनुमति प्रदान गर्ने निर्णय गरिएको छ । मन्त्रिपरिषद् बैठकले प्रदेश निजामती सेवा नियमावली मस्यौदा परामर्शका लागि प्रदेश लोकसेवा आयोगमा पठाउन स्वीकृति प्रदान गर्ने निर्णयसमेत गरेको छ । यस्तै बैठकले बागमती प्रदेशको मुख्यमन्त्री कार्यालय तथा स्वास्थ्य मन्त्रालयको सङ्गठन संरचना र दरबन्दी स्वीकृति प्रदान गर्ने पनि निर्णय गरेको मन्त्री दुलालले बताए । स्वास्थ्य मन्त्रालयतर्फको स्थानीय तहमा रहेका स्वास्थ्य संस्थाको रिक्त दरबन्दी पदपूर्ति गर्न समेत प्रदेश लोकसेवा आयोगलाई अनुमति दिने निर्णय गरिएको छ ।
अर्को पटकको अध्यक्ष म नै हो : आकाश गोल्छा
काठमाडौं । अटोमोबाइल व्यवसायीहरुको छाता संस्था नाडा अटोमोबाइल्स एसोसिएसन अफ नेपालका अध्यक्षका उम्मेदवार आकाश गोल्छाले अर्को पटक आफू नै नाडाको अध्यक्ष बन्ने बताएका छन् । मंगलबारको बैठकले करण चौधरीलाई अध्यक्ष बनाउने सहमति गरेपछि अर्को पटक आफूलाई नै अध्यक्ष बनाउने सहमति भएको उनले बताएका हुन् । अर्को पटक आफूलाई सहयोग गर्ने प्रतिवद्धता पाएपछि आफूले समर्थन गरेको उनको भनाइ छ । ‘सहमतिमा एक जनाले छोड्नु नै थियो, करण सर अघिल्लो निर्वाचनमा उम्मेदवार बनेर पराजित भएको र यस पटक पनि इच्छा देखाएकोले सहमतिमा हामी ब्याक भएका हौं, पूर्व अध्यक्षहरूले पनि मिलेर जानु पर्छ भनेर सुझाव दिनुभयो, अहिले अर्थतन्त्र समस्यामा परेको बेला मिलेर नै जानुपर्छ भनेपछि हामी सहमतिमा गएका हौं,’ गोल्छाले विकासन्युजसँग भने । उनले नयाँ बन्ने कार्यसमितिमा आफू पनि रहने बताएका छन् । तर, पद भने उनले खुलाउन मानेनन् । सम्भवतः उनी वरिष्ठ उपाध्यक्ष बन्ने चर्चा पनि छ । गोल्छासँगै करण चौधरी र प्रकाश कपुरी नाडाको अध्यक्ष बन्ने प्रतिस्पर्धामा थिए । तर, अन्ततः गोल्छा र कपुरीले चौधरीलाई समर्थन गरेका हुन् ।
नबिल बैंकको डिबेन्चरमा मागभन्दा बढी आवेदन, बिक्री बन्द
काठमाडौं । नबिल बैंकले बिक्री खुला गरेको डिबेन्चरमा मागभन्दा बढी आवेदन दिएको छ । मंसिर २९ गतेदेखि पुस ३ गतेसम्म आवेदन खुलेको उक्त डिबेन्चरमा मागभन्दा बढी आवेदन परेको हो । बैंकले निष्काशन गरेको तीन अर्ब रुपैयाँ बराबरको ऋणपत्रको बिक्री पुस ३ गते बैंकिङ समय पश्चात् बन्द भएको हो । प्रतिकित्ता एक हजार रुपैयाँका दरले ३० लाख कित्ता ऋणपत्र निष्काशन गरिएकोमा पहिलो पटक दिएको समयमा नै सबै डिबेन्चर बिक्री भएको बैंकले जनाएको छ । बैंकले बिक्रीमा ल्याएको कुल ३० लाख कित्ता ऋणपत्रमध्ये १ अर्ब २० करोड रुपैयाँ बराबरको १२ लाख कित्ता सर्वसाधारणलाई र एक अर्ब ८० करोड रुपैयाँ बराबरको १८ लाख कित्ता व्यक्तिगत तबरबाट बिक्री खुल्ला गरिएको थियो । सर्वसाधारणलाई छुट्टाइएको १२ लाख कित्तामध्ये पाँच प्रतिशत अर्थात् ६ करोड रुपैयाँ बराबरको ६० हजार कित्ता सामूहिक कोषका लागि समेत समावेश गरिएको थियो । यस सात वर्षे ऋणपत्रमा लगानीकर्ताले ९ प्रतिशतको ब्याजदर पाउने नबिलले जनाएको छ । बैंकले हाल २६६ शाखा सञ्जालसहित २२ वटा एक्सटेन्सन काउन्टर र ३१३ एटिएम मेसिनबाट सेवा प्रदान गर्दे आएको छ । यस बैंकबाट १८ लाखभन्दा बढी ग्राहकले बैंकिङ सेवा लिँदै आएका छन् ।
