सुन लुटपाट गर्ने दुई जना पक्राउ
काठमाडौं । नेपाल प्रहरीले बूढानीलकण्ठ क्षेत्रमा सुन लुटपाट गर्ने दुई जनालाई पक्राउ गरेको छ । प्रहरी वृत्त महाराजगञ्जको टोलीले बूढानीलकण्ठ नगरपालिका-२ विएमसी स्कुल र माथिल्लो भङ्गाल क्षेत्रमा महिलाले लगाएको गहना लुटपाटमा संलग्न दुई जनालाई आइतबार बूढालीनकण्ठ क्षेत्रबाट पक्राउ गरेको हो । पक्राउ पर्नेमा रौतहट मौलापुर नगरपालिका–४ का १९ वर्षीय सरोजकुमार शाह र सोही स्थानका २० वर्षीय राधेश्याम शाह रहेका छन् । जिल्ला प्रहरी परिसर काठमाडौंका प्रवक्ता प्रहरी उपरीक्षक नवराज अधिकारीले विएमसी स्कुल नजिक ७५ वर्षीया शारदा थापाको एक तोला ९२ लाल सुन लुटपाटमा सरोजकुमार र माथिल्लो भङ्गालमा सुमित्रा श्रेष्ठको सुन लुटपाटमा संलग्न राधेश्यामलाई पक्राउ गरिएको जानकारी दिए । प्रहरीले पक्राउ परेका दुवै जनालाई चोरी तथा डाँकासम्बन्धी कसुर मुद्दामा काठमाडौं जिल्ला अदालतबाट पाँच दिनको म्याद थप गरी अनुसन्धान भइरहेको प्रवक्ता अधिकारीले बताए ।
नार्कका कर्मचारीलाई क्षमता अभिवृद्धि तालिम
पोखरा । राष्ट्रिय कृषि अनुसन्धान प्रतिष्ठानले प्राविधिक र वैज्ञानिक कर्मचारीहरूका लागि आयोजना गरेको ‘डिजिटलाइजेसन अफ रिसर्च डाटा’ विषयक तालिम मत्स्य अनुसन्धान केन्द्र, बेगनास, पोखरामा आइतबारदेखि सुरु भएको छ । तीन दिनसम्म चल्ने उक्त तालिमको उद्घाटन गर्दै प्रमुख अतिथि नार्कका योजना तथा समन्वय निर्देशक डा. लुमानिधि पाण्डेले यो तालिमले कर्मचारीलाई अनुसन्धानका तथ्याङ्कहरू व्यवस्थित गर्न सहयोग पुग्ने बताए । उनले यस्ता तालिमबाट अनुसन्धानमा संलग्न कर्मचारीलाई छोटो समयमा अनुसन्धानका नतिजा पत्ता लगाउन सहयोग पुग्ने हुनाले क्रमशः सबै प्राविधिक र वैज्ञानिकहरूलाई दक्ष बनाउँदै लैजानुपर्ने कुरामा जोड दिए । कार्यक्रमका अध्यक्ष राष्ट्रिय कृषि अनुसन्धान प्रतिष्ठानका निर्देशक बिनेशमान साखःले आगामी दिनमा पनि प्रतिष्ठानले यस्ता तालिमहरू सञ्चालन गर्दै जाने र कर्मचारीको क्षमता बढाउन कृषि विज्ञानका नयाँ प्रविधिबाट नार्कले लाभ लिने बनाउन प्रयत्नरत रहनुपर्ने बताए । प्रतिष्ठानका प्रशासकीय अधिकृत अञ्जली बज्राचार्यले सञ्चालन गरेको उद्घाटन कार्यक्रममा राष्ट्रिय कृषि प्रविधि सूचना केन्द्रका प्रमुख डा. कालिकाप्रसाद उपाध्यायले सहभागी र प्रशिक्षकलाई स्वागत गर्दै प्रतिष्ठानले नार्कभित्रका कर्मचारीलाई समयानुकूल तालिम सञ्चालन गर्नु प्रशंसनीय रहेकोले यस्ता थप तालिम दिनुपर्नेमा जोड दिए । कार्यक्रममा बागवानी अनुसन्धान केन्द्र, मालेपाटनका प्रमुख डा. सुनिल अर्याल, कफी अनुसन्धान कार्यक्रम, गुल्मीका संयोजक जीतनारायण चौधरी, मत्स्य अनुसन्धान केन्द्र, बेगनासका प्रमुख डा. मोहम्मद इकबाल हुसेन, सिमिट नेपालबाट प्रशिक्षक सरल कार्की, नार्कबाट प्रशिक्षक डा. उज्ज्वलकुमार कुशवाह लगायतको उपस्थिति थियो । तालिममा नार्कका विभिन्न कार्यालयमा कार्यरत प्राविधिक, प्राविधिक अधिकृत र वैज्ञानिक गरी १६ जनाको सहभागिता छ । यस्तै तालिम थप कर्मचारीका लागि केही दिनमै राष्ट्रिय धानबाली अनुसन्धान कार्यक्रममा पनि आयोजना गरिने बताइएको छ ।
नयाँ उत्पादन र प्रविधिमा सवा ४ खर्ब लगानी थप्दै टाटा मोटर्स
काठमाडौं । भारतको प्रमुख अटोमोबाइल कम्पनी टाटा मोटर्सले चालु आर्थिक वर्ष २०२४-२५ मा नयाँ उत्पादन र प्रविधिहरू ल्याउन ४ खर्ब ३० अर्ब रुपैयाँ लगानी गर्ने भएको छ। टाटाले हालै ४ खर्ब १० अर्ब २० करोड बराबर लगानी पनि गरेको छ । चालु आर्थिक वर्षमा गर्ने भनिएको लगानी यसबाहेक हो । यो लगानीमा कम्पनीको बेलायती इकाई ज्यागुआर ल्यान्ड रोभर (जेएलआर) ले ठूलो हिस्सा पाउने छ । कम्पनीले जेएलआरमा करिब ३ खर्ब ५० अर्ब रुपैयाँ (३ अर्ब ५० करोड पाउन्ड) लगानी गर्ने छ । हालै टाटाले जेएलआरमा ३ खर्ब ३० अर्ब अर्थात करिब ३ अर्ब ३० करोड पाउन्ड लगानी गरेको थियो भने टाटा मोटर्समा करिब ८० अर्ब रुपैयाँ लगानी गरेको थियो । टाटा मोटर्स समूहका प्रमुख वित्त अधिकारी पीबी बालाजीले भने, ‘जेएलआरको लगानी सन् २०२५ मा करिब ६ प्रतिशतले बढिरहेको छ भने टाटा मोटर्सको लगानी स्थिर छ ।’ उनले जेएलआरमा उत्पादन योजनासँगै आउने भएकाले थप लगानी भइरहेको बताए । उनले जेएलआर र टाटा मोटर्सको लगानी सबै उत्पादन र प्रविधिहरूमा रहेको बताए । जेएलआरले यो वर्ष बजारमा रेन्ज रोभर बीईवी र डिफेन्डर ओक्टा ल्याउन लागेको छ । शेयरखानका एक विश्लेषकले भने, ‘आर्थिक वर्ष २०२५ मा पुँजीगत खर्च ३ अर्ब ५० करोड डलर (३ खर्ब ५० अर्ब रुपैयाँ) हुने अनुमान छ ।’ उनका अनुसार ३ खर्ब ३ अर्ब डलरको योजनाबद्ध पुँजीगत खर्चबीच हालको ७० अर्ब डलरको कुल ऋणको तुलनामा जेएलआर वित्त वर्ष २०२५ मा ऋणमुक्त हुने अपेक्षा गरिएको छ। कार्यरत पुँजी लाभको उल्टाइका कारण जेएलआरले २०२५ को तेस्रो महिनामा तरलता देख्न सक्ने ती विश्लेषको भनाइ छ । गत आर्थिक वर्ष अक्टोबर/डिसेम्बर त्रैमासिकमा जेएलआरको खुद ऋण १ अर्ब ५७ करोड डलरबाट घटेर ७३ करोड २० लाख डलरमा झरेको थियो । भारतमा सवारीसाधन सञ्चालक अब ऋणमुक्त छन् र २०२५ मा समेकित शुद्ध ऋण समानता हासिल गर्ने सम्भावना छ । मोतीलाल ओसवालका विश्लेषकहरूका अनुसार बढ्दो लागतको दबाब ध्यानमा राख्दै जेएलआरको मार्जिन २०२४ देखि २०२६ मा स्थिर रहने आशा गरिएको छ । माग उत्पादन र ईभीहरूको बढ्दो लोकप्रियताले मार्जिनलाई कमजोर बनाउने सम्भावना रहेको उनीहरूको भनाइ छ । विश्लेषकहरूले यस वर्षको अन्त्यसम्ममा कर्भ एसयूभी र अर्को वर्ष सिएरा जस्ता सवारीसाधनहरू सार्वजनिक गरेसँगै भारतको यात्रुवाहक सवारीको बजारमा उछाल आउने अपेक्षा गरेका छन् । एजेन्सी
काठमाडौंमा बिहानैदेखि हावाहुरीसहित वर्षा
काठमाडौंमा हावाहुरीसहित वर्षा भएको छ । आज बिहानैबाट काठमाडौंका अधिकांश स्थानमा हावाहुरीसहित वर्षा भएको हो । काठमाडौंका धेरै स्थानमा अहिले हावाहुरीसहित वर्षा भइरहेको मौसमविद् मीनकुमार अर्यालले जानकारी दिए । उनले भने, ‘अहिले काठमाडौं उपत्यकाको बूढानीलकण्ठ, सुन्दरीजल, धापड्याम, शिवपुरीमा पानी परिरहेको र सबैभन्दा बढी सुन्दरीजलमा वर्षा भइरहेको छ ।’ उपत्यकाको उत्तरी भेगका अधिकांश ठाउँमा वर्षा भइरहेको तथा करिब दुई दिन घण्टा वर्षासहित मौसम बदली भइरहने जल तथा मौसम पूर्वानुमान महाशाखाले जनाएको छ । यसैगरी आज बागमती, कोषी तथा मधेस प्रदेशका एक दुई स्थानमा राति भारी वर्षा हुने सम्भावना रहेको मौसमविद् अर्यालले बताए । स्थानीय वायुको प्रभावले हावाहुरीसहित वर्षा भइरहेको तथा आज काठमाडौंमा हल्कादेखि मध्यम वर्षाको सम्भावना रहेको जल तथा मौसम पूर्वानुमान महाशाखाले जनाएको छ ।
भारतसँग जोडिएको पर्साका सीमानाका तीन दिन बन्द हुने
वीरगञ्ज । भारतमा हुने लोकसभा निर्वाचनलाई लक्षित गर्दै भारतसँग जोडिएको पर्साका सीमानाका तीन दिन बन्द हुने भएको छ । जिल्ला प्रशासन कार्यालय पर्साले यही जेठ १० देखि १२ गते बेलुका ६ बजेसम्म भारतसँग जोडिएका पर्साको सीमानाका बन्द हुने जनाएको छ । जिल्ला प्रशासन कार्यालय पर्साका प्रमुख जिल्ला अधिकारी दिनेशसागर भुसालले भारतको विहार राज्यको पश्चिम चम्पारण जिल्लामा जेठ १२ गते हुने लोकसभा निर्वाचनलाई लक्षित दुई देशबीचको सीमानाका बन्द हुने बताए । ‘दुवै मुलुकमा निर्वाचन हुँदा ४८ घण्टाअगावै सीमानाका बन्द गर्ने परम्पराअनुसार सीमानाका बन्द गर्ने सहमति भएको छ,’ उनले भने, ‘भारतको विहार राज्यको पश्चिम चम्पारण जिल्लामा हुन गरिरहेको निर्वाचनलाई शान्तिपूर्ण र भयरहित वातावरणमा सम्पन्न गर्न शुक्रबार बसेको बिडिसिसी बैठकको निर्णयअनुसार निर्वाचन हुनु ४८ घण्टाअघिदेखि सीमानाका बन्द गर्ने निर्णय भएको छ ।’ पर्साको एक सय सात किलोमिटर सीमा क्षेत्र भारतसँग जोडिएको छ । दुवै मुलुकको बिडिसिसी बैठकको निर्णय र समाहरणालय, पश्चिम चम्पारण, बेतिया (विहार) को पत्रांकको पत्रबाट समेत अनुरोध भएर आएको जिल्ला प्रशासन कार्यालय पर्साले जनाएको छ । नेपालमा निर्वाचन हुँदा पनि भारतको सीमानाका बन्द गर्ने परम्परा रहँदै आइरहेको छ ।
कांग्रेस संसदीय दलको बैठक बस्दै
काठमाडौं । नेपाली कांग्रेसको संसदीय दलको बैठक सोमबार बिहान बस्ने भएको छ । सोमबार नै बस्न लागेको संसद् बैठकमा कसरी प्रस्तुत हुने भन्ने विषयमा छलफल गर्न संसदीय दलको बैठक बस्न लागेको हो । बैठक संघीय संसद् भवन नयाँ बानेश्वरस्थित ल्होत्से हलमा बस्ने छ । संसदीय दल कार्यसमिति र संसदीय दलको बैठक बोलाएको कांग्रेस संसदीय दलका प्रमुख सचेतक रमेश लेखकले जानकारी दिए। कार्यसमितिको बैठक बिहान ८स्३० बजे र दलको बैठक बिहान ९ बजे बस्ने उनले बताए । गृहमन्त्री रवि लामिछाने सहकारीको रकम हिनामिना प्रकणमा संलग्न रहेको भन्दै कांग्रेसले संसदीय छानबिनको माग गरिरहेको छ। गृहमन्त्रीलक्षित छानबिन समिति बनाउने विषयमा सरकारले चासो नदेखाउँदा कांग्रेसले संसद् अवरुद्ध गर्दै आएको छ । सोमबार प्रतिनिधि सभा बैठकमा प्रधानमन्त्री पुष्पकमल दाहाल ‘प्रचण्ड’ले विश्वासको मत लिने तयारी छ ।
सूर्योदय वोमी लघुवित्तको १ लाख ५० हजार कित्ता संस्थापक सेयर बिक्रीमा
काठमाडौं । सूर्योदय वोमी लघुवित्तले संस्थापक सेयर बिक्रीमा ल्याएको छ । संस्थाले ५ जना संस्थापक सेयरधनीको स्वामित्वमा रहेको १ लाख ५० हजार ८०१ कित्ता संस्थापक सेयर बिक्रीमा राखेको हो । विद्यमान संस्थापक सेयधनीहरूका लागि मात्रै यो सेयर बिक्रीमा राखिएको संस्थाले जनाएको छ । सेयर खरिद गर्न चाहने संस्थापक सेयरधनीहरूले सूचना प्रकाशित भएको ३५ दिनभित्र आवश्यक कागजात प्रमाण संलग्न गरी ललितपुर महालक्ष्मीमा रहेको कर्पोरेट कार्यालय वा सेयर रजिष्ट्रार कुमारी क्यापिटलमा पेस गर्नुपर्नेछ । निर्धारित मितिभित्र सेयर खरिदका लागि कुनै आवेदन नपरेमा अन्य व्यक्ति तथा कम्पनीलाई सेयर बिक्री प्रक्रिया अघि बढाइने संस्थाले जनाएको छ ।
इरानका राष्ट्रपति चढेको हेलिकोप्टर दुर्घटना, अवस्था अज्ञात
काठमाडौं । इरानका राष्ट्रपति इब्राहिम रायसी चढेको हेलिकोप्टर दुर्घटना भएको छ । राष्ट्रपति इब्राहिम विदेशमन्त्रीसहित अजरबैजानमा भएको एक कार्यक्रमबाट फर्किने क्रममा हेलिकोप्टर दुर्घटनामा परेर हराइरहेको बीबीसीले जनाएको छ । खराब मौसमका कारण हेलिकोप्टर दुर्घटनामा परेको आशंका गरिएको खबरमा उल्लेख छ । हेलिकाेप्टरमा राष्ट्रपतिसँगै विदेशमन्त्री होसेन अमिर अब्दुल्लाहियान, इरानका सर्वोच्च नेताका प्रतिनिधि अयोतल्लाह मोहम्मद अली अल हसम, इरानको पूर्वी अजरबैजान प्रान्तका गभर्नर मलिक रहमाती र अरु धेरै व्यक्ति रहेका इरानका गृहमन्त्री अहमद वाहिदीले पुष्टि गरेका छन् । हेलिकाेप्टर खोज्न ४० जनाको टोली परिचालन गरिएको छ । इरानको सरकारी सञ्चारमाध्यमकाअनुसार हेलिकप्टरले उडानका क्रममा कठिनाइको सामना गरिएको थियो र ‘हार्ड ल्यान्डिङ’ को प्रयास गरिएको थियो । बीबीसीका अनुसार राष्ट्रपतिको सवारीमा तीन हेलिकाेप्टर संलग्न थिए । यीमध्ये दुई वटाले सुरक्षित अवतरण गरेका छन् ।
