कोशीमा बीमा बढाउन उच्चस्तरीय समिति गठन हुने, प्रदेश बीमा नीति ल्याउने
काठमाडौं । नेपाल बीमा प्राधिकरणको आयोजनामा विराटनगरस्थित कोशी प्रदेश सरकारको सभाहलमा आइतबार सम्पन्न बीमा सम्बन्धी छलफल तथा अन्तरक्रिया कार्यक्रममा प्रदेश सरकारले बीमाको पहुँच विस्तार गर्न उच्चस्तरीय समिति गठन गर्ने र प्रदेश बीमा नीति ल्याउने घोषणा गरेको छ । कोशी प्रदेशका मुख्यमन्त्री हिक्मत कुमार कार्कीले कार्यक्रममा बीमाको दायरा विस्तार गर्दै राहत वितरणभन्दा नागरिकलाई बीमा सुरक्षामा ल्याउन प्राथमिकता दिने बताए । न्यून आय भएका नागरिक र घर बीमालाई विशेष प्राथमिकतामा राख्ने प्रतिवद्धता व्यक्त गर्दै उनले बीमा कम्पनीहरूले समयमा दाबी भुक्तानी नगरेसम्म जनविश्वास नबढ्ने भन्दै कारवाहीका लागि प्राधिकरणलाई निर्देशन दिन आग्रह गरे । नेपाल बीमा प्राधिकरणका अध्यक्ष शरद ओझाले बीमा ऐन र नियमावलीअनुसार बीमा विस्तारका लागि प्रदेश सरकारले देखाएको सक्रियतालाई सकारात्मक रुपमा लिँदै प्रदेशमा ‘बण्डल प्रोडक्ट’ विकास र अभियान सञ्चालन गर्न प्राधिकरण तत्पर रहेको जानकारी गराए । साथै, जङ्गली हात्तीबाट हुने क्षति न्यूनीकरणका लागि हात्ती बीमालेख तयार गर्ने प्रक्रिया अघि बढेको उनले बताए । नेपाल बीमा प्राधिकरणका निर्देशक निर्मल अधिकारीले बीमा बजारको अवस्था, विकासका सम्भावना र प्रदेश सरकारको भूमिकाबारे प्रस्तुति दिएका थिए । अन्तरक्रियामा सहभागीहरूले सबै प्रदेशमा लागू गर्न मिल्ने साझा बीमा नीति बनाउनुपर्ने, संघ र प्रदेशबीच सहकार्य बलियो बनाउनुपर्ने, बीमा दाबी भुक्तानीमा ढिलाइ नगरिनुपर्ने, जङ्गली हात्ती प्रभावित क्षेत्रमा विशेष बीमालेख ल्याउनुपर्ने धारणा राखे । कार्यक्रममा प्रदेशका मन्त्रीहरू, योजना आयोगका उपाध्यक्ष, मन्त्रालयका सचिव तथा नेपाल बीमा प्राधिकरणका कर्मचारीहरूको सहभागिता रहेको थियो । कार्यक्रमको सञ्चालन नेपाल बीमा प्राधिकरण, कोशी प्रदेश कार्यालयका प्रमुख विनोद पोखरेलले गरेका थिए ।
सांसद सुवालको टिप्पणी : विदेशमा निजी बैंकको शाखा खोल्न दिए ‘चोरलाई चौतारो’ हुन्छ
काठमाडौं । नेपाल मजदुर किसान पार्टीका सांसद प्रेम सुवालले विदेशमा निजी बैंकको शाखा खोल्न दिए चोरलाई चौतारो हुने टिप्पणी गरेका छन् । आइतबारको अर्थ समितिमा भएको बैंक तथा वित्तीय संस्थासम्बन्धि बाफिया विधेयकको छलफलमा भाग लिदै उनले यस्तो बताएका हुन् । सरकारी बैंकलाई दिने की निजी बैंकलाई शाखा खोल्न दिने बाफियामा प्रष्ट नभएको भन्दै निजीलाई दिए त्यो खतरनाक हुने बताए । उनकाअनुसार बैंकलले गरेको अनुगमनका प्रतिवेदन गोप्य राख्न नहुने बताए । सांसद सुवालकाअनुसार अनुगमन गरेका प्रतिवेदन सार्वजनिक गर्नुपर्छ । उनले भने– ‘बैंकको शाखा विदेशमा खोल्न दिनुपर्ने व्यवस्था प्रश्ताव गरिएको रहेछ । निजी बैंकको शाखा खोल्न दिए चोरलाई चौतारो हुन्छ । विदेशी बैंकमा खाता खोल्न पनि दिनुहुँदैन । जिल्लाका बैंकमा खाता खोल्ने, कर्जा लिने वातावरण बनाउनुपर्छ ।’ उनकाअनुसार फौजदारी अभियोग लागेकाहरुलाई सार्वजनिक ठाउँमा जान दिनु हुँदैन । फौजदारी अभियोगमा पुष्टी भएपछि सार्वजनिक पदमा जान दिनु भनेको अपराध गर्न प्रोत्साहन गर्नु रहेको उनको भनाई छ ।
अटो हब थापाथलीमा जगदम्बा मोटर्सकाे अत्याधुनिक शोरुम, थप १५ ठाउँमा खोल्दै
काठमाडौं । नेपालका लागि प्रोटोन गाडीको आधिकारिक बिक्रेता जगदम्बा मोटर्सले काठमाडौंको अटोमोबाइल हब मानिने थापाथलीमा आफ्नो नयाँ अत्याधुनिक शोरुम सञ्चालनमा ल्याएको छ । आइतबार एक कार्यक्रमबीच कम्पनीले आफ्नो इलेक्ट्रिक गाडी ‘प्रोटोन ईमास ७’ को नयाँ शोरुम उद्घाटन गरेको हो । कम्पनीका कार्यकारी निर्देशक अखिल गुप्ता, वरिष्ठ उपाध्यक्ष राजु भेटवाल, चर्चित गायिका तथा अभिनेत्री केकी अधिकारी र गायक तथा संगीतकार बृजेश श्रेष्ठले संयुक्त रूपमा रिबन काटेर तथा पानसमा बत्ती बालेर शोरुमको शुभारम्भ गरे । कार्यक्रममा बोल्दै जगदम्बा मोटर्सका कार्यकारी निर्देशक अखिल गुप्ताले थापाथली जस्तो प्रमुख व्यापारिक केन्द्रमा शोरुम स्थापना गर्न पाउनु कम्पनीका लागि गौरवको विषय भएको बताए । उनले प्रोटोन ईमास-७ मलेसिया र चीनमा आफ्नो सेगमेन्टमा सबैभन्दा बढी बिक्री हुने इलेक्ट्रिक गाडी रहेको जानकारी दिँदै यसको सफलता विश्वव्यापी रहेको उल्लेख गरे । गुप्ताले भने, ‘हामीले सन् २०२५ भित्र नक्साल र थापाथलीसहित नेपालभर १५ वटा नयाँ शोरुम खोल्ने योजना बनाएका छौँ । केही महिनाभित्रै हाम्रो सञ्जाल देशभर फैलनेछ ।’ कम्पनीका वरिष्ठ उपाध्यक्ष राजु भेटवालले नेपालको अटोमोबाइल बजार अत्यन्तै चुनौतीपूर्ण रहेको बताए । उनले भने, ‘यो कठिन बजारमा ग्राहकलाई उत्कृष्ट सेवा दिन हामीले ‘कम्पनी आफैंले स्वामित्व लिई सञ्चालन गर्ने’ योजना बनाएका छौं ।’ उनले आगामी महिनाहरूमा भक्तपुर, पोखरा, नारायणघाट र नेपालगञ्जमा पनि थ्रीएस (३ एस) सुविधासहितका शोरुमहरू खोल्ने तयारी भइरहेको जानकारी दिए । कार्यक्रममा चर्चित अभिनेत्री केकी अधिकारीले प्रोटोन ईमास ७ गाडी खरिद गरेकी छन् । उनलाई कार्यकारी निर्देशक गुप्ता र वरिष्ठ उपाध्यक्ष बेटवालले गाडीको हस्तान्तरण गरे । गाडी बुझ्दै अभिनेत्री अधिकारीले गाडीको क्लासिक डिजाइन, आरामदायी भित्री भाग र शंकर ग्रुप जस्तो विश्वसनीय संस्थासँग जोडिएको ब्रान्ड भएकाले आफूले प्रोटोन रोजेको बताइन् । उनले भनिन्, ‘आज तुलसी एकादशीको शुभ दिनमा मैले यो गाडी पाएकी छु । यो गाडीको बनावट र विशेषताहरूले मलाई पहिलो नजरमै आकर्षित गर्यो । मलाई विश्वास छ, यसले मेरो यात्रालाई अझ सहज र सुखद बनाउनेछ । ’ कार्यक्रममा गायक तथा संगीतकार बृजेश श्रेष्ठले आफुले पहिलेदेखि नै प्रोटोन ईमास ७ को गाडी चलाइरहेको अनुभव सुनाए । उनले प्रोटोन ईमास ७ निकै सुरक्षा र यात्राका लागि भरपर्दो भएको दाबी गरे । उनले भने, ‘यो गाडीको फाइभ-स्टार सुरक्षा रेटिङ र लामो यात्राका लागि उपयुक्त हुनु मेरो पहिलो प्राथमिकता हो । मेरो परिवार पनि यो गाडीबाट अत्यन्तै खुसी छ । यसको पफर्मेन्स र आरामले म पूर्ण रूपमा सन्तुष्ट छु । ’ प्रोटोन सन् १९८३ मा मलेसियाको पहिलो राष्ट्रिय कारको रूपमा स्थापना भएको र सन् २०१७ मा चिनियाँ अटोमोबाइल ’जिली’ सँगको साझेदारीपछि प्रविधि र नवीनतामा ठूलो फड्को मारेको उनले बताइन् । ईमास ७ मा १६० किलोवाटको शक्तिशाली मोटर, द्रुत गतिको चार्जिङ क्षमता भएको ब्लेड ब्याट्री र सुरक्षाका लागि ’ सेल-टु-बडी’ जस्ता अत्याधुनिक प्रविधिहरू जडान गरिएको छ । यो मलेसियाको ब्राण्ड हो । दक्षिण एशियासहितका राइट ह्याण्ड ड्राइभ भएका देशमा प्रोटोन इमास-७ उपलब्ध रहेको कम्पनीले जनाएको छ । कम्पनीका अनुसार यो दुई ब्याट्री अप्सनमा छ भने प्राइम र प्रिमियम गरी दुई भेरियन्टमा उपलब्ध छ । दुबै भेरियन्टमा फ्रन्ट ह्वील ड्राइभ १६० किलोवाट क्षमताको पावरफुल मोटर दिइएको छ । यसको पीकटर्क भने ३२० न्यूटन मिटर छ । इमास–७ ले शून्यबाट १०० को स्पीड भेट्टाउन ६.९ सेकेन्ड मात्रै लगाउने कम्पनीले दाबीको छ । एसयूभीको टप स्पीड १७५ किलोमिटर प्रतिघन्टा छ । यस्तै, इमास-७ को भेरियन्ट अनुसार ४९.५२ र ६०.२२ किलोवाट आवर क्षमताको ‘एजिस सर्ट ब्लेड ब्याट्री’ दिइएको छ । यी दुई ब्याट्रीको रेन्ज क्रमशः ३४५ र ४१० किलोमिटर रहने डब्लूएलटीपीले प्रमाणित गरेको छ । कम्पनीका अनुसार उक्त ब्याट्रीलाई ९२१ पटक पुरै चार्ज र डिस्चार्ज गर्दा ९०.५ प्रतिशत ब्याट्री हेल्थसहित ४ लाख किलोमिटर सजिलै गुडाउन सकिने कम्पनीले बताएको छ । मलेसियन बजारमा २३ हजारदेखि २७ हजार अमेरिकी डलर मूल्य पर्छ ।
अप्पर स्याङ्गे हाईड्रोपावरको सेयर रजिष्ट्रार सेवा माछापुच्छ्रे क्यापिटलले गर्ने
काठमाडौं । माछापुच्छ्रे क्यापिटल लिमिटेड र अप्पर स्याङ्गे हाईड्रोपावर लिमिटेडबीच सेयर रजिष्ट्रार सम्बन्धी सेवा प्रदान गर्ने सम्झौता भएको छ । आइतबार हस्ताक्षर गरिएको सम्झौताबमोजिम अप्पर स्याङ्गे हाईड्रोपावरका सेयर अभिलेख राख्ने, दाखिला खारेज, नामसारी, रोक्का राख्ने, लगत अद्यावधिकजस्ता सम्पूर्ण काम माछापुच्छ्रे क्यापिटलले गर्नेछ। सम्झौतापत्रमा माछापुच्छ्रे क्यापिटलका सीईओ उपेन्द्र मालाकार र अप्पर स्याङ्गे हाईड्रोपावरका प्रबन्ध निर्देशक विरबहादुर घलेले हस्ताक्षर गरेका हुन् । अबदेखि सम्पूर्ण सेयर रजिष्ट्रार सेवा माछापुच्छ्रे क्यापिटलको बागदरबारस्थित जेडीए कम्प्लेक्सको तेस्रो तलाबाट सञ्चालन हुनेछ।
एलन मस्कले गठन गरे नयाँ अमेरिका पार्टी, दुई–दलीय प्रणालीलाई चुनौती
काठमाडौं । अमेरिकी राष्ट्रपति डोनाल्ड ट्रम्पका पूर्व सहयोगी एलन मस्कले शनिबार देशको ‘एक–दलीय प्रणाली’ भनेर वर्णन गरेको कुरालाई चुनौती दिन संयुक्त राज्य अमेरिकामा नयाँ राजनीतिक दल स्थापना गरेको बताएका छन् । संसारका सबैभन्दा धनी व्यक्ति तथा सन् २०२४ को चुनावमा ट्रम्पका सबैभन्दा ठूला राजनीतिक दाता मस्कसँग तथाकथित सरकारी दक्षता विभाग (डिओजिई) को प्रमुखका रूपमा खर्च कटौती र सङ्घीय जागिरहरू घटाउने ट्रम्पको प्रयासको नेतृत्व गरेपछि राष्ट्रपतिसँग तीतो मतभेद भएको थियो । मस्कले राष्ट्रपतिको विशाल घरेलु खर्च योजनालाई लिएर ट्रम्पसँग झगडा गरेका छन् । यसले अमेरिकी ऋण विस्फोट गराउनेछ भन्दै उनले यसका लागि मतदान गर्ने सांसदहरूलाई पराजित गर्न आफ्नो शक्तिमा सबै गर्ने वाचा गरेका छन् । अब उनले कथित ‘अमेरिका पार्टी’ आफ्नै राजनीतिक ढाँचा सिर्जना गरेको छ र यसमार्फत त्यो हासिल गर्ने प्रयास गर्नेछन् । हाम्रो देशलाई बर्बादी र भ्रष्टाचारले दिवालिया बनाउने कुरामा हामी एक–दलीय प्रणालीमा बाँचिरहेका छौँ, लोकतन्त्रमा होइन', स्पेस एक्स र टेस्लाका मालिकले आफ्नो सामाजिक सञ्जाल प्लेटफर्म एक्समा पोस्ट गरे, 'आज, अमेरिका पार्टी तपाईंलाई तपाईंको स्वतन्त्रता फिर्ता दिन गठन गरिएको छ ।' मस्कले शुक्रबार, अमेरिकी स्वतन्त्रता दिवसमा अपलोड गरिएको एउटा सर्वेक्षणलाई उद्धृत गरे । उक्त सर्वेक्षणमा उनले उत्तरदाताहरूलाई ‘लगभग दुई शताब्दीदेखि अमेरिकी राजनीतिमा प्रभुत्व जमाएको दुई–पार्टी (कोहीले एक–पार्टी भन्छन्) प्रणालीबाट स्वतन्त्रता चाहन्छन् कि’ भनेर सोधेका थिए । यस सर्वेक्षणले १२ लाखभन्दा बढी प्रतिक्रिया प्राप्त गरेको थियो । 'दुईदेखि एकको अनुपातले, तपाईंहरू नयाँ राजनीतिक दल चाहनुहुन्छ र तपाईंहरूले त्यो पाउनुहुनेछ !' उनले शनिबार पोस्ट गरे । मस्कले दुई टाउको भएको सर्पको चित्र र ‘एक–दलीय प्रणालीको अन्त्य गर’ भन्ने क्याप्सन भएको मिम पनि साझा गरे । जोखिममा रहेका सांसदहरूमा ‘लेजर-फोकस’ नयाँ पार्टीले सन् २०२६ को मध्यावधि चुनाव वा त्यसको दुई वर्षपछि हुने राष्ट्रपतीय निर्वाचनमा कति प्रभाव पार्नेछ भन्ने स्पष्ट छैन । ट्रम्पले कांग्रेसका रिपब्लिकनहरूलाई आफ्नो ठूलो घरेलु एजेन्डा ‘वन बिग ब्युटिफुल बिल’ का रूपमा पारित गर्न दबाब दिएपछि ट्रम्प–मस्क विवाद गत महिनाको अन्त्यमा नाटकीय रूपमा पुनः सुरु भयो । मस्कले कानूनको कडा विरोध गर्नुभयो र ‘ऋण दासत्व’ लाई समर्थन गरेकामा यसका रिपब्लिकन समर्थकहरूलाई निर्दयतापूर्वक आक्रमण गरे । उनले विधेयकको पक्षमा मतदान गर्न सङ्घीय खर्च घटाउन अभियान चलाउने कानून निर्माताहरूलाई चुनौती दिन नयाँ राजनीतिक पार्टी सुरु गर्ने प्रतिज्ञा गरे । विज्ञहरूले यसले अमेरिकी घाटामा एक दशकमा थप ३४ खर्ब डलर थप्ने बताएका छन् । 'यदि यो पृथ्वीमा मैले गर्ने अन्तिम काम भयो भने पनि तिनीहरूले अर्को वर्ष आफ्नो प्राथमिक चुनाव हार्नेछन्', मस्कले यस हप्ताको सुरुमा भने । मस्कले मुख्य खर्च विधेयकको कडा आलोचना गरेपछि ट्रम्पले प्रविधि व्यापारीलाई निर्वासन गर्ने र उनका व्यापारहरूबाट सङ्घीय कोष रोक्ने धम्की दिए । उक्त विधेयक अन्ततः कांग्रेसबाट पारित भएर कानूनमा हस्ताक्षर भयो । दक्षिण अफ्रिकामा जन्मिएका र सन् २००२ देखि अमेरिकी नागरिकता लिएका मस्कलाई निर्वासन गर्नेबारे विचार गर्ने हो कि भनेर सोधिएको प्रश्नमा राष्ट्रपतिले पत्रकारहरूलाई भने, 'हामीले हेर्नु पर्नेछ ।' सर्वेक्षण पोस्ट गरेपछि शुक्रबार मस्कले जोखिममा रहेका सदन र सिनेटका सिटहरू छान्न र मुख्य कानूनहरूमा ‘निर्णायक भोट’ बन्न सम्भावित राजनीतिक युद्ध योजना प्रस्तुत गरे । 'यसलाई कार्यान्वयन गर्ने एक तरिका केवल दुई वा तीन सिनेट सिट र आठदेखि १० सदन जिल्लामा लेजर–फोकस गर्नु हो', मस्कले एक्समा पोस्ट गरे । अमेरिकी सदनका सबै चार सय ३५ सिट प्रत्येक दुई वर्षमा कब्जा गरिन्छ भने सिनेटका एक सय सदस्यमध्ये छ वर्षको कार्यकाल पूरा गर्ने लगभग एक तिहाइ प्रत्येक दुई वर्षमा निर्वाचित हुन्छन् । केही पर्यवेक्षकहरू कसरी तेस्रो–पार्टी अभियानहरूले ऐतिहासिक रूपमा मत विभाजन गरेको छ भनेर औँल्याउन सङ्कोच गरेनन् । व्यापारी रस पेरोटको स्वतन्त्र राष्ट्रपति उम्मेदवारीले सन् १९९२ मा जर्ज डब्लु बुसलाई पराजित गर्न मद्दत गरेको थियो । बुसको पुनः उम्मेदवारीका कारण डेमोक्रेट बिल क्लिन्टनको विजयी भए । 'तपाईँले रस पेरोट तान्दै हुनुहुन्छ र मलाई यो मनपर्दैन', एक एक्स प्रयोगकर्ताले मस्कलाई लेखे । रासस
त्रिवि क्रिकेट मैदानमा कुर्सी जडान सुरु
कीर्तिपुर । कीर्तिपुरस्थित क्रिकेट मैदानको प्यारापिटमा सिट जडान कार्य सुरु भएको छ । रङ्गशालालाई अन्तरराष्ट्रियस्तरमा बनाउन र रातमा खेल सञ्चालन गराउन गत फागुनदेखि काम सुरु भएको हो । यसको पहिलो चरणमा १० हजार दर्शक अट्ने गरी प्यारापिट निर्माण र आठ वटा फ्लडलाइट जडान गरिँदैछ । निर्माणको जिम्मा पाएको बिजी कन्स्ट्रक्सनका इञ्जिनियर सुनील शाहका अनुसार प्यारापिटमा पहेलो सेतो खैरो हरियो नीलो र सुन्तला गरी पाँच रङका कुर्सी जडान हुने छन् । प्यारापिटलाई रङ्गशालाको पश्चिमतर्फ छ र पूर्वतर्फ दुईगरी आठ खण्डमा विभाजन गरिएको छ । प्रत्येक खण्डमा ६५२ कुर्सी राखिनेछन् ।
गैर बैंकिङ सम्पत्ति बैंकका लागि ठूलो चुनौती बन्यो : अध्यक्ष पौडेल
काठमाडौं । बैंक तथा वित्तीय परिसंघका अध्यक्ष उपेन्द्र प्रसाद पौडेलले गैर बैंकिङ सम्पत्ति बैंकिङ क्षेत्रका लागि ठूलो चुनौती बनेको बताएका छन् । आइतबार काठमाडौंमा आयोजित एक कार्यक्रममा बोल्दै उनले यस्तो धारणा राखेका हुन् । नबिल बैंकका अध्यक्ष समेत रहेका पौडेलले विभिन्न नीतिगत व्यवस्थासँगै दिनप्रतिदिन खराब कर्जा बढ्दा गैर बैंकिङ सम्पत्ति चुनौतीपूर्ण बन्दै गएको बताएका हुन् । कार्यक्रममा उनले साना ऋणीलाई ऋण कसरी लिने, व्यवसाय कसरी गर्ने भन्ने लगायत विषयको ज्ञान नहुँदा पनि समस्या भइरहेको धारणा राखे । उनले ऋणीको क्षमता विकासमा बैंकहरु चुकेको धारणा राखे । उनले ‘डिरेक्टिभ लेण्डिङ पोलिसी’ मा पुनरावलोकन गर्न छुट्टै अध्ययन जरुरी भइसकेको बताउँदै यस विषयमा नेपाल राष्ट्र बैंकले पनि तत्काल एक्सन लिनुपर्ने बेला भएको बताए । ‘बैंकिङ क्षेत्रमा सुशासन छ, राज्यका हरेक क्षेत्र बैंकिङ क्षेत्र सरह सुशासनमा चल्नुपर्छ,’ उनले भने, ‘बैंकिङ क्षेत्रले पनि अब आफ्नो टार्गेट पूरा गर्ने हिसाबले मात्रै काम गर्न जरुरी छैन ।’ हरेक क्षेत्रले आफ्ना कमजोरी सुधार गरेर अघि बढ्न जरुरी रहेको उनको भनाइ छ । बैंकिङ क्षेत्रको दिशा बिग्र्यो भने समग्र अर्थतन्त्रको दिशा बिग्रिने उनको धारणा छ ।
सीईओ सन्तोष कोइरालाको प्रश्न : बैंकले कहिलेसम्म लाभांश नबाढ्ने ?
काठमाडौं । नेपाल बैंकर्स संघका अध्यक्ष सन्तोष कोइरालाले बैंकमा पनि कनै लगानीकर्ताको लगानी रहेकोले ती लगानीकर्ताले पनि नियमित प्रतिफल पाउने वातावरण बन्नुपर्ने बताएका छन् । आइतबार काठमाडौंमा आयोजित एक कार्यक्रममा बोल्दै उनले पछिल्लो समय केही नीतिगत कारणले बैंकहरुको लाभांश क्षमता घटेको र केहीले लाभांश वितरण नै गर्न नसक्ने अवस्था रहेकोले यो परिस्थिति कहिलेसम्म रहने भन्ने प्रश्न गरेका हुन् । माछापुच्छ्रे बैंकका प्रमुख कार्यकारी अधिकृत (सीईओ) समेत रहेका उनले कार्यक्रममा भने, ‘बैंकमा पनि कुनै लगानीकर्ताको लगानी छ, पछिल्लो समय बैंकहरु लाभांश दिन सक्ने अवस्थामा छैनन्, बैंकहरुले लाभांश कहिले वितरण गर्न पाउँछन् ? त्यसैले लचिलो नीति आवश्यक छ, लचिलो नीति आयो भने अर्थतन्त्र बाउन्स ब्याक हुन मद्दत पुग्छ ।’ उनले आगामी आर्थिक वर्षको मौद्रिक नीतिमार्फत त्यस्तो सहज नीतिको अपेक्षा व्यक्त गरे । उनले अहिले बैंकिङ क्षेत्रले सम्पत्ति व्यवस्थापनको समस्या भोगिरहेको सुनाए । उनले बैंकको गैर बैंकिङ सम्पत्ति व्यवस्थापनका लागि एउटा शक्तिशाली ‘एसेट म्यानेज्मेन्ट कम्पनी’ आवश्यक रहेको धारणा राखे । ‘बैंकहरुले पनि गैर–बैंकिङ सम्पत्ति बिक्री गर्ने प्रयास गरिरहेका छन् । तर, स्थानीय तहले सहयोग गरेका छैनन् । एउटा घर बिक्रीका लागी स्थानीय तहमा अनुमति माग्दा स्थानीय तहले स्वीकृति दिइरहेको छैन । सम्पत्ति बिक्रीका लागि कुनै पनि निकाय नधाउने गरि सम्पत्ति व्यवस्थापन कम्पनी चाहियो,’ उनले भने । उनले लिलामको सूचनामा फोटो राख्न नपाइने वा नाम उल्लेख नगर्ने व्यवस्थाले मात्रै समस्याको समाधान नहुने तर्क राखे । उनले मौद्रिक नीतिमार्फत ‘डिरेक्टिभ सेक्टर लेण्डिङ पोलिसी’ पनि पुनरावलोकन हुनु पर्ने बताए । अहिले बैंकको औसत आधार दर ६ प्रतिशत हुँदा पनि ८ खर्ब लगानीयोग्य रकम बैंकिङ क्षेत्रमा रहेको सुनाउँदै त्यो रकम प्रवाह हुन सक्ने नीतिको आवश्यकता रहेको धारणा राखे ।
