अब बालुवाटार र नक्सालमा पनि मेलम्चीको खानेपानी
काठमाडौं । प्रधानमन्त्रीको सरकारी निवास बालुवाटार, नक्साल, भाटभाटेनी पूर्वलगायत क्षेत्रमा मेलम्चीको खानेपानी वितरण गरिने भएको छ । खानेपानीमन्त्री प्रदीप यादवका अनुसार खानीपानी पठाउनका लागि आवश्यक पूर्वाधार तयारी अवस्थामा रहेकाले अब चाँडै सो क्षेत्रमा मेलम्चीको खानेपानी पुग्नेछ । खानेपानी मन्त्रालय मातहतको आयोजना कार्यान्वयन निर्देशनालय (पिआइडी) द्वारा आज बालुवाटार क्षेत्रमा मेलम्ची खानेपानी आपूर्ति प्रणालीअन्तर्गतको ‘पाइपलाइन’ बिछ्याइएको क्षेत्रमा अनुगमन तथा निरीक्षणपछि उनले पाइपलाइन बिछ्याउने कार्य सफल भएकाले चाँडै मेलम्चीको खानेपानी वितरण गरिने बताए । मन्त्री यादवले भने, 'बालुवाटारस्थित प्रधानमन्त्री निवास तथा आसपासका क्षेत्रहरूमा मेलम्ची खानेपानी आपूर्ति प्रणालीअन्तर्गत बिछ्याइएको प्राइमरी पाइपलाइन सफलतापूर्वक सम्पन्न गरिएको छ । अब चाँडै मेलम्चीको खानेपानी वितरण गर्छौं । हाल पाइपलाइनको दबाब परीक्षण ‘प्रेसर टेस्ट’ को तयारी तथा कार्यसम्पन्न गर्ने चरणमा रहेको र प्रेसर टेस्ट सफलतापूर्वक सम्पन्न भएपछि बालुवाटार, नक्साल (भाटभटेनी पूर्व), टुडालदेवी, विशालनगर, वङ्शीधर मार्ग पश्चिम तथा सुवर्णशम्शेर सडकमा मेलम्चीको पानी आपूर्ति सुरू गरिने आयोजना कार्यान्वयन निर्देशनालय (पिआइडी) का प्रमुख लक्ष्मी उपाध्यायले जानकारी दिए । उनका अनुसार पानी वितरणपश्चात् उक्त क्षेत्रका करिब तीन हजार ५०० घरधुरी प्रत्यक्ष रूपमा लाभान्वित हुने अपेक्षा गरिएको छ । काठमाडौं उपत्यकाका बासिन्दालाई शुद्ध, स्वच्छ तथा नियमित खानेपानी आपूर्ति गर्ने दीर्घकालीन लक्ष्यअनुरूप उक्त पाइपलाइन बिछ्याउने कार्य निर्माण गरिएको आयोजना कार्यान्वयन निर्देशनालय (पिआइडी) का आयोजना प्रबन्धक अमित रञ्जितले जानकारी दिए ।
न धेरै पैसा, न साझेदारी : रिलायन्स इन्डस्ट्रीज एक्लै किन अघि बढ्न खोज्दैछ ?
काठमाडौं । क्विक कमर्स बजारमा तीव्र रूपमा विस्तार भइरहँदा मुकेश अम्बानीको नेतृत्वमा रहेको रिलायन्स इन्डस्ट्रीजले भने निकै सावधानीपूर्वक पाइँला चालिरहेको छ । कम्पनीले यो क्षेत्रमा धेरै पैसा नलगाई र कुनै साझेदारी नगरी आफ्नै नेटवर्क निर्माणमा केन्द्रित हुने रणनीति अगाडि सारेकाे छ । कम्पनीका अनुसार हालको बजार विश्लेषणबाट देखिएको छ कि क्विक कमर्समा सक्रिय केही कम्पनीहरूको खरिद आर्थिक रूपमा लाभदायक नदेखिएकाले रिलायन्सले आत्मनिर्भर योजना रोजेको हो । भारतीय इकोनॉमिक टाइम्सका अनुसार रिलायन्स रिटेलका मुख्य वित्त अधिकृत दिनेश तालुजाले एक बैठकमा भने, 'हामी कुनै पनि यस्तो अवसर छुटाउन चाहँदैनौं, जहाँ हामी प्रतिस्पर्धा गर्न सक्दैनौं । अर्ग्यानिक (प्राकृतिक) वृद्धि र इनअर्ग्यानिक (कम्पनी खरिद) विस्तारबारे चाखलाग्दो बहस छ । तर अरू कम्पनीलाई आफ्नै नेटवर्कमा समाहित गर्नु चुनौतीपूर्ण हुन्छ । त्यसैले हामी आफ्नै बलियो नेटवर्क निर्माणमा केन्द्रित छौं, र हामीसँग पहिलेबाटै ठूलो ग्राहक समूह पनि छ ।' तालुजाका अनुसार, रिलायन्सले ‘डार्क स्टोर’ भनिने विशेष गोदामहरू स्थापना गरिरहेको छ, जुन स्थानहरूमा माग उच्च छ तर हालको स्टोर सञ्जालले पर्याप्त सेवा दिन सक्दैन, वा जहाँ कम्पनीको उपस्थिति अझै पुगेको छैन । उनले भने, 'यो रणनीति हाम्रो लागि लाभदायक छ, किनकि हामी पहिले नै भएका पूर्वाधारहरूलाई सदुपयोग गर्न सक्छौं । हाम्रा अधिकांश डार्क स्टोरहरू पहिलो दिनदेखि नै नाफामा चलिरहेका छन् ।' भारतमा ई-कमर्स बिक्रीमा क्विक कमर्सको योगदान वर्षेनी दोब्बर दरमा बढिरहेको छ, यद्यपि यसको बजार हिस्सा अहिले पनि ३.६ प्रतिशत सीमामा सीमित छ । सुरुमा किराना वा दैनिकीका उपभोग्य सामग्रीमा केन्द्रित यो च्यानल अहिले प्रिमियम उत्पादनहरूसमेत समेट्दै तीव्र गतिमा फैलिएको छ । हालैको अध्ययनअनुसार, भारतको क्विक कमर्स बजार लगभग १० अर्ब अमेरिकी डलरसम्म पुगेको छ, जसमा झन्डै ३० मिलियन ग्राहक मासिक रूपमा किनमेल गर्छन् । यद्यपि, यसको झन्डै ८० प्रतिशत कारोबार अझै महानगरहरूमा सीमित छ, र साना शहरतिर मुनाफासहितको विस्तार अझै चुनौतीपूर्ण देखिएको छ । जीयोमार्ट, फ्लिपकार्ट र अमेजनजस्ता ठूला खेलाडीहरूको उपस्थितिपछि पनि ब्लिंकिट, इंस्टामार्ट, जेप्टोजस्ता स्टार्टअपहरू क्विक कमर्सको अगुवा बनेका छन् । यिनको तुलनामा रिलायन्सले साझेदारी वा खरिदको बाटो रोज्ने भन्दा पनि आफ्नो पूर्वाधारमा आधारित अर्ग्यानिक मोडेलमा विश्वास राखिरहेको देखिन्छ । बढ्दो अर्डर र आन्तरिक वृद्धिदर रेडसियरको पछिल्लो रिपोर्टअनुसार, २०२५ को पहिलो पाँच महिनामा भारतको क्विक कमर्स उद्योग १५० प्रतिशतले वृद्धि भएको छ । यसको पछाडि मुख्य कारणहरूमा डार्क स्टोरहरूको वृद्धि, सामानको विविधता र उपलब्धता, र प्रतिस्पर्धात्मक मूल्य छन् । रिलायन्सको हकमा, २०८२ सालको पहिलो त्रैमासमा कम्पनीले दैनिक अर्डर संख्यामा अघिल्लो त्रैमासिकको तुलनामा ६८ प्रतिशत वृद्धि गरेको छ भने गत वर्षको तुलनामा यो दर १७५ प्रतिशत पुगेको जनाएको छ।
वीपी कोइरालाको ४३औँ स्मृति दिवसमा विविध कार्यक्रमसहित मनाइँदै
काठमाडौं । वीपी कोइरालाको ४३ औँ स्मृति दिवसको अवसरमा भोलि बिहान ८ बजे वीपी स्मृति अस्पताल, वसुन्धरामा विभिन्न कार्यक्रमहरू आयोजना गरिने भएका छन् । नेपाली कांग्रेसका शीर्ष नेताहरूको विशेष सहभागितामा हुने कार्यक्रमहरूको मूल उद्देश्य वीपी कोइरालाको विचार र योगदानको स्मरण गर्नु रहेको वीपी स्मृति अस्पतालका अध्यक्ष उमेश जंग रायमाझीले जानकारी दिए । दिवसको मुख्य आकर्षणस्वरूप 'देश विकास र देशवासीको उन्नतिको आधार विपी विचार' विषयक विचार गोष्ठी आयोजना गरिने छ । उक्त गोष्ठीमा प्रमुख अतिथिका रूपमा नेपाली कांग्रेसका सभापति तथा पूर्वप्रधानमन्त्री शेरबहादुर देउवाको सहभागिता रहने अध्यक्ष रायमाझीले जानकारी दिए । यसै अवसरमा, पूर्वअध्यक्ष डा. शेखर कोइरालाले वीपी स्मृति अस्पतालमा फलफूल वितरण कार्यक्रमको उद्घाटन गर्नेछन् । अस्पतालकै आयोजनामा रक्तदान कार्यक्रम पनि तय गरिएको छ, जसको शुभारम्भ महामन्त्री विश्वप्रकाश शर्माले स्वयं रक्तदान गरेर गर्नेछन् । इच्छुक रक्तदाताहरूलाई सम्पर्क गर्न आयोजकले आग्रह गरेको छ । स्वास्थ्य सेवामा पहुँच पुर्याउने उद्देश्यले मन्त्री प्रदीप पौडेलको प्रमुख आतिथ्यमा निःशुल्क स्वास्थ्य परीक्षण कार्यक्रमको समेत आयोजना गरिएको छ । साथै, पूर्वमन्त्री शशांक कोइरालाको उपस्थितिमा वृक्षारोपण कार्यक्रम सञ्चालन गरिनेछ । वीपी कोइरालाको स्मृतिमा विशेष सांस्कृतिक कार्यक्रम अन्तर्गत ऐतिहासिक चलचित्र नालापानीको विशेष प्रदर्शनसमेत गरिनेछ । वीपी स्मृति अस्पताल २०६४ साल असोज १३ गते स्थापना भएको हो । स्वास्थ्य सेवा र जनशक्ति उत्पादनमा केन्द्रित यस संस्थाले सातै प्रदेशका जनतालाई लक्षित गरी सेवा दिँदै आएको छ । हाल अस्पतालबाट विशेषज्ञहरूमार्फत विभिन्न रोगको उपचार तथा शल्यक्रियासमेत उपलब्ध गराइँदै आएको छ । स्टाफ नर्स र हेल्थ असिस्टेन्ट तहमा नियमित पढाइ सन्चालनमा रहेको संस्थाले २०६९ सालदेखि वार्षिक ४० जना स्वास्थ्यकर्मी उत्पादन गर्दै आएको छ । अस्पतालले लोपोन्मुख जातजाति, अति गरिब र दुर्गम क्षेत्रका नागरिकलाई निःशुल्क सेवा प्रदान गर्दै आएको छ भने अन्य सेवामा पनि १०–२५ प्रतिशतसम्म छुट प्रदान गर्दै आएको छ । हालै मातातीर्थमा स्वास्थ्य शिविर सञ्चालन गरिएको थियो । आगामी दिनमा देशका सबै प्रदेशमा सेवा विस्तार गर्ने लक्ष्यसहित वीरगञ्जमा सेवा सुरु गर्ने तयारी गरिएको छ ।
एनआईसी एशिया बैंक २८ औं वर्षमा प्रवेश
काठमाडौं । एनआईसी एशिया बैंकले आफ्नो स्थापनाको २८ औं वार्षिकोत्सव मनाएको छ । 'बैंक पनि साथी पनि, राम्रो पनि हाम्रो पनि' भन्ने नारालाई आत्मसात् गर्दै बैंकले आफूलाई विश्वसनीय, उत्तरदायी र प्रविधिमैत्री बैंकिङ सेवाको नमुनाका रूपमा स्थापित गरेको छ । २८ वर्षको दौरानमा ग्राहाकहरुको अगाध स्नेह एवं भरोसा पाएको बैंकले जनाएको छ । नेपालको वित्तीय क्षेत्रमा जति योगदान गर्न सफल भएका छौँ त्यसको सम्पूर्ण श्रेय ग्राहकहरुलाई नै जाने बैंकले विज्ञप्तीमा उल्लेख गरेको छ । यस्तै आगामी दिनहरुमा पनि अझ विश्वस्तरीय, अत्याधुनिक, प्रविधिमैत्री, ग्राहकमैत्री तथा अनुकरणीय अनुभव सहितको बैंकिङ्ग सेवा एवं सुविधाहरु प्रदान गर्दै सबै सरोकारवालाहरुको पहिलो रोजाईको बैंक बन्ने अठोट बैंकले गरेको छ । डिजिटल फष्ट बैंक बन्ने अभिप्रायले बैंक भौतिक उपस्थितिलाई समेत दरिलो बनाउँदै स्थापनाकालदेखि हालसम्म आइपुग्दा मुलुकभर ३६० शाखाकार्यालयहरू, ६७० एटिएम, ११६ वटा विस्तारित काउन्टर एवं ४२ वटा शाखारहित शाखा सञ्जालबाट लाखौं ग्राहकहरुमाझ गतिशील बैंकिङ्ग पार्टनरको रुपमा जोडिएको छ । देशको अर्थतन्त्रको सवलीकरण तथा उच्च आर्थिक वृद्धिमा टेवा पुर्याउन उत्तरदायी बैंकिङ्गको अभ्यास गर्दै डिजिटल भुक्तानीलाई अझ सशक्त बनाउँदै वित्तीय समावेशीकरणका लागि मुगु, कालिकोट, बझाङ, रूकुम, जुम्ला, सल्यान जस्ता बैंक तथावित्तीय संस्थाहरूको उपस्थिति न्यून रहेका दुर्गम जिल्लाहरूमा समेत शाखाविस्तार गरी निर्वाध रुपमा बैंकिङ्ग सेवा देशको कुनाकुनामा पुर्याउन बैंक सफल भएको विज्ञप्तीमा भनिएको छ ।
म्यानमारको अन्तर्राष्ट्रिय अटो एक्स्पोमा चिनियाँ ईभीहरूको बाहुल्यता
काठमाडौं । म्यानमारको अन्तर्राष्ट्रिय अटो एक्स्पोमा चिनियाँ ईभीहरूको बाहुल्यता छ । याङ्गुन कन्भेन्सन सेन्टरमा चिल्लो विद्युतीय सवारी साधनहरू प्रदर्शन गरिएका थिए । चम्किलो ड्यासबोर्डहरू, एआई सुविधाहरू र उत्सुक भीडले सफा अटोमोटिभ भविष्यमा म्यानमारको बढ्दो चासोलाई उजागर गरेको छ । तीन दिने म्यानमार अन्तर्राष्ट्रिय अटो एक्स्पो २०२५ मा ३० भन्दा बढी ब्राण्डहरू रहेका थिए । जसमध्ये धेरैजसो चिनियाँ थिए ।
ग्लोबल आइएमई समुन्नत योजना–२ को बाँडफाँट सम्पन्न
काठमाडौं । ग्लोबल आइएमई बैंक लिमिटेड कोष प्रवर्द्धक र ग्लोबल आइएमई क्यापिटल लिमिटेड योजना व्यवस्थापक रहेको ‘ग्लोबल आइएमई समुन्नत योजना–२ अन्तर्गतको इकाई बाँडफाँट प्रक्रिया सम्पन्न भएको छ । प्रति इकाई अंकित मूल्य १० रुपैयाँ दरका १० करोड २० लाख इकाई सार्वजनिक निष्कासनमा ल्याइएको उक्त योजनाको असार २२ गतेदेखि छिटोमा असार २५ र ढिलोमा श्रावण ४ गतेसम्म बिक्री खुला गरिएको थियो । तर छिटोमा अर्थात असार २७ गतेभित्रै मागभन्दा बढी आवेदन प्राप्त भएकाले निष्कासन प्रक्रिया समयभन्दा अगावै बन्द गरिएको हो । मागभन्दा बढी आवेदन प्राप्त भएमा निष्कासन गरिएको इकाईको अधिकतम २५ प्रतिशतसम्म थप गरी बाँडफाँट गर्न सकिने व्यवस्था अनुसार यस योजनाको कुल इकाई संख्या १२ करोडमा २५ प्रतिशत थप गर्दै १५ करोड पुर्‍याइएको हो । बाँडफाँट गरिएको १५ करोड इकाईमध्ये १५ प्रतिशत अर्थात २ करोड २५ लाख इकाई बीज पूँजीका लागि छुट्याइएको थियो । सोहीअनुसार कोष प्रवर्द्धक ग्लोबल आइएमई बैंकलाई १३.५० प्रतिशत अर्थात २ करोड २ लाख ५० हजार इकाई र योजना व्यवस्थापक ग्लोबल आइएमई क्यापिटललाई १.५० प्रतिशत अर्थात २२ लाख ५० हजार इकाई मिति २०८२ असार ३० गते बाँडफाँट गरिएको छ । बीज पूँजी बाँडफाँट पश्चात बाँकी रहेको १२ करोड ७५ लाख इकाई सर्वसाधारणलाई बाँडफाँट गर्न सिडिएस एण्ड क्लियरिङ लिमिटेडको सि-आस्वा प्रणालीमार्फत ३५ हजार ८०२ वटा आवेदनबाट कुल १३ करोड ९ लाख ३३ हजार ५१० इकाईका लागि आवेदन प्राप्त भएको थियो ।
साउनको पहिलो सोमबार पशुपतिमा भक्तजनको भीड (तस्बिरसहित)
काठमाडौं । आज साउन महिनाको पहिलो सोमबार । काठमाडौंको पशुपतिनाथ मन्दिरसहित देशभरका शिवालयमा भक्तजनहरूको भीड लागेको छ । काठमाडौंको पशुपतिनाथमा बिहानैदेखि भक्तजनहरूको भीड देख्न सकिन्छ । साउने सोमबारको पूजाआज गर्न आएका दर्शनार्थीका लागि बिहान साढे ३ बजेदेखि नै चारै ढोका खुला गरेर भक्तजनलाई दर्शन गराइएको छ । दर्शनार्थीका लागि सुरक्षा, स्वयंसेवक परिचालन, दर्शन व्यवस्थापन, स्वास्थ्य शिविर, खानेपानी लगायत व्यवस्थापन गरिएको पशुपति क्षेत्र विकास कोषले जनाएको छ । साउन महिना र सोमवार भगवान शिवजीको महिना र वार भएकाले पनि यस अवसरमा धेरै भक्तजनको भीड लाग्ने गर्छ । साउन महिनामा पशुपतिनाथ मन्दिरमा सुन्दरीजलबाट बोल बम यात्रा गरी जल चढाउने भक्तजनको पनि भीड लाग्ने गर्दछ । बोल बम यात्रा गरी सुन्दरीजलबाट शुद्ध जल ल्याएर पशुपतिनाथमा चढाउने चलन छ । काठमाडौं उपत्यकामा पशुपतिनाथसहित, गोकर्णेश्वर, सन्तानेश्वर, डोलेश्वर, किराँतेश्वर, भालेश्वरसहित, काभ्रेपलाञ्चोकको साँगा, तनहुँको देवघाट, म्याग्दीको गलेश्वर लगायतका शिवालयमा भक्तजनहरु बिहानैदेखि स्नान गरी महादेवको पूजाआराधनामा व्यस्त छन् ।
मञ्जुश्री फाइनान्सको न्यूरोड शाखा स्थानान्तरण, नयाँ स्थानबाट सेवा सुरु
काठमाडौं । मञ्जुश्री फाइनान्स लिमिटेडको न्यूरोड शाखा काठमाडौं महानगरपालिका–२२, खिचापोखरी, न्यूरोडस्थित हालको स्थानबाट करिब ५० मिटर उत्तरतर्फ स्थानान्तरण भई आइतबारदेखि नयाँ स्थानबाट सेवा प्रवाह सुरु गरिएको छ । नयाँ शाखा कार्यालयको उद्घाटन फाइनान्सका सञ्चालक समिति अध्यक्ष सुमन प्रसाद अधिकारीले गरेका हुन् । शाखा स्थानान्तरणको उद्देश्य ग्राहक सेवा अझ सहज र प्रभावकारी बनाउने रहेको शाखा प्रमुख सन्जीब श्रेष्ठले जानकारी दिए । मञ्जुश्री फाइनान्सले हालसम्म करिब २३ अर्ब रुपैयाँ निक्षेप संकलन गरी १८.८ अर्ब रुपैयाँ कर्जा परिचालन गरिसकेको छ। फाइनान्सले निक्षेपमा प्रतिस्पर्धी ब्याजदर र सुलभ कर्जा सुविधा प्रदान गर्दै आइरहेको छ। हाल २७ वटा शाखा र १ वटा विस्तारित काउन्टरमार्फत सेवा दिइरहेको यस संस्थाले १ लाख ५० हजारभन्दा बढी सन्तुष्ट ग्राहकहरूलाई सेवा पुर्याइरहेको छ। देशकै अग्रणी फाइनान्स कम्पनीहरूमध्ये एकको रूपमा परिचित मञ्जुश्री फाइनान्स उत्कृष्ट बैंकिङ सेवा विस्तारमा प्रतिबद्ध रहेको जनाएको छ।
