१७ किलो सुनसहित एक युवक पक्राउ
लमजुङ । अन्नपूर्ण पदमार्गअन्तर्गत लमजुङको खुदीमा १७ किलो सुनसहित एक युवकलाई प्रहरीले पक्राउ गरेको छ । मनाङको नासोङ गाउँपालिका-९, दानाक्युका ३१ वर्षीय पासाङ गुरुङलाई प्रहरीले बिहीबार पक्राउ गरेको हो । मनाङबाट बेँसीशहरतर्फ मोटरसाइकलमा आएका गुरुङ जाँचका क्रममा पक्राउ परेका हुन् । प्रहरी जाँचका क्रममा उनी भाग्न खोजेका र भाग्दै गर्दा खुदी बजार क्षेत्रबाट प्रहरीले पक्राउ गरेको हो । युवकबाट एक किलो लेखिएको १७ थान सुन समातिएको प्रहरी नायब उपरीक्षक पदमबहादुर विष्टले बताए । प्रहरीले ती युवकले सुन बोक्न प्रयोग गरेको बा५८प ४२९१ नं को मोटरसाइकलसमेत नियन्त्रणमा लिएको छ । सदरमुकाम बेँसीशहरबाट करिब सात किमी उत्तरतर्फ मनाङ जाने बाटोमा युवक समातिएका हुन् । सुनलाई तिब्बतको सीमाबाट मनाङ हुँदै ल्याइएको हुन सक्ने अनुमान गरिएको छ । रासस
बैंकहरुको नाफा घट्न थाल्यो, लगानीकर्ताले कमाउने दिन सकिएकै हुन् र?
काठमाडौं । स्थानीय निर्वाचनको सफलता तथा संघ र प्रदेशको निर्वाचन सम्मुखमै आइपुग्दा केहि बैंकहरु भने नाफा बढाउन असफल भएका छन् । निर्वाचनले अर्थतन्त्रलाई चलायमान बनाउने र बैंकहरुको पनि बजार बढ्ने बताइँदै आएका बेला लगानीकर्तालाई निराश पार्ने गरी बैंकको नाफा घटेको छ । चालु आर्थिक वर्षको पहिलो त्रैमाशिक वित्तीय विवरण सार्वजनिक गरेका आधा दर्जन बैंक मध्ये ३ वटाको नाफा घटेको छ भने ३ वटाको बढेको छ । हिमालयन बैंक, मेगा बैंक र सिटिजन्स बैंकले पहिलो त्रैमासिकमा आफ्नो नाफा बढाउन सकेनन् । नविल बैंक, प्राइम कमर्शियल बैंक, एनएमबी बैंक र सानिमा बैंकको नाफा बढेपनि सन्तोषजनक छैन् । यसबाट चालु आर्थिक वर्षमा बैंकको नाफा धेरै नबढ्ने देखिएको छ । ‘गत बर्ष ६ महिनासम्म झेलिएको तरलता अभावले ब्याजदर १३ प्रतिशतसम्म पुगेको थियो, अहिले त्यसकै परिणाम भोगिँदैछ’, बैंकर्स संघका अध्यक्ष समेत रहेका मेगा बैंकका सिइओ अनिल शाहले भने । शाहले नेतृत्व गरेको मेगा बैंकको नाफा घटेर ८ करोड ११ लाख रुपैयाँमा खुम्चिएको छ । मेगा बैंकले गत आवको पहिलो त्रैमासिकमा १४ करोड रुपैयाँ ६९ रुपैयाँ नाफा कमाएको थियो । बैंकको नाफा घटेपछि प्रतिसेयर आम्दानी १७.२७ बाट घटेर १.७७ प्रतिशतमा खुम्चिएको छ । त्यस्तै, सिटिजन्स बैंकको नाफा पनि ३४ करोड ५१ लाखबाट खुम्चिएर ३१ करोडमा झरेको छ । ३ महिनामा सिटिजनले ३ करोड रुपैयाँ नाफा घटेको उसले सार्वजनिक गरेको वित्तीय विवरणमा उल्लेख छ । नाफा घटेपछि सिटिजन्सको प्रतिसेयर आम्दानीमा गिरावट आएर १५ रुपैयाँ ९० पैसामा झरेको छ । हिमालयन बैंकको पनि नाफा ३ करोड रुपैयाँ घटेको छ । बैंकले गत आवको पहिलो त्रैमासिकमा ४३ करोड ८४ लाख नाफा कमाएको थियो तर चालु आवको सोही अवधीमा जम्मा ४१ करोड मात्रै नाफा कमाउन सफल भएको देखिन्छ । आखिर किन घट्यो त बैंकको नाफा ? बैंकर्स संघको अध्यक्ष शाह भन्छन–‘तरला अभाव भएको ६ महिनाको ब्याजदर, दशैं तिहारमा ऋण असुलीमा ढिलाईले पहिलो त्रैमासिकमा नाफा घट्यो ।’ उनले त्रैमासिक सकिएको १५ दिन भित्रै वित्तिय विवरण बुझाउनुपर्ने बाध्यात्मक कारणले पनि नाफा कम देखिएको दावी गरे । ‘राष्ट्र बैंकले १५ दिनभित्र वित्तिय विवरण बुझाउन भनेको छ, त्यसले १६ औं दिन हुने आम्दानीलाई समेट्न सकिएन, त्यसैले पनि नाफा थोरै देखिएको हो’, शाहले भने । उनका अनुसार बैंकहरुले पुँजी वृद्धिकै मात्रामा बजार बढाउन लगानीका नयाँ स्रोतहहरुको व्यापक खोजी गरिरहेका छन् । २ सय वटा स्थानीय तहमा शाखा विस्तारसँगै गाउँ गाउँमा वित्तिय पहुँच पुगेको र त्यसले नयाँ बजार पाएसँगै दोश्रो त्रैमासिकमा बैंकहरुको नाफामा उल्लेख्य वृद्धि हुने दावी पनि उनले गरे । आसन्न निर्वाचनपछि स्थानीय, प्रदेश र केन्द्र सरकारले गर्ने विकास खर्चले बैंकहरुको नाफा बढाउन ठुलो योगदान दिने आशा पनि उनले व्यक्त गरे । उता, नेपाल राष्ट्र बैंकका सहायक प्रवक्ता राजेन्द्र पण्डितले एकाध कम्पनीहरुलाई आधार मानेर बैंकहरुको नाफा घटेका भन्न नमिल्ने बताए । ‘कुनै बैंकले पहिलो त्रैमासिकमै झण्डै एक अर्ब कमाएका पनि छन, केहि बैंकले भने नाफा घटाएको देखिन्छ’, सहायक प्रवक्ता पण्डितले भने । उनले कम्पनीहरुलाई छुट्टा छुट्टै अध्ययन गरेपछि मात्रै कुनै बैंकको नाफा किन ह्वात्तै बढेको र कुनैको घटेको बारे भन्न सकिने स्पष्ट पारे । सानिमा बैंकका सिइओ भुवन दाहालले पनि बैंकहरुका लागि सुनौला दिन सकिएको बताउँदै आएका छन् । उनले पुँजी वृद्धिको तुलनामा बजार र नाफा बढाउन निकै चुनौती बढ्दै गएको बताए । उनी नेतृत्वको बैंक सानिमाले ३ महिनामा ७ करोड रुपैयाँ नाफा बढाएपनि प्रतिसेयर आम्दानी भने घटेको छ ।
काँग्रेसले ४५ जिल्लामा केन्द्र र प्रदेशसभाका उम्मेदवार टुङायो, हेर्नुस को को परे ?
काठमाडौं । आगामी मंसिर २१ गते हुने प्रदेशसभा तथा प्रतिनिधिसभाको दोस्रो चरणको चुनावमा नेपाली काँग्रेसले उम्मेदवार छनौट गरेको छ । ४५ जिल्लामा हुन लागेको चुनावमा १२८ केन्द्रका लागि प्रत्यक्ष र २५६ जना प्रदेशसभाका लागि उम्मेदवार छनौट गरेको काँग्रेसले जनाएको छ । (काँग्रसका उम्मेदवार जान्नको लागि यहाँ क्लिक गर्नुहोस्।)
पाँच वर्षमुनिका बालबालिकालाई भिटामिन ‘ए’ र जुकाको औषधि खुवाइँदै
काठमाडौं । देशभरका बालबालिकालाई आज र भोलि(कात्तिक १६ र १७ गते) भिटामिन ‘ए’ र जुकाको औषधि खुवाइँदै छ । स्वास्थ्य मन्त्रालयले देशभरका छ महिनादेखि पाँच वर्षमुनिका २७ लाख बालबालिकालाई भिटामिन ‘ए’ र एक वर्षदेखि पाँच वर्षमुनिका २३ लाख बालबालिकालाई जुकाको औषधि खुवाउने लक्ष्य राखेको छ । स्वास्थ्य सेवा विभाग बाल स्वास्थ्य महाशाखाका पोषण शाखा प्रमुख राजकुमार पोखरेलले देशभरका ५० हजारभन्दा बढी महिला स्वास्थ्य स्वयंसेविका परिचालन गरिएकोे जानकारी दिए । गत कात्तिक २ र ३ गते देशभरका बालबालिकालाई खुवाउने भनिएको भिटामिन ‘ए’ र जुकाको औषधि खुवाउने कार्यक्रम निर्धारण भए पनि तिहारका कारण आज र भोलि सारिएको हो । भिटामिन ‘ए’ को कमीले भविष्यमा बालबालिकालाई रतन्धो रोग लाग्ने, कुपोषण हुने, दीर्घकालीन झाडा पखाला लाग्ने, दादुरालगायतका रोग लाग्ने चिकित्सकले बताएका छन् । सरकारले हरेक छ महिनामा भिटामिन ‘ए’ र जुकाको औषधि खुवाउने गरेको छ । पोखरेलले तराईका २८ जिल्लाका बालबालिकामा रक्तअल्पता पनि अत्यधिक देखिएकाले छ महिनादेखि दुई वर्षसम्मका बालबालिकालाई आइरन भएको धुलो बालविटा पनि खुवाइने बताए । उनले हरेक बालबालिकालाई कुपोषण छ कि छैन भनेर जाँच गरी भएका बालबालिकालाई नजिकको स्वास्थ्य संस्थामा सिफारिस गरी पठाउन पनि महिला स्वास्थ्य स्वयंसेविकालाई सूचित गरेको बताए । रासस
भूकम्प अति प्रभावित स्थानीय तहका वडामा प्राविधिक खटाइने
काठमाडौं । राष्ट्रिय पुनः निर्माण प्राधिकरणले भूकम्प अति प्रभावित १४ जिल्लाका स्थानीय निकायका वडामा कम्तीमा एकजना प्राविधिक खटाउने निर्णय गरेको छ । प्राधिकरणका प्रमुख कार्यकारी अधिकृत युवराज भुसालको संयोजकत्वमा बसेको ८९औँ कार्यकारी समितिको बैठकले शहरी विकास मन्त्रालय, केन्द्रीय आयोजना कार्यान्वयन एकाईबाट निजी आवास पुनः निर्माणका लागि जिल्लामा खटिएका तथा प्राधिकरणबाट नयाँ नियुक्त हुने प्रक्रियामा रहेका इञ्जिनियर, सब-इञ्जिनियर र ओभरसियरमध्येबाट भूकम्प अति प्रभावित १४ जिल्लाका स्थानीय तहको प्रत्येक वडामा कम्तीमा एकजना प्राविधिक पुग्ने गरी खटाउने निर्णय गरेको हो । भूकम्प कम प्रभावित १७ जिल्लामा भने लाभग्राही सङ्ख्याका आधारमा निजी आवास पुनः निर्माण कार्यमा पर्याप्त हुने गरी प्राविधिक खटाउने व्यवस्था मिलाई पुनः निर्माणमा तीव्रता दिने निर्णय पनि प्राधिकरणले गरेको छ । स्थानीय तहमा निर्वाचित जनप्रतिनिधि र सरोकारबाला बीच छलफल गरेर पुनः निर्माणमा देखिएका समस्या पहिचान गर्ने, समस्या समाधानको उपाय खोजी गर्ने र पुनः निर्माणमा स्थानीय तहको साझेदारीको विधि तय गर्ने उद्देश्यले निर्वाचित जनप्रतिनिधि, सम्बद्ध मन्त्रालय, विभाग, नेपाल राष्ट्र बैंक एवं बैंकर्स एशोसिएशन लगायतका सरोकार भएका संस्थासँग शुक्रबार छलफल गर्ने निर्णय पनि भएको प्राधिकरणका प्रवक्ता यमलाल भुसालले जानकारी दिए । पुनः निर्माण गरेका र गर्न चाहने भूकम्पपीडितले स्थानीय तहमा प्राविधिक नभेट्दा समस्या भएको गुनासो गरेपछि कार्यकारी समितिको बैठकले यस्तो निर्णय गरेको प्राधिकरणले जनाएको छ । रासस
वोमी माइक्रोफाइनान्सको सेयर मूल्य समायोजन, प्रतिकित्ता १५०० रुपैयाँ मात्र
काठमाडौं । बिहीबार वोमी माइक्रोफाइनान्सको सेयर मूल्य समायोजन भएको छ । नेप्सेले कम्पनीको २० प्रतिशत बोनस सेयर पछिको सेयर मूल्य समायोजन गरेको हो । समायोजन पश्चात कम्पनीको सेयर मूल्य प्रतिकित्ता १५५० रुपैयाँ रहको छ । जसको आधार मूल्य प्रतिकित्ता १४२९ रुपैयाँ रहेको थियो ।
दुध उत्पादक कृषकलाई खुशीको खबर, १ लिटर दुधमा १ रुपैयाँ सरकारी अनुदान
काठमाडौं । सरकारले देशभरका कृषकलाई दूधको उत्पादनमा एक रुपैयाँ अनुदान कार्यक्रम सुरु गरेको छ । पशु सेवा विभागले १ लिटर दूध उत्पादन बापत कृषकलाई एक रुपैयाँ अनुदान दिनेछ । पशु सेवा विभागले दुध उत्पादन तथा बजारीकरणलाई प्रोत्साहन गर्ने उद्येश्यले पाइलट कार्यक्रमको रुपमा कृषकलाई अनुदान कार्यक्रम सुरु गरेको हो । कृषकले सो अनुदान प्राप्त गर्नका लागि निश्चित मापदण्ड पालना गरेको दूग्ध उत्पादक सहकारी संस्थामा दुध संकलन गर्नुपर्नेछ । उक्त सहकारीले दैनिक कम्तिमा ३ सय लिटर दुध संकलन र वर्षमा न्युनतम दुई सय दिनसम्म दुधको कारोबार गरेको हुनुपर्नेछ । त्यस्तै सहाकारीले नियमित रुपमा वार्षिक साधारण सभा र लेखा परिक्षण गरेको, स्थायी लेखा नम्बर लिएको र करचुक्ता गरेको हुनुपर्ने मापदण्डमा उल्लेख छ । विभागका अनुसार गत आर्थिक वर्षमा विभागले ७ करोड लिटर बराबरको दूध संकलन भएको थियो । सोही आधारमा सहकारी मार्फत कृषकलाई ७ करोड रुपैयाँ अनुदान वितरण गरेको केन्द्रीय गाईभैंसी प्रबर्द्धन कार्यालयका कर्मचारी सुरेश ज्ञवालीले जानकारी दिए । गत वर्ष अनुदान प्राप्त गर्ने सहकारीले अहिले न्युनतम १० प्रतिशतले दुध संकलन बढाएको हुनुपर्ने उनले बताए । उनले भने, ‘यसले दुध उत्पादक कृषकलाई प्रोत्साहित गर्छ नै । साथै यसले दुध संकलन गर्ने सहकारीलाई पनि कानुनी दायरमा ल्याउन मद्दत पुर्याउछ ।’ गत आर्थिक वर्षदेखि लागू गरिएको सो कार्यक्रमले दूध उत्पादन तथा संकलनमा वृद्धि भइरहेको उनले जानकारी दिए । उनले भने, ‘यस अघि जिल्ला प्राशासन कार्यालयमा मात्र दर्ता गराउने प्रावधानलाई फराकिलो बनाएका छौं । यसलाई अझ सहज बनाउन हामीले यस्ता सहकारी संस्थालाई विभिन्न जिल्लाका पशु सेवा कार्यालयमार्फत पनि दर्ता गराउने व्यवस्था जारी गरेका छौं ।’ दुग्ध उत्पादक सदस्यलाई अनुदान कार्यक्रममा सहभागि हुन १५ दिनको सुचना प्रकाशन गरेको छ ।
स्थानीय तहमा औद्योगिक ग्राम स्थापनाको तयारी
उद्योग मन्त्रालयले मुलुकका ७५३ स्थानीय तहमा औद्योगिक ग्राम स्थापना गर्ने गृहकार्य गरिरहेको छ । सरकारले देशमा रोजगारी वृद्धि गरी युवा जनशक्तिलाई विदेशिनबाट रोक्न यस्तो ग्रामको विकास गर्न लागिएको हो । हरेक तहमा ससाना घरेलु उद्योग स्थापनाका लागि उचित वातावरणको व्यवस्थापन गर्न ती ग्रामको विकास गर्ने अवधारणा ल्याइएको उद्योग राज्यमन्त्री रेशम लामाले जानकारी दिए। उक्त ग्राम स्थापनाका लागि १०० देखि २०० रोपनी क्षेत्रफलको जमिनको व्यवस्था तथा बिजुली, बाटो, पानीलगायतका पूर्वाधार मन्त्रालयले तयार गर्नेछ । उद्योगी र व्यवसायीले सञ्चालन गर्न खोजेका उद्योगका बारे स्थानीय तहमा पेश गरेको प्रतिवेदनका आधारमा मन्त्रालयले ती ग्राममा स्थान उपलब्ध गराउने छ । के कस्तो उद्योग तथा व्यवसाय कुन स्थानीय तहमा उपयुक्त हुन्छ, त्यसको आधारमा ग्रामको विकास गरिन्छ । त्यसैगरी, मन्त्रालयले मझौला तथा ठूला उद्योग सञ्चालनका लागि १४ औद्योगिक क्षेत्र निर्माण गर्ने प्रवक्ता प्रदीप कोइरालाले जानकारी दिनुभयो । यसका लागि एक हजार रोपनीभन्दा धेरै क्षेत्रफल आवश्यक हुन्छ । शहर बजार तथा त्यस वरपर क्षेत्रमा भएका उद्योगलाई समेत उक्त स्थानमा प्रतिस्थापन गर्न सकिने योजना छ । रासस
