भिभो वाई३२ नेपाली बजारमा, ५२ हजार ९९९ रुपैयाँसम्मका तीन भेरियन्ट
काठमाडौं । स्मार्टफोन ब्रान्ड भिभोले ८,००० एमएएच क्षमताको ब्याट्रीसहित नयाँ स्मार्टफोन भिभो वाई३२ नेपाली बजारमा सार्वजनिक गरेको छ । दैनिक रूपमा लामो समय स्मार्टफोन प्रयोग गर्ने युवा पेसाकर्मी, फिल्डमा काम गर्ने कर्मचारी तथा काम र व्यक्तिगत प्रयोजनका लागि भरपर्दो फोन खोज्ने प्रयोगकर्तालाई लक्षित गरी यो स्मार्टफोन ल्याइएको कम्पनीले जनाएको छ । वाई सिरिजअन्तर्गत सार्वजनिक गरिएको यस फोनमा ४४ वाट फ्ल्यासचार्ज, आईपी६८ तथा आईपी६९ डस्ट एन्ड वाटर रेजिस्टेन्स र एन्टी–ड्रप आर्मर डिजाइनलगायतका सुविधा समावेश छन् । भिभो वाई३२ को मुख्य विशेषता यसको ८,००० एमएएच क्षमताको ब्याट्री हो । कम्पनीका अनुसार फोनमा रहेको ६ वर्षे ब्याट्री हेल्थ प्रविधिले १ हजार ५०० पटक पूर्ण चार्ज गरेपछि पनि ब्याट्रीको क्षमता कम्तीमा ८० प्रतिशत कायम राख्न मद्दत गर्छ । ब्याट्रीको प्रयोग र चार्जिङलाई व्यवस्थित गर्न फोनमा स्मार्ट चार्जिङ इन्जिन तथा रातभर चार्ज गर्दा ब्याट्रीलाई सुरक्षित राख्न ओभरनाइट चार्जिङ प्रोटेक्सन सुविधा दिइएको छ । त्यस्तै, ४४ वाट फ्ल्यासचार्ज प्रविधिले कम समयमा ब्याट्री चार्ज गर्न सहयोग गर्ने कम्पनीले जनाएको छ । डिजाइनतर्फ भिभो वाई३२ मा प्रिमियम मेटालिक क्यामेरा डिजाइन र डायनामिक लाइट उपलब्ध छन् । डायनामिक लाइटले फोनमा आउने कल, सन्देश तथा अन्य सूचनाका लागि प्रकाशमार्फत संकेत दिन्छ । यसका साथै आईपी६८ तथा आईपी६९ डस्ट एन्ड वाटर रेजिस्टेन्सले धुलो र पानीबाट सुरक्षा प्रदान गर्ने तथा एन्टी–ड्रप आर्मर डिजाइनले दैनिक प्रयोगका क्रममा हुन सक्ने ठक्कर र आकस्मिक खसाइबाट फोनलाई थप सुरक्षा दिने कम्पनीको दाबी छ । भिभो वाई३२ नेपाली बजारमा तीन भेरियन्टमा उपलब्ध छ । ४ जीबी र्याम र १२८ जीबी स्टोरेज भएको भेरियन्टको मूल्य ३९ हजार ९९९ रुपैयाँ, ६ जीबी र्याम र १२८ जीबी स्टोरेजको मूल्य ४५ हजार ९९९ रुपैयाँ तथा ६ जीबी र्याम र २५६ जीबी स्टोरेज भएको भेरियन्टको मूल्य ५२ हजार ९९९ रुपैयाँ तोकिएको छ । फोन देशभरका आधिकारिक भिभो बिक्री केन्द्रबाट खरिद गर्न सकिने कम्पनीले जनाएको छ । कम्पनीले विशेष सुरुवाती अफरअन्तर्गत भिभो वाई३२ सार्वजनिक भएको पहिलो ३० दिनभित्र खरिद गर्ने ग्राहकलाई थप दुई वर्षको ब्याट्री वारेन्टी उपलब्ध गराउने जनाएको छ । यसले फोनको दीर्घकालीन प्रयोगमा ग्राहकलाई थप सुविधा र भरोसा दिने कम्पनीको अपेक्षा छ ।
मुस्लिम कोटाबाट कांग्रेसको सहमहामन्त्रीमा आलम निर्वाचित
काठमाडौं । नेपाली कांग्रेसको १५औं महाधिवेशनअन्तर्गत मुस्लिम क्लस्टरतर्फको सहमहामन्त्रीमा डा. मोहमद फिरदोस आलम निर्वाचित भएका छन् । रौतहटका आलमले निकटतम प्रतिस्पर्धी गोरखाका अब्दुल सत्तार र अतहर कमाल मुसलमानलाई पराजित गर्दै सहमहामन्त्री पदमा जित हासिल गरेका हुन् । मतगणनाको अन्तिम परिणामअनुसार आलमले प्रतिस्पर्धीलाई ६०० भन्दा बढी मतान्तरले पराजित गरेका छन् । डा. आलमले ३ हजार ३ सय ४७ मत प्राप्त गर्दा उनका निकटतम प्रतिस्पर्धी सतारले २ हाजार ७ सय २७ मत प्राप्त गरेका हुन् । अर्को उम्मेदवार अतहर कमाल मुसलमानले भने ५५७ मत मात्रै प्राप्त गरेको निर्वाचन समितिले जानकारी दिएको छ । मुस्लिम क्लस्टरतर्फ सहमहामन्त्रीको एक पदका लागि आलम, अब्दुल सत्तार र अतहर कमाल मुसलमानबीच प्रतिस्पर्धा भएको थियो । रौतहट निर्वाचन क्षेत्र नम्बर २ बाट निर्वाचित प्रतिनिधिसभा सदस्यसमेत रहेका आलमले मधेशमा पार्टीलाई उठाउने जिम्मेवारी पाएका छन् ।
आमिर खानका भाञ्जा इमरान खानलाई भारत छाड्न निर्देशन
काठमाडौं । भारतको विदेशी क्षेत्रीय दर्ता कार्यालय (एफआरआरओ) ले अभिनेता इमरान खानलाई अक्टोबर २८ भित्र देश छाड्न निर्देशन दिएको छ । अमेरिकी नागरिक रहेको दाबी गरिएका इमरानमाथि भारतका मुख्य निर्वाचन आयुक्त ज्ञानेश कुमारविरुद्धको विरोध प्रदर्शनमा सहभागी भएर विदेशीसम्बन्धी कानुन उल्लंघन गरेको आरोप लगाइएको छ । बलिउड अभिनेता आमिर खानका भाञ्जासमेत रहेका इमरान गत अक्टोबर १० मा मुम्बईस्थित अगस्त क्रान्ति मैदानमा भएको विरोध प्रदर्शनमा सहभागी भएका थिए । त्यसक्रममा उनलाई प्रहरीले नियन्त्रणमा लिएको थियो । प्रदर्शनमा सहभागी भएको विषयलाई लिएर भारतीय जनता पार्टी (भाजपा) का नेता किरीट सोमैयाले इमरान अमेरिकी नागरिक भएको दाबी गर्दै विदेशीसम्बन्धी कानुन उल्लंघन गरेको आरोप लगाएका थिए । उनले यस विषयमा प्रहरीमा उजुरीसमेत दिएका थिए । प्रहरीका अनुसार गामदेवी प्रहरी कार्यालयमा परेको उजुरीमाथि आवश्यक प्रक्रिया अघि बढाउँदै त्यसलाई विदेशी क्षेत्रीय दर्ता कार्यालयमा पठाइएको थियो । नाम सार्वजनिक नगर्ने सर्तमा एक प्रहरी अधिकारीले दिएको जानकारीअनुसार एफआरआरओले जारी गरेको सूचनामा इमरानमाथि आप्रवासन तथा विदेशीसम्बन्धी ऐनका दफा ७ र २९ उल्लंघन गरेको आरोप लगाइएको छ । सोही आधारमा उनलाई अक्टोबर २८ भित्र भारत छाड्न निर्देशन दिइएको हो ।
मलेसिया जाने कामदारको बायोमेट्रिक गर्ने संस्थाका सञ्चालक खड्का पक्राउ
काठमाडौं । मलेसिया जाने कामदारको बायोमेट्रिक गर्ने संस्थाका सञ्चालक कैलाश खड्का पक्राउ परेका छन् । नेपाली कामदारलाई सिन्डिकेटमार्फत रोजगारीका लागि मलेसिया पठाइदिने र स्वास्थ्य परीक्षणमा आर्थिक भार थप्ने गरी बढी पैसा आरोपमा प्रहरीले उनलाई बिहीबार पक्राउ गरेको हो । वैदेशिक रोजगारीमा जाने कामदारको स्वास्थ्य परीक्षणमा सिन्डिकेट खडा गरेको र कामदारसँग बढी रकम लिएको आरोप छ । नेपाल प्रहरीको केन्द्रीय अनुसन्धान ब्यूरो (सीआईबी) ले उनी लगायत अन्य मेडिकल व्यवसायीमाथि अनुसन्धान बढाएको छ । विभिन्न संघसंस्थामा पनि आबद्ध खड्का वैदेशिक रोजगार बोर्डको सदस्यका रुपमा स्वास्थ्य व्यवसायी तथा स्वास्थ्य व्यवसायी संघका अध्यक्षसमेत थिए ।
भारतमा धर्म परिवर्तन गरेपछि आरक्षण नपाइने
काठमाडौं । भारतमा धर्म परिवर्तन गर्ने व्यक्तिले आफ्नो पहिलेको धर्ममा रहेको सामाजिक हैसियतका आधारमा आरक्षण सुविधा नपाउने भएका छन् । भारतको सर्वोच्च अदालतले धर्म परिवर्तन गर्नुअघिको सामाजिक पिछडिएको अवस्थाका आधारमा नयाँ धर्ममा आरक्षण सुविधा दाबी गर्न नमिल्ने फैसला गरेको हो । अदालतले इस्लाम धर्म अपनाएको व्यक्तिले पहिलेको सामाजिक हैसियतका आधारमा पिछडिएको वर्गको आरक्षण पाउन नसक्ने भन्दै मद्रास उच्च अदालतको फैसलालाई सदर गरेको छ । बार एन्ड बेन्चका अनुसार अदालतले बिहीबार हिन्दु धर्म त्यागेर अन्य धर्म अपनाउने व्यक्तिले आफ्नो पहिलेको धर्ममा रहेको सामाजिक पिछडिएको अवस्थाका आधारमा आरक्षण सुविधा दाबी गर्न नसक्ने स्पष्ट पारेको छ । न्यायाधीश प्रशान्त कुमार मिश्रा र न्यायाधीश श्री चन्द्रशेखरको संयुक्त इजलासले धर्म परिवर्तनपछि कुनै व्यक्तिलाई उसको पहिलेको धर्ममा रहेको सामाजिक पिछडिएको अवस्थाका आधारमा नयाँ धर्मअन्तर्गत सूचीकृत पिछडिएको वर्गमा समावेश गर्न नमिल्ने स्पष्ट पारेको हो । इजलासले भनेको छ, ‘संविधानको धारा १६(४) अन्तर्गत आरक्षण सुविधा प्राप्त गर्न सम्बन्धित पिछडिएको वर्गको सदस्य हुनु अनिवार्य छ । धर्म परिवर्तन गर्नुअघिको सामाजिक हैसियतका आधारमा मात्रै कुनै व्यक्तिलाई नयाँ धर्ममा पिछडिएको वर्गको सदस्य मान्न सकिँदैन ।’ सर्वोच्च अदालतले सन् १९५० को संविधान (अनुसूचित जाति) आदेशको समेत उल्लेख गरेको छ । अदालतले भनेको छ, ‘उक्त आदेशको अनुच्छेद ३ अनुसार हिन्दु, सिख वा बौद्ध धर्मबाहेक अन्य कुनै धर्म मान्ने व्यक्तिलाई अनुसूचित जातिको सदस्य मान्न सकिँदैन ।’ इजलासले धर्म परिवर्तन गरिसकेको व्यक्ति पुनः हिन्दु धर्ममा फर्किए पनि उसले पहिले प्राप्त गरेको पिछडिएको वर्गको मान्यता र आरक्षण सुविधा स्वतः पुनः प्राप्त नहुने स्पष्ट पारेको छ ।
पाकिस्तानमा विद्यालयको छत खस्दा १८ बालबालिकासहित १९ जनाको मृत्यु
काठमाडौं । पाकिस्तानको पेसावरमा एक निजी विद्यालयको छत खस्दा १८ बालबालिका र एक महिला शिक्षिकासहित १९ जनाको मृत्यु भएको छ । दुर्घटनामा अन्य ४० बालबालिका घाइते भएका छन् । बीबीसी उर्दूका अनुसार उक्त दुर्घटना पेसावरको दिर कोलोनी क्षेत्रमा भएको हो । लेडी रिडिङ अस्पतालका प्रवक्ता मोहम्मद आसिमका अनुसार दुर्घटनापछि १८ बालबालिकालाई मृत अवस्थामा अस्पताल ल्याइएको थियो । दुर्घटनामा ज्यान गुमाएकी एक महिला शिक्षिकाको शव पनि अस्पताल ल्याइएको छ । उनका अनुसार दुर्घटनामा घाइते भएका ४० बालबालिकालाई उपचारका लागि लेडी रिडिङ अस्पतालमा भर्ना गरिएको छ । घाइतेमध्ये केहीको अवस्था गम्भीर रहेको बताइएको छ । अस्पताल प्रशासनका अधिकारीहरू ट्रमा सेन्टरमा खटिएका छन् । घाइते बालबालिकालाई तत्काल आवश्यक उपचार उपलब्ध गराउने काम भइरहेको अस्पतालले जनाएको छ ।
पुनर्बीमा कम्पनीको विभिन्न क्षेत्रमा ३२ अर्बभन्दा बढी लगानी
काठमाडौं । गत आर्थिक वर्ष २०८२/८३ को चौथो त्रैमाससम्ममा पुनर्बीमा कम्पनीहरूले ३२ अर्ब ९८ करोड रुपैयाँ बराबर लगानी गरेका छन् । बीमा प्राधिरकणले सार्वजनिक गरेको तथ्यांकअनुसार दुई पुनर्बीमा कम्पनीले एक वर्षमा ३२ अर्ब ९८ करोड ४९ लाख रुपैयाँ लगानी गरेका छन् । एक वर्षमा हिमालयन रि इन्स्योरेन्स कम्पनीले १८ अर्ब ८७ करोड ४२ लाख रुपैयाँ लगानी गरेका छन् । त्यस्तै, नेपाल पुनर्बीमा कम्पनीले १४ अर्ब ११ करोड ७ लाख रुपैयाँ लगानी गरेका छन् । कुन क्षेत्रमा कति लगानी ? पुनर्बीमा कम्पनीहरूले सबैभन्दा धेरे लगानी बैंक तथा वित्तीय संस्थाहरूको मुद्दति निक्षेपमा गरेका छन् । मुद्दति निक्षेपमा मात्रै कम्पनीहरूले १९ अर्ब ९० करोड ३१ लाख रुपैयाँ लगानी गरेका छन् । बीमा कम्पनीहरूले वाणिज्य बैंकको निक्षेपमा १९ अर्ब ६४ करोड ३१ लाख रुपैयाँ लगानी गरेका छन् । त्यस्तै, विकास बैंकहरूको मुद्दति निक्षेपमा ४४ करोड र वित्त कम्पनीमा २५ करोड रुपैयाँ लगानी गरेका छन् । त्यसैगरी बीमा कम्पनीहरूले सरकारी बचतपत्र तथा ऋणपत्रमा १ अर्ब ८० करोड रुपैयाँ बैंक तथा वित्तीय संस्थाहरुको अग्राधिकार सेयर, बन्ड, डिबेन्चर र ऋणपत्रमा १ अर्ब ६२ करोड ८७ लाख रुपैयाँ लगानी गरेका छन् । त्यस्तै, नागरिक लगानी कोष र म्युचुअल फन्डमा १ अर्ब ४६ करोड ९१ लाख रुपैयाँ, इन्भेस्टमेन्ट कम्पनीको सेयरमा १ अर्ब ५ करोड, अन्य संस्थापक सेयरमा २२ करोड र सूचीकृत नभएका पब्लिक कम्पनीको सेयरमा ५४ करोड रुपैयाँ लगानी गरेका छन् ।
नेपाल–चीन व्यापार सहजीकरणमा जोड, सीमा नाका सुधारदेखि लगानी विस्तारसम्म छलफल
काठमाडौं । नेपाल र चीनबीच सीमा नाकाको पूर्वाधार सुधार, भन्सार जाँचपास प्रक्रियालाई छरितो बनाउने तथा सीमापार व्यापार र ढुवानीलाई सहज बनाउने विषयमा छलफल भएको छ । दुवै देशबीच आर्थिक सहकार्य र लगानीका अवसर विस्तार गर्ने विषयले पनि भेटवार्तामा प्राथमिकता पाएको छ । नेपालका लागि चिनियाँ राजदूत चाङ माओमिङ र उद्योग, वाणिज्य तथा आपूर्तिमन्त्री दीपककुमार साहबीच बुधबार भएको भेटवार्तामा द्विपक्षीय व्यापारिक सम्बन्धलाई थप प्रभावकारी बनाउने विषयमा विचार आदानप्रदान भएको हो । भेटमा सीमा नाकामा भन्सार जाँचपास प्रक्रियालाई व्यवस्थित र प्रभावकारी बनाउने, नाका पूर्वाधार निर्माण तथा सुधार गर्ने र सीमापार वस्तु ढुवानीमा सहजीकरण गर्ने विषयमा छलफल भएको चिनियाँ दूतावासले जनाएको छ । त्यसैगरी, नेपाल–चीनबीच आर्थिक तथा व्यापारिक सहकार्यलाई थप विस्तार गर्ने, लगानीका सम्भावना पहिचान गर्ने र व्यापार प्रवर्द्धनका व्यावहारिक अवसर उपयोग गर्ने विषयमा पनि दुवै पक्षबीच छलफल भएको छ । दुवै पक्षले आपसी सञ्चार र समन्वयलाई सुदृढ बनाउँदै सीमा नाकाबीचको अन्तरआबद्धता बढाउने तथा द्विपक्षीय व्यापार र लगानी विस्तार गर्ने प्रतिबद्धता व्यक्त गरेका छन् । सीमा नाकाको पूर्वाधार विकास र व्यापार सहजीकरणमा सहकार्य बढाउन सके वस्तुको आवतजावत सहज हुनुका साथै दुई देशबीचको आर्थिक गतिविधि विस्तारमा समेत सहयोग पुग्ने अपेक्षा गरिएको छ । चिनियाँ दूतावासका अनुसार यस्ता सहकार्यले नेपाल र चीनको आर्थिक विकास, सीमापार व्यापार प्रवर्द्धन तथा पारस्परिक लाभमा आधारित आर्थिक सम्बन्धलाई थप मजबुत बनाउने विश्वास गरिएको छ ।
