कांग्रेसका नवनिर्वाचित पदाधिकारी र केन्द्रीय सदस्यले आज शपथ लिँदै
काठमाडौं । नेपाली कांग्रेसको १५औँ महाधिवेशनबाट निर्वाचित केन्द्रीय कार्यसमितिका पदाधिकारी र सदस्यहरूको शपथ ग्रहण समारोह आज हुँदैछ । केन्द्रीय निर्वाचन समितिले असोज अन्तिम साता सम्पन्न १५औँ महाधिवेशनबाट निर्वाचित सभापतिबाहेकका पदाधिकारी र केन्द्रीय सदस्यहरूको शपथ ग्रहण समारोह बिहीबार आयोजना गर्न लागेको हो । सभापति गगनकुमार थापाले भने दसैँको फूलपातीका दिन अर्थात् असोज ३१ गते नै शपथ ग्रहण गरी पदभार सम्हालिसकेका छन् । निर्वाचन समितिकाका अनुसार आज कात्तिक १२ गते दिउँसो २ बजे पदाधिकारी र केन्द्रीय सदस्यहरूको शपथ ग्रहण हुनेछ । समारोह पार्टीको केन्द्रीय कार्यालय सानेपामा आयोजना गरिनेछ । निर्वाचन समितिले गत सोमबार सूचना प्रकाशित गरी १५औँ महाधिवेशनबाट निर्वाचित पदाधिकारी र केन्द्रीय सदस्यहरूलाई शपथ ग्रहण समारोहमा उपस्थित हुन आग्रह गरेको थियो । असोज १८ देखि २३ गतेसम्म सम्पन्न कांग्रेसको १५औँ महाधिवेशनबाट गगनकुमार थापाको नेतृत्वमा २३१ सदस्यीय केन्द्रीय कार्यसमिति चयन भएको थियो । पार्टी विधानमा २९७ सदस्यीय केन्द्रीय कार्यसमितिको व्यवस्था छ । बाँकी ६६ सदस्य सभापतिले मनोनीत गर्ने प्रावधान रहेको छ । रिक्त सदस्य पदमा मनोनयन गर्ने विषयमा छलफल गर्न आजै केन्द्रीय कार्यसमिति बैठक बस्ने तयारीसमेत गरिएको छ ।
१ अर्बमा बन्यो केरौन १३२ केभी सबस्टेसन, २ दिन ४ जिल्लामा विद्युत् बन्द हुने
काठमाडौं । मोरङ र आसपासका क्षेत्रको विद्युत् माग सम्बोधन गर्दै आपूर्तिलाई पर्याप्त, भरपर्दो र गुणस्तरीय बनाउन मोरङको कानेपोखरी गाउँपालिका-२ मा १३२ केभी क्षमताको केरौन सबस्टेसन निर्माण सम्पन्न भएको छ । सबस्टेसनलाई कात्तिक १४ गते शनिबार र १५ गते आइतबार चार्ज गर्ने तयारी गरिएको छ । सबस्टेसन चार्ज गर्ने क्रममा पूर्व-पश्चिम १३२ केभी प्रसारण लाइनअन्तर्गत दुहबी-दमक खण्डमा पर्ने केरौन सबस्टेसनमा प्रसारण लाइन जोड्ने र छुट्याउने काम गरिनेछ । दुहबी-दमक १३२ केभी प्रसारण लाइनबाट सबस्टेसनमा विद्युत् आपूर्ति गरिनेछ । उक्त कार्यका लागि शनिबार र आइतबार बिहान ४ बजेदेखि मध्याह्न १२ बजेसम्म दुहबी-दमक प्रसारण लाइन बन्द गरिनेछ । यसका कारण सो अवधिमा झापा, इलाम, पाँचथर र ताप्लेजुङ जिल्लाका सम्पूर्ण क्षेत्र तथा मोरङको उर्लाबारी र पथरी आसपासका क्षेत्रमा विद्युत् आपूर्ति बन्द हुनेछ । सबस्टेसनमा १३२/३३ केभी क्षमताका ६३ एमभीएका दुईवटा र ३३/११ केभी क्षमताको २२.५ एमभीएको एउटा पावर ट्रान्सफर्मर जडान गरिएको छ । सबस्टेसनको कुल क्षमता १४८.५ एमभीए रहेको छ । यसअघि उक्त क्षेत्रमा दुहबी-रानी-रङ्गेली ३३ केभीको करिब ५० किलोमिटर लामो प्रसारण लाइनमार्फत विद्युत् आपूर्ति हुँदै आएको थियो । केरौन सबस्टेसन सञ्चालनमा आएपछि विद्युत् आपूर्ति हुने लाइनको दूरी घट्ने र त्यसबाट आपूर्ति प्रणालीमा सुधार आउने अपेक्षा गरिएको छ । सबस्टेसनबाट स्थानीय क्षेत्रमा विद्युत् वितरण गर्न ११ केभीका पाँचवटा फिडर लाइन निकालिएका छन् । त्यस्तै, केरौन-रङ्गेली र केरौन-विराटचोक ३३ केभी डबल सर्किट प्रसारण लाइनसमेत निर्माण गरिएको छ । आयोजना निर्माणका लागि २०७८ असारमा ठेक्का सम्झौता भएको थियो । करिब एक अर्ब रुपैयाँ अनुमानित लागत रहेको आयोजना नेपाल सरकार र नेपाल विद्युत् प्राधिकरणको लगानी तथा एसियाली विकास बैंकको सहुलियतपूर्ण ऋणमा निर्माण गरिएको हो ।
पोखरा एभेन्जर्सविरुद्ध सुदूरपश्चिम रोयल्सको शानदार जित, दीपेन्द्रको अर्धशतक
काठमाडौं । सुदूरपश्चिम रोयल्सले नेपाल प्रिमियर लिग (एनपीएल) को तेस्रो संस्करणमा पोखरा एभेन्जर्सविरुद्ध शानदार जित हासिल गरेको छ । बुधबार (आज) कीर्तिपुरस्थित त्रिवि क्रिकेट रंगशालामा पोखरा एभेन्जर्सले प्रस्तुत गरेको १४६ रनको लक्ष्य पछ्याएको सुदूरपश्चिमले १६.५ ओभरमा चार विकेट गुमाएर पूरा गरेको हो । सुदूरपश्चिमका लागि कप्तान दीपेन्द्र सिंह ऐरीले अर्धशतक बनाए । उनले ५१ रन बनाएका हुन् । उनले ३६ बलमा ४ चौका र २ छक्का प्रहार गरेका थिए । त्यस्तै, ब्रान्डन म्याकमुलेनले २२, इशान पाण्डेले ३७ र साइब जाइबले १५ रन बनाए । त्यसअघि पहिले ब्याटिङ गरेको पोखराले निर्धारित २० ओभरमा ७ विकेट गुमाएर १ सय ४५ रन बनाएको थियो । पोखराका लागि महेदी हसनले ३२ रन बनाउँदा कप्तान कुशल भुर्तेलले २१ रन बनाए । त्यस्तै, सकिब अल हसनले १४ रन बनाउँदा उसका लागि सर्वाधिक राम्रो प्रदर्शन भने अर्जुन घर्ती मगरको नाममा रह्यो । उनले २५ बलमा ४० रन बनाए । सुदूरपश्चिमका लागि अनिल खरेलले ३ विकेट लिँदा हेमन्त धामी, स्कट कुग्लीङ र दीपेन्द्र सिंह ऐरीले १-१ विकेट लिएका थिए । यो सुदूरपश्चिमको पहिलो जित हो । खेलमा जित हासिल गरेसँगै टोलीले २ अंक जोडेको छ । दुवै संस्करणको उपविजेतासमेत रहेको सुदूरपश्चिमले उद्घाटन खेलमा लुम्बिनी लायन्ससँग सात विकेटको हार बेहोरेको थियो । पोखराकाे भने यो पहिलाे खेल हाे ।
स्वास्थ्य र चिकित्सा शिक्षासम्बन्धी विगतका सहमति कार्यान्वयन गर्ने सरकारको निर्णय
काठमाडौं । सरकारले स्वास्थ्य तथा चिकित्सा शिक्षा क्षेत्रका विभिन्न पक्षसँग विगतमा भएका सहमति कार्यान्वयन गर्ने निर्णय गरेको छ । सिंहदरबारस्थित प्रधानमन्त्री तथा मन्त्रिपरिषद्को कार्यालयमा बुधबार (आज) बसेको बैठकले कार्यान्वयन हुन बाँकी सहमति समयमै टुङ्ग्याउने निर्णय गरेको हो । बैठकमा स्वास्थ्य तथा खाद्य स्वच्छता मन्त्री, शिक्षा तथा खेलकुद मन्त्री र प्रधानमन्त्री वालेन्द्र शाहका स्वास्थ्य सल्लाहकारलगायतको सहभागिता थियो । बैठकले आन्दोलनरत विभिन्न पक्षसँग विगतमा भएका सहमतिको पनि समीक्षा गरेको छ । कार्यान्वयन भइसकेका सहमतिको प्रगति मूल्यांकन गर्दै बाँकी विषय सम्बन्धित निकायबीच समन्वय गरेर टुङ्ग्याउने निर्णय भएको कार्यालयले जनाएको छ ।
सुदूरपश्चिमलाई पोखराले दियो १४६ रनको लक्ष्य
काठमाडौं । नेपाल प्रिमियर लिग (एनपीएल) को तेस्रो संस्करणमा पोखरा एभेन्जर्सले सुदूरपश्चिम रोयल्सविरुद्ध १४६ रनको लक्ष्य प्रस्तुत गरेको छ । पोखराले सुदूरपश्चिमविरुद्ध २० ओभरमा ७ विकेट गुमाउँदै १४६ रनको लक्ष्य प्रस्तुत गरेको हो । पोखराका लागि अर्जुन घर्तीले ४० रन, मेहदी हसनले ३२ तथा कुशल भुर्तेलले २१ रन जोडे । शकिब अल हसनले १४ रन बनाउँदा धनन्जय लक्षणले ११ रन जोडे । बलिङतर्फ सुदूरपश्चिमका अनिल खरेलले तीन विकेट लिँदा हेमन्त धामी, दीपेन्द्र सिंह ऐरी र स्कट कुग्लेइनले एक–एक विकेट लिए । कीर्तिपुरस्थित त्रिवि क्रिकेट रंगशालामा टस हारेर पोखरा ब्याटिङमा आएको थियो ।
१३१ प्रतिशतले बढ्यो सानिमा बैंकको नाफा, प्रतिसेयर आम्दानी पनि दोब्बरभन्दा बढी
काठमाडौं । सानिमा बैंकको चालु आर्थिक वर्ष २०८३/८४ को पहिलो त्रैमासमा खुद नाफा उल्लेख्य रूपमा बढेको छ । बैंकले सार्वजनिक गरेको वित्तीय विवरणअनुसार गत वर्षको सोही अवधिको तुलनामा खुद नाफा १३१.१३ प्रतिशतले बढी १ अर्ब ५ करोड रुपैयाँ पुगेको हो । बैंकको नाफासँगै प्रतिसेयर आम्दानी, स्वपुँजीमा प्रतिफल र वितरणयोग्य नाफामा पनि सुधार देखिएको छ । खराब कर्जा अनुपात घट्नुका साथै निक्षेप संकलन र कर्जा प्रवाहमा समेत वृद्धि भएको छ । समीक्षा अवधिमा बैंकको प्रतिसेयर आम्दानी ९ईपीएस० बढेर २९ रुपैयाँ १७ पैसा पुगेको छ । गत वर्षको सोही अवधिमा प्रतिसेयर आम्दानी १३ रुपैयाँ १५ पैसा थियो । यस आधारमा बैंकको प्रतिसेयर आम्दानी १६ रुपैयाँ २ पैसाले बढेको छ । त्यस्तै, बैंकको स्वपुँजीमा प्रतिफल (आरओई) पनि उल्लेख्य रूपमा सुधार भएको छ । गत वर्षको सोही अवधिमा ७.६८ प्रतिशत रहेको आरओई बढेर १५.६० प्रतिशत पुगेको छ । बैंकको प्रतिसेयर कुल वितरणयोग्य नाफा पनि बढेको छ । गत वर्षको सोही अवधिमा १९ रुपैयाँ २७ पैसा रहेको प्रतिसेयर वितरणयोग्य नाफा बढेर २७ रुपैयाँ ५८ पैसा पुगेको छ । यसैगरी, बैंकको निक्षेप संकलन ११.८४ प्रतिशतले बढेर २ खर्ब ५४ अर्ब ९३ करोड रुपैयाँ पुगेको छ । बैंकको खुद कर्जा तथा सापटी प्रवाह भने १.६९ प्रतिशतले बढेर २ खर्ब ७ अर्ब ४३ करोड रुपैयाँ पुगेको छ । बैंकको वित्तीय विवरणमा खराब कर्जा अनुपातमा पनि सुधार देखिएको छ । गत वर्षको सोही अवधिमा ३.९१ प्रतिशत रहेको कुल निष्क्रिय कर्जा अनुपात (ग्रस एनपीए) घटेर २.८६ प्रतिशतमा झरेको छ । एक वर्षको अवधिमा बैंकको खराब कर्जा अनुपात १.०५ प्रतिशत बिन्दुले घटेको हो । बैंकको पुँजी पर्याप्तता स्थिति पनि सन्तोषजनक देखिएको छ । वित्तीय विवरणअनुसार बैंकको प्राथमिक पुँजी पर्याप्तता अनुपात (टियर वान) ९.७० प्रतिशत र कुल पुँजी पर्याप्तता अनुपात १२.३७ प्रतिशत कायम भएको छ ।
इजरायलमा ७० प्रतिशतभन्दा बढी मतगणना सकिँदा पनि कसैले बहुमत पाएन
काठमाडौं । इजरायलमा सम्पन्न संसदीय निर्वाचनको ७० प्रतिशतभन्दा बढी मतगणना सकिँदा पनि कुनै गठबन्धनले स्पष्ट बहुमत हासिल गर्ने संकेत देखिएको छैन । इजरायलको केन्द्रीय निर्वाचन समितिका अनुसार हालसम्म ७० प्रतिशतभन्दा बढी मतगणना सम्पन्न भएको छ । तर, अहिलेसम्मको परिणामले कुनै पनि गठबन्धनले सरकार गठनका लागि आवश्यक बहुमत प्राप्त गर्ने अवस्था देखाएको छैन । प्रधानमन्त्री बेन्जामिन नेतन्याहु नेतृत्वको गठबन्धन अझै पनि सबैभन्दा अगाडि छ । यद्यपि, यस गठबन्धनले प्राप्त गर्ने अनुमानित सिट संख्या घटेर ५४ मा झरेको छ । त्यस्तै, गादी आइजेनकोट नेतृत्वको विपक्षी गठबन्धनको पनि दुई सिट घटेको छ । अब उक्त गठबन्धनले ४७ सिट प्राप्त गर्ने देखिएको छ । अर्कोतर्फ, अरब राजनीतिक दलहरूको सिट संख्या बढेर १९ पुगेको छ । इजरायलको संसद् ‘नेसेट’मा कुल १२० सिट छन् । सरकार गठन गर्न कुनै पनि गठबन्धनले कम्तीमा ६१ सिटको समर्थन जुटाउनुपर्छ । तर, अहिलेसम्मको मतगणनाले कुनै पनि प्रमुख गठबन्धनले एक्लै बहुमत प्राप्त गर्ने सम्भावना देखाएको छैन । यद्यपि, मतगणना जारी रहेकाले अन्तिम परिणाममा फेरबदल हुन सक्ने निर्वाचन समितिले जनाएको छ । यसैबीच, विपक्षी ‘चेन्ज ब्लक’ गठबन्धनमा आबद्ध डेमोक्रेट्स पार्टीका नेता याइर गोलानले अरब नेतृत्वका राजनीतिक दलहरूलाई समेत सहभागी गराएर नयाँ सरकार गठन गर्न आह्वान गरेका छन् । निर्वाचनअघि गोलान आफ्नो गठबन्धनका एकमात्र त्यस्ता नेता थिए, जसले अरब नेतृत्वका दलहरू जोइन्ट लिस्ट र रा’अमसँग सहकार्य गर्न तयार रहेको बताएका थिए । तर, आइजेनकोटसहित विपक्षी गठबन्धनका अन्य नेताहरूले ती दलहरूसँग साझा राजनीतिक मूल्य र मान्यताको अभाव रहेको भन्दै सहकार्य गर्न अस्वीकार गरेका थिए । पछिल्लो मतगणनाले कुनै पनि प्रमुख गठबन्धनलाई स्पष्ट बहुमत नदिने संकेत गरेसँगै इजरायलमा नयाँ सरकार गठनका लागि राजनीतिक दलहरूबीचको सहकार्य निर्णायक बन्न सक्ने देखिएको छ ।
कामना सेवा फुटसल कप सिजन ६ को टाइसिट ड्र र ट्रफी अनावरण
काठमाडौं । कामना सेवा विकास बैंक लिमिटेडले आयोजना गर्न लागेको ‘कामना सेवा फुटसल कप सिजन ६’ को टाइसिट ड्र, जर्सी तथा ट्रफी अनावरण र ब्रान्ड एन्थम सार्वजनिक कार्यक्रम सम्पन्न भएको छ। कात्तिक ११ गते आयोजित कार्यक्रममा प्रतियोगितामा सहभागी टोलीका प्रतिनिधि, टिम म्यानेजर, एन्फाका रेफ्री तथा बैंकका कर्मचारीको उपस्थिति थियो। कार्यक्रममा बैंकका प्रमुख सञ्चालन अधिकृत रघुनाथ त्रिपाठीले फुटसल कप बैंकका लागि प्रतियोगितामा मात्र सीमित नभई खेलकुदमार्फत समाज र युवासँग जोडिने माध्यम भएको बताए। खेलकुदले स्वस्थ जीवनशैली, अनुशासन र सामूहिक कार्यको सन्देश दिने भएकाले बैंकले यस्ता कार्यक्रमलाई निरन्तरता दिँदै आएको उनको भनाइ थियो। कार्यक्रममा त्रिपाठीले प्रतियोगिताको ब्रान्ड एन्थम सार्वजनिक गर्नुका साथै सहभागी टोलीका टिम म्यानेजरलाई जर्सी हस्तान्तरण गरे। सोही अवसरमा प्रतियोगिताको टाइसिट ड्र पनि सार्वजनिक गरिएको थियो। कार्यक्रममा गत सिजन अर्थात् सिजन ५ का पुरुषतर्फका विजेता सिद्धार्थ बैंक र महिलातर्फका विजेता लुम्बिनी विकास बैंकका प्रतिनिधिहरूले मन्तव्य राखेका थिए। उनीहरूले बैंकले आयोजना गरेको प्रतियोगिताले बैंक तथा वित्तीय संस्थाका कर्मचारीबीच आपसी सद्भाव र भाइचारा विकास गर्न सहयोग पुग्ने भन्दै कामना सेवा विकास बैंकलाई धन्यवाद दिए। साथै, सहभागी सबै टोलीलाई शुभकामना व्यक्त गरे। त्यसैगरी, एन्फाका सहायक रेफ्री हरिश कार्कीले प्रतियोगिताका खेल नियमबारे विस्तृत जानकारी गराए। उनले खेलको अनुशासन, फाउल तथा निर्णयसम्बन्धी नियम बुझेर स्वच्छ र रोमाञ्चक प्रतिस्पर्धा गर्न सबै टोलीलाई आग्रह गरे। कार्यक्रममा एन्फा फुटसल रेफ्री सङ्गीता सुनुवारको पनि उपस्थिति थियो। यस वर्षको प्रतियोगितामा पुरुषतर्फ २० र महिलातर्फ १० गरी ३० टोलीले प्रतिस्पर्धा गर्नेछन्। प्रतियोगिता कात्तिक १४ र १५ गते शनिबार र आइतबार धन्वन्तरी फुटसल कोर्टमा सञ्चालन हुने बैंकले जनाएको छ। खेलकुद प्रवर्द्धन, युवा प्रतिभालाई मञ्च प्रदान तथा महिला सहभागितालाई प्रोत्साहन गर्ने उद्देश्यले प्रतियोगिता आयोजना गरिएको बैंकले जनाएको छ। बैंकले आगामी दिनमा पनि यस्ता कार्यक्रमलाई निरन्तरता दिने बताएको छ।
