नाडेप लघुवित्तको सीईओमा पवनकुमार श्रेष्ठ नियुक्त
काठमाडौं । नाडेप लघुवित्त वित्तीय संस्था लिमिटेडको प्रमुख कार्यकारी अधिकृत (सीईओ) मा पवनकुमार श्रेष्ठ नियुक्त भएका छन् । संस्थाको सञ्चालक समितिको कात्तिक ११ गते बसेको २४८औँ बैठकले श्रेष्ठलाई सीईओमा नियुक्त गर्ने निर्णय गरेको हो । संस्थाले नेपाल स्टक एक्सचेन्ज (नेप्से) लाई दिएको जानकारीअनुसार श्रेष्ठको नियुक्ति कात्तिक १६ गतेदेखि लागू हुनेछ । उनलाई दुई वर्षका लागि प्रमुख कार्यकारी अधिकृतमा नियुक्त गरिएको संस्थाले जनाएको छ । नाडेप लघुवित्त नेपाल राष्ट्र बैंकबाट ‘घ’ वर्गको इजाजतपत्र प्राप्त राष्ट्रियस्तरको लघुवित्त वित्तीय संस्था हो ।
बहुमत गुमेपछि नेतन्याहुको आरोप– ‘अरब दलहरूले चुनाव चोरे’
काठमाडौं । इजरायलमा मंगलबार सम्पन्न संसदीय निर्वाचनमा बहुमत प्राप्त गर्न असफल भएपछि प्रधानमन्त्री बेन्जामिन नेतन्याहुको लिकुड पार्टीले अरब राजनीतिक दलहरूमाथि चुनावी धाँधलीको आरोप लगाएको छ । लिकुड पार्टीले बुधबार विज्ञप्ति जारी गर्दै अरब दलहरूले निर्वाचनमा व्यापक अनियमितता गरेको दाबी गरेको हो । विज्ञप्तिमा आतंकवादलाई समर्थन गर्ने र यहुदी राष्ट्र समाप्त पार्न चाहने अरब दलहरूले चुनाव चोरेको आरोप लगाइएको छ । घुसखोरी, धम्की, हिंसा, जालसाजी र मतदाता परिचालनका लागि प्रतिबन्धित सफ्टवेयर प्रयोग गरेर निर्वाचनमा धाँधली गरिएको पार्टीको दाबी छ । लिकुड पार्टीले कथित चुनावी धाँधलीसँग सम्बन्धित सयौं बयान र प्रमाण प्रहरी, इजरायलको आन्तरिक सुरक्षा निकाय शिन बेट र केन्द्रीय निर्वाचन समितिलाई बुझाएको जनाएको छ । पार्टीका अनुसार ती प्रमाण अरब समुदायका विभिन्न मतदान केन्द्रमा भएका भनिएका अनियमिततासँग सम्बन्धित छन् । विज्ञप्तिमा अरब राजनीतिक दल राुमका मतपत्रसँगै नगद राखिएका हजारौं खाम फेला परेको दाबी गरिएको छ । त्यस्तै, मतदान केन्द्रका कर्मचारीलाई धम्की दिइएको र उनीहरूमाथि हिंसा गरिएको आरोप पनि लगाइएको छ । एउटै मतदान कक्षमा एकैपटक धेरै मतदाता प्रवेश गरेको, दोहोरो मतदान भएको र मतदाता तथा मतपत्र राखिएका खामको संख्यामा भिन्नता देखिएको दाबी लिकुड पार्टीले गरेको छ । यसका अतिरिक्त मतदाता परिचालनका लागि प्रतिबन्धित सफ्टवेयर प्रयोग गरिएकोलगायत अन्य अनियमितता भएको आरोप पनि पार्टीले लगाएको छ । लिकुडले प्रहरी र शिन बेटसँग कथित चुनावी धाँधलीको विस्तृत अनुसन्धान गर्न माग गरेको छ । साथै, दोषी पाइएका व्यक्तिहरूमाथि कानुनबमोजिम कडा कारबाही गर्नुपर्ने जनाएको छ । पार्टीले केन्द्रीय निर्वाचन समितिसँग पनि आरोपहरूको तत्काल छानबिन गर्न माग गरेको छ । यस्ता गतिविधिले इजरायलको निर्वाचनको निष्पक्षता र परिणाममा गम्भीर असर पुर्याएको लिकुडको दाबी छ । यद्यपि, लिकुड पार्टीले लगाएका व्यापक चुनावी धाँधलीका आरोप स्वतन्त्र रूपमा पुष्टि भएका छैनन् । इजरायलको केन्द्रीय निर्वाचन समितिका एक अधिकारीले समेत व्यापक धाँधली भएको दाबीलाई अस्वीकार गरेका छन् । यसैबीच, बिहीबार बिहानसम्म करिब ९०.४ प्रतिशत मतगणना हुँदा नेतन्याहु नेतृत्वको गठबन्धनले ५३ सिट प्राप्त गर्ने प्रक्षेपण गरिएको छ । उनका प्रमुख प्रतिद्वन्द्वी गादी आइजेनकोट नेतृत्वको गठबन्धनले ४८ सिट प्राप्त गर्ने अनुमान छ । त्यस्तै, अरब समुदायको नेतृत्वमा रहेका दुई राजनीतिक दलले संयुक्त रूपमा १९ सिट प्राप्त गर्ने प्रक्षेपण गरिएको छ । अरब समुदायको नेतृत्वमा रहेका राुम र जोइन्ट लिस्टले अहिलेसम्मकै धेरै सिट जित्ने सम्भावना देखिएको हो । इजरायलको १२० सदस्यीय संसद् नेसेटमा सरकार गठनका लागि कम्तीमा ६१ सिट आवश्यक पर्छ । हालसम्मको मतगणनाअनुसार नेतन्याहु र आइजेनकोट दुवै नेतृत्वका गठबन्धन बहुमतबाट टाढा छन् । यस्तो अवस्थामा अरब दलहरूको समर्थन नयाँ सरकार गठनका लागि निर्णायक बन्न सक्ने देखिएको छ । तर, उनीहरूसँग सहकार्य गर्ने विषयमा विपक्षी दलहरूबीच समेत मतभेद छ । मतगणना पूरा नभएकाले अन्तिम सिट संख्या परिवर्तन हुन सक्नेछ ।
नेपालमा चक्रवात ‘अर्णव’को जोखिम
काठमाडौं । बङ्गालको खाडीमा विकसित चक्रवात ‘अर्णव’को प्रभावले नेपालका विभिन्न क्षेत्रमा वर्षा र उच्च हिमाली भेगमा हिमपात हुन सक्ने पूर्वानुमान गरिएको छ । समुद्री आँधी भारतको भूभागमा प्रवेश गरेपछि कमजोर हुने र नेपाल आइपुग्दा यसको तीव्रता घट्ने आकलन गरिए पनि सम्भावित जोखिमलाई ध्यानमा राखेर सतर्कता अपनाउन मौसमविद्हरूले आग्रह गरेका छन् । भारतको विशाखापटनमनजिकबाट जमिनमा प्रवेश गर्ने अनुमान गरिएको चक्रवातको प्रभाव नेपालमा कति पर्ने भन्ने अझै निश्चित भइसकेको छैन । यसको मार्ग, गति र वायुमण्डलीय अवस्थाले वर्षा तथा हिमपातको मात्रा निर्धारण गर्ने मौसमविद्हरूको भनाइ छ । जल तथा मौसम विज्ञान विभागकी प्रवक्ता विभूति पोखरेलका अनुसार नेपाल आइपुग्दा चक्रवात कमजोर भएर न्यूनचापीय प्रणालीका रूपमा रहने सम्भावना छ । तर, यसको मार्ग नेपालनजिक पर्ने भएकाले सम्भावित जोखिमलाई बेवास्ता गर्न नहुने उनले बताएकी छन् । चक्रवात कमजोर हुँदैमा त्यसले ल्याउने जलवाष्पको प्रभाव पनि पूर्ण रूपमा समाप्त नहुने भएकाले विशेषगरी उच्च हिमाली क्षेत्रमा हिमपातको जोखिम रहन सक्ने मौसमविद्हरूको आकलन छ । मुस्ताङपूर्वका हिमाली क्षेत्रमा बढी जोखिम मौसम पूर्वानुमान महाशाखाले यसअघि नेपालका सबै हिमाली जिल्लामा सम्भावित जोखिमलाई ध्यानमा राखेर सतर्कता अपनाउन आग्रह गरेको थियो । मंगलबारको पूर्वानुमानमा भने मुस्ताङदेखि पूर्वतर्फका हिमाली जिल्लामा जोखिम बढी हुन सक्ने औँल्याइएको छ । यद्यपि, पश्चिम नेपालमा जोखिम नरहेको निष्कर्षमा पुग्न नमिल्ने विभागकी प्रवक्ता पोखरेलले बताएकी छन् । उनका अनुसार सुदूरपश्चिमको दार्चुलासम्मै पूर्वसावधानी आवश्यक छ । मौसम प्रणालीको मार्ग र तीव्रतामा परिवर्तन आउन सक्ने भएकाले जोखिमसम्बन्धी पूर्वानुमानसमेत फेरिन सक्ने उनले बताइन् । शुक्रबार वर्षा र हिमपातको प्रभाव बढ्न सक्ने चक्रवात ‘अर्णव’को प्रभावबाट लुम्बिनी, गण्डकी, बागमती, मधेश र कोशी प्रदेशका विभिन्न स्थानमा वर्षा हुन सक्ने अनुमान गरिएको छ । ती प्रदेशका उच्च हिमाली क्षेत्रमा हिमपातको सम्भावना पनि छ । मौसम पूर्वानुमान महाशाखाको आकलनअनुसार बिहीबारदेखि सुरु हुने वर्षा शुक्रबार बढी सक्रिय हुन सक्नेछ । शनिबारदेखि भने प्रणाली कमजोर हुँदै जाने अनुमान छ । केही स्थानमा भारी वर्षासमेत हुन सक्ने भएकाले मौसमको पछिल्लो अवस्था बुझेर मात्र यात्रा तथा अन्य गतिविधिको योजना बनाउन आग्रह गरिएको छ । विशेषगरी उच्च हिमाली क्षेत्रमा हिमपात र हिमआँधीको जोखिम हुन सक्ने भएकाले पदयात्री तथा पर्वतारोहणमा जानेहरूले सावधानी अपनाउनुपर्ने मौसमविद्हरूको सुझाव छ । प्रतिकूल मौसमको पूर्वानुमान भएका क्षेत्रमा यात्रा स्थगित गर्ने वा सुरक्षित स्थानमा फर्कने विकल्पबारे पनि विचार गर्नुपर्ने उनीहरूको भनाइ छ । धानबाली भित्र्याउने किसानलाई सतर्कता चक्रवातको प्रभावले हुने वर्षाले कृषि क्षेत्रमा समेत क्षति पु¥याउन सक्ने देखिएको छ । अहिले धान काट्ने र भित्र्याउने समय भएकाले किसानले मौसमको पूर्वानुमानअनुसार कामको योजना बनाउनुपर्ने मौसमविद्हरूको सुझाव छ । वर्षाका कारण खेतमा काटेर राखिएको धान भिज्ने, बालीमा क्षति पुग्ने तथा भित्र्याउने काम प्रभावित हुने जोखिम रहन्छ । त्यसैले सम्भव भएसम्म धान सुरक्षित स्थानमा राख्ने र वर्षाको सम्भावना भएका दिनमा कृषि कार्यको तालिका मिलाउनुपर्ने देखिन्छ । मौसमविद्हरूले चक्रवातको प्रभाव र त्यसबाट उत्पन्न हुन सक्ने वर्षा तथा हिमपातको अवस्थाबारे पछिल्लो पूर्वानुमान नियमित रूपमा हेर्न आग्रह गरेका छन् । चक्रवात नेपाल आइपुग्दा कमजोर हुने आकलन गरिए पनि वर्षा, हिमपात र कृषि क्षेत्रमा पर्न सक्ने असरलाई ध्यानमा राख्दै पूर्वतयारी गर्नु आवश्यक देखिन्छ ।
कांग्रेसको नयाँ कार्यसमितिले आज जिम्मेवारी सम्हाल्दै, शपथ ग्रहणको शैली फेरिने
काठमाडौं । नेपाली कांग्रेसको १५औँ महाधिवेशनबाट निर्वाचित नयाँ केन्द्रीय कार्यसमितिले आजदेखि औपचारिक रूपमा पार्टीको नेतृत्व र सञ्चालनको जिम्मेवारी सम्हाल्ने भएको छ । नवनिर्वाचित पदाधिकारी तथा केन्द्रीय सदस्यहरूको शपथ ग्रहणसँगै आजै पदबहाली र केन्द्रीय कार्यसमितिको पहिलो बैठकसमेत गर्ने तयारी गरिएको छ । ललितपुरको सानेपास्थित पार्टी केन्द्रीय कार्यालय बीपी स्मृति भवनमा दिउँसो २ बजे शपथ ग्रहण समारोह आयोजना गरिएको छ । केन्द्रीय निर्वाचन समितिका अनुसार सभापतिबाहेक नवनिर्वाचित सबै पदाधिकारी तथा केन्द्रीय सदस्यले पद तथा गोपनीयताको शपथ लिनेछन् । नवनिर्वाचित सभापति गगनकुमार थापाले यसअघि नै असोज ३१ गते दसैँको फूलपातीका दिन शपथ ग्रहण गरिसकेका छन् । त्यसैले आजको समारोहमा सभापतिबाहेकका पदाधिकारी र सदस्यहरूलाई शपथ गराएर प्रमाणपत्र वितरण तथा पदबहाली गराइनेछ । निर्वाचन समितिका सदस्य सचिव अधिवक्ता राजु कटुवालका अनुसार यसपटकको शपथ ग्रहण कार्यक्रम विगतका महाधिवेशनभन्दा फरक ढाँचामा हुनेछ । शपथ ग्रहणसँगै प्रमाणपत्र वितरण र पदबहालीसमेत एकै दिन सम्पन्न गर्ने तयारी गरिएको छ । गत असोज १८ देखि २३ गतेसम्म काठमाडौंमा सम्पन्न कांग्रेसको १५औँ महाधिवेशनअन्तर्गत भएको निर्वाचनको अन्तिम नतिजा असोज ३० गते औपचारिक रूपमा सार्वजनिक गरिएको थियो । महाधिवेशनको उद्घाटन र बन्दसत्र खुलामञ्चमा तथा मतदान खुलामञ्च र राष्ट्रिय सभागृहमा गरिएको थियो । असोज २३ गते भएको मतदानपछि सोही दिन राति राष्ट्रिय सभागृहमा सभापति पदको मतगणना सुरु गरिएको थियो । सभापतिको नतिजा असोज २४ गते बिहान सार्वजनिक भएको थियो भने अन्य पदको मतगणना सोही दिन रातिदेखि सानेपास्थित पार्टी केन्द्रीय कार्यालयमा गरिएको थियो । यसपटक निर्वाचनमा ७ हजार ३९२ मतदाता सहभागी भएको निर्वाचन समितिले जनाएको छ । सदस्य सचिव कटुवालका अनुसार १४औँ महाधिवेशनमा ४ हजार ७०० मतदाताको मतगणना सम्पन्न गर्न १२ दिन लागेको थियो । तर, यसपटक मतदाताको संख्या बढेर ७ हजार ३९२ पुग्दा पनि एक साताभित्रै मतगणना सकिएको हो । निर्वाचनमा झन्डै एक लाख ६२ हजार मतपत्र गणना गर्नुपरेको थियो । कुल २२९ पदका लागि निर्वाचन भएकोमा ७७ प्रकारका पद रहेका थिए । प्रत्येक मतदाताले २३ वटा मतपत्रमार्फत मतदान गर्नुपर्ने व्यवस्था गरिएको थियो । महाधिवेशनबाट गगनकुमार थापा ९४ प्रतिशत मतसहित सभापतिमा निर्वाचित भएका छन् । वरिष्ठ उपसभापतिमा विश्वप्रकाश शर्मा, खुला उपसभापतिमा डा। चन्द्रकान्त भण्डारी र इन्जिनियर मधु आचार्य, महिला उपसभापतिमा पुष्पा भुसाल तथा समावेशी उपसभापतिमा विनोद चौधरी निर्वाचित भएका छन् । त्यस्तै, महामन्त्रीमा प्रदीप पौडेल, उदयशमशेर जबरा र डा। डिला संग्रौला ९पन्त० निर्वाचित भएका छन् । विभिन्न समावेशी समूह र अन्य पदमा निर्वाचित सदस्यहरूसहित नयाँ केन्द्रीय कार्यसमितिले आजदेखि पार्टीको सांगठनिक तथा राजनीतिक जिम्मेवारी अघि बढाउनेछ । शपथ ग्रहण र पदबहालीपछि आजै सानेपामा नयाँ केन्द्रीय कार्यसमितिको पहिलो बैठक बस्ने तयारी छ । बैठकमा महाधिवेशन सफल बनाउन सहयोग गर्ने प्रतिनिधि, निर्वाचन समिति, सुरक्षाकर्मी, सञ्चारकर्मी तथा पार्टीका नेता–कार्यकर्तालाई धन्यवाद दिने प्रस्तावमाथि छलफल हुने बताइएको छ । त्यसैगरी, पार्टीका आगामी सांगठनिक गतिविधि तथा जिल्ला र प्रदेश अधिवेशनका विषयमा पनि बैठकमा छलफल हुने नेताहरूले बताएका छन् । नयाँ नेतृत्वले औपचारिक रूपमा जिम्मेवारी सम्हालेसँगै कांग्रेसको आगामी संगठनात्मक कार्यदिशा र अधिवेशनसम्बन्धी तयारीबारे हुने निर्णयलाई चासोका साथ हेरिएको छ ।
एनपीएलको स्वास्थ्य साझेदार बन्यो आर्य फार्माल्याब, तीन वर्षे सम्झौता
काठमाडौं । आर्य फार्माल्याबले नेपाल प्रिमियर लिग (एनपीएल) को स्वास्थ्य साझेदारका रूपमा नेपाल क्रिकेट संघ (क्यान) सँग तीन वर्षे सहकार्य गर्ने सम्झौता गरेको छ । स्थापनाको ३०औँ वर्षमा प्रवेश गरेको अवसरमा कम्पनीले यस्तो सम्झौता गरेको हो । कम्पनीका अनुसार क्रिकेटमार्फत स्वास्थ्य सचेतना अभिवृद्धि गर्नुका साथै खेलकुद र जनस्वास्थ्यबीचको सम्बन्धलाई थप मजबुत बनाउनु सहकार्यको मुख्य उद्देश्य हो । यस सहकार्यअन्तर्गत आर्य फार्माल्याबले एनपीएलका खेल सञ्चालन हुने त्रिभुवन विश्वविद्यालय अन्तर्राष्ट्रिय क्रिकेट मैदानमा स्वास्थ्य परामर्श, स्वास्थ्य परीक्षण कक्ष, जनचेतनामूलक कार्यक्रम तथा मनोरञ्जन र खेलकुदसम्बन्धी गतिविधि सञ्चालन गरिरहेको छ । यी कार्यक्रममार्फत खेल हेर्न आउने दर्शकलाई आधारभूत स्वास्थ्य परीक्षण, स्वास्थ्य परामर्श र स्वस्थ जीवनशैलीसम्बन्धी जानकारी प्रदान गर्ने कम्पनीको लक्ष्य छ । यसैगरी, आर्य फार्माल्याबले खेलाडीको उत्कृष्ट प्रदर्शन र खेल भावनालाई प्रोत्साहन गर्न प्रत्येक खेलमा दुई खेलाडीलाई ‘हेल्दी पार्टनरसिप अवार्ड’ प्रदान गर्ने भएको छ । अवार्ड प्राप्त गर्ने प्रत्येक खेलाडीले जनही २५ हजार रुपैयाँ पुरस्कार पाउनेछन् । त्यस्तै, प्रत्येक खेलमा एक जना दर्शकलाई २० हजार रुपैयाँको ‘हार्टबिट मुमेन्ट अफ द म्याच’ पुरस्कार प्रदान गरिने कम्पनीले जनाएको छ । यी कार्यक्रमले खेलाडीको योगदानको कदर गर्नुका साथै दर्शकको सहभागिता र उत्साह बढाउने अपेक्षा गरिएको छ । स्थापनाको ३० वर्ष पूरा गरेको अवसरमा सुरु गरिएको यस सहकार्यलाई कम्पनीले आफ्नो यात्राको महत्त्वपूर्ण उपलब्धिका रूपमा लिएको छ । क्रिकेटजस्तो लोकप्रिय खेलमार्फत धेरैभन्दा धेरै नागरिकसम्म स्वास्थ्यसम्बन्धी सन्देश पुर्याउन सकिने विश्वास कम्पनीले व्यक्त गरेको छ ।
डलरको भाउ बढ्यो, युरो र पाउन्ड स्टर्लिङ घटे
काठमाडौं । नेपाल राष्ट्र बैंकले बिहीबारका लागि निर्धारण गरेको विदेशी मुद्राको विनिमय दरअनुसार अमेरिकी, अष्ट्रेलियन र सिंगापुर डलरको भाउ बढेको छ । युरो, पाउन्ड स्टर्लिङ, स्वीस फ्र्यांक र क्यानेडियन डलरको भाउ भने घटेको छ । राष्ट्र बैंकले बिहीबार अमेरिकी डलर एकको खरिददर १५२ रुपैयाँ ६ पैसा र बिक्रीदर १५२ रुपैयाँ ६६ पैसा तोकेको छ । बुधबार अमेरिकी डलर एकको खरिददर १५१ रुपैयाँ ८९ पैसा र बिक्रीदर १५२ रुपैयाँ ४९ पैसा थियो । त्यस्तै, युरोपियन युरो एकको खरिददर १६९ रुपैयाँ १७ पैसा र बिक्रीदर १६९ रुपैयाँ ८३ पैसा कायम भएको छ। बुधबार युरो एकको खरिददर १६९ रुपैयाँ २१ पैसा र बिक्रीदर १६९ रुपैयाँ ८८ पैसा थियो। बिहीबार पाउन्ड स्टर्लिङ एकको खरिददर २०२ रुपैयाँ र बिक्रीदर २०२ रुपैयाँ ७९ पैसा निर्धारण गरिएको छ। बुधबार यसको खरिददर २०२ रुपैयाँ २४ पैसा र बिक्रीदर २०३ रुपैयाँ ४ पैसा थियो। राष्ट्र बैंकका अनुसार स्वीस फ्र्यांक एकको खरिददर १८३ रुपैयाँ १२ पैसा र बिक्रीदर १८३ रुपैयाँ ८४ पैसा तोकिएको छ। बुधबार स्वीस फ्र्यांक एकको खरिददर १८३ रुपैयाँ ३४ पैसा र बिक्रीदर १८४ रुपैयाँ ७ पैसा थियो। अष्ट्रेलियन डलरको भाउ पनि बढेको छ। बिहीबार अष्ट्रेलियन डलर एकको खरिददर १०६ रुपैयाँ ८७ पैसा र बिक्रीदर १०७ रुपैयाँ २९ पैसा कायम भएको छ। बुधबार यसको खरिददर १०६ रुपैयाँ ७१ पैसा र बिक्रीदर १०७ रुपैयाँ १३ पैसा थियो। त्यस्तै, क्यानेडियन डलर एकको खरिददर १०८ रुपैयाँ १५ पैसा र बिक्रीदर १०८ रुपैयाँ ५८ पैसा निर्धारण गरिएको छ। बुधबार यसको खरिददर १०८ रुपैयाँ ३५ पैसा र बिक्रीदर १०८ रुपैयाँ ७७ पैसा थियो। सिंगापुर डलरको भाउ पनि बढेको छ। बिहीबार सिंगापुर डलर एकको खरिददर ११८ रुपैयाँ ५८ पैसा र बिक्रीदर ११९ रुपैयाँ ५ पैसा तोकिएको छ। बुधबार यसको खरिददर ११८ रुपैयाँ ५० पैसा र बिक्रीदर ११८ रुपैयाँ ९७ पैसा थियो।
८ दिनका लागि बैंकिङ प्रणालीबाट १ खर्ब ५० अर्ब निक्षेप खिच्दै राष्ट्र बैंक
काठमाडौँ । नेपाल राष्ट्र बैंकले बैंकिङ प्रणालीमा रहेको अधिक तरलता व्यवस्थापन गर्न १ खर्ब ५० अर्ब रुपैयाँ बराबरको निक्षेप संकलन गर्दै छ । राष्ट्र बैंकको मौद्रिक व्यवस्थापन विभागले आज कात्तिक १२ गते ८ दिनको अवधिका लागि १ खर्ब ५० अर्ब रुपैयाँ निक्षेप संकलन उपकरणको बोलकबोल तथा निष्कासन गर्न लागेको हो । यस बोलकबोल प्रक्रियामा सहभागी हुन चाहने ‘क’, ‘ख’ र ‘ग’ वर्गका बैंक तथा वित्तीय संस्थाहरूले आज दिउँसो ३ बजेसम्म अनलाइन बिडिङ सिस्टम सफ्टवेयर मार्फत आफ्नो आवेदन पेस गर्नुपर्ने बैंकले जनाएको छ । निक्षेप संकलनको ब्याजदर बोलकबोलको माध्यमबाटै निर्धारण हुनेछ भने इच्छुक संस्थाहरूले बहु ब्याजदरमा समेत बोलकबोल गर्न सक्नेछन् । यसरी संकलन गरिएको निक्षेपको साँवा तथा ब्याज भुक्तानी आगामी असोज २८ गते गरिनेछ । बोलकबोलमा सहभागी हुँदा घटीमा १० करोड र बढीमा १० करोड रुपैयाँले भाग गर्दा निःशेष भाग जाने गरी कुल आह्वान रकमसम्मका लागि आवेदन दिन सक्नेछन् । निक्षेप संकलनका लागि आह्वान गरिएको रकम बाँडफाँड गर्दा सबैभन्दा कम ब्याजदर प्रस्ताव गर्नेलाई पहिलो प्राथमिकतामा राखिने राष्ट्र बैंकले जनाएको छ । समान ब्याजदर प्रस्ताव गर्नेहरूको रकम कुल निष्काशित रकमभन्दा बढी भएमा ‘प्रो–राटा बेसिस’ मा बाँडफाँड हुनेछ । निक्षेप संकलन उपकरणमा लगानी गरेको रकमलाई सम्बन्धित बैंकले अनिवार्य नगद मौज्दातमा गणना गर्न पाउने छैनन् । तर, राष्ट्र बैंकको निर्देशन बमोजिम कायम राख्नुपर्ने वैधानिक तरलता अनुपात र तरलता अनुपातमा भने गणना गर्न सक्नेछन् ।
काठमाडौं बाहिरिँदा साढे २ सय, भित्रिँदा ६०० रुपैयाँसम्म तिर्नुपर्ने
काठमाडौं । नागढुंगा सुरुङमार्ग प्रयोग गर्ने सवारीसाधनबाट आगामी कात्तिक १५ गतेदेखि सडक उपभोग दस्तुर (टोल शुल्क) संकलन गरिने भएको छ । भौतिक पूर्वाधार तथा यातायात मन्त्रालयअन्तर्गत विकास सहायता कार्यान्वयन महाशाखाको नागढुंगा सुरुङमार्ग निर्माण आयोजनाले सार्वजनिक सूचना जारी गर्दै शुल्क संकलनसम्बन्धी जानकारी दिएको हो । सडक बोर्ड नेपालको कार्यकारी समितिको २०८३ असोज १२ गतेको निर्णय तथा २०८२ चैत २६ गते नेपाल राजपत्रमा प्रकाशित सूचनाअनुसार टोल शुल्क संकलन सुरु गर्न लागिएको आयोजनाले जनाएको छ । आयोजनाले काठमाडौं भित्रिने र काठमाडौं बाहिरिने सवारीसाधनका लागि छुट्टाछुट्टै शुल्क निर्धारण गरेको छ । काठमाडौं भित्रिने सवारीसाधनले वर्गअनुसार ६५ रुपैयाँदेखि ६०० रुपैयाँसम्म टोल शुल्क तिर्नुपर्नेछ । त्यस्तै, काठमाडौं बाहिरिने सवारीसाधनले ६० रुपैयाँदेखि २५० रुपैयाँसम्म शुल्क बुझाउनुपर्नेछ । आयोजनाले सुरुङमार्ग प्रयोग गर्ने सबै सवारीधनी तथा चालकलाई तोकिएको शुल्क बुझाएर मात्र यात्रा गर्न आग्रह गरेको छ । नागढुंगा सुरुङमार्ग सञ्चालनसँगै सडक उपभोग दस्तुर संकलन सुरु हुन लागेको हो । यसबाट सुरुङमार्ग प्रयोग गर्ने सवारीसाधनका लागि शुल्क तिर्नुपर्ने व्यवस्था लागू हुनेछ ।
