८ दिनका लागि बैंकिङ प्रणालीबाट १ खर्ब ५० अर्ब निक्षेप खिच्दै राष्ट्र बैंक
काठमाडौँ । नेपाल राष्ट्र बैंकले बैंकिङ प्रणालीमा रहेको अधिक तरलता व्यवस्थापन गर्न १ खर्ब ५० अर्ब रुपैयाँ बराबरको निक्षेप संकलन गर्दै छ । राष्ट्र बैंकको मौद्रिक व्यवस्थापन विभागले आज कात्तिक १२ गते ८ दिनको अवधिका लागि १ खर्ब ५० अर्ब रुपैयाँ निक्षेप संकलन उपकरणको बोलकबोल तथा निष्कासन गर्न लागेको हो । यस बोलकबोल प्रक्रियामा सहभागी हुन चाहने ‘क’, ‘ख’ र ‘ग’ वर्गका बैंक तथा वित्तीय संस्थाहरूले आज दिउँसो ३ बजेसम्म अनलाइन बिडिङ सिस्टम सफ्टवेयर मार्फत आफ्नो आवेदन पेस गर्नुपर्ने बैंकले जनाएको छ । निक्षेप संकलनको ब्याजदर बोलकबोलको माध्यमबाटै निर्धारण हुनेछ भने इच्छुक संस्थाहरूले बहु ब्याजदरमा समेत बोलकबोल गर्न सक्नेछन् । यसरी संकलन गरिएको निक्षेपको साँवा तथा ब्याज भुक्तानी आगामी असोज २८ गते गरिनेछ । बोलकबोलमा सहभागी हुँदा घटीमा १० करोड र बढीमा १० करोड रुपैयाँले भाग गर्दा निःशेष भाग जाने गरी कुल आह्वान रकमसम्मका लागि आवेदन दिन सक्नेछन् । निक्षेप संकलनका लागि आह्वान गरिएको रकम बाँडफाँड गर्दा सबैभन्दा कम ब्याजदर प्रस्ताव गर्नेलाई पहिलो प्राथमिकतामा राखिने राष्ट्र बैंकले जनाएको छ । समान ब्याजदर प्रस्ताव गर्नेहरूको रकम कुल निष्काशित रकमभन्दा बढी भएमा ‘प्रो–राटा बेसिस’ मा बाँडफाँड हुनेछ । निक्षेप संकलन उपकरणमा लगानी गरेको रकमलाई सम्बन्धित बैंकले अनिवार्य नगद मौज्दातमा गणना गर्न पाउने छैनन् । तर, राष्ट्र बैंकको निर्देशन बमोजिम कायम राख्नुपर्ने वैधानिक तरलता अनुपात र तरलता अनुपातमा भने गणना गर्न सक्नेछन् ।
काठमाडौं बाहिरिँदा साढे २ सय, भित्रिँदा ६०० रुपैयाँसम्म तिर्नुपर्ने
काठमाडौं । नागढुंगा सुरुङमार्ग प्रयोग गर्ने सवारीसाधनबाट आगामी कात्तिक १५ गतेदेखि सडक उपभोग दस्तुर (टोल शुल्क) संकलन गरिने भएको छ । भौतिक पूर्वाधार तथा यातायात मन्त्रालयअन्तर्गत विकास सहायता कार्यान्वयन महाशाखाको नागढुंगा सुरुङमार्ग निर्माण आयोजनाले सार्वजनिक सूचना जारी गर्दै शुल्क संकलनसम्बन्धी जानकारी दिएको हो । सडक बोर्ड नेपालको कार्यकारी समितिको २०८३ असोज १२ गतेको निर्णय तथा २०८२ चैत २६ गते नेपाल राजपत्रमा प्रकाशित सूचनाअनुसार टोल शुल्क संकलन सुरु गर्न लागिएको आयोजनाले जनाएको छ । आयोजनाले काठमाडौं भित्रिने र काठमाडौं बाहिरिने सवारीसाधनका लागि छुट्टाछुट्टै शुल्क निर्धारण गरेको छ । काठमाडौं भित्रिने सवारीसाधनले वर्गअनुसार ६५ रुपैयाँदेखि ६०० रुपैयाँसम्म टोल शुल्क तिर्नुपर्नेछ । त्यस्तै, काठमाडौं बाहिरिने सवारीसाधनले ६० रुपैयाँदेखि २५० रुपैयाँसम्म शुल्क बुझाउनुपर्नेछ । आयोजनाले सुरुङमार्ग प्रयोग गर्ने सबै सवारीधनी तथा चालकलाई तोकिएको शुल्क बुझाएर मात्र यात्रा गर्न आग्रह गरेको छ । नागढुंगा सुरुङमार्ग सञ्चालनसँगै सडक उपभोग दस्तुर संकलन सुरु हुन लागेको हो । यसबाट सुरुङमार्ग प्रयोग गर्ने सवारीसाधनका लागि शुल्क तिर्नुपर्ने व्यवस्था लागू हुनेछ ।
२ हजार बढी कुकुरको बन्ध्याकरण गर्दै ललितपुर महानगर, प्रतिकुकुर साढे २ हजारसम्म खर्च
काठमाडौं । ललितपुर महानगरपालिकाले महानगर क्षेत्रभित्र रहेका सामुदायिक कुकुरको संख्या नियन्त्रण र व्यवस्थापन गर्ने उद्देश्यले बन्ध्याकरण कार्यक्रम सञ्चालन गर्ने भएको छ । महानगरपालिकाले करिब २ हजार वा सोभन्दा बढी सामुदायिक कुकुरको बन्ध्याकरण गर्ने तयारी गरेको हो । महानगरपालिकाले पशु कल्याणका क्षेत्रमा काम गरिरहेका संघसंस्था तथा भेटेरिनरी क्लिनिकलाई कार्यक्रम सञ्चालनका लागि प्रस्ताव पेस गर्न आह्वान गरेको हो । प्रस्तावअनुसार प्रतिकुकुर बन्ध्याकरणका लागि अधिकतम २ हजार ५०० रुपैयाँसम्म खर्च गर्न सकिने महानगरपालिकाले जनाएको छ । इच्छुक संघसंस्था तथा भेटेरिनरी क्लिनिकले तोकिएको रकमको सीमाभित्र रहेर कार्यक्रम सञ्चालनसम्बन्धी प्रस्ताव पेस गर्नुपर्नेछ । महानगरपालिकाका अनुसार प्रस्ताव पेस गर्न इच्छुक संस्थाले मंसिर ११ गतेभित्र कार्यालयअन्तर्गतको जिन्सी व्यवस्थापन केन्द्रमा आवश्यक कागजातसहित प्रस्ताव बुझाउनुपर्नेछ । प्रस्तावसँगै पेस गर्नुपर्ने कागजातबारे जानकारी लिन पनि महानगरपालिकाले सम्बन्धित संघसंस्था तथा क्लिनिकलाई जिन्सी व्यवस्थापन केन्द्रमा सम्पर्क गर्न अनुरोध गरेको छ ।
आज एनपीएलमा काठमाडौं र जनकपुर तथा कर्णाली र विराटनगर भिड्दै
काठमाडौं । नेपाल प्रिमियर लिग (एनपीएल) मा आज दुई खेल हुँदैछन् । आज जनकपुर बोल्ट्स र काठमाडौं गोर्खाज तथा कर्णाली याक्स र विराटनगर किंग्सबीच प्रतिस्पर्धा हुन लागेको हो । त्रिवि क्रिकेट मैदानमा हुने पहिलो खेलमा जनकपुर बोल्ट्स र काठमाडौं गोर्खाज आमनेसामने हुनेछन् । यी दुई टोलीबीचको खेल दिउँसो साढे १२ बजे सुरु हुनेछ । जारी प्रतियोगितामा काठमाडौं गोर्खाजको यो पहिलो खेल हो । जनकपुर बोल्ट्स भने यसअघि भएको खेलमा कर्णाली याक्ससँग पराजित भएको थियो । आजै साँझ ५ बजे कर्णाली याक्स र विराटनगर किंग्सबीच दोस्रो खेल हुनेछ । विराटनगर किंग्स पनि प्रतियोगिताको आफ्नो अघिल्लो खेलमा चितवन राइनोजसँग पराजित भएको थियो ।
सार्वजनिक शौचालय व्यवस्थित र दिगो बनाउँदै काठमाडौं महानगर, माग्यो प्रस्ताव
काठमाडौं । काठमाडौं महानगरपालिकाले महानगर क्षेत्रभित्र रहेका सार्वजनिक शौचालयको सञ्चालन तथा व्यवस्थापनलाई व्यवस्थित, प्रभावकारी र दिगो बनाउन सेवाप्रदायकसँग प्रस्ताव तथा सुझाव माग गरेको छ । महानगरपालिकाको सहरी योजना आयोगको सचिवालयले सार्वजनिक शौचालय सञ्चालन तथा व्यवस्थापनका लागि इच्छुक फर्म, कम्पनी तथा संघसंस्थालाई लक्षित गर्दै रुचि पत्र आह्वान गरेको हो । महानगरले सार्वजनिक शौचालयको सेवा सुधार गर्ने उद्देश्यले सेवाप्रदायकहरूको उपलब्धता, अनुभव, क्षमता र सुझावका आधारमा भावी सञ्चालनको ढाँचा तथा योजना तयार गर्न लागेको जनाएको छ । महानगरपालिकाका अनुसार सार्वजनिक शौचालयको सञ्चालनलाई प्रभावकारी बनाउन सेवाप्रदायकसँगको सहकार्य र उनीहरूको व्यावसायिक अनुभव महत्त्वपूर्ण हुनेछ । त्यसका लागि इच्छुक संस्थाबाट प्राप्त हुने प्रस्ताव तथा सुझावलाई आगामी सञ्चालन योजना निर्माणको आधारका रूपमा लिइनेछ । इच्छुक फर्म, कम्पनी तथा संघसंस्थाले सूचना प्रकाशित भएको मितिले सात दिनभित्र महानगरपालिकाको आधिकारिक वेबसाइटमा उपलब्ध लिङ्कमार्फत आवेदन दिनुपर्नेछ ।
गृह मन्त्रालयले सोध्यो सशस्त्र प्रहरी निरीक्षक प्रधानलाई स्पष्टीकरण, सेवाबाट हटाउने चेतावनी
काठमाडौं । अध्ययन बिदा सकिएपछि कार्यालयमा हाजिर नभएको भन्दै गृह मन्त्रालयले सशस्त्र प्रहरी निरीक्षक सचिन प्रधानसँग स्पष्टीकरण माग गरेको छ । सचिवस्तरको कात्तिक १० गतेको निर्णयअनुसार मन्त्रालयले ७ दिनभित्र स्पष्टीकरण पेस गर्न निर्देशन दिँदै विभागीय कारबाही गर्नुपर्ने अवस्था देखिएको जनाएको छ । प्रधान अध्ययन बिदा समाप्त भएपछि कार्यालयमा हाजिर हुनुपर्नेमा सम्बन्धित निकायलाई जानकारी नगराई र बिदासमेत स्वीकृत नगराई अनुपस्थित रहेको मन्त्रालयले जनाएको छ । प्रधान २०८३ जेठ १७ गतेसम्म अध्ययन बिदामा रहेको र जेठ १८ गतेदेखि कार्यालयमा हाजिर हुनुपर्ने उल्लेख छ । तर, तोकिएको मितिदेखि उनी कार्यालयमा अनुपस्थित रहेको मन्त्रालयले जनाएको छ । सशस्त्र प्रहरी बल नेपाल नम्बर ३८ रिजर्भ गण मुख्यालय, लखनपुर, झापामा दरबन्दी रहेका प्रधानले आफू अनुपस्थित रहनुको कारण खुलाउँदै बाटोको म्यादबाहेक ७ दिनभित्र स्पष्टीकरण पेस गर्नुपर्नेछ । मन्त्रालयले सशस्त्र प्रहरी नियमावली, २०७२ को नियम ११३ को उपनियम (१) को खण्ड (ज) अनुसारको कसुरमा कारबाही गर्नुपर्ने देखिएको जनाएको छ । उक्त कसुरमा नियमावलीको नियम ११० को खण्ड (ख) को उपखण्ड (१) बमोजिम भविष्यमा सरकारी सेवाका लागि अयोग्य नठहरिने गरी सेवाबाट हटाउनेसम्मको विभागीय कारबाही हुन सक्ने चेतावनी दिएको छ ।
नेपाल बैंकका सम्पूर्ण सेवा ७ घण्टा बन्द हुने
काठमाडौं । नेपाल बैंकले शाखा समायोजनसम्बन्धी प्राविधिक कामका लागि आफ्ना सम्पूर्ण सेवा अस्थायी रूपमा बन्द गर्ने भएको छ । बैंकले तथ्याङ्क स्थानान्तरण (डाटा माइग्रेसन) गर्नुपर्ने भएकाले शुक्रबार रातिदेखि शनिबार बिहानसम्म सेवा बन्द गर्न लागेको हो । बैंकले सार्वजनिक गरेको सूचनाअनुसार कात्तिक १३ गते शुक्रबार राति ११:३० बजेदेखि कात्तिक १४ गते शनिबार बिहान ६ः३० बजेसम्म बैंकबाट प्रवाह हुने सम्पूर्ण सेवा बन्द रहनेछन् । यस अवधिमा ग्राहकले बैंकका नियमित सेवाहरू उपयोग गर्न नपाउने भएकाले आवश्यक बैंकिङ कारोबार समयमै सम्पन्न गर्न बैंकले ग्राहकलाई आग्रह गरेको छ । शाखा समायोजनसम्बन्धी कामलाई व्यवस्थित बनाउन तथ्याङ्क स्थानान्तरण गर्न लागिएको बैंकले जनाएको छ । प्राविधिक काम सम्पन्न भएपछि बैंकका सेवाहरू पुनः सञ्चालनमा आउने अपेक्षा गरिएको छ । सेवा बन्द हुँदा ग्राहकमा पर्न जाने असुविधाप्रति बैंकले क्षमायाचना गरेको छ ।
कांग्रेसका नवनिर्वाचित पदाधिकारी र केन्द्रीय सदस्यले आज शपथ लिँदै
काठमाडौं । नेपाली कांग्रेसको १५औँ महाधिवेशनबाट निर्वाचित केन्द्रीय कार्यसमितिका पदाधिकारी र सदस्यहरूको शपथ ग्रहण समारोह आज हुँदैछ । केन्द्रीय निर्वाचन समितिले असोज अन्तिम साता सम्पन्न १५औँ महाधिवेशनबाट निर्वाचित सभापतिबाहेकका पदाधिकारी र केन्द्रीय सदस्यहरूको शपथ ग्रहण समारोह बिहीबार आयोजना गर्न लागेको हो । सभापति गगनकुमार थापाले भने दसैँको फूलपातीका दिन अर्थात् असोज ३१ गते नै शपथ ग्रहण गरी पदभार सम्हालिसकेका छन् । निर्वाचन समितिकाका अनुसार आज कात्तिक १२ गते दिउँसो २ बजे पदाधिकारी र केन्द्रीय सदस्यहरूको शपथ ग्रहण हुनेछ । समारोह पार्टीको केन्द्रीय कार्यालय सानेपामा आयोजना गरिनेछ । निर्वाचन समितिले गत सोमबार सूचना प्रकाशित गरी १५औँ महाधिवेशनबाट निर्वाचित पदाधिकारी र केन्द्रीय सदस्यहरूलाई शपथ ग्रहण समारोहमा उपस्थित हुन आग्रह गरेको थियो । असोज १८ देखि २३ गतेसम्म सम्पन्न कांग्रेसको १५औँ महाधिवेशनबाट गगनकुमार थापाको नेतृत्वमा २३१ सदस्यीय केन्द्रीय कार्यसमिति चयन भएको थियो । पार्टी विधानमा २९७ सदस्यीय केन्द्रीय कार्यसमितिको व्यवस्था छ । बाँकी ६६ सदस्य सभापतिले मनोनीत गर्ने प्रावधान रहेको छ । रिक्त सदस्य पदमा मनोनयन गर्ने विषयमा छलफल गर्न आजै केन्द्रीय कार्यसमिति बैठक बस्ने तयारीसमेत गरिएको छ ।
