माछापुच्छ्रे बैकको ९ प्रतिशत बोनस र ६ प्रतिशत नगद लाभांश दिने प्रस्ताव पारित
काठमाडौं । माछापुच्छ्रे बैक लिमिटेडको सेयरधनीलाई ९ प्रतिशत बोनस र ६ प्रतिशत नगद लाभांश दिने प्रस्ताव पारित भएको छ । शुक्रबार सम्पन्न बैंकको १९औँ वार्षिक साधारण सभाले कम्पनीको सञ्चालक समितिको उक्त प्रस्तावलाई पारित गरेको हो । उक्त सभाले बैंकको आर्थिक बर्ष २०७३/७४को बार्षिक प्रतिबेदन पारित गरेको छ । साथै, उक्त सभाले आगामी ३ वर्षको लागि जे.पी. राजवाहक एन्ड कम्पनीलाई बाह्य लेखापरीक्षक नियुक्ती गर्ने निर्णय पनि गरेको छ । हाल बैंकको चुक्ता पूँजी ७ अर्व ३९ करोड रुपैयाँ रहेको छ । उक्त पारित बोनस पश्चाात कम्पनीको चुक्तापूँजी ८ अर्ब ५ करोड रुपैयाँ पुग्नेछ । सोही अवसरमा बैंकले पोखराको नयाँबजार स्थित नयाँ एटीएम काउण्टरको समेत उद्घाटन गरेको छ । बैंकले आ.व. २०७४/७५को पहिलो त्रैमाससम्ममा २८ करोड ९ लाख रुपैयाँ खुद मुनाफा आर्जन गरेको छ । साथै २०७४ असोज मसान्त सम्ममा ६० अर्व ३० करोड रुपैयाँ निक्षेप परिचालन गरी ५४ अर्ब ४२ करोड रुपैयाँ कर्जा प्रवाह गरेको छ ।
पेट्रोल-डिजेलको भाउ बढ्ने निश्चित, सन् २०१८ सम्म तेल उत्पादनमा कटौती गर्ने सहमती
भियना । अर्गेनाइजेशन अफ पेट्रोलियम एक्सपोर्टिङ कंट्रिज (ओपेक) ले विहिबार बसेको १७३ औं बैठकमा सन् २०१८ सम्म तेलको उत्पादनलाई कटौती गर्ने निर्णय गरेको छ । लगातार ओरालो लागिरहेको कच्चा तेलको भाउ नियन्त्रण गर्ने उद्येश्यले ओपेकले यस्तो निर्णय गरेको हो । यसको सिधा मतलब आगामी दिनमा कच्चा तेलको मूल्य बढ्ने सम्भावना देखिएको छ । नेपालमा पेट्रोल तथा डिजेलको मूल्यमा यसको असर पर्ने निश्चित देखिएको छ । ओपेक संसारका पेट्रोलिय पदार्थ निर्यात गर्ने राष्ट्रहरुको ठुलो संगठन हो । यसमा मध्यपूर्वी क्षेत्रका १५ सदस्य मुलुकहरु आबद्ध छन् । ओपेकको भियानास्थित हेडक्वार्टरमा भएको मिटिङमा घंटौंसम्मको बहसपछि यस्तो सहमती जुटेको हो । यद्यपी लिबियाको तेल नियन्त्रणका लागि उत्पादन कटौती आवश्यक छ/छैन भन्ने बारे अझै सहमती भएको छैन । लिबिया अहिले आन्तरिक अस्थिरताबाट गुज्रीरहेको छ । १४ सदस्यीय ओपेक र गैर-ओपेक मेम्बरसँग संयुक्तरुपमा उत्पादन कटौतीमा बैठक गरिरहेका छन् । गैर-ओपेक देशहरुका नेतृत्व रुसले गर्नेछ । रूसले यही वर्ष ओपेक देशहरुसँग मिलेर उत्पादन कटौती गरेका थिए । यो कदम घाटामा गइरहेको अन्तराष्ट्रिय कच्चा तेल बजारलाई उतार्नका लागि चालिएको हो । यसअघि सन् १९७० मा ओपेकले तेल उत्पादनमा कटौती गरेको थियो । जसले तेलको मूल्य अचानक आकाशिएको थियो । अन्तराष्ट्रीय बजारमा कच्चा तेलको मुल्य प्रति ब्यारेल ६० अमेरिकी डलरसम्म पुगेको छ । उत्पादन कटौंती गर्ने सम्झौतामा अमेरिकाको सहभागिता छैन । त्यसैले माग पुरा गर्न अमेरिकाले आफ्नो उत्पादन बढाउने तर्फ रुसको संशय रहेको छ । अन्तराष्ट्रिय बजारमा कच्चा तेलको मूल्य नियन्त्रण गर्ने यो तरिक यो ओपेक मै निर्भर छ । यदी दुवै पक्ष (ओपेक र नन ओपेक) बीच सहमति बन्यो भने अन्तराष्ट्रीय बाजारमा तेलको भाउ बढ्ने निश्चित नै रहेको छ ।
जापानी राजदूतद्धारा चेम्वर एक्स्पोको अवलोकन
काठमाडौ । राजधानीको भृकुटीमण्डपमा बिहीबारदेखि सुरु भएको नेपाल चेम्वर एक्स्पो २०७४ को नेपालका लागि जापानी राजदूत मासासी ओगावाले एक्स्पोको भ्रमण गरेका छन् । राजदूतको टोलीलाई नेपाल चेम्वर अफ कमर्सका अध्यक्ष राजेश काजी श्रेष्ठ, एक्स्पो संयोजक राष्ट्रभूषण चाकुबजीले अवलोकन भ्रमण गराएका थिए । राजदूत मासासीले मेलामा रहेको विभिन्न स्टलहरुको अभिरुचिपूर्वक अवलोकन गरेका थिए । चेम्वरले गरेको यो तेश्रौ एक्स्पो हो । चेम्वरले प्रत्येक वर्ष यस्ता अन्तराष्टिय एक्स्पो गर्दै आएको छ । यस पटकको एक्स्पोमा दक्षिण कोरियाले पार्टनर मुललुकको हैसियतमा सहभागिता जनाएको छ भने थाइल्याण्ड फोकस मुलकुको रुपमा सहभागी रहेको छ । एक्सपोमा नेपालसहित कोरिया, थाइल्याण्ड, भारत, चीन, जापान, पाकिस्तान र वंगलादेश गरी आठ वटा मुलुकहरुको सहभागिता रहेको छ । मेलामा कुल दुई सय २५ वटा स्टलहरु रहेका छन् । एक्स्पो सोमबारसम्म चल्नेछ ।
सिक्लेस आयोजनाबाट परीक्षण उत्पादन शुरु
पोखरा । कास्कीको मादी गाउँपालिकाको सिक्लेसमा सञ्चालित सिक्लेस जलविद्युत् आयोजनाले परीक्षण उत्पादन शुरु गरेको छ । केसी कन्सट्रक्सनको सिक्लेस हाइड्रोपावर कम्पनीले तीन वर्ष अघिदेखि शुरु गरेको सो आयोजनाको निर्माण सम्पन्नपछि १३ मेगावाट विद्युत् परीक्षण उत्पादन शुरु गरेको हो । उत्पादन भएको विद्युत् राष्ट्रिय प्रशारण लाइनमा जोडिएको आयोजनाका प्रबन्ध निर्देशक किरण केसीले जानकारी दिनुभयो । कुल दुई अर्ब पाँच करोड रुपैयाँको लागतमा उक्त आयोजना निर्माण गरिएको हो । सिक्लेस गाउँ नजिकैको मड्क्यु खोलामा बाँध बनाई जम्मा गरिएको पानीलाई तीन किलोमिटर लामो सुरुङमा दुईवटा ट्रर्वाइनबाट तल झारी विद्युत् उत्पादन गरिएको छ । उत्पादित विद्युत् १३२ केभी प्रशारण लाइनबाट लेखनाथस्थित बूढीबजारमा निर्माण भएको सव-स्टेशनमा जोडिएको छ । ‘रन अफ द रिभर’ प्रविधिमा बनेको सो आयोजनाले नेपाल विद्युत् प्राधिकरणसँग हिउँदको समयमा प्रतियुनिट रु सात र वर्षायामको समयमा प्रतियुनिट रु चारका दरले विद्युत् खरिद बिक्री गर्ने सम्झौता भएको निर्देशक केसीले बताए । रासस
फागुन अघि काठमाडौं धुलो मुक्त नहुने, मेलम्चीले तत्काल सडक पिच नगर्ने
काठमाडौं । धुलोमुक्त हुने राजधानी बासीको सपना फागुन महिना अघि पुरा नहुने भएको छ । मेलम्ची खानेपानी आयोजनाले पाइप बिछ्याउने काम ९० प्रतिशत सम्पन्न गरेको भएपनि खनिएका सडकमा कालोपत्रे गर्ने काम भने भर्खरै १३ किलोमिटर मात्रै सम्पन्न गरेको छ । न्युनतम ४ मिटर देखि ७ मिटर चौडाई भएको ११० किलोमिटर सडक खनेर मेलम्ची खानेपानी आयोजना कार्यान्वयन इकाइले पाइप बिछ्याएको थियो । तर सो मध्ये १३ किलोमिटर मात्रै कालोपत्रे भएको छ । बाँकी ९७ किलोमिटर सडकमा भने फागुनपछि मात्रै कालोपत्रे हुनेछ । ‘हामीले ठेक्का त गत साल नै लगाएका थियौं तर जाडो महिनामा पिच गर्न नमिल्ने भएपछि फागुनपछि मात्रै काम अघि बढ्छ’, मेलम्ची खानेपानी आयोजना कार्यान्वयन निर्देशनालयका प्रवक्ता लिाला प्रसाद ढकालले भने । आयोजनाले ११० किलोमिटर सडक पिच गर्न ८८ करोडको ठेक्का लगाएको थियो । पाइप बिछ्याउने तथा प्रेसर जाँच्ने काम ढिला भएकाले पिच गर्न पनि ढिलाई भएको उनले बताए । मेलम्ची खानेपानी आयोजना कार्यान्वयन इकाईले वितरण प्रणालीको ६७० किलोमिटर र थोक वितरण सञ्जालका लागि ७६ किलोमिटर पाइप बिछ्याउने योजना रहेको छ । सोमध्ये थोक वितरण प्रणालीको ६५ किलोमिटर र खुद्रा वितरण प्रणालीको ६२५ किलोमिटर पाइप बिछ्याईसकेको छ । बाँकी रहेको पाइप बिछ्याउने काम आगामी २ महिनाभित्रै सम्पन्न गर्ने लक्ष्य राखेको छ । मेलम्चीले भत्काएको ७ मिटर बढि चौडाई भएका सडक भने सडक विभागले खानेपानी मन्त्रालयबाट बजेट लिएर कालोपत्रे गर्नेछ । ६७० मिटर सडकमध्ये ५६० किलोमिटरमा भने पाइप बिछ्याउँदा नै पिच गर्ने वा पुर्ने व्यवस्था गरिएको थियो । ‘साना पाइप बिछ्याउने ठाउँमा त्यतिबेलै सडक पुर्ने वा कालोपत्रे गर्ने व्यवस्था थियो । सोही अनुसार पाइपलाई पुर्णरुपमा पुरेर फिनिसिङ गरिसकिएको छ’, ढकालले भने ।
प्याजको भाउ नियन्त्रणमा भारतले ‘हार’ स्विकार्यो, उपभोक्ता मन्त्री भन्छन्, ‘अब हाम्रो हातमा छैन’
काठमाडौं । भारत सरकारले प्याजको निर्यातमा अंकुश लगाउँदा पनि भारतमा प्याजको आपूर्ति सहज बन्न सकेको छैन । एक साताअघि भारतको उपभोक्ता मामिला मन्त्रालयले घरेलु बजारमा प्याजको आपूर्ति सहज गर्ने भन्दै बाहिर निर्यात हुने प्याजको न्यूनतम मूल्य तोक्ने निर्णय गर्यो । निर्यातमा अंकुश लगाउँदा नेपाल लगायतका छिमेकी मुलुकमा प्याजको मूल्य आकाशिरहेको बेलामा विहिबार भारतको संयुक्त उपभोक्ता मामिला मन्त्री रामविलास पासवानले आफ्नो विफलता स्विकारेका छन् । नेपाली बजारमा पछिल्लो एक महिनामा प्याजको मूल्य प्रति किलो ५४ प्रतिशतले बढेको छ । कालिमाटी फलफूल तथा तरकारी बजार विकास समितिका अनुसार एक महिनाअघि प्रति किलो ६४ रुपैयाँ पुगेको प्याजको भाउ अहिले ९९ रुपैयाँ पुगेको छ । मंसिर ७ गते भारतका उपभोक्ता मामिला मन्त्री रामविलास पासवानले ट्विट गर्दै घरेलू बजारमा प्याजको आपूर्ति बढाउन र निर्यातलाई निरुत्साहित गर्न प्याजको न्यूनतम मूल्य प्रति टन ८५० अमेरिकी डलर तय गरेको जानकारी दिएका थिए । निर्यातमा अंकुश लगाउँदापनि भारतका दिल्ली, महाराष्ट्र जस्ता प्रमुख सहरमै प्याजको आपूर्ति सहज नबनेपछि सरकारले हार मानेको छ । टाइम्स अफ इण्डियासँग बोल्दै पासवानले भने, ‘माग र आपूर्तिबीच ठुलो अन्तर छ । मैले तपाईंहरुलाई तथ्यगत कुरा भनेको छु । प्याजको मूल्य अब हाम्रो हातमा रहेन ।’ एशियाकै सबैभन्दा ठुलो प्याज मण्डी लसलगाँउमा बुधबार प्याजको भाउमा १८ प्रतिशतले गिरावट आएको थियो । यद्यपी भारतका अन्य स्थानमा प्याजको आपूर्ति सहज बन्न सकेको छैन । पासवानले केन्द्र र प्रान्त बसेर यो समस्याको समाधान खोज्नुपर्ने स्पष्ट पारेका छन् । गत आर्थिक वर्षको तुलनामा प्याजको उत्पादन क्षमतामा ह्रास आएको पासवानले जानकारी दिए । उनका अनुसार गत आवमा २.६५ हेक्टर क्षेत्रफलमा प्याज खेती गरिएकोमा यसपाली घटेर १.९ लाख हेक्टर पुगेको छ । भारतबाट नेपालमा खपत हुने लगभग ९९ प्रतिशत प्याज आयात हुने गरेको कालीमाटी फलफुल तथा तरकारी बजार विकास समितिले जनाएको छ।
ज्योति विकास बैंकको नयाँ शाखा दाङको मौरीघाटमा
काठमाडौं । ज्योति विकास बैंक लिमिटेडले शुक्रबारदेखि दाङ जिल्लाको राप्ती गाँउपालिका ४, मौरीघाटमा नयाँ शाखा कार्यालय संचालनमा ल्याएको छ । उक्त स्थानमा पहिलो बैंकको रुपमा बैंकको यस शाखाले आफ्नो कारोवार संचालनमा ल्याएको हो । उक्त शाखा कार्यालयको उद्घाटन समारोहका प्रमुख अतिथि राप्ती गाँउपालिका प्रमुख नुमानन्द सुवेदीे तथा ज्योति विकास बैंकको संचालक समितिका अध्यक्ष हरिचन्द्र खड्काले संयुक्त रुपमा गरेका थिए । यो शाखा सहित दाङ जिल्लामा यस बैंकको ४ बटा शाखा कार्यालय भएका छन् । आफ्नो सेवा क्षेत्रलाई ग्रामीण भेग र वित्तीय पहुँच नपुगेका स्थानहरुमा शाखा विस्तार गर्दै लगिने र मुनाफालाई मात्र नहेरी सामाजिक उत्तरदायित्व र सेवा भाव समेतलाई जोड दिँदै आएको बैंकको संचालक समितिका अध्यक्ष हरिचन्द्र खड्काले जानकारी गराए । यस बैंकको ४६ वटा शाखा कार्यालय र १४ वटा एटिएम रहेका छन् ।
कैलाश विकास बैंकको १९ प्रतिशत लाभांश पारित, चुक्ता पुँजी साढे २ अर्ब माथी
काठमाडौं । कैलाश विकास बैंक लिमिटेडको १९.४५ प्रतिशत लाभांश पारित भएको छ । बैंकको शुक्रबार सम्पन्न २४औं वार्षिक साधारण सभाले १० प्रतिशत बोनस र ९.४५ प्रतिशत नगद लाभांश गरी सो मात्राको लाभांश वितरण गर्ने कम्पनीको प्रस्ताव पारित गरेको हो । साथै, उक्त सभाले संस्थाको आ.व. २०७३/०७४को वासलात तथा सोही मितिको नाफा नोक्सान हिसाव तथा नगद प्रवाह विवरण समेत पारित गरेको छ । १० प्रतिशत बोनस सेयर पश्चात कम्पनीको चुक्ता पुँजी २ अर्ब ५२ करोड रुपैयाँ पुगेको छ । गत मंसिर १३ गतेसम्ममा यस संस्थाले १८ अर्ब ३२ करोड रुपैयाँ निक्षेप संकलन गरी१६ अर्ब १९ करोड रुपैयाँ कर्जा प्रवाह गरेको कम्पनीद्धारा जारी विज्ञप्तिमा उल्लेख छ ।
