प्लाष्ट नेपाल फाउण्डेशनद्धारा भेटघाट कार्यक्रम सम्पन्न
काठमाडौं । विश्व वातावरण दिवसको अवसरमा विभिन्न सञ्चारकर्मी र प्लाष्ट नेपाल फाउण्डेशनका पदाधिकारी एवं सदस्यवर्गबीच भेटघाट कार्यक्रम सम्पन्न भएको छ । साथै, फाउण्डेशनका उपाध्यक्ष दिपक श्रेष्ठको सभापतित्वमा सोमबारका दिन काठमाडौंमा उक्त कार्यक्रमको आयोजना गरेको हो । कार्यक्रममा यस फाउण्डेशनका सञ्चालक समिति सदस्य तथा मिडिया टिमका संयोजक विनित अग्रवालले कार्यक्रमको उद्देश्य र महत्वमाथि प्रकाश पारेका थिए । प्लाष्टिकजन्य सामाग्रीको उपयोगिता, महत्व र प्रयोग पश्चात् निस्कने फोहोरको नकारात्मक असर र यसको सही व्यवस्थापनबारे जनचेतना फैलाउने उद्देश्यले यस विषयमा फाउण्डेशनले एउटा सानो वृत्त चित्र तयार गरी कार्यक्रममा प्रस्तुत गरेको थियो । कार्यक्रममा फाउण्डेशनका उपाध्यक्ष श्रेष्ठले वातावरण संरक्षणमा फाउण्डेशनले विभिन्न सरोकारवालहरुसँग मिलेर काम गर्ने प्रतिवद्धता जनाएका छन् ।
पेट्रोलियम पदार्थको मूल्य वृद्धि बाध्यता- मन्त्री यादव
काठमाडौं । उद्योग, वाणिज्य तथा आपूर्तिमन्त्री मातृका यादवले पेट्रोलियम पदार्थको मूल्य वृद्धि सरकारको रहर नभई बाध्यता भएको बताएका छन् । प्रतिनिधिसभाको सोमबारको बैठकमा विशेष समय लिएर इन्डियन आयल कर्पोरेशन र नेपाल आयल निगमबीच भएको सम्झौताअनुसार मूल्य वृद्धि भएको उनले बताएका छन् । सन् २०१७ मार्च १८ मा अन्तर्राष्ट्रिय क्षेत्रमा पेट्रोलियम पदार्थको मूल्य वृद्धि भएमा सोअनुसार मूल्य समायोजन गरिने दुई देशबीचको सो सहमतिमा उल्लेख छ । रासस
मन्त्री रघुवीरको निर्णयमाथि सर्वोच्चको अंकुश, वीपी राजमार्गमा ठूला सवारी नचलाउन आदेश
काठमाडौं । वीपी राजमार्गमा ठूला सवारी साधन नचलाउन सर्वोच्च अदालतले आदेश दिएको छ । न्यायधिश सपना प्रधान मल्लको एकल इजालासले सोमबार राजमार्गमा ठूला सवारी नचलाउन आदेश दिएको हो । मन्त्रिपरिषदको जेठ १३ गतेको निर्णयलाई कार्यान्वयन नगर्न सर्वोच्चले आदेश दिएको हो । सो इजलासमा बसन्त बस्नेत लगायत ३ जनाले बहस गरेका थिए । यसअघि प्राविधिक टोलीले गरेको अध्ययनमा राजमार्गमा १८ जना भन्दा धेरै सिट क्षमताको सवारी चलाउन नमिल्ने प्रतिवेदन बुझाएको थियो । वकिलहरुले रुट इजाजत दिने काम मन्त्रीको नभई विभागको भएको भन्दै इन्जिनियरहरुको रिर्पोट प्रस्तुत गरेका थिए । सर्वोच्चले मन्त्रिपरिषदको निर्णयको विषयमा लिखित जवाफ समेत माग गरेको छ । फैसलापछि दक्षिण एसियाकै नमुना राजमार्गले न्याय पाएको माइक्रो बस व्यवसायी संघका अध्यक्ष राजेन्द्र आचार्यले बताए ।
सनराइज बैंकको स्वास्थ्य बीमा अन्तर्गत महर्जनले पाए बीमा रकम
काठमाडौं । सनराइज बैंक लिमिटेडले “स्वास्थ्य बीमा सुविधा” अन्तर्गत ग्राहक राजेन्द्र महर्जनलाई बीमा रकम भुक्तानी गरेको छ । उक्त योजना अन्तर्गत बैंकले भैसीपाटी शाखाका ग्राहक महर्जनलाई उपचार खर्च ८० हजार २५६ बराबरको रकम प्रदान गरेको हो । बैंकका नायब महाप्रबन्धक रविन नेपालले सोमबार(आज) एक कार्यक्रमकाबीच बिरामी महर्जनलाई उक्त रकम दिएका हुन् । बैंकको उक्त बीमा अन्तर्गत बैंकका बचतकर्ताहरुले अस्पताल भर्ना भई स्वास्थ्य उपचार गराउँदा लाग्ने खर्च १ लाख रुपैयाँमा नबढ्ने गरी आफ्नो बचत खातामा रहने बार्षिक औषत मौज्दातको २५ प्रतिशत वा विल रकम मध्ये जुन कम हुन्छ सो रकम दाबी गर्न पाइनेछ । बैंकले यस “स्वास्थ्य बीमा सुविधा” अन्तर्गत देशभरका ७० भन्दा बढी तोकिएका निजी अस्पतालहरुमा स्वास्थ परिक्षण गराउँदा ५ देखि २० प्रतिशत सम्म छुट प्रदान गर्दै आएको छ ।
आइएमई जनरल इन्स्योरेन्स र ग्राण्डी हस्पिटलबीच क्यास लेस सम्झौता
काठमाडौं । आइएमई जनरल इन्स्योरेन्स लिमिटेड र ग्राण्डी इन्टरनेशनल हस्पिटलबीच सेवा प्रदान गर्ने सम्झौता भएको छ । उक्त सम्झौतापत्रमा आइएमई जनरल इन्स्योरेन्सका नायव महाप्रबन्धक पवन थापा र ग्राण्डी हस्पिटलका मेडिकल डाइरेक्टर डा. चक्रराज पाण्डेले हस्ताक्षर गरेका छन् । यस सम्झौता पश्चात आइएमई जनरल इन्स्योरेन्सबाट औषधोपचार बीमा सेवा खरिद गर्ने ग्राहकहरुको बीमालेखको सीमासम्म ग्राण्डी हस्पिटलबाट नगद रहित हस्पिटलाईजेसन सेवा प्राप्त हुनेछ । सोही अवसरमा इन्स्योरेन्सका नायव महाप्रबन्धक पवन थापाले हस्पिटलसँगको सहकार्यमा कम्पनीका ग्राहकहरुलाई बीमालेखमा तोकिएको सिमासम्म क्यास लेश हस्पिटलाईजेशन सुविधा प्रदान गर्ने इच्छा व्यक्त गरी संझौता गरेकोमा अस्पतालको संचालक समिति तथा व्यवस्थापनलाई धन्यवाद दिएका छन्। साथै, कार्यक्रममा हस्पिटलले आफ्ना ग्राहकहरुलाई इन्स्योरेन्ससंग आईजीआई औषधोपचार बीमालेख खरिद गरी अस्पतालसँग बीमालेखको सिमासम्म नगद रहित हस्पिटलाईजेशन सेवा लिन आग्रह गरेका छन् । साथै, उनले अस्पताल र अस्पतालसंग आवद्ध सदस्यहरुलाई औषधोपचार लगायत आवश्यक पर्ने सबै प्रकारका निर्जीवन बीमा सेवा यस इन्स्योरेन्सबाट प्राप्त गर्नसक्ने बताएका छन् ।
एईसीसी ग्लोबलको ‘अष्ट्रेलियन एप्लिकेशन्स् डे’ शुरु, २८ वटा विश्वविद्यालय सहभागी
काठमाडौं । एईसीसी ग्लोबलको सर्वाधिक ठूलो अष्ट्रेलियन शैक्षिक मेला “अष्ट्रेलियन एप्लिकेशन्स् डे जुन २०१८” को शुरु भएको छ । उक्त मेलाको उद्घाटन नेपालका लागि अष्ट्रेलियन राजदूत पिटर बडले गरेका हुन् । कार्यक्रममा २८ विश्वविद्यालय तथा कलेज प्रतिनिधिहरुको सहभागिता रहेको थियो । जसमा विद्यार्थी र तिनका अभिभावकले प्रत्यक्ष रुपमा ती प्रतिनिधिहरुसँग कोर्स, शुल्क एवं छात्रवृत्तिसम्बन्धी आफ्ना जिज्ञासाहरु राख्ने अवसर प्राप्त गरे । यस कार्यक्रमको मुख्य आकर्षण प्रतिनिधिहरुद्वारा स्पट असेस्मेन्ट तथा फाइनेन्सियल एवं भिसा गाइडेन्स बुथ रहेको थियो । कार्यक्रममा विद्यार्थीहरुले आफ्ना जिज्ञासाहरु प्रस्तुत गरे र एईसीसी ग्लोबलका दक्ष भिसा अफिसरहरुले उचित सल्लाहसुझाव सहित मद्दत पुर्याए । बैँकिङ पार्टनरको रुपमा एनआईसी एसिया, नेपाल एसबीआई, सानिमा बैंक, सिद्धार्थ बैंक र एभरेष्ट बैंक गरी ५ विभिन्न बैंकहरुले कार्यक्रममा उपस्थित सहभागीहरुलाई उत्कृष्ट अफरहरु प्रदान गरे । यस कार्यक्रममा ब्रिटिस काउन्सिल नेपालको पनि सहभागिता रहेको थियो । “विद्यार्थीहरु विश्व विद्यालय सम्म पुग्न नसक्ने अवस्थामा हामीले विश्वविद्यालयलाई नै विद्यार्थी सामु ल्याउने सक्दो प्रयास गरेका र्छौँ”, एईसीसी ग्लोबलका डेष्टिनेशन हेड सैलेश कुमार झाले भने । साथै, यस मेला आगामी जेठ २३ गते चितवनको भरतपुर गार्डेन रिसोर्ट र २४ गते पोखराको होटल पोखरा ग्राण्डीमा बिहान १० बजेदेखि बेलुकी ५ बजेसम्म आयोजना गरिने छ ।
तनहुँको फुस्रेटारमा ग्लोबल आइएमई बैंकको एक्सटेन्सन काउण्टर
काठमाडौं । ग्लोबल आइएमई बैंकले तनहुँ जिल्लाको फुस्रेटारमा नयाँ एक्सटेन्सन काउण्टर शुरु गरेको छ । सेवाग्राहीको बढ्दो चाप र स्थानियबासीको बिस्तारित बैंकिङ्ग सेवाको आवश्कतालाई मध्यनजर गर्दै बैंकले उक्त स्थानमा एक्सटेन्सन काउण्टरको शुरुवात गरेको हो । हाल बैंकले १२९ शाखा, १३१ एटिएम, ५ एक्सटेन्सन काउण्टर, १४ वटा राजश्व संकलन काउण्टर र ८७ शाखा रहित बैंकिङ्ग सेवा, ३ प्रतिनिधि/सम्पर्क कार्यालय माफर्त सेवा प्रदान गर्दे आइरहेको छ ।
भ्रष्ट्राचार अभियोगमा एकै दिन ४ जना विरुद्ध विशेष अदालतमा मुद्दा दायर
काठमाडौं । भ्रष्ट्राचारको अभियोगमा एकै दिन ४ जना विरुद्ध विशेष अदालत काठमाडौंमा मुद्दा दायर भएको छ । अख्तियार दुरुपयोग अनुसन्धान आयोगले विभिन्न समयमा पक्राउ गरेको अभियुक्तमाथी मुद्दा दायर गरिएको हो । मुद्दा दायर हुनेहरुमा रामाशिष साह, बिक्रान्त शुक्ला, अहमद खान र गिरवललाल धोवी रहेका छन् । वीरेन्द्र ऐश्वर्य उमावि लिम्सा, जाजरकोटका निमावि तहका विज्ञान विषयका शिक्षक रामाशिष साहको आईएससीको प्रमाणपत्र नक्कली भएको पुष्टी भएको हो । यसैगरी नेपाल विद्युत प्राधिकरण नेपालगञ्ज वितरण केन्द्र, नेपालगञ्ज, बाँकेमा कार्यरत ३ जनाले विद्युत मिटर नामसारी र नयाँ जडान गर्ने प्रयोजनका लागि घुस मागेपछि अख्तियारको टोलीले पक्राउ गरेको थियो । चारै जना विरुद्ध बिगो जरिवाना र कैदको माग गर्दै मुद्दा दायर गरिएको अख्तियारका प्रवक्ता रामेश्वर दंगालले जानकारी दिए ।
