जुम्लाबाट १७ करोडको स्याउ निर्यात, करीब १४ हजार घरधुरी स्याउ खेतीमा
काठमाडौं । जुम्लामा यस वर्ष १७ करोडको स्याउ निर्यात गरिएको छ । आर्थिक वर्ष ०७५/०७६ को भदौदेखि कात्तिकसम्म व्यापारीले १७ करोड बढीको स्याउ निर्यात गरेका हुन् । प्रधानमन्त्री कृषि आधुनिकीकरण परियोजना, स्याउ सुपरजोन जुम्लाका अनुसार जिल्लामा झण्डै तीन हजार ४०० टन स्याउ उत्पादन भएकामा दुई हजार ३०० टन स्याउ निर्यात भइसकेको छ । आठ वटा स्थानीय तहबाट स्याउ निर्यातका लागि करीब ३०० व्यापारीले अनुमति लिएका थिए । स्थानीय तहले प्रतिकिलो स्याउ निर्यातको ५० पैसाका दरले कर लिएको छ । व्यापारीले सरदरमा प्रतिकिलो ५० का दरले कृषकबाट स्याउ खरीद गरेका हुन् । उत्पादन भएका स्याउ काठमाडौँ, सुर्खेत, विराटनगर, पोखरालगायत देशका प्रमुख शहरमा निर्यात गरिन्छ । यस वर्ष प्रतिकूल मौसमका कारणले स्याउ उत्पादन सोचेअनुसार नभएको स्याउ सुपरजोनका वरिष्ठ कृषि अधिकृत टीकाराम शर्माले बताएका छन् । कृषि ज्ञान केन्द्रको तथ्याङ्कअनुसार जिल्लाको तीन हजार ४५० हेक्टर जमीनमा स्याउ खेती गरिन्छ । गत वर्ष तीन हजार ७०० टन स्याउ निर्यात भएको थियो । जुम्लाका कूल १८ हजार घरधुरीमध्ये करीब १४ हजार घरमा स्याउका बगैँचा रहेको छ । रासस
सानिमा बैंक राष्ट्रिय पत्रकारिता पुरस्कार पत्रकार देवकोटा र बरालले पाउने
काठमाडौं । यस वर्षको प्रेस काउन्सिल सानिमा बैंक राष्ट्रिय पत्रकारिता पुरस्कार पत्रकार कृष्णज्वाला देवकोटा र अरुण बरालले पाउने भएका छन् । सानिमा बैंक राष्ट्रिय पत्रकारिता पुरस्कार छनौट समितिद्धारा पत्रकार देवकोटा र बरालले ५ लाख राशीको उक्त पुरस्कार जनही दुई लाख ५० हजार रुपैयाँ पाउने भएका हुन् । प्रेस काउन्सिल नेपालका कार्यवाहक अध्यक्ष किशोर श्रेष्ठको संयोजकत्वमा नेपाल पत्रकार महासंघका अध्यक्ष गोविन्द आचार्य, सानिमा बैंकका प्रमुख कार्यकारी अधिकृत भुवनकुमार दाहाल, वरिष्ठ पत्रकार तीर्थ कोइराला सदस्य र काउन्सिलका मुख्य अधिकृत झविन्द्र भुसाल सदस्य सचिव रहेको पुरस्कार छनौट समितिको बैठकले पुरस्कार वितरण गर्ने भएका छन् । उक्त बैठकले पुरस्कार अग्रज पत्रकारहरुको उपस्थितिमा यही मंसिर २४ गते प्रदान गर्ने निर्णय गरेको छ । लामो समयदेखि पत्रकारितामा संलग्न रहनु भएका पत्रकार देवकोटा छापा पत्रकारितामार्फत नयाँ ढाँचामा समाचार सामग्री सम्प्रेषण गर्दै आएको नयाँ पत्रिका दैनिकका प्रधान सम्पादकको रुपमा रहेका छन् । त्यस्तै, पत्रकार बराल अनलाइन सञ्चारमाध्यमको रुपमा अनलाइन खबर डटकमका सम्पादक हुन् ।
कृषि ज्ञानकेन्द्रमा न काम छ न तलब नै, हाजिर गरेर घर फर्कन कर्मचारी बाध्य
काठमाडौं । प्रदेश सरकारअन्तर्गत रहेको कृषि ज्ञान केन्द्रका लागि सरकारले कार्यक्रम र बजेटको व्यवस्था नगर्दा त्यहाँ कार्यरत कर्मचारी अन्योलमा रहेको छ । कार्यक्रम र बजेटअख्तियारी नआएकै कारण काभ्रेपलाञ्चोक र सिन्धुपाल्चोक हेर्ने गरी काभ्रेपलाञ्चोकको धुलिखेलमा स्थापना भएको कृषि ज्ञानकेन्द्र यतिबेला सुनसान रहेको छ । कार्यालयको संरचनाअनुसार कार्यालय प्रमुखसहित १७ जनाको दरबन्दी रहेको सो कार्यालयमा करीब दुई हप्तादेखि १३ जना कर्मचारी हाजिर भइसकेको भए पनि कार्यक्रम नहुँदा कार्यालय आउने हाजिर गर्ने र फर्कन बाध्य रहेका छन् । कार्यालय प्रमुख, सात जना अधिकृत, तीन जना प्राविधिक सुब्बा, एक जना लेखापाल, एक जना खरिदार, तीन जना कार्यालय सहयोगी र एक जना चालकको गरी १७ जनाको दरबन्दी रहेको छ । जसमध्ये अहिले तीन जना अधिकृत र एक जना खरिदार गरी चार जनाबाहेक १३ जना कर्मचारी दैनिक कार्यालय आउने र हाजिर गरेर फर्कने गरिरहेका छन् । जिल्ला कृषि विकास कार्यालयबाट कृषि ज्ञान केन्द्रमा परिवर्तन भएपछि पहिलो कर्मचारीका रुपमा दैनिक कार्यालय सञ्चालन गर्दै आएको लेखापाल अखिल खड्काले बताएका छन् । कार्यक्रम नहुँदा कार्यालय आउने हाजिर गर्ने र फर्किनेबाहेक केही भएको कार्यक्रम र बजेट नहुँदा दैनिक प्रशासनिक खर्च र तलब खानसमेत नपाएको जनाएका छन् । मङ्सिर लाग्दा पनि तलब नआएको हुनाले धेरै समस्या ब्यहोरिरहेको अधिकृत थर्क जिसी बताएका छन् । तलब खान नपाउँदा विशेष गरी बाहिरबाट आउने कर्मचारीलाई धेरै समस्या भइरहेको छ । प्रथम चौमासिकको कार्यक्रम अहिलेसम्म कुनै पनि गर्न पाइरहेको छैन, कार्यक्रम नहुँदा न त काम छ, न त तलब नै, खासगरी प्रशासनिक खर्च र तलब भत्ता नदिँदा कर्मचारी ठूलो मर्कामा परेका छन् । संविधानको सङ्घीय संरचनाअनुसारको नयाँ कार्यालय भएकाले हाललाई कुनै पनि कार्यक्रम छैन । कार्यालयका प्रमुख कृष्णभद्र अधिकारीले अहिले नियमितरुपमा गर्ने काम साल्ट टे«डिङ कम्पनीमा किसानलाई मलखादको सिफारिश, कृषि सामग्री कम्पनीमा बीउबिजन र बिक्रेताको नवीकरण गर्नुपर्ने र विषादी बिक्रेताको नवीकरण जुन नियमितरुपमा गर्नुपर्ने काममात्रै गर्दै आएका छन् । किसानका बीचमा गर्नुपर्ने कार्यक्रम भने कुनै पनि शुरु नभएको भन्दै कार्यक्रम र बजेट नभएका कारण कृषि ज्ञानकेन्द्रमा काम गर्ने आफूलगायत सबै कर्मचारीले साउनदेखि तलबसमेत खान नपाएको कार्यालय प्रमुख अधिकारीले बताएका छन् । रासस
शिक्षालाई विज्ञान र प्रविधिसँग जोड्नुपर्छ – शिक्षामन्त्री पोखरेल
काठमाडौं । २५औँ वार्षिकोत्सव तथा रजतजयन्ती कार्यक्रममा शिक्षामन्त्री गिरिराजमणि पोखरेलले सरकारले लिएको समृद्ध नेपाल र सुखी नेपालीको अभियानलाई सफल पार्ने बताएका छन्र । विश्वविद्यालय अनुदान आयोगको शिक्षालाई विज्ञान, प्रविधि, खोज र अनुसन्धानसँग जोडेर लैजाने तथा त्यसलाई प्रयोग गर्नसके मात्रै देश समृद्ध हुने बताएका छन् । परम्परागत शिक्षा र परीक्षामुखी शिक्षा काम नलाग्ने बताउँदै मन्त्री पोखरेलले नेपालको शिक्षा विकाससँग जोड्ने बताएका छन् । परीक्षामुखी शैक्षिक पद्धतिले समस्या समाधान हुँदैन, शिक्षालाई उत्पादनसँग जोडेर लैजाने बताएका छन् । मन्त्री पोखरेलले आगामी एक वर्षभित्र विद्यालय बाहिर रहेका सबै बालबालिकालाई विद्यालयमा ल्याएर राष्ट्रियरुपमा देशलाई पूर्ण साक्षर घोषणा गर्ने तयारीमा जुटेको बताएका छन् । साथै सबै शिक्षण संस्थालाई हरित अभियानमा जोड्ने बताउँदै मन्त्री पोखरेलले उच्च शिक्षा क्षेत्रमा रहेको अराजकता र बेथितिलाई अब सुधार गरेर लैजाँदै विश्वविद्यालयलाई राष्ट्रिय वा प्रदेश के हो त्यो वर्गीकरण गर्दै राष्ट्रिय र प्रदेशअन्तर्गत लैजाने तयारी भएको छ । सङ्घीय शिक्षा नीति निर्माण प्रक्रियामा सरकार अगाडि बढेको बताउँदै पहिलो मस्यौदा तयार भएको छ । अब सातवटै प्रदेशबाट सुझाव लिएर दोस्रो मस्यौदा तयार गरी निचोडमा पुग्ने छ । कार्यक्रममा अध्यक्ष प्रा डा भीमप्रसाद सुवेदीले उच्च शिक्षाको अवस्था भयावह रहेको चित्रण गर्दै शिक्षामा आएको चुनौतीबारे छलफल गर्दै अगाडि बढ्ने बताएका छन् । रासस
‘सिआईआई कन्म्याक प्रदर्शनीले निर्माण व्यवसायीदेखि सिङ्गो मुलुकलाई फाइदा हुने’
काठमाडौं । देशको सबैभन्दा ठूलो पूर्वाधार प्रदर्शनीे ‘सिआईआई कन्म्याक प्रदर्शनी २०१८’ भक्तपुरमा शुरु भएको छ । भक्तपुरको सल्लाघारी मैदानमा शुरु भएको उक्त प्रदर्शनीको उद्घाटन भौतिक पुर्वाधार तथा यातायातमन्त्री रघुविर महासेठले गरेका हुन् । यातायातमन्त्री महासेठले देशको विकासका लागि पुर्वाधार विकास पहिलो प्राथमिकता भएको र यसकालागि नविनतम् निर्माण प्रविधिको आवश्यकता पर्ने बताएका छन् । देशको सबैभन्दा ठूलो पूर्वाधार प्रदर्शनीेको रुपमा रहेको सो प्रदर्शनीबाट नेपालका निर्माण व्यवसायीमात्र नभई सिङगो मुलुकले नै फाइदा लिनसक्ने उनले बताए । मन्त्री महासेठले अबको करिव चार बर्षमा मुलुकको पुर्वाधार विकासमा कायापलट ल्याउने बताएका छन् । समृद्ध ‘नेपाल–खुशी नेपाली’ भन्ने नारालाई साकार पार्न सरकार यो अभियानमा लागेको उनले बताएका हुन् । यसअघि नीति निर्माण गर्ने र तीन तहका सरकारको लागि आवश्यक ब्यवस्थापन गर्ने काममा सरकार अल्मलिएको भन्दै उनले अव अरु काम सकीएकोले विकास निर्माणको काम गर्ने बेला आएको बताए । नेपालमा भौतिक पुर्वाधारको क्षेत्रमा अझै धेरै काम गर्न बाँकी रहेको भन्दै उनले यसमा आधुनिक निर्माण प्रविधिको भूमिका महत्वपूर्ण हुने धारणा राखे । करिब चार वर्षको अवधिमा ६ हजार देखि ८ हजार किलोमिटर पक्की सडक बनाउने योजना सुनाउँदै उनले यसका लागि आधुनिक प्रविधिको आवश्यकता समेत औंल्याए । नेपालका लागि भारतीय राजदुत मन्जिभ् सिंह पुरीले समृद्ध नेपालको परिकल्पना पुरा गर्न पुर्वाधार विकासमा जोड दिनुपर्ने खाँचो औंल्याउँदै त्यसका लागि आधुनिक निर्माण प्रविधिको स्थान महत्वपूर्ण हुने धारणा राखे । समृद्ध नेपाल निर्माणका लागि तीव्र विकास आवश्यक पर्ने उल्लेख गर्दै उनले यसकालागि लगानी र प्रविधिको खाँचो पर्ने र यो प्रदर्शनीले त्यसमा सहयोग पुर्याउने बताए । त्यसअघि पुर्वमन्त्री एवं सांसद महेश बस्नेतले नेपालमा अन्तर्राष्ट्रियस्तरको प्रदर्शनीहलको अभाव खड्किएको भन्दै त्यस्तो हल निर्माणकालगि भक्तपुर क्षेत्रमा २ सय रोपनी जग्गा उपलब्घ गराउन आँफू तयार रहेको बताए । नयाँ नेपाल निर्माणकालागि सम्वद्ध सवैपक्ष एकसाथ अगाडि बढ्नुपर्ने आवश्यकता औंल्याउँदै उनले त्यसका लागि आवश्यक प्रविधि, एवं साधन र स्रोतको कमी हुन नहुने धारणा राखे । त्यसअघि कन्म्याक नेपाल २०१८ का अध्यक्ष अरविन्द के गर्गले नेपाल भारतवीच प्रगाढ आर्थिक एवं साँस्कृतिक सम्वन्ध रहेको उल्लेख गर्दै नेपालको उन्नति र प्रगतिमा भारतीय व्यवसायको साथ र सहयोग निरन्तर हुने प्रतिवद्धता जनाए । समृद्ध नेपालको निर्माणका लागि यहाँ पुर्वाधार विकासकालागि सडक, पुल, विद्यूत जस्ता क्षेत्रमा बिशेष ध्यान दिन जरुरीरहेको धारणा उनले राखे । सिआईआई ट्रेड फेयर काउन्सिलका अध्यक्ष विपिन सोन्धीले कुनैपनि मुलुकको निर्माण क्षेत्रको विकासमा सरकारी सहयोग महत्वपुर्ण हुने बताए । नेपाल प्रत्येक दुई बर्षमा यस्तो प्रदर्शनीको आयोजना गर्ने योजना सुनाउँदै उनले यसले नेपालमा नयाँ प्रविधि ल्याउन सहयोग पुग्ने धारणा राखे । त्यसक्रममा सिआईआईका डेपुटी डिरेक्टर जनरल विरेन्द्र गुप्ता र नेपाल निर्माण ब्यवसायी महासंघका अध्यक्ष रवी सिंगले नेपालको निर्माण व्यवसायका विभिन्न आयामहरुको बारेमा प्रकाश पारेका थिए । भारतीय उद्योग संघ (सीआईआई) को अयोजनामा नेपालको सबैभन्दा ठूलो निर्माण उपकरण प्रदर्शनी सीआईओ कन्म्याक २०१८ को आयोजना भएको हो । सल्लाघारी ओपन ग्राउण्ड, भक्तपुरमा मंसिर ६ देखि शुरु भएको प्रदर्शनी मंसिर ८ गतेसम्म आयोजित हुनेछ । तीन दिने प्रदर्शनीमा १ सय ५० भन्दा बढी प्रदर्शकहरुले १५ हजार वर्गफिट क्षेत्रफलमा प्रदर्शनीको आयोजना गरेका छन् ।
नयाँ श्रम कानुनबाट नेपालमा लगानीको वातावरण बन्यो, अर्थतन्त्रमा सुधार हुने- चन्द्रप्रसाद ढकाल
काठमाडौं । आइएमई ग्रुपका अध्यक्ष तथा रोजगारदाता परिषद्का सभापति एवम् नेपाल उद्योग वाणिज्य महासंघका उपाध्यक्ष चन्द्रप्रसाद ढकालले नेपालमा हालै जारी श्रम सम्बन्धी दुई छुट्टाछुट्टै कानुनका कारण देशमा लगानीको वातावरण बनेको बताएका छन् । श्रमिकहरुको वर्तमान आर्थिक अवस्था विषयमा एओटीएसद्धारा जापानको टोकियोमा आयोजित अन्तर्राष्ट्रिय सम्मेलनलाई सम्बोधन गर्दै ढकालले श्रम र श्रमिकहरुको सामाजिक सुरक्षा सम्बन्धी कानुनमा भएको नयाँ व्यवस्थाबाट देशमा लगानीको वातावरण बनेको बताएका हुन् । नेपाल उद्योग वाणिज्य महासंघको रोजगारदाता परिषदको अध्यक्षका रुपमा उक्त सम्मेलनलाई सम्बोधन गर्दै ढकालले देशमा उद्योग धन्दाको स्थापना र विकासका साथै वैदेशिक लगानीका लागि पनि यी कानुनले नयाँ वातावरण सिर्जना गर्ने बताएका छन् । साथै, श्रमसँग जोडिएका विविध समस्या हल गर्न सहयोग पुग्ने नेपालको आर्थिक क्षेत्रले अपेक्षा गरेको उनले बताए । यी नयाँ कानुनी व्यवस्थाले श्रमिकसँग जोडिएका विभिन्न खाले समस्या सम्बोधनका लागि समन्वय गर्न महासंघलाई पनि सहयोग पुगेको ढकालले बताए । नेपाल सरकार, रोजगारदाता, श्रमिकहरु आवद्ध ट्रेड युनियन प्रतिनिधि तथा नेपाल उद्योग वाणिज्य महासंघबीचको छलफल र परामर्शपछि यी कानुन आएका र नयाँ व्यवस्था बमोजिम श्रमिकलाई दिने सेवा र सुविधाका लागि रोजगारदाताहरु पनि सहमत भएकोले नेपालको श्रम क्षेत्रमा र यसका कारण सिंगो अर्थतन्त्रकै क्षेत्रमा यी कानुनले सकारात्मक प्रभाव पार्ने उनले बताए । श्रमिकको सामाजिक सुरक्षाका लागि उनीहरुको आफ्नै र रोजगारदाताका तर्फबाट गरिने योगदानले सामाजिक सुरक्षा कानुनतः नै निर्माण भएको र न्युनतम ज्यालाको नयाँ व्यवस्थाले श्रमका क्षेत्रमा सकारात्मक प्रभाव पार्ने उनले बताए । योगदानमा आधारित यस सामाजिक सुरक्षा कार्यक्रममा रोजगारदाताका तर्फबाट कामदारको शुरु तलबको २० र श्रमिक आफैको ११ प्रतिशतका दरले काटेर सामाजिक सुरक्षा कोषमा जम्मा गरी श्रमिकलाई दिने प्रावधान रहेको छ । उपाध्यक्ष ढकालले नेपालमा लामो राजनीतिक संक्रमणपछि स्थीर सरकार बनेको भन्दै नेपालमा लगानीका लागि विदेशी लगानीकर्ताहरुलाई पनि आग्रह गरेका छन् । श्रमिकका समस्याका विषयलाई पनि सम्बोधन गर्ने गरी श्रमसम्बन्धी कानुन निर्माण भएका र देशमा राजनीतिक स्थिरता पनि आएकोले नेपालका कैयौँ सम्भावनाका क्षेत्रहरुमा लगानी गर्न अब विदेशी लगानीकर्ताका लागि राम्रो र सकारात्मक वातावरण बनेको उनले बताए । सो सम्मेलनमा विश्वका १४ देशका रोजगारदाता कम्पनी तथा प्रतिष्ठानका प्रतिनिधिहरुको सहभागिता रहेको थियो ।
अर्घाखाँची सिमेन्टले क्षमता बढाएर दैनिक ६० हजार बाेरा पुर्याउँदैछ: अभिनय जैसवाल
र्इ. अभिनय जैसवाल, याेजना बिक्री प्रमुख, अर्घाखाँची सिमेन्ट प्रा. लि. अर्घाखाँची सिमेन्ट प्रा.लि. नेपालकै ठूलाे ओपीसी सिमेन्ट उत्पादन गर्ने कम्पनी मध्येमा पर्दछ । डेनिस प्रविधि, क्रिस्चियन पिफरको प्रयोग गरी रुपन्देहीकाे भैरहवामा रहेको मिल मार्फत उच्चस्तरीय सिमेन्टको उत्पादन गर्दै आएको छ । यसले रोटरी क्लिन टेक्नोलोजीका माध्यमबाट आफ्नै क्लिङकर पनि उत्पादन गर्दै आएको छ । अर्घाखाँची सिमेन्टले प्रविधि र स्रोतहरुको चयनमा निकै ध्यान पुर्याएको छ । अर्घाखाँची सिमेन्टले सबैभन्दा उत्कृष्ट सिमेन्ट उत्पादन गर्दै अाएकाे छ । हामी वातावरणमैत्री कार्यहरुका मार्फत् निर्माण व्यापारमा आफुलाई अग्रणी स्थानमा पुर्याउन चाहान्छौं । यस कम्पनीले नयाँ प्लास्टिकद्वारा लेमिनेशन गरिएको बोराको प्रयोग गर्दै आएको छ, जसले गर्दा सिमेन्ट लामो समयसम्म बिग्रिदैन । हामी कम्पनीको कार्यक्षेत्रभन्दा अघि बढ्दै समाजको हरेक क्षेत्रलाई संलग्न गराउन चाहान्छौं । जसबाट हाम्रा प्रक्रियाहरु सुरक्षित र अन्तर्राष्ट्रिय गुणस्तरकाे भएको सुनिचित् होस् । हाम्रो दैनिक क्षमता भनेको दैनिक २४ हजार बोरा रहेको छ । क्लिङ्कर प्रविधि अपडेट गरेपछि हाम्रो क्षमता दैनिक ६० हजार बाेरा पुग्ने छ । यसका लागि ३ महिना समय लाग्नेछ । नेपालमा ५० भन्दा बढी सिमेन्ट कम्पनीहरु छन् । यसमा दुई किसिमका सिमेन्ट कम्पनी छन् । एउटा आफ्नै क्लिङ्कर उत्पादन गरी सिमेन्ट बनाउने र अर्को क्लिङ्कर आयात गरी सिमेन्ट बनाउने कम्पनीहरु छन् । ५० भन्दा बढी कम्पनीहरु मध्ये आफ्नै क्लिङ्कर उत्पादन गर्ने कम्पनीहरु १६ वटा जति मात्रै रहेका छन् । सिमेन्टको प्लान्टमा इ.पी.सी. ‘इलेक्ट्रोस्ट्याटिक प्रेसिपिटेटर’ र डेनिस प्रविधि जस्ता वातावरणमैत्री उपायहरुको प्रयोग गरिएको छ । साथै, फ्याक्ट्री एरियामा पूर्ण हरियाली गरिएको छ । सिमेन्टमा न्युनतम ५३ एमपीए को शक्ति र सहनशीलता चाहिने पुर्वाधारहरु निर्माण गर्न सकिन्छ । कन्ट्रोल रुमसँग जोडिएका अनलाइन एनलाइजर र अटोमेटिक वे फिडरबाट सबैभन्दा उत्कृष्ट कच्चा पदार्थको मिश्रण प्राप्त गर्न सकिन्छ । लगातार बगिरहने सिलोका माध्यमबाट भट्टीमा एकैनाशको कच्चा पदार्थ जाने गर्दछ । यसकारणले सिमेन्टको हरेक कण एकैनाशको हुने गर्दछ । सबै निरीक्षण कम्प्युटरबाटै हेर्ने भएकाले यसले क्लिङ्करको गुणस्तर उच्च राख्दछ भने भट्टीमा कच्चा पदार्थको समय पनि व्यवस्थित राख्दछ । पाँच कारणबाट जाने प्रि हिटर साइक्लोन सिस्टमका साथ प्रिक्याल्सिनरले निर्माण प्रक्रियालाई अझै व्यवस्थित बनाउँछ । आधुनिक फ्यास डेनिस प्रविधिमा उच्च क्षमताको विभाजक भएकाले यसले सिमेन्टको झनै सुक्ष्म कणहरु उत्पादन गर्दछ । यसले गर्दा सिमेन्टको मिसावट राम्रो हुन जान्छ र कङ्क्रिटको घनत्व पनि बढ्छ । सिमेन्ट उत्पादनको क्रममा थोरै मात्र पानी प्रयोग गरिएको हुने भएकाले यसबाट बनाइएको कङक्रिट रसाउने सम्भावना निकै कम हुन्छ । यसले गर्दा सिमेन्टको घनत्व बढी हुनुको साथै टिकाउ पनि हुन्छ । हामीले नेपाल गुणस्तर चिन्ह लिएका छौं । हाम्रो सिमेन्ट नेपालका ठूला ठूला आयोजनाहरुमा प्रयोग भैसकेका छन् । सेनजेन हाइड्रोपावर रसुवा, नारायण मुग्लिन सडकखण्ड, लोवर मोदी, मेलम्ची खानेपानी लगायत आयोजनाहरुमा यसको प्रयोग भैसकेको छ । समग्रमा हाम्रो उत्पादन प्रयोग गर्ने सेवाग्राहीहरु सन्तुष्ट छन् । यसबाट अझ अत्याधुनिक उत्पादन बजारमा ल्याउन सहयोग पुग्नेछ । नेपालमा अहिले पुर्वाधार विकासमा ठूला आयोजनाहरु सञ्चालन भैरहका छन् । धेरै पानी पर्ने समयमा सिमेन्टको माग कम हुन्छ भने कम पानी पर्ने समयमा माग बढी हुन्छ । यो समयमा हाम्रो उत्पादनले माग धान्न सक्दैन । अहिले सिमेन्ट र डन्डी उत्पादनमा ठूला लगानीहरु भित्रिरहेका छन् । यसले केही वर्षमै बजार माग पुरा गर्नेछ । पहिले नेपालमा सेवाग्राहिरु क्वालिटीमा सचेत रहेका थिएनन् । तर अहिले चेतनाको स्तर बढीसकेको छ । हाम्रो उत्पादनले अन्तर्राष्ट्रिय बजारमा पनि प्रतिस्पर्धा गर्न सक्छ । तर नेपालकै भाग धान्न नसकेको अवस्थामा हाम्रो ध्यान नेपालमै रहेको छ । हाम्रो देशैभरी डिलर रहेका छन् । अझै केही स्थानमा थप्ने तयारी गरिरहेका छौं । धेरै सिमेन्ट बेच्ने डिलरहरुलाई विभिन्न सुविधाहरु प्रदान गरिरहेका छौं । सेवाग्राहीलाई म के भन्न चाहन्छु भने सिमेन्टको प्रयोग गर्दा कम्पनी प्रोफाइल र कस्ता योजनाहरुमा प्रयोग भैरहका छन् भनेर बुझ्नुपर्छ । (कुराकानीमा अाधारित)
ताप्लेजुङकाे मध्य मेवाखोला जलविद्युत् आयोजना निर्माण , मेवा डेभलपर्स प्राइभेटले कार्य शुरू गर्दै
काठमाडौं । मेवाखोलाबाट ४९ मेगावाटको मध्य मेवाखोला जलविद्युत् आयोजना निर्माण हुने भएको छ । मिक्वाखोला गाउँपालिकास्थित साविकको साँवा र लिवाङ गाविस भएर बग्ने उक्त खोलाबाट आगामी पाँच वर्षभित्रै निर्माण सम्पन्न हुने आयोजकले जनाएकाे छ । नौ अर्बको लागत अनुमान गरिएको आयोजना मेवा डेभलपर्स प्राइभेट लिमिटेडले निर्माण कार्य थालनी गरेको छ । करीब निर्माणका लागि उक्त कम्पनीले दुई वर्षअघि नै सर्वेक्षण अध्ययन अनुमति लिई विस्तृत अध्ययन गर्दै आएको छ । हाल आयोजनाका लागि सडक विस्तार भइरहेको छ भने जग्गा खरिद र पिपीएको कार्य सकिएको कम्पनिका इञ्जिनीयर भानु पोख्रेलले बताएका छन्। अबको एक वर्षभित्रै आयोजनाको निर्माण कार्य शुरु गरिनेछ । कम्पनीले मङ्सिर ५ गते आयोजना प्रभावित क्षेत्रका स्थानीयसँग अन्तक्र्रिया गरेको जनाएको छ । यस्तै फुङ्फुङगे झरना छेउमा इनटेक र लिवाङको नावामा पावर हाउस राख्ने कम्पनीको लक्ष्य रहेको आयोजनाका अध्यक्ष तथा सांसद वसन्तकुमार नेम्वाङको भनाई रहेको छ । तीन महीनाभित्र परियोजनाको आइइ प्रतिवेदन आउने इञ्जिनीयर पोख्रेलले जानकारी दिए । फुङ्फुङगे झरना छेउमा ८७ मिटर लम्बाइ र २० मिटर चौडाइको बाँध बाँध्ने, छ किलोमिटर सुरुङ निर्माण गरिने कम्पनीको भनाइ छ । आयोजनाका विभिन्न संरचनामा पुग्न हेडबक्सबाट पावर हाउससम्म करीब आठ किलोमिटर सडक र ढुङ्गेसाँघु सवस्टेशनसम्मको १३२ केभीको करीब १३ किलोमिटर प्रसारण लाइनसमेत निर्माण गरिने जनाएका छन् । रासस
