चेम्बर एक्स्पो मंसिर १३ गतेदेखि शुरु, निकासी योग्य वस्तुको प्रवद्र्धन गर्ने
काठमाडौं । नेपाल चेम्बर अफ कर्मसले आगामी मंसिर १३ गतेदेखि ‘नेपाल चेम्बर एक्स्पो २०१८’ गर्ने भएको छ । चेम्बरले निर्यात प्रवद्र्धन, वैदेशिक लगानी आकर्षण गर्ने उद्देश्यले सो दिनदेखि ५ दिन(मंसिर १७ गते)सम्म उक्त एक्स्पोको आयोजना गर्न लागेको हो । काठमाडौंको भृकुटी मण्डपमा हुने उक्त मेलामा १९० वटा स्टल रहने आयोजकले बताएका छन् । ५ दिन सम्म चल्ने सो मेलामा अटोमोबाईल, इलेक्ट्रिकल एण्ड इलेक्ट्रोनिक्स, फ्लोरिङ एण्ड फर्नि्सिङ, होम अप्लायन्स, फेसन वेर एण्ड एसेसरीज, मोबाइल ग्याजेटस्, एफएमसीजी लगायतका स्टल रहनेछन् । मेलाको चौथो संस्करणमा व्यापारिक अन्तक्र्रिया, आयात निर्यातको सूचना आदान प्रदान तथा नेपाली उत्पादनको बजारिकरणमा विशेष जोड दिइने चेम्बरले जनाएको छ । गुणस्तरीय सामान प्रयोग गर्न उपभोक्ता हित सम्बन्धी जनचेतना अभिवृद्धि गर्ने उक्त प्रदर्शनीको प्राथमिकता रहेको छ । प्रदर्शनी मार्फत निकासी योग्य वस्तुको प्रवद्र्धन गर्न सबै व्यापारीक समुदायलाई प्रोत्साहन गरिने चेम्बरले बताएको छ । यस वर्ष म्यानमार एक्स्पोको पार्टनर कन्ट्री रहेको छ । मेलामा म्यानम्यारको म्यानम्यार उद्योग वाणिज्य महासंघको सहकार्यमा उद्योगी व्यवसायीहरुले सहभागिता जनाउने छन् । मेलामा म्यानमार, चीन, पाकिस्तान, बङ्गलादेश, कोरिया, भारत, जापान तथा अन्य देशहरु सहभागी हुने अायाेजकले जानकारी दिएकाे छ । साथै, मेलाकाे अफिसियल इन्स्याेरेन्स प्रभु इन्स्योरेन्स रहेको छ ।
अजोड इन्स्योरेन्स र मुक्तिनाथ विकास बैंकबीच बैंकास्योरेन्स सम्झौता
काठमाडौं । अजोड इन्स्योरेन्स लिमिटेड र मुक्तिनाथ विकास बैंक लिमिटेडबीच बैंकास्योरेन्स सेवा प्रदान गर्ने सम्बन्धि सम्झौता भएको छ । उक्त सम्झौतापत्रमा अजोड इन्स्योरेन्सका प्रमुख कार्यकारी अधिकृत कुमारबहादुर खत्री र बैंकका प्रमुख कार्यकारी अधिकृत प्रद्युमन पोखरेलले हस्ताक्षर गरेका हुन् । सहमतिसंगै बैंकका ग्राहकहरूले अजोड इन्स्योरेन्सले प्रदान गर्ने निर्जीवन बीमा सम्वन्धी सम्पूर्ण सेवा बैंकका सबै शाखाबाट लिन सकिने अजोड इन्स्योरेन्सका बजार विभाग प्रमुख लक्ष्मण पराजुलीेले बताए ।
उपत्यकामा मंसिर १३ देखि १६ गतेसम्म जोर बिजोर प्रणाली लागू, कुन दिन कुन सवारी चल्ने ?
काठमाडौं । मंसिर १३ गतेदेखि १६ गतेसम्म उपत्यकामा जोर बिजोर आधारमा सवारी चल्ने भएको छ । ४ दिनसम्म हुन लागेकाे दक्षिण एसिया प्यासिफिकको सम्मेलनका पाहुनाको सुरक्षाको लागि प्रहरीले यो प्रणाली लागू गरेको हो । ट्राफिक माहाशाखाका अनुसार मंसिर १३ र १५ गते बिजोर र १४ र १६ गते जोर सवारी मात्र चल्नेछ ।
नेपाल पुनर्बीमा र प्राइम लाइफबीच सम्झौता, २० प्रतिशत प्रत्यक्ष हिस्सा दिने
काठमाडौं । नेपाल पुनर्बीमा कम्पनी लिमिटेड र प्राइम लाइफ इन्स्योरेन्स कम्पनी लिमिटेडबीच पुनर्बीमा व्यवस्थाको लागि सम्झौता भएको छ । नेपाल सरकारले चालु आर्थिक वर्ष २०७५/०७६ को बजेटबाट व्यवस्था गरे बमोजिम २० प्रतिशत प्रत्यक्ष हिस्सा पुनर्बीमा व्यवस्थाको लागि उक्त सम्झौता भएको हो । सोमबार आयोजित एक कार्यक्रममा नेपाल पुनर्बीमा कम्पनीका प्रमुख कार्यकारी अधिकृत चिरायु भण्डारी र प्राइम लाइफ इन्स्योरेन्स कम्पनीका प्रमुख कार्यकारी अधिकृत मनोजकुमार भट्टराईले सो सम्बन्धी सम्झौतामा हस्ताक्षर गरेका छन् । उक्त व्यवस्थाले चालु आर्थिक वर्षको शुरुदेखि नै पुनर्बीमा हुने र यसमार्फत दुबै कम्पनी लाभान्वित हुने छन् ।
माथिल्लो मर्स्याङ्दी-२ को सेयर बिक्री छानविन गर्न उपसमिति गठन, अर्थमन्त्रालयले पनि छानविन गर्ने
काठमाडौं । अर्थसमितिले ६०० मेगावाटको माथिल्लो मर्स्याङ्दी-२ जलविद्युत आयोजनाको सेयर खरिद बिक्री सम्बन्धि उपसमिति गठन गर्ने निर्णय गरेको छ । मंगलबार बसेको अर्थसमितिको बैठकले सो जलविद्युत आयोजना निर्माणको लाईसेन्स पाएको हिमताल हाइड्रोपावर कम्पनी प्रालिको सेयर खरिद बिक्री बारे अध्ययन गर्न उपसमिति गठन गर्ने निर्णय गरेको हो । त्यस्तै, अर्थमन्त्रालयले पनि सो खरिद बिक्रीमा कायम गरेको मूल्य यर्थाथ हो वा होइन बारे छुट्टै अध्ययन गर्ने भएको छ । बैठकमा उपस्थित राजस्व सचिव शिशिर ढुङ्गानाले सो खरिद बिक्री बारे मन्त्रालयले छानविन गर्ने बताए । भारतीय जिएम आर कम्पनीले चिनिया कम्पनीलाई हिमताल हाइड्रोपावर कम्पनी बेचेको छ ।
चार महीनामै थपिए नवलपरासीमा ३८० घरेलु उद्योग, जनशक्ति अभावले
काठमाडौं । चालु आर्थिक वर्षको पहिलो चौमासिकमा मात्रै नवलपरासीमा ३८० लघु, घरेलु तथा साना उद्योग थपिएका छन् । ती उद्योगको दर्ताबाट घरेलु तथा साना उद्योग कार्यालय नवलपरासीले एक करोड २० लाख २१ हजार ३०३ राजश्व सङ्कलन गरेको छ । उद्योग स्थापना हुने क्रम बढ्न थालेपछि पछिल्लो समय नवलपरासी औद्योगिक क्षेत्रको रूपमा विकास भइरहेको छ । जिल्लामा लघु, घरेलु तथा साना उद्योग मात्र नभएर मझौला तथा ठूला उद्योग स्थापना हुने क्रम पनि बढ्दो छ । कार्यालयको तथ्याङ्कअनुसार जिल्लामा पाँच करोड सम्मको लगानी भएका सबैभन्दा धेरै सेवा उद्योग दर्ता छन् । पछिल्लो चार महीनाको अवधिमा पनि सबैभन्दा बढी १६६ वटा सेवामूलक उद्योग नै दर्ता भएको कार्यालय प्रमुख नन्दलाल पौडेलको भनाई रहेको छ । आर्थिक वर्ष २०७४ र ७५ सम्म दुई हजार ४८३ सेवामूलक उद्योग दर्ता थिए । चार महीनाकै अवधिमा कृषि तथा वनपैदावरमा आधारित १२२ उद्योग दर्ता भएका छन् । यसअघि कृषि तथा वनपैदावरमा आधारित एक हजार ३१२ उद्योग दर्ता थिए । पछिल्लो चार महीनामै पर्यटनका ५२ र उत्पादनमूलक उद्योग ४० वटा पनि दर्ता भएका छन् । चालु आर्थिक वर्ष २०७५/७६ को कात्तिक मसान्तसम्म जिल्लामा सेवामूलक दुई हजार ६ सय ४९, कृषि तथा वन पैदावरमा आधारित एक हजार ४३४, पर्यटनका एक हजार १३, उत्पादनमूलक ९२२, सूचना तथा सञ्चारप्रविधिका तीन र खनिज उद्योग दुई गरी कूल छ हजार २३ लघु, घरेलु तथा साना उद्योग दर्ता तथा सञ्चालनमा रहेको कार्यालय प्रमुख पौडेलले जानकारी दिएका छन् । यो नवलपरासी (बर्दघाट सुस्ता) पूर्व र (बर्दघाट सुस्ता) पश्चिम दुवै जिल्लाको तथ्याङ्क हो । दुई जिल्लामा विभाजन भए पनि पूर्वी नवलपरासीमा घरेलु तथा साना उद्योग कार्यालय स्थापना नभएकाले कार्यालयले दुवै जिल्ला हेर्दै आएको छ । नवलपरासीमा स्थापना भएका लघु, घरेलु तथा साना उद्योगबाट मुलुकको अर्थतन्त्र उकास्न महत्वपूर्ण स्थान रहेको भन्दै कार्यालय प्रमुख पौडेलले स्थानीय कच्चा पदार्थ स्रोतसाधन, परम्परागत सीप र प्रविधिमा आधारित यस्ता उद्योगको स्थापना, विकास, विस्तार, संरक्षण तथा सम्वद्र्धनका लागि प्रशासनिक तथा प्रवद्र्धनात्मक कार्यमार्फत सघाउ पुराइरहने बताएका छन् । कम जनशक्ति भए पनि औद्योगिक व्यवसाय फस्टाउने वातावरण निर्माण गर्न, परम्परागत सीप, कला र संस्कृतिको विकास र स्थानीय कच्चापदार्थको परिचालन गर्न कार्यालयले निरन्तर काम गरिरहेको छ । जिल्लामा अझैपनि धेरै उद्योग बिना दर्ता सञ्चालनमा रहेको तर जनशक्ति अभावले अनुगमन र नियमन गर्न समस्या भएको छ । दुवै जिल्लामा कार्य क्षेत्र र नौ जनाको मात्रै दरबन्दी भए पनि अहिले पाँचजना मात्र कर्मचारी कार्यरत् रहेका छन् । जिल्लामा लघु तथा घरेलु उद्योगको सम्भावना अझै धेरै रहेको घरेलु तथा साना उद्योग महासङ्घका जिल्ला अध्यक्ष मेघराज गौतम बताएका छन् । भारतसँगको खुला सीमाका कारण जिल्लामा उत्पादित उद्यमीका वस्तुले बजारमा प्रतिस्पर्धा गर्न नसक्नुका साथै कतिपय सञ्चालनमा रहेका उद्योगले पनि गुणस्तरमा ध्यान नदिँदा प्रतिस्पर्धा गर्न समस्या रहेको जनाएका छन् । जिल्लामा औद्योगिक वातावरण बनाउन आफूहरूले भरपुर प्रयास गरिरहेको उद्योग वाणिज्य सङ्घ नवलपरासीका अध्यक्ष केशव भण्डारी बताएका छन् । सदरमुकाम परासीस्थित वाइपास सडक क्षेत्रसहित सुनवलमा औद्योगिक करिडोर स्थापनाका लागि स्थानीय, प्रदेश र सङ्घीय सरकारसँग पहल भइरहेको अध्यक्ष भण्डारीको भनाई रहेको छ । रासस
अपर तामाकोशी हाइड्रोपावरको सेयर बाँडफाँड, कसले कति पाए ?
काठमाडौं । अपर ताकामोशी हाइड्रोपावर लिमिटेडले तेस्रो चरणमा सर्वसाधारणका लागि निष्काशन गरेको साधारण सेयर(आईपीओ) बाँडफाँड भएको छ । बिक्री प्रबन्धक नागरिक लगानी कोष र सनराइज क्यापिटलका अनुसार कुल अावेदक मध्ये ३ लाख ३४ हजार ७५ जना आवेदकले ४० कित्ता सेयर पाएका छन् । उनीहरुलाई ४० कित्ता दरले १ करोड ३३ लाख ६३ हजार कित्ता सेयर बाँडफाँड गरिएको छ । बिक्री प्रबन्धकका अनुसार ४० कित्ता सेयर बाँडफाँड पश्चात बाँकी रहेको १७ लाख २७ हजार ७५० कित्ता सेयर चिठ्ठा(गोला) प्रथाबाट बाँडफाँड गरिएको छ । गोलाप्रथाद्धारा कुल १ लाख ७२ हजार ७७५ जनाले १० कित्ता सेयर पाएका छन् । त्यस्तै, बाँकी रहेको १७ लाख २७ हजार ७५० कित्ता सेयरका लागि पुनः ३ लाख ३४ हजार ०७५ जना आवेदकहरु मध्येबाट गोलाप्रथा गरिएको बिक्री प्रबन्धकले जनाएको छ । कम्पनीले जारी गरेको १ अर्ब ५८ करोड बराबरका १ करोड ५८ लाख कित्ता सेयरका लागि कुल ३ लाख ३९ हजार ७ सय ७५ जना लगानीकर्ताले आवेदन दिएका थिए । कुल आवेदन परको मध्ये ५ हजार ७ सय जनाको आवेदन रद्द बिक्री प्रबन्धकले जनाएका छन् । कम्पनीले आईपीओ निष्काशन गरेको २२औँ दिनमा सेयर बाँडफाँड भएको हो ।
उपचारको भौतिक पूर्वाधार तयार, रोग लाग्न नदिने उपायका विषयमा गम्भीर : मन्त्री घिमिरे
काठमाडौं । राज्य पुनःसंरचनाको नयाँ अभ्यासमा रहेकाले कर्मचारी तथा राजनीतिक वृतमा काम गर्न केही जटिलता देखिएको भन्दै प्रदेश नं १ का सामाजिक तथा स्वास्थ्यमन्त्री जीवन घिमिरेले जनाएका छन् । प्रदेश स्वास्थ्य मन्त्रालयले इटहरीमा आयोजना गरेको तीन दिने कार्यक्रमको समीक्षा तथा योजना तर्जुमा गोष्ठीको उद्घाटन गर्दै नयाँ परिवेशमा जनप्रतिनिधि र कर्मचारीबीच केही मतभिन्नता देखिए पनि हट्दै जाने बताएका छन् । मन्त्री घिमिरेले देशमा स्वास्थ्य उपचारको भौतिक पूर्वाधार तयार गरेको तर रोग लाग्न नदिने उपायका विषयमा गम्भीर हुन सकेनौँ भन्दै अब रोग लाग्न नदिने विषयमा स्वास्थ्य क्षेत्रमा लागेका सबै सक्रिय हुनु आवश्यक रहेको जानकारी दिएका छन् । सङ्घीय, प्रादेशिक र स्थानीय तह सबैले देश र जनताप्रति उत्तरदायी भएर काम गर्ने बानीको विकास गर्नुपर्ने आवश्यकता रहेको छ । आन्तरिक मामिला मन्त्रालयका सचिव गोपाल पराजुलीले मानव स्वास्थ्यका क्षेत्रमा देखिएको समस्या न्यूनीकरणमा सम्बन्धीत सबै पक्ष गम्भीर भएर लाग्नुपर्ने छ । मन्त्रालयका सचिव हरिप्रसाद सुवेदीको अध्यक्षतामा भएको सो तीन दिने गोष्ठीमा मन्त्रालयका निर्देशक मोदराज डोटेलले प्रदेश नं १ को स्वास्थ्य अवस्थाको प्रतिवेदन प्रस्तुत गरेका छन् । रासस
