‘हेलो सरकारका गुनासा स्थानीय तहबाटै सम्बोधन’, ट्वीटरबाट बढी गुनासा
काठमाडौं । सरकारले स्थानीय तहबाट नै जनताका गुनासो सम्बोधन गर्न थालेको छ । प्रधानमन्त्री तथा मन्त्रिपरिषद्को कार्यालयअन्तर्गतको हेलो सरकार शाखाले ‘हेलो सरकार’को नयाँ सफ्टवेयर पोर्टल जडान गरेसँगै ७ सय ५३ वटै तहबाट जनताका गुनासो सम्बोधन हुने गरेका छन् । शाखाका प्रमुख शेखर पौडेलले साउनदेखि नयाँ पोर्टल जडान गरेपछि जनताका गुनासो सम्बन्धित स्थानीय तहबाट नै सम्बोधन हुन थालेको जानकारी दिए । त्यसका लागि हेलो सरकारले सबै स्थानीय तहलाई हेलो सरकारको ‘युजरनेम’ र ‘पासवर्ड’ दिएको छ । उक्त युजरनेममा हेलो सरकारमा आएका गुनासो सम्बन्धित ठाउँका स्थानीय तहमा पठाइन्छ र गुनासोलाई सम्बोधन गरिन्छ । “हामीले अब सिधैँ हामी कहाँ आएका गुनासो स्थानीय तहलाई पठाउँछौँ”, उनले भने, “ती गुनासोलाई सम्बन्धित स्थानीय तहका प्रमुख प्रशासकीय अधिकृत र गुनासो सुन्ने अधिकारीले सम्बोधन गर्नेछन् ।” पहिले हेलो सरकारमा आएका गुनासोलाई यहाँका कर्मचारीले सम्बन्धित निकायसँगको सहयोगमा सम्बोधन गर्ने गर्दथे । हेलो सरकारले सङ्घीय मन्त्रालय, विभाग, प्रदेश मन्त्रालय र जिल्ला प्रशासन कार्यालयलाई समेत हेलो सरकारको युजरनेम र पासवर्ड दिएको छ । वि.सं २०६८ कात्तिक १७ गतेबाट तत्कालीन प्रधानमन्त्री डा.बाबुराम भट्टराईले जनताका गुनासो सम्बोधन गर्नका लागि हेलो सरकार सञ्चालनमा ल्याउनुभएको हो । नयाँ पोर्टल सञ्चालन भएपछि गुनासा घटे हेलो सरकारको नयाँ पोर्टल सञ्चालन भएपछि गुनासाको सङ्ख्या घटेको छ । पहिलेको पोर्टलमा हेलो सरकारमा आएका जस्ता गुनासो पनि लिने गरिन्थ्ये भने अहिले ती आएका गुनासोलाई अवस्था हेरेर लिने गरिन्छ । “अहिले आएका गुनासोको व्यहोरा पूर्णरूपमा उल्लेख गरिएको छ कि छैन भनेर हामीले छलफल गरेर मात्र सम्बन्धित ठाउँमा ती गुनासो पठाउने गरेका छौँ”, हेलो सरकार शाखाकी शाखा अधिकृत हरिकला आचार्यले भने, “जसले गर्दा हेलो सरकारमा आउने गुनासाको सङ्ख्या घटेको हो ।” उनका अनुसार गत वैशाख १ देखि असारमसान्तसम्म एक हजार ८ सय ९ गुनासो आएका थिए, भने नयाँ पोर्टल सञ्चालन भएपछि साउनदेखि असोजसम्म एक हजार ७२ गुनासा आएका छन् । ट्वीटरबाट बढी गुनासा यसैगरी सर्वसाधारणले हेलो सरकारमा पहिले फोनबाट बढी गुनासा राख्ने गरेता पनि अहिले ट्वीटरबाट बढी गुनासो राख्ने गरेको पाइएको छ । शाखाका शाखा अधिकृत किरण जोशीले दैनिक ट्वीटरबाट सयको सङ्ख्यामा गुनासो आउने गरेको बताए । फोनबाट भने दैनिक १५ को सङ्ख्यामा मात्र गुनासो आउने गरेका छन् । हेलो सरकारमा फोनसहित फेसवुक, ट्वीटर, भाइवर र इमेलमार्फत गुनासो लिइने गरिन्छ । फोनका लागि पैसा नलाग्ने नम्बर ११११, भाइवरका लागि ९८५११४५०४५ र इमेल [email protected] रहेको छ । शाखा प्रमुख पौडेलले हेलो सरकारबारे जनचेतना जगाउन आवश्यक रहेको बताए । “अझै हेलो सरकारबारे सर्वसाधारणलाई थाहा छैन”, भने, “त्यही भएर सर्वसाधारणलाई जानकारी दिनका लागि जनचेतना जगाउने कार्यक्रम ल्याउन थालेका हौं ।” दैनिक दुई सयको सङ्ख्यामा हेलो सरकारमा सर्वसाधारणका गुनासो आउने गरेका छन् । अहिले बिहान ७ः०० देखि साँझ ९ः०० बजेसम्म हेलो सरकारमा १६ कर्मचारी जनताका गुनासो सम्बोधन गर्न खटिएका छन् । गत आर्थिक वर्षमा हेलो सरकारमा १६ हजार १२० गुनासोमध्ये आठ हजार २२ गुनासो फछ्र्यौट गरिएको छ । रासस
कृषि विकास बैंक र हेफरबीच वित्तिय सेवा प्रदान गर्ने सम्बन्धी सम्झौता
काठमाडौं । कृषि विकास बैंक र हेफर ईन्टरनेशनल नेपालबीच मुल्य श्रृंखलामा आधारित वित्तिय सेवा प्रदान गर्ने सम्बन्धी सम्झौता भएको छ । हेफर ईन्टरनेशनलका वरिष्ठ उपाध्यक्ष डा. महेन्द्रनाथ लोहनीको उपस्थितीमा बैंकका प्रमुख कार्यकारी अधिकृत अनिलकुमार उपाध्याय र हेफर ईन्टरनेशनल नेपालका राष्ट्रिय निर्देशक डा. शुभनारायण महतोले उक्त सम्झौता पत्रमा हस्ताक्षर गरेका हुन् । हेफर ईन्टरनेशनल नेपालका राष्ट्रिय निर्देशक डा. शुभनारायण महतोले आगामी दिनमा यस्तो कार्यक्रम थप विस्तार गर्दै लैजाने साथै बैंकले सहयोग गर्ने अपेक्षा रहेको बताए । त्यसैगरि हेफर ईन्टरनेशनलका वरिष्ठ उपाध्यक्ष डा. महेन्द्रनाथ लोहनीले २५ बर्ष पहिले २५ जना नेपाली महिलाबाट शुरु गरिएको परियोजना हाल लाखौं नेपाली महिला उद्यमीबीच पुगेको र कृषि तथा पशुको लघु व्यवसायमा बैंकले गर्न लागेको वित्तिय सहयोग कोशेढुंगा सावित हुने जानकारी दिए । उक्त अवसरमा बैंकका प्रमुख कार्यकारी अधिकृत अनिलकुमार उपाध्यायले हेफर नेपालसंग गरिएको यस प्रकारको सम्झौताले वित्तिय सहयोगको अभावमा आफ्नो व्यवसाय विस्तार गर्न नसकिरहेका मुल्य श्रृंखलामा आधारित साना÷मझौला महिला व्यवसायीहरुको आर्थिक तथा सामाजिक जीवनस्तर उकास्न बैंकले प्रदान गर्ने कर्जाले ठुलो सहयोग पुग्ने आशा गरेको बताए । यस कर्जाको कार्यान्वयन पक्ष हेर्ने बैंकको कृषि कर्जा तथा एमएसएमई विभागका विभागीय प्रमुख बाबुकाजी थापाका अनुसार हेफर ईन्टरनेशनल नेपालले सहकारी/कृषक समुह मार्फत रौतहट, धादिङ्ग, पाल्पा, रुपन्देही अर्घाखांची, लमजुंग, प्युठान र नुवाकोट जिल्लामा प्रवद्र्धन गरेको महिलाहरुलाई बाख्रा, तरकारी, स्थानिय कुखुरा र दुग्ध परियोजनामा बैंकले १ अर्ब रुपैयाँ सहुलियतपूर्ण कर्जा उपलब्ध गराउने जनाएका छन् । थापाका अनुसार कर्जाका अतिरिक्त बैंकले उनीहरुलाई उद्यमशीलता विकासका लागि तालीम, वाली तथा पशु सुरक्षण कार्यक्रम, वित्तिय साक्षरता तथा संस्थागत सामाजिक उत्तरदायित्व अन्तर्गत विभिन्न कार्यक्रम समेत संचालन बताए । सो कार्यक्रममा बैंकका उपमहा प्रवन्धकहरु प्रताप सुवेदी, यज्ञ प्रकाश न्यौपाने, ध्रुवचन्द्र गौतम, दिर्घबहादुर अर्याल, परामर्शदातामा घुरन ठाकुर, विभागीय प्रमुखमा बाशु अधिकारी, विना शर्मा तथा विभागका शा.प्र. प्रेम खनाल तथा सि.ए.कृष्ण निरौलाको उपस्थिति रहेको थियो । सो अवसरमा हेफर ईन्टरनेशनल नेपालको तर्फबाट कार्यक्रम निर्देशक डा. तिर्थराज रेग्मी, प्रकाश कटवाल, अदिस कार्की रविन निरौला लगायतको समेत उपस्थिति रहेको थियो ।
तीन महिनामा आठ अर्ब राजश्व सङ्कलन
काठमाडौं । आन्तरिक राजश्व कार्यालय भरतपुरले चालू आर्थिक वर्षको तीन महीनामा आठ अर्ब ५८ लाख ६४ हजार रुपैयाँ राजश्व सङ्कलन भएको छ । गत वर्षको यसै अवधिमा सात अर्ब ४५ करोड ५१ लाख १३ हजार रुपैयाँ राजश्व सङ्कलन भएको थियो । आन्तरिक राजश्व कार्यालयका अनुसार चालू आर्थिक वर्षमा राजश्व विभागले तोकेको लक्ष्यभन्दा कम राजश्व सङ्कलन भएपनि गत वर्षको यसै अवधिको तुलनामा राजश्व सङ्कलन बढेको जानकारी दिएको छ । विभागले तीन महीनाका लागि १० अर्ब ७४ करोड ९५ लाख ६६ हजार रुपैयाँ राजश्व सङ्कलनको लक्ष्य दिएको थियो । चालू आर्थिक वर्षमा अघिल्लो आर्थिक वर्षको तुलनामा ५५ करोड सात लाख ५१ हजार रुपैयाँ बढी राजश्व सङ्कलन भएको कार्यालयको तथ्याङ्कले देखाएको छ । चालू आर्थिक वर्षमा अन्तःशुल्कमा ६ अर्ब ८१ करोड ५९ लाख ५० हजार रुपैयाँ, मूल्य अभिवृद्धिकरमा ५९ करोड ४८ लाख ५८ हजार रुपैयाँ, आयकरमा ५२ करोड ६० लाख ३१ हजार रुपैयाँ राजश्व सङ्कलन भएको छ । कार्यालयका अनुसार व्याज करमा चार करोड ७१ लाख ६० हजार रुपैयाँ, बहालकरमा एक करोड ७३ लाख १८ हजार रुपैयाँ, स्वास्थ्य सेवा करमा ४४ लाख पाँच हजार रुपैयाँ र शिक्षा सेवा शुल्कमा एक लाख ४२ हजार रुपैयाँ राजश्व सङ्कलन भएको भन्सार कार्यालयले जानकारी दिएको छ । कार्यालयले लक्ष्य निर्धारण बढी भएका कारण तोकिए अनुसारको सङ्कलन गर्न कठिन भएको जनाएको छ । बजारमा व्यापार घटेको, केही कम्पनी ठूला करदाताकामा गएको, भिसिटीएसका कारण ढुवानीमा अन्योल रहेको, मदिराजन्य वस्तुहरुको बिक्री वितरणमा कमी आएको, भन्सार विन्दु घटेकाजस्ता कारण लक्ष्यअनुसार राजश्व सङ्कलन हुन नसकेको आशंका गरेको छ । रासस
अमेरिकी उपराष्ट्रपतिको भनाइप्रति चीनको आपत्ति
बेइजिङ । अमेरिकी उपराष्ट्रपति माइक पेन्सले व्यक्त गरेको चीनसँग सम्बन्धित विचारप्रति चीनले आपत्ति जनाएको छ । अमेरिकी उपराष्ट्रपति पेन्सको विचार चीनको वास्तविकता र चिनियाँ समाजको वास्तविक प्रणालीको बारेमा विश्व समुदायमा भ्रम फैलाउन खोजिएको भनी चीनले टिप्पणी गरेको हो । अमेरिकी उपराष्ट्रपति पेन्सले दिएको अभिव्यक्ति चीनको मानवअधिकारको वास्तविक अवस्था, धार्मिक आस्था तथा अन्य सामाजिक प्रणालीकै विरुद्धमा रहेको चीनले प्रतिक्रिया दिएको जानकारी दिएको छ । चिनियाँ विदेश मन्त्रालयका प्रवक्ता हुवा चुनिङले शुक्रबार चिनियाँ राजधानी बेइजिङमा आयोजित पत्रकार सम्मेलनमा सो धारणा राखेका हुन् । उनले भने – अमेरिकी उपराष्ट्रपति पेन्सले दिएको विज्ञप्ति हाम्रो आन्तरिक मामिलासम्बन्धी कानुन तथा परराष्ट्र नीतिको विरुद्धमा छ । उक्त भनाई राजनीतिक रुपमा पूर्णतः बायस भएको जानकारी दिए । चीनले आफ्नो सार्वभौमिकता, सुरक्षा प्रणाली तथा चीनको आफ्नो आन्तरिक मामिलाका विषयमा आउने यस्ता भनाइहरुको कडा रुपमा विरोध गर्दछ प्रवक्ता हुवाको भनाई छ । प्रवक्ता हुवाले ताइवान, हङकङ र चीनको सिनजियाङ प्रान्त चीनको विशुद्ध आफ्नो आन्तरिक मामिला भएकोले बाहिरबाट कसैको कुनै टिप्पणी आवश्यक नरहेको बताए । यी क्षेत्रहरुका बारेमा बाहिरबाट कसैले व्यक्त गर्ने विचारहरुमा चीनको कडा आपत्ति रहने जनाए । त्यस पत्रकार सम्मेलनमा उनले भने – ‘म अमेरिकीहरुलाई आफ्नै विषयमा कुरा गर्न, समस्याहरुको व्यवस्थापन गर्न तथा चीनको चासो नलिन सुझाव दिन चाहन्छु ।’ रासस/सिन्ह्वा
ललितपुरको कुमारीपाटीमा कामना सेवाको नयाँ शाखा
काठमाडौं । कामना सेवा विकास बैंकले ललितपुर महानगरपालिका वडा नं.२० स्थित कुमारीपाटीमा नयाँ शाखा विस्तार गरेको छ । बैंकको एक सयऔंं शाखा कार्यालय स्थापना गरी कारोबारको शुरुवात गरेका हो । बैंकका अध्यक्ष सुदिप आर्चाय तथा प्रमुख अतिथि एवं नेपाल राष्ट्र बैंकका डेपुटी गभर्नर शिवराज श्रेष्ठले संयुक्त रुपमा शाखा कार्यालयको उद्घाटन गरेका हुन् । शाखा स्थापनाको अबसरमा ग्राण्डी अस्पतालको सहकार्यमा निःशुल्क स्वास्थ्य परीक्षणको आयोजना समेत गरिएको थियो । प्रमुख अतिथि शिवराज श्रेष्ठले बैंकले छोटो अवधिमा राम्रो प्रगति गरी एउटा सवल बैंक बन्न सफल भएकोमा आगामी दिनमा बैंक बझै मजबुत हुदै जाने र देशको अर्थिक विकासमा टेवा पुराउने कुरामा आफू विश्वस्त रहेको बताए । बैकिङ क्षेत्रमा विभिन्न खाले जोखिम र चुनौतीहरु थपिंदै गएको हुँदा अत्यन्तै चनाख भएर काम गर्न सुझाव दिए । यसै अवसरमा बैंकले ग्राहकहरुको सुविधालाई मध्यनजर गर्दै आजै देखि लागू हुने गरी विविध विशेषता सहितको स्वर्णिम सुरक्षित प्रिमियमबचत खाताको शुरुवात समेत गरेको छ । नेपाल राष्ट्र बैंकका कार्यकारी निर्देशक भुवन कडेल र बैंकका अध्यक्ष सुदिप आचार्यले संयुक्त रुपमा उक्त योजनाको शुरुवात गरेका थिए । उक्त कार्यक्रममा बैंकका प्रमुख कार्यकारी अधिकृत प्रविण बस्नेतले बैंकको वर्तमान अवस्था र भावी योजना तथा रणनीतिको बारेमा प्रकाश पार्नु भएको थियो । बैंकका अध्यक्ष सुदिप आचार्यको अध्यक्षमा सम्पन्न उद्घाटन कार्यक्रममा सञ्चालक चतुराखर अधिकारीले स्वागत तथा संस्थापक कृष्ण आचार्य र बैंकका सञ्चालक भिमप्रसाद तुलाचन शुभकामना व्यक्त गरेका थिए । बैंकले देशका विभिन्न भागहरुमा एक सयवटा शाखा तथा ४९ बटा एटिएम मार्फत ग्राहकहरुलाई सेवा प्रदान गर्दै आएको छ । साथै, एविविएस्, लेटेस्ट इन्टरनेट व्याकिङ्ग एण्ड मोबाइल व्याकिङ्ग, सि एएसबिए लगायतका माध्यमबाट समेत सम्पूर्ण बैंकिङ्ग सेवाहरु उपलब्ध गराउँदै आएको र समय सापेक्ष सेवाहरु थप गर्दै जाने बैंकले जानकारी दिएको छ ।
शेयर बजारमा नेपाल लाइफ फेरि छैटौँ स्थानमा, ४ हप्तापछि हिमालयन बैंकलाई उछिन्यो
काठमाडौं । शेयर बजार पुँजीकरणमा ४ हप्तापछि नेपाल लाइफ इन्स्योरेन्स कम्पनीले फेरि छैंटौं स्थान हासिल गरेको छ । नेपाल लाइफले हिमालयन बैंकलाई उछिनेर सो स्थान हासिल गरेको हो । गत सेप्टेक्बर २६ मा भएको साप्ताहिक कारोबारमा हिमालयन बैंकले नेपाल लाइफलाई उछिनेर छैंटौं स्थान लिँदै आएको थियो । अक्टोबर २४ को कारोबारपछि भने नेपाल लाइफले हिमालयनलाई फेरि ७ औं स्थानमा सीमित गरिदिएको हो । पछिल्लो कारोबार अनुसार नेपाल लाइफको पुँजीकरण ४३ अर्ब ९७ करोड र हिमालयनको ४३ अर्ब २० करोड रुपैंया छ । सेप्टेम्बर २६ मा हिमालयन बैंकको शेयर ४८७ रुपैंयामा कारोबार भएकोमा अक्टोबर २४ मा ५०७ रुपैंया पुगेको छ जुन ४.११ प्रतिशतको वृद्धिदर हो । नेपाल लाइफको भने सोही अवधिमा शेयरमूल्यमा ५.८२ प्रतिशतले बढेको छ । यो अवधिमा नेपाल लाइफको शेयर मूल्य ७५६ रुपैंयाबाट ८०० रुपैंया पुगेको छ । हिमालयन बैंक बजार पुँजीकरणमा पछि पर्नुको कारण भने नेपाल लाइफको मूल्य धेरै रुपैंयाले बढ्नु हो । यो अवधिमा हिमालयन बैंकको २० रुपैंयामात्रै बढ्दा नेपाल लाइफको शेयरमूल्य ४४ रुपैंया बढेको थियो । नेपाल लाइफको ५ करोड ५० लाख र हिमालयन बैंकका ८ करोड ५२ लाख कित्ता शेयर जारी भएका छन् ।
जनता र ग्लोबल आईएमईको मर्जर प्रक्रियाले सार्थकता पाउँदै, दुवै बैंकले साधारणसभा बाेलाए
काठमाडौं । ग्लोबल आईएमई बैंक र जनता बैंकबीचको मर्जर प्रक्रिया सार्थकता उन्मुख देखिएको छ । मर्जरका लागि अन्तिम सम्झौता भई दुवै बैंकहरुले साधारणसभा समेत बोलाएसँगै ती बैंकहरुबीचको मर्जरले सार्थकता पाउन लागेको हो । दुवै बैंकहरुबीच यसअघि भएको सहमति अनुसार ग्लोबल आईएमई बैंक र जनता बैंकबीच तय भएको १००ः८५ अनुपातको स्वाप रेसियोलाई दुवै बैंकको डीडीए रिपोर्टले समेत साथ दिएसँगै प्रारम्भिक सम्झौताबमोजिम नै मर्जरका लागि अन्तिम सम्झौता भएको हो । दुवै बैंकहरुले मंसिर २ गते साधारणसभा बोलाएका छन् । साधारणसभामा बैंकको लेखापरीक्षण प्रतिवेदन, वार्षिक प्रतिवेदनका अतिरिक्त प्रस्तावित नगद लाभांश र बोनस शेयर प्रस्ताव पारित गर्ने र मर्जरसम्बन्धी सञ्चालक समितिले गरेको सम्झौता अनुमोदन गर्ने एजेन्डा तय गरिएको छ । ग्लोबल आईएमई बैंक २५.५ प्रतिशत लाभांश घाेषणाा गरिसकेकाे छ जसमध्ये १२.५ प्रतिशत नगद र १२.५ प्रतिशत बाेनस शेयर दिने प्रस्ताव गरिएकाे छ । त्यस्तै जनता बैंकको साधारणसभामा यसअघि बैंक सञ्चालक समितिले प्रस्ताव गरेको ६ प्रतिशत बोनससहित १२ प्रतिशत लाभांश प्रस्ताव पेश हुनेछ । घोषणा भएको उक्त बोनसपछि हुन आउने शेयर संरचनामा दुई बैंकहरुबीच तोकिएको १००ः८५ अनुातमा मर्जरमा जाने प्रस्तावसमेत पारित हुनेछ । साधारणसभाका लागि जनता बैंकले कात्तिक १४ गते तथा ग्लोबल आईएमई बैंकले कात्तिक २२ गते बुकक्लोजको मिति तोकेका छन् । ग्लोबल आईएमईको लाभांशका लागि कात्तिक २० गतेसम्म आफ्नो नाममा शेयर कायम हुनुपर्नेछ भने जनता बैंकको भने बिहीबारसम्म शेयर कायम भएका शेयरधनीले मात्रै साधारणसभामा सहभागिता जनाउन र बोनसमा हिस्सा पाउनेछन् । मौद्रिक नीतिभन्दा अघि नेपाल राष्ट्र बैंकको निर्देशनबमोजिम ‘बिग मर्जर’को प्रयासस्वरुप गत असार २२ गते ग्लोबल आईएमई र जनता बैंकबीच मर्जरमा जाने प्रारसम्भक समझदारी भएको थियो । मौद्रिक नीतिले मर्जरमा जाने बैंकहरुका लागि आकर्षक सुविधा नदिए पनि ती बैंकहरुले पूर्व सहमति अनुसार मर्जर प्रक्रियालाई निरन्तरता दिएका थिए । नेपाल राष्ट्र बैंकले गत असोज ८ गते दुई बैंकहरुबीचको सहमतिको लागि प्रारम्भिक स्वीकृति दिएको छ । दुवै बैंकले मर्जर प्रस्ताव पारित गरेपछि राष्ट्र बैंकले अन्तिम स्वीकृति दिनेछ त्यसपछि दुई बैंकबीच एकीकृत कारोबार हुनेछ । बुकक्लाेज नभई जनता बैंककाे काराेबार नहुने जनता बैंकको शुक्रबार बसेको सञ्चालक समितिको बैठकले साधारणसभा र बुकक्लोजको मिति तय गर्यो । तर जनताले घोषणा गरेको बुकक्लोजको मितिसम्म दोस्रो बजार भने खुल्ने छैन । शनिबार नियमित बिदा भएकोले नेपाल स्टक एक्सचेञ्जको कारोबार हुने छैन भने आइतबारदेखि मंगलबारसम्म तीन दिन तिहारका लागि सार्वजनिक बिदा हुनेछ । बुधबार पनि नेवार समुदायको भाइटीका परेकोले सो दिन सार्वजनिक बिदा दिने निर्णय सरकारले गरिसकेको छ । यसैले साधारणसभा आह्वान गरेपछि जनताका शेयरधनीहरु कारोबारको अवसरबाट वञ्चित भएका छन् । ग्लोबल आईएमईले भने कारोबारका लागि एक साताको समय दिएको छ ।
शनि विश्वकर्मा बने पहिलो नेपाल लोक स्टार,हात पारे ५० लाख
काठमाडौं । राेल्पाका शनि विश्वकर्मा लोक गायन रियालिटी शो ‘नेपाल लोक स्टार’ को विजेता बन्न सफल भएका छन् । शुक्रबार भृकुटीमण्डपमा सम्पन्न ग्राण्ड फिनालेबाट नेपालले नेपालकै पहिलो उत्कृष्ट मौलिक आवाजको धनी पाएको हो । नेपाल लोक स्टारको विजेता भएसँगै विश्वकर्माले ५० लाख रुपैयाँको पुरस्कार हात पारेका हुन् । यसका साथै उनले २५ लाख रुपैयाँ बराबरकाे जीवन बीमा पनि हात पारेेेेका छन् । यस्तै चेतन गोतामे (स्याङ्जा) लोकस्टारको दोस्रो बन्न सफल भएका छन् । उनले २५ लाख रुपैयाँ पुरस्कार र १५ लाख बराबरकाे जीवन बीमा हात पारेका छन्। विनोद दनुवार (उदयपुर) ले भने प्रतियोगितामा तेस्रो स्थान हात पारे । उनले १० लाख रुपैयाँ नगद पुरस्कारका साथै १० लाख रुपैयाँ बराबरकै जीवन बीमा प्राप्त गरेेेेका हुन् । यस्तै रामकुमार नेपाली इलेक्ट्रिफाइङ्ग पर्फर्मेन्स अवार्ड हात पार्न सफल भए। उनले लिट्मस केबलको तर्फबाट २ लाख रुपैयाँ हात पार्न सफल भए । फिनालेमा रामकुमार नेपाली (रामेछाप), शनि विश्वकर्मा (रोल्पा), चेतन गोतामे (स्याङ्जा) र बिनोद दनुवार (उदयपुर) बीच प्रतिस्पर्धा भएको थियो । ‘नेपाल लोक स्टार’का अनुसार गएको शनिबार दिउँसो १२ बजेबाट शुक्रबार दिउँसो १२ बजेसम्म स्रोता तथा दर्शकले गरेको भोटको आधारमा विजेता घोषित भएका हुन् । नेपाल लोक स्टारमा निर्णायकको रुपमा वरिष्ठ कलाकार तथा गायक जयनन्द लामा, गायक रामजी खाँड, सुनिता दुलाल र वरिष्ठ संगीतकार बीबी अनुरागी रहेेेेका थिए । अडिसनदेखि विभिन्न राउण्डहरु पार गर्दै नेपाल लोक स्टार को ग्राण्ड फिनालेमा ४ प्रतिस्पर्धी पुग्न सफल भएका थिए ।