विकासन्युज

कोरोना भाइरसको असर विश्व अर्थतन्त्रमा

काठमाडौं। चीन लगायत अन्य एशियाली देशहरुमा फैलिएको कोरोना भाइरसको असर विश्व अर्थतन्त्रमा देखिन थालेको छ । विश्वको दोस्रो ठूलो अर्थतन्त्र मानिएको चीनमा कोरोनाको संक्रमण फैलनु समग्र विश्व बजारका लागि सुखद नभएको विश्लेषकहरु बताउँछन् । विश्व अर्थव्यवस्थाका लागि यो भाइरस ठूलो जोखिम भएको उनीहरुकाे भनाइ छ । अर्थविद् डा. डिल्लीराज खनाल काराेना भाइरसले विश्व बजारमा धेरै असर पार्ने बताउँछन् । ‘नेपाल चीनको नजिकको राष्ट्र हो, चीनले नेपालमा धेरै लगानी गरेको छ, यसले गर्दा नेपालको अर्थतन्त्रमा यसले प्रत्यक्ष असर पार्छ,’ उनले भने । आगामी वर्षहरुका लागि पनि चीनले नेपालको विभिन्न क्षेत्रमा लगानी प्रतिवद्धता गरेको छ, यसमा पनि असर पर्ने देखिन्छ । नेपालमा विदेशी पर्यटक सबैभन्दा बढी चीनबाट आउँछन् । कोरोनाको कारणले नेपाल सरकारले सुरु गरेको भ्रमण वर्ष २०२० मा पनि धेरै असर पार्ने देखिन्छ । कारोना भाइरसका कारण नेपालको पर्यटन, यातायात लगायत आन्तरिक उत्पादनमा असर पार्ने अर्थविद् खनाल बताउँछन् । नेपालमा पर्ने असर चीन नेपालको छिमेकी राष्ट्र भएकोले पनि त्यसको प्रत्यक्ष असर नेपालमा अवश्य नै पर्छ । नेपालको अर्थतन्त्र मात्र होइन भौतिक पक्षमा यसले असर पार्ने अर्थविद् बताउँछन् । नेपालमा बढी सामानहरु अायात गर्ने देशमा चीन दाेस्राे स्थानमा पर्छ । गत बुधबार नेपाल सरकारले चीनसँगको मूख्य व्यापार नाका १५ दिनका लागि बन्द गरेको छ । यसले पनि नेपालको अर्थतन्त्र र व्यापारमा घाटा हुने देखिन्छ । चीनमा कोरोना भाइरसले उग्र रुप लिएपछि नेपाल सरकारले रसुवा नाका बन्द गर्ने निर्णय गरेको हो । पर्यटनमा प्रभाव चीनबाट सुरु भएको कोरोना भाइरसले चीनमा मात्र होइन छिमेकी राष्ट्र नेपालमा पनि ठूलो असर पर्ने जानकारहरु बताउँछन् । भाइरसको प्रकोपले नेपालको पर्यटन, यातायात, दैनिक उपभोग्य सामानलगायमा नराम्ररी प्रभाव पार्ने देखिएको हो । नेपालमा आउने पर्यटक मध्येको एक ठूलो देश चीन पनि हो । हाल नेपालका धेरै एयरलाइन्स कम्पनीहरुले चीनको उडान रोकेका छन् । यसले नेपालको पर्यटन क्षेत्रमा धेरै घाटा हुने पर्यटनविद्हरु बताउँछन् । नेपाल सरकारले हालै नेपाल भ्रमण वर्ष २०२० सुरु गरेको छ । भ्रमण वर्ष सुरु भएकै समयमा चीन लगायत एशियाली, युरोपलगायतका देशहरुमा कोरोना फैलनु नेपालको पर्यटन क्षेत्रका लागि राम्रो होइन । अर्थविद् खनालले नेपाल सरकारले सुरु गरेको भ्रमण वर्षकै सुरुमा कारोनाको प्रकोप फैलनु सुखद नभएको बताए । संस्कृति पर्यटन तथा उडड्यन नागरिक मन्त्रालयका प्रवक्ता रुद्रसिंह तामाङले यसले नेपालको पर्यटन मात्र नभएर समग्र अर्थतन्त्रमा असर पर्ने बताए । ‘कति असर पार्न सक्छ अहिले अनुमान लगाउन सकिन्न, तर कोराना भाइरसको प्रकोपले नेपालको पर्यटनमा प्रत्यक्ष रुपमा असर पर्छ,’ उनले भने । अहिले चीनलाई धेरै आर्थिक नोक्सनी भएको छ । देशका प्रभावित क्षेत्रमा यात्रा गर्न प्रतिबन्ध पनि लगाइएको छ । यो चीनियाँको भ्रमण गर्ने समय हो । भ्रमण गर्ने समयमा कोरोना भाइरसको प्रकोप हुनु नेपालका लागि सुखद होइन । यसले नेपालको पर्यटन व्यवसायमा ठूलो धक्का पुर्याउन सक्छ । विश्व स्वास्थ्य संगठनद्धारा आपतकालको घोषणा कोरोना भाइरस एउटा गम्भीर स्वास्थ्य समस्याका रुपमा रहेको भन्दै विश्व स्वास्थ्य संगठनले पनि आपतकालको घोषणा गरिसकेको छ । संक्रमणको प्रकोप चीनका कम्तीमा २५ प्रान्तमा फैलिएको छ भने कम्तीमा १८ शहरमा निकै डरलाग्दो तरिकाले फैलिएकाले ती सहरहरुमा यातायात साधन चलाउन प्रतिबन्ध लगाइएको छ ती क्षेत्रमा विभिन्न सतर्कता अपनाइएको चीन सरकारले बताएको छ । सरकारले देशभरीको उडान, रेल र बससेवामा पनि उच्च सतर्कताका लागि आह्वान गरेको छ । यसैगरी मानिसको बढी आवतजावत हुने विमानस्थल, बसपार्क, रेल स्टेसन लगायतमा स्वास्थ्य जाँचको प्रबन्ध मिलाइएको छ भने जंगली जनावर र पशु ओसार पसार तथा उपभोगमा कडाई गर्न निर्देशन दिइएको छ । चीनमा १७ वर्ष पहिले २००३ मा फैलिएको सार्स भाइसबाट चीनसहित अन्य देशमा ८ हजारभन्दा बढी मानिसहरु प्रभावित भएका थिए । तीमध्ये १० प्रतिशत मानिसहरुको मृत्यु भएको थियो । २००३ मा फैलिएको उक्त भाइरसका कारण चीनमा ५० अर्ब डलर नोक्सान भएको थियो । सार्स भाइरसको संक्रमणका कारण हङकङको सूचक त्यो समयमा २० प्रतिशतले घटेको थियो । चीनमा मात्रै अहिलेसम्म काेराेना भाइरसकाे कारण ३ सयभन्दा बढीको मृत्यु भइसकेको छ भने १४ हजारभन्दा बढी संक्रमित भएका अन्तर्राष्ट्रिय सञ्चार माध्यमले जनाएका छन् । यूराेपमा पनि असर चीन र अन्य एशियाली देशहरुले कोरोना भाइरसको कारण पर्यटन, उडड्यन, खुद्रा र मनोरोञ्जन क्षेत्रमा घाटा व्यहोरी सकेका छन् । उक्त भाइरसको संक्रमणले अमेरिका, जापान, दक्षिण कोरिया, ताइवान, हङकङ,मकाउ र थाइल्याण्डमा छोइसकेको र युरोपमा पनि फैलिन थालेको जनाइएको छ । कोरोना भाइरसको असर चीनको समग्र अर्थव्यवस्थामा देखिइरहेको छ ।  चीनले भाइरसको फैलावटलाई कम गर्न समूह बाहिरको भ्रमणमा प्रतिबन्ध लगाएको थियो । यसले पनि  टुर अपरेटरको सेयरमा गिरावट आउने निश्चित छ । यो भाइरस फैलिएको खबर आएसँगै चीनियाँ शेयर बजारमा ५ प्रतिशतको गिरावट आइसकेको छ । चीनको अर्थव्यवस्थामा घाटा हुनु भनेको समम्र विश्वलाई घाटा हुनु हो । विश्वको सबैभन्दा धेरै तेल खपत हुने स्थानमा मान्छेको आवतजावत र यातायातका साधन ठप्प पारेकाे छ। हाल कच्चा तेलको मूल्य घट्नुका साथै चीनको विकासदर पनि कमजोर हुने बताइएको छ । चीनमा पर्यटकहरुको पनि आर्थिक विकासमा ठूलो हिस्सा रहेको छ । यसबाट चीनमा आउने जाने विमानमा पनि असर पर्न सुरु भइसकेको छ । यससँगै हवाई इन्धनको माग पनि अधिक घटेको छ।

बारका पूर्वाध्यक्ष पाण्डेको निधन

दमाैली । नेपाल बार एशोसिएशन तनहुँका पूर्वाध्यक्ष एवं जिल्ला विकास समितिका पूर्वसभापति फणीन्द्रबहादुर पाण्डेको आज निधन भएको छ । केही समयदेखि अस्वस्थ पाण्डेको तनहुँको व्यास नगरपालिका–३ दमौलीस्थित निवासमा निधन भएको हो । पाण्डेको आज नै दमौलीस्थित मादीसेती घाटमा दाहसंस्कार गरिएको छ । पाण्डेको निधनप्रति शोक व्यक्त गर्दै दाहसंस्कारमा सहभागी नेकपाका केन्द्रीय सदस्य एकबहादुर रानाले परिवर्तन र निरङ्कुशताविरुद्धको आन्दोलनमा महत्वपूर्ण भूमिका निर्वाह गर्नुभएका पाण्डेको निधनले पार्टीलाई अपूरणीय क्षति पुगेको बताए । नेकपा जिल्ला अध्यक्ष एवं सांसद केदार सिग्देल, सांसद प्रतापकुमार श्रेष्ठ, जिल्ला समन्वय समिति तनहुँका प्रमुख शान्तिरमण वाग्ले, व्यासका प्रमुख न्यौपानेलगायतले सामाजिक क्षेत्रमा योगदान पुर्याएका पाण्डेको निधनले समग्र तनहुँवासीले अभिभावक गुमाएको महसुस गरेको बताएका छन् ।रासस

प्रभु बैंकको नयाँ शाखा काठमाडौंको धर्मस्थलीमा

काठमाडौं । प्रभु बैंकले आफ्नाे शाखा सञ्जाल विस्तार गर्ने क्रममा सोमबारदेखि काठमाण्डौंको धर्मस्थलीमा २०७औं शाखा सञ्चालनमा ल्याएको छ । उक्त शाखाको उद्घाटन तारकेश्वर नगरपालिकाका मेयर रामेश्वर वोहोराले गरेका हुन् । धर्मस्थली शाखाको उद्घाटन गर्दै प्रमुख अतिथी वोहोेराले प्रभु बैंकले आफ्नाे बैंकको व्यावसायिक सञ्जाल विस्तार गर्दै बैंकिङ्ग पहुँच नपुगेको ठाउँहरुमा शाखा कार्यालय सञ्चालनमा ल्याएर सर्वसाधारणको घर आँगनसम्म सरल र सहज रुपमा बैंकिङ्ग सेवा विस्तार गरी प्रशंसनीय कार्य गरेको बताए । बैंकको धर्मस्थली शाखा कार्यालयबाट प्रभु बैंकको गुणस्तरीय एवं अत्याधुनिक प्रविधियुक्त बैंकिङ्ग सेवा प्रवाह हुने भएकोले यहाँका स्थानीय बासिन्दा, सर्वसाधारणहरु, व्यवसायिक फर्म, कम्पनी तथा संघ संस्थाहरुले प्रभु बैंकको गुणस्तरीय सेवा उपभोग गरी लाभान्वित हुनेछन् । साथै, स्थानीय सर्वसाधारणमा बैंकिङ्ग बानीको विकासमा अभिवृद्घि भई स्थानीयस्तरको सम्पुर्ण आर्थिक कारोबार बैंकिङ्ग प्राणालीमा प्रवेश गर्नुका साथै यस क्षेत्रको समग्र आर्थिक उन्नतीमा धर्मस्थली शाखा कार्यालयले महत्वपूर्ण भूमिका निर्वाह गर्नेछ भन्ने बैंकले विश्वास लिएको छ ।

एनसेल साढे ३१ अर्ब नोक्सानीमा, सरकारलाई पनि अर्बाै‌ कर नाेक्सान

काठमाडौं । दूरसंचार सेवा प्रदायक कम्पनी एनसेल नोक्सानीमा गएको छ । एनसेलले गत आर्थिक वर्ष २०७५/७६ मा ३१ अर्ब ५१ करोड ९४ लाख ३ हजार ३ सय ८२ रुपैयाँ खुद नोक्सानी भएको वित्तीय विवरण कर कार्यालयमा बुझाएको छ । एनसेलको कूल आम्दानी पनि घटेको छ । गत वर्ष एनसेलले ५५ अर्ब २८ करोड ३९ लाख ३३ हजार ९६ रुपैयाँ कूल आम्दानी गरेको छ । अघिल्लो वर्ष  २०७४/७५ एनसेलको कूल आम्दानी ५९ अर्ब ६९ करोड २६ लाख ९१ हजार ९ सय १७ रुपैयाँ थियो । कम्पनीको प्रत्येक्ष खर्च पनि घटेको छ । ठूला करदाता कार्यालय स्रोतका अनुसार गत आर्थिक वर्ष एनसेलले १३ अर्ब ५४ करोड ५१ लाख ८७ हजार ४ सय १७ रुपैयाँ प्रत्येक्ष खर्च गरेको छ । अघिल्लो वर्ष कम्पनीले १३ अर्ब ७६ करोड ४८ लाख ३२ हजार २३ रुपैयाँ प्रत्येक्ष खर्च गरेको थियो । कम्पनीको कर तिर्नुअघिको संचालन नाफा करिब ५ अर्ब रुपैयाँले घटेको छ । गत आर्थिक वर्षमा एनसेलले कर तिर्नुअघि २० अर्ब ३५ करोड ७ लाख ९३ हजार २ सय २१ रुपैयाँ संचालन नाफा गरेको छ । अघिल्लो वर्ष एनसेलको कर तिर्नुअघिको संचालन नाफा २५ अर्ब १९ करोड ६७ लाख ५२ हजार ५ सय ३७ रुपैयाँ थियो । गत वर्ष कर तिरेपछिको एनसेलको नाफा १९ अर्ब ९९ करोड ५२ लाख २१ हजार ९ सय ७६ रुपैयाँ छ । अघिल्लो वर्ष यस्तो नाफा २४ अर्ब ६३ करोड २२ लाख ६६ हजार ४ सय २८ रुपैयाँ थियो । आर्थिक वर्ष २०७५/७६ काे नियमित काराेबारबाट करपछिकाे नाफा नाफा १९ अर्ब ९९ करोड ५२ लाख २१ हजार ९ सय ७६ रुपैयाँ भएपनि पुरानाे कर दाहित्वमा तानिएपछि एनसेल ३१ अर्ब ५१ करोड नाेक्सानमा गएकाे हाे । पुरानाे कर दाहित्वबाफत गत आर्थिक बर्ष ५१ अर्ब रुपैयाँभन्दा बढी आयकर तिर्नु परेका कारण कम्पनी नोक्सानीमा देखिएको हो । कम्पनीले गत आर्थिक वर्ष नेपाल सरकारलाई ५१ अर्ब ५१ करोड ४६ लाख २५ हजार ३ सय ५८ रुपैयाँ कर तिरेको छ । अघिल्लो आर्थिक वर्ष कम्पनी ६ अर्ब ६० करोड ९ लाख ८९ हजार ७ सय ४५ रुपैयाँ कर तिरेको थियो । पुरानाे कर दाहित्व नाफाबाट तिर्ने एनसेलकाे नीतिले सरकारलाई पनि अर्बाै नाेक्सान हुने करका जानकारहरू बताउँछन् ।

कोरोना भाइरसको प्रभाव नेपाली तरकारी बजारमा, सुन झै महँगियाे लसुन

काठमाडौं । पछिल्लो समयमा छिमेकी राष्ट्र चीनमा कोरोना भाइरसको संक्रमण बढेसँगै नेपालको तरकारी बजारमा प्रभाव देखिएको छ । नेपालमा अधिकांश लसुन चीनबाट आयात हुने हुँदा पछिल्लो समय कोरोना भाइरसको संक्रमणमा चीन परेसँगै भएको नाका बन्दले आयात निर्यात नहुँदा नेपाली बजारमा लसुनको मूल्य आकाशिएको कालीमाटी फलफूल तथा तरकारी बजार विकास समितिका उपनिर्देशक विनय श्रेष्ठले बताए । माघ १ गते प्रतिकेजी २ सय ८५ मूल्यमा बिक्री भएको लसुन हाल ५ सय ५० देखि ६ सय रुपैयाँमा बजारमा बिक्री भइरहेको छ । समितिका अनुसार हाल प्रतिकेजी ५ सय रुपैयाँ थोक मूल्य बिक्री भएको छ भने बजारमा प्रतिकेजी ६ सय रुपैयाँसम्म कारोबार भइरहेको जानकारी दिएको छ । एक महिनाकाे अवधिमा लसुन प्रतिकेजी ३ सय ३५ रूपैयाँले बढेकाे छ । गत पुस महिनाकाे २० गते प्रतिकेजी २ सय १५ रूपैयाँमा बिक्री भएकाे लसुन हाल प्रतिकेजी ५ सय ५० रूपैयाँमा बिक्री भइरहेकाे  कालीमाटी फलफूल तथा तरकारी बजार विकास समितिले जानकारी दिएकाे छ ।

अमेरिका जान लालायित युवालाई सुझावः ३१ प्रकारका जागिर अत्यन्त जोखिमपूर्ण

काठमाडौं । अधिकांश नेपाली यूवाहरु अमेरिका पलायन हुन लालायित छन् । अमेरिकामा गएर जागिर खाने, डलरमा तलब बुझ्ने अनि त्यहाँको आधुनिक रहनसहनमा रमाउने चाहनाले धेरै यूवापिढीलाई गाँजेको छ । चाहे रेष्टुराँमा भुइँ पुछ्ने काम होस् वा सामान डेलिभरीको जागिर । काम जेसुकै होस्, मात्र अमेरिकी डलरमा पारिश्रमिक बुझ्न पाए पुग्यो । तर तितो सत्य के हो भने नेपाली लगायत अधिकांश आप्रवासीहरुले अमेरिका गएर गर्ने अधिकतम काम जोखिमयुक्त रहेका छन् । अमेरिकी ब्युरो अफ लेबर स्टाटिस्टीकले सन् २०१८ मा कति जना मानिसहरुले जागिर गर्ने क्रममा ज्यान गुमाए भनेर तथ्यांक सार्वजनिक गरेको छ । सो जागिर गर्ने प्रत्येक १ लाख जनामा कति जनाले ज्यान गुमाए भनेर निकालेको सूचनाको आधारमा एजेन्सीहरुले अमेरिकाको सबैभन्दा बढी खतरनाक ३१ वटा जागिरहरुको सूची तयार गरेका छन् । सबैभन्दा बढी जोखिमयुक्त जागिर भनेर यातायत क्षेत्रसँग सम्बन्धित जागिरलाई राखिएको छ । प्रत्येक १ लाख जागिरेमध्ये धेरै फेटालिटी रेट (घाउ, चोट वा गम्भिर दुर्घटनाको दर) को आधारमा सबैभन्दा जोखिमयुक्त ३१ जागिर अथवा कामहरुको प्रकृतिको सूची प्रस्तुत गरिएको छ । जुन काम गर्नुपूर्व जोखिमको बारेमा जानकारी लिन जरुरी छ । (१) लगिङ कामदार मुख्य काम – मेसिनरी प्रविधी तथा हाते औजारको प्रयोगद्धारा रुख काट्ने काम । गम्भिर दुर्घटना दर (प्रति १ लाख जनामा) – ९७.६ जना (२) फिसिङ तथा सोसम्बन्धी कार्य मुख्य काम – जाली, फिसि¨ रड तथा अन्य साधनको प्रयोगद्धारा माछा र अन्य जलचर प्राणीहरुको संकलन । गम्भिर दुर्घटना दर (प्रति १ लाख जनामा) – ७७.४ जना (३) विमान चालक तथा हवाई इञ्जिनियरहरु मुख्य काम – यात्री तथा कार्गोको ओसापसारका लागि तोकिएको रुटअन्तर्गत विमानको संचालन तथा विमान मर्मत । गम्भिर दुर्घटना दर (प्रति १ लाख जनामा) – ५८.९ जना (४) घरको छानासम्बन्धी काम मुख्य काम – आवास तथा अन्य संरचनाहरुमा काठ, जस्ता, फलाम, आल्मुनियम लगायतका सामाग्रीको छाना लगाउने तथा आवश्यक मर्मतसंभार गर्ने । गम्भिर दुर्घटना दर (प्रति १ लाख जनामा) – ५१.५ जना (५) पुर्नप्रयोग हुने बस्तु वा फोहोरको संकलन मुख्य काम – पुर्नप्रयोग हुने फोहोर बस्तुको संकलन तथा नहुने बस्तुहरुको ब्यवस्थापन । गम्भिर दुर्घटना दर (प्रति १ लाख जनामा) – ४४.३ जना (६) सामाग्री वितरक (सेल्स वर्कस्) तथा ट्रक चालक मुख्य काम – बस्तु तथा सामाग्रीहरुको बिक्री तथा वितरणको लागि ट्रक तथा अन्य यातायात साधनको संचालन । गम्भिर दुर्घटना दर (प्रति १ लाख जनामा) – २६.० जना (७) कृषि ब्यवस्थापन मुख्य काम – कृषि फार्म तथा अन्य कृषिजन्य स्थापनाको योजना, निर्देशन, समन्वय तथा ब्यवस्थापन र संचालन । गम्भिर दुर्घटना दर (प्रति १ लाख जनामा) – २४.७ जना (८) संरचनागत फलाम तथा स्टिल कामदार मुख्य काम – फलामे वा स्टिलको प्रयोग गरी बन्ने संरचनामा ती सामाग्रीहरुको जडान, स्थापना तथा मर्मत । गम्भिर दुर्घटना दर (प्रति १ लाख जनामा) – २३.६ जना (९) निर्माण तथा उत्खननका सुपरिवेक्षण मुख्य काम – ठूला निर्माण तथा खानी वा उत्खनन क्षेत्रका कामदारहरुको प्रत्यक्ष सुपरिवेक्षण तथा समन्वय । गम्भिर दुर्घटना दर (प्रति १ लाख जनामा) – २१.० जना (१०) विद्युतीय तार जडान तथा मर्मत मुख्य काम – विद्युतीय गृह, परियोजना तथा वितरण केन्द्रको तारहरुको जडान तथा मर्मतसंभार । गम्भिर दुर्घटना दर (प्रति १ लाख जनामा) – १९.३ जना (११) विविध कृषिजन्य कामदारहरु मुख्य काम – खेती, कृषि तथा अन्य कृषिजन्य व्यवसायमा काम । गम्भिर दुर्घटना दर (प्रति १ लाख जनामा) – १८.० जना (१२) निर्माण सहयोगीहरु मुख्य काम – निर्माण क्षेत्रहरुमा निर्माणमा खटेका कामदारलाई सहायता । गम्भिर दुर्घटना दर (प्रति १ लाख जनामा) – १५.८ जना (१३) पुलिस/सुरक्षाकर्मी मुख्य काम- स्थानीय तथा संघिय कानून तथा अन्य अध्यादेशको कार्यान्वयन गरी मानव जिवन र सम्पत्तिको सुरक्षाका साथसाथै शान्ति तथा सुरक्षा कायम । गम्भिर दुर्घटना दर (प्रति १ लाख जनामा) – १३.७ जना   (१४) निर्माण क्षेत्रका कामदार मुख्य काम – निर्माण क्षेत्रहरुमा शारिरिक श्रममा आधारित कार्यहरु । गम्भिर दुर्घटना दर (प्रति १ लाख जनामा) – १३.० जना   (१५) सामान्य मर्मत तथा संभार कार्य मुख्य काम – मेसिन, मेसिनका हिस्सा तथा अन्य औजारको सीपमा आधारित मर्मत तथा संभार । गम्भिर दुर्घटना दर (प्रति १ लाख जनामा) – १२.५ जना   (१६) खानीको मेसिन अपरेटर मुख्य काम – बालुवा, कोइला, इन्धन तथा धातुका खानीमा सम्बन्धीत बस्तुको उत्खनन गर्नका लागि विभिन्न किसिमका मेसिनको प्रयोग । गम्भिर दुर्घटना दर (प्रति १ लाख जनामा) – ११.० जना (१७) इञ्जिनियर तथा निर्माणसम्बन्धी उपकरण तथा मेसिन अपरेटर मुख्य काम – निर्माण कार्यमा प्रयोग हुने विभिन्न प्रकारका उपकरण तथा मेसिनको संचालन । गम्भिर दुर्घटना दर (प्रति १ लाख जनामा) – १०.६ जना   (१८) बस तथा ट्रकको मेकानिक र डिजेल इञ्जिन विशेषज्ञ मुख्य काम – बस, ट्रक तथा विभिन्न डिजेल इञ्जिनको चेकजाँच, परिक्षण, मर्मत । गम्भिर दुर्घटना दर (प्रति १ लाख जनामा) – ९.५ जना   (१९) इलेक्ट्रिसियन मुख्य काम – तार तथा अन्य विद्युतीय सामाग्रीको जडान, रेखदेख तथा मर्मतसंभार गम्भिर दुर्घटना दर (प्रति १ लाख जनामा) – ८.८ जना   (२०) हिटर, यअर कन्डिसन र फ्रिज लगायतको जडान मुख्य काम – हिटर, यअर कन्डिसन र फ्रिज लगायतको जडान तथा मर्मत संभार । गम्भिर दुर्घटना दर (प्रति १ लाख जनामा) – ८.५ जना (२१) खेलाडी, धावक र एम्पायर मुख्य काम – विभिन्न खेलकुद प्रतियोगीताहरुमा प्रतिस्पर्धा गर्ने, प्रशिक्षण दिने लगायत । गम्भिर दुर्घटना दर (प्रति १ लाख जनामा) – ७.६ जना (२२) औद्योगीक ट्रक र ट्र्याक्टर अपरेटर मुख्य काम – वयर हाउस, गोदाम, फ्याक्ट्रि, निर्माण क्षेत्र लगायत अन्य विभिन्न स्थानमा कच्चा पदार्थको वसारपसार तथा उत्पादित सामानको ढुवानी । गम्भिर दुर्घटना दर (प्रति १ लाख जनामा) – ६.८ जना (२३) ट्याक्सी चालक र ब्यक्तिगत सवारी चालक मुख्य काम – अटोमोबाइल, भ्यान वा ब्यक्तिगत गाडी चलाउने । गम्भिर दुर्घटना दर (प्रति १ लाख जनामा) – ६.७ जना (२४) सिकर्मी–डकर्मी मुख्य काम– काठको झ्यालढोका बनाउने, काठका अन्य सामाग्रीको निर्माण गर्ने, ठड्याउने वा स्थापना गर्ने, आवश्यक मर्मतसंभार गर्ने । गम्भिर दुर्घटना दर (प्रति १ लाख जनामा) – ६.६ जना (२५) आकष्मिक चिकित्सकिय प्रावधिक तथा प्यारामेडिक्स मुख्य काम – थुनिएका, पुरिएका वा संकटमा परेका मानिसहरुको उद्धार गर्ने । आकष्मिक स्वास्थ्य सेवाको आँकलन गर्ने र सेवा प्रदान गर्ने । बिरामी वा घाइतेलाई तत्कालै स्वास्थ्य सुविधा केन्द्रसम्म पुर्याउने । गम्भिर दुर्घटना दर (प्रति १ लाख जनामा) – ६.५ जना (२६) सुरक्षा गार्ड मुख्य काम – चोरी, हिंसा वा नियमको उल्लंघनलाई रोक्न पहरेदारी गर्ने । गम्भिर दुर्घटना दर (प्रति १ लाख जनामा) – ६.४ (२७) वेल्डिङ मुख्य काम – फलामको सामाग्रीहरुलाई काट्ने, जोड्ने, फिटिङको लागि प्वाल पार्ने । गम्भिर दुर्घटना दर (प्रति १ लाख जनामा) – ६.२ जना (२८) गाडीको मर्मत मुख्य काम – सवारीसाधनमा आएको समस्याको पहिचान तथा निराकरण । गाडीहरुको मर्मत गम्भिर दुर्घटना दर (प्रति १ लाख जनामा) – ६.१ जना (२९) हाते श्रम तथ सामाग्रीको ओसारपसार मुख्य काम – भरिया, औजार वा मेसिनविना विभिन्न सामानहरुको बोकेर ओसारपसार गर्ने तथा अन्य सामान्य श्रम गर्ने । गम्भिर दुर्घटना दर (प्रति १ लाख जनामा) – ५.८ जना (३०) प्लम्बिङ मुख्य काम – पाइप लगाउने, पाइप काट्ने वा जोड्ने, पाइप तथा ढलको मर्मत गर्ने । गम्भिर दुर्घटना दर (प्रति १ लाख जनामा) – ५.६ जना (३१) रंगरोगन र मर्मत मुख्य काम –पर्खाल, घर, पुल, भवन तथा अन्य संरचनामा रंग पोत्ने । गम्भिर दुर्घटना दर (प्रति १ लाख जनामा) – ५.३ जना

चामल बोकेको ट्रक खस्यो पुलबाट

चितवन । चामल बोकेको ट्रक नारायणगढ–मुग्लिन सडकखण्डअन्तर्गत दुई नम्बर पुलबाट खोल्सामा खस्दा चालक शेरबहादुर गुरुङ घाइते भएका छन् । भैरहवाबाट चामल लिएर पोखरातर्फ जाँदै गरेको लु १ ख ६३४८ नम्बरको सो ट्रक इच्छाकामना गाउँपालिका– ५ मा आज बिहान दुर्घटना परेको थियो । दुर्घटना परी गम्भीर घाइते भएका चालक गुरुङको पुरानो मेडिकल कलेजमा भरतपुरमा उपचार भइरहेको जिल्ला प्रहरी कार्यालयले जनाएको छ । रासस

नबिल बैंककाे सजिलो एक्सप्रेस कर्जा योजना भैरहवामा सार्वजनिक

काठमाडौं । नबिल बैंकले नबिल सजिलो एक्सप्रेस कर्जा योजना भैरहवामा सार्वजनिक गरेको छ । साना तथा मझौला उद्यमको विकासका निम्ति नबिल बैंक र यूकेएड सक्षम एक्सिज टु फाइनान्सको सहकार्यमा उक्त योजना ल्याएको हो । कर्जासम्बन्धी निर्णय प्रकृयालाई गति दिँदै जोखिममा आधारित मूल्यांकन सहित क्रेडिट स्कोरिङ मोडल कर्जा आंकलन ढाँचाका आधारमा यो योजना आरम्भ गरिएको बैंकले जानकारी दिएको छ । सरल र शीघ्र प्रशोधनसहित अधिकतम साढे १०  प्रतिशतको ब्याजदरमा यो कर्जा उपलब्ध हुनेछ । यस याेजनाअनुसार  क्रेडिट स्कोरिङ विधिको प्रयोग गर्दै कर्जा स्वीकृत गर्ने तथा ब्याजदर तोक्ने नबिल बैंक पहिलो बैंक बन्न पुगेको छ । यसबाट साना तथा मझौला उद्यमका ग्राहकका लागि ७५ लाख रूपैयाँसम्मको कर्जा प्रतिस्पर्धी ब्याजदरमा उपलब्ध गराइनेछ । ऋणीको कर्जा आवेदनमा शीघ्र निर्णय लिँदै आवेदन प्राप्त भएको ३५ घण्टाभित्र स्वीकृति प्रदान गर्ने उद्देश्यले यो योजना ल्याइएको बैंकले जानकारी दिएको छ । नबिल सजिलो एक्सप्रेस कर्जा योजना निःशुल्क कारोबार सूचना, निःशुल्क मासिक विद्युतीय बैकिङ विवरण, व्यवसायको मुख्य मानिसलाई निःशुल्क क्रेडिट कार्ड हस्तान्तरणका साथै ३५ घण्टाभित्र निर्णय दिइसकिने आकर्षक प्याकेजका साथ आएको छ । नबिल बैंकका प्रमुख कार्यकारी अधिकृत अनिल केशरी शाहले यस क्षेत्रमा नबिल बैंक पहिलो स्थानको बैंकको रूपमा मान्यता पाएको र साना तथा मझौला उद्यम ग्राहक तथा व्यवसायका लागि पनि शीर्ष स्थानमा रहेको बताए । साथै, कर्जा प्रशोधन प्रकृयालाई छिटोछरितो, सहज र सरल बनाउने दिशामा नबिल सजिलो एक्सप्रेस कर्जाजस्ता रचनात्मक योजनाहरू अघि सार्दै साना तथा मझौला उद्यमका ग्राहकको पहिलो रोजाइ बनेको उल्लेख गरेका छन् । उद्यमको कर्जा आवेदन फारमको प्रशोधनका निम्ति अंकन विधि अँगालेबाट नबिलले कर्जा निर्णय प्रकृयामा थप वस्तुनिष्ठता ल्याउन सघाउनेछ । यसबाट अन्ततः नेपालको साना तथा मझौला उद्यम क्षेत्रलाई लाभ मिल्नेछ । नबिल बैंकले आफ्नो देशभर ९३ वटा शाखा कार्यालयहरू, एक सय ४२ एटिएम र १५ सयभन्दा धेरै नबिल रेमिट एजेन्टहरूसहित विभिन्न देशमा रहेका ऐजेन्टको बृहत् सन्जालमार्फत सेवा प्रवाह गरिरहेको छ ।