गरिमा विकास बैंकको २० प्रतिशत लाभांश पारित
काठमाडौं । गरिमा विकास बैंक लिमिटेडले सेयरधनीलाई २० प्रतिशत लाभांश वितरण गर्ने प्रस्ताव पारित गरेको छ । बैंकको सोमबार सम्पन्न २०औँ वार्षिक साधारणसभाले १० प्रतिशत बोनस सेयर र १० प्रतिशत नगद लाभांश वितरण गर्ने प्रस्ताव पारित गरेको हो । कास्कीको पोखरा महानगरपालिकास्थित होटल पोखरा ग्राण्डमा सम्पन्न साधारणसभाले प्रस्तावित बोनस सेयर तथा नगद लाभांशमा लाग्ने करसमेत समेटेर लाभांश वितरण गर्ने प्रस्ताव अनुमोदन गरेको बैंकले जनाएको छ । सभाले आर्थिक वर्ष २०८२/८३ को वार्षिक प्रतिवेदन, लेखापरीक्षकको प्रतिवेदनसहित २०८३ असार मसान्तको वासलात, नाफा–नोक्सान हिसाब, नगद प्रवाह विवरण, नाफा–नोक्सान बाँडफाँट हिसाब तथा इक्विटीमा भएको परिवर्तनसम्बन्धी विवरण पारित गरेको छ । त्यस्तै, आर्थिक वर्ष २०८३/८४ को लेखापरीक्षणका लागि लेखापरीक्षक नियुक्त गर्ने प्रस्ताव पनि सभाले अनुमोदन गरेको छ । हाल बैंकको चुक्ता पुँजी ६ अर्ब २ करोड १३ लाख ४८ हजार ३६७ रुपैयाँ २२ पैसा रहेको छ । प्रस्तावित १० प्रतिशत बोनस सेयर वितरणपछि बैंकको चुक्ता पुँजी बढेर ६ अर्ब ६२ करोड ३४ लाख ८३ हजार २०३ रुपैयाँ ९४ पैसा पुग्नेछ । गरिमा विकास बैंकले देशभरका १२६ शाखा कार्यालय, ५१ एटीएम तथा डिजिटल बैंकिङ सेवामार्फत ग्राहकलाई बैंकिङ सेवा प्रदान गर्दै आएको छ ।
एनएमबी बैंक र र्यापिड टेकबीच डिजिटल बैंकिङ सेवा विस्तारका लागि सम्झौता
काठमाडौं । एनएमबी बैंक लिमिटेडले ‘नेपाल फिनटेक एक्स्पो २०२६’ को अवसरमा र्‍यापिड टेक प्रालिसँग डिजिटल बैंकिङ सेवा विस्तारका लागि सहकार्य गरेको छ । व्यावसायिक संस्थाले प्रयोग गर्दै आएका सफ्टवेयर तथा डिजिटल प्रणालीबाटै बैंकिङ सेवा उपलब्ध गराउने उद्देश्यले दुई कम्पनीबीच सम्झौता भएको हो । सम्झौतापछि एनएमबी बैंकका व्यावसायिक तथा कर्पोरेट ग्राहकले आफ्नै बैंकिङ प्रणालीभित्रबाट रकम भुक्तानी, हिसाब मिलान तथा अन्य बैंकिङ कारोबार गर्न सक्नेछन् । यसले कारोबारलाई छिटो र सहज बनाउनुका साथै समय बचत गर्न सहयोग पुग्ने बैंकले जनाएको छ । त्यस्तै, साना तथा मझौला व्यवसायीले पनि व्यापारिक केन्द्र तथा विभिन्न डिजिटल प्लेटफर्ममार्फत छिटो, सुरक्षित र सहज रूपमा बैंकिङ सेवा प्राप्त गर्न सक्नेछन्। उक्त सुविधा निकट भविष्यमा सञ्चालनमा ल्याउने तयारी रहेको बैंकले जनाएको छ। यस सहकार्यले व्यावसायिक कारोबारमा हुने अनावश्यक झन्झट कम गर्नुका साथै डिजिटल माध्यमबाट वित्तीय सेवा प्रयोग गर्न सहज बनाउने अपेक्षा गरिएको छ। एनएमबी बैंकले हाल देशभर १९७ शाखा, १७६ एटीएम र ९ वटा एक्सटेन्सन काउन्टरमार्फत बैंकिङ सेवा प्रदान गर्दै आएको छ।
जनता टीभीका अध्यक्ष पौडेलको निधन
काठमाडौं । जनता टीभीका अध्यक्ष विजय पौडेलको निधन भएको छ । सोमबार (आज) कीर्तिपुर अस्पताल पुर्याउँदा पुर्याउँदै उनको निधन भएको अस्पतालका चिकित्सक डा. किरण नकर्मीले जानकारी दिए । जनता टीभीका सम्पादक टंक पन्तका अनुसार पौडेलले विष सेवन गरेका थिए । अस्पतालमा उपचार गर्न पुर्याएपछि उनलाई चिकित्सकले मृत घोषित गरेका हुन् ।
विशेष मूल्य समायोजन कार्यविधि स्वीकृत, संकटग्रस्त पूर्वाधार क्षेत्रले गति लिने महासंघको विश्वास
काठमाडौं । सरकारले ‘विशेष मूल्य समायोजन सम्बन्धी कार्यविधि, २०८३’ स्वीकृत गरेको छ । सरकारले स्वीकृत गरेको कार्यविधिलाई नेपाल निर्माण व्यवसायी महासंघले पूर्वाधार क्षेत्रका लागि कोशेढुंगा भन्दै स्वागत गरेको छ । असोज २३ गते सरकारले कार्यविधि स्वीकृत गरेको हो । सार्वजनिक खरिद ऐनमा मूल्य समायोजनको व्यवस्था भए पनि त्यसलाई कार्यविधिमार्फत थप स्पष्ट पारिनु ऐतिहासिक कदम भएको महासंघको ठहर छ । महासंघले विज्ञप्ति जारी गर्दै लामो समयदेखि समस्याग्रस्त बनेको पूर्वाधार क्षेत्रलाई चलायमान बनाउन नयाँ कार्यविधि महत्त्वपूर्ण हुने विश्वास व्यक्त गरेको छ । कार्यविधिले पूर्वाधार क्षेत्रको समग्र सुधार तथा विस्तारमा समेत योगदान पु‍र्याउने महासंघको अपेक्षा छ । मूल्य समायोजनसम्बन्धी कार्यविधिलाई महासंघको नवनिर्वाचित कार्यसमितिले प्रमुख एजेन्डाका रूपमा अघि सार्दै आएको थियो । महासंघका अध्यक्षको विशेष पहल तथा निरन्तर प्रयासपछि सरकारले कार्यविधि स्वीकृत गरेको विज्ञप्तिमा उल्लेख छ । महासंघले कार्यविधि स्वीकृतिमा महत्वपूर्ण भूमिका निर्वाह गरेको भन्दै प्रधानमन्त्री बालेन्द्र शाह र उनको सचिवालय तथा पूर्वाधार विकासमन्त्री र उनको सचिवालयप्रति आभार व्यक्त गरेको छ । साथै कार्यविधि स्वीकृत गर्ने मन्त्रिपरिषद्का सम्पूर्ण सदस्यलाई समेत धन्यवाद दिएको छ ।
एमालेको राष्ट्रिय कार्यकर्ता भेला मंसिर २ र ३ गते काठमाडौंमा
काठमाडौं । नेकपा एमालेले आगामी मंसिर २ र ३ गते काठमाडौंमा राष्ट्रिय कार्यकर्ता भेला आयोजना गर्ने भएको छ। एमालेका संगठन विभाग प्रमुख भानुभक्त ढकालले पार्टीका मनोनीत केन्द्रीय सदस्यहरूको शपथ ग्रहण कार्यक्रममा राष्ट्रिय कार्यकर्ता भेलाको मिति र स्थानबारे जानकारी गराएका हुन् । भेला आगामी मंसिर २ र ३ गते काठमाडौंमा हुन लागेको हो । एमालेले राष्ट्रिय कार्यकर्ता भेलामार्फत पार्टीका नेता तथा कार्यकर्तालाई संगठित बनाउने, संगठनात्मक गतिविधिलाई प्रभावकारी बनाउने र पार्टीको भावी कार्यदिशाबारे छलफल गर्ने तयारी गरेको बुझिएको छ । यद्यपि, भेलामा सहभागी हुने प्रतिनिधिको संख्या, छलफलका मुख्य एजेन्डा र कार्यक्रमको विस्तृत कार्यतालिकाबारे भने थप विवरण सार्वजनिक हुन बाँकी छ ।
भगवती कम्पोजिटको १० प्रतिशत बोनस सेयर पारित
काठमाडौं । भगवती कम्पोजिट इण्डष्ट्रिज लिमिटेडको दोस्रो वार्षिक साधारणसभाले १० प्रतिशत बोनस सेयर वितरण गर्ने प्रस्ताव पारित गरेको छ । सभाले बोनस सेयर वितरणपछि २० प्रतिशत हकप्रद सेयर निष्कासन गर्ने प्रस्तावसमेत अनुमोदन गरेको छ । चितवनको भरतपुर–७, कृष्णपुरस्थित होटल पौवामा सोमबार सम्पन्न साधारणसभाले कम्पनीको जारी पुँजी ४२ करोड रुपैयाँबाट बढाएर ७५ करोड रुपैयाँ पुर्याउने प्रस्ताव पनि पारित गरेको हो । सभाले आर्थिक वर्ष २०८२/८३ को वार्षिक प्रतिवेदन तथा वित्तीय विवरण अनुमोदन गर्नुका साथै आगामी आर्थिक वर्षका लागि लेखापरीक्षक नियुक्त गर्ने र सञ्चालक समितिका सदस्यहरूको नियुक्ति अनुमोदन गर्ने प्रस्ताव पारित गरेको छ । कम्पनीले आवश्यक कानुनी प्रक्रिया पूरा गरी नियामकीय स्वीकृति लिएपछि प्राथमिक सेयर (आईपीओ) निष्कासन प्रक्रिया अघि बढाउने जनाएको छ । भगवती कम्पोजिट इण्डष्ट्रिजले डब्लुपिसी ढोका, फ्रेम, वाल प्यानल तथा फाइबरजन्य सामग्री उत्पादन गर्दै आएको छ ।
मानसिक स्वास्थ्यमा न्यून लगानी, ८० प्रतिशत नागरिक उपचार बाहिर
काठमाडौं । नेपालमा मानसिक स्वास्थ्यसम्बन्धी समस्या बढ्दै गए पनि आवश्यक उपचार सेवा पाउने नागरिकको संख्या न्यून रहेको भन्दै सरोकारवालाहरूले सरकारी लगानी, संस्थागत संरचना र जनशक्ति व्यवस्थापनमा सुधार गर्न माग गरेका छन् । स्वास्थ्य सेवा विभागका निमित्त महानिर्देशक डा.कृष्णप्रसाद पौडेलका अनुसार मानसिक स्वास्थ्यसम्बन्धी उपचार आवश्यक पर्ने नागरिकमध्ये करिब ८० प्रतिशतले सेवा पाउन सकेका छैनन् । करिब २० प्रतिशतले मात्र आवश्यक सेवा प्राप्त गरिरहेको उनले बताए । स्वास्थ्य पत्रकार मञ्चले आयोजना गरेको कार्यक्रममा बोल्दै डा. पौडेलले नेपालमा मानसिक स्वास्थ्यलाई प्राथमिकतामा राख्ने भनिए पनि बजेट विनियोजन र कार्यक्रम कार्यान्वयनमा पर्याप्त ध्यान पुग्न नसकेको बताए । डा.कृष्णप्रसाद पौडेल । मानसिक स्वास्थ्यलाई व्यक्तिगत समस्याका रूपमा मात्र नहेरी राष्ट्रिय जनस्वास्थ्यको महत्त्वपूर्ण मुद्दाका रूपमा सम्बोधन गर्नुपर्ने उनको भनाइ थियो । डा. पौडेलका अनुसार नेपालमा करिब १० प्रतिशत नागरिकमा कुनै न कुनै प्रकारको मानसिक स्वास्थ्य समस्या रहेको छ । सन् २०२० को सर्वेक्षणलाई उद्धृत गर्दै उनले ५.२ प्रतिशत किशोरकिशोरीमा मानसिक स्वास्थ्यसम्बन्धी समस्या देखिएको जानकारी दिए । नेपालमा वार्षिक करिब सात हजार दुई सय जनाको आत्महत्याका कारण मृत्यु हुने गरेको तथ्याङ्क प्रस्तुत गर्दै उनले आत्महत्या न्यूनीकरणलाई प्रमुख चुनौतीका रूपमा औंल्याए । हाल प्रति एक लाख जनसङ्ख्यामा २४ जनाको आत्महत्याबाट मृत्यु हुने गरेको उल्लेख गर्दै उनले दिगो विकास लक्ष्य हासिल गर्न यो दरलाई पाँचभन्दा तल झार्नुपर्ने बताए । ‘दिगो विकासको लक्ष्य हासिल गर्न अहिले प्रति एक लाख जनामा २४ जनाको आत्महत्या हुने दरलाई पाँचभन्दा तल पुर्याउने ठूलो कार्यभार छ । मानसिक स्वास्थ्य प्राथमिकतामा भए पनि बजेट विनियोजन पर्याप्त छैन,’ डा. पौडेलले भने । उनका अनुसार आत्महत्याका कतिपय घटना प्रहरी तथा स्वास्थ्य संस्थासम्म नपुग्ने भएकाले यकिन तथ्याङ्क सङ्कलन र विश्लेषणका लागि प्रभावकारी संयन्त्रको आवश्यकता छ । प्राकृतिक विपद्, बाढीपहिरो र भूकम्पजस्ता घटनाले पनि नागरिकको मानसिक स्वास्थ्यमा गम्भीर असर पार्ने भएकाले यसलाई स्वास्थ्य क्षेत्रसँगै सामाजिक क्षेत्रका कार्यक्रममार्फत सम्बोधन गर्नुपर्ने उनले बताए । स्वास्थ्य बजेटको पाँच प्रतिशत लगानी स्वास्थ्य क्षेत्रमा सरकारी लगानी न्यून हुँदा मानसिक स्वास्थ्यसम्बन्धी कार्यक्रम सञ्चालन र सेवा विस्तारमा कठिनाइ भइरहेको डा. पौडेलले जानकारी दिए । सरकारले स्वास्थ्य वित्त रणनीति स्वीकृत गरे पनि त्यसको कार्यान्वयन प्रभावकारी हुन नसकेको उनको भनाइ छ । तीनै तहका सरकारले स्वास्थ्य क्षेत्रमा १० प्रतिशत लगानी गर्ने लक्ष्य राखिए पनि रणनीतिमा ‘क्रमशः’ भन्ने शब्द थपिएपछि बजेट वृद्धि हुन नसकेको उनले उल्लेख गरे । रणनीति स्वीकृत भएको लामो समय बितिसक्दा पनि स्वास्थ्य क्षेत्रमा सरकारी लगानी करिब पाँच प्रतिशतमा सीमित रहेको उनले बताए । ‘इपिडिमियोलोजी तथा रोग नियन्त्रण महाशाखाको करिब ५२ करोड रुपैयाँको बजेटबाट मानसिक स्वास्थ्य तालिम, एमएच ग्याप कार्यक्रम तथा समुदायमा आधारित गतिविधि सञ्चालन गर्नुपर्ने अवस्था छ,’ डा. पौडेलले भने । सरकारी बजेट अपर्याप्त हुँदा मानसिक स्वास्थ्यसम्बन्धी कतिपय कार्यक्रम साझेदार संस्थाहरूको सहयोगमा सञ्चालन गर्नुपरेको उनले बताए । मानसिक स्वास्थ्य सेवा विस्तारका लागि सरकारी लगानी बढाउनुका साथै विभिन्न निकायबीचको सहकार्यलाई प्रभावकारी बनाउनुपर्ने उनको भनाइ थियो । नीति बने पनि कार्यान्वयन फितलो मानसिक स्वास्थ्य अधिकारकर्मी तथा कोसिसका संस्थापक मातृकाप्रसाद देवकोटाले मानसिक स्वास्थ्यका क्षेत्रमा लामो समयदेखि काम भइरहे पनि नीतिगत प्रतिबद्धता कार्यान्वयनमा समस्या रहेको बताए । मातृकाप्रसाद देवकोटा । उनका अनुसार २०५३ सालमै मानसिक स्वास्थ्य नीति बने पनि त्यसको प्रभावकारी कार्यान्वयन र सम्बन्धित मन्त्रालयको स्वामित्वमा कमजोरी देखिएको छ । मानसिक स्वास्थ्यसम्बन्धी नीतिलाई व्यवहारमा उतार्न संघ र प्रदेश तहमा प्रभावकारी संयन्त्र निर्माण गर्नुपर्ने उनले बताए । देवकोटाले सर्वोच्च अदालतको परमादेशअनुसार मानसिक स्वास्थ्यका लागि छुट्टै महाशाखा वा विभाग स्थापना गर्नुपर्ने आवश्यकता औंल्याए । मानसिक स्वास्थ्यलाई नीतिगत बहसमा मात्र सीमित नराखी कार्यान्वयनका लागि जिम्मेवार निकाय, पर्याप्त बजेट र स्पष्ट कार्ययोजना आवश्यक रहेको उनको भनाइ थियो । परामर्श सेवा विस्तार गर्नुपर्ने कार्यक्रमका वक्ताहरूले मानसिक स्वास्थ्यसम्बन्धी सेवा स्थानीय तहसम्म विस्तार गर्नुपर्नेमा जोड दिएका छन् । उनीहरूका अनुसार पालिका तथा वडा तहका स्वास्थ्य संस्था र अस्पतालमा मानसिक स्वास्थ्यसम्बन्धी तालिमप्राप्त जनशक्ति परिचालन गरी मनोसामाजिक परामर्श सेवा उपलब्ध गराउन आवश्यक छ । आधारभूत स्वास्थ्यकर्मीलाई मानसिक स्वास्थ्यसम्बन्धी तालिम दिएर सेवा विस्तार गर्ने ‘टास्क सिफ्टिङ’ विधि, टेलिमेडिसिन तथा साझेदार संस्थासँगको सहकार्यलाई प्रभावकारी बनाउनुपर्नेमा पनि सरोकारवालाहरूले जोड दिएका छन् । त्यस्तै, मानसिक स्वास्थ्य सेवाका लागि मनोपरामर्शदाता तथा मनोसामाजिक परामर्शदाताको स्थायी दरबन्दी सिर्जना गर्नुपर्ने र आवश्यक जनशक्तिको व्यवस्थापन गर्नुपर्ने उनीहरूको माग छ । मानसिक स्वास्थ्यसम्बन्धी नीति तथा कार्यक्रम बने पनि पर्याप्त बजेट, संस्थागत जिम्मेवारी र प्रभावकारी कार्यान्वयनको अभावले सेवा विस्तारमा चुनौती देखिएको कार्यक्रममा औंल्याइएको थियो । सरोकारवालाहरूले मानसिक स्वास्थ्यलाई अन्य शारीरिक रोगसरह प्राथमिकता दिँदै कानुनी, नीतिगत तथा संरचनागत सुधार गर्न सरकारसँग आग्रह गरेका छन् ।
भक्तपुरमा बीवाईडीको नयाँ सर्भिस सेन्टर सञ्चालनमा, डल्लुमा पनि निर्माण सुरु
काठमाडौं । बीवाईडीको नेपालका लागि आधिकारिक वितरक साइमेक्स इंकले भक्तपुरमा नयाँ सर्भिस सेन्टर सञ्चालनमा ल्याएको छ। कम्पनीले काठमाडौंको डल्लुमा अर्को सर्भिस सेन्टर निर्माणका लागि शिलान्याससमेत गरेको छ। नेपालमा विद्युतीय सवारीसाधनको प्रयोग बढ्दै गएको अवस्थामा ग्राहकलाई बिक्रीपछिको सेवा सहज बनाउन सर्भिस नेटवर्क विस्तार गरिएको कम्पनीले जनाएको छ। यी दुई परियोजनाले बीवाईडीका ग्राहकलाई सवारीसाधनको मर्मतसम्भार तथा अन्य सेवा थप सहज रूपमा उपलब्ध गराउने अपेक्षा गरिएको छ। बीवाईडीको एसिया–प्यासिफिक अटो सेल्स डिभिजनका डेपुटी जनरल म्यानेजर झाङ जी र असिस्टेन्ट जनरल म्यानेजर तथा आफ्टर सेल्स प्रमुख फेङ एरदोङले भक्तपुरस्थित सर्भिस सेन्टर उद्घाटन गरेका हुन्। २५ हजार वर्गफिटभन्दा बढी क्षेत्रफलमा सर्भिस सेन्टर भक्तपुरमा निर्माण गरिएको नयाँ सर्भिस सेन्टर २५ हजार ७२.६० वर्गफिट क्षेत्रफलमा फैलिएको छ। यसलाई बिक्री, सर्भिस र स्पेयर पार्ट्ससम्बन्धी सुविधा एउटै स्थानबाट उपलब्ध गराउने ‘थ्रीएस’ सेन्टरका रूपमा विकास गरिएको हो। सेन्टरमा आठवटा सर्भिस बे रहेका छन्। तीमध्ये पाँचवटा सञ्चालनमा आइसकेका छन् भने बाँकी तीनवटा सवारीसाधनको सर्भिससम्बन्धी आवश्यकता बढ्दै जाँदा सञ्चालनमा ल्याइने कम्पनीले जनाएको छ। यसै स्थानमा सवारीसाधन बिक्रीका लागि शोरुम पनि चाँडै सञ्चालनमा आउनेछ। भक्तपुरको सांस्कृतिक तथा वास्तुकलागत पहिचानबाट प्रेरित भएर सर्भिस सेन्टरको डिजाइन तयार गरिएको कम्पनीले जनाएको छ। बीवाईडीको अन्तर्राष्ट्रिय ब्रान्ड मापदण्ड र स्थानीय सम्पदालाई जोड्ने उद्देश्यले यसलाई ‘बीवाईडी हेरिटेज शोरुम एन्ड सर्भिस सेन्टर’ अवधारणामा विकास गरिएको हो। डल्लुमा पनि सर्भिस नेटवर्क विस्तार भक्तपुरको सर्भिस सेन्टर उद्घाटनकै दिन काठमाडौंको डल्लुमा नयाँ सर्भिस सेन्टर निर्माणका लागि शिलान्यास गरिएको हो। डल्लुमा बन्ने सेन्टरले काठमाडौं उपत्यकामा बीवाईडीको बिक्रीपछिको सेवा क्षमता बढाउने कम्पनीको विश्वास छ। शिलान्यास कार्यक्रममा बीवाईडी एसिया–प्यासिफिक अटो सेल्स डिभिजनका प्रतिनिधिहरूसहित साइमेक्स इंकका अध्यक्ष अनिल श्रेष्ठ, प्रबन्ध निर्देशक यमुना श्रेष्ठ र प्रमुख कार्यकारी अधिकृत साहिल श्रेष्ठ सहभागी थिए। कम्पनीका अनुसार विद्युतीय सवारीसाधनको प्रयोग बढेसँगै दक्ष प्राविधिक जनशक्ति, सक्कली स्पेयर पार्ट्स र भरपर्दो मर्मतसम्भार सेवाको आवश्यकता पनि बढ्दै गएको छ। त्यसलाई ध्यानमा राख्दै नेपालमा बीवाईडीको सर्भिस पूर्वाधार विस्तारलाई प्राथमिकता दिइएको हो। भक्तपुरमा नयाँ थ्रीएस सेन्टर सञ्चालनमा आउनु र डल्लुमा निर्माण सुरु हुनुले ग्राहकलाई सवारीसाधन खरिददेखि नियमित मर्मतसम्भारसम्म सहज सेवा उपलब्ध गराउने कम्पनीको योजनालाई थप बल पुर्याउने अपेक्षा गरिएको छ।
